පුවත්පත්වලට ලිපි ලිවීම මාගේ විනෝදාංශයකි. මා ලියන ලිපි මගින් පාඨකයින් දැනුමක් ලබමින් ජීවිතයට යමක් එකතු කරගන්නේ නම් එය මාගේ සතුටකි. වේගයෙන් ඉදිරියට ඇදෙන තාක්ෂණික ලෝකයේ පුවත්පත් කියවන්නට තරම් විවේකයක් නොමැති අයවලුන් බොහෝය. තවකෙකු පුවත්පත් කියවන්නට කැමති නැත. අන්තර්ජාලයේ ද සිංහල බසින් සියලුම පුවත්පත් ඇති බැවින් තාක්ෂණයට ප්‍රිය කරන්නෝ පරිගණකයෙක් හෝ සිය ජංගම දුරකථනයෙන් ඒවා කියවති. එබැවින් මා ලියන ලිපි එවැනි පාඨක පිරිස් වෙත යොමු කරන්නට අදහස් කළ නිසා මෙවැනි බ්ලොග් අඩවියක් ගොඩනගන්නට සිතුවෙමි. මාගේ උත්සාහය කෙතරම් නම් සාර්ථකදැයි තීරණය වන්නේ ඔබගෙන් ලැබෙන ප්‍රතිචාර මතය. එබැවින් ඔබ මේ පිළිබඳ සිතන පතන දෑ මවෙත දන්වන්නට උනන්දුවන්නේ නම් එය මාගේ සතුටයි. ඔබ සැමට තෙරුවන් සරණයි!

Thursday, August 29, 2013

අනාගත රජකුගේ ප්‍රථම නිල ඡායාරූප දැක්ම - Official Inaugural Photographs of William's Son


අනාගත රජකුගේ මුල්ම නිල ඡායාරූප මේ වන විට නිකුත්ව තිබේ. මේ අනාගත රජු අන්කිසිවකු නොව මහා බ්‍රිතාන්‍යයේ විලියම් කුමරු හා කේට් කුමරියගේ කුළුඳුල් පුත් කේම්බ්‍රිජ් හි ජෝර්ජ් ඇලෙක්සැන්ඩර් ලුවී කුමරු ය. 






බ්‍රිතාන්‍ය කිරුළේ උරුමකරුවන්ගේ ඡායාරූප ගැනීම මීට පෙර සිදුකොට ඇත්තේ සර් සිසිල් බීටන් හා ස්නෝඩොන් වැනි ප්‍රවීන රාජකීය ඡායාරූප ශිල්පීන් විසිනි. නමුත් මෙවර එම සම්ප්‍රදාය බිඳ වැටී හෝ බිඳ දමා හෝ තිබේ. අනාගත රජුගේ මුල්ම නිල ඡායාරූප ශිල්පියා බවට පත්ව ඇත්තේ කේට් කුමරියගේ පියා වන මයිකල් මිඩෙල්ටන් ය. 

මෙය ඡායාරූප දෙකකින් සමන්විත වන අතර ඡායාරූප ගැනීම සඳහා භාවිත කොට ඇත්තේ මිල අඩු, ඡායාරූප ශිල්පීන් අතර ‛පොයින්ට් ඇන්ඩ් ෂූට්’ ලෙසින් ප්‍රකටව ඇති ඩිජිටල් කැමරාවකිනි. සාමාන්‍ය අප බොහෝ දෙනෙකු සතුව ඇති ඩිජිටල් කැමරා අයත්වන්නේ පොයින්ට් ඇන්ඩ් ෂූට් පවුලට ය. 


කේට්ගේ පියා සිය සුපුරුදු කැමරාව සමඟින්

මේ එක් ඡායාරූපයක විලියම් කුමරු හා කේට් කුමරිය සිය පුතු සමඟින් සිටගෙන සිටිනා අතර අනෙක් ඡායාරූපයේ සිය පවුලේ සුරතලුන් දෙදෙනා සමඟ හිඳගෙන සිටී. සෑම ප්‍රවෘත්තියකම මෙම පවුලේ සුරතලුන් දෙදෙනා පිළිබඳව ද විශේෂයෙන් සඳහන් කොට තිබිණි. එක් සුරතලකු වන්නේ බ්ලැක් කොකර් ස්පැනියල් වර්ගයට අයත් ලූපෝ නම් සුනඛයා වන අතර අනෙකා ගෝල්ඩන් රිට්‍රීවර් වර්ගයට අයත් ටිලී ය. අප රටේ නම් පවුලේ ඡායාරූපයකට නිවසේ සිටින දඩෝරියා වැද්දගන්නේ නැත. අහළ පහළක සිටිය ද වැරදීමකින් හෝ ඡායාරූපගත වී ඡායාරූපය අවලස්සන වේ යැයි සිතමින් දඩෝරියා පන්නා දමන්නට පුරුදුව සිටිමු. නමුත් බ්‍රිතාන්‍ය රාජකීයයන් එසේ කොට නොමැත. ඔවුන් සිය නිවසේ සුරතලුන් ද පවුලේම සාමාජිකයින් ලෙස සළකමින් නිල ඡායාරූපයට ඇතුළුවන්නට අවසර ලබා දී තිබේ. ඒ ඔවුන්ගේ සත්ව කරුණාව වන අතර අපේ සත්ව කරුණාව වෙනම ම එකකි. 

ඇලෙක්සැන්ඩර් කුමරු ඔතා ඇති බ්ලැන්කෙට්ටුව ද ප්‍රවෘත්තිවල විශේෂ අවධානයකට ලක්වූවකි. ඇලෙක්සැන්ඩර් කුමරු රෝහලින් පිටතට රැගෙන එන අවස්ථාවේ ඔහුව ඔතා තිබුණේ ද මෙම බ්ලැන්කෙට්ටුවෙන්ම ය. 
විලියම් කුමරුගේ නිල ඡායාරූපය 

චාල්ස් කුමරුගේ නිල ඡායාරූපය 

නවසීලන්ත රජයේ නිවසේදී චාල්ස් කුමරු, ඩයනා කුමරිය හා විලියම් කුමරු ගත් මෙම ඡායාරූපයේ සැලැස්ම විලියම් කුමරුට සිය පුතුගේ ඡායාරූප ගැනීමේදී සිතට නැගෙන්නට ඇති බව ඇතැමෙක් පවසති.

කේට් කුමරිගේ නිල ඡායාරූපය 

මෙම නිල ඡායාරූප ගැනීම සිදුකොට ඇත්තේ මෙම අගෝස්තු මාසයේ මුල් භාගයේ කේට්ගේ නිවස වන බර්ක්ෂයර් මන්දිරයේ උද්‍යානයේ දී වන අතර ඡායාරූප දෙකේම අනාගත රජු සිටින්නේ නින්දේ ය. 

ඡායාරූප දෙකම සරල සැළසුමකින් යුක්ත වුව ද ප්‍රවීනයක් පවසන්නේ මීට පෙර ලබාගත් රාජකීය ඡායාරූප සමඟ සැසඳීමේදී මේවායේ බොහෝ තාක්ෂණික දෝෂ ඇති බවය. ආලෝකය පසුපසින් පැමිණෙන නිසා පසුබිමෙහි ඇති දර්ශන එතරම් හොඳින් දිස්වන්නේ නැත. ඒ ආලෝකය නිසාම ඡායාරූපයේ බොහෝ ස්ථාන අපැහැදිලි වී ඇත. ප්‍රවීනයෙකු මෙම ඡායාරූප ගත්තේ නම් සමස්ථ ඡායාරූපයම ආලෝකවත් වන්නට අවශ්‍ය උපක්‍රම යොදනු ඇත. නමුත් මිල අඩු කැමරාවකින් මෙයට වඩා යමක් සිදුකළ නොහැක. අනෙක් මීට පෙර මෙවැනි රාජකීය නිල ඡායාරූප එළිමහනේ ගැනීමේ සම්ප්‍රදායක් පැවතුනේ ද නැත. කේට්ගේ පියා මේ සම්ප්‍රදාය බිඳ දමා තිබේ. ඇතැම්විට මෙය පැරණි සම්ප්‍රදායයන් බිඳ දමා නව ලෝකයට සරල ලෙස ඇතුළුවන්නට විලියම්ගේ හා කේට්ගේ කැමැත්ත විදහා දක්වන්නයක් බවට ද ඇතැමෙක් අදහස් දක්වති. 

මෙම ඡායාරූප මෙසේ ගැනීමේ අදහස මූලික වශයෙන්ම විලියම්ගේ හා කේට්ගේ බව දැනගන්නට ලැබී තිබේ. පවුලේ පිරිසත් සමඟ සතුටින් සිටින මොහොතක පිටස්තර පුද්ගලයකු පැමිණ ඡායාරූපගැනීමට කටයුතු සූදානම් කළහොත් එය තම සතුටට බාධාවක් වනු ඇතැයි ඔවුන් සිතන්නට ඇත. එබැවින් සාමාන්‍ය පවුලක සාමාන්‍ය ඡායාරූප ලෙස මේවා අරගන්නට ඔවුන් අදහස් කළා වෙන්නටත් ඇත. මේ අදහස් සියල්ලම විචාරකයින්ගේ පැසසුමට ලක්වුවත් සියලු දෙනා මෙම ඡායාරූපවල ඇති අඩු ගුණත්වය පිළිබඳ කතා කරති. පොටෝෂොප් මෘදුකාංගය පිළිබඳ දන්නා අයෙක් කේට්ගේ පවුලේ සිටියේ නම් මේවා මාධ්‍යට මුදා හරින්නට පෙර මෙම අඩුපාඩු සකස්කොට මේවා වඩාත් ඓතිහාසික මට්ටමකට රැගෙන එන්නට හැකියාවක්  තිබුණේ යැයි එක් ඡායාරූප ශිල්පියකු සී.එන්.එන්. ප්‍රවෘත්ති සේවයට පවසා තිබිණි. 

නමුත් විලියම් හා කේට් යුවලට අවශ්‍යව තිබෙන්නට ඇත්තේ පැපරාසින්ගේ කැමරාවවන් හසු නොවී හැකි ඉක්මණින් තම පුතුගේ නිල ඡායාරූප කිහිපයක් මාධ්‍යවලට මුදාහරින්නට වන්නට ඇත. 
කෙසේ හෝ දැන් මේවා ඇලෙක්සැන්ඩර් කුමරුගේ නිල ඡායාරූපයන් ය. ඒවායේ ගුණත්වයෙහි අඩුපාඩු ඇතත් ඒවා රාජකීය මට්ටමේ ඡායාරූපයන්ය. මිල අධික කැමරාවකින් ගත් ඡායාරූපවලට වඩා ලෝකයාගේ අවධානය මේවාට ලැබී තිබේ. රජවරුන් වූ විට එසේය. 

- රැජින පුවත්පත 2013-08-30

Thursday, August 22, 2013

මුහුණ හැඩකරගන්නට ‘මුහුණු ව්‍යායාම‘ - Facial Exercises for a Beautiful Face


යම්කිසි පුද්ගලයකුගේ වියපත්බව මුළින්ම තවත් කෙනෙකු දකින්නේ ඔහුගේ හෝ ඇයගේ මුහුණෙනි. බොහෝ කලකින් හමු වූ විට ඇතැමෙක්, “අම්මෝ ඔයා සෑහෙන්න වයසට ගිහින් නේ” යැයි පවසන්නේ මුහුණ දෙස බලමිනි. එයින් කියැවෙන්නේ වියපත් බව මැණගැනීමට සියලු දෙනා බලන්නේ යම්කිසි පුද්ගලයකුගේ මුහුණු දෙස බවය. වියපත් වීම ස්වභාවික දෙයක් වුවද, එය වළක්වාගත නොහැකි දෙයක් වුවද මුහුණෙන් පිළිබිඹු වන්නා වූ වියපත් පෙනුම වළක්වා ගත හැකි නම් එය ඔබේ සිතට යම්කිසි සහනයක් ගෙන දෙනු නිසැකය. ඇතැම් අය මේ සඳහා ප්ලාස්ටික් සැත්කම්වල පිහිට සොයා යති. ඒවා මගින් මුහුණෙහි වියපත් පෙනුම තුරන් කොට දමන බව සත්‍ය මුත් සියලු දෙනාට එසේ කරන්නට මුදල් හදල් නැත. නමුත් ඔබ මේ වෙනුවෙන් දිනකට සුළු කාලයක් වෙන් කරන්නට සූදානම් නම්, ඔබට කිසිඳු මුදලක් වැය නොකොට තවත් බොහෝ කාලයක් තරුණ බව රැකගත හැකිය. මුහුණෙහි ඇති රැළි, ඉරි, එල්ලා වැටෙන ස්වභාවය වැනි වියපත් සළකුණු ඉවත් කරන්නට ඇති ස්වභාවික ක්‍රමය වන්නේ මුහුණට ලබාදෙන ව්‍යයාමයන්ය. ඔබ වියපත්වත්ම මුහුණෙහි මාංශ පේශීවල ඇති ස්ථාවරබව තුරන්ව යන්නට පටන් ගනී. මුහුණට එල්ලා වැටෙන ස්වභාවයක් ලැබෙන්නේ එවිටය. නමුත් මුහුණෙහි මාංශ පේශී සඳහා ව්‍යයාම ලබාදෙන්නේ නම් මේ තත්වය තුරන්කොට ගත හැකිය. 

අපි පියවරෙන් පියවර මේවා පිළිබඳ කතා බහ කරමු. 

ඇස් සඳහා ව්‍යායාම 


ඇස් පිහිටා ඇති ප්‍රදේශයේ සම ඉතා සියුම් ය. මේ සියුම්බව වියපත් වෙත්ම තුරන්ව යයි. මේ නිසා ඇසිපිය අවට නොයෙක් රැළි හා ඉරි ඇතිවන්නට පටන් ගනී. කපුටකුගේ පාදවල හැඩය සහිත මෙවැනි රේඛා බොහෝ වියපත් මුහුණුවල දකින්නට ලැබෙන පොදු ලක්ෂණයන් ය. ඇස් සඳහා ව්‍යයාම ලබාදීමෙන් මේ තත්වය පහසුවෙන් සමනය කරගන්නට පුළුවන. 

ඔබේ ඇස් වසාගන්න. ව්‍යයාම සිදු කරනා කාලය ඇතුළත ඇස් වසා තබාගන්න. ඔබගේ ඇඟිලි තුඩු නළලේ දෙකෙළවරෙහි තබාගන්න. දැන් හැකිතාක් ඉහළ බලන්න. ඉහළ බලද්දී එයට විරුද්ධ බලයක් ඇඟිළි තුඩු මගින් පහළ අතට යොදන්න. අනතුරුව පහළ බලන්න. ඒ අවස්ථාවේදී ද ඇඟිළි තුඩු මගින් ඊට විරුද්ද බලයක් ඉහළ අතට යොදන්න. මෙම ව්‍යායාමය වරකට 10 වතාව බැගින් දිනකට දෙවරක් කරන්න. 

නළල සඳහා ව්‍යයාම 



වියපත් වෙත්ම නළලේ රැළි ඇතිවීම ද නිතර දක්නට ලැබෙන දෙයකි. මේවා ද ව්‍යයාම මගින් පහසුවෙන් තුරන්කොට දැමිය හැකිය. 

ඔබේ දබරඟිල්ල ඇස්වලට උඩින් තබාගන්න. දැන් ඇහි බැම ඔසවන අතරේ ඇඟිල්ලෙන් පහළ අතට සෙමින්  තල්ලුවක් දෙන්න. මෙය දිනපතා දවසකට කිහිප වරක් සිදු කරන්න. මෙය සිදුකරනා වාර ගණන වැඩිවත්ම එහි ප්‍රතිඵල ද ඉක්මන් වේ. 

මේ සඳහා තවත් ව්‍යයායමයක් ඇත. ඔබේ ඇහි බැමි උඩට ඔසවා තත්පර කිහිපයක් තබාගන්න. දැන් ලිහිල් කරන්න. මෙය දස වතාවක් කරන්න. දිනකට කිහිපවරක්ම සිදුකරන්න. 

තොල් සඳහා ව්‍යයාම 


මුඛය අවට ප්‍රදේශයේ ද වියපත්වත්ම රැළි ඇති වේ. විශේෂයෙන් තොල අවට ඇති ප්‍රදේශය වඩාත් ඉක්මණින් වියපත් වේ. මේ සඳහා නිරතුරු ව්‍යයාම අවශ්‍ය වේ. 

දෙතොල් තදකරගෙන සිනහවෙන ඉරියව්වකට පැමිණෙන්න. දැන් ඉගිළෙන හාදු ක්‍රියාවලිය ( කෙහසබට නසිැි ) මිනිත්තු තුනක කාලයක් පුරා සිදුකරන්න. මෙසේ කිරීමෙන් ඔබගේ තොල් අවට ප්‍රදේශයේ මාංශ පේශී ශක්තිමත් වේ. 

මේ සඳහා තවත් ව්‍යයාමයක් ඇත. දෙතොල් වසාගන්න. දැන් දෙතොල් නහය දෙසට ඔසවන්න. දහයට ගණන් කරනා තෙක් මෙම ඉරියව්වෙහි සිටින්න. මෙය පස්වරක් සිදු කරන්න. 

එල්ලා වැටෙන දෙතොල් ද වියපත් බවේ ලක්ෂණයකි. ඔබගේ දබරඟිල්ල හැකි තරම් තදින් උරන්න. දැන් ඇඟිල්ල සෙමින් ඉවතට ගන්න. මෙම ව්‍යයාමය දස වතාවක් සිදු කරන්න. 

කම්මුල් සඳහා ව්‍යයාම 


කම්මුල් වටා වූ මාංශ පේශී එල්ලා වැටීම වියපත්වන විට හොඳින්ම දකින්නට ලැබේ. මේ සඳහා මෙහි ඇති ව්‍යයාම සිදු කිරීම මෙම තත්වය වෙනස් කරනු ඇත. 

ඔබේ මුඛය වසා තරමක් සිනහසෙන්න. දැන් ඔබගේ කම්මුල් මුඛය තුළය ඇදගන්න. තත්පර දහයක් මේ ස්වභායෙන් සිට  ලිහිල් කරන්න. මෙය දස වතාවක් සිදු කරන්න. 

මේ සඳහා ඇති තවත් ව්‍යයාමයකි මේ. ඉහළ තොල පහළ අතට  තදවන සේ තබා දෙතොල්වලින් ඉංග්‍රීසි ‛ ධ ’ අක්ෂරයෙහි හැඩය ඇති කරගන්න.  දැන් සිනහවන්න. සිනහවන අතරේ ඇඟිලිවලින් කම්මුල් ඉහළ අතට සෙමින් තෙරපන්න. තත්පර 3 -5 ක පමණ කාලයක් මෙසේ සිටින්න. දැන් ලිහිල් කරන්න. මෙයදිනකට  20 - 30 වතාවක් පමණ සිදු කරන්න. 
ගෙළ ප්‍රදේශය සඳහා ඇති ව්‍යයාම ගෙළෙහි ඇති වියපත් රේඛා, එල්ලාවැටෙන මාංශ පේශීන් ඉවත්කිරීම සඳහා ඒ ප්‍රදේශයට සුවිශේෂි ව්‍යයාම අත්‍යවශ්‍යය. 

සෘජුව සිටගන්න. හිස ඉහළට ඔසවන්න. දෙතොල් තරමක් වසා ලිහිල්ව තබාගන්න. ඔබගේ යටිතොල උඩු තොලට උඩින් සිටින සේ තබාගන්න. දහයට ගණන් කොට ලිහිල් කරන්නත මෙය දසවතාවක් සිදු කරන්න. 
ගෙළ සඳහා තවත් ව්‍යයාමයක් තිබේ. සිටගෙන හිස ඔසවා උරහිස් පසුපසට අරගන්න. දැන් දබරඟිල්ල හා මහපටඟිල්ල ගෙළෙහි තබාගන්න. නිකට ඉහළට ’ඔසවන අතරේ ඇඟිවලින් ගෙළෙහි මාංශ පේශී පහළ අතට තෙරපන්න. මෙය දසවතාවක් සිදුකරන්න. 

ගෙළ සඳහා තවත් ව්‍යයායමයක් තිබේ. හිස දෙපසට ක්‍රියාත්මක කිරීමෙන්  ගෙළෙහි මාංශ පේශී ශක්තිමත් කළ හැකිය. මෙය වරකට පස්වතාවක්වත් කළ යුතු වේ. වම් අතට පස් වරක්, දකුණු අතට පස්වරක් වන මෙම ව්‍යයාමය සිදු කරන්න. මෙහිදී හිස උරහිස් දෙසට හැකිතාක් හැරිය යුතුවේ. 
මෙහි සඳහන් කොට ඇති ව්‍යයාම නිවැරදිව සිදු කිරීමෙන් ඔබගේ මුහුණේ ඇති මාංශ පේශී ශක්තිමත් කළ හැකිය. එය ඔබගේ තරුණ පෙනුම රඳවාගැනීමට මහඟු උපකාරයක් වනු ඇත. රූපලාවන්‍ය සැත්කම් සදහා වැයකරන වියදම් ද ඔබට අඩුකරගත හැකිය. එමෙන්ම මෙම ව්‍යයාම නිසා මුහුණේ රුධිර සංසරණය ද වර්ධණය වෙයි. එවිට මුහුණට ලැබෙන පෝෂණය ද ඉහළ යයි. එය මුහුණේ නිරෝගී හා තරුණබව රඳා පැවතීම සඳහා මහඟු රුකුළක් ලබාදෙනු ඇත. 

බටහිර ජ්‍යෝතිෂය ඔබ පිළිගන්නවාද? - Do you Believe in Western Astrlogy


සත්‍ය අසත්‍යතාවය කෙසේ වෙතත් අප ජීවිතයේ බොහෝ අවස්ථාවලදී අපි ජ්‍යෝතිෂයේ පිහිට පතන්නෙමු. විශේෂයෙන් ආවාහ විවාහ කටයුතු, නිවසක් ඉදිකිරීම, නිවසකට ගෙවැදීම, ව්‍යාපාරික ස්ථානයක් ආරම්භ කිරීම ආදී සුවිශේෂී අවස්ථාවලදී කොයි කවුරුත් පාහේ සුබ මුහුර්තයක් සොයාගැනීම සඳහා අනුගමනය කරන්නේ ජ්‍යෝතිෂ ක්‍රමවේදයන්ය. ආසියානුවන් ලෙස අප ජීවිත හැඩගැසී ඇත්තේ ඒ ආකාරයෙනි. නමුත් බටහිර රටවල වැසියන් පිළිබඳ අප සිතන්නේ මේ ආකාරයෙන් නොවේ. ජ්‍යෝතිෂය වැනි ගුප්ත විද්‍යාවන් පිළිබඳ ඔවුන් තුළ ඇත්තේ උදාසීන ආකල්පයකැයි අප සිතන්නෙමු. නමුත් සත්‍යය නම් එය නොවේ. බටහිර වැසියෝද අප තරමටම, ඇතැම්විට අපටත් වඩා තදබල ලෙස මෙම විද්‍යාවන්ගේ පිහිට පතති. උදාහරණයක් ලෙස එංගලන්තය හා ඒ අවට ඇති යුරෝපියානු රටවල ජනතාව අපල උපද්‍රව පිළිබඳ දැඩි විශ්වාසයකින් පසුවෙති. මේ නිසාම පෙරදිග හා සමානවම බටහිර රටවල ද ජ්‍යෝතිෂ විද්‍යාවක් ගොඩනැගී ඇත. ඔවුහු තම එදිනෙදා ජීවිතය හැඩගස්වා ගැනීමට මෙම ජ්‍යෝතිෂ උපදෙස් අනුගමනය කරති. 

බටහිර ජ්‍යෝතිෂය යනු මෑතකදී බිහි වූවක් නොවේ. එය වසර දහස් ගණනක් තිස්සේ අරාබියේ හා යුරෝපයේ ජනතාව අතර මැනවින් ප්‍රචලිත වී තිබිණි. බටහිර ජ්‍යෝතිෂයට අනුව කියැවෙන්නේ පෘථිවිය වටා සූර්යයා ඇතුළු සමස්ථ විශ්වයම පරිභ්‍රමණය වන බවය. නූතන බටහිර ජ්‍යොතිෂය පැවැත් එන්නේ පැරණි මෙසපොතේමියානු ශිෂ්ටාචාරයෙනි. මෙම ශිෂ්ටාචාරය පිහිටියේ වර්තමාන ඉරකයේ යුප්‍රටීස් සහ ටයිග්‍රීස් නම් ගංගා දෙකට මැදිවය. සුමේරියනු, අක්කඩියානුවන්, බැබිලෝනියන්වරු හා ඇසිරියන්වරු මෙම ශිෂ්ටාචාරයේ සිටියහ. 

අභ්‍යවකාශ වස්තූන්ගේ ගමන් රටාවන් අධ්‍යයනය කිරීම තුළින් බැබිලෝනියන්වරු ජ්‍යෝතිෂ විද්‍යාව ගොඩනැගීම සඳහා මුල් පියවර තැබූහ. නමුත් සූර්යයාගේ ගමන් මාර්ගය ගණනය කොට සූර්ය දිනදර්ශනයක් නිර්මාණය කරගැනීමට හැකි වූයේ පැරණි ග්‍රිකවරුන්ටය. 
බටහිර ජ්‍යෝතිෂ විද්‍යාවට අනුව කේන්දරයක් සකස් කිරීම සදහා පෙරදිග සේම විවිධ ගණනය කිරීම් සිදුකරනු ලබන අතර යම් යම් අවස්ථාවලදී  පංචාංග ලිතක පිහිට පතන අවස්ථා ද දක්නට ලැබේ. 
ලග්න ගණන පෙරදිග සංඛ්‍යාවම වන අතර නම්වලද වෙනසක් නැත. මෙහි දැක්වෙන්නේ ඒ ඒ ලග්න, ඒවායේ ගුණාංග හා ඒ ඒ ලග්න හිමියන් සොයා ගන්නා ආකාරයයි. 

1. මේෂ - නිර්භීතබව, උද්‍යෝගී බව, අලුතින් යමක් ඇරඹීමේ හැකියාව, තරගකාරීත්වය හා ආත්මාර්තකාමී බව 
මාර්තු 21 - අප්‍රේල් 20 අතර උපන් පුද්ගලයින් මෙම ලග්නයට අයිතිය. 
2. වෘෂභ - ස්වාමිත්වය, මුරණ්ඩු, අධිෂ්ඨානශීලිබව, විශ්වසනීයත්වය, ප්‍රායෝගිකබව 
අප්‍රේල් 21 - මැයි 21 අතර උපන් පුද්ගලයින් මෙම ලග්නයට අයිතිය. 
3. මිථුන - විවිධ හැකියාවන්වලින් යුක්තබව, දක්ෂබව, අසහනය, අස්ථිරබව හා කුතුහලය 
මැයි 22 - ජුනි 21 අතර උපන් පුද්ගලයින් මෙම ලග්නයට අයිතිය. 
4. කටක -  සංකීර්ණ, ආරක්ෂාකාරී, නොසන්සුන්, සංවේදීබව, භාවාත්මක බව 
ජුනි 22 - ජූලි 22 අතර උපන් පුද්ගලයින් මෙම ලග්නයට අයිතිය. 
5. සිංහ -  ආත්ම විශ්වාසය, පුළුල් මනස, චමත්කාරජනක බව, නායකත්වය හා අහංකාර බව 
ජූලි 23 - අගෝස්තු 22 අතර උපන් පුද්ගලයින් මෙම ලග්නයට අයිතිය. 
6. කන්‍යා - පරීක්ෂාකාරීබව, කලබලකාරීබව, භාවාත්මක නැඹුරුව, ප්‍රායෝගිකබව 
අගෝස්තු 23 - සැප්තැම්බර් 22 අතර උපන් පුද්ගලයින් මෙම ලග්නයට අයිතිය. 
7. තුලා - සමාජශීලීබව, සාධරණබව, අවිනිශ්චිතබව, වෙනස්වන සුළුබව 
සැප්තැම්බර් 23 - ඔක්තෝබර් 22 අතර උපන් පුද්ගලයින් මෙම ලග්නයට අයිතිය. 
8. වෘශ්චික -  සරාගී, අධිෂ්ඨානශීලීබව, පළිගැනීමට කැමති, රහස්‍යබව, මුරණ්ඩු 
ඔක්තෝබර් 23 - නොවැම්බර් 22 අතර උපන් පුද්ගලයින් මෙම ලග්නයට අයිතිය. 
9. ධනු - අවංක, කාර්යක්ෂමබව, සමාජශීලීබව, පරමාදර්ශී 
නොවැම්බර් 23 - දෙසැම්බර් 21 අතර උපන් පුද්ගලයින් මෙම ලග්නයට අයිතිය. 
10. මකර - විශ්වසනීයබව, අධිෂ්ඨානශීලීබව, ආරක්ෂිතබව, ප්‍රායෝගික හා සාම්ප්‍රදායික 
දෙසැම්බර් 22 - ජනවාරි 20 අතර උපන් පුද්ගලයින් මෙම ලග්නයට අයිතිය. 
11. කුම්භ -  මිත්‍රශීලීබව, ස්වාධීනබව, නිර්මාණාත්මක, මුරණ්ඩු, කැරළිකාර 
ජනවාරි 21 - පෙබරවාරි 19 අතර උපන් පුද්ගලයින් මෙම ලග්නයට අයිතිය. 
12. මීන - සංවේදී, සංකල්පනීය, භාවාත්මක, පරමාදර්ශී, නිර්මාණාත්මක බව 
පෙබරවාරි 20 - මාර්තු 20 අතර උපන් පුද්ගලයින් මෙම ලග්නයට අයිතිය. 

මෙම සටහන දෙස බැලීමෙන් අපට අවබෝධවන්නේ පෙරදිග මෙන්  නොව බටහිර ජ්‍යෝතිෂයේ සිය ලග්නය සොයගෙන්නට විශේෂ ගණනය කිරීම් අවශ්‍ය නැති බවය. අවශ්‍ය වන්නේ තමා උපන් මාසය හා දිනය දැනගැනීම පමණකි. 

පෙරදිග ජ්‍යෝතිෂයේ මෙන් බටහිර ජ්‍යෝතිෂයේ ද ග්‍රහ බලපෑම් විශ්වාස කරනා අතර ග්‍රහයින්ගේ නම් ද බොහෝ දුරට සමාන වේ. මෙහි දැක්වෙන්නේ එම ග්‍රහයන් සහ ඒවායෙන් නිරූපනය වන්නා වූ දෑ ය. 

සූර්යා (රවි) - ස්වයං ප්‍රකාශනය, ජීවන බලවේගය 
චන්ද්‍රයා (සඳු) - හැඟීම්, ප්‍රතිභාව, නිවස, දෙමාපියන් 
බුද - සිතිවිලි, කථනය, සන්නිවේදනය, ව්‍යාපාරික කටයුතු, කෙටි ගමන් බිමන් 
සිකුරු - ආදර ජීවිතය, නිර්මාණාත්මක බව, සුන්දරබව, සමාජ ජීවිතය 
අඟහරු (කුජ) - ක්‍රියාව, ශක්තිය, හදිසි අනතුරු, අධිෂ්ඨානය, ලිංගික ප්‍රකාශනය 
බ්‍රහස්පති (ගුරු) - වාසනාව, අවස්ථාවන් 
සෙනසුරු (ශනි) - රාජකාරී, වගකීම්, පාඩම්, ආශාවන් 
යුරේනස් - ක්ෂණික වෙනස්වීම්, ආතතිය, ප්‍රඥාව 
නෙප්චූන් - සිහින, මායාවන්, රැවටීම්, කලාවන් 
උතුරු චන්ද්‍ර අක්ෂය - මකර හිස, නව සහ ආගන්තුක සිදුවීම් සහ ක්‍රියාවන් 
දකුණු චන්ද්‍ර අක්ෂය - මකර වලිගය, ළමාවියෙහි හෝ පෙර භවයන් හි සිට පැමිණෙන පුරුදු 

මෙම තොරතුරු ඉදිරිපත් කළේ බටහිර ජ්‍යෝතිෂ විද්‍යාව පිළිබඳ ඔබට යම් වැටහීමක් ඇතිවනු පිණිසය. බටහිර රටවල ජ්‍යෝතිෂය පෙරදිග මෙන් සෑම වැඩකටයුත්තක් සඳහාම භාවිතයට නොගත්ත ද එය සෑහෙන ජනප්‍රියත්වයකින් පවතී. දිනපතා කෙටි පණිවිඩ මගින් පලාපල දැනුම්දෙන ආයතන ද එහි බොහෝ පවතී. මහා බ්‍රිතාන්‍ය රජ පවුල පවා මේ පිළිබඳ විශ්වාසයෙන් වැඩකටයුතු කරනා බැව් පෙනේ. ඔවුනගේ යම් යම් සුබ කටයුතුවලදී ජ්‍යෝතිෂ අදහස් අනුගමනය කරනා බැව් දැනගන්නට ලැබී ඇත. 

Wednesday, August 21, 2013

පැරණි සමාජයේ පහළම කතුන්ගෙන් නව සමාජයේ ඉහළම කතුන් උරුම කරගත් දැව ආභරණ - Wooden Jewelleries



කාන්තා විලාසිතාවන් අතර කැපී පෙනෙන දෙයක් වන්නේ ආභරණය. කුමන ඇඳුමකින් සැරසී සිටිය ද එයට ගැළපෙන ආභරණ පැළඳීමෙන් කාන්තාවකගේ පෙනුම සුවිශේෂ අයුරින් කැපී පෙනෙන තත්ත්වයකට පත්කළ හැකිය. අනෙක ආභරණ යනු විලාසිතාවන් අතර මග හැරිය නොහැකිම දෙයකි. අතීතයේ රන් හෝ රිදී ආභරණ සඳහා වැඩි ජනප්‍රියත්වයක් පැවතුණි. මන්ද දිදුලන ආභරණ කෙරෙහි වැඩි දෙනෙකුගේ ඇස ආකර්ෂණය කරගැනීමට හැකි වූ නිසාය. මිල අධික වීම හා ආරක්ෂාව පිළිබඳ ගැටලු නිසා මෙවැනි ආභරණ කාන්තාවන්ගෙන් මඳක් ඈත් වූ බැව් පෙනුණි. ඒ වෙනුවට මිලෙන් අඩු නමුත් සුවිශේෂී අලංකාරයෙන් යුක්ත ආභරණ ජනප්‍රිය වන්නට විය. සිප්පි කටු, යකඩ, ප්ලාස්ටික් මේ අතර කැපී පෙනේ. විශේෂයෙන් රන් හෝ රිදී ආභරණ ජනප්‍රියත්වයෙන් අඩු බටහිර රටවල මෙවැනි ඒවා සඳහා ඇත්තේ වැඩි ඉල්ලුමකි. මෑතක සිට බටහිර ලෝකයේ මෙන්ම අප රටේ ද ජනප්‍රිය වෙමින් පවතින තවත් එක් විලාසිතාවක් වන්නේ දැව ආභරණය. දැව කොටස්වලින් සකස් කරනා ලද මාල, වළලු, මුදු, කරාබු වැනි බොහෝ දේ දැන් වෙළෙඳසල්වල අලෙවි කරන්නට තිබේ. එපමණක් නොව ඒවා අන්තර්ජාලය ඔස්සේ ද මිලට ගන්නට පුළුවන.

මෑතක සිට ජනප්‍රිය වන්නට පටන් ගැනුණු බැවින් මෙය මෑතකදී නිර්මාණය කරගත් ආභරණ විශේෂයක් වශයෙන් යමෙකුට හැඟෙන්නට පුළුවන. නමුත් දැවයෙන් කරන ලද ආභරණවලට ඇත්තේ ඉතා දිගු ඉතිහාසයකි. එය ප්‍රාග් ඓතිහාසික යුගය දක්වා දිව යන්නකි. එබැවින් මේ සම්බන්ධයෙන් කිව යුතු විශේෂතම කරුණක් වන්නේ මෙම දැව ආභරණ රන්, රිදී දියමන්ති ආභරණවලට වඩා බොහෝ වයසින් වැඩි බවය. අතීත මානවයෝ දැවවලට අමතරව පාෂාණ අස්ථි කොටස්, ආදිය ද උපයෝගි කරගනිමින් විවිධාකාරයේ ආභරණ නිර්මාණය කළහ. වර්තමානයේ මේවා ජනප්‍රියත්වයට පත්වන්නේ අපට අතීත උරුමයක් යළි පණ ගැන්වීමක් ලෙස මිස මෑතකදී මතු වූ විලාසිතාවක් ලෙසින් නොවේ.
මෑතක සිට කාන්තා විලාසිතා අතර සොබාදහම හා බැඳුණු ඒවාට ලැබෙන ජනප්‍රියත්වය කමෛන් වැඩිවෙමින් පවතින බව ද පෙනේ. ඒ නිසාම මිල අධික ඇඳුම් වෙනුවට කපු රෙද්දෙන් කළ ඇඳුම්වලට ඇති ඉල්ලුම වැඩිවෙමින් පවතී. මන්ද එවැනි රෙදිවලින් සකසන ලද ඇඳුම් නිසා ශරීරයට ලැබෙන සුවපහසුව සේම සෞඛ්‍යාරක්ෂිත බව වැඩි බැව් අත්දැකීමෙන්ම අවබෝධ වී ඇති නිසාය. එවැනි කපු ඇඳුම් සමග දැවයෙන් කරන ලද ආභරණ පැළැඳීමෙන් තමන් සොබාදහම සමග තව තවත් සමීප වන බැව් බොහෝ කාන්තාවන් දැන් සිතන්නට පටන් ගෙන ඇත. ඒ නිසාම බටහිර රටවල මේවා පාරිසරික ආභරණ ඥජධ ණඥඹඥතපර නමින් ජනප්‍රියත්වයට පත්ව තිබේ. එහි අරුත වන්නේ පරිසර හිතකාමී පරිසරය හා බැඳුණු ආභරණ වැන්නකි. බටහිර රටවල මෙය ජනප්‍රියවන්නට පටන් ගැනෙන්නේ 1930 සිට 1950 දශක අතර කාලයේදීය. විශේෂයෙන් දෙවන ලෝක සංග්‍රාමය මුල් කොට ගෙන ලෝකයේ ආර්ථික පරිහානිය පැවැති කාලයේ දැව ආභරණ සඳහා අධික ඉල්ලුමක් පැවැති මුත් නවීන කර්මාන්ත තාක්ෂණයේ දියුණුවත් සමග කමෛන් ප්ලාස්ටික් ආභරණ ජනප්‍රියවන්නට පටන් ගැනීමත් සමග මේවාට ඇති ඉල්ලුම ද අඩුවී ගියේය. නමුත් වර්තමානයේ මෙම තත්ත්වය කමෛන් වෙනස් වෙමින් පවතී. ඒ අප පෙර දී කතා කළ සොබාදහමට ඇති ආදරය නිසාය.

නමින්ම දැක්වෙන පරිදි මෙම ආභරණ සම්පූර්ණයෙන්ම හෝ අර්ධ වශයෙන් හෝ දැවයෙන් සකස් කරන ලද ඒවාය. ඇතැම් ඒවා සම්පූර්ණයෙන්ම දැව කොටස්වලින් යුක්ත වුවද ඇතැම් ඒවා වීදුරු, ගල්, ප්ලාස්ටික් හෝ සිප්පි කටු සමග මිශ්‍ර කරමින් සකසා ගන්නා බව පෙනේ. වර්තමානයේදී නම් දැවයෙන් සම්පූර්ණයෙන් නිමවන ලද අත් ඔරලෝසු පවා මිලට ගන්නට පුළුවන. දැව ආභරණ අතර සාම්ප්‍රදායික හැඩ තල මෙන්ම එසේ නොවන ඒවා ද දක්නට ලැබේ. ඇතැම් ඒවායේ ඇත්තේ මුල් දැව කැබැල්‍ලේ හැඩයම මිස අලුතින් නිර්මාණය කරන ලද්දක් නොවේ. ඇතැම් දැව වර්ගවල ඇති වර්ණ ද මෙම ආභරණවල අලංකාර බව වැඩි කරන්නට හේතු වී තිබේ. කුමනාකාරයෙන් තනනු ලැබුව ද විශේෂයෙන්ම පෙනෙන්නට ඇති දෙය නම් ඒ සියලු ඒවා කිසිදු අපහසුවකින් තොරව අලෙවි කරගත හැකි බවය. අන්තර්ජාලය ඔස්සේ දැව ආභරණ අලෙවි කරනා ඇතැම් වබේ අඩවිවලින් කෙරෙන්නේ ලෝකයේ බොහෝ ඈත රටවල සිටින සාම්ප්‍රදායික ජීවන රටා ගතකරන්නන් නිපදවන දැව ආභරණ එකතු කොට ඒවා අලෙවි කිරීමය. මෙයින් දැව ආභරණවලට පමණක් නොව ඒවා නිර්මාණය කරන්නන්ට ද ජනප්‍රියත්වයක් ලැබේ. මෙසේ නිපදවන ඇතැම් දැව ආභරණ කෙතරම් මටසිලිටි ලෙස සියුම් ලෙස නිර්මාණය කර ඇතිදැයි කිවහොත් ඒවා දැවයෙන් නිර්මාණය කරන ලද ඒවාදැයි සැක සිතෙන තරම්ය. ඇතැම් ඒවා රන් හෝ රිදී තරමටම ඔපවත්ය.

අප රටේ සංස්කෘතිය පිළිබඳ සලකා බලන විට අපට දක්නට හැකි දෙයක් වන්නේ රන් මෙන්ම රිදී ආභරණ අතීතයේ ඉතා ජනප්‍රියව පැවැති බවය. කෞතුකාගාරයට ගිය විට අපේ ඉපැරණි ආභරණ ඕනෑ තරම් දැක බලා ගන්නට පුළුවන. නමුත් දැවයෙන් හෝ වෙනත් වර්ගවලින් කරනා ලද ආභරණවලට අතීත සිංහල ජනසමාජය අතර වැඩි ඉල්ලුමක් තිබුණු බැව් නොපෙනේ. විශේෂයෙන් උසස් යැයි සම්මත කුල කාන්තාවන් අතර රන් හෝ රිදී ආභරණ හැරුණුවිට වෙනත් ආභරණ ජනප්‍රිය වූයේ නැත. දැව හෝ සිප්පි කටුවලින් තැනූ ආභරණ වැඩි වශයෙන් ජනප්‍රියව පැවැතියේ පහත් යැයි සම්මත කුල අතරය. පැරණි ඉන්දියාවේ ආර්ය වංශික කාන්තාවන් රන් රිදී ආභරණ පැළඳි අතර දැව හෝ ලෝහ ආභරණ කුලහීන කතුන්ට සීමා වූ බව පෙනේ. එවැනි ආභරණ පැළඳීම උසස් කුලවතුන් සැලකුවේ මදිකමක් ලෙසිනි. නමුත් දැන් තත්ත්වය හාත්පසින්ම වෙනස්ය. දැන් අප රටේ දැව ආභරණ කෙරෙහි වැඩි ආකර්ෂණයක් පළ කරන්නේ ද නාගරික උසස් සමාජ ආර්ථිකයකින් යුතු කාන්තාවන් බව පෙනේ.

රැජින 2013-08-23

Thursday, August 15, 2013

බ්‍රිතාන්‍ය රජ පවුලට උරුම රජ සැප - Royal Privileges of British Royal Family


විලියම් කුමරුට හා කැතරින් කුමරියට පුත් කුමරකු ඉපදීමෙන් පසුව බ්‍රිතාන්‍ය රාජකීයයන් පිළිබඳ බොහෝ දෙනා තුළ යම්කිසි සුවිශේෂී උනන්දුවක් ඇති වී තිබෙන බව පෙනෙයි. අප රටේ බොහෝ දෙනකු විශ්වාස කරන අන්දමට ජෝර්ජ් ඇලෙක්සැන්ඩර් ලුයී ලෙසින් මෙලොව එළිය දැක ඇත්තේ මෙලොව කලාතුරකින් බිහිවන පුණ්‍යවන්තම දරුවෙකි.  බ්‍රිතාන්‍ය මහ රැජින, කිරුළේ අයිතිය ඔවුන්ගේ රාජකීය පරම්පරාවත්් පිළිබඳ බොහෝ දෙනා  මහත් ආශාවෙන් කතා කරති. ඔවුන් පිළිබඳ ඔබ සමග අප ද කතා කරන්නට සිතුවේ එබැවිනි.

බ්‍රිතාන්‍ය රජ පවුල  ලෝකයේ දැනට පවතින රාජකීය පවුල් අතරින් ඉතා දිගු ඉතිහාසයකට හිමිකම් කියයි. එහි ආරම්භය ලෙස සඳහන් වන්නේ ක්‍රි.ව. 757 වසරයි. ඒ ඔෆ්ෆා නමැත්තා සිය ඥාති සොයුරු වූ ඒ තල්බාඩ් මරා දමා මර්සියා නම් රාජධානිය අත්පත් කරගැනීමත් සමගිනි. එතැන් පටන් ලොව වටා වූ විවිධ රාජ්‍ය අත්පත් කරගනිමින් හිරු නොබසින අධිරාජ්‍යය යන විරුදාවලිය ලබමින් ව්‍යාප්ත වුණු බ්‍රිතාන්‍ය රාජධානිය අදවන විට ප්‍රමාණයෙන් කුඩා වුවද මේ තාක් පැමිණි රාජකීය පරම්පරාව අදටත් මහේශාක්‍ය ලීලාවෙන් වැජඹෙයි.

බ්‍රිතාන්‍යය වර්තමානයේ රජ පවු‍ලේ පාලනයට ලක්ව නැති ප්‍රජාතන්ත්‍රවාදී රාජ්‍යයක් වුවද එහි බහුතරයක් තවමත් බ්‍රිතාන්‍ය රජ පවුල කෙරෙහි සුවිශේෂී ආදරයක් දක්වති. ඕස්ට්‍රේලියාව බ්‍රිතාන්‍ය රැජිනගෙන් මිදිය යුතු ද නැතිද යන්න පිළිබඳ කළ ජනමත විමසුමකදී හෙළිවූයේ ඔවුන් තවමත් මහ රැජිනට කැමැති බවය. මේ නිසාම රජ පවුල බොහෝ වරප්‍රසාද විඳිමින් සැප විඳින තත්ත්වයට පත්ව ඇත.

බ්‍රිතාන්‍ය රජ පවුල භුක්ති විඳින වරප්‍රසාද පිළිබඳ බොහෝ කාරණා සොයා ගැනීමට නැතත් විවිධ මූලාශ්‍ර ඔස්සේ යම් යම් දේ සොයාගත හැක. ඔවුන්ගේ වරප්‍රසාද අතර පහත කාරණා සුවිශේෂය. 2008-2009 වසරේ පමණක් එහි බදු ආදායමින් ස්ටර්ලිං පවුම් මිලියන 41.5 (රුපියල් මිලියන 8260.03) බ්‍රිතාන්‍ය මහ රැජිනගේ වියදම් සඳහා වෙන් කෙරිණි.

නිල මහජන රාජකාරි සිදුකරගෙන යාම සඳහා මහ රැජිනත් එඩින්බර්ග් ආදිපාදවරයාත් වාර්ෂික පාර්ලිමේන්තු දීමනාවලට හිමිකම් කියති.
මහ රැජිනගේ ගමන් බිමන් සඳහා බ්‍රිතාන්‍ය රජයෙන් බෙන්ට්ලි රථ 2 ක්, රොල්ස් රෝයිස් රථ 3 ක් හා ඩේම්ලර් රථ 3 ක් වශයෙන් අති සුඛෝපභෝගී රථ 8 ක් ලබා දී තිබේ.

බ්‍රිතාන්‍ය මහ රැජිනට ලෝකයේ කිසිදු රටකට ගමන් කිරීම සඳහා ගමන් බලපත්‍රයක් අවශ්‍ය නැති අතර වාහන පැදවීම සඳහා රියැදුරු බලපත්‍රයක්ද අවශ්‍ය නැත. බ්‍රිතාන්‍ය රාජකීයයන්ගේ සියලු වියදම් සඳහා මුදල් සොයාගන්නේ සාමාන්‍ය ජනතාවගේ බදු මුදල්වලින් බව සැබෑ මුත් රජ පවුලටම වෙන්වූ ආදායම් මාර්ග ද නැතිවාම නොවේ. නමුත් කාලයත් සමග මෙම ආදායම් මාර්ග කමෛන් අඩුවී ගොස් තිබේ. රජ පවුලට අයත්ව තිබූ ඇතැම් දේපළ ඔවුන් කැමැත්තෙන්ම රජයට පවරා දුන් අවස්ථා ද දක්නට ලැබේ.

බ්‍රිතාන්‍ය මීට දශක ගණනාවකට පෙර තිබූ සෞභාග්‍යමත් ආර්ථිකයට දැන් හිමිකම් නොකියන නිසා ඇතැමුන්ගේ අදහස නම් බ්‍රිතාන්‍ය මහ රැජින ඇතුළු රජ පවුලට හිමිව ඇති මෙම ආර්ථික වරප්‍රසාද බොහොමයක් කපා හැරිය යුතු බවය. ඔවුන් පවසන්නේ රජ පවුල් බ්‍රිතාන්‍ය ආර්ථිකයට පවා බරක් බවය. අප රටේ මෙන් නොව එහි ආර්ථික වර්ධනයේ ඉලක්කයන් සපුරාගැනීම සඳහා ඔවුහු වැඩකරන දින ගණන පවා සියුම්ව ගණනය කරති. යම් වසරක නියමිත නිවාඩු දින ගණනට වඩා එකක් හෝ වැඩි වුවහොත් එය ඔවුන්ගේ ආර්ථික ඉලක්කයන් සපුරාගන්නට බාධා කරයි. රජ පවු‍ලේ යම් කිසි සුවිශේෂී උත්සවයක් ඇති වුවහොත් එවැනි දිනයක් නිසැක ලෙසම රජයේ නිවාඩු දිනයක් බවට පත්වේ. රජ පවුල් ආර්ථිකයට බරක් බැව් ඇතැමෙක් පවසන්නේ එබැවිනි. බ්‍රිතාන්‍ය රජය මේ වන විට පවුම් ට්‍රිලියන 1.1ක ණය බරකින්ද මිරිකී සිටී.

නමුත් බහුතරයකගේ කැමැත්ත වන්නේ රජ පවුල මෙවැනි වරප්‍රසාද ලබා දී අනාගතය මුළුල්‍ලේ ද ආරක්ෂා කරගත යුතු බවය. රජ පවුල් යනු සංචාරකයන් බ්‍රිතාන්‍යයට අද්දවා ගැන්මට ඇති ප්‍රධාන උපක්‍රමයකි. අනෙක රජ පවුල නිසා බ්‍රිතාන්‍ය තුළ අත්තනෝමතික පාලනයක් ගෙන යන්නට කිසිදු අගමැතිවරයකුට හැකියාවක් නැත. අදටත් බ්‍රිතාන්‍යයේ පවතින නීතිය අනුව මහ රැජිනට ද හිතුමතේ කටයුතු කරන්නට නොහැකිය. මේ හේතු දෙක නිසා මහ බ්‍රිතාන්‍ය තුළ ඒකාධිපති පාලනයක් බිහිවීමේ ඉඩකඩක් නැත. රජ පවුල තවදුරටත් සියලු වරප්‍රසාද දී පවත්වා ගතයුතු බවට බොහෝ දෙනෙකු පවසන්නේ එබැවිනි.

අනෙක බ්‍රිතාන්‍යය ලෝකයේ අභිමානවත් හා මහේශාක්‍ය රටක් බවට පත්ව ඇත්තේ ද රජ පවුල නිසාවෙනි. කොටින්ම රජ පවුල බ්‍රිතාන්‍යය හොබවන සුවිශේෂ කිරුළකි. මෙම හේතුන් නිසා ඔවුනට මෙම වරප්‍රසාද ලැබිම පිළිබඳ බහුතරයක් ප්‍රශ්න කරන්නේ හෝ එය අභියෝගයට ලක් කරන්නේ  නැත. ප්‍රශ්න කරන්නේ ලිබරල් මතවාදීන් පමණකි.


මේ නිසා රජ පවු‍ලේ සියලු දෙනා බහුතරයකට වැදගත් කාරණාය. දිනපතා දරුවන් බොහෝ දෙනෙකු උපන්නද විලියම් කුමරුව හා කැතරින් කුමරියට පුත් කුමරකු ඉපදීම ඔවුනට සුවිශේෂී වන්නේ එබැවිනි.