පුවත්පත්වලට ලිපි ලිවීම මාගේ විනෝදාංශයකි. මා ලියන ලිපි මගින් පාඨකයින් දැනුමක් ලබමින් ජීවිතයට යමක් එකතු කරගන්නේ නම් එය මාගේ සතුටකි. වේගයෙන් ඉදිරියට ඇදෙන තාක්ෂණික ලෝකයේ පුවත්පත් කියවන්නට තරම් විවේකයක් නොමැති අයවලුන් බොහෝය. තවකෙකු පුවත්පත් කියවන්නට කැමති නැත. අන්තර්ජාලයේ ද සිංහල බසින් සියලුම පුවත්පත් ඇති බැවින් තාක්ෂණයට ප්‍රිය කරන්නෝ පරිගණකයෙක් හෝ සිය ජංගම දුරකථනයෙන් ඒවා කියවති. එබැවින් මා ලියන ලිපි එවැනි පාඨක පිරිස් වෙත යොමු කරන්නට අදහස් කළ නිසා මෙවැනි බ්ලොග් අඩවියක් ගොඩනගන්නට සිතුවෙමි. මාගේ උත්සාහය කෙතරම් නම් සාර්ථකදැයි තීරණය වන්නේ ඔබගෙන් ලැබෙන ප්‍රතිචාර මතය. එබැවින් ඔබ මේ පිළිබඳ සිතන පතන දෑ මවෙත දන්වන්නට උනන්දුවන්නේ නම් එය මාගේ සතුටයි. ඔබ සැමට තෙරුවන් සරණයි!

Saturday, August 30, 2014

කිසිදා මල නොබැඳෙන දිල්ලියේ යකඩ කුලුණ - Mysteriuos Iron Pillar in India



අරුම  පුදුම ලෝකයේ කතාකරන්නට බොහෝ දේවල් තිබේ. එයින් එකක් වන්නේ ඉන්දියාවේ නවදිල්ලියේ කුටුබ් චතුරශ්‍රයේ පිහිටි අභිරහස් යකඩ කුලුණයි. මෙය මීටර් 7ක් හෙවත් අඩි 23ක් උසින් යුක්තය. පොලොව යටට මෙය තවත් මීටර් 1.07 ක් හෙවත් අඩි 3 අඟල් 8ක් ගිලාබැස තිබේ.  විෂ්කම්භය සෙන්ටිමීටර් 41ක් හෙවත් අඟල් 16.9 කි. මෙය ටොන් හයකටත් වඩා බරින් යුක්ත යැයි ගණන් බලා තිබේ. මෙතරම් පවසන මෙහි විශේෂත්වය කුමක්දැයි ඔබට දැන ගැටලුවක් ඇතිවනු ඇත මෙහි ඇති අරුමය, පුදුමය, විශේෂත්වය හා අභිරහස වන්නේ මෙම යකඩ කුළුනේ කිසිදා මළ නොබැඳීමය. 
 

කුලුණේ කොට ඇති පැරණි අක්ෂර

  
පසුගිය වසර 1600 මුළුල්ලේ කිසිඳු මළබැඳීමකට ලක්වෙමින් නොපැවතුණු මෙය පිළිබඳව විද්‍යාඥයෝ විවිධ අදහස් පළකරන්නට වූහ. මෙය කෙසේ නිෂ්පාදනය කරන්නට ඇතිද යන්න පිළිබඳව කිසිවකුට හෝ සොයාගන්නට නොහැකි විය. වර්ෂ 1020 දී දිල්ලි නගරය ගොඩනැංවූ ආංග්පාල් නම් රජු විසින් මෙය මෙහි ගෙන ආ බැව් විශ්වාස කෙරේ. 


19වැනි සියවසේ දෙවැනි කාර්තුව තෙක් මෙය විද්‍යාඥයින්ගේ අවධානයට ලක්වූයේ නැත. මෙම කුලුණ පිළිබඳ මුළින්ම වාර්තාගත  කරන්නේ ඉන්දියාවේ සිටි බ්‍රිතාන්‍ය සොලුදාදුවන්ය. කැප්ටන් ආර්චර් මේ අතුරින් එක අයෙකි. ඔහු මෙහි කොට ඇති අක්ෂර කිසිවක් කියවාගත නොහැකි බව වාර්තා කොට තිබිණි. පසුව බ්‍රිතාන්‍ය පුරාවිද්‍යාඥයකු වූ ජේම්ස් ප්‍රින්සෙප් මෙහි ඇති ඉපැරණි අක්ෂර කියවා ඒවා ඉංග්‍රීසියට පරිවර්තනය කළේය. එහි චන්ද්‍රා නමැති පාලකයකු පිළිබඳ සඳහන්ව තිබිණි. 
 

1905 දී ගත් ඡායාරූපයක්


ඉපැරණි කුලුණක් වූ මෙහි මළ නොබැඳීමේ රහස සොයාගන්නට බොහෝ දෙනෙකු උත්සාහ කළහ. පසුව මෙය මෙතැනින් ගළවා රසායනික පරීක්ෂණයකට ලක් කෙරිණි. එහිදී අනාවරණය වූයේ මෙම කුළුනේ යකඩ සංයුතිය වර්තමාන යකඩ සමඟ සසඳාබැලීමේදී එහි කාබන්වලින් තොර හෝ කාබන් ඉතා ස්වල්ප ප්‍රමාණයක් පවතින බවය. එනම් පිරිසිදු යකඩ නොවන බවයි. පිරිසිදු යකඩ නොවේ නම් මෙය මළබැඳිය යුතු නමුත් එහි මළ බැඳුණු සළකුණක් හෝ නැත. 


වර්ෂ 1963 දී ඉන්දියාවේ පුරාවිද්‍යා පර්යේෂණ ආයතනයේ රසායන විද්‍යාඥයකු වන එම්.කේ. ඝෝෂ් පැවසූයේ මෙය යකඩ උණුකොට අච්චුවකට දැමීමෙන් තැනූවක් නොව මේ හැඩය ඇතිවනතුරු මෙය යකඩ කුට්ටියකට මිටියෙන් පහරදීමෙන් තනන ලදදක් බවය. මේ සඳහා කම්කරුවන් 120 දෙනෙකු සතිදෙකක් තිස්සේ වෙහෙස වන්නට ඇති බව  ද ඔහු පවසයි. 


වර්ෂ 2002දී කාන්පූර් හි ලෝහ විද්‍යාඥයකු වන ආචාර්ය බාලසුබ්‍රමනියම් පැවසූයේ මෙම කුලුණ වටා ඔක්සිජන්, යකඩ හා හයිඩ්‍රජන් තට්ටුවක් තවරා ඇති  බවය. මෙම තට්ටුව නිසා මෙය මළබැඳීමෙන් වැළකෙන බව ඔහු පැවසූයේය. අනෙක මෙම තට්ටුවේ ඇති විශේෂත්වය වන්නේ එය කාලයත් සමඟ සෙමින් වර්ධණය වීමය. 


මෙම කුලුණට පිටුපා හේත්තුවී පිටුපසට දෑත් දිගුකොට එසේම හේත්තු වූ තවත් පුද්ගලයකුගේ දෑත් ස්පර්ශකිරීමෙන් වාසනාව පෑදෙන බැව් මිනිසුන් තුළ විශ්වාසයක් තිබිණි. නමුත් මෙම විශ්වාසය කුළුනේ පැවැත්මට තර්ජනයක් වනු ඇතැයි විශ්වාස කෙරුණු බැවින් 1997 දී මෙය වටා ලෝහ වැටක් ඉදිකරනු ලැබිණි. 


මෙම කුළුනේ යම්කිසි අභිරහසක් තිබුණ ද නොතිබුණ ද මෙය ලෝහ විද්‍යාඥයින්ට සහ එය හදාරන්නන්ට කදිම ආදර්ශයක් බවට පත්ව ඇතිබව නම් පැහැදිලි කරුණකි. 


Tuesday, August 26, 2014

කෙල්ලන්ගේ සහ කොල්ලන්ගේ සෞඛ්‍යය පිරිහෙමින් පවතී - Unhealthy Youngs and Teens



දැනට වසර 50 කට පෙර මිනිසුන් වශයෙන් අප අත්විඳි සෞඛ්‍ය සම්පන්න බව වර්තමානය වන විට සැළකිය යුතු තරමින් පහල බැස ඇති බැව් නිකමට වටපිට දෙස නෙත යොමු කිරීමෙන් මොනවට පැහැදිලි වේ. තාක්ෂණය කෙතරම් දියුණු වී තිබුණද, මිනිසාගේ සෞඛ්‍යය නම් දිනෙන් දින පිරිහෙන බැව් පෙනේ. අපගේ දෙමාපියන් හෝ මුත්තණු මිත්තණියන් අප අද පසුකරමින් පවතින වයසේදී එකල අත්විඳි තරම් සෞඛ්‍ය තත්වයක් අද අපි අත්විඳින්නේ නැති බැව් පර්යේෂණවලින් ද හෙළිවී තිබේ. අද වැඩිහිටි වියෙහි පසුවන බොහෝ දෙනෙකු මෙයට පෙර පරම්පරාවට අයත් වූවන්ට වඩා අධික රුධිර පීඩනයෙන්, දියවැඩියාවෙන්, අධික තරබාරුබවින් පෙළෙන බැව් සොයාගෙන තිබේ. එනම් වර්තමාන පරම්පරාවේ සෞඛ්‍යය ඊට පෙර පරම්පරාවට වඩා බෙහෙවින් පහත අඩියක පවතී. මෙම පර්යේෂණය සිදුකොට ඇත්තේ හෘද රෝග වැළැක්වීම පිළිබඳ යුරෝපීය ජර්නලය මගිනි. 


අවුරුදු 20, 30, 40 හා 50 වියෙහි පසුවූවන් අළලා රුධිර පීඩනය හා බර සම්බන්ධව වසර 25කට වැඩි කාලයක් තිස්සේ කරගෙන ගිය පර්යේෂණයෙන් හෙළිවී ඇත්තේ තරුණ පරම්පරාවේ පරිවෘත්තීය සෞඛ්‍යය ඉතා පහත් මට්ටමකට වැටී ඇති බවය. 


මෙම අධ්‍යයනයෙන් හෙළි වී ඇත්තේ අවුරුදු 30 ගණන්වල පසුවන පිරිමින්, එයට පෙර පරම්පරාවේ මෙම වයස් කාණ්ඩවලම පසුවූ පිරිමින්ට වඩා අධික ලෙස තරබාරුවීමේ අවධානම 20% කින් පමණ ඉහළ බවය. අවුරුදු 20 ගණන්වල පසුවන කාන්තාවන් දැනට අවුරුදු 10කට පෙර මෙම වයස්වලම පසුවූ කාන්තාවන්ට වඩා තරබාරුවීමේ අවධානම දෙගුණයක් බව ද මෙයින් හෙළිවී තිබේ. 


ගැහැණු හා පිරිමි භේදයකින් තොරවම තරුණ පරම්පරාවන් අතර රුධිර පීඩනය ඉහළ මට්ටමකට නැග තිබේ. එමෙන්ම තරුණ වියෙහි පසුවන්නන් දියවැඩියාවට ගොදුරුවීමේ අවධානම එයට පෙර පරම්පරාවට වඩා ඉහළය. 


මහජන සෞඛ්‍යය සහ පරිසරය පිළිබඳ ඕලන්ද ජාතික ආයතනයේ ප්‍රධානී සහ ගත් කතුවරයකු ද වන ගර්බන් හල්සේග් පවසන්නේ තරුණ පරම්පරාව පරිවෘත්තීය සෞඛ්‍යය පිරිහීම අතින් අතින් වසර 15ක් පමණ ඉදිරියෙන් සිටිනා බවය.  අලුත්ම පරම්පරාවන්ට අයත් පිරිසේ සෞඛ්‍ය තත්වය මෙයටත් වඩා පිරිහුණු මට්ටමක පවතින බැව් ඔහු පවසයි. 


උදාහරණයක් ලෙස තරබාරුබව පිළිබඳ කතා කරන්නේ නම් වර්තමාන පරම්පරාවේ අවුරුදු 40 ගණන්වල පසුවන්නන්ගේ මෙම අවදානම මෙයට පෙර පරම්පරාවට අයත්වූවන්ගේ අවුරුදු 55 ගණන්වල පසුවන්නන්ගේ අවදානමට සමාන බව ඔහු වැඩිදුරටත් පවසයි. 


මෙයින් පැහැදිලි වන්නේ තරුණ පරම්පරාව පැරණි පරම්පරාවට වඩා සෞඛ්‍යය පිරිහීම අතින් වසර 15ක් ඉදිරියෙන් සිටිනා බවය. 


මෙම තොරතුරුවලින් පැවසෙන තවත් දෙයක් වන්නේ තරුණ පරම්පරාව සිය සිරුරේ බර තත්වය සෞඛ්‍ය සම්පන්න මට්ටමකින් පවත්වාගෙන යායුතු බවත්, ශාරීරික ක්‍රියාකාරිත්වය දැනට වඩා වැඩිදියුණු කරගතයුතු බවත්, සමබල ආහාර පාන ගැනීම පිළිබඳ වැඩි අවධානයක් යොමුකළ යුතු බවත්ය.  මෙම පර්යේෂණයෙන් හෙළිවී ඇති තවත් විශේෂ කරුණක් වන්නේ ඉහළ ආදායම් ලබන රටවල තරුණයින් අතර දුම්පානය අඩුවී ඇති නිසා ඔවුන් පෙනහළු පිළිකා වැනි රෝගවලට ලක්වීමේ අවදානම තුරන්ව ගියත්, ඒ වෙනුවට තරබාරුබව හා දියවැඩියාව කෙමෙන් වැඩිවෙමින් පවතින බවය. තරුණ පරම්පරාව සිය වර්තමාන අවදානම් තත්වය පිළිබඳ අවධානය යොමු කරන්නේ නම් ඔවුන්ගේ ආයු අපේක්ෂණය සැළකිය යුතු මට්ටමකින් ඉහළ තත්වයකට පත්කළ හැකි බවත් මෙම පර්යේෂණය සිදුකළ අය පවසති. නමුත් තරුණ පරම්පරාව මෙය තේරුම් ගන්නේද යන්න පිළිබඳ සහතිකයක් විය නොහැකි බව පර්යේෂක කණ්ඩායම වැඩිදුරටත් පවසයි.

Sunday, August 24, 2014

විෂ්ණු ෂර්මන් - Vishnu Sharma


විෂ්ණු ෂර්මන් යනු පංචතන්ත්‍රය නම් උපමා ග්‍රන්ථය රචනා කළේ යැයි සැළකෙන ඉන්දියානු විද්වතකු සහ ලේඛකයෙකි. පංචතන්ත්‍රය සම්පාදනය කළේ යැයි සැළකෙ නිවැරදි කාලවකවානුව පිළිබඳ නිශ්චිත අදහස් නැතත් එය ක්‍රි.පූ. 1200 - ක්‍රි.ව. 300 අතර යැයි විශ්වාස කෙරේ.ඇතැම් විද්වතුන් පවසන්නේ විෂ්ණු ෂ්ර්මන් ක්‍රි.පූ. 3 වැනි සියවසෙහි ජීවත් වූ බවය. 

ලෝකයේ භාෂාවන් වැඩිම සංඛ්‍යාවකට පරිවර්තනය වූ ආගමික ආගමික නොවන ග්‍රන්ථය වන පංචතන්ත්‍රය ක්‍රි.ව. 570 දී  බොර්සූයා විසින් පාල්වි බසට (පරිසියානු බසකි) ද, ක්‍රි.ව. 750දී පරිසියානු විද්වතකු වූ අබ්දුල්ලා ඉබන් අල්-මුකාෆා විසින් ‛කාලිලා වා දිම්නා’ නමින් අරාබි බසටත් පරිවර්තනය කරනු ලැබිණි

පංචතන්ත්‍රය කෘතියේ පෙරවදනේ ඇති සඳහනට අනුව එය සම්පාදනය කරන ලද්දේ විෂ්ණු ෂර්මන් බව පැහැදිලිය. මේ හැරුණු විට ඔහු පිළිබඳ සොයාගන්නට වෙනත් බාහිර තොරතුරක් නැත. මෙවැන්නෙක් සැබවින්ම ජීවත් වූයේද, නැතහොත් මෙම නම වෙනත් කතුවරයකු වෙනුවට යොදාගත් ව්‍යාජ නමක් ද යන්න පිළිබඳව ද ඇතැම් විද්වත්හු සැක පහල කරති. පංචතන්ත්‍රයේ සඳහන් වී ඇති විවිධ භූගෝලීය තොරතුරු, සතුන් ආදිය පිළිබඳ සළකා බැලීමේදී ඔහු ඉපදී ඇත්තේ කාශ්මීරයේ බව විදුවත්හු පවසති.


විනාකිරි හිතන තරමටම නරකත් නැහැ - Vinegar is not so bad as we think



සිංහල අලුත් අවුරුද්දට අප නිවෙස්වල අච්චාරුවක් වැරදුනේ නැත. මැලේ අච්චාරුවට වඩා අපට සුපුරුදු සිංහල අච්චාරුවට අපි බොහෝ කැමැත්තක් දක්වන්නෙමු. මෙතරම් කැමැත්තක් පැවති අච්චාරුව එක් සිංහල අවුරුද්දකදී පිළියෙල කරන්නට ඕනෑකමක් දක්වනු පෙනුනේ නැත. එයට හේතු කුමක්දැයි සොයා බැලූ විට දැනගන්නට ලැබුණේ අච්චාරු තැනීමට ගන්නා විනාකිරිකෑමට හිතකර දෙයක් නොවන බැවින් අච්චාරු සාදන්නේ නැති බවය. තවදුරටත් සොයා බැලූ විට දැනගන්නට ලැබුණේ වර්තමානය වනවිට මෙම අහිතකර තත්වයනිසා බොහෝ නිවෙස්වල සිංහල අච්චාරුව සාදන්නේ නැති බවය. බොහෝ දෙනෙක් වඩාත් පහසුවෙන් මැලේ අච්චාරු සාදාගෙන අනුභව කරන්නට පුරුදුව සිටිති. විනාකිරු මෙතරම් අගුණ දෙයක්දැයි සොයා බලා අනෙක් අයටත් පවසන්නට සිතුනේ එවිටය.

සැබැවින්ම විනාකිරි යනු කුමක්ද? විනාකිරිවල ප්‍රධාන වශයෙනම අඩංගු වන්නේ ඇසිටික් අම්ලය (CH3COOH) හා ජලය යි. ඇසිටික් අම්ලය තනාගනු ලබන්නේ ඇසිට්ක් අම්ල බැක්ටීරියාව මගින් ඔෆෙතනෝල් (ofethanol) පස්සවා ගැනීමෙනි. මේ විද්‍යාත්මක ලෙස විස්තර කිරීමයි. අප දන්නා පරිදි අප රටේ විනාකිරි නිපදවාගනු පොල් රා පස්සවා ගැනීමෙනි. මීට අමතරව තල් විනාකිරි ද තිබේ. ඊටත් අමතරව අපේ රටේ එතරම් දකින්නට නැති වුවද විවිධ පළතුරුවලින් නිපදවාගනු ලබන විනාකිරි ද දක්නට ලැබේ.  ඇපල්, උක්, රටඉඳි මෙන්ම මීපැණිවලින් ද විනාකිරි තනනු ලබයි. විනාකිරි නිපදවාගැනීමේදී සිදුවනු පැස්සවීමේ ක්‍රියාවලිය දීර්ඝවන තරමට ඇසිටික් අම්ලයේ ඇති සැර බව අඩුවෙයි. කෙසේ නමුත් මෙසේ ස්වභාවිකව නිපදවාගනු ලබන විනාකිරි සැබවින්ම සෞඛ්‍යයට අහිතකරද?

විනාකිරි පිළිබඳ පොදු වෛද්‍ය මතය මෙසේ සඳහන් කළ හැකිය.

විනාකිරි සුළු ප්‍රමාණයෙන් පරිභෝජනයකිරීමේ ගැටලුවක් නැත. නමුත් විශාල පරිමාණයෙන් ගැනීම අහිතකරවිය හැකිය. විනාකිරි යනු ආම්ලීය ද්‍රාවණයකි. මෙයින් අපගේ සෞඛ්‍යයට වාසි ගෙන දෙන්නේ නැතැයි පවසන්නේ නම් එය අසත්‍යයකි. විනාකිරිවල ඇති ඇසිටික් අම්ලය මගින් සෞඛ්‍යමය වශයෙන් වාසි පවතී. විනාකිරි මගින් අපගේ අභ්‍යන්තර ආහාර මාර්ග පද්ධතිය පිරිසිදු කරයි. ඒ ශරීරය තුළ ඇති අහිතකර බැක්ටීරි වර්ග විනාශ කිරීමෙනි. නමුත් සිරුර සෞඛ්‍ය සම්පන්නව පැවතීමට නම් ඇතැම් බැක්ටීරියා වර්ග අවශ්‍ය වේ. අපට හිතකර බැක්ටීරියා වර්ග විනාශ කරන දමනා බැවින් අධික විනාකිරි පරිභෝජනය අහිතකර යැයි පැවසෙන්නේ එබැවිනි.

ජලය සමඟ හොඳින් කවළම් කරගත් විනාකිරි මේස හැඳි දෙකක් පමණ දිනකට පරිභෝජනය කිරීමේ වරදක් නැති බව වෛද්‍ය මතයයි. මෙය සෘජු ලෙස පානය කරනවාට වඩා ආහාරවලට එක්කරගැනීම වඩාත් සුදුසු වේ. මේ ආකාරයට හිතකර ප්‍රමාණයෙන් විනාකිරි පරිභෝජනය කරන්නේ නම් එයින් අපට ලැබිය හැකි ප්‍රයෝජනයන් ද බොහෝය. විශේෂයෙන් අපගේ ආහාර ජීර්ණය සඳහා විනාකිර්වලින් ලබාගත හැක්කේ මහඟු පිටිවහලකි.

කැල්සියම් අවශෝෂණය

අම්ල සහිත ආහාර වැඩිවශයෙන් ගැනීමෙන් ශරීරයේ කැල්සියම් අවශෝෂණය කරගැනීමේ හැකියාව ඉහළ යන බව වෛද්‍යවරු පවසති. එබැවින් අහිතකර නොවන මටටමින් දෛනිකව විනාකරි ආහාරවලට එක්කරගැනීමෙන් මේ මහඟු ප්‍රතිඵලය අතිවිඳිය හැකි වේ. මෙය වඩාත්ම ප්‍රයෝජනවත්වන්නේ කාන්තාවන්යට. කැලිසියම් ඌනතාවය බොහෝ විට මතුවන්නේ කන්තාවන් තුළිනි. අස්ථි තුනීවීම, ඔස්ටියෝපොරෝසිස වැනි රෝගවලින් වැළකීම සඳහා ආහාරයට විනාකිරි එක්කරගැනීම සුදුසු වේ. ඇතැම් කාන්තාවනට කිරිවල අඩංගු ලැක්ටෝස් ජීර්ණයකරගත නොහැකි රෝගයක් වැළඳේ. මේ නිසා ඔවුනට විවිධ ජීර්ණ රෝග ඇතිවන්නට පුලුවන. මෙම ජීර්ණ ගැටලුවල ප්‍රතිඵලය ලෙස සිරුරෙන් කැල්සියම් බැහැරවන්නට පුලුවන. විනාකිරි ආහාරයට එක්කරගැනීමේ වාසිය ලැබෙන්නේ එවිටය.

රුධිරයේ සීනි මට්ටම පාලනය

දියවැඩියාවේ දෙවැනි අවස්ථාවේ පසුවන රෝගීන්ගේ රුධිරයේ සීනි මට්ටම පාලනය කරන්නට විනාකිරිවලින් මහඟු පිටිවහලක් ලැබෙන බැව් මෑතකදී කළ පර්යේෂණයකින් හෙළිව තිබේ. මෙම අවස්ථාවේදී දියවැඩියාව පාලනය කරගත නොහැකි වුවහොත් අන්ධවීම, ලිංගික බෙලහීනතාවය, හැඟීම් දැනීම නොමැතිවීම වැනි තත්වයන්ට ගොදුරුවිය හැකිය. එමෙන්ම හෘද රෝග වැනි තත්වයන් ද ඇතිවිය හැකිය. දියවැඩියාවේ දෙවැනි තත්වයේ පසුවන රෝගීන්ගේ සිරුර ඉන්සියුලින් හෝමොනයේ ක්‍රියාකාරීත්වයට ප්‍රතිරෝධයක් ඇති කරයි. සිරුර මගින් සාමාන්‍යයෙන් ඉන්සියුලින් රුධිරනාලවලට නිකුත්කරනු ලබන්නේ ආහාරයක් සිරුරට ඇතුළුවූ විටය. ඉන්සියුලින්වල කාර්යභාරය වන්නේ සෛලවලට ආහාරවල ඇති කාබෝහයිඩ්‍රේට්වලින් ග්ලූකෝස් හෙවත් සීනී උරාගැනීමට උදව්කිරීමය. නමුත් සිරුර මගින් ඉන්සියුලින්වලට ප්‍රතිරෝධයක් දක්වනවිට  සෛලවලට සීනි උරාගැනීම සිදුනොවී රුධිරය තුළ සීනි තැන්පත්මක් සිදුවේ. මෙහිදී ශක්තිය නිපදවන්නට සෛලවලට සීනී උරාගැනීමට බාධාවක් ඇතිවේ. එබැවින් සීනි උරාගැනීම සඳහා සිරුර විසින් වැඩි වශයෙන් ඉන්සියුලින් නිකුත්කරන්නට පටන්ගනී. මෙහිදී සිදුවන්නේ රුධිරයේ වැඩි වශයෙන් සීනි තැන්පත්වීමය. කාලයත් සමඟ මෙසේ අධිකව සීනි තැන්පත්වීම නිසා ස්නායු පද්ධතියට හානි සිදුවේ. එබැවින් රුධිරයේ සීනි මට්ටම පාලනය කිරීම අතිශය වැදගත්ය. විනාකිරි පිහිටට පැමිණෙන්නේ එම අවස්ථාවේදීය. විනාකිරි ආහාරයට එක්කරගැනීම නිසා රුධිරයට සීනි උරාගැනීමේ වේගය බොහෝ සෙයින් අඩුවන බැව් සොයාගෙන තිබේ. එවිට රුධිරයේ සීනි තැන්පත්වීම අඩු වේ. එමෙන්ම සිරුරේ ඉන්සියුලින් සංවේදීතාවය වැඩිකරන්නට ද විනාකිරි හේතුවන බැව් සොයාගෙන තිබේ.

පිළිකා වැළඳීම හා වයස්ගතවීමට එරෙහිවන්නට ඇති වඩාත් හොඳම අවිය වන්නේ නැවුම් එළවලු හා පලතුරුය. මේවායේ ඇති ප්‍රතිඔක්සිකාරක මගින් සෛල හානීවීම අඩුකරයි. එළවලු හා පළතුරුවලට විනාකිරි තරමක් එක්කරගැනීමෙන් ඒවායේ ඇති මෙම ගුණය තවත් ඉහළ නංවන බැව් සොයාගෙන තිබේ.

මීට අමතරව විනාකිරි හිතකර ප්‍රමාණයෙන් ගැනීමෙන් බොහෝ සෞඛ්‍යමය ප්‍රතිලාභයන් ද අත්වන බැව් සොයාගෙන ඇති අතර ඒවා තවමත් පර්යේෂණ මට්මේ පවතින බැවින් බොහෝ තොරතුරු හෙළිවනු ඇත්තේ නුදුරු අනාගතයේදීය.

කෘමී සතුන් දෂ්ඨකිරීම, අව්රශ්මියෙන් සම පිළිස්සීම, කැපීම් හා සීරීම් සඳහා ප්‍රතිකාරයක් ලෙසින් ද, ආහාරවල ඇති දුර්ගන්ධය නැතිකරන්නක් ලෙස ද, හිස පීරන පනා හා බුරුසු වැනි උපකරණ පිරිසුදු කරන්නක් ලෙස ද, මුඛ දු්ර්ගන්ධය නැතිකොට සුදුවන් දත් දෙපළක් ලබාගැනීමට ද, නිය ආලේපනවල දිදුලන බව වැඩිවේලාවක් රඳවා තබාගැනීමට ද විනාකිරි උපකාරීවන බැව් සොයාගෙන තිබේ.

මෙහි සඳහන් කෙරුණේ විනාකිරිවලින් ලැබිය හැකි ප්‍රයෝජනවලින් ස්වල්පයක් පමණි. එය ඔබගේ මුළුතැන්ගෙයින් පිටමං කළ යුතු දෙයක් නොව අනිවාර්යයෙනම් තිබිය යුතු දෙයක් බැව් දැන් ඔබට අවබෝධවන්නට ඇත. එබැවින් මෙවර සිංහල අවුරුද්දට හිතේ දෙගෙඩියාවකින් තොරව අච්චාරුවක් පිළියෙළකර ගැනීමට ද දැන් කිසි බාධාවක් නැත.