පුවත්පත්වලට ලිපි ලිවීම මාගේ විනෝදාංශයකි. මා ලියන ලිපි මගින් පාඨකයින් දැනුමක් ලබමින් ජීවිතයට යමක් එකතු කරගන්නේ නම් එය මාගේ සතුටකි. වේගයෙන් ඉදිරියට ඇදෙන තාක්ෂණික ලෝකයේ පුවත්පත් කියවන්නට තරම් විවේකයක් නොමැති අයවලුන් බොහෝය. තවකෙකු පුවත්පත් කියවන්නට කැමති නැත. අන්තර්ජාලයේ ද සිංහල බසින් සියලුම පුවත්පත් ඇති බැවින් තාක්ෂණයට ප්‍රිය කරන්නෝ පරිගණකයෙක් හෝ සිය ජංගම දුරකථනයෙන් ඒවා කියවති. එබැවින් මා ලියන ලිපි එවැනි පාඨක පිරිස් වෙත යොමු කරන්නට අදහස් කළ නිසා මෙවැනි බ්ලොග් අඩවියක් ගොඩනගන්නට සිතුවෙමි. මාගේ උත්සාහය කෙතරම් නම් සාර්ථකදැයි තීරණය වන්නේ ඔබගෙන් ලැබෙන ප්‍රතිචාර මතය. එබැවින් ඔබ මේ පිළිබඳ සිතන පතන දෑ මවෙත දන්වන්නට උනන්දුවන්නේ නම් එය මාගේ සතුටයි. ඔබ සැමට තෙරුවන් සරණයි!

Thursday, February 26, 2015

ජනපති ඉදිරියේ තිරුපති අගුල් වැටෙයි - Tirumala temple lock broken for Sri Lankan President



ජනාධිපති මෛත්‍රීපාල සිරිසේන මහතා සිය ඉන්දීය සංචාරය අතරතුරදී තිරුපති කෝවිල වැඳපුදාගෙන ඒමට ගිය බැව් ඉන්දියාව ඇතුළු බොහෝ ජාත්‍යන්තර මාධ්‍ය වාර්තාකොට තිබිණි. ඔහු තිරුපති හෙවත් ‛තිරුමාල ශ්‍රී වෙන්කතේෂ්වර කෝවිල’ වෙත ගොස් එහි පූජාවකට සහභාගී වන්නට සූදානමින් සිටි අවස්ථාවේ සිදුවූ අකරතැබ්බයක් පිළිබඳ ඉන්දියාවේ සුප්‍රකට පුවත්පතක් වන ‛ද ටයිම්ස් ඔෆ් ඉන්ඩියා’ හි වෙබ් අඩවියේ වාර්තාකොට තිබිණි. සිදුවීම මෙසේ ය. 

මෙම සිදු ඇත්තේ පසුගිය 18 වැනි බදාදා අලුයම 2.15ට පමණය. තිරුපති කෝවිලේ පූජකවරු ‛බංගරු වාකිලි’ හෙවත් ‛රන් දොරටුව’ විවෘත කිරීමට පැමිණෙන්නේ මේ වේලාවටය. වෙන්කතේෂ්වර දෙවිඳුන් වැඩ සිටින කුටියට ඇතුලුවීම සඳහා ඇති අවසන් දොරටුව මෙය වේ. දෙවිඳුන් වෙනුවෙන් දෛනිකව පැවැත්වෙන ප්‍රථම පූජාව වන මෙය ‛සුප්‍රාභතම් සේවා’ යනුවෙන් හඳුන්වනු ලබයි. එහි අරමුණ වන්නේ දෙවිඳුන්ව අවදිකරවීමය. 

මෙම පූජාව දෛනිකව අලුයම 3 ට පැවැත්වෙන අතර එයට මිනිත්තු 45කට පෙර පූජකවරු මෙතැනට පැමිණෙති. ඒ කුටිය විවෘතකොට පිරිසිදුකිරීම සඳහා ය. රන් දෙරටුව විවෘත කිරීම සඳහා විශේෂයෙන් සකස් කරන ලද යතුරු තුනක් තිබෙන අතර ඒවා එකම අවස්ථාවේදී අගුලු තුළට ඇතුළු කළ යුතුය. පසුගිය බදාදා සිදුවූයේ මෙසේ ඇතුළු කරන ලද මුල්ම යතුර අගුල තුළ සිරවීමය. එය ගළවා ගැනීමට නොහැකි වූ අතර අවසානයේ අගුළ බිඳ දෙැරටුව විවෘත කරන්නට බලධාරීන්ට සිදුවිය. 

සුප්‍රභාත්ම පූජාවට සහභාගී වනු පිණිස සිරිසේන ජනපතිවරයා සහ එම මහත්මිය ඒ වන විටත් දොරටුව අභියස පැමිණ සිට ඇත. අගුල සිරවුණු විගස කෝවිලේ බලධාරීහු වහා ක්‍රියාත්මක වී කියතකින් අගුල කපා අලුයම 3ට සුප්‍රභාත්ම පූජාව පැවැත්වීම සඳහා අවස්ථාව සළසා දී තිබේ. 

මෙයට පෙර දිනයේ මධ්‍යම රාත්‍රීයේ දෙවිඳුන් සඳහා දෛනිකව පවත්වනු ලබන අවසන් පූජාව වන ‛ඒකාන්ත සේවා’ අවසන් කිරීමෙන් පසුව ද මෙම අගුල් හොඳින් ක්‍රියාත්මක වූ බව එහි නියෝජ්‍ය විධායක නිලධරයෙක් වන චින්නාම්ගිරි රමානි පැවසූයේය. “නමුත් කුමක් හෝ හේතුවකට උදේ මේ අගුළ හිරවුණා නේ.” ඔහු පැවසූයේය. 

කෝවිලේ බලධාරීන් පවසන්නේ මෙම අගුල් විශේෂයෙන් තනවන ඒවා බවත්, එවැන්නක් සිදුවූ මුල්ම අවස්ථාව මෙය බවත් ය. “නැවතත් මෙවැනි යාන්ත්‍රික දෝෂ ඇති නොවීමට අප වග බලාගන්නවා. ” යැයි රමානා වැඩිදුරටත් පවසා සිටියේය. මෙම සිදුවීම නිසා දෙවිඳුන් වෙනුවෙන් විශේෂ පූජාවක් පැවැත්විය යුතු යැයි බැතිමතුන් අතර අදහසක් ඇති වූ මුත්, කෝවිල් බලධාරීන් පැවසූයේ එවැන්නක් අවශ්‍ය නොවන බවය. මෙම සිදුවීම නිසා සුප්‍රාභාත්ම පූජාව ප්‍රමාද වූ බවට ඇතැමුන් ප්‍රචාරයක් කළ ද එවැන්නක් සිදු නොවූ බව රමානි පවසා සිටියේය. 

‛ද ටයිම්ස් ඔෆ් ඉන්ඩියා’ වෙබ් අඩවියට අමතරව ‛ඉන්දියා ටුඩේ’ ‛ද හින්දු’ ආදී වෙබ් අඩවි ද මෙම සිදුවීම වාර්තා කොට තිබිණි. මෙම ප්‍රධාන වෙබ් අඩවිවලට අමතරව තවත් වෙබ් අඩවි ගණනාවක ද මෙම පුවත් පළව තිබුණි. 

ජ්‍යොතිෂය සහ අනෙකුත් ගුප්ත කටයුතු කෙරෙහි  පසුගිය කාලය මුළුලේම බොහෝ දෙනාගේ අතිශය විවේචනයට  එල්ල වූ බැව් අපි දනිමු. නමුත් දැන් පෙනෙන පරිදි යළිත් සිදුවන්නේ අතීතයේ සිදු වූ දෙයමය. ජ්‍යොතිෂයෙන් අනාවැකි පළකරන්නට නොහැකි බැව් දැන දැනත් යළිත් අනාවැකිකරුවන් මතුවෙමින් තිබෙන අතර ඔවුන්ට පෙර පරිදිම ප්‍රසිද්ධ මාධ්‍යවලින් සිය ‛කෙප්ප’ ඇදබෑමට අවස්ථාව සළසා තිබේ. හිටපු ජනපති මහින්ද රාජපක්ෂ මහතා වජ්‍රයක් අතේ දරා ජන ප්‍රසාදයක් දිනාගන්නට උත්සාහ කළ බැව් අපි දුටිමු. ඒ පිළිබඳ දේශපාලන නායකයන් විවිධ මට්ටමෙන් විවේචනය එල්ළ කරනු ලැබිණි. කෙසේ නමුත් වර්තමාන ජනාධිපතිවරයා ද එවැන්නක් අතේ දරා සිටිනු දක්නට හැකි විය. තිරුපති ගිය මහින්ද රාජපක්ෂ පිළිබඳ අවඥාවෙන් කතා කළ මාධ්‍ය මෛත්‍රීපාල සිරිසේන මහතා තිරුපති ගොස් සිදුවූ අකරතැබ්බය පිළිබඳ මාධ්‍යවලින් කතා කරනු නොඇසිනි. 

අවසානයේ පැවසිය හැක්කේ කෙතරම් විවේචනය එල්ල වුව ද ගුප්ත දේ පසුපස යන්නට ඇති ආශාව අපේ රටේ මිනිසුන්ගෙන් කිසිදා දුරස් නොවන බවය. එබැවින් අපේ රට තවදුරටත් පාලනය වනු ඇත්තේ සෞරග්‍රහ මණ්ඩලයෙන් සහ දෙවිවරුන්ගේ පිහිටෙනි. 

අතිරේක කියැවීම්

Tuesday, February 24, 2015

මෛත්‍රීත් මහින්දත් දෙන්නාම වැන්ද කෝවිල තිරුපති - Story of Lord Venkateswara temple in Tirumala



තිරුපති කෝවිල කියන්නේ ඉන්දියාවේ පිහිටා තිබෙන සුප්‍රකට, ඓතිහාසික වටිනාකමක් ඇති හින්දු සිද්ධස්ථානයක්. මෙහි බොහෝ හාස්කම් ඇති ස්ථානයක් ලෙස හින්දු බැතිමතුන් විශ්වාස කරනවා. මේ ගැන අප බොහෝ කාලයක් සිට යම් යම් කරුණු දැන සිටියත් පසුගිය ජනාධිපතිවරණය සමයේ වැඩිදෙනෙක් මේ ගැන කතා කරන්න පටන් ගත්තා. ඒ හිටපු ජනාධිපති මහන්ද රාජපක්ෂ මහතා සිය ජනාධිපතිවරණයෙන් ජයග්‍රහණය කරනු වස් පූජා පවත්වා බාරහාරවීමට මෙම කෝවිලට ගොස් තිබූ නිසයි. ඔහු එහි පූජාවන්ට සහභාගී වී සිටින ආකාරය පිළිබඳව විවිධ ඡායාරූප අන්තර්ජාලයේ පළව තිබුණා. ජනාධිපතිවරණය නිමවීමත්, එයින් මහින්ද රාජපක්ෂ මහතා පරාජය වීමත් නිසා මේ  පිළිබඳ මතකය ටිකෙන් ටික ගිළිහිලා ගියා. නමුත් නව ජනාධිපති මෛත්‍රීපාල සිරිසේන මහතාගේ ඉන්දීය සංචාරය අතරතුරේ තිරුපති වන්දනාවේ යන බැව් ප්‍රවෘත්තිවලින් පැවසුණු නිසා නැවතත් ඒ පිළිබඳ උනන්දුවක් ඇති වී තිබෙන බවක් පෙනෙනවා. 

තිරුමාල කන්ද

මෙය තිරුපති යනුවෙන් හැඳින්වූවත් නියම නම වන්නේ ‛තිරුමාල ශ්‍රී වෙන්කතේෂ්වර කෝවිල’ යන්නයි. එය ඉන්දියාවේ ආන්ද්‍රා ප්‍රදේශ්හි, චිට්ටූර් දිස්ත්‍රික්කයේ තිරුපති නම් කඳුකර නගරය ආසන්නයේ පිහිටා තිබෙනවා. තිරුපති නගරයට ආසන්නව ඇති නිසා එය වැඩි දෙනෙක් හඳුන්වන්නේ ‛තිරුපති කෝවිල’ නමින්. තිරුපති කෝවිල පිහිටා තිබෙන්නේ ‛තිරුමාල’ කඳු වැටිය මුදුනේ යි. තිරුමාල කන්ද මුහුදු මට්ටමේ සිට මීටර් 853ක පමණ උන්නතාංශයකින් පිහිටා තිබෙනවා. එම ප්‍රදේශය වර්ග කිලෝමීටර් 27කින් පමණ යුක්තයි. මෙම කන්ද මුදුන් හතකින් සමන්විතයි. හින්දු විශ්වාසයට අනුව එය සියලු සර්පයන්ට අධිපති රජු වන අදීෂගේ හිස් හත යැයි පැවසනෙවා. මෙම මුඳුන් හත සේසාද්‍රි, නීලාද්‍රි, ගරුඩාද්‍රි, අන්ජානාද්‍රි, වෘෂභාද්‍රි, නාරායනාද්‍රි සහ වෙන්කතාද්‍රි යනුවෙන් හඳුන්වනු ලබනවා. ක්‍රි.ව. 300 දී පමණ ඉදිකළේ යැයි සැළකෙන මෙම කෝවිල පිහිටා තිබෙන්නේ මේ අතරින් වෙන්කතාද්‍රි හෙවත් වෙන්කත් කන්දේ මුඳුන මතයි. මෙම කෝවිලට අධිගෘහිත හින්දු දෙවියා වන්නේ වෙන්කතේෂවරයි. ඔහු විෂ්ණු දෙවියන්ගේ එක් වේසයක් යැයි විශ්වාස කෙරෙනවා. බලාජි, ගෝවින්ද හා ශ්‍රීනිවාස යන නම්වලින් ද වෙන්කතේෂ්වර හඳුන්වනු ලබනවා. මෙම කෝවිල කෙළවර වන්නේ පූජනීය විලක් වූ ශ්‍රී ස්වාමි පුෂ්කර්නි හි එක් ඉවුරකින්. දකුණු ඉන්දීය ගෘහනිර්මාණ ශිල්පයට අනුව ඉදිකොට ඇති මෙහි දක්නට ඇති අක්ෂර සියල්ල ඇත්තේ දෙමළ බසින්. 

වෙන්කතේෂවර පිළිමය


තිරුපති කෝවිලේ පවතින්නේ යැයි පැවසෙන හාස්කම්වලට අමතරව මෙය ලොව පුරා ප්‍රසිද්ධියට පත්ව ඇත්තේ ලෝකයේ ඇති ධනවත්ම කෝවිල ලෙසයි. ලෝකයේ වැඩි දෙනෙක් සංචාරය කළ ස්ථානයක් වන නිසා මෙය අධික ලෙස විවිධ ප්‍රදානයන් ලැබෙනවා. මෙය කරා දිනකට වන්දනා කණ්ඩායම් වශයෙන් 50,000 - 100,000 දක්වා පැමිණෙනවා. වාර්ෂිකව පැමිණෙන වන්දනාකරුවන්ගේ සංඛ්‍යාව මිලියන 30 - 40 පමණ වෙනවා. වාර්ෂිකව පැවැත්වෙන බ්‍රහ්මෝත්සවම් පූජාව වැනි උත්සව සමයන්හිදී මෙයට දිනකට පැමිණෙන වන්දනා කණ්ඩායම් සංඛ්‍යාව ලක්ෂ 5ක් දක්වා ඉහළ යන බවයි පැවසෙන්නේ. මේ නිසා මොවුන්ගෙන් පූජා පිණිස ලැබෙන මුදල්, වෙනත් වටිනා භාණ්ඩ නිසා ලොව ඇති ධනවත්ම සිද්ධස්ථානය මෙය බවට පත්වීමේ පුදුමයක් නැහැ. 
මෙම දේවස්ථානය පිළිබඳ ප්‍රවාද කිහිපයක්ම පවතිනවා. එයින් එක් විශ්වාසයකට අනුව මෙහි පවතින වෙන්කතේෂ්වර පිළිමය පෘථිවිය බිහිවුණු කලියුගය මුළුල්ලේම මෙහි පැවතී තිබෙනවා. 



ලොව පුරා පැතිර පවතින විශ්වාසයන්ට අනුව මේ දේවාලයට බාරහාර වීමෙන් සියලු බලාපොරොත්තු ඉටුවන බවයි පැවසෙන්නේ. අප රටේ හිටපු රාජ්‍ය නායකයා නැවත ජනපතිවීමේ පැතුම නිසැකවම ඉටුවේ යැයි බලාපොරොත්තුවෙන් මෙයට බාරහාර වී පුද පූජා පවත්වන්නට ඇත්තේ ඒ නිසා විය යුතුයි. නමුත් මෙවර එවැන්නක් සිදුවූයේ නැහැ. 



හාස්කම්වලට අමතරව මෙය පිළිබඳ තවත් එක් රසවත් කතාවක් ද පවතිනවා. එය තිරුපති ප්‍රදේශයේ කවුරුත් දන්නා දෙයක්. මේ කතාව උරුළෑවන්ට සම්බන්ධයි. මෙම දේවාලයට සම්බන්ධව ඇති 12 වැනි සියවසට අයත් ලේඛනවලත් මෙම සතා ගැන සඳහන්ව තිබෙනවා. උරුළෑවා කියන්නේ අධික දුර්ගන්ධයක් ඇති සතෙක් වුවත්, මෙයින් හමුවන ඓතිහාසික ලේඛනවලට අනුව උගෙන් ලබාගත් ස්‍රාවයකින් පිළියෙල කරගත් තෙල් වර්ගයක් මිශ්‍ර කළ ජලයෙන් එකල සිටි රජවරු ස්නානය කරන්නට පුරුදුව සිටි බව පැවසෙනවා. මෙම තෙල් වර්ගය හඳුන්වනු ලබන්නේ ‛පුනුගු’ නමින්. රජවරු මෙසේ ස්නානය කරන්නේ සුවඳවත්ව සිටීමට බවයි පැවසෙන්නේ. මෙම තෙල් 14 වැනි සියවස පමණ වන විට ඉතා මිල අධික සුවඳ විලවුන් වර්ගයක් බවට පත්ව තිබුණා. මෑත ඉතිහාසයේදී මෙම තෙල් වර්ගය භාවිත කළේ එහි සෑම සිකුරාදා දිනකම පැවැත්වෙන වෙන්කතේෂවර පූජාවේදී එම දෙවිඳුන්ගේ පිළිමයේ ආලේප කිරීම සඳහායි. නමුත් උරුළෑවා වඳවීගෙන යන සත්වයෙක් ලෙස ලැයිස්තු ගතකිරීමේ ප්‍රතිඵලයක් ලෙස මෙම චාරිත්‍රයට බාධා පැමිනුණා. 




තිරුපති කෝවිල හයිද්‍රාබාද් සිට කිලෝමීටර් 579 ක්, චෙන්නායි සිට කිලෝමීටර් 86ක් සහ  බැංගලෝර්වල සිට කිලෝමීටර් 181ක්  දුරින් පිහිටා තිබෙනවා. අපේ රටේ සිට බොහෝ දෙනෙක් ඉන්දියාවට ගමන් කිරීමේදී තෝරාගන්නේ චෙන්නායි ගුවන් තොටුපල නිසාත්, එතැන් සිට කිලෝමීටර් 86ක් තරම් අඩු දුරක මෙය පිහිටා තිබීමත් නිසාත් මෙය නරඹා වැඳුම් පිදුම් කරගෙන එන්නට ඉතාම පහසුයි. තිරුපති කෝවිල නිසාම එහි ජාත්‍යන්තර මට්ටමේ ගුවන් තොටුපොළක් ද තිබෙනවා. එය පිහිටා ඇත්තේ තිරුපති නගරයේ සිට කිලෝමීටර් 14ක් දුරින්. ඔබ සැහැල්ලු බඩු බාහිරාදිය රැගෙන යනවා නම් පමණක් චෙන්නායි ගුවන් තොටුපල හරහා තිරුපති කරා ඉතා කෙටි වේලාවකින් ළඟාවන්න පුළුවන්. බඩුබාහිරාදිය වැඩිපුර අරන් යනවා නම් ඔබ යායුතු වන්නේ හයිද්‍රාබාද් ගුවන්තොටුපළටයි. 

එමෙන්ම චෙන්නයි සිට තිරුපති දක්වා දුම්රියෙන් මෙන්ම මහා මාර්ගය ඔස්සේ ද ගමන් කළ හැකියි. චෙන්නායි සිට පැය 3කින් පමණ ළඟා විය හැකි වුණත් හයිද්‍රාබාද් හරහා යනවා නම් පැය 10 -12 ක පමණ ගත විය හැකියි. 

මීට අමතරව තිරුපති කරා වන්දනා ගමන් සංවිධානය කරන විවිධ ආයතන බොහෝ ගණනක් චෙන්නායි ඇතුළුව ඉහත කී අනෙක් ප්‍රධාන නගර දෙකේ පවතිනවා. ඒවායෙන් ද ප්‍රයෝජන ගත හැකියි. නමුත් චෙන්නායි සිට ගුවනින් ගමන්කිරීම සඳහා කිසිදු මාර්ගෝපදේශකයකු අවශ්‍ය නැති බවයි කිව යුත්තේ. 



තිරුපති නගරය කරා ගමන් කරන බැතිමතුන්ට සහ සංචාරකයන්ට නවාතැන් සැපයීම සඳහා විවිධ මට්ටමෙන් ස්ථාන බොහොමයක් පවතිනවා. මෙම කෝවිල් භාරකාර මණ්ඩලය මගින් ඉදිකළ නවාතැන් ඉතාමත් අඩුමිලට ලබාගන්නට පුලුවන්. සාමාන්‍ය පහසුකම් සපයන කුඩා ප්‍රමාණයේ නවාතැනක් අපේ රටේ මුදලින් නම් රුපියල් 250 - 550 ත් අතර මිලකට ලබාගන්නට පුළුවන්. වායුසමීකරණය කළ කුඩා නවාතැන් අපේ රටේ මුදලින් රුපියල් 1280 - 1600 අතර මිලකට ලබාගන්නට පුලුවන්. මේ සඳහන් කළේ එක් දිනකට මිල ගණන්. මීට අමතරව තරු පංතියේ හෝටල් ද පවතිනවා. ෆෝර්චූන් සිලෙක්ට් ග්‍රෑන්ඩ් රිජ්, ආර්.ආර්. හවුස්, ෆෝර්චූන් කෙන්සස් හොටෙල් ආදිය මේ අතර පවතින අතර එක් රාත්‍රියක් සඳහා ඒවායේ මිල ගණන් අපේ රටේ මුදලින් රුපියල් 2000 - 6000 අතර පවතිනවා. 

ඔබ තිරුපති කරා ගමන් කරන්නේ නම් මීට අමතරව දැනගත යුතු කරුණු කිහිපයක්ම තිබෙනවා. ඒ එම ප්‍රදේශයේදී ඔබ හැසිරිය යුතු අන්දමයි. මෙය දහස් ගණන් වන්දනාකරුවන් පැමිණෙන ස්ථානයක් බව මුළින්ම මතකයේ තබා ගත යුතුයි. සිද්ධස්ථානයට ගැළපෙන ඇඳුම් ඇඳිය යුතුයි. මත්පැන් පානය නොකළ යුතු අතර මස් පමණක් නොව මාළු හා බිත්තර මෙම ප්‍රදේශයේදී පරිභෝජනයෙන් වැළකිය යුතුයි. කෙල ගැසීම හෝ අන්‍යන්ට කරදර වන ලෙස හැසිරීම නිසා ඔබ එහි නොසිටිය යුතු අයෙක් බවට බලධාරීන්ට පෙනී යන්නට පුළුවන්. කෝවිල තුළට ඇතුළුවීමේදී ජංගම දුරකතන හා කැමරා රැගෙන යාම තහනම්. කාන්තාවන් සාම්ප්‍රදායික ඉන්දීය සාරියකින් සැරසිය යුතුයි. එසේ නොමැති නම් සම්පූර්ණ සිරුර වැසෙන සේ පමණක් නොව ගෙල වැසෙන සේ සුදු රෙද්දක් ද ඔතා ගත යුතුයි. මේවා කෝවිලට ඇතුළුවන ස්ථානයෙන් අපේ රටේ මුදලින් නම් රුපියල් 180කට පමණ ලබාගන්නට පුළුවන්. 

මෙම ප්‍රදේශයේ ස්වභාවික ජලය කිවුල් ස්වභාවයෙන් යුක්ත බැවින් බෝතල් කළ ජලය පානය කිරීම වඩාත් සුදුසුයි. 

අවසන් වශයෙන් කිව යුත්තේ ඔබගේ ආගමික විශ්වාසය කුමක් වුවත් ඔබ සංචාරයේ යෙදෙන ආගමික ස්ථානයේ සම්ප්‍රදායයන්ට ගරුකරන්නට මතක තබාගත යුතු බවයි. 

අතිරේක කියැවීම්
ජනපතිවරයා ඉදිරියේ තිරුපති අගුල් වැටෙයි

Sunday, February 22, 2015

අනුන්ට රජකම දෙන්න තම අත පය කප්පවා ගත් සුභාදේව - Subhadeva who sacrificed own limbs to make a king



වර්තමානයේ අපේ රට ගත්තොත් දේශපාලනයට එන්නේ රටට සේවයක් කරන්නය කියලා කවුරු හරි කියනවා නම් ඒක කටින් විතරක නෙවෙයි වෙන වෙන තැන්වලිනුත් හිනායන්න පුලුවන් කතාවක්. හැම දේශපාලුවෙක්ම ඇවිත් රටට වඩා සේවයක් කරගන්නේ තමන්ටයි. ඒ නිසා තමන්ට බාධාවක් වෙන කෙනාගේ බෙල්ල කපලා හරි ඉස්සරහට එන්නයි දේශපාලුවෝ උත්සාහ කරන්නේ. ඒ කොහොම වුණත් වෙන කෙනෙකුට රජකම දෙන්න තමන්ගේ අත කපා ගත්ත අය ගැන කතා අපේ රටේ අතීතයෙන් හොයාගන්න පුලුවන්. ඒ ගැන තමයි මේ කියන්න යන්නේ. 

මේ කතාව ඇසෙන්නේ ක්‍රි.ව. 3 වැනි සියවසෙන්. 

ක්‍රි.ව. 209 දී රජ වූ වෝහාරික තිස්ස රජතුමා දයාවත්, යුක්තිගරුක භාවයත් නිසා ජනතාවගේ දැඩි ආදරයකට පාත්‍රව සිටියා. නමුත් ඔහුගේ මළනුවන් වූ අභයනාග කුමාරයා රජ බිසව සමඟ අනියම් සම්බන්ධයක් පැවැත්තුවා. මේ පළහිලව්ව රජතුමාට ආරංචි වුණු බව දැනගත්ත හැටියෙම අභයනාග කුමාරයා පැත්ත පළාතෙවත් ඉන්නේ නැතිව පැනලා ගියා. රුහුණේ තිබුණු ‛හල්ලතිත්ථ’ කියන නැව් තොටට පැමිණි ඔහු වෝහාරික තිස්ස රජු ගැන ජනතාවගේ සිතේ කළකිරීමක් ඇතිකරවන්නට උපායක් යෙදුවා. ඒ සඳහා ඔහුට අභයනාගගේ මවගේ සහෝදරයෙක්, ඒ කියන්නේ මාමා කෙනෙක් වූ ‛සුභාදේව’ ගේ උපකාරයත් ලැබුණා. 

අභයනාග කියනනේ වෝහාරික තිස්ස රජුගේ මළනුවන් බව නැව් තොටේ සිටි සියලු දෙනා දැන සිටියා. එහිදී අභයනාග හා සුභාදේව අමනාපයෙන් සිටින බවට එහි සිටින අයට පෙනෙන සේ හැසිරුණා. අභයනාග නිතරම තම මාමාට බැණ වදිනු එහි සිටින අය දුටුවා. දිනක් අධික ලෙස කෝප පෙනුමක් ආරූඪ කරගත් අභයනාග තම මාමාගේ අත්පා කපා දමන්න නියෝග කළා. මෙය ඔවුන්ගේ සැළැස්මේ කොටසක්. 

අත්පා කපා දැමූ පසු සුභාදේව කෙලින්ම ගියේ වෝහාරික තිස්ස රජු හමුවීමටයි. එහිදී තමා සමග ඇති අමනාපයක් නිසා අභයනාග විසින් තම අත්පා කපා දැමූ බව ඔහු රජු හමුවේ පවසා සිටියා. මේ ආකාරයට ඔහු රජ වාසලේ රැඳී සිටිමින් රජුගේ විශ්වාසය දිනාගත්තා. ඔහුට රජ මාලිගාවේ විශේෂ වගකීම් පවරන්නට ද රජතුමා පියවර ගත්තා. රට වැසියන්ට දයාව කරුණාව පෙන්වීම නිසා ඔවුන් පාලනය කළ නොහැකි බවත්, රටවැසියන් පාලනය කිරීම සඳහා තමා තුළ හොඳ සැළැස්මක් ඇති බවත් ඔහු පැවසුවා. ඒ අනුව සුභාදේවගේ සැලැස්ම ක්‍රියාත්මක වුණා. අවසානයේ සිදුවුණේ රජුටත් නොදැනී රටවැසියා තළාපෙලා දමන පාලනයක් බිහිවීමයි. මෙයින් සිදුවුණේ මෙතෙක් කල රජු ගැන පැහැදීමෙන් සිටි ජනතාව තුළ රජු කෙරෙහි කළකිරීමක් ඇතිවීමයි. 

මේ වෙනකොට අභයනාග සිටියේ ඉන්දියාවේ. වෝහාරික තිස්ස රජුගේ වැඩකටයුතු මොනවාදැයි සොයා බලන්නට ඔහු ලංකාවට චරපුරුෂයෙක්
(අභයනාගගේ බුද්ධි අංශ නිලධාරියෙක්) එව්වා.

රටවැසියන් රජු ගැන කළකිරීමෙන් සිටින බව දැනගත් ඔහු රජකම ලබැගැනීමට මෙය සුදුසු කාලය බව තේරුම් ගත්තා. දකුණු ඉන්දියාවෙන් සේනාවක් ද සංවිධානය කරගත් අභයනාග අනුරාධපුරය බලා පිටත් වුණා. රජුගැන කලකිරීමෙන් සිටි රටවැසියෝ රජු වෙනුවෙන් සටන්කිරීමට කැමැත්තක් දැක්වූයේ නැහැ. මේ සියලු විපත් ගෙනා බිසව ද රැගෙන අසු පිට නැගුණු රජු කඳුකරයට පළායන්නට පටන් ගත්තා. ඔහු පසුපස ලුහුබැඳ ගිය අභයනාග රජු මරා අනුරාධපුරයට පැමිණ රජ වුණා. ඔහු සිය බිසව බවට පත්කරගත්තේ වෝහාරික තිස්ස රජුගේ බිසවයි. අභයනාග වසර 22ක්ම රජකම් කළා. සුභාදේවටත් සළකන්න ඇති. නමුත් ඔහු ගැන විස්තරයක් හොයාගන්න පුළුවන් වුණේ නැහැ. 

ඉතිං මේවාට තමයි රාජකීය කුමන්ත්‍රණ කියන්නේ. ඒ කාලෙත් වුණා. අදත් වෙනවා. හෙටත් වෙයි.

Saturday, February 21, 2015

පිටපොත ගැන දන්නවාද? - What is called as Pitapotha



පොතකට පිටින් තව පොතක් තබා බැඳීමේ ක්‍රමයක් අනුරාධපුර රාජධානි සමයේ අගභාගයේ පමණ පැවතුණා. එසේ එක් දෙවැනි පොත හඳුන්වනු ලැබූයේ ‛පිටපොත’ නමින්.

මෙහිදී සිදුකෙරුනේ ප්‍රධාන පොතේ නොතේරනෙ තැන් පැහැදිලි කොට වෙනම පොතක් පිළියෙල කොට එය මෙසේ පිටින් සම්බන්ධකිරීමයි. මෙය පැරණි පුස්කොලපොත් ක්‍රමයක් විදිහට හඳුන්වනු ලබනවා. මේ විදහට සකස් කළ පොත් කිහිපයක්ම පවතිනවා. ‛පාලි කංඛාවිතරණියට’ ලියූ ‛කංඛාවිතරණි පිටපොත’, ‛නාමරූප සමාසය’ පිළිබඳ ලියූ ‛සිලි පිටපොත’, ‛රූප සිද්ධි පිටපොත’, ‛කසයින් පිටපොත’ මෙවැනි ඒවාට උදාහරණ ලෙස දක්වන්නට පුළුවන්. ‛කසයින් පිටපොත’ යනුවෙන් හඳුන්වනු ලබන්නේ පාලි කච්චායන ව්‍යාකරණ ලියැවුණාට පසු එහි අර්ථය පැහැදිලිකිරීම සඳහා ලියන ලද පිටපොත ලෙස සැළකෙනවා.

ගැටපද, සන්න ආදිය සහ  පිටපොතෙහි බොහෝ සමානත්වයක් දක්නට ලැබෙනවා. ඇතැම් අවස්ථාවලදී මේ සියලල විවිධ නම්වලින් හඳුන්වනු ලැබූ එකම පොත් වර්ගයක් ලෙස ද තේරුම් යා හැකියි. ගැටපද, සන්න පොත්වලින් කෙරෙන්නේ ද මුල් ග්‍රන්ථයම නැවත සරල අයුරින් තේරුම්කොට දීමයි. පිටපොතෙන් කෙරෙන්නේ ද එම කාර්යයම වුණත් මෙහි ඇති විශේෂත්වය මෙය ප්‍රධාන පොතටම බැඳ එය සමගම  පැවතීමයි.

මේ පොත් බිහිවූයේ ත්‍රිපිටක බුද්ධ ධර්මය හා අර්ථ කතා පාලිය (අට්ඨ කතා පාලි) සාමාන්‍ය ජනතාවට තේරුම්කොට දීම සඳහායි. කංඛාවිතරණී පිටපොතෙන් ඒ බව සනාථ වෙනවා. කංඛාවිතරණිය යනු විනය පිටකයේ ප්‍රාතිමෝක්ෂ කොටසට බුද්ධඝෝෂ හිමියන් සැපයූ අර්ථ කතාවයි.එය සෝම නම් භික්ෂූන් වහන්සේ නමක් කළ ඇරයුමෙන් ලියන ලද්දක් බව පැවසෙනවා. එම කතාව සාමාන්‍ය ජනතාවට තේරුම් ගැනීම පහසු කරනු සඳහා කංඛාවිතරණී පිටපොත පිළියෙල කොට තිබෙනවා. 

අතිරේක කියැවීම්





 

 
 

Thursday, February 19, 2015

ලුකානිකොස් - මානව අයිතීන් වෙනුවෙන් දිවි කැප කළ සටන්කාර සුනඛයා - A tribute to Loukanikos, the legendary Greek riot dog



ප්‍රවෘත්තියක් ලෙස මෙහි වටිනාකම පැරණි වුවද මෙහි ඇති කරුණු කිසිවකුට හෝ ප්‍රයෝජනයක් වේ යැයි සිතෙන නිසා මෙය බ්ලොගයේ පළකිරීමට අදහස් කළෙමි.

මානව හිමිකම් පිළිබඳව අපි නිතර කතා කරන්නෙමු. ඒ ලොව උතුම්ම සත්වයා මිනිසා නිසා විය හැකිය. කෙසේ නමුත් මෑත ඉතිහාසය තුළ දී මිනිසාට මෙන්ම සෙසු සතුන්ට ද මේ මිහිතලයේ සම අයිතියක් ඇතැයි සත්ව හිමිකම් සංවිධාන විසින් මහත් ප්‍රයත්නයකින් යුක්තව ඒත්තු ගැන්වීමෙන් පසු දියුණු ලෝකය සත්ව හිමිකම් පිළිබඳව ද කතා බහ කරනු දක්නට හැකි විය. කෙසේ නමුත් මානව හිමිකම් වෙනුවෙන් මෙන්ම සත්ව හිමිකම් වෙනුවෙන් ද වීදි බැස උද්ඝෝෂණය කළ යුතු එකම සත්වයා මිනිසා පමණක් විය. සතුන් කිසිදා තම හිමිකම් වෙනුවෙන් වීදි බැස උද්ඝෝෂණය කරනු අප අසා නැත. නමුත් මානව හිමිකම් වෙනුවෙන් වීදි බැස මිනිසුන්ගේ සටනට උරදෙමින් ඉමහත් කැපවීමක් කළ, මුල් පෙළේ වීදි සටන් ප්‍රමුඛයෙකු වූ සුනඛ වීරයකු පිළිබඳව සඳහන් කළහොත් එම පුවතෙහි ඇත්තේ කිසියම් අපූර්වත්වයකි.

අධික රාජ්‍ය ණය බර පියවා ගැනීම පිණිස ග්‍රීක රජය ක්‍රියාත්මක කළ අසාධාරණ ආර්ථික ප්‍රතිපත්ති හා ජාත්‍යන්තර මූල්‍ය අරමුදල සිය රට මත පැනවූ විවිධ නියමයන්ට එරෙහිව 2010 මැයි මාසයේදී එරට සාමාන්‍ය ජනතාව වීදි බසින්නට වූහ. මෙය වැඩි දිනක් ගතවන්නට පෙර මහා ජනතා රැල්ලක් බවට පත්විය. මේ පිළිබඳ ජාත්‍යන්තර මාධ්‍ය ඔස්සේ පුවත් පළවෙද්දී බොහෝ ඡායාරූප හා වීඩියෝ දර්ශනවල මේ උද්ඝෝෂණ මධ්‍යයේ නිතර දක්නට නොලැබෙන අමුතු ආකාරයේ සටන්කරුවකු ද සිටින බැව් පෙනෙන්නට තිබිණි. වැඩි දවසක් ගතවන්නට මත්තෙන් ජාත්‍යන්තර මාධ්‍ය මෙම ජනතා නැගී සිටීම පිළිබඳව පමණක් නොව උද්ඝෝෂකයන් මධ්‍යයේ සිටි මේ අමුත්තා හෙවත් සුනඛ සටන්කරුවා පිළිබඳව ද කතා බහ කරන්නට පටන්ගත්හ. මේ සුනඛයා සාමාන්‍ය ජනතාවගේ අරගල මර්දනයට පැමිණි පොලීසියට එරෙහිව දැඩිව සටන් වදිනු දක්නට හැකිවිය.



සැබැවින්ම මේ සුනඛයා කවරෙක්ද?

ඌ නමින් ලුකානිකොස්’ (Loukanikos) ය. මේ සුනඛයා  කුලවත්සුනඛ වංශිකයෙක් ද නොවේ. අප රටේ ව්‍යවහාරයට අනුව කිවහොත් නිකම්ම නිකම්ගම් බල්ලෙකි.  උපතේ සිටම මධ්‍යම ඇතන්ස් නගරයේ වීදි අතර අයාලේ ඇවිදිමින් සිටි මේ සුනඛයාට අරගලකරුවන් තැබූ නම වූයේ නිකිෆොරොස්ය. ජයග්‍රහණය රැගෙන එන්නායන්න එහි අරුත විය. තවත් පිරිසක් කැනෙලොස්නමින් ද ඌ හඳුන්වන්නට වූහ. ඒ 2008 වසරේ දී මිය ගිය තවත් සුනඛ උද්ඝෝෂකයකු සිහිවනු පිණිසය. නමුත් වඩාත් ප්‍රචලිත වූයේ මෙහි මුලින්ම සඳහන් කළ ලුකානිකොස් යන නමය. සොසේජස් කරලයන්න එහි අරුත විය. බොහෝ මාධ්‍යවල ලුකානිකොස් පිළිබඳව සඳහන්ව තිබුණේ  වැලි පැහැති සුනඛයාලෙසිනි.
ඇතන්ස් නුවර පැවැති මහජන උද්ඝෝෂණ අතරතුර මිනිසුන් සමඟ පෙරමුණේ සිටි ලුකානිකොස් ජාත්‍යන්තර මාධ්‍යයේ නිතර වාර්තා වුණු චරිතයක් විය. පොලීසිය විසින් උද්ඝෝෂකයන් වෙත එල්ල කළ දරුණු ප්‍රහාර අතරවාරයන්හිදී පවා මිනිසුන් අතැර නොයමින් මහත් ධෛර්යයයෙන් යුක්තව සටන් කරන ලුකානිකොස්ගේ රුව ලෝකයාට දැකගන්නට හැකිවිය. සිය උද්ඝෝෂක සඟයන්ගේ සැබෑ සතුරා වන පොලීසිය පැහැදිලිව හඳුනාගෙන ඔවුනට එරෙහිව තර්ජනාත්මක විරෝධය පාන්නට ලුකානිකොස් කිසිදු විටෙක පසුබට වූයේ නැත. උද්ඝෝෂකයන් ද සිය සුනඛ සගයා පිළිබඳ නිරන්තර සැළකිල්ලක් දක්වනු පෙනෙන්නට තිබිණි. බීබීසී, සීඑන්එන්, අල් ජසීරා සහ තවත් ප්‍රමුඛ පෙළේ ජාත්‍යන්තර මාධ්‍යවල සුලබ මාතෘකාවක් වූයේ ලුකානිකොස් ය. ජාත්‍යන්තර ටයිම්සඟරාව 2011 වසරේ ලොව ප්‍රබලතම පුද්ගලයන් 100 දෙනා අතරට ලුකානිකොස්ව ද තෝරාගෙන තිබිණි. ලුකානිකොස් වෙනුවෙන් ෆේස්බුක් පිටුවක් ඇති අතර මේ ලිපිය ලියන මොහොත වන විට එයට ලයික්හෙවත් කැමැත්ත පළ කරන අවස්ථා 48,436ක් ලැබී තිබිණි.


උද්ඝෝෂණ අතරතුරේ පොලීසියට එරෙහිව අරගල කරනවාට අමතරව ලුකානිකොස් කළ තවත් සුවිශේෂීතම මෙහෙවරක් වූයේ පොලීසිය විසින් උද්ඝෝෂකයන්ට එරෙහිව එල්ල කරනු ලබන කඳුළු ගෑස් බෝම්බ සිය මුවින් ඩැහැගෙන ගොස් වෙනත් තැනකට දැමීමය. මේ නිසා ඌ කඳුළු ගෑස් හා වෙනත් විෂ වායුවලට බෙහෙවින් නිරාවරණය වි තිබිණි. ඇතැම් උද්ඝේෂණ අවස්ථාවලදී ලුකානිකොස්ගේ දෑස් ජලයෙන් පොඟවා සෝදා දමන්නට ද උද්ඝෝෂකයන් ක්‍රියාකරනු දක්නට හැකිවිය.



කාලයක් තිස්සේ මෙසේ කඳුළු ගෑස්වලට නිරාවරණය වීම හා පොලීසියෙන්  එල්ල වූ දරුණු පාපහරවල් නිසා නිසා ලුකානිකොස් නිතර අසනීප විය. කෙසේ මුත් ඌ 2012 වසර දක්වාම අඛණ්ඩව විවිධ උද්ඝෝෂණ සඳහා සක්‍රියව දායක වනු දක්නට ලැබිණ. නමුත් අසනීප තත්වය පිළිබඳ සළකා බැලූ ලුකානිකොස්ට ආදරය කරන්නෝ ඌ එක් පවුලක රැකවරණයට පත්කරන්නට අදහස් කළහ. මේ අයුරින් ඌ නම හෙළිකරන්නට අකැමැති පවුලක සාමාජිකයන්ගේ රැකවරණයෙහි ජීවත්වන්නට පටන් ගත්තේය. සාමාන්‍යයෙන් සුනඛයකු වසර පහළොවක් පමණ ජීවත් වුව ද ලුකානිකොස්ගේ දුර්වල සෞඛ්‍ය තත්වය නිසා ඌට එතරම් කාලයක් මිනිසුන් අතර රැඳී සිටින්නට වරම් ලැබුණේ නැත. 2014 ඔක්තෝබර් 9 වැනිදා සිය අවසන් සමයේ ස්වාමියාගේ උකුළෙහිම ලුකානිකොස් අවසන් හුස්ම හෙළූ බැව් ප්‍රවෘත්ති ඔස්සේ ප්‍රචාරය විණි. ඒ වන විට ලුකානිකොස් දස හැවිරිදි වියෙහි පසුවිය.

මේ පුවතින් ඉමහත් සංවේගයට පත් ලුකානිකොස්ට ආදරය කළ දහස් ගණනක් දෙනා සමාජ ජාල වෙබ් අඩවි ඔස්සේ සිය ශෝකය ලියා තබන්නට උත්සුක වූහ.


ලුකානිකොස් වීර සුනඛයාගේ සිරුර ග්‍රීසියේ ඇතන්ස්හි කඳු ගැටයක් මත ගසක සෙවණේ මිහිදන් කරනු ලැබිණි. ලුකානිකොස් උද්ඝෝෂණය කළේ තමාට කිසිදු ප්‍රතිලාභයක් බලාපොරොත්තුවෙන් නොවේ. ඒ වසර දහස් ගණනක් තිස්සේ මිනිසා හා සුනඛයා අතර පවතින ශුද්ධ වූ මිත්‍රත්වයේ නාමයෙනි. මිනිසුන් අතරෙහි වූ සිය මිතුරන් හා සතුරන් හඳුනාගන්නට ලුකානිකොස්ට අපූරු ඉවක් තිබිණි. අතීතයේ ද මිනිසුන් වෙනුවෙන් මෙවැනි කැපකිරීම් කළ උදාර සුනඛයෝ සිටියහ. අනාගතයේද බිහිවනු ඇත. එසේ බිහිවන සුනඛයන් අතර ගම්බද පෙළපතට අයත් සාමාන්‍ය සුනඛයෝ ද ඕනෑ තරම් සිටිය හැක. ඒ කෙසේ හෝ ලොව දියුණු මිනිසුන් සත්ව අයිතීන් වෙනුවෙන් කතා කරන්නට පෙළඹෙන යුගයක මානව අයිතීන් වෙනුවෙන් උදාර මෙහෙවරක් කොට තම දිවිය ද කැප කළ  ලුකානිකොස් පිළිබඳ මතකය මිනිස් හදවත් තුළ සදානුස්මරණීය වනු නිසැකය.