පුවත්පත්වලට ලිපි ලිවීම මාගේ විනෝදාංශයකි. මා ලියන ලිපි මගින් පාඨකයින් දැනුමක් ලබමින් ජීවිතයට යමක් එකතු කරගන්නේ නම් එය මාගේ සතුටකි. වේගයෙන් ඉදිරියට ඇදෙන තාක්ෂණික ලෝකයේ පුවත්පත් කියවන්නට තරම් විවේකයක් නොමැති අයවලුන් බොහෝය. තවකෙකු පුවත්පත් කියවන්නට කැමති නැත. අන්තර්ජාලයේ ද සිංහල බසින් සියලුම පුවත්පත් ඇති බැවින් තාක්ෂණයට ප්‍රිය කරන්නෝ පරිගණකයෙක් හෝ සිය ජංගම දුරකථනයෙන් ඒවා කියවති. එබැවින් මා ලියන ලිපි එවැනි පාඨක පිරිස් වෙත යොමු කරන්නට අදහස් කළ නිසා මෙවැනි බ්ලොග් අඩවියක් ගොඩනගන්නට සිතුවෙමි. මාගේ උත්සාහය කෙතරම් නම් සාර්ථකදැයි තීරණය වන්නේ ඔබගෙන් ලැබෙන ප්‍රතිචාර මතය. එබැවින් ඔබ මේ පිළිබඳ සිතන පතන දෑ මවෙත දන්වන්නට උනන්දුවන්නේ නම් එය මාගේ සතුටයි. ඔබ සැමට තෙරුවන් සරණයි!

Sunday, September 28, 2014

දහවලටත් අද්භූත රූප මැවී පෙනෙන අනුරපුර ආරාමික වන පෙත - Anuradhapura Monastery Forest where the mysterical phenomenon happens


දිවා කාලයේ පවා විවිධ අද්භූත දර්ශන විද්‍යමාන වන බව පැවසෙන අනුරාධපුර පූජා නගරය ආසන්නයේම පිහිටි වන පෙතක් පිළිබඳව අපට අසන්නට ලැබුණේ ඉතා අහම්බෙනි. අනුරාධපුර සමාධි පිළිමයේ සිට ගල් පාලම පාර ඔස්සේ කිලෝ මීටර් දෙකක් පමණ දුරකින් පිහිටි මෙම විස්මිත වන පෙත පිළිබඳව අතීතයේ සිට ප්‍රදේශයේ ගැමියන් තුළ භීතියක් ඇති කළ බව ද අපට දැන ගත හැකි විය.


අතීතයේ නොයෙකුත් අද්භූත රූප දර්ශනය වූ මෙහි පසුගිය කාලයේ සිට දිවා කාලයේ දී පවා යෝගාවචර භික්‍ෂුන්වහන්සේගේ රූප අද්භූත ලෙසින් දර්ශනය වන බව ද අප ලත් තොරතුරින් පැවසිණි.


ඉතා කලාතුරකින් අසන්නට ලැබෙන පුවතක් වූ මෙහි සත්‍ය අසත්‍යතාව විමසීමේ වැදගත්කම වටහා ගත් අපි පසුගිය දිනෙක එම වන පෙත සොයා ගියෙමු. එය පිහිටියේ අනුරාධපුර වටවන්දනා පාරෙන් තරමක් ඔබ්බට වන්නටය. අනුරාධපුරයට පැමිණෙන වන්දනාකරුවන්ගෙන් ඉතා සුළු පිරිසක් පමණක් මෙම මාර්ගය ඔස්සේ ගමන් කරති. ඒ අනුරාධපුර ඓතිහාසික ගල් පාලම නරඹනු පිණිස ය. එනිසාම මෙම මාර්ගය ගල් පාලම පාරයනුවෙන් ප්‍රසිද්ධව පවතී.


අනුරාධපුර කුට්ටම්පොකුණ සහ සමාධි ප්‍රතිමාව අද්දරින් වැටී ඇති මෙම මාර්ගය ඔස්සේ කිලෝ මීටර් දෙකක් ඉදිරියට ගිය අපට සමස්ත ලංකා බෞද්ධ මහා සම්මේලනය විසින් සවිකරවන ලද විජයාරාම ආරාමික නටබුන්යන නාම පුවරුවක් දැක ගත හැකි විය. ඒ ප්‍රධාන මාර්ගයෙන් වමට හැරෙන රණවිරු ඉන්දික අරුණමාර්ග පිවිසුමේය. එම මඟ ඔස්සේ තවත් මඳ දුරක් ගිය අපට ද්වීතීක වන ලැහැබ් සහිත පරිසරයකට පිවිසිය හැකි විය. එම මාර්ගයේ වම් පස බැකෝ යන්ත්‍ර මගින් අක්කර ගණනාවක පිහිටි පස ඉවත් කොට කොට ඇති බවක් ද අපට දැක ගත හැකි විණි. එය ක්‍රීඩා පිටියක් තැනීමේ මූලික පියවරකැයි ගම්මු කීහ.


අපේ ගමනාන්තය වූ මෙම අද්භූත වන පෙත පිහිටියේ ඉන් මඳක් ඔබ්බේය. මෙය පුරා විද්‍යා දෙපාර්තමේන්තුව සතු රක්‍ෂිතයකි. මෙය නම් කොට ඇත්තේ විජයාරාමයයනුවෙනි. එහෙත් විජයාරාමය යනු මෙහි පැරණි නම නොවේ. එය මෑතක දී පටබැඳුණු නමකි. එහෙත් මෙතෙක් නාමිකව හඳුනා නොගැනුණු ක්‍රී.ව. හත් වන හෝ අට වන සියවස්වලට අයත් පැරණි පබ්බත විහාරයක නටබුන් මෙම වන පෙත තුළ සැඟව ඇතැයි අපට දැන ගන්නට ලැබිණි.


මේ ඡායාරූපය 2014 සැප්තැම්බර් 27 වැනි දින රාත්‍රී 10.00 ට පමණ විජයාරාම පුරාවිද්‍යා පරිශ්‍රයට ගිය වෛද්‍ය සුගත් විජේවර්ධනයන් ගත් එකක්. මෙහි දැක්වෙන ආලෝකය කුමක් විය හැකිද?



පබ්බත විහාර යනු අනුරාධපුර යුගයේ ඇතුළු නුවර පිහිටි මහා විහාර වලට අමතරව යෝගාවචර භික්‍ෂුන්වහන්සේ වැඩ සිටි වන ගත ආරාම විශේෂයකි. ආරාමික ගෘහනිර්මාණ සැලසුම් වලට අනුව මේවා පංචාවාස යනුවෙන් පුරා විද්‍යාඥයන් වර්ග කොට ඇත. අනුරාධපුර ඇතුළුනුවරට පිටතින් පිහිටි වෙස්සගිරිය හෙවත් පැරණි ඉස්සරාරාමය, තොළුවිල, ප්‍රාචීනතිස්ස පබ්බත, පුලියන්කුලම සේම මීට නොදුරින් පිහිටි පන්කුලියේ අශෝකාරාමය ද මෙතෙක් හඳුනා ගැනුණු පංචාවාස අතරින් කිහිපයකි.


එහෙත්, ඉහත සඳහන් සෙසු පංචාවාස සමඟ සංසන්දනය කරන විට මෙම වන පෙත තුළ පිහිටි පංචාවාසය පුරා විද්‍යාත්මක වශයෙන් කිසිදු ගවේෂණයකට ලක් වී නැත. ශ්‍රී ලංකාවේ ප්‍රථම පුරා විද්‍යා කොමසාරිස් ධුරය හෙබවූ එච්.සී.පී. බෙල් සූරීන් දහනව වන සියවසේ අග භාගයේ තැබූ වාර්තා කිහිපයක මෙම වන වාසය පිළිබඳව සටහන් වී තිබේ. එහෙත් ලංකාවේ අසම සම පුරා විද්‍යාඥයා වශයෙන් සැලකෙන සෙනරත් පරණවිතානයන් ගේ අවධානය හෝ මෙම වනවාසය සහ ආරාමික සැලැස්ම කෙරෙහි පූර්ණ වශයෙන් යොමු නොවීම පුදුමයකි.


එහෙත් අක්කර විසිදෙකක භූමි ප්‍රමාණයකින් යුත් මෙම විජයාරාම පැරණි ආරාම සංකීර්ණය පුරා විද්‍යා අධ්‍යක්‍ෂ ජනරාල් ආචාර්ය සෙනරත් දිසානායකයන්ගේ අධීක්‍ෂණය යටතේ මධ්‍යම සංස්කෘතික අරමුදල මඟින් පුරා විද්‍යා ගවේෂණයන්ට ලක් කිරීමේ වැඩසටහනක් මේ වසරේ ජනවාරි දහවෙනි දින සිටඅරඹා ඇත. මෙම ගවේෂණ කටයුතු සඳහා නියාමකත්වය ලබා දෙනුයේ මධ්‍යම සංස්කෘතික අරමුදලේ ව්‍යාපෘති අධ්‍යක්‍ෂ මහාචාර්ය ටී.ජී. කුලතුංගයන් විසිනි.


මධ්‍යම සංස්කෘතික අරමුදලේ ගවේෂණ නිලධාරී රංජිත් ගොඩකුඹුර මහතා මෙම ගවේෂණ කණ්ඩායමේ ප්‍රධානත්වය හොබවයි. මෙම ගවේෂණය යටතේ මෙම වන ගැබ තුළ තිබූ පැරණි ආරාමික ස්ථාන හතළිස් තුනක් හඳුනාගෙන ඇත. මෙම ව්‍යාපෘතිය සඳහා සමස්ත ලංකා බෞද්ධ මහා සම්මේලනය ද සුවිසල් දායකත්වයක් හිමිකර දී තිබේ.


‘‘මොකක්ද මේ කැලය ඇතුළේ අද්භූත දර්ශන පේනවය කියන කතාව ?’’


මෙම ආරාමික පරිශ්‍රය තුළදී අපට හමුවූ එහි සේවක මුතු බණ්ඩා දසනායක මහතාගෙන් අපි ඇසුවෙමු. රූස්ස ගසින් යුත් පිරිපුන් වනාන්තර ලක්‍ෂණ පළ කරන මෙම වන පියස තුළට හිරු එළිය පතිත වනුයේ ද ඉතා සීමිතවය. එනිසා මෙය නිරතුරු අඳුරු ස්වභාවයකින් යුක්ත වූවකි.




‘‘මේ කැලේ එක එක අද්භූත රූප දවල්ටත් පේනවය කියලා ගම්මුන් අතරේ ඉස්සර ඉඳලම කතා පැතිරිලා තියෙනවා. ඒ නිසා මේ අවට ගම්වල ගෑනු අය දරකෑල්ලක් කඩා ගන්නවත් මේ කැලෑවට ඇවිත් නැහැ. ඉස්සරම කතා පැතිරිලා තිබුණේ මේ කැලයේ වලිගයක් තියෙන ලොකු මිනිහෙක් ඉන්නවය කියලාලූ.


නමුත් මෑතක ඉඳලා තමයි ඔය යෝගාවචර හාමුදුරුවරුන්ගේ රූප දර්ශනය වෙනවාය කියන කතාව පැතිරිලා තියෙන්නේ. කොහොම වුණත් මේ හැම රූපයක්ම මේ නටබුන්වලට අරක් ගත්තු බහිරව දේවතාවුන් වහන්සේ පෙන්නුම් කරන දේවල් කියලා තමයි ගම්මුන් විස්වාස කරන්නේ. නමුත් මේ පරිශ්‍රයේ ගවේෂණ කටයුතු පටන් ගැනීමත් එක්ක අනුරාධපුරයට එන බොහොම දෙනෙක් මේ පුරාවිද්‍යා පරිශ්‍රය බලන්නත් එනවා.හෙතෙම කීය.


ඒ හාමුදුරුවරුන්ගේ රූප දැකපු කෙනෙක් අපිට මුණ ගස්සන්නට බැරිද ?

 අපි දසනායක මහතාගෙන් අසා සිටියෙමු.


"ඔය කතාව පළාත පුරාම පැතිරිලා තියෙන බවක් විතරයි මම දැන ගෙන හිටියේ. මේ සයිට් එකේ වැඩට ආපු නුවර පැත්තේ මිස් කෙනෙක් මීට සති දෙකකට විතර කලින් සිකුරාදාවක දවල් එකොලහට විතර බොරපාට දිග ලෝගුවක් වගේ ඇඳුමක් ඇඳගත්තු කවුරු හරි පේන්න ඉන්නවා ගස් අතරින් දැකලා තියෙනවා. ඊට පස්සේ ඒ මිස් එක පාරටම අහක බලන කොටම එතනත් ඒ රූපය ඒ විදිහටම පෙනිලා තියෙනවා. මේ විදිහට හතර සැරයක්ම ඒ මිස් රූපය දැකලා. ටික වෙලාවකින් එතැනට ආපු කනිටු සේවකයෙකුගෙන් අහල තියෙනවා, මෙතැන තේරුම් ගන්ඩ බැරි හරි අමුතු දෙයක් දැක්කා කියලා.


පුදුමෙ කියන්නේ ඒ මිස් මේ කැලේ ඔහොම දර්ශන තියෙනවා කියලා කලින් අහල තිබිලම නැහැ. එතකොට අර කනිටු සේවකයාත් මිස් බය වෙයි කියලා හිතාගෙන නෑ මිස් එහෙම මුකුත් මෙහෙ නෑ කියලා කියලා තියෙනවා.දසනායක මහතා කීය.


‘‘එහෙම අද්භූත දර්ශන පේනවා නම් මෙතැනට ජනතාව පැමිණීමේ අඩුවක් තියෙන්න ඕනේ නේද?’’ අපි ඇසීමු.


මම හිතන්නේ නෑ හැමෝටම එහෙම පෙනේවිය කියලා. ඒත් මෙතැනට එන හුඟදෙනෙක් කියන්නේ මෙතැනදී හිත සමාධිගත වෙනවා වගේ අමුතුම සුවයක් දැනෙනවා කියලයි. ඒ හැරුණම මේ වගේ දර්ශනවලින් කාගේවත් ලොම් ගහකටවත් නපුරක් වෙලා නැහැ.ඉතින් මොකටද මෙහේ එන්න බය වෙන්නේ.


දසනායක මහතාගේ ඒ කතාවට සවන් දුන් අපි ඉන්පසුව එම ආරාමික වන පෙත ආසන්නයේම පිහිටි නිවසට ගොස් එහි ගෘහමූලිකයා වන හේරත් මුදියන්සේලාගේ චන්ද්‍රරත්න මහතා හමු වීමු. එම පරිශ්‍රය තුළ අද්භූත රූප දර්ශනය වන පුවත තමන් ද විටින් විට අසා තිබුණත් එවැනි දර්ශනයක් කිසිදා දැක නැති බව හෙතෙම කීය.


ඒත් මහත්තයො මෙහෙම දෙයක් නම් සිද්ධ වුණා. මම පහුගිය කාලේ හරක් බඳින්න ඔය කැලේට ගියා. ඊට පස්සේ මට එකපාරටම හිතට අමුත්තක් තේරුණා. ඒ හින්දම මට පාර අමතක වුණා. අන්තිමේ මම මේ කැලෙන් එළියට ඇවිත් තියෙන්නේ කොලොන්ගස්වැව වැව පැත්තෙන්. ඔය කැලේ කිට්ටුවම ඉන්න මටත් එහෙම දෙයක් වුණේ කොහොමද කියල මටම හිතා ගන්න බැහැ.


සාමාන්‍යයෙන් මිනිස්සු හේන් කුඹුරුවලට අඩි පාරක් තනාගන්නේ ඒ ආසන්නම භූමි භාගය හරහායි. නමුත් ඔය කැලය හරහා අඩි පාරක්වත් වැටිලා නැහැ. ගම්මුන් අඩි පාර තනාගෙන තියෙන්නේ ඔය කැලේ මැදින් බිම්කඩ මඟහැරෙන විදියට. මේවා නිකම්ම සිද්ධ වුණු දේවල් වෙන්න බැහැ, මේවාට මොකක්හරි ප්‍රබලහේතු බලපාන්න ඇතිහෙතෙම කීය.


කෙසේ හෝ මෙම ආරාමික වන පියස තුළ ඇති ඇඳිරිය තුළ අපට නොවැටහෙන කිනම් හෝ ගුප්ත බලයක් පැතිර ඇතැයි සිතේ. මෙම බිම් කඩෙහි ඇති නටබුන් අතීතයේ මෙහි පැවැති ප්‍රෞඩ ශාසනික උරුමය කියා පාන ප්‍රබල ශාක්ෂි වැන්න. අතීතයේ මෙහි වැඩ වාසය කළ දස දහස් ගණන් භික්‍ෂුන් වහන්සේ අතරින් රහත් ඵලයට පත් නොවූ භික්‍ෂුන් කොතෙකුත් හිඳින්නට ඇත. සසරේ අපට නොපෙනෙන භවයන්හි සැරි සරන උන්වහන්සේ තම පැරණි සසර පුරුද්ද අනුව මෙම පින් බිමට වැඩමවා සිටිය නොහැකි ද යන සැකය අප තුළ ඇති විය. එහෙත් මෙහි කිසියම් මනෝ විද්‍යාත්මක පසුබිමක් තිබේ දැයි යන්න දැන ගැනීමට ද අපට අවශ්‍ය විණි. එබැවින් අපි ඒ සම්බන්ධයෙන් ගාල්ල කාරාපිටිය ශික්‍ෂණ රෝහලේ විශේෂඥ මනෝ වෛද්‍ය රූමි රූබන් මහතා ගෙන් විමසා සිටියෙමු.


ඉහත සඳහන් විස්තරයට අනුව ඔය තත්ත්වය මනෝ වෛද්‍ය විද්‍යාත්මකව හැඳින්විය හැක්කේ ව්‍යාජ භ්‍රාන්ති හැටියටයි. තමන්ගේ මනසින් ඇති කරගන්නා අරමුණු හා පරිකල්පනයන්ට අනුව මනැසේ මැවෙන ඇසට නොපෙනෙන රූප, කනට නොඇසෙන ශබ්ද නාසයට නොදැනෙන ආඝ්‍ර්‍රාණ ප්‍රකෘති නොවන ස්පර්ශ ආදිය මේ භ්‍රාන්ති විදිහට විස්තර කරන්නට පුළුවන්. නමුත් ඒ භ්‍රාන්තිමය අත්දැකීම්වලට මුහුණ දෙන අය සිතන්නේ ඒවා සැබැවින්ම තමන් ඇසින් දුටු කනින් ඇසූ නාසයෙන් ආඝ්‍රාණය කළ හෝ ස්පර්ශමය අත්දැකීම් ලැබූ සත්‍ය සිදුවීම් විදිහටයි වෛද්‍ය රූබන් කියයි.


‘‘නමුත් ඒ පරිශ්‍ර්‍රයේ භික්‍ෂු රූප දැකිය හැකි බව කලින් නොදැන සිටි පුරා විද්‍යාවට සම්බන්ධ නිලධාරිනියකුත් පසුගිය දිනයෙක එහි සැරිසරන භික්‍ෂු රූපයක් දැක තිබෙනවා. ඊට හේතුව කුමක්ද ? අපි වෛද්‍ය රූබන් ගෙන් ඇසුවෙමු.


ඇසට, කනට, නාසයට ශරීරයට විශේෂිත අරමුණු නොලැබෙන නිසල නිඟඬ පරිසරයක් තුළදී යටි සිතේ ක්‍රියාකාරීත්වය ඉස්මතු වීමෙන් යමෙකු තුළ ඉහත සඳහන් භ්‍රාන්තිමය තත්ත්වයක් ඇති විය හැකියි. නිසල වනපෙත් භාවනාවට සුදුසුයි කියන්නේ ඒ හින්දයි. භාවනාව කියන්නේ තමන් විසින් සිත තුළ ඇතිකර ගන්නා නිමිත්තක් මනැසින් වර්ධනය කර ගැනීමක්. එසේ අරමුණක්, නිමිත්තක් වර්ධනය කර නොගත්තත් යටි සිතෙන් ඉබේටම ඒ කාර්ය භාරය ඉටුවන්න පුළුවන්. ඒ අනුව එබඳු භික්‍ෂුන් වහන්සේ දර්ශනය වන බව කලින් නොදැන සිටියත් එය අතීතයේ භික්‍ෂුන්වහන්සේ වැඩසිටි ආරාමයක් බව පුරාවිද්‍යාවට සම්බන්ධ නිලධාරිනියක් වන ඇය දැන සිටින්නට ඇති. එනිසා තමයි ඇගේ යටි සිතෙන් පැන නැඟුණු භික්‍ෂු රූපයි දෘශ්‍ය භ්‍රාන්තියක් ලෙස ඇයට අත්දකින්නට හැකි වුණේ.


වෛද්‍ය රූබන්ගේ නිගමනය එය වුවද මෙවන් අධ්‍යාත්මික සංකල්ප සමග නවීන විද්‍යාත්මක මත කෙසේ ඈදිය යුතුද? කෙසේ ඈදිය හැකි ද? යන්න පිළිබඳ අවසන් නිගමනයකට එළඹීම ඔබ හට භාර කරමින් අපි නිහඬ වන්නෙමු.

මෙයට සම්බන්ධ ඊළග ලිපිය
“අනාගතයේ අනුරාධපුරය මුළු ලෝකයේම ආධ්‍යාත්මික කේන්ද්‍රස්ථානය වන්නත් පුලුවන්” 

Saturday, September 27, 2014

ගර්භාෂය කුළියට දීම හෙවත් අන්වාදේශය - Surrogation - renting out one's womb



අනුන්ගේ දරුවන්ට වැඩීම සහා තමන්ගේ ගර්භාෂය කුළියට දීම හෙවත් අන්වාදේශය (Surrogation)  වර්තමානයේ බහුලව සිදුවන්නකි. මේ පිළිබ මෑත ඉතිහාසයේ වැඩිපුරම කතා බහට ලක්වූ පුවතක් වූයේ බොලිවුඩයේ සුපිරි නළුවකු වන ෂා රුක් ඛාන් ගේ බිරි වන ගෞරි තම තෙවැනි දරු උපත සිදු කළේ ඒ ආකාරයට වීම නිසාය. ඒ 2013 වසරේ මැයි මාසයේදීය. අන්වාදේශය විවිධ ආකාරයෙන් සිදු කෙරෙන අතර මෙහිදී සිදුවූයේ ෂාරුක් ගේ ශුක්‍රාණු හා ගෞරිගේ ඩිම්බ රසායනාගාරයක කෘත්‍රිමව සංසේචනය කොට ලබාගත් යුක්තානුව වෙනත් කාන්තාවකගේ ගර්භාෂයේ වර්ධනයවීම පිණිස තැන්පත් කිරීමය. 47 හැවිරිදි වියෙහි පසු වූ ගෞරි, තවත් දරුවකුට කැමැත්තෙන් පසුවුවද එවැනි වයසකදී දරුවකු පිළිසිඳ ගැනීමෙහි පවතින අවදානම පිළිබඳ සැලකිල්ලට ගෙන අන්වාදේශය ඔස්සේ දරුවකු ලබාගැනීමට පෙළඹුණු බැව් ඇය පවසා තිබිණි. 

අන්වාදේශය යනු අලුත් දෙයක් නොවේ. අන්වාදේශය යන්නෙහි අරුත වෙනත් කාන්තාවකගේ ගර්භයක ඉපදුණු දරුවකු ඇයගෙන් පරිබාහිර පුද්ගලයකු විසින් හදාවඩාගැනීම සඳහා ලබාගැනීමය. මේ අරුතින් ගත්කල අන්වාදේශය යන්නෙහි ඉතිහාසය බයිබලයේ උත්පත්ති කතාව තෙක්ම දිව යයි. අනෙක මෙම ක්‍රමය ඔස්සේ දරුවන් ලැබූ මුල්ම ඉන්දියානුවන් වන්නේ ද ෂාරුක් ඛාන් හා ගෞරි පමණක්ම නොවේ. 2011 දෙසැම්බර් මාසයේ ආමීර් ඛාන් හා ඔහුගේ බිරිඳ කිරාන් රාඕ සිය පුතු වූ අසද් රාඕ ඛාන් හිමිකරගත්තේ මේ ක්‍රමයෙනි. එමෙන්ම සල්මාන් ඛාන්ගේ සොහොයුරා වූ සොහේල් ඛාන්ද අනුගමනය කළේ මේ ක්‍රමයමය. ජාත්‍යන්තර තලයේ සුප්‍රකට චරිත වන එල්ටන් ජෝන් සහ සිය සමලිංගික සගයා වන ඩේවිඩ් ෆර්නිෂ්. රිකී මාර්ටින්, මයිකල් ජැක්සන්ගේ තෙවැනි පුතු වූ දෙවැනි ප්‍රින්ස් මයිකල්. පාපන්දු ක්‍රීඩකයකු වන ක්‍රිස්ටියානෝ රොනාල්ඩෝ වැනි තවත් බොහෝ දෙනෙකු දරුවන් හිමිකරගෙන ඇත්තේ මෙම ක්‍රමය ඔස්සේය. ආමීර් ඛාන් සිය දරුවා පිළිබඳ මාධ්‍යයට හෙළිකරමින් පවසා තිබුණේ මෙම ක්‍රමය නිසරුභාවයෙන් පෙළෙන දෙමාපියන් සඳහා කදිම විසඳුමක් බවය. 

මෙම ක්‍රියාවලිය සරලව මෙසේ විස්තර කළ හැකිය. මෙහිදී සිදුවන්නේ වෙනත් යුවළක් වෙනුවෙන් යම්කිසි කාන්තාවක් සිය ගර්භාෂය තුළ දරුවකු වර්ධනය කර දීමයි. මේ සඳහා ඇය යම්කිසි මුදලක් අයකරන්නෙ නම් එය ගර්භාෂය කුලියට දීම වශයෙන් හැඳින්වීමේ වරදක් ද නැත. එය යම් පුද්ගලයකුගේ වාහනයක් වෙන අයෙකුට ගමන් බිමන් යාම සඳහා කුලියට දීමට වඩා වැඩි වෙනසක් නොමැත. අන්වාදේශය බොහෝ විට යොදාගනු ලබන්නේ නිසරු යුවළකට දරුවකු ලබාගැනීමේ ක්‍රමයක් වශයෙනි. මෙහිදී පුරුෂයා හෝ කාන්තාව හෝ දෙදෙනාම හෝ නිසරු විය හැකිය. දරුවකු පිළිසිඳ ගැනීමට අවශ්‍ය කරනා ඩිම්බය ප්‍රදානය කරන්නා වූ කාන්තාව හඳුන්වනු ලබන්නේ ප්‍රවේණි මව‘ genetic mother වැනි නමකිනි. මෙම ක්‍රියාවලිය සම්ප්‍රදායික අන්වාදේශය’ traditional surrogacy නම් වේ. මේ සඳහා ඩිම්බය ප්‍රදානය කළ කාන්තාව විවාහක යුවළගෙන් පරිබාහිර කාන්තාවක නම් එම ක්‍රියාවලිය හඳුන්වනු ලබන්නේ ගැබ්දැරීමේ අන්වාදේශය’ gestational surrogacy වැනි නමකිනි. දරුවා ලැබිමේ අපේක්ෂාවෙන් සිටිනා යුවළ සමාජමය දෙමාපියන්වශයෙන් හඳුන්වනු ලබයි. ගැබ දැරීම සඳහා අදාළ කාන්තාව විසින් මුදල් අයකරන්නේ නම් එය වාණිජමය අන්වාදේශයනමින් ද මුදල් අය නොකරන්නේ නම් එය පරහිතකාමී අන්වාදේශයවශයෙන් ද හඳුන්වනු ලබයි. 

මෙය මෙසේ සරලව විස්තර කළද මේ සඳහා වැයවන මුදල නම් සරල වන්නේ නැත. නිසරුභාවයෙන් පෙළෙන යුවළකගේ එකම පිහිට මෙය වුවද එම පිහිට ලබාගැනීමට නම් සෑහෙන තරම් ධනවත් විය යුතු බව පෙනෙන්ට තිබේ. මේ ආකාරයෙන් දරුවකු හිමිකරගැනීම සඳහා අවම වශයෙන් ඇමරිකන් ඩොලර් 50,000ක් (රුපියල් ලක්ෂ 66ක් පමණ) වත් තිබිය යුතු යැයි පැවසේ. මෙය ජාත්‍යන්තර මිල වුවද ඉන්දියාවේ ඇතැම් වබේ අඩවි සඳහන් කරන්නේ එහි මෙය ඩොලර් 25,000කින් (රුපියල් ලක්ෂ 33ක්) පමණ සිදුකරගත හැකි බවය. (මෙම මුදල් ප්‍රමාණයන් දිනෙන් දින ඉහළ යන බව සළකන්න. මෙය ලියන මොහොතට වඩා ඔබ මෙය කියවන මොහොතේ මෙම ප්‍රමාණයන් වෙනස්වන්නට පුලුවන)

මෙය මෙතරම් සුලභවෙමින් පවතින්නක් වුවද මෙහි ඇති සදාචාරාත්මක බව පිළිබඳ විවිධ අදහස් මතුවෙමින් පවතී. වෙනත් කාන්තාවකට උපන් දරුවකු ඇයගෙන් පරිබාහිර පුද්ගලයකුට දරුකමට හදාවඩා ගැනීමට ලබාදීම යන්න මෙහි සරල අරුත වුවද මානුෂීය වශයෙන් ගත්කළ එය දෙස අප වඩාත් ගැඹුරු ලෙස බැලිය යුතුවේ. වර්තමානයේ සිදුවන්නේ වෙනත් පුද්ගලයකුගේ අවශ්‍යතාවය මත යම්කිසි කාන්තාවක් සිය ගර්භාෂය කුලියට ලබාදීමය. මේ දරුවා තමාට නෙලැබෙන බවත්, තමාගේ නොවන බවත් එම කාන්තාව හොඳාකාරවම දනී. නමුත් ඇය සාමාන්‍ය මවක් සේ එම කලලය ‍පෝෂණය කරමින් දසමසක් එය දරා සිට මොලොවට බිහි කරයි. අප දන්නා තරමින් මව තුළ සිය කුසෙහි සිටිනා දරුවා පිළිබඳ ඇතිවන ස්නේහය කුස තුළ වැඩෙන දරුවාට දැනේ. දරුවා තුළ සිය මව පිළිබඳ සෙනෙහසක්, ආදරයක් ඇතිවන්නේ එහි බලපෑමෙනි. නමුත් කුලියට සිය ගර්භාෂය ලබාදෙන කාන්තාවක් තුළ සිය කුසෙහි වැඩෙන දරුවා පිළිබඳ එවැනි සෙනෙහසක් ඇති වේ යැයි කිව හැකිද ? ඇයට අවශ්‍යවන්නේ තමා භාරගත් රාජකාරිය ඉටුකර දීම විනා කුසතුළ වැඩෙනා දරුවා පිළිබඳ සෙනෙහසක් ඇතිකර ගැනීම නොවේ. ඇයගේ මෙම හැඟීම දරුවාගේ මානසික ක්‍රියාවලිය හා දරුවාගේ පෞරුෂය වර්ධනය වීම කෙරෙහි අහිතකර ලෙස බලපානු ඇත.

සිය කලලය ගබ්සාවකින් විනාශ කරන්නට උත්සාහ කළ එහෙත් එය ව්‍යර්ථ වූ දෙමාපියන්ට උපන් දරුවන් තුළ මාපියන් කෙරෙහි සෙනෙහසක් නැති බැව් පර්යේෂණ මගින් ඔප්පු වී තිබේ. එසේ හෙයින් කුළියට ගත් ගර්භාෂයක වැඩෙනා දරුවන්ගේ මානසිකත්වයද සාමාන්‍ය දරුවකුගේ මානසිකත්වයට වඩා වෙනසක් තිබිය හැකිය.

එමෙන්ම මෙම ප්‍රවණතාවය කමෛන් වර්ධනය වුවහොත් සංවර්ධනය වෙමින් පවතින රටවල දරුවන් ඇතිකිරීමේ ගොවිපළඇති විය හැකි බවට මේ පිළිබඳ පර්යේෂණ පවත්වන ඇමෙරිකා එක්සත් ජනපදයේ ආචාර්ය ජෝන් ලැන්ටොස් අනතුරු හඟවයි. බොහෝ රටවල ආගමික කණ්ඩායම් ද මෙම ප්‍රවණතාවය පිළිබඳ සිය විරෝධය පළකොට තිබේ.
සමාජයීය වශයෙන්ද මෙය ඉදිරියේදී ගැටලුවක් වන්නට ඇති ඉඩකඩ බොහෝය. මුදල් වෙනුවෙන් සිය ගර්භාෂය කුලියට දීම තුළින් කාන්තාවන් තුළ සෘණාත්මක ආකල්ප වර්ධනය විය හැකිය. 

නිසරුභාවයෙන් පෙළෙන සිය ඥාතියකුට හෝ මිතුරකුට කරන උදව්වක් වශයෙන් මෙවැනි දෙයකට කාන්තාවක් යොමුවීම හා මුදලට සිය ගර්භාෂය කුළියට ලබාදීම අතර බොහෝ වෙනසක් තිබේ. අනෙක් අතට යම් පුද්ගලයකුට පිහිටක් වීමේ අපේක්ෂාවෙන් වුවත් මෙවැන්නකට කැමැත්ත පළ කිරීම අප වැනි සංස්කෘතියක් තුළ කෙසේ කළ හැකිද යන ගැටලුවද මතුවේ. මන්ද අප සමාජය කාන්තාවකගේ ගැබ්ගැනීම පිළිබඳ විවිධ දේ අනුමාන කරන්නට පුරුදුව ඇති බැවිනි. මෙය වාණිජකරණයට ලක් නොවිය යුතුය යන්න බහුතරයකගේ අදහස වී තිබේ. අනෙක ගැබ දරනා කාන්තාවට සිය කුසෙහි වැඩෙනා දරුවා පිළිබඳ තීරණ ගැනීමේ අයිතිය සුරැකෙන අයුරින් නීති සකස්විය යුතු බවට ද අදහස් මතුවෙමින් තිබේ. වෙනත් අයකු වෙනුවෙන් සිය ගර්භාෂයේ දරුවකු වර්ධනය කරමින් සිටිය ද යම් අවස්ථාවක මෙම දරුවා තමා විසින්ම හදාවඩා ගන්නට එම කාන්තාව කැමැත්ත පළ කළහොත්, ඇයට එම අවස්ථාව ලැබෙන සේ නීතීරීති සකස් විය යුතු යැයි හඬක් මතුවෙමින් පවතී. නිසරු පුද්ගලයන්ගේ පිහිටට ඇති එකම මග මෙය වුවද මෙම ප්‍රවණතාවය වෙනස් පෞරුෂයකින් යුක්ත දරු පරපුරක් ඇති වන්නට හේතුවක් වන බව නම් නිසැකව සඳහන් කළ හැකිය. එය සමාජය ප්‍රගමණයට වඩා පරිහානියක් සිදුවන්නට ද ඉඩ ඇත.

Thursday, September 25, 2014

සාපේක්ෂත්වය - relativity



හැමදාම උදේට මරදානෙන් කෝච්චියෙන් බහින කොට 7.40 විතරවත් වෙනවානේ. ඉක්මණට යන්න ඕන නිසා පාලමෙන් පැනලා දුවනවා පාර පැනලා බස් එකකට ගොඩවෙන්න. පාර පනින තැන පොලිස් රාළහාමි වාහන යවලා යවලා ඔන්න අපට යන්න වාහන නවත්වනවා. අපි පාර පැනලා ඉවරවෙන්නත් කලින් වාහන කාරයෝ යන්න පුදුම දැඟළිල්ලක් දඟලන්නේ. ඔන්න මට මෙහෙම හිතෙනවා. 

“මුන් නම් මහ කාලකන්නි ජාතියක්. ජීවිතේට පයින් යන මනුස්සයෙක්ගේ අමාරුවක් දැනෙන්නේ නැහැ. පොඩ්ඩක් පාර පැනලා ඉවර වෙනකල් මුන්ට ඉවසන්න බැරි හැටි. මුන්ට නම් හොඳක් සිද්ද වෙන්න එපා. ටයර් එකේ පැච් එකක්වත් පළයන්! ඇංජිම කැඩියන්!” 

මෙහෙම හිතින් බැන බැන ගිහින් බස් එකකට නගිනවා. ඔන්න බස් එක යන්න පටන් ගන්නවා. මෙන්න එක පාරට බස් එක නතර වෙනවා. මොකද මේ? අයියෝ කහ ඉරක් නේ. ගෑනු මිනිස්සු තොගයක් පාර පනිනවා. ඔන්න මට ආයෙත් මෙහෙම හිතෙනවා. 

“යකෝ මුන් පාර පනින්නත් මේ වෙලාවෙම ආවනේ. ඉක්මණට පාර පනින්නෙත් නැහැ. ගමේ යනවා වගේ යන්නේ. බස් එකක වැඩට යන මිනිහෙක්ගේ අමාරුවක් දැනෙන්නේ නැති හැටි. මුන්ට නම් මොකද ඉතිං ඔහේ පාර දිගේ කයිය ගහගෙන යයි. බස් එක ඉක්මණට ගියේ නැත්නම් රතු ඉර වදින්නේ අපට කියලා මුන්ට දැනෙන්නේ නැති හැටි.” 

Wednesday, September 24, 2014

ලොව දෙවැනි බලවතාගේ ගෙදර බවලතා - පෙන්ග් ලියුවාන්’ - Peng Liyuan, the Wife of Chinese President



First Lady යන්න මලලසේකර ශබ්දකෝෂයේ දක්වා ඇත්තේ ඇමරිකා එක්සත් ජනපදයේ රාජ්‍ය නායකයාගේ බිරිඳ සහ රටක රාජ්‍ය නායකයාගේ බිරිඳයනුවෙනි. විකිපීඩියාවේ දැක්වෙන්නේ  ඇමරිකා එක්සත් ජනපද ජනපතිවරයාගේ බිරිඳ සඳහා යොදනු ලබන නිල නොලත් ගෞරව නාමයයන්නයි. ඔක්ස්ෆර්ඩ් ශබ්දකෝෂයේ දැක්වෙන්නේ The wife of the President of the US or other head of state යන්නයි. මලලසේකරයේ ඇත්තතේ ද එම අර්ථයමය. මේ වචනය පිළිබඳ මෙතරම් හාරා අවුස්සා බලන්නට සිත් වූයේ මේ මාසයේ (2014  සැප්තැම්බර්) චීන ජනපති සහ ඔහුගේ බිරිඳ ශ්‍රී ලංකාවේ සංචාරය කිරීම නිසා පුවත්පතක් සඳහා එම ජනපති ආර්යාව පිළිබඳ කෙටි විස්තරයක් ලියන්නට සිදුවූ බැවිනි. බොහෝ පුවත්පත්වල First Lady යන්න බොහෝ දෙනෙක් සිංහලයට පරිවර්තනය කරනුයේ ප්‍රථම කාන්තාවවශයෙනි. නමුත් එවැනි අදහසක් කිසිදු ශබ්දකෝෂයක නැත. මේවාට කියන්නේ ගෙඩි පිටින් කරන පරිවර්තනයනුවෙනි. ඔබ ලේඛකයෙක් නම් එවැනි පරිවර්තනවලින් වැළකී සිටින්න යැයි කියමින් මෙසේ ලිපිය පටන් ගන්නෙමි.

ජනාධිපතිවරයකුගේ ආර්යාවක් වීම යනු ලෙහෙසි පහසු කටයුත්තක් නොවේ. එයට පෙර පින් තිබිය යුතුය. එසේ නම් ලෝක බලවතකුගේ ආර්යාවක් බවට පත්වීමට කෙතරම් නම් පිනක් තිබිය යුතු දැයි සිතේ. ඔබ කාන්තාවක නම් එවන් කාන්තාවක් පිළිබඳ ඔබ දැන සිටිය යුතුමය. මන්ද ඔවුන් අතර සිටින ශ්‍රේෂඨ කාන්තාවන් කාන්තා ලෝකයටම පූර්වාදර්ශ සපයන්නියන් වන බැවිනි.


ලෝකයේ දෙවැනි බලවතා ලෙස ප්‍රකටව සිටින චීනයේ ජනාධිපති ෂි ජින්ග්පින්ග්පසුගිය දිනෙක (2014 සැප්තැම්බර්) ශ්‍රී ලංකාවේ සංචාරය කළේය. ඔහු සමඟ ඔහුගේ ආර්යාව වන පෙන්ග් ලියුවාන්ද පැමිණියාය. ලෝක නායක ජනාධිපතිවරුන් අප රටෙහි සංචාරය කළ ද ඔවුනගේ ආර්යාවන් ගැන එතරම් කතා කරන්නට දේවල් තිබුණේ නැත. නමුත් චීන ජනපතිවරයාගේ ආර්යාව එසේ නොවේ. ඇය ගැන කතා කරන්නට බොහෝ දේවල් තිබේ.

1962 නොවැම්බර් 20 වැනිදා උපන් පෙන්ග් ලියුවාන් චීනයේ අතිදක්ෂ ජන ගී ශිල්පිනියක සේම ප්‍රසිද්ධ වේදිකාවේ ද සුප්‍රකට ගායන ශිල්පිනියක් ද වන්නීය. චීනයේ දේශපාලනමය වශයෙන් ව්‍යවස්ථාවෙන් බලය ලැබී ඇත්තේ අගමැතිවරයාට වුව ද චීන හා ඇමරිකානු මාධ්‍ය, ‛චීනයේ ජනපති ආර්යාව’ (Chinese First Lady) වශයෙන් මාධ්‍ය ඔස්සේ ප්‍රසිද්ධිය ලබාදෙන්නේ ලියුවාන්ටය. ෆෝර්බස් වර්ගීකරණයට අනුව ලෝකයේ 57 වැනි ප්‍රබල කාන්තාව වන්නේ ද ඇයයි.



චීනයේ මහජන විමුක්ති කලා ඇකඩමියේ පීඨාධිපති ධුරය උසුලන්නේ ද ලියුවාන්ය. චීනයේ අතිශය ඉහළ ස්වරවලින් ගායනා කිරීමේ හැකියාවෙන් යුක්ත ශිල්පිනියන් (soprano singer) අතුරින් ප්‍රමුඛස්ථානයේ වැජඹෙන්නීද ඇයමය. ගායනා හැකියාවෙන් ඇය දිනා ඇති සම්මාන ගණන මෙතෙකැයි ගණනය කළ නොහැකි තරම්ය. ඇයගේ ගී නිර්මාණ බොහොමයකට පදනම වී ඇත්තේ ගොවි ජනතාව, ගොවි සමාජය, ගොවි සංස්කෘතිය වැනි දෑ ය. ලියුවාන් චීන මහජන විමුක්ති හමුදාවේ සිවිල් සාමාජිකාවකි. එය හමුදාව තුළ මේජර් ජනරාල් පදවියක් හා සමාන යැයි පැවසේ. සාම්ප්‍රදායික චීන ජන සංගීතය පිළිබඳව ශාස්ත්‍රපති උපාධියක් හිමිකර ගත් ප්‍රථම කාන්තාව ද ඇය යි.


ඇය චීන මහජන විමුක්ති හමුදාව සමග එක්වූයේ 18 හැවිරිදි වියෙහිදීය. චීන - වියට්නාම් දේශසීමා යුද්ධයේදී ඇය යුද පෙරමුණට ගොස් සොල්දාදුවන් ධෛර්යමත්කිරීමේ වැඩකටයුතුවල ක්‍රියාකාරීව නිරත වූවාය.


ඇය චීන ජනාධිපති ෂි ජන්ග්පින්ග් සමග විවාහ වී වසර 25ක් පමණ වන අතර ඔවුනට ෂි මින්ග්සේ නමින් දියණියක් සිටී. ෂි ජින්ග්පින්ග් ට ලියුවාන්ගේ දෙමාපියන් මුළින්ම අකමැති වුව ද තමා ද සාමාන්‍ය ගොවියකුගේ දරුවකු බව ඔප්පු කිරීමෙන් පසුව ඔහුට ඔවුන්ගේ කැමැත්ත ලබාගැනීමට හැකිවිය. දේශපාලකයකුට තම දියණියගේ ආරක්ෂාව සළසන්නට තරම් විවේකයක් තිබේ යැයි ඔවුන් තුළ සහතිකයක් නොතිබීම එයට හේතුව විය.

බොහෝ ජනාධිපති ආර්යාවන් මහජනතාව අතර ගෞරවාදරයට පාත්‍රවන්නේ හෝ එවැනි ගෞරවාදරයක් ලබාගන්නේ සිය සැමියන්ගේ දේශපාලන බලමහිමය නිසාය. සිය සැමියන් නොයැති නම් එවැන්නියන්ට වඩා ගමේ පලා විකුණන ගැහැනු ශ්‍රේෂ්ඨය. නමුත් ලියුවාන්ගේ තත්වය එසේ නොවේ. ඇය සිය දේශපාලක සැමියාටය වඩා වැඩි ගෞරවයක් මහජනතාව අතර හිමිකොට ගෙන සිටී.



චීන ජනාධිපතිවරයා ඉන්දියාවේ සංචාරය කළ අවස්ථාවේ එහි මාධ්‍ය ලියුවාන් හඳුන්වා දී තිබුණේ බීජිං හි රහස් ආයුධය හෙවත් චීන ජනපතිගේ රූමත් ආර්යාවවශයෙනි. ඇය මේ වන විට 52 හැවිරිදි වියෙහි පසු වුවද, ඇමරිකානු ජනපති බිරිඳ මිචෙල් ඔබාමා, එක්සත් රාජධානියේ ඔටුන්න හිමි කුමරුගේ බිරිඳ කේට් ආදී සුවිශේෂ කාන්තාවන් අතරදී ජාත්‍යන්තර මාධ්‍යන්හි අවධානය මා වෙතට ආකර්ෂණය කරගැනමය තරම් ප්‍රබල පෙනුමකින් යුක්ත වූ බැව් සඳහන් කළ යුතුය.

ලියුවාන් කාන්තා අයිතීන් වෙනුවෙන් නිරතුරුව සටන් කරන්නියක ලෙස ද ප්‍රකටව සිටින අතර සිය දේශීය නිෂ්පාදන සඳහා, විශේෂයෙන් චීනයේ නිපදවන රූපලාවන්‍ය ද්‍රව්‍ය විදේශ වෙළෙඳපලට හඳුන්වාදීම සඳහා නිලනොලත් වෙළෙඳ නාම තානාපතිනියක ලෙසින් ද ක්‍රියාකරනු දක්නට ලැබේ.

චීන ජනාධිපතිවරයා ලෝකයේ දෙවැනි බලවත් රාජ්‍යයේ ජනාධිපතිවරයා වශයෙන් සිය විදෙස් සංචාර සියල්ලටම සිය බිරිඳ එක්කරගැනීමට අමතක නොකරයි. ඒ ඇයට ලෙව පුරා ඇති ආකර්ෂණය නිසාය. ඇතැම් අවස්ථාවල මාධ්‍ය හඹා යන්නේ ජනපතිවරයා පසුපස නොව ලියුවාන් පසුපසය.


බැරක් ඔබාමාගේ බිරිඳ වන මිචෙල් ද ඔහුගේ වාසගම වන ඔබාමා යන්න සිය නමට ඈඳාගත්ත ද ලියුවාන්ට එසේ කරන්නට අවශ්‍යතාවයක් ඇතිවූයේ නැත. ඇයට සිය සැමියාගේ උදව් උපකාර නොමැතිව වුව ජනතාව අතරට යාමට හැකිය. සැබවින්ම ඇය සිය සැමියා වූ චීන ජනාධිපතිවරයාගේ ආලෝකයෙන් බැබලෙනවාට වඩා සිදුව ඇත්තේ ඇගේ ආලෝකයෙන් චීන ජනාධිපතිවරයා බැබලීමයි. එයට හොඳම උදාහරණයක් වන්නේ එක් අවස්ථාවක චීන ජනාධිපතිවරයා පිළිබඳ සාමාන්‍ය පුරවැසියෙක් පළකළ අදහසකි.

මම ෂි ජින්ග්පින්ග් ගැන දැනගෙන හිටියේ ලියුවාන්ගේ සැමියා හැටියට විතරයි. පස්සේ තමයි දැනගත්තේ ඔහු තමයි චීන ජනාධිපති කියලා.


ක්ෂය රෝගය පිළිබඳ ලෝක ජනතාව දැනුවත් කිරීම සඳහා ලියුවාන් ලෝක සෞඛ්‍ය සංවිධානයේ තානාපතිනියක් ලෙස ද කටයුතු කරයි. ඇය මේ සියල්ල මැද මහජනතාව වෙනුවෙන් ගී ගැයීමට ද අමතක කොට නැත.  යම් දිනෙක චීන ජනාධිපතිවරයාට සිය ධුරය අහිමි වුව ද ලියුවාන් නිසැක ලෙසම ජනතාව අතර මියෙන තුරුම ආර්යාවක්ලෙස වැජඹෙනු ඇති බව බොහෝ චීන වැසියන්ගේ අදහස හා පැතුම වී තිබේ.