පුවත්පත්වලට ලිපි ලිවීම මාගේ විනෝදාංශයකි. මා ලියන ලිපි මගින් පාඨකයින් දැනුමක් ලබමින් ජීවිතයට යමක් එකතු කරගන්නේ නම් එය මාගේ සතුටකි. වේගයෙන් ඉදිරියට ඇදෙන තාක්ෂණික ලෝකයේ පුවත්පත් කියවන්නට තරම් විවේකයක් නොමැති අයවලුන් බොහෝය. තවකෙකු පුවත්පත් කියවන්නට කැමති නැත. අන්තර්ජාලයේ ද සිංහල බසින් සියලුම පුවත්පත් ඇති බැවින් තාක්ෂණයට ප්‍රිය කරන්නෝ පරිගණකයෙක් හෝ සිය ජංගම දුරකථනයෙන් ඒවා කියවති. එබැවින් මා ලියන ලිපි එවැනි පාඨක පිරිස් වෙත යොමු කරන්නට අදහස් කළ නිසා මෙවැනි බ්ලොග් අඩවියක් ගොඩනගන්නට සිතුවෙමි. මාගේ උත්සාහය කෙතරම් නම් සාර්ථකදැයි තීරණය වන්නේ ඔබගෙන් ලැබෙන ප්‍රතිචාර මතය. එබැවින් ඔබ මේ පිළිබඳ සිතන පතන දෑ මවෙත දන්වන්නට උනන්දුවන්නේ නම් එය මාගේ සතුටයි. ඔබ සැමට තෙරුවන් සරණයි!

Tuesday, February 27, 2018

අභිරහස් ලෙස මියගිය බොලිවුඩ් නිළියෝ - Mystery Deaths of Bollywood Actresses

Image copyright - http://english.manoramaonline.com/content/dam/mm/en/news/nation/images/2018/2/26/sridevi-certificate.jpg.image.784.410.jpg


මුළු ලෝකයම කම්පා කරමින් බොලිවුඩ් සුපිරි රංගන ශිල්පිනියක වූ ශ්‍රී දේවි ජීවිතයෙන් සමුගත්තා. කෙසේ වෙතත් ඇගේ මරණය සිදුවී දවස් කිහිපයක් ඇතුළත දැනගන්නට ලැබුණේ ඇයගේ මරණයට හේතුව මුලින් සඳහන් කළ කාරණය නොවන බවයි. මුලින් සඳහන් කළේ එය හෘදයාබාධයක් නිසා සිදු වූ මරණයක් බවයි. නමුත් වෛද්‍ය වාර්තා ලැබුණු පසු දැනගන්නට ලැබුණේ අහම්බෙන් සිදු වූ දියේ ගිලීමක් නිසා මේ මරණය සිදුවන්නට ඇති බවයි. ඇය මත්පැන් පානය කොට සිටි බවත් හෙළි වී තිබෙනවා. දැන් ඒ ගැන බොහෝ දෙනා විවිධ අදහස් දක්වන්නට පටන් අරන් තිබෙනවා. මෙවැනි අසාමාන්‍ය, අභිරහස් ලෙස මිය ගිය නළු නිළියන් සම්බන්ධ පළමු සිදුවීම මෙය නොවෙයි. අතීතයට ගොස් විපරම් කරද්දී බොලිවුඩයෙන් එවැනි සිදුවීම් බොහොමයක් හමු වෙනවා. මේ කියන්න යන්නේ ඒ අතරින් කිහිපයක් පමණයි.

දිව්‍යා භාරතී


දිව්‍යා භාරතීගේ මරණය 


90 දශකයේ බොලිවුඩ් සිනමාවේ අතිශය ජනප්‍රියත්වයක් වගේම ඉහළතම අය කිරීමකට ද හිමිකම් කියූ රංගන ශිල්පිනියක් තමයි දිව්‍යා භාරතී. ඇගේ මරණය පසුපස ඇති අභිරහස ගැන අදටත් ක්ෂේත්‍රයේ කතා බහට ලක් වෙනවා. ඇය විවාහ වී සිටියේ චිත්‍රපට නිෂ්පාදකයකු වූ සජිද් නාදියාවාලා සමගයි. මුම්බායි හි වර්සෝවා හි නිවාස සංකීර්ණයක පස්වැනි මහලේ පිහිටා තිබුණු ඇගේ නිවසේ සිට බිමට ඇද වැටීමෙන් හිසෙහි සිදු වූ රුධිර වහනය නිසා ඇය මිය ගිය බවයි වාර්තා වුණේ. 1993 අප්‍රේල 5 වැනිදා මිය යද්දී ඇගේ වයස අවුරුදු 21ක් වූවා පමණයි. කෙසේ නමුත් බොහෝ වාර්තාවලින් පෙන්වා දී තිබෙන්නේ අද වන විට වත් ඇගේ මරණයට නිවැරදි හේතුව දැනුම් දී නොමැති බවයි. බොහෝ වාර්තාවලින් පවසන්නේ ඇය ඉහළ සිට බිමට ඇද වැටී ඇත්තේ මත්පැන් පානය කොට සිටි නිසා බවයි. මෙය සිය දිවි නසා ගැනීමක් විය හැකි බව ඇතමෙක් සිතනවා. ඇගේ දෙමාපියන් පවසන්නේ මෙය ඝාතනයක් බවයි. කෙසේ නමුත් 1998 වසරේ දී පොලිසිය මේ සිදුවීම පිළිබඳ සෙවීම නිල වශයෙන් අවසන් කළා. ඇය මිය ගිය අවස්ථාවේ දී ඇගේ නිවසේ එවකට ජනප්‍රිය ඇඳුම් මෝස්තර නිර්මාණ ශිල්පිනියක වූ නීතා ලල්ලා සහ ඇගේ සැමියා සිටි බවට පැවසෙන නමුත් පොලිසිය ඒ ඔස්සේ කිසිදු පරීක්ෂණයක් පවත්වා නැති වීමත් පුදුමයට කරුණක්. 

ප්‍රවීන් බාබි


 
ප්‍රවීන් මරණයට පත් ව සිටි අවස්ථාව



70 සහ 80 දශකයේ බොලිවුඩයේ සිටි අතිශය ජනප්‍රියත්වයකට පත් නිළියක් තමයි ප්‍රවීන් බාබි කියන්නේ. කිසිදා විවාහ ජීවිතයකට ඇතුළත් නොවුනත් ඇය මහේෂ් භාත් සහ කබීර් බේඩි කියන සිනමාකරුවන් සමග දැඩි සමීප ඇසුරක් පැවැත් වූ බව දැනගන්නට ලැබෙනවා. ඒ වගේම ඇය සහ අමිතාබ් බච්චන් ගැනත් විවිධ කටකතා පැතිර ගොස් තිබෙනවා. බොලිවුඩ් සිනමාවේ අතිශය ජනප්‍රියත්වයකට පත්ව සිටි ඇය 1983 වසරේ දී හදිසියේම සිනමාවෙන් සමුගන්නවා. ඉන්පසු ඇය ජීවත්වන ප්‍රදේශයක්වත් කිසිවකුට දැනගන්නට ලැබෙන්නේ නැහැ. විවිධ වාර්තාවන්ට අනුව පසුව දැනගන්නට ලැබෙන්නේ ඇය අධ්‍යාත්මික සුවය සොයා ඇමරිකා එක්සත් ජනපදය ඇතුළු තවත් රටවල් කිහිපයක සංචාරයකට ගිය බවයි. 1984 දී සිය අනන්‍යතාව නිවැරදිව ඔප්පු කරගන්නට නොහැකි වීම නිසා ඇය ඇමරිකා එක්සත් ජනපදයේ කෙනඩි ගුවන් තොටුපළේ රඳවා තබා ගැනීමක් ගැන දැනගන්නට ලැබෙනවා. ඇයට මාංචු දමා මානසික රෝගීන් සිටින වාට්ටුවකට ගෙන ගොස් දැමූ බවට මේ වාර්තා පවසනවා. මේ අවස්ථාවේදී ඉන්දීය කොන්සල්වරයා ඇය හමුවන්නට ගොස් ඇති අතර ඇය කිසිවක් සිදු නොවූ අන්දමින් සිනහවෙමින් සාමාන්‍ය අන්දමින් කතා බව කළ බවයි පැවසෙන්නේ. ඇය 1989 දී නැවත මුම්බායිවලට පැමිණි පසු වෛද්‍ය වාර්තාවක සඳහන් කෙරෙන්නේ ඇය භින්නෝන්මාදයනම් මානසික රෝගයකින් පෙළුණු බවයි. කෙසේ නමුත් ඇය එය ප්‍රතික්ෂේප කරනවා. එපමණක් නෙවෙයි ඇය නඩුවත් ගොනු කරමින් අමිතාබ් බච්චන්, බිල් ක්ලින්ටන්, චාල්ස් කුමරු, ඇමරිකානු, බ්‍රිතාන්‍ය සහ ප්‍රංශ  රජය, කතෝලික සභාව, සී. අයි, , කේ.ජී.බී. වැනි ඔත්තු සේවාවන් තමාව ඝාතනය කිරීම සඳහා කුමන්ත්‍රණයක් සිදු කරන බවට චෝදනා කරන්නට පටන් ගන්නවා. කෙසේ නමුත් සාක්ෂි නොමැති වීම නිසා මේ නඩු ක්‍රියාත්මක වන්නේ නැහැ. 2005 වසරේ දී ඇය සිය නිවසේ දී මිය ගොස් සිටිය දී පොලිසියට හමු වෙනවා. පොලිසියට ඇගේ සිරුර හමුවෙද්දී ඇය මිය ගොස් පැය 72ක් පමණ ගත වී තිබුණු බවයි වාර්තාවල දැක්වෙන්නේ. කෙසේ නමුත් ඇගේ මරණයට නිවැරදි හේතුවක් සොයා ගන්නට පොලිසිය අසමත් වනවා. අවසානයේ පවසන්නේ එයට හේතුව සංකීර්ණ දියවැඩියා තත්වයක් බවයි.


ජියාහ් ඛාන්



ජියාහ්ගේ මළ සිරුරේ වූ තුවාල


සිය නිවසේ නිදන කාමරයේ සීලීම් පංකාවේ එල්ලීමෙන් මරණයට පත් වූ ජියාහ් ඛාන්ගේ සිරුර 2013 ජූනි 3 වැනිදා පොලිසියට හමු වෙනවා. පොලිසිය එකවර පවසන්නේ මෙය සිය දිවි නසා ගැනීමක් බව නමුත් ඇගේ මව චෝදනා කරන්නේ ඇගේ  පෙම්වතා මෙන්ම එවකට ජනප්‍රිය නළුවකු ද වූ සූරාජ් පංචෝලි විසින් ඇය ඝාතනය කොට ඇති බවයි. ඇගේ සිරුරේ තැන් තැන්වලින් අසාමාන්‍ය අන්දමේ ලප කැළල් ද දකින්නට ලැබුණා. ජියාහ් මුලින්ම රංගනයට එක් වන්නේ අමිතාබ් බච්ච් සමග නිශාබ්ද්චිත්‍රපටයෙන්. කෙසේ නමුත් ඇයගේ නිවසේ නවකතා පොතක තිබී පිටු හයකින් යුක්ත යම්කිසි සටහනක් ඇගේ සොයුරියට හමු වෙනවා. එහි එක් තැනක සඳහන් වන්නේ  මරණයට ආසන්න දිනයක ඇය ගබ්සාවක් සිදුකොට ගෙන ඇති බවයි.  මේ කාලයේ ඇය සමග සම්බන්ධයක් පැවැත් වූ සූරාජ්ගෙන් මේ ගැන ප්‍රශ්න කරන්නට පොලිසිය අත්අඩංගුවට ගත්තත් ඔහු වැඩි දිනක් ගතවන්නට මත්තෙන් ඇප පිට නිදහස් වෙනවා. මුම්බායි ඉහළ උසාවිය ඉන්දීය මධ්‍යම ඔත්තු කාර්යාංශයට නියෝගයක් දෙමින් කියා සිටින්නේ මේ ගැන විමර්ශනයක් පවත්වන ලෙසයි. එම පරීක්ෂණයෙන් පසු වාර්තාවක් නිකුත් කරමින් පොලිසිය පවසන්නේ සූරාජ් විසින් දරුණු ලෙස පහරදීමේ ප්‍රතිඵලයක් ලෙස ඇය මිය ගොස් තිබූ බවයි. 2016 වසරේ දී මධ්‍යම ඔත්තු කාර්යාංශය සිය අවසන් වාර්තාව ලබා දීමෙන් පවසන්නේ ඇය මරා සීලිම් පංකාවේ එල්ලා ඇති බවයි. මේ පරීක්ෂණයෙන් සෑහීමකට පත් නොවෙන ජියාහ්ගේ මව මේ ගැන පරීක්ෂණ පවත්වන්නට බ්‍රිතාන්‍ය අධිකරණ වෛද්‍යවරයෙකුගේ සහාය ලබාගත්තත් ඔහු පවසන්නේ ඔත්තු කාර්යාංශ වාර්තාවට වඩා හාත්පසින්ම වෙනස් කතාවක්. ඔහුගේ වාර්තාවට අනුව මෙය ඝාතනයක් නොව හුදෙක් සිය සිවි නසා ගැනීමක් පමණක් බව දැක්වෙනවා. මේ මරණය පිළිබඳ විමර්ශන තවමත් අවසන් වී නැහැ.  

විවෙක් බබාජී



විවෙක් බබාජී බොලිවුඩ් සිනමාවේ ජනප්‍රිය තරුවක්ව සිටියත් මිනිසුන් ඇය වඩාත් හොදින් හඳුනා ගත්තේ කාමසූත්‍රනමින් වෙළඳපළට පැමිණි උපත් පාලන උපකරණ ප්‍රචාරණය කිරීමේ දැන්වීම්වලට පෙනී සිටීම නිසයි. ඇගේ පළමු චිත්‍රපටය වූයේ දීපාක් තිජෝරි සමග රඟ පෑ යේ කයිෂි මොහාබත්. 2010 ඇය සිය නවාතැනේ සීලිමේ එල්ලී සිය දිවි නසා ගෙන සිටිනු පොලිසියට දැනගන්නට ලැබෙනවා. ඇගේ දිනපොත කාමරයේ තිබී හමු වන අතර එහි අවසන් වරට ලියා තිබුණේ මෙවැන්නක්.

උඹ මාව මැරුවා ගෞතම් වොහ්රා

ගෞතම් යනු ඇය මිය යන සමයේ ඇසුරු කරමින් සිටි පෙම්වතාගේ නමයි. පොලිස් වාර්තා පවසන්නේ මානසික ආතතිය නිසා ඇය සිය දිවි නසාගෙන ඇති බවයි. 2012 වසරේදී මේ පිළිබඳ විමර්ශන නැවත ආරම්භ කෙරුණු අතර එහිදී ගෞතම් අත්අඩංගුවට ගැනෙනවා. මේ විමර්ශන තවම අවසන් නැහැ.  

බොලිවුඩයෙන් ඇසෙන මෙවැනි අභිරහස් මරණ සංඛ්‍යාව මෙහි සඳහන් කළ කිහිපය පමණක් නොවෙයි. වැනි සිදුවීම් තවත් බොහොමයක් තිබෙනවා. ඒ සියල්ල මෙහි සඳහන් කරන්නට අපහසුයි. කෙසේ නමුත් මේ සියල්ල පසුපස ඇත්තේ අභිරහසක්. ශ්‍රී දේවියගේ මරණයත් එවැන්නක් ද නැතිද යන්න අනාගයේදී අපට දැනගන්නට ලැබේවි.

Sunday, February 11, 2018

බුල්ටෝ ගැන මිහිරි මතකය - Sweet Memory of Bulto Tof‍fees



දැනට වසර දෙකකට මඳ කාලයකට පෙර, නිවැරදිවම සඳහන් කළ හොත් 2016 අප්‍රේල් 7 වැනිදා  කොළඹ සෞන්දර්ය විශ්ව විද්‍යාලයේ දෘශ්‍ය කලා පීඨ කලාගාරයේ සිබිල් වෙත්තසිංහයන්ගේ සිතුවම් ප්‍රදර්ශනයක් පැවැත්විණි. මෙයට අනුග්‍රහය දැක්වූ ආයතනයක් විසින් විවිධ රස කැවිලි පිරවූ බඳුන් කිහිපයක්  ගෙනැවිත් තිබිණි. මේ රස කැවිලි අතර බුල්ටෝ ද තිබිණි. කුඩා කාලයේ බුල්ටෝ කෑවාට පසු මා බුල්ටෝ රස විඳ තිබුණේ නැත. අනෙක මගේ දියණියවත් පුතාවත් කිසිදාක බුල්ටෝ රස විඳ නැති බව ද මම හොඳාකාරවම දැන සිටියෙමි. මන්ද අප පළාතේ කිසිදු තැනක බුල්ටෝ විකුණන්නට තබා තිබෙනු මා දැක නැති නිසා ය. මේ නිසා පවුලේ සියලු දෙනාටම රස විඳීමේ අදහසින් බුල්ටෝ කිහිපයක් මිලට ගැනීමේ අදහසින් ඒවායේ මිල ගණන් විමසූ විට දැනගන්නට ලැබුණේ ඒවා එම ආයතනය විසින් රැගෙන විත් තිබුණේ විකුණන්නට නොව එතැනට එන කුඩා දරුවන්ට නොමිලේ දීමට බව ය. මේ නිසා මම දුවටත් පුතාටත් පමණක් බුල්ටෝ දෙකක් ඉල්ලා ගතිමි.
 
අපේ ගමේ, ඒ කියන්නේ ඇහැලියගොඩ යාය පාරේ ‘යාය කඩේ’ නමින් කඩයක් තිබිණි. මා දැන් වාසය කරන්නේ ගමේ නොවුනත් යාය කඩේ වසා ඇති බව ගූගල් සිතියමේ ‘ස්ට්‍රීට් වීව්’ එකෙන් දුටුවෙමි. අප බුල්ටෝ කෑවේ යාය කඩයෙනි. ඒවා තෙල් කඩදාසිවල දවටා වීදුරු බෝතලවල තිබෙනු දකින එකල අපගේ  කටට කෙළ ඉනුවේ ඒ රසයට කැමැති නිසාය. කෙසේ නමුත් පසුකාලීනව විවිධ පැහැයෙන්, හැඩයෙන් යුතු ටොෆී වර්ග බොහොමයක් වෙළඳපළට පැමිණි නිසා බුල්ටෝ කෙමෙන් කෙමෙන් අපෙන් ඈත් විය. අද පරම්පරාවේ බොහෝ දෙනෙක් බුල්ටෝ ගැන දන්නේ නැති තරම් ය. 

අප කුඩා කාලයේ තිබුණේ ‘ගුණසිරි’ බුල්ටෝ ය. ඒ කාලයේ ඒ පිළිබඳ වෙළෙඳ දැන්වීම් පවා තිබිණි. මේවා ප්‍රමාණ දෙකකින් තිබුණු අතර ප්‍රමාණයෙන් ලොකු බුල්ටෝ අප ගම් පළාතේ හඳුන්වන ලද්දේ ‘අලි බුල්ටෝ’ නමිනි. මට මතක අන්දමට කුඩා ප්‍රමාණයේ බුල්ටෝ එකක් ශත 10ක් වූ අතර අලි බුල්ටෝ එකක් ශත 25ක් විය. ඉන් පසු මේවායේ මිල වැඩි වූ නමුත් මට මතක මේ මිල ගණන් දෙක පමණි. 

බුල්ටෝ සාදන්නේ කෙසේදැයි මා දැනගත්තේ අහම්බෙනි. මා ඒ දැන ගත් ක්‍රමය නිවැරදි බව දැන ගත්තේ බොහෝ කාලයකට පසුව බුල්ටෝ සෑදීමේ ක්‍රමය අන්තර්ජාලයෙන් දුටු විටය. පොල් වතුර රත් කළ විට සිදුවන්නේ කුමක්දැයි සොයා බැලීමට දිනක් සිතුණු බැවින් එසේ සිදු කොට බැලීමි. පොල් වතුර භාජනයක දමා ලිපට අල්ලා ගෙන සිටිද්දී මද වේලාවකින් පොල් වතුර උණු වී කලු පැහැයකට හැරිණි. එයින් කර වූ සුවඳක් සමග බුල්ටෝ සුවඳක් ද වහනය වූයෙන් මදක් දිව ගා බැලීමී. එයින් දැනුණේ බුල්ටෝ රසයකි. බුල්ටෝ සාදන්නේ පොල් වතුර උණු කිරීමෙන් යැයි මම සිතුවෙමි. එය නිවැරදි බව දැනගත්තේ ඉතාමත් මෑතකදී බුල්ටෝ සාදන ද්‍රව්‍ය වට්ටෝරුවේ පොල් වතුර ද අඩංගු වූ බව දැකීමෙනි.

බුල්ටෝ යන්න සිංහල වදනක් නොවන බව දැනෙන මුත් කුමන බසකින් ලැබුණේ දැයි සිතාගන්නට තරම් මගේ භාෂා දැනුම ප්‍රමාණවත් නැත. Bulto යනුවෙන් ස්පාඤ්ඤ වදනක් නම් තිබේ. නමුත් එහි එක් අර්ථයකවත් රස කැවිල්ලක් ගැන කියවෙන්නේ නැත. මේ නිසා බුල්ටෝ කුමන රටක වචනයක් දැයි දන්නේ නැත. 

කුමන රටක වුවත් බුල්ටෝ රස විඳ ඇති අය එහි රසය දනිති. අද ද ඇතැම් පලාත්වල මෙන්ම සුපිරි වෙළෙඳ සල්වල ද බුල්ටෝ ඇති මුත් අප පළාත වන වෙන්නප්පුව පැත්තේ තවමත් බුල්ටෝ විකුණන්නට තිබෙනු දැක නැත. කෙසේ නමුත් බුල්ටෝ ගැන මෙසේ මිහිරි මතකයක් එක් කරන්නට සිතුණේ බුල්ටෝ රසය ගැන හදිසියේ මතක් වීම නිසාමය.