පොම්පියෝ කියන්නේ කවුද?

මේ දිනවල අපට නිතර ඇසෙන්නට වූ නමක් තමයි ‘පොම්පියෝ’ කියන්නේ. එයට හේතුව වුණේ ඔහු පැය කිහිපයකට අපේ රටේ සංචාරයකට පැමිණීමත්, ඒ පැමිණීම පසුපස කුමක් හෝ කුමන්ත්‍රණයක් පවතින බව නන් දෙසින් ඇසෙන්නට වීමත් නිසයි. ඇත්තටම මේ පොම්පියෝ කියන්නේ කවුද?

මයිකල් රිචඞ් පොම්පියෝ කියන්නේ ඇමරිකානු දේශපාලඥයෙක්, රාජ්‍ය තාන්ත්‍රිකයෙක්, ව්‍යාපාරිකයෙක් සහ නීතිඥයෙක් හැටියට හඳුන්වා දෙන්නට පුළුවන්. 2018 අප්‍රේල් මාසයේ සිට අද දක්වා ඔහු ඇමරිකා එක්සත් ජනපදයේ 70 වැනි රාජ්‍ය ලේකම් ලෙස කටයුතු කරනවා. හිටපු හමුදා නිලධාරියකු වන ඔහු 2017 අප්‍රේල් මාසයේ සිට 2018 අප්‍රේල් මාසය දක්වා ඇමරිකානු ඔත්තු සේවය වන සී.අයි.ඒ. ආයතනයේ අධ්‍යක්ෂවරයා ලෙස කටයුතු කළා. ඔහු දක්ෂ බුද්ධි නිලධාරියකු ලෙස ද ප්‍රකටයි. 

කෙසේ නමුත් ඇමරිකාව තුළ නම් ඔහු ප්‍රකටව  ඇත්තේ අසාර්ථක රාජ්‍ය නිලධාරියකු ලෙසයි. විශේෂයෙන් කොවිඞ් 19 වසංගතය ඇතිවීමත් සමග ලෝකයේ සෙසු රටවල් සමග සහයෝගීව කටයුතු කොට ඇමරිකාව තුළ මෙය ව්‍යාප්ත වීම වළක්වා ගන්නවා වෙනුවට රටවල් සමග අමනාප වීම් සිදු කළ බව ඇමරිකානුවන්ම චෝදනා කරනවා. චීනයේ වුහාන් හි රසායනාගාරයක් තුළ කොව්ඩි 19 වෛරසය කෘත්‍රිමව නිපදවූ බවට වූ පුවත නිර්මාණය කරන ලද්දේ ඔහු විසින් බව ඇමරිකානු ජනමාධ්‍යම පවසා සිටිනවා. 

වොෂිංටන් පෝස්ට් පුවත්පත පවසා සිටියේ ඇමරිකානු ඉතිහාසයේ සිටි අසාර්ථකම, අදක්ෂම, නරකම රාජ්‍ය ලේකම්වරයා මොහු බවයි. කොව්ඩි 19 ට එරෙහි සටනේ දී ඔහු ඒ සඳහා ක්‍රියාකාරී ලෙස සහයෝගය පළ නොකළ බවයි පැවසෙන්නේ.  ඇමරිකානු රාජ්‍ය ලේකම්වරයා ලෙස ඔහුට පැවරී තිබුණු බලය ඔහු භාවිත කළේ මන්ද බුද්ධික ස්වභාවයෙන්. ඔහු එහි දී කළේ වෛරසය සමග සටන් කරනවා වෙනුවට ලෝකයේ රටවල් සමග මතවාදී යුද්ධයක් ආරම්භ කිරීම පමණයි. 

කොවිඞ් වසංගතය නිසා දැඩි වෛද්‍ය අවශ්‍යතාවයක පැවති ඉරානයට උපකාර කරන ලෙස බොහෝ දෙනෙක් ඇමරිකාවෙන් ඉල්ලා සිටිය ද එය ඉටු නොවුණේ පොම්පියෝ නිසා බව පැවසෙනවා. ඉරානයට උපකාර කරනවා වෙනුවට ඔහු කළේ එරටට එරෙහි සම්බාධක තවතවත් දැඩි කිරීම පමණයි. 

දැඩි ට්‍රම්ප් හිතවාදියකු වූ පොම්පියෝ,  අපේ රට තුළ කොවිඞ් නැවත හිස ඔසවන කාලයක පැය කිහිපයකට පමණක් පැමිණීම පිළිබඳ විවිධ පාර්ශ්ව එල්ල කරන චෝදනාවල සත්‍යයක් නැතිවා විය නොහැකියි. 

ඇමරිකානු ජනතාව ගැන හෝ නොසිතන, අසාර්ථක රාජ්‍ය නායකයකු වන ඔහු ට්‍රම්ප් වෙනුවෙන් ඕනෑම දෙයක් කරන්න පසුබට නොවන පුද්ගලයකු ලෙස ද ප්‍රකටයි. එසේ හෙයින් ඔහුගේ ශ්‍රි ලංකා ගමන ට්‍රම්ප් වෙනුවෙන් කරනා ‘පිම්පි’ කාර්යයක් වන්නට ඇති ඉඩකඩ ද බොහොමයි.