පුවත්පත්වලට ලිපි ලිවීම මාගේ විනෝදාංශයකි. මා ලියන ලිපි මගින් පාඨකයින් දැනුමක් ලබමින් ජීවිතයට යමක් එකතු කරගන්නේ නම් එය මාගේ සතුටකි. වේගයෙන් ඉදිරියට ඇදෙන තාක්ෂණික ලෝකයේ පුවත්පත් කියවන්නට තරම් විවේකයක් නොමැති අයවලුන් බොහෝය. තවකෙකු පුවත්පත් කියවන්නට කැමති නැත. අන්තර්ජාලයේ ද සිංහල බසින් සියලුම පුවත්පත් ඇති බැවින් තාක්ෂණයට ප්‍රිය කරන්නෝ පරිගණකයෙක් හෝ සිය ජංගම දුරකථනයෙන් ඒවා කියවති. එබැවින් මා ලියන ලිපි එවැනි පාඨක පිරිස් වෙත යොමු කරන්නට අදහස් කළ නිසා මෙවැනි බ්ලොග් අඩවියක් ගොඩනගන්නට සිතුවෙමි. මාගේ උත්සාහය කෙතරම් නම් සාර්ථකදැයි තීරණය වන්නේ ඔබගෙන් ලැබෙන ප්‍රතිචාර මතය. එබැවින් ඔබ මේ පිළිබඳ සිතන පතන දෑ මවෙත දන්වන්නට උනන්දුවන්නේ නම් එය මාගේ සතුටයි. ඔබ සැමට තෙරුවන් සරණයි!

Monday, August 5, 2019

උසේ හැටියට බර පහසුවෙන්ම සොයා ගනිමු



නීරෝගී සිරුරක් පවත්වාගෙන යන්නට සෑමදෙනෙක් තුළම ඇත්තේ ඉමහත් කැමැත්තක්. නීරෝගී සිරුරක් පවත්වාගෙන යාම සඳහා බොහෝ දෙනෙක් විවිධ උපක්‍රම අනුගමනය කරනවා. නිතර ව්‍යයාම කිරීම, ව්‍යයාම සිදුකරන්නට පහසුකම් ඇති මධ්‍යස්ථානවලට සම්බන්ධ වී ඒවායේ සිටින විශේෂඥයින්ගේ උපදෙස් පැතීම, වෛද්‍ය උපදෙස් ලබාගැනීම වැනි විවිධ දෑ මේ අතරින් විශේෂයි. ව්‍යායාම කිරීම සැබැවින්ම යහපත් දෙයක්. ව්‍යායාම කළ ද නොකළ ද ඔබගේ සිරුර තරබාරු තත්වයට පත්වීමෙන් වළක්වා ගැනීම සඳහා සුදුසු පියවර අනුගමනය කිරීම නම් සෞඛ්‍යය පැත්තෙන් ගත් කල හිතකර තත්වයක්. මන්ද තරබාරු තත්වය සමඟ ලෙඩ රෝග ගණනාවක්ම අප කරා පැමිණෙන නිසයි. ඔබ තරබාරු ද නැති ද යන්න පහසුවෙන්ම සොයාගන්නට වෛද්‍යවරයෙකු හෝ ව්‍යායාම සම්බන්ධ උපදේශකවරයකු හෝ හමුවට යා යුතුම නැහැ. මේ සඳහා ඔබ දැනගත යුතු වන්නේ එක් සරල දෙයක් පමණයි. එය හඳුන්වන්නේ දේහ ස්කන්ධ පරිමාණය ( body mass index - BMI  )  නමින්. බොහෝ දෙනෙක් දැනටමත් මේ ගැන අසා ඇතිවාට සැකයක් නැහැ.

දේහ ස්කන්ධ පරිමාණය මඟින් සිදු කෙරෙන්නේ ඔබගේ උස සහ බර මත පදනම්ව සිරුරේ ඇති මේද ප්‍රමාණය ගණනය කිරීමයි. මෙය පුද්ගලයාගෙන් පුද්ගලයාට වෙනස් වුවද අපට මෙහිදී පොදුවේ ලෝකයේ සැලකිල්ලට ලක් කෙරෙනා ප්‍රමාණයන් පිළිබඳව මෙහිදී සඳහන් කළ හැකියි. මේ පිළිබඳ යම් අවබෝධයක් ඇති කර ගැනීම මඟින් සිරුර තරබාරු නොවී පවත්වාගෙන යන්නට ඔබට අවස්ථාවක් සැලසෙනවා.
දේහ ස්කන්ධ පරිමාණයට අනුව සිරුරක තත්වය කොටස් කිහිපයකට වර්ග කරන්නට පුළුවන්. එනම්,

1. බරින් අඩු
2. සාමාන්‍ය
3. බරින් වැඩි
4. තරබාරු

දැන් ඔබ දැන ගත යුතු දෙය වන්නේ ඔබ පසුවන්නේ මේ අතරින් කුමන වර්ගයේ ද යන්නයි. මන්ද සිරුරේ මේද තත්වය වැඩිවත්ම එය බොහෝ සෞඛය ගැටලු ඇතිකරන්නට හේතුවන නිසයි. අන්තර්ජාලය සම්බන්ධ වී ගූග්ල්සෙවුම් යන්ත්‍රයෙන් BMI Calculator  යනුවෙන් යතුරු ලියනය කොට සෙව්වේ නම් දේහ ස්කන්ධ පරිමාණයක් ගණනය කිරීම සඳහා වූ වෙබ් පිටු දහස් ගණනක් පෙන්නුම් කරයි. සිරුරේ උසට හා බරට අනුව මෙසේ දේහ ස්කන්ධ පරිමාණය ගණන කිරීම ගණිතමය වශයෙන් නිවැරදි වුවත් එමඟින් සර්ව සම්පූර්ණ නිවැරදි තත්වයක් පෙන්නුම් නොකරනා බව ද සිහියේ තබාගත යුතුයි. නමුත් මෙයින් පෙන්වන ප්‍රතිඵලය මඟින් ඔබගේ සිරුර වඩාත් සෞඛ්‍ය සම්පන්නව පවත්වාගෙන යාම සඳහා ලැබෙන්නේ මහඟු උපකාරයක් බව නම් කිව යුතුයි.

අන්තර්ජාලය ඔස්සේ දේහ ස්කන්ධ පරිමාණය ගණනය කරගත හැකිවුවද එය ඔබටම කරගන්නට ද පුළුවන්.  සඳහා මෙහි සඳහන් කොට ඇති ක්‍රමය අනුගමනය කළ හැකියි. මෙය ක්‍රම දෙකක් ඔස්සේ සිදු කළ හැකියි.

1. ඔබ සිරුරේ බර මැන ගත්තේ රාත්තල්වලින් නම් උස මැන බැලිය යුත්තේ අඟල්වලිනි. මෙසේ මැන ගත් බර ඔබේ උසෙහි වර්ගයෙන් බෙදා 703න් ගුණ කිරීමෙන්  දේහ ස්කන්ධ පරිමාණය ලබාගන්නට පුළුවන්.

උදා. බර රාත්තල් 176 නම් හා උස අඩි 5 අඟල් 8 නම් මුලින්ම උස අඟල්වලට හරවන්න. එවිට 68 වේ. එහි වර්ගය 4624ක් වෙනවා. එවිට
(176/4624) x 703. පිළිතුර 26.7 යි.

2. ඔබ සිරුරේ බර මැන ගත්තේ කිලෝග්‍රෑම්වලින් නම් උස මැන බැලිය යුත්තේ මීටර්වලිනි. මෙසේ මැනගත් බර ඔබේ උස ප්‍රමාණයෙහි වර්ගයෙන් බෙදීමෙන් දේහ ස්කන්ධ පරිමාණය ලබාගන්නට පුළුවන්.

ඔබේ පහසුව සඳහා මම BMI Calculator එකකුත් දැම්මා



උදා. බර කිලෝග්‍රෑම් 80 නම් හා උස මීටර් 1.72 යැයි සිතන්න. මුලින්ම උසෙහි වර්ගය සොයා ගන්න. එය 2.95 වෙනවා. එවිට

(80/2.95). පිළිතුර 27.1 යි.

දේහ ස්කන්ධ පරිමාණය ගණනය කිරීම සඳහා පහත සඳහන් කරුණු සාමාන්‍යයෙන් සැලකිල්ලට ගැනෙනවා.

1. පුද්ගලයකුගේ ස්ත්‍රී පුරුෂ භාවය
2. පුද්ගලයකුගේ වයස
3. පුද්ගලයකුගේ උස අඩි හා අඟල්වලින් හෝ මීටර්වලින්
4. පුද්ගලයකුගේ බර රාත්තල් හෝ කිලෝග්‍රෑම්වලින්

දේහ ස්කන්ධ පරිමාණය ගණනය කිරීමේදී මෙම කරුණු සියල්ල සැළකිල්ලට ගැනෙනවා. ඒ අනුව ලැබෙන ප්‍රතිඵලයට අනුව ඔබගේ සිරුර පවතින්නේ කුමන තත්වයක ද යන්න පිළිබඳ අවබෝධයක් ලබාගන්නට පුළුවන්. සාමාන්‍යයෙන් වයසත් සමඟ දේහ ස්කන්ධ පරිමාණයේ සාමාන්‍ය තත්වය පහත පරිදි වෙනවා.

වයස  දේහ ස්කන්ධ පරිමාණය
1. අවුරුදු 15 16 - 17
2. අවුරුදු 20 24 - 26
2. අවුරුදු 30 26 - 27
3. අවුරුදු 40 27 - 28
4. අවුරුදු 50  28 - 29
5. අවුරුදු 60 27 - 28

මෙම කරුණුවලින් පෙනෙන දෙයක් වන්නේ දේහ ස්කන්ධ පරිමාණය වයසත් සමඟ කෙමෙන් වර්ධනය වී යළිත් කෙමෙන් අඩුවන්නට පටන් ගැනෙනා බවයි. සාමාන්‍ය මෙය අඩුවන්නට පටන් ගැනෙන්නේ අවුරුදු 57 දී පමණ බව සොයාගෙන තිබෙනවා.

ඔබගේ සිරුරේ දේහ ස්කන්ධ පරිමාණය ගණනය කිරීමෙන් ලැබෙනා ප්‍රතිඵලයට අනුව සිරුර පවතින්නේ කුමන තත්වයකද යන්න සොයාගත හැකි බැව් මෙහි සඳහන් කළා. ඒ අනුව පහත වර්ග කොට ඇති ආකාරය පිළිබඳ සැලකිලිමත්වීමේදී ඔබගේ සිරුර පිළිබඳ අවබෝධයක් ලබාගැනීමට හැකියාව ලැබෙනවා.

1. දේහ ස්කන්ධ පරිමාණය 18.5ට අඩු නම්  බරින් අඩු
2. දේහ ස්කන්ධ පරිමාණය 18.5 - 24.9 නම් සාමාන්‍ය
3. දේහ ස්කන්ධ පරිමාණය 25 - 29.9 නම් බරින් වැඩි
4. දේහ ස්කන්ධ පරිමාණය 30ට වැඩි නම් තරබාරු

මෙම වර්ගීකරණය අනුව ඇතැම් විට ඔබ දැන් සිටින්නේ බරින් වැඩි හෝ තරබාරු තත්වයේ වන්නට පුළුවන්. එය එක් අතකින් වහා කලබල විය යුතු තත්වයක් ද නොවේ. නමුත් නොසලකා හැරිය හැකි තත්වයක් ද නොවේ. ඔබගේ සිරුර තරබාරු තත්වයට පත්වීමත් සමඟ හෘද රෝග, රුධිර නාලවල රුධිර කැටි සිරවීම හෝ දියවැඩියාව වැනි ලෙඩ රෝග ගණනාවක් ද ඔබ කරා පැමිණෙන බවත් මතකයේ තබා ගත යුතුයි. ඔබගේ දේහ ස්කන්ධ පරිමාණය අවදානම් තත්වයේ පවතී නම් පහත කරුණු පිළිබඳව ද සැලකිල්ලක් දැක්වීම යහපත්.

1. ඉණෙහි වටප්‍රමාණය අඟල් 35 ට වැඩි
2. අධික රුධිර පීඩනය
3. කොලෙස්ටරෝල් මට්ටම
4. රුධිරයේ සීනි මට්ටම
5. පවුලේ හෘදයාබාධ ඇතිවීම පිළිබඳ ඉතිහාසය
6. ව්‍යායාම සිදුකෙරෙනා ආකාරය
7. දුම්බීම

මේවා පිළිබඳ සැලකිල්ලක් දැක්වීමෙන් දේහ ස්කන්ධ පරිමාව මගින් පෙන්වන්නාවූ සැබෑ අවදානම පිළිබඳ අවබෝධයක් ලබාගන්නට පුළුවන්. මෙහදී ඔබ මතක තබා ගත යුතු එක වැදගත් දෙයක් තිබෙනවා. එනම්, ඔබගේ බරින් 5% - 15% ක් අතර ප්‍රමාණයක් අඩු කරගන්නට හැකියාවක් ඇත්නම් ඔබට මෙහි සඳහන් කළ තත්වයන් වලක්වාගැනීම සඳහා ඇති හැකියාව ද ඉතා ඉහළ බවයි.


Friday, July 12, 2019

භූමිකම්පා අත්දැකීමක් පරිගණකයෙන් විඳිමු - Earth quick with computer screen



භූමිකම්පාවක දී සිදුවන කම්පනය පරිගණක තිරය තුළින් විඳීමේ හැකියාව ලබා ගන්නා අන්දම ගැනයි මේ කියන්න යන්නේ. මේක html file එකක්. මේක මට ලැබුණේ අපේ රට සුනාමි ව්‍යසනයට මුහුණ දුන් අවුරුද්දේ දී කුමක් හෝ වෙබ් අඩවියකින්. මේක කරන්නේ මෙහෙමයි. මේ පහළ තියෙන සබැඳිය ඔස්සේ ගිහින් මේ html file එක ලබා ගන්න. 


මෙය ස්මාර්ට් දුරකතනයකින් නම් විඳින්න පුළුවන් වෙයි ද කියලා දන්නේ නැහැ. පරිගණකයට ලබා ගෙන ඉන් පසුව Internet Explorer කියන වෙබ් බ්‍රවුසර් එකෙන් විවෘත කරගන්න. 



එවිට මෙහෙම තිරයක් අපට ලැබෙනවා. 



දැන් තියෙන්නේ රික්ටර් පරිමාපක අංක තෝරා Experience මත ක්ලික් කිරීමයි. එවිට තිරය කම්පනය වන ආකාරයෙන් අපට එම රික්ටර් පරිමාණයට අදාළව පොළොව කොයි තරම් වේගයකින් ගැස්සේනවාද කියා සරල අවබෝධයක් ලබා ගන්න පුළුවන්.

මතක තියා ගන්න මෙය නිවැරදිව ක්‍රියාත්මක වන්නේ Internet Explorer සමග පමණයි.


Tuesday, July 9, 2019

සිංහලයාට උරුම අස්න සාහිත්‍යය



තිසර, සැලළිහිණි, කොවුල් ආදී පක්ෂීන් අත යැවූ සංදේශ ඇතුළත් සංදේශ කාව්‍ය හැරුණු විට අස්නසාහිත්‍යයක් ද සිංහල බසෙහි පවතිනවා. විහාර අස්න, දොරකඩ අස්න, අනුශාසනා අස්න, දඹදෙණි අස්න, මහා අස්න, කුවේණි අස්න, සිංහබා අස්න, ආදිය එයට ඇතුළත්. මේ අතරින් විහාර අස්න, දොරකඩ අස්න, අනුශාසනා අස්න සාහිත්‍ය කෘතිවලට වඩා ආගමික උත්සවවලට අදාළ කෘති ලෙස පිළිගැනෙනවා.

විහාර අස්න

නම් පොත නමින් ප්‍රසිද්ධියට පත්ව ඇත්තේ විහාර අස්නයි.  මෙය අතීතයේ කුඩා දරුවනට අකුරු කියවන පාඩම් පොත් පෙළේ දෙවැන්නයි. හෝඩිය කියැවූ පසු අකුරු කිහිපයක් එක් කොට තැනූ වචන කියැවීම හුරු කරනු පිණිස මෙය පැරැණි පන්සල් පාසල් හි භාවිත වුණා. මෙය මුලදී රචිතව ඇත්තේ සති පිරිත් අවසානයේ ආටානාටිය දේශනාවට මුලින් කියන විහාර අස්න ලෙසිනුයි. මෙය හයවන පැරකුම්බා රජ දවස රචිත වූවෙකැයි සැලකෙනවා. ඒ අතර ම ලක්දිව එවකට පැවැති ප්‍රධාන විහාරස්‍ථාන නාම මාලාව බෞද්‍ධයකු විසින් දැන සිටිය යුතු බැවින් ද මෙහි එන පරිදි යොදා ඇති වචන කියැවීම පහසු බැවින් ද හෝඩිය ළඟට ම මෙය කියවන ‍දෙවෙනි පොත වශයෙන් භාවිත වූ බව පෙනෙන්ට තිබෙනවා.  කතුවරයා කවරෙක්දැයි සඳහන් නැතත් මේ පොත නරෙන්‍ද්‍රසිංහ රාජ සමයට අයත් යැ යි සිතිය හැකියි.

අනුශාසනා අස්න
අතීතයේ සති පිරිත් දේශනා කිරීම බහුල වශයෙන් සිදු වුණා. මේ ආකාරයට සත් දවසක් මුළුල්ලෙහි දායකකාරකාදීන් මහ සංඝයා විෂයෙහි සිදු කළ දාන මානාදියෙහි පින් අනුමෝදන් කරවීම ද, සියලු දෙවියන්ට පින් අනුමෝදන් කරවීම ද, සියලු දායක සමූහයාට සකල ආකාරයෙන් වන්නා වූ සියලු උවදුරු දුරුකොට අභිවෘද්ධිය සැලසිය යුතුය යන නියමයක් දෙවියන්ට විධාන කිරීමක් ද ඇතුළුව පින් අනුමෝදන් කරවීමේ හා ආශිර්වාද කිරීමේ කාර්යය මෙම අනුශාසනා අස්න කීම තුළින් සිදු කෙරෙනවා.

දඹදෙණි අස්න
දඹදෙණි අස්නේ නිමිත්ත වී ඇත්තේ දළාදා පූජාව විස්තර කොට ඉදිරි කාලයේ දී ද එබඳු පින්කම්වලට ජනතාව සහභාගී කරවා ගැනීමයි. මේ අස්න ලියා ඇත්තේ දඹදෙනි රාජධානියේ පාලකයා වූ පරාක්‍රමබාහු රජුගේ කාලයෙහි දළදා උත්සවය දුටු අයෙක් විසින් බව කියැවෙනවා. ඒ ප්‍රාතිහාර්යය දුටු සූර්ය දිව්‍ය පුත්‍රයා ද තමා යන ගමන නවත්වා සාධුකාර දුන් බවත්, බොහෝ දෙනෙක් සෝවාන් ඵලය ලබා ගත් බවත් දඹදෙණි අස්නේ දැක්වෙනවා.

කුවේණි අස්න
කුවේණි අස්න කෝට්ටේ පරාක්‍රමබාහු රජුට ආශීර්වාද කිරීම සඳහා ලියන ලද්දක් බව සැළකෙනවා. එකම වාක්‍යයකින් ලියා ඇති මෙය ඇත්තේ අනුප්‍රාස බහුල වෘත්ත ගන්ධි රචනා ශෛලියයි. මදහසින් නුවනගින් බලා කපු කටින්නිය, රුසිරු ලොව වටින්නිය, කුවේණිය යකින්නිය, ළඟට ගොස් දකින්නිය, සුසුම්ලා යකින්නී මෙලෙස සිට කියන්නී . . . ආදී වශයෙන් ලියැවී තිබෙනවා.

සිංහබා අස්න
සිංහබා අස්න ලියා ඇත්තේ සිංහල රාජ වංශයෙහි අවසාන රජු වන ශ්‍රී වීර පරාක්‍රම නරේන්ද්‍රසිංහ රජු වෙනුවෙනුයි. කුවේණි අස්න ලියා ඇති ශෛලියෙන්ම ලියා ඇති මෙහි සිංහබාහු කතාවට ද විශේෂ තැනක් හිමි වී තිබෙනවා. දීවාකර කුලග පත් මෙ අප හිමිතුමන් සහ මෙයින් පසු මෙලක්දිව සැපත් වන රජුන්ටත් අසිරිමත් සව්සිරි සැප සලත්වා. නොයෙක් වික්මෙන් දිමුත් නුමුත් මැතිදුන් සමග මෙලක වැසි දනන් සැම මෙපස්වා දහස් කල් රකිත්වා රකිත්වායන ආකාරයෙන් සිංහබා අස්න අවසන් වෙනවා.

Thursday, July 4, 2019

අපූරු දඬුවම් දුන් ඉලනාග රජු



අපේ ඉතිහාසයේ ඉලනාග රජතුමා සම්බන්ධව සිදුවීම් කිහිපයක්ම හමුවෙනවා. ඉලනාග රජකමට පත්වෙන්නේ සීවලී රැජින සිහසුනෙන් පළවා හැරීමෙන් පසුවයි. රාජාභිෂේකයෙන් පසු ඉලනාග රජතුමා සිරිත් පරිදි තිසා වැවේ දිය නෑමට යනවා. මේ වෙලාවේ අනිවාර්යයෙන්ම අමාත්‍ය මණ්ඩලය ද රජු සමග මේ අවස්ථාවට සහභාගී විය යුතුයි. එය රාජ ගෞරවය වෙනුවෙන් සිදු කරන දෙයක්. රජතුමා දිය නා ආපසු යාමට සූදානම් වෙද්දී දුටුවේ ලම්භකර්ණ වංශයට අයත් රාජ නිලධාරීන් පිරිස රජතුමාටත් කලින් පිටත්ව ගොස් ඇති බවයි.

ඒ කාලයේ පැවති චාරිත්‍රවලට අනුව මෙවැනි ක්‍රියාවකින් පෙනෙන්නේ රජුව නොසලකා හැරීමක්. ඒ වගේම එය තවත් අතකින් රාජද්‍රෝහී ක්‍රියාවක් ද වෙනවා. මෙයින් කෝපයට පත් රජතුමා රුවන්වැලි මහා සෑය කරා යාමට තනමින් සිටි පාරක වැඩ කරන්නට ඔවුන්ව යොදවනවා. ලම්භකර්ණ වංශිකයන් උපතින්ම පුහු මාන්නයෙන් සිටි පිරිසක්. එවැනි පිරිසක් පාරේ වැඩ කරනු දැකීම සාමාන්‍ය ජනතාවගේ සතුටට කාරණයක් වුණා. රජතුමා එතැනින් නැවතුණේ නැහැ. ඔහු කළේ සමාජයේ පහත් යැයි සැලකෙන චණ්ඩාල වංශිකයන් පිරිසක් වැඩ පරීක්ෂා කිරීම සඳහා යෙදවීමයි.

මේ සිදුවීම නිසා ලම්භකර්ණ වංශිකයන්ගේ සිත තදින්ම පෑරෙනවා. ඔවුන් පසුව කුමන්ත්‍රණයක් කොට රජුව සිර ගතකොට රාජ්‍ය පාලනය ඔවුන් අතට ගන්නවා.

කෙසේ වෙතත් රජු මේ සිරබත් කෑමෙන් නිදහස් වෙනවා. ඒ ගැන මහාවංශයේ මෙන්න මෙහෙම සඳහන් වෙනවා.

තම සැමියාත් බිළිඳු දරුවාත් මරා දමතැයි ඉලනාග බිසව බියෙන් බලා සිටියාය. දරුවා දාමරිකයන් අතින් මිය යනවාට වඩා මඟුල් ඇතාගේ පයට පෑගී මිය යාම හොඳ යැයි සිතූ ඈ දරුවාව ඇඳුම් පැළඳුම්වලින් සරසා ඇතා ඉදිරිපිට තැබුවාය. යමක් තේරුම් ගත්තා මෙන් ඇතා බිළිඳා හොඬයෙන් ගෙන පිටේ තබා ඉලනාග රජු සිරකර ගෙන සිටි කුටිය කරා දිව ගොස් එහි බිත්ති බිඳ රජු බේරාගෙන කිසි උවදුරක් වන්නට ඉඩ නොදී මහාතිත්ථ නැව් තොටට ගෙන ගියේය. රජු එහි නැවැත්වූ ඇතා ඉක්බිතිව හුදකලාව කඳුකර වනාන්තරයට ගියේය.

මහාතිත්ථ නැව් තොටින් නැව් නැග ඉන්දියාවට ගිය ඉලනාග රජු අවුරුදු තුනක් එහි වාසය කොට එරට සෙබළුන්ගේ ආධාර ඇතිව ලංකාවට පැමිණ නැවත රාජ්‍යය අල්ලා රජ බවට පත් වෙනවා. තමාට සතුරුකම් කළ ලම්භකර්ණ වංශිකයන්ගේ හිස ගසා දැමීමට රජු තීරණය කළත් බිසවගේ බලවත් ඇවටිල්ල හමුවේ ඔවුනට අභය දානය ලබා දෙනවා. නමුත් ඔවුන් විසින් අදින ලද රථයකින් නගරය පුරා සංචාරය කරන රජු එය අවසන් වූ වහාම ඔවුන්ගේ නාසා සහ පා ඇඟිලි කපා දැමූ බව ඉතිහාස කතාවලින් දැනගන්නට ලැබෙනවා.

Friday, June 28, 2019

කට පිච්චෙන්න තේ බොන අයට ගලනාලයේ පිළිකා ඇතිවීමේ අවදානමක් - Hot Tea and Cancer Risk



ඇමරිකා එක්සත් ජනපදයේ පිළිකා සංගමය මේ වසර මුලදී සිය පර්යේෂණ වාර්තාවක් නිකුත් කරමින් පවසා සිටියේ එරටින් වාර්ෂිකව ගලනාලයේ පිළිකා ඇතිවන රෝගීන් 17,650 කට ආසන්න ප්‍රමාණයක් වාර්තා වන බවත්, එයින් 16,000 ක් පමණ මිය යන බවත් ය. දරා ගැනීමේ හැකියාව අනුව මෙම පිළිකා රෝගී තත්වය නිර්ණය කිරීමෙන් පසු මෙයට ගොදුරු වන රෝගීන්ගෙන් 20% ක් පමණ උපරිම වශයෙන් වසර 5 ක පමණ දක්වා ජීවත් බව  පැවසේ. යම් කිසි පුද්ගලයෙකුගේ ගලනාලය තුළ පිළිකා තත්වයක් ඇති විමට විවිධ සාධක හේතු වේ. වයස 55 ඉක්මවීම, පුරුෂයකු වීම, ආමාශය නිතරම පාහේ ආම්ලික ස්වභාවයට ගොදුරු වන පුද්ගලයකු වීම, නිතර සකසන ලද ආහාර පරිභෝජනය කරන්නකු වීම, එළවළු පලතුරු අඩුවෙන් ආහාරයට එක් කරගන්නකු වීම ආදී කරුණු ගලනාල පිළිකාවන්ට ගොදුරු වීමේ අවදානම වැඩි කරයි.

කෙසේ නමුත් මේ වසර මුලදී මේ සම්බන්ධයෙන් නිකුත් කරන ලද වාර්තාවෙන් මෙම පොදු, කලක් තිස්සේ දැන සිටි කරුණුවලට වඩා බිය ජනක කාරණාවක් ද හෙළි කොට තිබිණි. ඒ, තේ, කෝපි හෝ වෙනත් පාන වර්ග අධික ලෙස උණුසුම් තත්වයෙන් පරිභෝජනය කරන්නන් ද ගලනාල පිළිකාවන්ට ගොදුරු වීමේ හැකියාව තිබෙන බව ය.

මේ සම්බන්ධව පර්යේෂණය මෙහෙවන ලද්දේ ඇමරිකානු පිළිකා සංගමයේ අවේක්ෂණ පර්යේෂණ මධ්‍යස්ථානයේ ක්‍රමෝපාය අධ්‍යක්ෂ ෆර්හාඩ් ඉස්ලාමි විසිනි.

වෛද්‍ය ඉස්ලාමි ඇතුළු කණ්ඩායම මෙයට දත්ත එකතු කර ගැනීම සඳහා අවුරුදු 40 - 75 අතර වයසේ පසුවන 50,000 කට අධික නියැඳියක් භාවිත කරන ලදී. පර්යේෂකයන් වසර 10 ක පමණ කාලයක් තිස්සේ මෙම නියැඳියේ පුද්ගලයන්ව අධීක්ෂණයට ලක් කළ අතර, 2004 - 2017 කාලය තුල දී මේ අතරින් 317 දෙනෙකුට ගලනාල පිළිකාව වැළඳුණි.

පර්යේෂකයන් විසින් පානයන්ගේ උෂ්ණත්වය ද කොටස් දෙකකට වෙන් කළහ. ඒ අධික ලෙස උණුසුම්සහ ඇල් මැරුණුවශයෙනි. අධික ලෙස උණුසුම්  යනු සෙන්ටිග්‍රේඩ් අංශක 60 ට වඩා වැඩි උණුසුමින් යුක්ත ඒවා වූ අතර ඇල් මැරුණුයනු එම උෂ්ණත්ව මට්ටමට වඩා අඩු ඒවා ය.

ඒ වගේම මෙම පර්යේෂණයේ දී අවධානයට ලක් කළ තවත් එක් කාරණයක් වූයේ තේ හෝ වෙනත් උණුසුම් පානයක් කෝප්පයකට වත් කර ගැනීමේ සිට පානය කිරීම දක්වා අතර තුළ කාලයයි. එම කාලය මිනිත්තු 2 - 6 අතර නම්, එය ද අධික ලෙස උණුසුම්යන ගොඩට ඇතුළත් කෙරිණි.

මෙම පර්යේෂණයේ සමස්ත ප්‍රතිඵලය දෙස බැලූ විට පෙනෙන්නට තිබුණේ දෛනිකව අධික ලෙස උණුසුම්තේ හෝ වෙනත් පානයකින් මිලි ලීටර් 700 ක් පමණ පරිභෝජනය කරන්නන්, එසේ නොවන පුද්ගලයන්ට වඩා 90%කින් ගලනාල පිළිකා රෝගයට ලක්වීමේ ඉහළ අවදානමකින් පසු වන බව ය.

‛‛අධික උණුසුම් තත්වයේ පවතින පානයක් නිතර පරිභෝජනය කිරීම නිසා ගලනාල පිළිකා තත්වයක් ඇති වන්නට හේතු විය හැකිය යන්න පිළිබඳව අප මෙයට පෙර අවිධිමත්ව සිදු කළ පර්යේෂණයකින් සොයා ගත් කරුණු මෙම නව පර්යේෂණය තුළින් තහවුරු වුණා. මේ නිසා මෙය උණුසුම්ව පරිභෝජනය කරන සියලුම පානයන් සඳහා අදාළ වන බව සඳහන් කරමින් මහජනතාව දැනුම්වත් කිරීම සුදුසු යැයි අපි කල්පනා කළා. මේ නිසා සියලු දෙනාගෙන්ම ඉල්ලා සිටින්නේ යම් පානයක් සෙන්ටිග්‍රේඩ් අංශක 60 ට වඩා අඩු තත්වයට හෙවත් ඇල්මැරුණු තත්වයකට පත් වන තුරු එය පරිභෝජනය කිරීමෙන් වැළකී සිටීම වඩාත් යහපත් බවයි.’’ වෛද්‍ය ඉස්ලාමි ඇතුළු පර්යේෂක කණ්ඩායම එසේ පවසයි.

‛‛බොහෝ පුද්ගලයන් තේ, කෝපි හෝ වෙනත් පානයන් දැඩි ලෙස උණුසුම් ස්වභාවයෙන් පරිභෝජනය කරන්නට දක්වන්නේ දැඩි කැමැත්තක්. කෙසේ නමුත් අප සිදු කළ පර්යේෂණයෙන් හෙළි වී තිබෙන්නේ එසේ අධික ලෙස උණුසුම්ව යම් පානයක් පරිභෝජනය කිරීමේ දී ගලනාල පිළිකා ඇති වන බව යි. එබැවින් එහි උෂ්ණත්වය අඩු වන තුරු මදක් ඉවසන මෙන් මා ඉල්ලා සිටිනවා.’’

වෛද්‍ය ඉස්ලාමි සියලු දෙනාගෙන්ම එම ඉල්ලීම සිදු කරයි.

කෙසේ නමුත් මෙයට කුමක් හේතු වේ ද යන වෛද්‍ය විද්‍යාත්මක කාරණය හෙළිකරගැනීමට ඔවුන්ට තවමත් හැකි වී නැති අතර ඒ සඳහා තවත් පර්යේෂණයක් කරන්නට ඔවුහු අදහස් කරගනෙ සිටිති.

ගලනාල පිළිකාවක් යනුවෙන් හඳුන්වනු ලබන්නේ ගලනාලයේ ඇති වන මාරක ගැටිත්තකි. ගලනාලය යනු ඔබ අප කවුරුත් දන්නා පරිදි මුඛයෙන් ලබා දෙන ආහාර ආමාශය කරා ගමන් කරනා නාලයයි. තවත් ආකාරයකින් සඳහන් කළ හොත් උගුර සහ ආමාශය සම්බන්ධ කරනා නාලයයි.

මෙය ඇමරිකා එක්සත් ජනපදයේ විරල රෝගී තත්වයකි. නමුත් මෙය ආසියාවෙ සහ අප්‍රිකාවේ බහුලව පවතින රෝගී තත්වයක් නිසා මෙම පර්යේෂණය වඩාත් වැදගත් වන්නේ ආසියානු රටක ජීවත් වන අපටය. 2015 වසරේ දී ලෝකයේ පිළිකා රෝගයෙන් මිය ගිය 2.6% වන රෝගීන්ගෙන් 1%කටම වැළඳී තිබුණේ ගලනාල පිළිකාව ය. එය බොහෝ විට වයස අවුරුදු 55ට වැඩි පුද්ගලයන්ට වැළඳේ.

ගලනාල පිළිකාව ප්‍රධාන වශයෙන් ප්‍රභේද දෙකකි.

1. ශල්කමය සෛල කාසිනෝමාව (Squamous cell carcinoma) - මෙය ගලනාලයේ ඉහළ කොටසේ ඇති සෛලවල ඇති වේ.

2. ගලනාලයේ අපිච්ඡද පටකයේ සෛලවල ඇති වන පිළිකාව (Adenocarcinoma of the esophagus) - මෙය බොහෝ විට ඇති වන්නේ ගලනාලය සහ ආමාශය එකිනෙක සම්බන්ධ වන සන්ධියේ පවතින සෛලවලය.

මීට අමතරව ගලනාලයේ ඇති වන පිළිකා තත්වයන්ගේ තවත් විරල ප්‍රභේදයන් කිහිපයක් ම වේ. කෙසේ නමුත් බොහෝ දෙනෙක් නොසිතන, නමුත් අවදානමක් ඇති මෙම තත්වය පිළිබඳ අප දඩි සැලකිල්ලක් දැක්විය යුතුව ඇත්තේ අප අතර සිටින බොහෝ දෙනෙක් ද අධික ලෙස උණුසුම් තත්වයේ පවතින පානයන් කෙරෙහි දැඩි කැමැත්තක් දක්වන බැවිනි. මේ නිසා මෙම පර්යේෂණයෙන් පැවසෙන පරිදි මදක් ඇල්මැරෙන තෙක් සිට උණුසුම් පානයන් පරිභෝජනය කිරීමව වඩාත් සුදුසු බව සඳහන් කළ හැකිය.

Wednesday, June 19, 2019

ක්‍රිකට් ලෝකයේ උගත්තු - Educated people in the Cricket World


වර්තමානයේ ක්‍රිකට් ක්‍රීඩකයන්ගේ වටපිටාව ගෙන බැලුවොත් පෙනෙන්නේ ඔවුන් බොහෝ දෙනෙක් කුඩා කාලයේ පටන්ම ක්‍රිකට් ක්‍රීඩාව වෙනුවෙන්ම සූදානම් වෙමින් කටයුතු කරන සහ කළ අය බවයි. තවත් විදියකින් පැවසුවොත් ඔවුන් යම් දිනක ජාතික ක්‍රිකට් කණ්ඩායමට සම්බන්ධවීමේ අරමුණින් සියලු කටයුතු කරමින් සිටින බව පෙනෙනවා. බොහෝ දෙනෙක් තමාගේ අධ්‍යාපනය පිළිබඳ අවධානය යොමු කරන්නේ ඉතා අඩු මට්ටමකින්. නමුත් අතීතයේ තත්වය එයට වඩා වෙනස්. අතීතයේ සිටි ක්‍රිකට් ක්‍රීඩකයන් බොහෝ දෙනෙකු යම් දිනෙක වෘත්තීමය ක්‍රිකට් ක්‍රීඩකයන් වීම සම්බන්ධයෙන් දැඩි සිහිනවල එල්බගෙන නොසිටි බව පැහැදිලිව පෙනෙන්ට තිබෙනවා. ඔවුන් අධ්‍යාපනය පිළිබඳව ද දැඩි අවධානයක් යොමු කොට තිබෙනවා. ඒ නිසාම ඔවුන් බොහෝ දෙනෙකුට ක්‍රිකට්වලට අමතරව උසස් අධ්‍යාපනික සුදුසුකම් තිබෙන බව ද පෙනෙනවා. අතීතයේ සිටි එවැනි ක්‍රිකට් ක්‍රීඩකයන් කිහිප දෙනෙකු ගැනයි ක්‍රිකට් වසන්තය මැද ගෙවී යන මේ සතියේ කතා කරන්නේ.


ජෝන් මයිකල් බ්‍රේලි




නියම නම ජෝන් මයිකල් බ්‍රේලි වුනත් ලෝකයේ ප්‍රසිද්ධ වෙලා හිටියේ මයික් බ්‍රේලි නමින්. 1942 වසරේ උපන් ඔහු මුල් පෙළේ පිතිකරුවෙකු සහ කඩුළු රකින්නකු ලෙස එංගලන්ත ක්‍රිකට් කණ්ඩායම වෙනුවෙන් ක්‍රීඩා කළා. ක්‍රිකට් ක්‍රීඩාව වෙනුවෙන් සිට ජීවිතය කැප කළත් අධ්‍යාපනය අතින් ඉහළට ගිය පුද්ගලයෙක් විදියට ඔහුව හඳුනාගන්නට පුළුවන්. ඔහු කේම්බ්‍රිජ් විශ්ව විද්‍යාලයෙන් උපාධි දෙකක් ලබා ගත් පුද්ගලයෙක්. ඔහු කේම්බ්‍රිජ් විශ්ව විද්‍යාලයේ ඉගෙනුම ලබන කාලයේ දී අන්තර් විශ්ව විද්‍යාල තරග වෙනුවෙන් ක්‍රීඩා කළා. ජාත්‍යන්තර ක්‍රිකට් ක්‍රීඩකයකු බවට පත්වන්නට ඔහුට අවස්ථාව ලැබුණේ මේ තරගවලට සහභාගී වීම නිසයි. ඔහු ක්‍රිකට් ක්‍රීඩාවෙන් විශ්‍රාම ගියාට පසු ඔහු ලේඛකයකු සහ මනෝ විශ්ලේෂකයකු ලෙස සේවය කළා. ඔහු එම කාලයේ බ්‍රිතාන්‍ය මනෝවිශ්ලේෂක සංගමයේ සභාපතිවරයා ලෙස ද සේවය කළා.

ඉම්රාන් ඛාන්




පකිස්තානු ක්‍රිකට් කණ්ඩායම වෙනුවෙන් ක්‍රීඩා කළ ඉම්රාන් ඛාන් ගැන ක්‍රිකට් ලෝලීන්ට අමුතුවෙන් කියන්න අවශ්‍ය නැහැ. ක්‍රීඩාවෙන් සමුගෙන වසර ගණනාවක් ගත වුවත් ක්‍රිකට් ලෝකයේ ඔහු ඒ තරමටම ප්‍රසිද්ධයි. 1952 වසරේ උපන් ඔහු වර්තමාන පකිස්තානු අගමැතිවරයා ද වෙනවා. ඔහු සමාජ සේවකයකු සේම පරහිතකාමියකු ලෙස ද ප්‍රසිද්ධියක් උසුලනවා. ඔහු ලාහෝරයේ ඒටිචිසන් විද්‍යාලයේ සහ එංගලන්තයේ රාජකීය ව්‍යාකරණ විද්‍යාලයේ උසස් අධ්‍යාපනය හදාරා තිබෙනවා. 1972 වර්ෂයේ දී ඔක්ස්ෆර්ඩ් විශ්ව විද්‍යාලයට අයත් කීබල් කොලේජ් හි ලියාපදිංචි වූ ඔහු එහිදී දර්ශනවේදය, දේශපාලනය සහ ආර්ථික විද්‍යාව හැදෑරූ අතර 1975 වසරේ දී ගෞරව උපාධියක් සහිත ඉන් පිටවුණා. ඔහු කලක් බ්‍රැඩ්ෆෝර්ඩ් විශ්ව විද්‍යාලයේ කුලපතිවරයා ලෙස ද සේවය කළා. ක්‍රිකට් ක්‍රීඩාවෙන් සමුගැනීමෙන් පසු ඔහු ක්‍රිකට් විස්තර විචාරකයකු  ලෙස ද කටයුතු කළා.


කුමාර් චෝක්ෂනාද සංගක්කාර




1977 වසරේ උපන් කුමාර් චෝක්ෂනාද සංගක්කාර හෙවත් කුමාර් සංගගක්කාර කියන්නේ කවුද කියා විස්තර කරන්න යන එක තේරුමක් නැති දෙයක්. ලෝකයේම ක්‍රිකට් ලෝලීන් අතර සංගායන ආදරණීය නමින් හැඳින්වෙන ඔහු ශ්‍රී ලංකා ක්‍රිකට් කණ්ඩායමේ සිටි දක්ෂ කඩුළු රකින්නෙක්. 2011 ජූලි 4 වැනිදා පැවැත්වූ කොලින්ස් කවුඩ්රි දේශනය නිසා ඔහු ලෝකයේ ක්‍රිකට් පරිපාලකයන් අතර මහත් අගැයීමකට ලක් වුණා. මේ නිසා ඔහු ක්‍රිකට් ලෝකයට මහත් බලපෑම් කළ ක්‍රීඩකයෙක් ලෙස ද සැලකෙනවා. මහනුවර ත්‍රිත්ව විද්‍යාලයේ සිසුවකු වූ ඔහු 1996 වර්ෂයේ දී කලා විෂය ධාරාවෙන් උසස් පෙළ හැදෑරූ අතර ත්‍රිත්ව විද්‍යාලයේ සිසුවකුට ලැබෙන උසස්තම ගෞරවය වූ රයිඩ් රන් පදක්කම දිනා ගත්තා. එය ඔහුට පිරිනමනු ලැබුයේ සෑම අතින්ම දක්ෂ සිසුවා ලෙස ඔහු තෝරා ගත් නිසයි. සිය පියාගේ අඩිපාරේ යමින් ඔහු කොළඹ විශ්ව විද්‍යාලයේ නීති පීඨයේ නීතිය හැදෑරීම සඳහා ද ලියාපදිංචි වුණා. කෙසේ නමුත් ක්‍රිකට් සංචාරවලට දිගින් දිගටම සහභාගී වන්නට සිදු වූ නිසා ඔහුට සිය නීතිඥ වෘත්තිය සම්පූර්ණ කරගැනීමට හැකියාවක් ලැබුණේ නැහැ.


අනිල් කුම්බ්ලේ




1970 දී උපන් අනිල් කුම්බ්ලේ ඉන්දීය ක්‍රිකට් ක්‍රීඩකයෙක් බව ක්‍රිකට් ලෝලීන් දන්නා දෙයක්. දකුණතින් පා දඟ පන්දු යවන්නට දස්කම් දැක්වූ ඔහු මුත්තයියා මුරලිදරන් සහ ෂේන් වෝර්න්ට පසුව වැඩිම ටෙස්ට් කඩුළු සංඛ්‍යාවක් දවා ගත් පන්දු යවන්නා ලෙස ද වාර්තා ගත වී සිටිනවා. ඉන්දියානු පුරවැසියකුට ලැබිය හැකි ඉහළම සම්මානය වූ පද්ම ශ්‍රීසම්මානය ද ඔහු හිමිකර ගෙන සිටිනවා. ඔහු ක්‍රිකට් ක්‍රීඩකයකු ලෙස ලෝකයේ ප්‍රසිද්ධියට පත්ව සිටියත් ඔහුගේ අධ්‍යාපනික වශයෙන් ලබා ඇති සුදුසුකම් පිළිබඳ බොහෝ දෙනෙක් දන්නේ නැහැ. ඔහු ඉන්දියාවේ රාෂ්ට්‍රීය ඉංජිනේරු විද්‍යාලයෙන් යාන්ත්‍රික ඉංජිනේරු විද්‍යාව පිළිබඳ උපාධියක් හිමි කර ගෙන සිටිනවා.

රාහුල් ඩ්‍රාවිඩ්



1973 උපන් රාහුල් ඩ්‍රාවිඩ් ඉන්දීය ක්‍රිකට් කණ්ඩායමේ හිටපු දක්ෂ ක්‍රිකට් ක්‍රීඩකයෙක්. ඔහු එහි නායකත්වය ද උසුලනු ලැබුවා. ක්‍රිකට් ඉතිහාසයේ හොඳම පිතිකරුවකු ලෙස ද ඔහු ඉතිහාස ගත වී තිබෙනවා. බැංගලෝරයේ උසස් බාලක පාසලක් වූ සාන්ත ජෝශප් විද්‍යාලයේ ඉගෙනුම ලබා ඇති ඔහු බැංගලෝරයේ වාණිජ විශ්ව විද්‍යාලයෙන් වාණිජවේදී උපාධියක් හිමිකරගෙන සිටිනවා. පසුව ඔහු ව්‍යාපාර පරිපාලන උපාධියක් සඳහා ද ලියාපදිංචි වී එය හැදෑරීම ආරම්භ කළා. ඔහුව ඉන්දීය ජාතික ක්‍රිකට් කණ්ඩායමට තෝරා ගනු ලැබුයේ එම කාලයේදීයි. එසේ නොවුනේ නම් ඔහු ව්‍යාපාර පරිපාලනවේදී උපාධිධරයකු ද වනු නොඅනුමානයි.

ජොෆ් ලෝසන්




1957 වසරේ දී උපන් ජොෆ් ෆ්‍රාන්සිස් ලෝසන් කියන්නේ ඕස්ට්‍රේලියානු ක්‍රිකට් කණ්ඩායමේ ක්‍රීඩකයෙක්. ඔහු කලක් පකිස්තානු ක්‍රිකට් කණ්ඩායමේ පුහුණුකරු ලෙස ද කටයුතු කරනු ලැබුවා. ක්‍රිකට් ක්‍රීඩකයකු ලෙස ලෝකයේ ප්‍රකට වූ ඔහුගේ අධ්‍යාපන සුදුසුකම් පිළිබඳ බොහෝ දෙනෙක් දන්නේ නැහැ. ඔහු නිව් සවුත්වේලස් විශ්ව විද්‍යාලයේ දෘෂ්ටි පරීක්ෂාව පිළිබඳ උපාධිධරයෙක්. කෙසේ නමුත් ක්‍රිකට් ක්‍රීඩාවට පැමිණීමත් සමග ඔහුට එය වෘත්තියමය වශයෙන් ඉදිරියට කරගෙන යන්නට හැකියාවක් තිබුණේ නැහැ.

සයීඩ් අන්වර්




1968 දී උපන් සයීඩ් අන්වර් පකිස්තානු ක්‍රිකට් කණ්ඩායමේ හිටපු ක්‍රීඩකයෙක්. ඔහු වරෙක එම කණ්ඩායමේ එක් දින සහ ටෙස්ට් තරගවල නායකයා ලෙස ද කටයුතු කළා. ආරම්භක පිතිකරුවකු ලෙස ප්‍රකටව සිටි ඔහු යම් යම් අවස්ථාවලදී පමණක් වමතින් මද වේග පන්දු යවන්නකු ලෙස ද කටයුතු කොට තිබෙනවා. ඔහු කරච්චි හි එන්.ඊ.ඩී. ඉංජිනේරු සහ තාක්ෂණික විශ්ව විද්‍යාලයෙන් 1998 වසරේ දී පරිගණක පද්ධති ඉංජිනේරු විද්‍යාව පිළිබඳ ඉහළ පෙළේ උපාධියක් ලබාගෙන තිබෙනවා.

ජවගාල් ශ්‍රීනාත්




1969 වර්ෂයේ දී උපන් ජවගාල් ශ්‍රීනාත් ඉන්දීය ක්‍රිකට් කණ්ඩායමේ ක්‍රීඩකයෙක්. ක්‍රිකට් ක්‍රීඩාවෙන් සමුගැනීමෙන් පසු ඔහු ජාත්‍යන්තර ක්‍රිකට් තරග තීරකයකු ලෙස කටයුතු කරමින් සිටිනවා. ඉන්දීය ක්‍රිකට් කණ්ඩායමේ සිටි දක්ෂතම වේග පන්දු යවන්නකු ඔහු එරට ක්‍රිකට් ක්‍රීඩකයන් අතර කඩුළු 300 ඉක්මවූ ප්‍රථම පන්දු යවන්නා ද වෙනවා. ඔහු ක්‍රිකට් ක්‍රීඩකයකු ලෙස ප්‍රකටව සිටියත් උසස් අධ්‍යාපනික අංශයෙන් ද ඉතා උසස් සුදුසුකම් ලද පුද්ගලයකු ලෙස සඳහන් කළ හැකියි. ඔහු, මයිසූරා හි ශ්‍රී ජයචාමරාජෙන්ද්‍ර ඉංජිනේරු විද්‍යාලයේ යාන්ත්‍රික උපකරණ සම්බන්ධ උපාධිධරයකු වෙනවා.