මනුෂි චිලර් - 2017 ලෝක රූ රැජින කිරුළ ඉන්දියාවට

2017 වසර අවසන් වී 2018 වසර එළඹෙන්නේ ඉන්දියාව ඉමහත් සතුටක ගිල්වමින් බව කීවොත් එහි වරදක් නැත. ඒ අන් කිසිවක් නිසා නොව චීනයේ ‛සන්යා සිටි ඇරීනා’ හි දී 2017 නොවැම්බර් 18 වැනිදා පවත්වන්නට යෙදුණු ලෝක රූ රැජින තරගයෙන් තරගකාරියන් 118 දෙනෙකු අභිබවමින් 2017 ලෝක රූ රැජින ඉන්දියාවෙන් බිහි වීම නිසා ය. ඈ නමින් ‛මනුෂී චිලර්’ ය. ඉන්දියාවෙන් ලෝක රූ රැජිනක් මෙසේ බිහිවන්නේ වසර 17 කට පසුව ය. 2017 වසර අවසන් වෙමින් තිබිය දී ඉන්දියාව ලද මේ ජයග්‍රහණය ඔවුන්ට මහමෙරක් තරම් වටින්නේ මේ නිසා ය.

මනුෂී චිලර් වෛද්‍ය ශිෂ්‍යාවකි. මෝස්තර නිරූපණ ශිල්පිනියකි. එමෙන්ම කිවිඳියකි. 1997 මැයි 14 වැනිදා උපන් ඇය මෙයට පෙර ඉන්දියාව තුළ පවත්වන ලද ෆෙමිනා රූ රැජින තරගය ද ජයග්‍රහණය කළාය. ඇගේ මේ ජයග්‍රහණය සමගින් ඉන්දියාව මෙතෙක් බිහි කළ ලෝක රූ රාජිනියන් සංඛ්‍යාව හයකි.

ඉන්දියාවෙන් මුලින්ම රූ රැජිනක් බිහි වන්නේ 1966 වසරේ ය. ඒ රීටා ෆාරියා ය. ඉන්පසු 1994 වසරේ දී අයිෂ්වර්යා රායි ලෝක රූ රැජින වූවා ය. 1997 වසරේ දී ඉන්දියාව තවත් රූ රැජිනක් ලොවට දායාද කළ අතර ඈ නමින් ඩයනා හේඩ්න් ය. යුක්තා මූකී ලෝක රූ රැජින වෙමින් 1999 වසරේ දී ඉන්දියාව තවත් වතාවක් ලෝකය අමන්දාන්දයට පත් කළාය.  ඉන් පසු ලෝක රූ රැජිනක් ඉන්දියාවෙන් බිහිවන්නේ 2000 වසරේ දී ය. ඇය ප්‍රියංකා චොප්රා ය. මනූෂි චිලර් ලෝක රූ රැජින වන්නේ ඉන් වසර 17 කට පසුව ය.

රීටා ෆාරියා

අයිශ්වර්යා

ඩයනා හේඩ්න්

යුක්තා මුඛි

ප්‍රියංකා

මනූෂි චිලර් ඉන්දියාවේ හර්යානා ප්‍රාන්තයේ ගොවි පවුලක තරුණියකි. පරම්පරාවෙන් ගොවි පවුලක වුව ද ඇගේ පියා වෘත්තියෙන් වෛද්‍යවරයෙකි. ඔහු නමින් මිත්‍ර බාසු චිලර් ය. ඔහු ආරක්ෂක පර්යේෂණ සහ සංවර්ධන සංවිධානයේ විද්‍යාඥයකු ද වන්නේ ය. මනූෂිගේ මව නීලම් චිලර් ද වෛද්‍යවරියකි. ඇය මානව චර්යා සහ අනුබද්ධ විද්‍යා ආයතනයේ මහාචාර්යවරියක සේම ස්නායු රසායන විද්‍යා අංශයේ අංශාධිපතිනිය ද වන්නී ය. මේ අනුව මනූෂිගේ පවුල එසේ මෙසේ පවුලක් නොවන බව පැහැදිලි ය.

මව සහ පියා සමග

නවදිල්ලියේ සාන්ත තෝමස් විද්‍යාලයේ අධ්‍යාපනය හැදැරූ මනූෂි සිය දෙමාපියන්ගේ අඩි පාරේ යමින් වෛද්‍ය විද්‍යාව හැදෑරීම පිණිස සෝනිපත් හි පිහිටි කාන්තාවන් සඳහා පමණක් වෙන් වූ භගත් පූල් සිං රජයේ වෛද්‍ය විද්‍යාලයට ඇතුළු වූවා ය. මනූෂි හොදින් පුහුණු වූ කුචිපුඩි නර්තන ශිල්පිනියක් ද වන්නී ය. කුචිපුඩි යනු ඉන්දියාවේ සාම්ප්‍රදායික නර්තනයන් සතෙන් එකකි. ඇය 2017 වසරේ ෆෙමිනා ඉන්දීය රූ රැජින තරගයට සහභාගී වන්නේ හර්යානා ප්‍රාන්තය නියෝජනය කරමිනි.

ලෝක රූ රැජින තරගයක අවසන් වටයේ දී ජයග්‍රහණය මග පෙන්වන්නේ තරගකාරියන්ගේ බාහිර පෙනුම පමණක්ම නොවේ. ඔවුන් ලෝකය දකින බුද්ධිමත් ආකාරය ද මෙයට බලපාන්නේය. මනුෂී ට ද එය පොදුය. ඇයට මේ ජයග්‍රහණය හිමි කර දුන්නේ ඈ මාතෘත්වය සහ කාන්තාවන් පිළිබඳ පළ කළ බුද්ධිමත් අදහස් නිසාය. මනූෂි අවසන් ජයග්‍රාහිකාවන් පස් දෙනා අතර සිටිද්දී ඇගෙන් පැනයක් අසනු ලැබිණි. ඇගෙන් අසනු ලැබූයේ ඉහලම වැටුපක් හිමි විය යුත්තේ කුමන වෘත්තියට ද යන්න ය. ඇය පිළිතුරු දෙමින් පවසා සිටියේ මාතෘත්වයට යන්න ය. එය මුදලින් මැනිය නොහැකි බවත්, එය මැනිය හැක්කේ ආදරය සහ ගෞරවය යන මිනිස් ගුණාංගයන්ගෙන් බවත් ඇය පවසා සිටියා ය. තමාගේ ජීවිතයේ ලද සියලු ජයග්‍රහණයන් පසුපස සිය මව සිටි බව ද ඇය මෙහි දී සිහිපත් කළාය. සෑම මවක්ම සිය දරුවන් වෙනුවෙන් ඉමහත් කැපවීමක් කරනා බව ද ඇය සඳහන් කළාය. ඉහළම වැටුප හිමි විය යුත්තේ මාතෘත්වයට යැයි ඇය හඩ නගා පවසා සිටියේ සවන් පිරී යන අනේක වූ ප්‍රේක්ෂක ප්‍රතිචාර රැසක් මැද්දේ ය. ඇගේ මේ ප්‍රකාශය ඇයට ලෝක රූ රැජින බවට පත්වන්නට මග එළි පෙහෙළි කළා පමණක් නොව ඇය ලෝකයේ සෑම දෙනෙකුගේම අතිශය ගෞරවයට පාත්‍ර වන්නට ද හේතුවක් විය.

මනුෂී චිලර් ලෝක රූ රැජින ලෙස කිරුළ පළඳද්දී දෙවෙනි තැනට මෙක්සිකෝවේ ඇන්ඩ්‍රියා මීසා ද තෙවැනි තැනට එංගලන්තයේ ස්ටෙෆානි හිල් ද පත් වූවා ය. මෙම තරගය සඳහා ශ්‍රී ලංකාවෙන් දුෂේනි සිල්වා ඉදිරිපත් වුව ද ඇයට අවසන් 40 දෙනා අතරට පැමිණීමට හෝ හැකියාවක් ලැබුණේ නැත.

ඉන්දියාවෙන් මෙතෙක් බිහි වූ ලෝක රූ රැජිනන්ට අමතරව විශ්ව රූ රැජිනන් ද බිහි වී තිබේ. ඒ 1994 දී සුස්මිතා සෙන් සහ 2000 දී ලාරා දත්තා වශයෙනි. මේ තරග දෙකෙහි ඇති වෙනස් කුමක් දැයි යමෙකුට සිතෙන්නට පුළුවන. ලෝක රූ රැජින තරගය 1951 දී එක්සත් රාජධානියේ එරික් මෝර්ලි විසින් ආරම්භ කරන ලද්දක් වන අතර එහි වර්තමාන හිමිකාරිත්වය දරන්නේ ඔහුගේ බිරිඳ වන ජුලියා මෝර්ලි ය. විශ්ව රූ රැජින තරගය 1952 දී ඇමරිකා එක්සත් ජනපදයේ රෙදිපිළි ව්‍යාපාරයක් වූ පැසිෆික් මිල්ස් මගින් ආරම්භ කරන ලද්දක් වන අතර එහි වර්තමාන හිමිකාරිත්වය දරන්නේ ඇමරිකානු ජනපති ඩොනල්ඩ් ට්‍රම්ප් සහ එන්.බී.සී. සමාගම වේ. මේ තරග දෙකෙන්ම ඉන්දියාවට බිහි වූ රූ රැජිනන්ගෙන් බොහෝ දෙනෙක් බොලිවුඩ් නිළියන් බවට පත් වූහ. නමුත් නිළියන් වශයෙන් අතිශය සාර්ථකත්වයට පත් වූයේ අයිශ්වර්යා සහ ප්‍රියංකා පමණි. ඩයනා හේඩ්න්, යුක්තා මූඛි, නිළියන් වන්නට උත්සාහ කළ ද ඔවුන්ගේ සිනමා නිර්මාණ සාර්ථක වූයේ නැත. විශ්ව රූ රැජිනන් බවට පත් වූ සුස්මිතා සෙන් සහ ලාරා දත්තා ද නිළියන් බවට පත් වූ මුත් එතරම් සාර්ථකත්වයක් හිමි වූයේ නැත. ඉන්දියාවේ මුල්ම ලෝක රූ රැජින වූ රීටා ෆාරියා මේ සඳහා මග විවර කර ගත්තේ මෝස්තර නිරූපණයෙනි. ඇය  සිනමාට සම්බන්ධ වූ නමුත් පසුව මේ සියල්ල අතහැර වෛද්‍යවරියක වූවා ය. ඇය දැනට අයර්ලන්තයේ ඩබ්ලින් හි වාසය කරන්නී ය.

සුස්මිතා සෙන්

ලාරා දත්තා

2017 වසරේ ලෝක රූ රැජින වූ මනුෂී චිලර් වෛද්‍ය ශිෂ්‍යාවකි. ඇයගේ දෙමාපියන් ද වෛද්‍යවරුන් ය. ඇය ඉන්දියාවේ නිසා බොලිවුඩ් සිනමාවෙන් ඇයට නිසැකවම ඇරයුම් ලැබෙනු ඇත. කෙසේ නමුත් ඇය අයිශ්වර්යා, ප්‍රියංකා ආදීන් ගේ මාවතේ යනු ඇති ද නැතහොත් රීටා ෆාරියා මෙන්ම වෛද්‍ය වෘත්තිය වෙනුවෙන් ජීවිතය කැප කරනු ඇති ද යන්න බොහෝ දෙනෙකු අසති. අනාගතය මේ සියල්ල තීරණය කරනු ඇත. 

මිනිස් හඬ හඳුනාගැනීමේ යාන්ත්‍රණය - බේබි ටෝක් සිට ගූගල් ජීබෝර්ඩ් දක්වා

පරිගණකයේ යතුරු පුවරුව දෙස බලා ඉංග්‍රීසි බසින් අමාරුවෙන් හෝ යතුරු ලියනය කරන්නට බොහෝ අයට හැකියාව තිබුණ ද, සිංහල බසින් යතුරු ලියනය කිරීම බොහෝ දෙනෙකුට ලේසි පහසු කටයුත්තක් නොවේ. මේ නිසා මේ කාර්යය කර ගැනීම සඳහා කලින් කලට විවිධ ක්‍රම විවිධ පිරිස් විසින් හඳුන්වා දෙනු ලැබිණි. පරිගණක යතුරු පුවරුවේ ඉංග්‍රීසි අක්ෂර සමග සිංහල අක්ෂර ද මුද්‍රණය කිරීම මෙයට දුන් එක් විසඳුමක් විය. නමුත් මේ ආකාරයට යතුරු ලියනය කරන්නට පුරුදු වූ පුද්ගලයකුට හදිසියේ වෙනත් ආකාරයක යතුරු පුවරුවක් සමග වැඩකටයුතු කරන්නට සිදුවුවහොත් මහත් දුෂ්කරතාවයන්ට මුහුණ දෙන්නට සිදු විය. ඒ වාගේම උච්චාරණය වන ශබ්දයට අනුව (Phonetic) අකුරු යතුරු ලියනය කිරීමේ ක්‍රමයක් ද හඳුන්වා දෙනු ලැබිණි. නමුත් මෙයින් ඇතැම් වචන නිවැරදිව යතුරු ලියනය කරගැනීම සඳහා අමතර වෙහෙසක් දරන්නට සිදු විය. මෙවැනි ගැටලු නිසා නිවැරදිව සිංහල බසින් යතුරු ලියනය කිරීම බොහෝ විට විජේසේකර සිංහල යතුරු පුවරුව පිළිබඳ යම් පුහුණුවක්, දැනුමක් ඇති පිරිසකට පමණක් සීමා විය. බොහෝ දෙනෙකු සිය යතුරු ලියන අවශ්‍යතා එවැනි පුද්ගලයන් ලවා කරවා ගැනීමට උත්සුක වුණා මිසක සිංහල බසින් යතුරු ලියනය කරන්නට උත්සාහ ගත්තේ නැත. කෙසේ නමුත් සිංහල භාෂාවට විශේෂ සැලකිල්ලක් දක්වන ගූගල් සමාගම නිසා මෙම තත්වය කෙමෙන් වෙනස් වන්නට විය.

අන්තර්ජාලයේ පවතින් සෙසු සෙවුම් යන්ත්‍ර (Search Engines) සිංහල බසට සහයෝගයක් නොදක්වන කාලයේ දී පවා ගූගල් සමාගම සිය සෙවුම් තුල, ගූගල් සිතියම තුළ සිංහල නම් ඇතුලත් කරන්නට උත්සුක වී තිබෙනු දක්නට හැකි විය. කිසියම් පුද්ගලයකු සිය හඬින් පවසන දෑ හඳුනාගෙන, ඒවා ඒ ආකාරයෙන්ම යතුරු ලියනය කරන ක්‍රමයක් ගූගල් සමාගම ලොවට ඉදිරිපත් කරන්නේ මේ අතරවාරයේය. කෙසේ නමුත් මිනිස් හඬ හඳුනා ගැනීමේ තාක්ෂණය මුළින්ම ලොවට ඉදිරිපත් කළේ ගූගල් සමාගම නොවේ. මෙහි ඉතිහාසය 60 දශකය තරම් ඈතකට ගමන් කරයි.

මේ සඳහා මුළින්ම ලොවට ඉදිරිපත් වූ ක්‍රමය වූයේ Baby Talk ය. කෙසේ නමුත් එයට හැකි වූයේ මිනිස් හඬින් පවසන අංක හඳුනාගැනීම පමණි. යන්ත්‍රයකට මිනිස් හඬ හඳුනාගැනීම දුෂ්කර දෙයක් බවට පත් වූයේ එක් එක් පුද්ගලයාගේ උච්චාරණය එකිනෙකට වෙනස් වීමය. සෑම හඬක්ම හඳුනාගැනීමේ තාක්ෂණයක් බිහිකිරීම මේ නිසා වඩ වඩාත් දුෂ්කර කටයුත්තක් විය. පසුව 1952 දී Audrey නමින් තවත් තාක්ෂණයක් හඳුන්වා දුන් අතර එයින් ද කර ගත හැකි මිනිස් හඬ හඳුනාගැනීම සහ හඬ භාවිතයෙන් උපදෙස් ලබාදීමය. ද අංක හඳුනා ගැනීම පමණි. පසුව 1962 දී Shoebox යන්ත්‍රය හඳුන්වා දුන් අතර එයට ඉංග්‍රීසි වචන 16ක් හඳුනාගත හැකි විය.

Shoebox යන්ත්‍රය

මේ ආකාරයට විවිධ යන්ත්‍ර මගින් ද, පරිගණක තාක්ෂණය දියුණු තත්වයට පත්වීමෙන් පසු විවිධ මෘදුකාංග මගින් ද මිනිස් හඬ හඳුනාගැනීමේ උත්සාහයන් හි නොකඩවා යෙදිණි. කෙසේ නමුත් අප සාමාන්‍ය පරිදි කතා බහ කරද්දී ඇසෙන හඬ හඳුනා ගැනීමට මේ කිසිදු උපක්‍රමයකට හැකියාව තිබුණේ නැත. බොහෝ විට මේවාට හඳුනා ගත හැකි වූයේ පුහුණු කරගත් යම් උච්චාරණ රටාවන් පමණක් විය.

ස්මාර්ට් වර්ගයේ ජංගම දුරකතන ලෝකයේ ජනප්‍රිය වීමත් සමග ගූගල් සමාගම මේ කාර්යයට සම්බන්ධ වන්නට තීරණය කළේය. මිනිස් හඬ නිවැරදිව හඳුනාගැනීමේ උපක්‍රම බිහිකිරීමේ උත්සාහයන් සියල්ලටම වඩා ගූගල් සමාගම දැරූ උත්සාහය වඩාත් සාර්ථකතවයට පත් විය. එයට හේතුව වූයේ මිනිස් හඬ හඳුනාගැනීමේ වඩාත් සාර්ථකව අත්හදා බැලීම සඳහා ජංගම දුරකතන තරම් වෙනත් උපාංගයක් නොමැති වීම නිසාය. අනෙක ජංගම දුරකතනයේ ඇති කුඩා යතුරු පුවරුව වෙනුවට මිනිස් හඬින් විධාන ලබාදීමට බොහෝ දෙනෙකු තුළ පවතින කැමැත්ත ද  මෙයට තවත් හේතුවක් විය. මේ නිසා ගූගල් හඳුන්වා දුන් මිනිස් හඬ හඳුනාගැනීමේ තාක්ෂණය සීඝ්‍ර ලෙස වර්ධනය වන්නට විය. අනෙක ලොව පුරා සිටින කෝටි සංඛ්‍යාත ජංගම දුරකතන පරිශීලකයන්ගේ එකිනෙකට වෙනස් උච්චාරණ ශෛලීන් ගූගල් සේවා පරිගණකවලට ලැබීම නිසා ස්වභාවික මිනිස් හඬ වඩාත් නිවැරදිව හඳුනා ගැනීමට මෙම තාක්ෂණයට හැකියාව ලැබිණි. ගූගල් සමාගම මේ ආකාරයට මිනිස් හඬ හඳුනා ගැනීමේ තාක්ෂණය අත්හදා බලද්දී ඇපල් සමාගම ද ‛සිරි’ (Siri) නම් යෙදුමක් සිය දුරකතනවලට ඇතුළත් කළේය. නමුත් ගූගල් සමාගම වඩාත් වේගයෙන් ඉදිරියට යන බව දැකගත හැකි විය.

ගූගල් සමාගම ඕනෑම මිනිස් හඬක් හඳුනාගැනීම සාර්ථකව අත්හදා බැලීමෙන් නොනැවතී  මිනිස් හඬින් පවසන දෑ යතුරු ලියනය කිරීමේ හැකියාව පිළිබඳව සොයා බලන්නට විය. ඒ වන විටත් මිනිස් හඬින් පවසන දෑ යතුරු ලියනය කරන යන්ත්‍ර සහ මෘදුකාංග බොහොමයක් තිබුණු අතර බටහිර රටවල මෙය වඩාත් සාර්ථකව ක්‍රියාත්මක විණි.

ගූගල් සමාගම මිනිස් හඬ හඳුනා ගැනීමේ තාක්ෂණය සඳහා ලෝකයේ භාවිත වන ප්‍රධාන පෙළේ භාෂාවන් 119ක් සිය පරිගණකවලට ඇතුළත් කළේය. සිංහල බස ද ඒ අතර විය. කෙසේ නමුත් ගූගල් සමාගමේ මේ උත්සාහයේ වඩාත්ම සිත්ගන්නා සුළු කාර්යය ලෙස සඳහන් කළ හැක්කේ අප කතා කරන සිංහල බසින් පවසන යමක් හඳුනාගෙන එය වඩාත් නිවැරදි ලෙස යතුරු ලියනය කිරීමේ යාන්ත්‍රණයක් බිහිකිරීමය. මෙතෙක් කල් සිංහල බසින් යතුරු ලියනය කිරීමේ ගැටලුවලට මුහුණ දුන් බොහෝ දෙනෙකුට මෙය අස්වැසිල්ලක් විය. මෙය ඇන්ඩ්‍රොයිඩ් වර්ගයේ ජංගම දුරකතනවල ස්ථාපනය කළ හැකි Gboard - the Google Keyboard නම් යෙදුමක් හරහා ලබාගත හැකි අතර මිනිස් හඬ හඳුනාගැනීම සඳහා අන්තර්ජාල පහසුකම අවශ්‍ය වේ. මෙය භාවිතයෙන් සිංහල බසින් පවසන ඕනෑම දෙයක් ඉතාමත් නිවැරදි ආකාරයෙන් යතුරු ලියනය කරගැනීමේ හැකියාව පවතී. මේවා යතුරු ලියනය වන්නේ සිංහල යුනිකෝඩ් අක්ෂරවලින් වන අතර මුද්‍රණ කටයුත්තක් සඳහා එය භාවිත කරන්නේ නම්,  ඊට ගැළපෙන අක්ෂර වර්ගයක් බවට මෙම යුනිකෝඩ් අක්ෂර පෙරළා ගත යුතු  වේ.

මෙය අක්ෂර සංයෝජන කටයුතු සඳහා තවමත් වානිජමය වශයෙන් භාවිත කරනු දක්නට නැති අතර එසේ යොදාගැනීම කෙතරම් සාර්ථක ද යන්න පිළිබඳව මෙතෙක් නිවැරදි ඇගයීමක් ද සිදුකොට නොමැත. දැනට මෙය භාවිත වන්නේ සමාජ ජාල ආදියේ කොමෙන්ටු යතුරු ලියනය සඳහා පමණක් බැව් පෙනෙන්නට තිබේ. ඉන් ඔබ්බට කිසිවෙක් මෙයින් ප්‍රයෝජනය ගන්නා බවක් පෙනෙන්නට නැත. අනෙක මෙය තවමත් පරිගණක සඳහා ස්ථාපනය කළ නොහැකි වීමත් මෙය වානිජමය වශයෙන් අක්ෂර සංයෝජන කටයුතු සඳහා යොදා ගැනීම පසුබෑමට හේතුවක් විය හැකිය. අනෙක ජංගම දුරකතනවල ඇති උසස් තත්වයෙන් යුක්ත අධි සංවේදී මයික්‍රෆෝන තරම් පරිගණකවල භාවිත වන සාමාන්‍ය මයික්‍රෆෝන ප්‍රබල නොවීම නිසා මිනිස් හඬ නිවැරදි හඳුනා ගැනීමේ ගැටලු ද ඇති විය හැකිය. කෙසේ නමුත් නුදුරු අනාගතයේ දී මිනිස් හඬින් පවසන දෑ සිංහල බසින් යතුරු ලියන කිරීමේ තාක්ෂණය වඩ වඩාත් දියුණු තත්වයට පත්වන බව නම් ඉඳුරාම පැවසිය හැකිය. 

ප්‍රකට පුද්ගලයන්ගේ අකට විකට කෑම පුරුදු - Weird Food Habits of Famous People

ආහාර ගැන කතා කරද්දි බොහෝ දේවල් මතක් වෙනවා. බඩගින්නේ ඉන්න වෙලාවක නම් මතක් වෙනවා විතරක් නෙවෙයි කටට කෙළත් උනනවා. කන්න කැමතිම දෙයක සුවඳක් දැනුනොත් ඉතිං ඒ ගැන කතා කරලා වැඩක් නෑ. ලෝකයේ එක එක රටවල නොයෙක් විදියේ කෑම පුරුදු දකින්නට පුළුවන්. අපි කැමතිම දෙයක් ඇතැම් වෙලාවට වෙනත් රටක කෙනෙකු කොහොමටවත් කෑමට ගන්න අකැමති වෙන්න ඉඩ තියෙනවා. ඒ වගේම තමයි වෙනත් රටක කෑම වර්ග අපට කනවා තියා අහලකටවත් ගන්න හිතෙන එකක් නෑ. 

නැගෙනහිර ආසියාව, කැරිබියන් දූපත්, දකුණු ඇමරිකාව සහ  දකුණු අප්‍රිකාව ආදී රටවල් කුකුළන්ගේ කකුල්, රසවත් කෑමක්. ‛කුකුල් කකුල්’ කියන්නේ අපේ රටෙත් බොහෝ දෙනෙක් කෑමට කැමැත්ත දක්වන ‛ඩ්‍රම්ස්ටික්’ කියන එක නෙවෙයි. කුකුලාගේ කකුල්වල ඇඟිලි තියෙන කොටස ගැනයි මේ කියන්නේ. ඒ වගේම හරකුන්ගේ පාද කොටස් මැදපෙරදිග, නැගෙනහිර යුරෝපයේ සහ තුර්කියේ ප්‍රසිද්ධ කෑමක්. ඔවුන් මෙය හඳුන්වන්නේ ‛ඛෑෂ්’ නමින්. මේ වගේ අමුතු විදියේ කෑම වර්ග ලෝකයේ ඕනෑ තරම් තියෙනවා. ඇතැම් ඒවා ප්‍රසිද්ධියේ ලියන්නත් බැරි තරම්. නමුත් ඒ රටවල් ඒවා රසවත් කෑම. ඒ වගේ රටක පුද්ගලයෙක් අපේ රටක ඇවිත් එවැනි කෑමක් කෑවොත් අපට ඒක පෙනෙන්නේ අමුතු විදියේ කෑම පුරුද්දක් විදියටයි. කොහොම වුනත් මේ වගේ රටවල්වලට අයිති නැති වුනත් ලෝකයේ ඇතැම් ප්‍රසිද්ධ පුද්ගලයන් තුළත් මේ වගේ අමුතු විදියේ කෑම පුරුදු දකින්නට තිබෙනවා. ඉන්දියාවේ මිනිස්සු කෑම කාලා ඇඟිලි ලෙව කෑවාට අපේ රටේ එසේ කරන්නේ නැහැ. ඒක අපට අමුතු ආහාර පුරුද්දක්. කොහොම වුනත් දැන් අපි කතා කරන්න යන්නේ මේ වගේ අමුතු කෑම රටා තියෙන ලෝකයේ ප්‍රසිද්ධ පුද්ගලයන් ගැනයි. 

වැරන් බෆට්ගේ උදේ කෑම 

වැරන් බෆට් කියන්නේ ලෝක ප්‍රසිද්ධ ව්‍යාපාරිකයෙක්. ලෝකයේ ඉන්න හොඳම ආයෝජකයා හැටියටයි ඔහු ගැන සඳහන් වෙන්නේ. දැනට 86 වැනි වියෙහි පසුවන ඔහු දැනට කාලක ඉඳන් ඔහු උදේ කෑම හැටියට ගන්නේ අයිස්ක්‍රීම් විතරයි. එක දිගට අයිස් ක්‍රීම් ආහාර ලෙස ගැනීමෙන් දියවැඩියාව වැළඳීමේ දැඩි අවදානමක් තිබුනත් වැරන් බෆට් ට නම් මේ තරම් වයස වෙලත් එවැනි තත්වයක් ඇති වෙලා නැහැ. ඒ වගේම ඔහු දිනකට පස් වතාවක් කොකා කෝලා බොනවා. 

කැරට් නිසා කහ පාට වුණු ස්ටීව් ජොබ්ස් 

ස්ටීව් ජොබ්ස් ගැන නොදන්න කෙනෙක් මේ ලෝකේ නැහැ. විශේෂයෙන් ඇපල් පරිගණක සහ ඇපල් අයිෆෝන් තියෙන අය ඔහු ගැන දැනගෙනම සිටිය යුතුයි. මේවායේ නිර්මාතෘ ඔහුයි. ඔහු එක කාලෙක කැරට් විතරක් කෑමට ගන්න පුරුදු වුණා. කැරට් කෑමට ගැනීමෙන් සම ලස්සන වුනත්, ඕනෑවට වඩා ගැනීම අහිතකරයි. ස්ටීව් ජොබ්ටත් ඒ ගැටළුවට මුහුණ දෙන්න සිද්ධ වුණා. ඔහු කැරට් එක දිගට ආහාරයට ගත් නිසා සම කහ පැහැයට හැරුණා. අවසානයේ වෛද්‍ය උපදෙස් මත ඔහුට සිය ආහාර රටාව වෙනස් කරන්නට සිද්ධ වුණා. 

වල් පැලෑටි කෑමට ගත් හෙන්රි ෆෝඩ් 

ලෝක ප්‍රකට මෝටර් රථ සමාගමක් වූ ෆෝර්ඩ් සමාගමේ නිර්මාතෘ තමයි හෙන්රි ෆෝඩ් කියන්නේ. යන්ත්‍ර සමගම ජීවත් වීම නිසා තමන්ගේ ශරීරයත් එක්තරා ආකාරයක යන්ත්‍රයක් ලෙස සිතන්න පටන් ගත්තා. ඒ වගේම මේ යන්ත්‍රයට ස්වභාවික ආහාර වර්ග ඒ ආකාරයෙන්ම ලබාදීමෙන් වැඩි යහපතක් වේ යැයි සිතුවා. ඔහු ඒවා හැඳින්වූයේ ස්වභාවික ඉන්ධන ලෙසයි. ඔහු මේ ස්වභාවිත ඉන්ධන ලෙස තෝරාගත්තේ පාරවල් අයිනේ වන ලැහැබ්වල වැඩුණු වල් පැලෑටි. උදේ ආහාරයට ඔහු ගන්නා සැන්ඩ්විඩ්වල මැදට ඔහු වල්පැලෑටි තබා කෑමට ගන්නට මේ නිසා පුරුදු වුණා. 

තණකොල පෙත්තන් කාපු ඇල්බට් අයින්ස්ටයින් 

ඇල්බට් අයින්සටයින් කියන්නේ ලෝකයේ හිටි සුප්‍රකට විද්‍යාඥයෙක්. සාපේකෂතාවාදය ලොවට හෙළිදරව් කළෙත් ඔහු. ඔහු කැමතිම කෑම වර්ග අතර බැදපු බිත්තර වගේම බිම්මලුත් තිබුණා.. ඊට අමතරව ඔහු රහසේම තවත් දෙයක් ආහාරයට ගන්නට හුරු වෙලා හිටියා. ඒ තමයි තණකොල පෙත්තන්. එය රහසක් විදියට තබාගන්නයි ඔහුට අවශ්‍ය කළේ. නමුත් කාලයත් එක්ක ඔහුගේ මේ රහස ලෝකයා දැගගත්තා. 

ෆේස්බුක් අයිතිකාරයාගේ අමුතු පුරුද්ද 

ෆේස්බුක් අයිතිකාරයා තමයි මාර්ක් සකර්බර්ග්. ඔහුට වර්ණ අන්ධතාවයක් තියෙන නිසා ෆේස්බුක් එක නිල්පාට කළ කතාව කවුරුත් දන්නවා. ඒ වගේම ඕනෑම කෙනෙකුට අනුමාන කළ හැකි මුරපදයක් යෙදූ නිසා ඔහුගේම ෆේස්බුක් ගිණුමට වෙන කෙනෙක් හොර රහසේ ගිය කතාවකත් ලෝකයා දන්නවා. ඔහුගේ කෑම පුරුද්දත් මේ වගේම තමයි. ඔහු වෙළෙඳ පළෙන් මිලට ගෙන මස් කෑමට ගන්න කැමැති නැති කෙනෙක්. මස් කනවා නම් ඔහුම මරා ගත්ත සතෙකුගේ මස් පමණයි ඔහු ආහාරයට ගන්න පුරුදු වෙලා හිටියේ. ඔහු කුකුල්ලු, උරෝ, එළුවෝ වගේ සතුන් මරා ආහාරයට ගැනීමට පුරුදු වෙලා හිටියා. කොහෙම වුනත් මේ පුරුද්ද ලෝකයා දැනගත්තොත් ඒක ඒ තරම් හොඳ මදි කියලා ඔහුට තේරුම් ගියා නිසා පසුව එය නතර කළා. 

ෂාරුක් ගේ අමුතු කෑම 

ගුවන් යානාවලදී ලබා දෙන ආහාර වර්ගවලට ගුවන් මගීන් ඒ තරම් කැමැත්තක් දක්වන්නේ නැති බව කියැවෙනවා. නමුත් බොලිවුඩ් නළු ෂාරුක් ඛාන් ඊට වඩා වෙනස්, ඔහු ඒ වගේ කෑමවලට දක්වන්නේ පුදුමාකාර කැමැත්තක්. ඒ වගේම ඔහු අයිස්ක්‍රීම් කෑමට ගන්න කොහොමටවත් කැමැති නෑ. අනෙක ඔහු කෑම ගන්නා අතරේ කවුරු හරි ඡායාරූපයක් ගත්තොත්, ඒ තමයි ඡායාරූප ශිල්පියා කරගත් ලොකුම වරද වෙන්නේ. ඔහුට ගුටි කන්නට සිද්ධ වෙන වැඩක් තමයි ඒ. ෂාරුක් කැමැති නෑ කෑම ගනිද්දී ඔහුගේ ඡායාරූප අරගන්නවාට. 

තණකොල කන ටෙනිස් ක්‍රීඩකයා 

විම්බෙල්ඩන් කියන්නේ ටෙනිස් ක්‍රීඩාව සඳහා දිනාගත හැකි ඉහළම කුසලානය. 2011 වසරේ දී මෙය දිනාගත්තේ සර්බියානු ක්‍රීඩකයකු වුණු නොවාර්ඩ් ජොකොවික්. ඔහු තනිවම ඉන්න හැම වෙලාවකම තණකොල කෑමට ගැනීමට පුරුදුව සිටියා. ටෙනිස් ක්‍රීඩා කිරීම සඳහා හොඳ ශාරීරික ශක්තියක් තණකොලවලින් ලැබෙන බවයි ඔහු විශ්වාස කළේ.