ලෝකයේ කුඩාම නත්තල් ගස් - World's Smallest Xmas Trees

මේ දවස්වල හැමෝම කතා කරන්නේ ලෝකයේ ලොකුම නත්තල් ගහ ගැන. ඒක හදන්න ගිය මුදල් කන්දරාව ගැන. සමහරෙක් හොඳ කියනවා. තවත් සමහරෙක් නරක කියනවා. මේක හොඳ හෝ නරක් වෙලා තියෙන්නේ මේ සඳහා අධික මුදලක් වියදම් කරන්න සිදුවුණු නිසානේ. මේ තරම් වියදම් නොකර නත්තල් ගස් හදලා ලෝකයේ ගෞරවයට පාත්‍ර වුණු අයත් ඉන්නවා. ඒ අය හැදුවේ ලොකු ඒවා නෙවෙයි.පොඩි ඒවා. පොඩි කියන්නේ පොඩීඩීඩීඩීඩීම ඒවා. ඒ කියන්නේ ලෝකයේ කුඩාම නත්තල් ගස්. රුපියල් අස්සේ අලුක්කාල් ගහනවා කියලා කාට හරි හිතෙයිද දන්නේ නෑ. කෝකටත් මේක කියවන එකෙන්අඩුපාඩුවක් නම් වෙන එකක් නෑ.

මේ තියෙන්නේ විලාර්ඩ් විගන්ස් හදපු ලෝකයේ පුංචිම නත්තල් ගස. ඒකේ තියෙන්නේ නත්තල් ගසක් සහ කුඩා දැරියක්. මේක චිත්‍රයක්. චිත්‍රය කොයි තරම් කුඩා ද කියනවා නම් ඉඳකටු සිදුරක දාන්න පුළුවන් තරමට පොඩියි. ඒ කියන්නේ මිලිමීටරයකිනුත් ඉතා කුඩා කොටසක් තරමට කුඩයි. මෙය නිර්මාණය කොට ඇති විලාර්ඩ් විගන්ස් කියන්නේ බර්මින්හැම්වල මූර්ති ශිල්පියෙක්. අන්වීක්ෂණයක් තුළින් බලමින් මැරුණු මැස්සෙකුගේ රෝම කෙන්දකින් තමයි ඔහු මේ සිතුවම ඇඳලා තියෙන්නේ. 2017 ජනවාරි 31 වෙනතුරු මේ කුඩාම නත්තල් ගස එංගලන්තයේ නොටින්හැම් වල ෆ්‍රියර් ලේන් කලාගාරයේ මේක ප්‍රදර්ශනය වෙනවා.

ඒ වගේම මොරියාර්ටි (ෂර්ලොක් හොම්ස් කතාවක එන කෙනා නෙවෙයි) කියන මහාචාර්යවරයා ද ලෝකයේ කුඩාම නත්තල් ගසක් නිර්මාණය කොට තිබෙනවා. ඔහු මේ සඳහා භාවිත කොට ඇත්තේ නැනෝ ලිතෝග්‍රැෆි කියන තාක්ෂණයයි. ඔහු සිලිකන් මතුපිටකින් හයිඩ්‍රජන් අණු 42ක් ඉවත්කිරීමෙන් මේ නිර්මාණය කොට තිබෙනවා. මේ සඳහා ඔහු යොදා ගත් මතුපිට නැනෝමීටර් 20ක් වෙනවා. නැනෝ මීටරයක් කියන්නේ මීටරයකින් බිලියනකින් එක පංගුවක් වෙනවා. එතකොට මේ සඳහා යොදා ගත්ත මතුපිට මීටරයකින් බිලියකින් පංගු 20 ක් වෙනවා. ඔහු සිදුකොට ඇත්තේ නත්තල් ගසක හැඩය එන පරිදි හයිඩ්‍රජන් අණු 20ක් ඉවත් කිරීමයි. කොහොම වුනත් මේ සිද්ධිය නම් වාර්තා වෙන්නේ 2014න්.

මේ වගේ කුඩාම නත්තල් ගස් හදපු කතන්දර තව ඕනෑ තරම් ඇති. හැමෝම ලොකු නත්තල් ගස් ගැන විතරක් කතා කරන එකෙන් කුඩාම අයට අසාධාරණයක් වෙයි කියා සිතුණු නිසා ඒවා ගැනත් මේ විදිහට කතා කරන්න හිතුවා. 

ටැලිගිරැං හුටපට කතා

මේ වෙන්නප්පුවට කිට්ටුව බොරලැස්ස පැත්තේ පැරණි කතාවක්.

මේ පැත්තේ මනුස්සයෙක් හිටියා පේදුරු කියලා. මේ මනුස්සයා කරපු රස්සාවල්වලින් එකක් තමයි පොල් ලෙලි එකතු කරපු එක. මේ පැත්තේ පොල් ලෙලිවලට කිව්වේ ‘පොල් මට්ටා’ කියලයි. ඒ නිසාම මේ මනුස්සයාව අඳුනගෙන හිටියේ ‘මට්ට පේදුරු’ කියලයි.

මට්ට එකතු කරන රස්සාවෙන් වාසියක් නැති නිසා ටිකක් ඈත කැලෑ පළාතක ලී ඉරුම් වාඩියක උයන්න යන්න මිනිහා තීරණය කළා. දැන් ඉතිං මට්ට පේදුරු ඉරුම් වාඩියක උයන අප්පු විදිහට ඔන්න වැඩ කරන්න පටන් ගත්තා.

මාසයක් දෙකක් වැඩ කරලා දවස් කීපයකට ගමට එන එක මට්ට පේදුරුගේ පුරුද්දක්. මෙහෙම ආපු එක වතාවක මිනිහගේ නමට විදුලි පණිවිඩයක් ආවා. හැබැයි මේක මිනිහ අතට දෙන්න විදුලි පණිවිඩය අරන් ආපු තැපැල් පියුං මහත්තයාට සෑහෙන වදයක් විඳින්න සිද්ධ වුණා. ඒකට හේතුව වුනේ මේකයි.

විදුලි පණිවිඩය ලියපු තැපැල් කන්තෝරුවේ තැපැල් මහත්තයා මට්ට පේදුරු කියන නම ඉංග්‍රීසියෙන් ලියපු නිසයි. ඉතිං විදුලි පණිවිඩයේ තිබුණේ මෙන්න මෙහෙම අපභ්‍රංශ නමක්.

Husk Peter

Boralessa

Lunuwila

Husk කියන්නේ ඉංග්‍රීසියෙන් පොල් ලෙල්ලට, එහෙමත් නැත්නම් මට්ටයට කියන නම. Peter කියන්නේ පේදුරු කියන එකේ ඉංග්‍රීසි නම. ඉතින් කවුද මේ Husk Peter කියන සුද්දා කියලා ගමේ හැමෝගෙන්ම ඇහුවා. ඒත් හොයා ගන්න පුළුවන් වුනේ නෑ. අවසානයේදී ගමේ හිටි දැන උගත් කෙනෙක් යන්තම් හොයා ගත්තා මේ Husk Peter කියන්නේ වෙන කවුරුවත් නෙවෙයි මට්ට පේදුරු තමයි කියලා.

අන්තිමේදී මට්ට පේදුරුට විදුලි පණිවිඩය ලැබුණා කියමුකෝ. මේකේ විදුලි පණිවිඩයත් තිබුනේ ඉංග්‍රීසියෙන්. මොකක්ද පණිවිඩේ?

Bring pair of Sows

Sow කියන්නේ ඊරි නේ. අර කලින් දැන උගත් කෙනාම මේකත් විසඳලා දුන්නා. ඉතිං මට්ට පේදුරු කල්පනා කළා ඊරියෝ දෙන්නෙක් ඉරුම් වැඩියට මොකටද කියලා. මොනව වුනත් කියපු දේ අරන් යන්නත් ඕනිනේ. ඒ කාලේ කෝච්චියේ සත්තු අරන් යන්න පුළුවන් නිසා පුත්තලමට යන කෝච්චියේ පොඩි පහේ ඊරියෝ දෙන්නෙක් දාගෙන මට්ට පේදුරු ඉරුම් වාඩියට උන්ව අරන් ගියා.

ඉරුම් වාඩියේ බාස්ට ඊරියෝ දැකලා ඌරු ජුවල් ගියාලු. මිනිහා තැපැල් කන්තෝරුවට කියලා තියෙන්නේ

‘කියත් ජෝඩුවක් ගේන්න’

කියලයි. මේක එහේ තැපැල් කන්තෝරුවෙන් කියලා තියෙන්නේ

Bring pair of saws කියලයි. කොහොම වුනත් මේක බොරලැස්සට එනකොට Saws කියන එක Sows වෙලා. ඔන්න ඔහොම තමයි මට්ට පේදුරු Husk Peter වුනෙත් කියත් ජෝඩුව ඊරියෝ ජෝඩුවක් වුනෙත්.

මේ වගේම විදුලි පණිවිඩ හුටපටයක් තවත් පළාතක වෙලා තියෙනවා.

එක මනුස්සයෙක් විවාහ වුණු අලුත් ඈත පළාතකට ගුරු පත්වීමක් ලැබුනාලු. ඉතිං අලුත බැඳපු මනමාලි ගෙදර දාලා ඉස්කෝල මහත්තයා ඈත පළාතේ ඉස්කෝලෙට ගියා. මනමාලිගේ තනියට හිටියේ ඉස්කෝල මහත්තයාගේ තාත්තා විතරයි.

ඉස්කෝල මහත්තයාගේ තාත්තා ටිකක් වයස වුනත් පොඩි මනමාල ගතියකුත් තිබුණලු. දවසක් ඉස්කෝල මහත්තයාගේ තාත්තා අලුත් මනමාලි ළඟින් දවස් දෙක තුනක් වාඩි වුනාලු. එනපොට හරියන්නේ නෑ කියලා දැනුණු මනමාලි මේක ඉස්කෝල මහත්තයාට දැනුම් දෙන්න හිතුවලු. මාමණ්ඩිගේ මනමාලකම ගැනත් කියන්න ඕන නිසා පොඩි කොල කෑල්ලක පණිවිඩයක් ලියලා ගෙවල් ළඟ ඉන්න පොඩි දරුවකුට දීලා කිව්වලු ‘මෙන්න මේක තැපැල් කන්තෝරුවේ මහත්තයාට දීලා කියන්න ටෙලිග්‍රෑම් එකක් ගහන්න කියලා’

පණිවිඩය මේකයි.

‘තාත්තා වලා. වහාම එන්න’

තාත්තාගේ මනමාල කම කෙටියෙන් කියන්න තමයි ‘තාත්තා වලා’ කියලා ලියලා තියෙන්නේ. ඒත් තැපැල් මහත්තයා හිතලා තියෙන්නේ මේක වැරදීමකින් ලියපු එකක්ය, හරි ගස්සලා ලියන්න ඕන කියලා මෙන්න මෙහෙම ලිව්වලු.

‘තාත්තා මළා. වහාම එන්න’.

මම හිතන්නේ කතා‍වේ ඉතිරි ටික කියන්න ඕන වෙන්නේ නෑ.

අලුත් ලෝකයට අලුත් ගැජට් 15 කොටස - New Gadgets for New World Part 15

මේක තමයි අලුත්ම වතුර බෝතලේ

අපට ලොකු ජල හිඟයක් නැතත් පිරිසිදු ජලය බොන්න කැමති බොහෝ දෙනෙක් කොහේ ගියත් වතුර බෝතලයක් අරන් යන එක නම් දැන් පුරුද්දක් වෙලා. උණුකරලා නිවාගත්ත ජලය වුනත් සම්පූර්ණයෙන්ම සෞඛ්‍ය සම්පන්නයි කියන්න බැහැ. ඒ නිසා මේ අලුත්ම වතුර බෝතලය ගැන දැනගෙන ඉන්න එක හොඳයි. මේක හඳුන්වන්නේ Black+Baum Eau Good Water Bottle නමින්. සෞඛ්‍යයට හිතකර, ඉතා සැහැල්ලු ප්ලාස්ටික් වර්ගයකින් නිමවා ඇති නිසා මෙය බරින් ද ඉතාමත් අඩුයි. ඒ විතරක් නෙවෙයි මේ බෝතලේ ඇතුලේ සක්‍රීය බින්කොටාන් කියල ගල් අඟුරු වර්ගයෙන් සාදන ලද පෙරහනයක් තියෙනවා. බින්කොටාන් කියන්නේ ජපන් භාෂාවෙන් ‛සුදු ගල් අඟුරු’ කියන තේරුම තියෙන වචනයක්. ජපන් වැසියන් 17 වැනි සියවස තරම් ඈත කාලයක පටන් ජලය පිරිසිදු කරගන්න මේ බින්කොටාන් කියන ගල් අඟුරු විශේෂය භාවිත කරලා තියෙනවා. ජලයේ ඇති ක්ලෝරීන් අවම කරලා එයට අවශ්‍ය ඛනිජ ලවණ කොටස් එකතු කරන්නත් ජලයේ තිබිය යුතු නිවැරදි පී.එච් මට්ටම (pH level) පවත්වා ගන්නටත් මේ පෙරහනයට පුළුවන්. මේ නිසා තමන් පානය කරන්නේ නිසැකැවම පිරිසුදු ජලය කියලා ඔබට සහතික වෙන්න පුළුවන්. සැහැල්ලු ප්ලාස්ටික් වර්ගයක් වුනත් ඉතාමත් ශක්තිමත්ව නිපදවා ඇති මෙහි මිල ඇමරිකානු ඩොලර් 18.95 (රුපියල් 2,816) වෙනවා.

ස්මාර්ට් වයර් කෝඩ් එකක්

හැමදේම ස්මාර්ට් වෙන එකේ වයර් කෝඩ් එකටත් එයින් ගැළවෙන්න බැහැ. Orvibo COCO කියන්නේ මේ විදිහට ස්මාර්ට් ආකාරයෙන් නිපදවපු වයර් කෝඩ් එකක්. මෙයට සාමාන්‍ය ප්ලග් හෙවත් කෙවෙනි තුනක් සම්බන්ධ කරන්න පුළුවන්. ඒ වගේම යූ.එස්.බී. කෙවෙනි දෙකක්ද තිබෙන නිසා ජංගම දුරකතන ආරෝපණය කරගන්නටත් පුළුවන්. මෙයින් ලැබෙන ප්‍රයෝජනය මෙය පමණක් නෙවෙයි. මෙය හා ඔබගේ ස්මාර්ට් ජංගම දුරකතන අතර සම්බන්ධතාවයක් ගොඩනගා ගත හැකි නිසා මෙයට සම්බන්ධ කොට ඇති විවිධ උපකරණවල තත්වය ඔබගේ ජංගම දුරකතනයෙන් පරීක්ෂා කරන්නටත්, ඒවායේ ක්‍රියාකාරීත්වය පාලනය කරන්නටත් පුළුවන්. මෙහි මිල ඇමරිකානු ඩොලර් 64.86 (රුපියල් 9,639) වෙනවා.

සුවඳ හමන අත් පළඳනාවක්

අත් පළඳනා එහෙමත් නැත්නම් දන්න විදිහට කිව්වොත් බ්‍රේස්ලට් කියන්නේ බොහෝ දෙනෙක් පළඳින්න ප්‍රිය කරන දෙයක්. රන්, රිදී වගේම වෙනත් ලෝහවලින් තනන ලද ඒවා, විවිධ ප්‍රමාණයන්ගෙන්, විවිධ මිල ගණන් යටතේ මිලට ගන්නට පුළුවන්. නමුත් මේ කතා කරන්න සැරසෙන අත් පළඳනාව මේ හැම එකක්ටම වඩා වෙනස්. මෙය Lockstone Solaris Fragrance Infused Bracelet නමින් හඳුනවනවා. නමින්ම කියැවෙන පරිදි මේක සුවඳ හමන අත් පළදනාවක්. ගැහැනු පිරිමි භේදයක් නැතිව පළඳින්න පුළුවන්. මෙය නිපදවා ඇති ද්‍රව්‍යයට ඕනෑම සුවඳක් උරාගැනීමේ හැකියාව තිබෙනවා. ඒ නිසා ඔබ කළ යුත්තේ ඔබේ ප්‍රියතම සුවඳ විලවුන් වර්ගය මෙම අත් පළඳනාවට විදීම පමණයි. මෙයට එම සුවඳ උරාගෙන ඔබ අවට සුවඳවත් කරන්නට මෙයට හැකියාව තිබෙනවා. මෙහි ඇති අනෙක් විශේෂත්වය තමයි ඔබේ සුවඳ විලවුනයේ සුවඳ පවතින කාලය මෙන් සත් වාරයක කාලයක්  සුවඳ රඳවාගන්නට මෙයට ඇති හැකියාවයි. මෙය නිෂ්පාදනය කළ විශේෂඥයන් පවසන්නේ මෙය පසුපස ඇති ක්‍රියාකාරීත්වයේ රහස කේශාකර්ෂණ ක්‍රියාවලිය බවයි. මෙහි මිල ඇමරිකානු ඩොලර් 44ක් (රුපියල් 6,552ක්) වෙනවා.

පෙර ලිපිය

අලුත් ලෝකයට අලුත් ගැජට් 14 කොටස - New Gadgets for New World Part 14

ඊළඟ ලිපිය
අලුත් ලෝකයට අලුත් ගැජට් 16 කොටස - New Gadgets for New World Part 16

අලුත් ලෝකයට අලුත් ගැජට් 14 කොටස - New Gadgets for New World Part 14

එළවළු පලතුරු ආරක්ෂාවට අලුත් ක්‍රමයක්

එළවළු සහ පලතුරුවල නැවුම් බව පවත්වාගෙන යන්න අපි කරන්නේ ඒවා ශීතරකණයකට දාලා තියන එක. නමුත් එය එතරම් සාර්ථක නැති බව පෙනෙන්නට තියෙන්නේ ඇතැම් විට මේවායේ ඇති තෙතමනය ඉවත් වන නිසයි. මේ ගැටලුවට විසඳුමක් විදිහට අලුත් උපකරණයක් දැන් හඳුන්වා දී තිබෙනවා. මෙය හඳුන්වන්නේ Water Shade නමින්. මෙය ආහාර වසා තබන වට්ටියක පෙනුමට සමානයි. නමුත් විනිවිද පෙනෙනවා. අප යමක් මෙයින් වසා තබන විට එය තුළ ඔක්සිජන් හා ජල වාෂ්ප යහමින් පවතින ආකාරයටයි සකස් කොට තිබෙන්නේ. මේ නිසා මෙය වඩා සුදුසු එළවලූ සහ පලතුරු සඳහායි. විදුලි බලයෙන් ක්‍රියාත්මක වන මෙය තුළ ඇති ඔක්සිජන් ප්‍රමාණය එයින් පිටත වායුගේාලයේ පවතින ප්‍රමාණයට වඩා වැඩි බවයි පැවසනේනේ. කාබන් ඩයොක්සයිඩ් පිටවන ලෙසත්, විෂබීජවලට ඇතුළු විය නොහැකි ලෙසත් මෙය සකස් කොට තිබෙනවා. නමුත් ජලයට සහ ඔක්සිජන්වලට මෙයට ඇතුළු විය හැකියි. මේ සියල්ල පාලනය වන්නේ මෙහි ඇති අධෝරක්ත කිරණ සංවේදකය ඔස්සේයි. මේ නිසා ඔබට ශීතකරණයට වඩා හොඳින් එළවළු සහ පලතුරුවල ඇති නැවුම් ස්වභාවය ආරක්ෂා කරගන්න මෙය උපකාරී වෙනවා.

ජලයෙන් දැල්වෙන පහනක්

සාමාන්‍යයෙන් අපි දන්නා දේ තමයි ජලයෙන් පහන් පත්තු කරන එක කොහොම වුනත් ජලය නිසා පහන් නිවී යන බව. නමුත් මේ WAT පහන වෙළෙඳ පලට පැමිණි අවස්ථාවේ ඉඳන් ඒ කතාව දොරමුල්ලට විසි කරන්න සිද්ධ වෙනවා. මෙහි ඇත්තේ ‛හයිඩ්‍රෝ ඉලෙක්ට්‍රික් (hydroelectric) බැටරියක්. ඒ කියන්නේ ජලයෙන් විදුලිය නිෂ්පාදනය වන බැටරියක්. මේ නිසා පහන පත්තු කරන්න නම් එයට ජලය දැමිය යුතුයි. ජලය දැමූ විට එය තුළ විද්‍යුත් රාසායනික ප්‍රතික්‍රියාවක් ඇතිවී ආලෝකට ඇති වෙනවා. පරිසර හිතකාමී ආකාරයෙන් ආලෝකය ජනනය කරගන්න මිනිසා දරන නිරන්තර උත්සාහයට මෙය හොඳ විසඳුමක් වේවි.

ක්ෂණික කුඩ වියලනය

මොර සූරන වැහි කාලේට ගමනක් බිමනක් ගිහින් ආවට පස්සේ කුඩේ වේලෙන්න කොහේ හරි තැනකින් හුළං වදින්න තියන්න ඕන. එහෙම නැත්නම් ඒක ආයේ බෑග එකට දාගන්න වෙන්නේ නෑ. මේ ගැටලුව අපට විතරක් නෙවෙයි ලෝකයේ හැමෝටම බලපාන දෙයක්. අන්න ඒ නිසයි පහසුවෙන් කුඩ වියළාගන්න පුළුවන් උපකරණයක් නිෂ්පාදනය වෙලා තියෙන්නේ. මේ උපකරණය Swan Umbrella Dryer නම් වෙනවා. කාර්යාලවල, වෙනත් පොදු ස්ථානවල මෙය සවිකොට තැබිය හැකියි. කුඩය එය තුළට බස්සවා තැබිය හැකි ආකාරයෙන් සකසා තිබෙනවා. මේ උපකරණ තුළ ඇති යාන්ත්‍රික ක්‍රියාකාරිත්වය මගින් කුඩයේ ඇති සියලු ජලය එයට උරා ගන්නවා. මෙසේ උරා ගන්නා ජලය වෙනත් තැනක ගබඩා කොට වෙනත් වැඩකටයුතු සඳහා වුවත් යොදා ගන්න පුළුවන් බවයි එහි නිෂ්පාදකයෝ පවසන්නේ. තමා ඉදිරියේම තත්පර කිහිපයක් ඇතුළත කුඩය වියැළෙන නිසා වැඩි වේලාවක් බලා සිටින්නට අවශ්‍ය වෙන්නේත් නැහැ.

පෙර ලිපිය‍
අලුත් ලෝකයට අලුත් ගැජට් 13 කොටස - New Gadgets for New World Part 13

පසු ලිපිය
අලුත් ලෝකයට අලුත් ගැජට් 15 කොටස - New Gadgets for New World Part 15

ජයලලිතා - ශෂිකලා අසම්මත ප්‍රේමය සහ තමිල්නාඩු දේශපාලනය

ඉන්දියාවේ තමිල්නාඩු ප්‍රාන්තයේ මහ ඇමතිනියව සිටි ජයලලිතා පසුගියදා මිය ගියාය. නිළියක ලෙසින් හඳුනාගත් ඇය මිය ගියේ ප්‍රබල දේශපාලන චරිතයක් ලෙසිනි. හිටපු දකුණු ඉන්දීය නළුවකු වූ එම්.ජී. රාමචන්ද්‍රන්ගේ නොනිල බිරිඳ ලෙස ප්‍රකටව සිටි ඇය ඔහුගේ මරණින් පසු ඔහුගේ උරුමය වු සමස්ත ඉන්දීය අන්නා ද්‍රවිඩ මුන්නේත්‍ර කසාගම් පක්ෂයේ නායිකාව බවට ද පත්වූවාය. ඇගේ දේශපාලන ජීවිතය පසුපස සිටි දැවැන්තම සෙවනැල්ල වූයේ රාමචන්ද්‍රන් වුවත්, ඇතැම් විට ඔහුට ද වඩා ඇයට බලපෑම් කළ තවත් චරිතයක් ලෙස ශෂිකලා නට්රාජන් පිළිබදව සඳහන් කළ හැකිය. ජයලලිතා සහ ශෂිකලා අතර පැවැති සමීපත්වය කෙතරම් ද යත් එය අසම්මත ඇසුරක් දක්වා දුරදිග ගොස් පැවැති බව ප්‍රසිද්ධ කරුණකි.  ජයලලිතාගේ මරණින් පසුව  ඔවුන්ගේ මේ අසම්මත ඇසුර පිළිබඳ කතා මතුවන්නට පටන් ගෙන තිබේ.

ශෂිකලාගේ සැමියා වූ ආර්. නට්රාජන් තමිල්නාඩු රජයේ තාවකාලික පදනම යටතේ මහජන සම්බන්ධතා නිලධරයකු- ලෙස සේවය කළ අයෙකි. ඔහු දිස්ත්‍රික් අයබදු එකතු කරන්නිය වූ චන්ද්‍රලේඛා සමඟ ඉතා සමීපව වැඩකටයුතු කළේය.  චන්ද්‍රලේඛා එවකට මහ ඇමතිව සිටි රාමචන්ද්‍රන්ට ඉතා සමීපව සිටි තැනැත්තියක විය.

රාමචන්ද්‍රන් සහ ජයලලිතා අතර පැවැති සමීප සබඳතාවය නිසා ඔහු නිතරම උත්සාහ කළේ සිය දේශපාලන උරුමකාරිය බවට ජයලලිතා පත්කිරීමය. ජයලලිතා වටා බොහෝ පිරිසක් අකාර්ෂණීය වීම මෙයට බලපෑ ප්‍රබලතම හේතුව විය. එහි මුල් පියවර වශයෙන් රාමචන්ද්‍රන් විසින් ජයලලිතා සිය පක්ෂයේ ප්‍රචාරක ලේකම්වරිය බවට පත් කළේය.

ශෂිකලා චිත්‍රපට පිළිබඳ උනන්දු වූ තැනැත්තියක බැවින් අමතර ආදායමක් උපයා ගනු වස් වීඩියෝ පට කුලියට දීමේ ව්‍යාපාරයක් ආරම්භ කළාය. එමෙන්ම කුඩා විඩියෝ කැමරාවක් ගෙන අසල්වැසියන්ගේ මංගල උත්සව ආදිය වීඩියෝ ගත කර යම් ආදායමක් උපයාගන්නට පටන් ගත්තාය. ජයලලිතාගේ වීඩියෝ චිත්‍රපටයක් රූප ගත කරන්නට මේ කාලයේ ශෂිකලාට සිතුණි. ඇය සිය සැමියාට පැවසූවේ චන්ද්‍රලේඛා ලවා මේ සඳහා අවස්ථාව සලසා ගන්නා ලෙසය. චන්ද්‍රලේඛාගේ කුඩා පුතු වූ අභිජීත් බලා කියා ගන්නා වැඩකටයුතු සිදු කළේ ශෂිකලා වූ බැවින් ඇයට මෙම ඉල්ලීම මග හරින්නට හැකියාවක් තිබුණේ ද නැත.

චන්ද්‍රලේඛා විසින් ශෂිකලාව ජයලලිතා හට හඳුන්වා දුන් අතර ඔවුහු දුටු සැනින් මිතුරියන් බවට පත් වූහ. ජයලලිතා සහ ශෂිකලා හමුව සිදුවූයේ ඒ අයුරිනි. කාලයත් සමග ජයලලිතාගේ ඉතා විශ්වාසවන්තම මිතුරිය බවට පත් වූයේ ශෂිකලාය. ජයලලිතාගේ යහපත් කාලවලදී පමණක් නොව අයහපත් කාලවලදී ද ශෂිකලා ඇය සමඟ සිටියාය.

1987 වර්ෂයේ ජයලලිතාගේ මරණයත් සමඟ ජයලලිතා මහත් කැලඹීමකට පත් වූ ඇය රාමචන්ද්‍රන්ගේ බිරිඳ වූ ජානකීගේ රූකඩයක් බවට පත්වූවාය. කෙසේ මුත් තමා ජානකීගේ හිංසනයන්ට ලක්වන බව ජනතාවට පවසමින් තමාට පැවැති ජනප්‍රසාදය ඔස්සේ වැඩි කාලයක් ගතවන්නට මත්තෙන් තමිල්නාඩු ප්‍රාන්තයේ මහ ඇමතිනිය බවට පත්වන්නට සමත් වූවාය.

පසුව ජයලලිතාගේ ආධාරකරුවන් විසින් ගෙන ආ දෝෂාභියෝගය හමුවේ පරාජයට පත්වූ ජානකීට පක්ෂය පවා අහිමිව ගියේය. ජයලලිතා මහ ඇමතිනිය ලෙසත් රාමචන්ද්‍රන්ගේ දේශපාලන උරුමකාරිය ලෙසත් පෙරමුණටම පැමිණියාය. ජයලලිතාගේ ප්‍රබලත්වය සමග ශෂිකලාගේ තත්වය ද ප්‍රබල විය. සැබැවින්ම පැවසුවහොත් ඇය ජයලලිතාට ද වඩා ප්‍රබල තැනකට පත් වූවාය. ඇමතිවරුන් ඇතැම් විට කෙළින්ම විධාන ලබාගත්තේ ශෂිකලාගෙනි.

ජයලලිතාගේ ජීවිතය වට කොට සිටියේ ශෂිකලාගේ ඥාතීන්ය. ඇයගේ සියලු ඕනෑ එපා කම් ඉටු කරන්නට ඔවුහු සැදී පැහැදී සිටියහ. ඉන්දියානු දේශපාලඥනයකු වූ සුබ්‍රමනියම් ස්වාමි මෙය හඳුන්වා දුන්නේ ‛මන්නාර්ගුඩි මාෆියාව’ ලෙසිනි. මන්නාර්ගුඩි යනු ශෂිකලා උපන් ගමය.

1989 දී ජයලලිතා මහ ඇමතිනිය බවට පත්ව සිටි සමයේ ශෂිකලා සිය ගම වූ මන්නාර්ගුඩියේ සිට සේවකයන් 40 දෙනෙක් ජයලලිතාගේ නිවසේ වැඩකටයුතු කිරීම සඳහා රැගෙන ආවාය. ජයලලිතාගේ සේවිකාවන්, අරක්කැමියන්, රියැදුරන් ආදී සියලු දෙනා ශෂිකලාගේ ගමෙහි පිරිස විය. ජයලලිතාගේ ආනුභාවයට පින් සිදුවන්නට 1996 වන විට ශෂිකලා ඇතුළු ඥාතීහු ඉතා ධනවතුන් බවට පත්ව සිටියහ. ශෂිකලා ඇතුළු ඥාතීන් අයථා ක්‍රම මගින් මුදල් උපයන බවට තොරතුරු  තමිල්නාඩු ප්‍රාන්තය පුරා පැතිර ගියේය. 1996 මැතිවරණයෙන් ජයලලිතා පරාජයට පත්වීමට මෙය ප්‍රබල හේතුවක් විය.

කෙසේ නමුත් 1998 දී ජයලලිතා නැවත තමිල්නාඩු මහ ඇමතිනිය බවට පත්වූවාය. ඒ එවක ඉන්දීය අගමැති වූ අතල් බිහාරි වජ්පායිගේ ජාතික ප්‍රජාතන්ත්‍රවාදී සන්ධානය සමග එක්වීමෙනි. කෙසේ නමුත් අගමැතිවරයාගේ පක්ෂයේ සිටි ප්‍රමෝද් මහ්ජාන් සහ බරේෂ් මිශ්‍රා, මන්නාර්ගුඩි මාෆියාව පිළිබඳ කතා නැවත හාරා අවුසන්නට වූහ. කෙසේ නමුත් ශෂිකලාගේ පවුලේ පැවැති අධික ධන බලය හමුවේ ප්‍රමෝද් මහජාන් වැනි දේශපාලනඥයන් ද පසුබා ගිය බැව් පෙනෙන්නට තිබිණි.  මහජාන් අවසානයේ සිදු කළේ ශෂිකලාව නොසළකා හැරීම. කෙසේ මුත් එම නොසළකා හැරීම මහ විනාශයක් බවට පත් වූ බව පෙනුණේ ශෂිකලා සෝනියා ගාන්ධි සමඟ එක්වීමත් සමගිනි. ශෂිකලා 1999 වසරේදී නවදිල්ලියේ අශෝක හෝටලෙයේ තේ පැන් සාදයක් සංවිධානය කළේය. මෙයට අනුග්‍රහ දැක්වූයේ සුබ්‍රමනියම් ස්වාමිය. ඔහු එයට අනුග්‍රහය දක්වන්නට හේතුව වූයේ එවක අගමැති වජ්පායි ඔහුව කැබිනට් ඇමැතිකමක් ලබාදීම ප්‍රතික්ෂේප කිරීම නිසාය.  ජයලලිතාගේ පක්ෂය වජ්පායීගේ රජයෙන් ඉවත් වූ අතර වජ්පායීගේ රජය බිඳ වැටුණි. 2003 වසරේදී අධිකරණය නියෝගයකින් ජයලලිතා නැවත බලයට පැමිණිය ද 2006 වසරේදී යළි පරාජයට පත්වූවාය. මේ සියලු ජය පරාජයන්හීද ශෂිකලා නොසැලී ජයලලිතා සමග සිටියාය.

2011 දී ජයලලිතා නැවත බලයට පැමිණියාය. ශෂිකලා තමිල්නාඩු මහ ඇමතිනිය බවට පත්කිරීම සඳහා මේ සමයේ ශෂිකලාගේ මන්නාර්ගුඩි මාෆියාව සැලසුම් කළේය. එයට හේතුව වූයේ බැංගලෝර් උසාවියේදී අසමින් පැවැති වත්කම් නඩුවේ තීන්දුව නිසා ජයලලිතාට සිරගත වන්නට සිදුවනු ඇතැයි ඔවුන් සිතූ බැවිනි. ජයලලිතාගේ කල්‍යාන මිත්‍රයකු වූ එවකට ගුජ්රාත් මහ ඇමතිව සිටි  නර්න්ද්‍ර මෝඩි, මන්නාර්ගුඩි මාෆියාව පිළිබඳ ජයලලිතාට අනතුරු ඇඟවූවේය. තමිල්නාඩුව කරා පැමිණෙන ආයෝජකයන්ගෙන් ශෂිකලාගේ පිරිස විසින් කප්පම් ලබාගන්නා බැවින් ඔවුන් ආයෝජනයන් අමතක කොට දමා තමිල්නාඩුව අතහැර යන බව ද හෙළි කළේය. එමෙන්ම ඔවුන් තමාට වස දෙන්නට කුමන්ත්‍රණයක් කරන බවට දූෂමාන ආරංචියක් ද ජයලලිතාගේ කණ වැකුණි. ඉමහත් භීතියට පත් ජයලලිතා, වෛද්‍ය පරීක්ෂණ කිහිපයක් සිදුකරගැනීම සඳහා ශෂිකලාට ද නොකියා වෛද්‍යවරයකු හමුවන්නට ගියාය. එහිදී හෙළිවූයේ ඇයට සුළු ප්‍රමාණයකින් ආසනික් අඩංගු වේදනා නාශක ලබාදී තිබුණු බවය. මේ වන විට ජයලලිතාගේ නිවසේ සේවය කළේ ශෂිකලාගේ හෙදියකි. ඇයගේ සියලු කෑම බීම භාරව සිටියේ ඇය ය. ජයලලිතාගේ ඉවසීමේ රතු කට්ට පැන්නේ මේ සමයේදීය. යම් හෙයකින් තමා සිරගතවුවහොත් තම ‛පුටුව’ ශෂිකලාට ලබාදීම සඳහා පැවැති කුමන්ත්‍රණ කතා බහ පිළිබඳව ද ඇයට දැනගන්නට ලැබිණි.

2011 දෙසැම්බර් 17 වැනිදා ජයලලිතා කෙවිට අතට ගත්තාය. ඇය මන්නාර්ගුඩි කල්ලියට සිය නිවසින් පටවන ලෙස අණ කළාය. ශෂිකලාව ද පක්ෂයෙන් නෙරපා දැමුවාය. අයථා ක්‍රම මගින් මුදල් ඉපැයූවේ යැයි චෝදනා කරමින් ශෂිකලාගේ ඇතැම් ඥාතීන් සිරභාරයට ද පත් කෙරිණි.

දශක කිහිපයක් තිස්සේ ජයලලිතා සහ ශෂිකලා අතර පැවති, ඉන්දීය දේශපාලනයේ ‛අසමසම’ සමීප සබැඳියාවට කණකොකා හැඩුවේ ඒ අයුරිනි. නමුත් මේ විරසකය වැඩි කාලයක් පැවැතියේ නැත. 2012 මාර්තු මාසයේදී ජයලලිතා නැවත ශෂිකලා සිය සමීපයට ගත්තාය. ඇය එවර පැවසූවේ ශෂිකලා සහ ඇගේ පවුලේ පිරිස තමාට එරෙහිව කුමන්ත්‍රණයක් කළ බව තමා නොදන්නා බව හා එවැනි කටකතා විශ්වාස නොකරන බවය.

තමාගේ ජීවිතය පවා අවදානමේ හෙළන ලද ශෂිකලා නොමැතිව ජයලලිතාට ජීවිතය ඉදිරියට රැගෙන යාම මේ තරම් දුෂ්කර වූයේ මන්ද යන්න කිසිවකු දන්නේ නැත. ජයලලිතා මිය ගිය බැවින් ඇගෙන් ඒ පිළිබඳව දැනගන්නට හැකියාවක් ද නැත. ශෂිකලා කිසිදා එවැන්නක් හෙළිකරතැයි සිතිය නොහැකිය. ශෂිකලාගේ සිතෙහි දැන් බලපවත්වනවා ඇත්තේ තමිල්නාඩු මහ ඇමති සිහිනය බව නිසැකය. ජයලලිතාගේ නිසල දේහය අසල ශෂිකලා නිරතුරු රැඳී සිටිමින් ලෝකය හමුවේ පැවසුවේ තමා ඇයට සිටි එකම ආරක්ෂකයා තමාය යන්න පමණක් නොව, “අම්මා ගියාය - ශෂිකලා දිනේවා” යන්න විය හැකිය. 

මේ සම්බන්ධ තවත් ලිපියක්

ජයලලිතාගේ පැටිකිරිය මෙන්න

ලෝකයේ මිටිම යුවල කසාද බැන්දා - World's shortest couple wedding

ලෝකයේ අරුම පුදුම දෑ සැබැවින්ම අරුම පුදුම බව කවුරුන් පැවසුව ද ගිනස් ලෝක වාර්තා කමිටුව නිල වශයෙන් පිළිගන්නා තෙක් එය අරුම පුදුම දෙයක් වන්නේ නැත. පසුගිය නොවැම්බර් 17 වැනිදා ගිනස් වාර්තා කමිටුව ලෝකය හමුවේ නිල වශයෙන් දැනුම් දුන්නේ ලෝකයේ මිටිම විවාහක යුවල තමා හමුවීමට පැමිණි බවත්, ඔවුන් ලෝකයේ මිටිම  යුවල ලෙස තම කමිටුව විසින් නිල වශයෙන් පිළිගත් බවත්ය. මේ නිසා ලෝකයේ මිටිම විවාහක යුවල පිළිබඳ කිසිඳු සැකයකින් තොරව මේ තොරතුරු ඉදිරිපත් කරන්නට හැකියාව තිබේ.

ඔහු 31 හැවිරිදි බ්‍රසීල ජාතිකයකු වූ පෝලා ගේබ්‍රියෙල් ද සිල්වා බැරෝස් වන අතර උසින් අඟල් 35.54 (සෙන්ටිමීටර 90.28) වන අතර ඇය 26 හැවිරිදි බ්‍රසීල ජාතික කාන්තාවක වන කැටියුෂියා ලයි හොෂිනෝ වන අතර උසින් අඟල් 35.88 (සෙන්ටිමීටර 91.13) ක් වේ. ඔවුන් දෙදෙනාගේම උසෙහි එකතුව අඟල් 71.42 (සෙන්ටිමීටර 71.42) ක් හෙවත් අඩි 5 අඟල් 11ක් පමණ වේ.

ලෝකයේ මිටිම යුවල ලෙස ගිනස් වාර්තාව පිහිටුවීමෙන් පසු ඔවුහු මාධ්‍ය හමුවේ සිය කතාව දිගහැරියහ.

“මම මුල්ම වතාවට ඇයව දුටු වෙලාවේ ඉඳලාම ඇය සමඟ ආදරයෙන් බැඳුණා’ යැයි පෝලා පැවසූව ද ඔහුගේ සහකාරිය වන කැටියුෂියා පවසන්නේ තමාව ඔහුව මුළින්ම ප්‍රතික්ෂේප කළ බවකි. නමුත් කෙසේ හෝ ඔහු ඇගේ සිත දිනාගැනීමට සමත් වූවේය.

ඔවුන් මුළින්ම හමුවී ඇත්තේ කතාබහකිරීමේ (chat online) වෙබ් අඩවියක් වන මයික්‍රොසොෆ්ට් සමාගම හරහා ක්‍රියාත්මක වන එම්.එස්.එන්. මෙසෙනේජර් (MSN Messenger) සේවාව ඔස්සේය. පෝලා ඇයට මිතුරු යෝජනාවක් ගෙන ආ මොහොතේ ඇය ඔහුව සිය මිතුරු ලැයිස්තුවෙන් අවහිර කොට දැමුවාය. ඔහුගේ පෙනුම සහ අදහස් හුවමාරු කරගන්නා ආකාරයෙන් ඇයට සිතුනේ පෝලා යනු කරදරකාරයකු ලෙසිනි. ඇය ඔහුව මේ ආකාරයට මාස 18ක කාලයක් අවහිර කොට දමා තිබිණි.

“දවසක් මොන හේතුවක් නිසා ද මන්දා මට හිතුණා ඔහුට දාලා තිබුණු අවහිරතාවය අයින් කරලා දාන්න.”

කැටියුෂියා පැවසුවාය. ඇගේ මිතුරු ලැයිස්තුවේ තමාට තිබුණු අවහිරතාවය ඉවත් කොට ඇති බව දැනගෙන මිනිත්තුවක් ගත වන්නටත් පෙර ඔහු ඇයව අන්තර්ජාලය ඔස්සේ ඇමතුවේය.

දින කිහිපයක් මෙසේ ‛චැට්’ කිරීමෙන් පසු සැබෑවටම හමුවිය යුතු යැයි ඔවුන්ට සිතෙන්නට ඇත. මේ නිසාම 2008 දෙසැම්බර් 20 වැනිදා 20 වැනිදා ඔවුහු එකිනෙකා හමුවූහ. පෝලා මේ සඳහා තමා උපන් ප්‍රදේශය වන ඉටාපේවා සිට කිලෝමීටර 180ක් දුර ගෙවා කැටියුෂියාගේ උපන් ප්‍රදේශය වන ලොන්ඩ්‍රිනා කරා පැමිණියේය. ඇගේ සුන්දරත්වය දැක තමා විස්මයට පත්වූ බව පෝලා පවසයි. කෙසේ නමුත් ඔහු සඳහන් කරන්නේ ඇය ඉතා ලජ්ජාශීලි කාන්තාවක වූ බවය.

ටික දිනක් ඇසුරුකිරීමෙන් පසු දෙසැම්බර් 29 වැනිදා ඔවුහු පෙම්වතුන් බවට පත් වූහ. සෑම මාස දෙකකට වරක්ම පාහේ හමුවෙමින්, ආදර හැඟීම් බෙදා හදා ගනිමින් ඔවුහු දිගුකාලීන ආදර සම්බන්ධයක් පවත්වාගෙන ගියහ.

“මම මීට කලින් ආදර සම්බන්ධතාවයක් තිබිලා නෑ. පෝලා කියන්නේ මගේ පළමු ආදරවන්තයා.”

කැටියුෂියා පවසන්නීය.

2012 ජනවාරි මාසයේදී කැටියුෂියා තීරණය කළේ තමාගේ උපන් ප්‍රදේශය වන ලොන්ඩ්‍රිනා අතහැර පෝලාගේ උපන් ප්‍රදේශය වන ඉටාපේවා කරා යා යුතු බවය. පෝලා රජයේ සිවිල් සේවකයකු වූ අතර කැටියුෂියා සතුව රූපලාවන්‍යාගාරයක් තිබිණි. ඔවුහු එක්ව ජීවත්වන්නට පටන් ගත්හ.

අවුරුදු 21 සපිරෙන තෙක් පෝලාට ඇවිදීමේ හැකියාව තිබුණේ නැත. ඔහු තනිව ඇවිදීමට ආධාරකයක් ලෙස කුඩා දරුවන් සෙල්ලම් කරන ට්‍රයිසිකලයක් භාවිත කළ අතර විසිවැනි වියට පමණ එළැඹෙද්දී රෝද හතරකින් යුක්ත ආධාරකයක් යොදාගත්තේය. පසුව ඔහු රෝද හතරකින් යුක්ත මෝටර් රථයක් වැනි යාන්ත්‍රික වාහනයක් සිය ගමන් බිමන් සඳහා යොදාගන්නට පටන් ගත්තේය. ඉන්පසුව ඔහු තමාට පැදවිය හැකි ආකාරයට මෝටර් රථයක් වෙනස්කොට පිළියෙල කරවා ගත්තේය. කැටියුෂියා ද සිය රූපලාවන්‍යාගාරය පවත්වාගෙන යන්නේ ඉතා සුවිශේෂී ආකාරයකිනි. එහි සෑම දෙයක්ම පිළියෙල කොට ඇත්තේ ඇගේ උසට සරිලන පරිදිය.

පෝලා පවසන්නේ තමා උපන් ප්‍රදේශය වන ඉටාපේවාවල නගරාධිපති තනතුරට තරගකිරීමේ බලාපොරොත්තුවක් තමා තුළ තිබෙන බවය.

“අපි දෙන්නත් අනෙක් අය වගේම සාමාන්‍ය අය. අපට අඩුවකට තියෙන්නේ උස විතරයි.” ඔහු පවසයි.

සමාජය හමුවේ තමා නිතරම පාහේ යම් යම් අපහසුතාවයන්ට ලක්වන බව ඔවුහු පවසති. පොදු වැසිකිලියකට යන සෑම අවස්ථාවකදීම පාහේ අන්‍යයන්ගේ සිනහවට ලක්වන බවත්, මහ මග ඇවිද යද්දී සියලු දෙනා තමා දෙසට ඇඟිල්ල දිගුකොට අමුතු සතෙක් දෙස බලන්නා වැනි හැඟීමකින් අවධානය යොමුකරන බවත් ඔවුහු පවසති.

“මම කවදා හරි විවාහ වෙලා අපේම ගෙදරක ජීවත්වෙන එක ගැන සිහින මැව්වා. දැන් ඒක ඉටු වුණා. ඒත් මට තියෙන දුක මට දරුවෙක් ලබන්න බැරි එක. මගේ ගර්භාෂය දරුවෙක් දරාගන්න තරම් කුඩා වැඩියි. නමුත් හැමදේම නියම කාලෙට මේ වුණා වගේ සිද්ධ වෙයි. කොහොම වුනත් අපේ ජීවිතේ තියෙන සතුට කිසිම දෙයකින් නැතිකරගන්න මම කැමති නෑ.”

කැටියුෂියා පවසන්නීය.