පුවත්පත්වලට ලිපි ලිවීම මාගේ විනෝදාංශයකි. මා ලියන ලිපි මගින් පාඨකයින් දැනුමක් ලබමින් ජීවිතයට යමක් එකතු කරගන්නේ නම් එය මාගේ සතුටකි. වේගයෙන් ඉදිරියට ඇදෙන තාක්ෂණික ලෝකයේ පුවත්පත් කියවන්නට තරම් විවේකයක් නොමැති අයවලුන් බොහෝය. තවකෙකු පුවත්පත් කියවන්නට කැමති නැත. අන්තර්ජාලයේ ද සිංහල බසින් සියලුම පුවත්පත් ඇති බැවින් තාක්ෂණයට ප්‍රිය කරන්නෝ පරිගණකයෙක් හෝ සිය ජංගම දුරකථනයෙන් ඒවා කියවති. එබැවින් මා ලියන ලිපි එවැනි පාඨක පිරිස් වෙත යොමු කරන්නට අදහස් කළ නිසා මෙවැනි බ්ලොග් අඩවියක් ගොඩනගන්නට සිතුවෙමි. මාගේ උත්සාහය කෙතරම් නම් සාර්ථකදැයි තීරණය වන්නේ ඔබගෙන් ලැබෙන ප්‍රතිචාර මතය. එබැවින් ඔබ මේ පිළිබඳ සිතන පතන දෑ මවෙත දන්වන්නට උනන්දුවන්නේ නම් එය මාගේ සතුටයි. ඔබ සැමට තෙරුවන් සරණයි!

Saturday, May 31, 2014

සොහොනේ සැතපුණු හාම්පුතාට තනි රකින ‛කැප්ටන්’ - Dog who slept on his owner's grave



සුනඛයා තරම් මිනිසුන්ට හිතවත්, තමන්ට කළ උදව්වක් අමතක නොකරන සතෙක් මේ ලෝකේ නැහැ. එක වේලක් කන්න යමක් දුන්න කෙනෙකු වුණත් අඳුනාගෙන වළිගය වනන්න තරම් සුනඛයන්ට හොඳ මතකයක් තියෙනවා. කළගුණ හොඳින් මතකයේ තබාගෙන ඉන්නවා. ඉතින් ජීවිත කාලේම තමන්ව හදාවඩා ගත්තු ස්වාමියෙකුට සුනඛයෙක් කොයි තරම් ලෙන්ගතුබවක් ඇතිද? අපට ඒකට මේ ලෝකේ ඕනෑ තරම් උදාහහරණ තියෙනවා.  මෑතකදි එහෙම එකක් දැනගන්නට ලැබුණා. මේ ප්‍රවෘත්තිය නම් ටිකක් පරණයි. ඒත් මේ කතාව හැමෝටම වැදගත් වෙයි කියලා හිතෙන නිසා ඔබත් එක්ක මේ ගැන කියන්න හිතුවා. 

මේ කතාවෙන් කියැවෙන සුනඛයාගේ නම කැප්ටන්. කැප්ටන්ට  ස්වාමියෙක් හිටියා මිගුවෙල් ගුස්මාන් කියලා. ඔහු 2006 වසරේදී මිය ගියා. අවමඟුල් කටයුතු ඉවරවෙලා ටිකකින්  කැප්ටන් ගෙදර නැහැ කියලා පවුලේ කට්ටිය දැනගත්තා. ඔවුන් කැප්ටන්ව හැමතැනම හෙව්වා. ඒත් හම්බවුණේ නැහැ.

මෙහෙම සතියක් විතර ගත වුණා. මිගුවෙල්ගේ අමමඟුලට සහභාගී වුණු කිහිප දෙනෙක් එක දවසක් හවස් යාමයක හරි අපූරු දෙයක් දැක්කා. කැප්ටන් තමන්ගේ ස්වාමියාගේ සොහොන උඩ නිදාගෙන ඉන්න හැටි ඔවුන් දැක්කා. ඔවුන් සෙහොන්පල්ලාට මේ බව කිව්වා. ඔහු මේ බව මිගුවෙල්ගේ නිවසට දැනුම් දුන්නා. ඔවුන් ඇවිත් කැප්ටන්ව නිවසට අරගෙන ගියා. කැප්ටන්ව නිවසට අරන් ගියත් හැම රැයකම කැප්ටන් උඩු බුරලන්නයි, දොර තදින් පහුරුගාන්නයි පටන් ගත්තා. එතකොට නිවසේ අය කළේ දොර අරින එක. කැප්ටන් ඒ වෙලාවට එළියට දුවගෙන යනවා. ආපහු එන්නේ උදේට. ටික දවසක් යනකොටයි කැප්ටන් යන්නේ කොහේද කියලා ගෙදර අය හොයා ගත්තේ. කැප්ටන් ගිහින් තිබුණේ නිවසේ ඉඳන් සැතපුම් 3ක් ඈතින් තිබුණු සොහොන් පිටියට. එහි තමයි කැප්ටන්ගේ ස්වාමියා, ඒ කියන්නේ මිගුවෙල්ගේ සෙහොන තිබුණේ.

මේ සිදුවීමෙන් අනතුරුව වසර 7ක් ගෙවී ගියා. මේ වසර 7 පුරාම කැප්ටන් රාත්‍රියට නිදාගත්තේ තමන්ගේ ස්වාමියාගේ සොහොන උඩ. හැම දවසකම හවස 6ට කැප්ටන් සොහොන් පිටියට එන නිසා, සොහොන්පල්ලා ඒ වෙනකල් එහි ගේටුටව විවෘත කර තබන්නත් පුරුදු වුණා. උදේ පාන්දර සොහොන්පල්ලා ආයෙත් ගේට්ටුව විවෘත කරන තුරු කැප්ටන් තමන්ගේ ස්වාමියාගේ සොහොන මුර කරන්නට මේ විදියට පුරුදු වුණා.


විස්තරේ හැටියට මේ පින්තූරය අරගෙන ඇත්තේ 2013 විතර. සමහර විට කැප්ටන් තවමත් ජීවතුන් අතර ඇති. එහෙම ඉන්නවා නම් තවමත් තමන්ගේ ස්වාමියාගේ සොහොන මුරකරනවත් ඇති. සුනඛයෙක් තමන්ගේ ස්වාමියාට කොයි තරම් භක්තියක් තියෙනවාද කියන එකට මේක හොඳම උදාහරණයක්.

අපි අතර ඉන්න බොහෝ දෙනෙක් තමන්ගේ ඥාතියකුගේ, හිතවතෙකුගේ මරණයෙන් ටික දවසකට පස්සේ ඔහුව අමතක කර දමනවා. ඒ මනසින් උසස් අයගේ හැටි. ඒත් මනසින් උසස් නැහැ කියලා මිනිසුන් කියන සුනඛයන් හැසිරෙන්නේ මෙන්න මේ විදිහයි. 

නරේන්ද්‍ර මෝදිගේ දිවුරුම් දීම හා බැඳුණු රසමුසු තැන් - Humorous things relating to Narendra Modi's Swearing




63 හැවිරිදි නරේන්ද්‍ර මෝදි පසුගිය මැයි 26 වැනිදා ඉන්දියාවේ නව අගමැතිවරයා ලෙස දිවුරුම් දුන්නේය. ඉන්දියාවේ මෙතෙක් පහළ වූ අගමැතිවරුන් සහ මෝදි අතර විවිධ වෙනස්කම් පවතනි බැව් පැහැදිලිවම පෙනෙන්නට තිබේ. ඔහු මෙතෙක් ඉන්දියාවේ පහළ වූ අගමැතිවරුන් සේ උසස් කුළයකින් පැවතෙන්නෙක් නොවේ. බටහිර රටවල කෙසේ වෙතත් ආසියානු කලාපයේ සමාජයේ පහළ ස්ථරයක පුද්ගලයකු ජීවිතයේ හිනි පෙත්තතට නැගුණු විට ඒ පුද්ගලයා දෙස වපර ඇසකින් බලනු පෙනෙන්නට ඇති කරුණකි. එසේ හෙයින් මෝදිගේ දිවුරුම් දීමේ අවස්ථාව ඇතැමුනට ඉන්දීය ඉතිහාසයේ සුවිශේෂී සිදුවීමක් වන අතරේ ඇතැමුන්ට එය සිනහසෙන්නට අවශ්‍ය අමුද්‍රව්‍ය සපයන්නක් බවට පත්ව තිබූ බැව් දැකිය හැකිය. නරේන්ද්‍ර මෝදිගේ දිවුරුම් දීම සම්බන්ධව සිදුවීම් පිළිබඳ අවධානය යොමුකිරීමේදී පෙනෙන්නේ ඒවා අතරින් ඇතැම් ඒවායේ සියුම් ලෙස අපහාසය හා උපහාසය ගැබ්ව ඇති බවය.

ජවහර්ලාල් නේරු විශව විද්‍යාලයේ ආචාර්ය උපාධියක් ඇති ෂහ්සාද් ඉබ්‍රාහිමි  සිය ජීවිකාව පවත්වාගෙන යන්නේ සිය සරසවි භූමිය තුළ අවන්හළක් පවත්වාගෙන යාමෙනි. ඔහුට පසුගිය දවසක සිය ජීවිතයේ ප්‍රීතිමත්ම හැඟීම භුක්ති විඳින්නට අවස්ථාවක් හිමිවිය. ඒ නරේන්ද්‍ර මෝදි සිය දිවුරුම් දීමේ උත්සවය සඳහා ඔහුට ආරාධනා කළ නිසාය. තමාට ඇරයුම් ලැබුණු අවස්ථාවේ ඔහු සතුට පළ කළේ මෙසේය.

චායි වාලා කෙනෙක් අගමැති වුණු වෙලාවේ ඒක බලන්න තවත් චායි වාලා කෙනෙකුට ආරාධනා කරන්න එයා අමතක කරලා නැහැ. අනේ මට මේක දරාගන්න බැරි සතුටක්. අයියෝ . . . මට මේ ගැන කතා කරන්න බැරි තරම් සතුටුයි.

චායි වාලා යනු හින්දි බසින් තේ හදන්නා යන අරුත දෙයි. චායි වාලා වරු ඉන්දියාවේ සෑම තැනකම පාහේ බහුල චරිතයකි. කොතැනකදී හෝ උණුසුම් තේ කෝප්පයක් රස විඳන්නට අවශ්‍ය නම් එතැනට අවශ්‍ය චායි වාලා කෙනෙකි. නරේන්ද්‍ර මෝදි ද කුඩා සමයේ සිය පියා සමඟ තේ විකුණුවේය. ඔහුගේ පියාගේ ප්‍රධාන රැකියාව එය වන්නට ඇත.

මගේ වගේ අධ්‍යාපන සුදුසුකම් තියෙන කෙනෙකුට මෝදිගේ පාලනයක් යටතේ නම් තේ හදන්න වෙන එකක් නැහැ.

ඉබ්‍රාහිම් එසේ පැවසුවේය.

පළපුරුදු තෙලුගු දේශපාලඥයකු වන අශොක් ගජපති රාජු කැබිනට් අමාත්‍යවරයකු ලෙස දිව්රුම් දීමේදී සිදු වූ පුදුමාකාර වරදක් සිදුවිය. ජනපති ප්‍රනාබ් මුඛර්ජි දිවුරුම් ප්‍රකාශය මුළින් කියවාගෙන යන අතර දිවුරුම් දෙන ඇමතිවරයා එය නැවත කියවිය යුතුය. එහිදී ගජපති රාජු වන මමයන්න පවසද්දී ගජපති රාජු සිය නම නොපවසමින් අදාළ ප්‍රකාශය කියවාගෙන ගියේය. මෙහිදී රාජු ගේ දිවුරුම් දීමට බාධා කළ ජනපතිවරයා ඔහුට සිය නම සහිතව නැවත එම ප්‍රකාශය පවසන ලෙස ඉල්ලා සිටියේය.

දිවුරුම්දීමේ උත්සවයට තිබූ විශාල අඩුපාඩුවක් ලෙස පෙනෙන්නට තිබුණේ ජලයය. අපේ රටේ වුවද උත්සවයක අවස්ථාවක සියලු ප්‍රභූවරුන් අත ජල බෝතලය බැගින් තිබෙනු දැකිය හැකි වුවද මෝදිගේ දිවුරුම් දීමේ උත්සවයේ සංවිධායකවරුනට ජලය අමතකව තිබූ බැව් පෙනුණි. දැඩි හිරු රශ්මිය නිසා සියලු දෙනාගේම උගුරකට වියැලී යන්නට පටන් ගැනුණු සේය. මේ තත්වය දරාගැනීමට නොහැකි වූ තැන අරුන් ජැට්ලි (ඔහු වර්තමාන මෝදි රජයේ මුදල් හා ආරක්ෂක අමාත්‍යවරයාය) ගේ පුත් රොහාන් ජැට්ලි විජලන තත්වය නිසා ක්ලාන්තව ඇදවැටුණි. ඔහුව සජලනය කිරීම පිණිස අසල ඇති රෝහලකට රැගෙන යන්න සිදුවිය.

අරුන් ජැට්ලි

අධික උණුසුම් තත්වය දිවුරුම්දීමේ උළෙලට දැඩි බාධාවක් සේ පෙනුණි. සියලු දෙනා පසුවූයේ දැඩි අපහසුතාවයකිනි. ජනපති මුඛර්ජි දිවුරුම්දීමේ කටයුතු වේගවත් කරන්නට සිතුවේ ඒ නිසා වන්නට හැකිය. ඔහු සිය ලේකම් ඔමිතා පෝල් හට ඒ බැව් දැනුම් දුන්නේය. නජ්මා හෙප්තුල්ලා (ඇය වර්තමාන මෝදි රජයේ සුළු කටයුතු පිළිබඳ ඇමතිනියයි) දිවුරුම්දී අත්සන කරන අතරතුරේදීම ජනපතිවරයා මෙසේ පවසනු ශබ්ද විකාශන යන්ත්‍ර ඔස්සේ සියලු දෙනාටම අසුණි. ඔයා නිවේදනය කරන්කෝ. එයාලා වෙලාව ගන්නවා.පෝල් කිසිදු අඩුපාඩුවක් නොතබාම ඔහුගේ උපදෙස් පිළිපදින බැව් පෙනුණි.

වරණාසි නුවර වැසියෝ නරේන්ද්‍ර මෝදි අගමැතිධූරයට පත්වීම උත්කර්ෂවත් ලෙස සැමරූහ. ඔවුහු ගංගා නදී තීරය අසබඩ පාර්ලිමේන්තු මන්දිරයේ වැලි අනුරුවක් ඉදි කළහ. භාරතීය ජනතා පාක්ෂිකයෝ හිරු උදාවත් සමඟ නංගා නදියෙහි බැස ආගමික වතාවත් සිදුකරනු දක්නට හැකි විය. ඔවුහු නදියෙහි ස්නානයට පැමිණි පිරිසට රසකැවිලි බෙදා දුන්හ.

ඇසෑම් හි සිතුවම් ශිල්පියකු වන ගෞතම් බර්ධාන් කළේ තවත් පුදුමාකර දෙයකි. ඔහු සිය රුධිරයෙන් නරේන්ද්‍ර මෝදිගේ රුව සිත්තම් කළේය. අඟල් 35ක ප්‍රමාණයේ වූ මෙම ආලේඛ්‍ය සිත්තමෙහි වර්ණ තුනකින් යුක්ත පරෙවියෙකු සහ ස්වාමි විවේකානන්දගේ මුහුණ ද විය.

නරේන්ද්‍ර මෝදිගේ මව වන හිරාබාසහ සහ බිරිඳ වන ජසෝබාඩෙන්මෙම දිවුරුම් දීම සිය ඇසින් දකින්නට දිල්ලියට ගියේ නැත. මව එය රූපවාහිනිය තුළින් නැරඹුවේ ගාන්ධිනගර් හි වෙසෙන සිය බාල පුතුවන පන්කජ් මෝදිගේ නිවසේ සිටය. 95 වියැති හිරාබා දිල්ලියේ උත්සවයට සහභාගීවන්නට තරම් නිරෝගී තත්වයක පසු නොවූවාය. මෝදි දිවුරුම් දෙන අවස්ථාවේදී ඔවුහු අත්පොළසන් දෙමින් මෝදිගේ ජනප්‍රියතම උදාන වදන් දෙකක් වන භාරත් මාතා කි ජායි’ (භාරත මාතාවට ජය වේවා) සහ වන්දේ මාතරම්’ (මවුනි, මම ඔබ පසසමි) යන්න පැවසූහ. සියලු තැන රතිඤ්ඤා හඬ ඇසුණි. හිරාබාගේ සහ පන්කජ්ගේ දෑස්වලින් මතුවූ කඳුළු කම්මුල් ඔස්සේ රූරා වැටුණි. දැනට දැනගන්නට ලැබී ඇති කරුණුවලට අනුව ඉන්දීය පුරවැසියකු අගමැති ලෙසින් දිවුරුම් දෙනවිට එය දකින්නට ඒ කිසිවකුගේ මව ජීවතුන් අතර සිට නැත. ඉන්දීය ඉතිහාසයේ එවැනි අවස්ථාවක් දක්නට ලැබුණු ප්‍රථම අවස්ථාව ද මෙය විය.







මෝදිගේ බිරිඳ වන ජසෝබාඩෙන් මෙහ්සානා සිට සිය සැමියා ඉන්දියාවේ අගමැති ලෙස දිවුරුම්දීමේ උත්සවය රූපවාහිනියෙන් නැරඹුවාය. මෝදිගේ උපන් ගම වන වාද්නගර් හි සතුට උතුරා යමින් තිබිණි. රතිඤ්ඤා හඬ දසත රැව්දුනි. සිය පොලොවේ පස්වලින් උපන් පුතුවෙනුවෙන් උද්දාමයට පත්   ගම්වැසියෝ සතුටින් නැටූහ.

Friday, May 30, 2014

එවරස්ට් කන්ද තරණය කළ ලොව ලාබාලතම කාන්තාව - මලවත් පූර්නා - Malavath Purna the youngest women to climb Everest

මලවත් පූර්නා 

පුදුමාකාර දේවල් සිදුකිරීම සම්බන්ධව ලෝකයේ ප්‍රසිද්ධියට පත්ව ඇති කාන්තාවන් බොහොමයි. අපට ඒ වගේ කාන්තාවක් ගැන මතකදී අසන්නට ලැබුණා. ඇත්තටම ඇය වැඩිහිටි කාන්තාවක් නොවෙයි. 2000 වසරෙදී  උපන් (විකිපීඩියා එකේවත් තවම ඇය ගැන ලොකු විස්තරයක් නැහැ. ඒ නිසා උපන් වසර විතරයි දැනට දන්නේ) ඇය තවම 13 හැවිරිදි දැරියක්. මලවත් පූර්නානම් වූ ඇය ඉන්දියාවේ ආන්ද්‍රා ප්‍රදේශ් හි නිසම්බාඩ් දිස්ත්‍රික්කයට තමයි අයිති. ඇත්තටම මොකක්ද පූර්නා කළ අරුම පුදුම වැඩේ? ඇය මේ මෑත දවසක එවරස්ට් කන්ද තරණය කළා. එහෙම තරණය කළාට පස්සේ ඇය එවරස්ට් තරණය කළ ලාබාලතම දැරිය බවට පත්වුණා. ඒක තමයි ඇය කළ අරුම පුදුම දෙය.

මලවත් පූර්නා 

පාසලේ 9 වැනි ශ්‍රේණියේ ඉගෙනගන්න ඇගේ දෙමපියන් ගොඩක් දුප්පත්. ඔවුන් කරන්නේ කුළි වැඩ. ජීවන තත්වයෙන්, කුළයෙන් වගේම හැම අතින්ම පහලම තැනක ඉන්න ඇය ලෝකයේ ඉහළම ස්ථානය තරණය කරන්නට තරම් වාසනාවනත් වුණා. ඇය ගැන දැන් මුලු ලෝකයාම කතා කරනවා.

ආන්ද්‍රා ප්‍රදේශ්වල සමාජ සේවා ආයතනයක් මගින් දරුවන් වෙනුවෙන් සංවිධානය කළ කඳවුරකට පූර්නා සහභාගී වුණා. මේ වැඩසටහනයටම සහභාගී වුණු 17 හැවිරිදි සදන්පාලි ආනන්ද් කුමාර් මේ දවසේම පූර්නාගෙන් පසුව එවරස්ට් මුදුනට පා තැබූ බව කියැවෙනවා. මෙම කඳුනැගීමේ කණ්ඩායම සඳහා 20 දෙනෙක් සහභාගී කරවාගෙන තිබුණා. මේ ගමන සඳහා දින 52ක් ගතවුණා. පසුගිය මැයි 25 වැනිදා උදේ 6ට ඔවුන් කඳු මුදුනට පා තැබුවා.

මට මුළින්ම මේ ගැන බය හිතුණා. ඒත් අපට ලැබුණු පුහුණුව ගැන හිතලා මම ඒ බය නැති කරගත්තා. මම කවදාවත් උත්සාහය අතහරින කෙනෙක් නෙවෙයි.ඇය මේ ප්‍රකාශය බී.බී.සී. ආයතනය වෙනුවෙන් සිදු කළේ මැයි 28 වැනි බදාදා එවරස්ට් කඳු පාමුළ කදවුරක සිටයි.

ඇය එවරස්ට් කඳු තරණය සඳහා සහභාගී වුණේ දැඩි අධිෂ්ටානයකින්. අපට ඇය ගැන ආඩම්බරයි.ඩිස්කවරි ආයතනයට මෙම අදහස් ප්‍රකාශ කළේ මෙම කඳු තරණ කණ්ඩායමේ  තාක්ෂණික උපදේශක මොහොමඩ් අන්සාරි.

ආනන්ද් කුමාර් සහ පූර්නා 

ඉන්දියාවේ අති දුෂ්කර පළාතක ගෝත්‍රවලට අයත් දරුවන් දෙදෙනෙක් ලෝකයේ අතිශය දුෂ්කර මාවතක් පසුකරමින් එවරස්ට් කඳු මුදුන තරණය කළ මුල්ම අවස්ථාව මෙයයි. පුර්නාගේ මේ ජයග්‍රහණයෙන් පසුසේ ඇගේ පියා, මලවත් දේවිදාස් සහ අම්මා ලක්ෂ්මිපූර්නාගේ සොහොයුරාට දුන්නේ අපූරු අවවාදයක්. දවසක පුතත් අක්ක වගේම එවරස්ට් කන්දට නගින්න ඕන.නිසාමාබාද්වල වැසියන්ගේ එවරස්ට් තරණය කළ දෙවැන්නා වන්නේද පූර්නායි.

මෙහි සඳහන් කළ ආනන්ද් කුමාර් කුළය අතින් සළකා බලන විට පූර්නාටත් වඩා පහත්. කලක් මෙම කුළය හඳුවන්වනු ලැබූයේ ස්පර්ශ කිරීමට පවා නුසුදුසු කුලහීනයන් ලෙසයි.

සාමාන්‍යයෙන් එවරස්ට් තරණය සිදුකරන්නේ කන්දේ ටිබෙට් බෑවුම දෙසින් වුවත්, අප්‍රේ්ල් මාසයේදී මේ ප්‍රදේශයේ දරුණු හිම කඳු කඩාවැටීමක් සිදු වුණා. එයින් එවරස්ට් කඳු තරණය සඳහා එඩ්මන් හිලරිගේ සිට අද දක්වා සහායට පැමිණෙන ෂර්පා ගෝත්‍රයට අයත් වැසියන් 16 දෙනෙක් මිය ගියා. ඒ නිසා එම මාර්ගය වසා දැමුවා. පූර්නා ගිය කණ්ඩායමට එම නිසා දුෂ්කර වූ දිගු මාර්ගයක් තෝරාගන්නට සිදුවී තිබුණා.

පූර්නාට පෙර මෙම වාර්තාවට හිමිකම් කී නිමා චෙම්ජි 

පූර්නා මේ වාර්තාවට හිමිකම් කියන්නට පෙර එය හිමි කරගෙන සිටියේ නේපාල දැරියක්. නිමා චෙම්ජි නම් වූ ඇය 2012 දී එවරස්ට් තරණය කරන විට 16 හැවිරිදි වියෙහි පුසු වුණා.

පූර්නා එවරස්ට් මුදුනේ දී ලද අත්දැකීම පසුව මෙසේ විස්තර කළා.


බලන බලන හැම පැත්තෙම කඳු. හරිම ලස්සනයි.” 

Thursday, May 29, 2014

ශ්‍රී ගෞතම සම්බුද්ධ ටෙලි නාට්‍යයේ යශෝධරා - කාජල් ජායින් - Kajal Jain as the actress for Yashodhara


මේ දවස්වල පුංචි තිරේ ජනප්‍රියම ටෙලි නාට්‍ය අතුරින් එකක් තමයි ‛ශ්‍රී ගෞතම සමබුද්ධ’ කියලා කියන්නේ. බුදු රජාණන් වහන්සේගේ ජීවන චරිතය ගැන කතා කරන මෙය ඉන්දියානු නිෂ්පාදනයක්. අපි ඒ ගැන කලින් කතා බහ කරලා තියෙනවා. දෙරණ රූපවාහිනියෙන් සෑම සේනසුරාදාවකම සහ ඉරිදාවකම රාත්‍රි 8.30ට මෙය නරඹන්න පුලුවන්. අපි පසුගිය සති දෙකේ මේ ටෙලි නාට්‍යයේ ප්‍රධාන චරිත දෙකක් ගැන කතා කළා. ඒ සිදුහත් කුමරුගේ හා බුදුන් වහන්සේගේ චරිතය නිරූපණය කරන හිමන්සු සෝනි සහ ප්‍රජාපතී ගෝතමියගේ චරිතය නිරූපණය කරන ගන්ගුන් උප්‍රාරි ගැනයි. අද අප තවත් ප්‍රධාන චරිතයක් ගැන කතා කරන්න හිතුවා. ඒ .තමයි සිදුහත් කුමරුගේ සාංසාරික ආදරණීය බිරිඳ යශෝධරා ගැනයි. මේ ටෙලි නාට්‍යයයේ යශෝධරාගේ චරිතයට පණ දෙන්නේ කාජල් ජායින්. අපි ඇය ගැනයි අද කතා කරන්නේ. 

කාජල් ජායින් කියන්නේ 2008 වසරේ ඉන්දියානු රූ රැජින තරගාවලියේ අවසන් වටයට තේරුණු එක් තරුණියක්. මේ ඇයගේ මුල්ම ටෙලි නාට්‍ය රංගන අත්දැකීම විදිහට තමයි සැළකෙන්නේ. පරීක්ෂණ කිහිපයකියන් පසු ඇය මේ චරිතය සඳහා තෝරාගනු ලැබුවා. ඇය මාධ්‍ය සංකච්ඡාවකදී මේ ගැන මෙහෙම කතා කළා. 



“මම සිදුහත් කුමරුගේ බිරිඳ, ඒ කියන්නේ යශෝධරා තුමරියගේ චරිතය නිරූපණය කරන්නට තෝරාගෙන තිබෙනවා. බුදුන් වහන්සේගේ ජීවිතයේ වැදගත්ම පුද්ගලයෙක් වන යශෝධරාගේ චරිතය නිරූපණය කරන්නට ලැබීම මගේ ජීවිතයේ වැදගත්ම අවස්ථාවක් කියලයි මම හිතන්නේ.” 

ඇය තව දුරටත් ඒ ගැන කතා කළා. 

බුදු දහම කියන්නේ මට අලුත් දෙයක් නෙවෙයි. මම ඒ ගැන පුංචි කාලේ ඉඳන්ම බුදු දහම ගැන බොහෝ පොත් පත්, කතා කියවා තියෙනවා. ඒ කොහොම වුණත් මා මේ චරිතය සඳහා තෝරාගනු ලැබුවාට පස්සේ ඒ ගැන තව තවත් විස්තර සොයන්න වොහෙස මහන්සි වුණා. විශේෂයෙන් යශෝධරා කියන්නේ මෙන වගේ කෙනෙක් ද කියන එක ගැන මම වැඩිපුර විස්තර සොයා බැලුවා.” 

මුළින්ම මොස්තර නිරූපණ ශිලිපිනයක වූ ඇය මෙයට පෙර පන්ජාබ් චිත්‍රපටයක් වූ ‛ග්වේලියර්’ , ‛හිම්මාත් සිංග්’ සහ ‛මේරේ යාර් කාමිනී’, ‛යාර් අනුමුලේ’ වැනි පන්ජාබ් චිත්‍රපට කීපයකටම රංගනයෙන් දායක වී තිබෙනවා. 


නමුත් ශ්‍රී ගෞතම සම්බුද්ධ ඇගේ මුල්ම ටෙලි නාට්‍ය රංගනයයි. මෙයට අමතරව ඇයට ඉන්දීය සිනමාවේ පතාක යෝධයන් වන රිතික් රෝෂන් සහ සහිඩ් කපූර් සමඟ වෙළෙඳ දැන්වීම සඳහා පෙනී සිටින්නටත් අවස්ථාව ලැබී තියෙනවා. ඊට අමතරව බිපාෂා බාසු සහ අසීන් සමගත් ඇය වෙළෙඳ දැන්වීම් සඳහා පෙනී සිටියා. 

මගේ විශ්වාසය ඉහළ නංවාගන්න ඉන්දීය රූ රැජින තරගය ලොකු පිටිවහළක් වුණා. අයිශ්වර්යා රායි, සුස්මිතා සෙන් ආදී රංගන ශිල්පිනියන් අද මේ තත්වයෙන් බැබලෙන්නේ ඔවුන් ද රූ රැජින තරගවලින් පැමිණි අය නිසා කියලයි මම හිතන්නේ.” 

ඇය ජර්මනියේ පැවැත්වූ හොඳම මෝස්තර නිරූපණ ශිල්පිනියන් තේරූමේ තරගයකට ද 2008 වසරේදී සහභාගී වී තිබෙනවා. එහිදී ඇයට ලෝකයේ හොඳම නිරූපණ ශිල්පිනයන් අතර 15 වැනි තැන ලබාගන්නට හැකි වුණා. කෙසේ නමුත් ඇයගේ බලාපොරොත්තුව බොලිවුඩ් හි ස්ථාවර වී රංගන ශිල්පිනියක් විදියට තමන්ගේ ජීවිතය ඉදිරියට ගෙන යාමයි. 

මේ ටෙලි නාට්‍යයෙන් පස්සේ මා ගැන බොහෝ දෙනෙක් කතා කරයි කියලා මම හිතනවා. මට ඕන ඒ මාර්ගයේම ඉදිරියට යන්න.” ඇය එසේ පවසනවා. 

ඇය මෙහි රඟපෑමෙන් අනතුරුව ලෝකයේ ප්‍රමුඛ පෙළේ බෞද්ධ සංවිධාන 25කින් පමණ ඇයගේ රංගනය පසසා ලිපි ලැබී තිබෙනවා. ඇය මීට පෙර චිත්‍රපටවල සහ වෙළෙඳ දැන්වීම්වල පෙනී සිටියත් බොහෝ දෙනෙක් ඇය හඳුනාගත්තේ ශ්‍රී ගෞතම සම්බුද්ධ නාට්‍යයෙන්. දැන් අය ගැන මිනිස්සු බොහෝ දේ දන්නා නිසා ඇය රංගනයෙන් දායක වූ ‛හිම්මාත් සින්’ චිත්‍රපටයත් කතා බහට ලක්වෙයි කියා ඇය සිතනවා. 

දිනකට ආහාර වේල් හතරක් ලබාගන්නට හුරුපුරුදුව සිටින ඇය පවසන්නේ කුඩා ආහාර වේල් කිහිපයක් ගැනීම වඩාත් සෞඛ්‍ය සම්පන්න බවයි. යෝග ව්‍යයාම කරන ඇය වැඩිපුර ජලය පානය කරන්නටත් හුරු පුරුදුව සිටිනවා. දිදුලන සමත් සඳහා හොඳින් ජලය පානය කළ යුතු බවයි ඇය පවසන්නේ. පහසුයි කියා ඇයට සිතෙන ඇඳුම් අඳින්නට කැමති ඇය නව විලාසිතා පසුපස යාමට එතරම් කැමැත්තක් දක්වන්නේ නැහැ. 

තමන්ගේ ජීවිතයේ ඉළක්කයන් ගැන අඩුම තරමේ දවසට එක් වරක්වක් හිතන්න පුරුදු වෙන්න. එය ළඟා කරගැනීමට කළ හැකි හැම දෙයක්ම කරන්න. ඒ ඉළක්ක ළඟාවන තුරු ඉවසීමෙන් කටයුතු කරන්න.” 

මේ තමයි ඇයගේ ආදර්ශ පාඨය. ඇය එය පවසන්නේ අනුනට නොව තමන්ටමයි. නමුත් එය ඕනෑම නෛකුට අදාළ කරගන්නට හැකි කතාවක්. 

මෙතෙක් ලෝකයාගෙන් සැඟවූ නරේන්ද්‍ර මෝදිගේ බිරිඳගේ කතාව - Story of Narendra Modi's 'Hidden' Wife


මේ දිනවල ලෝකයේ, විශේෂයෙන් දකුණු ආසියාවේ බොහෝ දෙනෙක් අතර වැඩිපුරම ජනප්‍රිය නම තමයි. නරේන්ද්‍ර මෝදි. මෑතකදි අවසන් වුණු ඉන්දීය මහ මතිවරණයෙන් විශිෂ්ඨ ජයක් ලබාගත් ඔහු මේ ලිපිය ලියන මෙහොතවන විට මැයි 26 වැනිදා ඉන්දීය අගැමති ධූරයේ දිව්රුම් දෙන්නට සූදානමින් සිටින බවත් වාර්තා වී තිබුණා. කවුරු හරි කෙනෙක් ප්‍රසිද්ධ වෙනකොට ඒ පුද්ගලයාගේ හැම විස්තරයක්ම හොයන්න උත්සාහ කරන එක මිනිසුන්ගේ ස්වභාවය. අපිත් මිනිස්සු නිසා අපටත් ඒ ඕන කම ඇතිවුණා. ඒත් මේ සොයන්න යන්නේ නරේන්ද්‍ර මෝදි ගැනම නෙවෙයි. ඔහුගේ බිරිඳ ගැන. මෝදි මෑතක් වෙනකල්ම තමන්ගේ බිරිඳ ගැන කිසිම දෙයක් හෙළි කරලා තිබුණේ නැහැ. ඔහු විවාහක අයෙක් කියලා කවුරුවත් දැනගෙන සිටියේත් නැහැ. ඒ ගැන කාටවත් හොයන්න ඕන වුණෙත් නැහැ. කෙහොම හරි මහමැතිවරණයට නාමයෝජනා පත්‍ර භාර දෙන වෙලාවේ එහි විවාහක අවිවාහක බව යටතේ ඔහු නමක් සඳහන් කොට තිබුණා. ඒ තමයි ‛ජසෝඩාබෙන් චිමන්ලාල්’. ඒ වෙලාවෙත් මාධ්‍යවලට මේ කවුද කියන එක ගැන හොයන්න වුණු පෙනුමක් තිබුණේ නැහැ. ඒත් මෝදි දිනන ලකුණු පෙනෙනන් පටන්ගත්තාට පස්සේ තමයි ඕප දූප හොයන අය ඇය ගැනත් හොයන්න පටන් ගත්තේ. 


නරේන්ද්‍ර මෝදි කියන්නේ ධනවත් පවුලකින් ඉහළට ආපු පුද්ගලයෙක් නෙවෙයි. ඔහු තාත්තත් එක්ක කෝච්චි ස්ටේෂන්වල තේ විකුණලත් තියෙනවා. මෝදි අයිතිවුණේ ‛ගන්චි’ කියන කුලයට. මේ කුලයේ සිරිත තමයි ළමා කාලයේදීම විවාහ සිදුකරන එක. ඉතිං පාසල් ජීවිතේට ආයුබෝවන් කියල මෝදිට ගෙදරට වෙලා ඉන්න ලැබුණේ නැහැ. අම්මයි තාත්තයි මෝදිට කටයුත්තක් ලෑස්ති කළා. ගෑනු ළමයා තමයි ජසෝඩාබෙන් චිමන්ලාල්. ඇයත් සමඟ විවාහ ගිවිසගන්නකොට මෝදිට අවුරුදු 13යි. මේ ගෑනු ළමයාට අවුරුදු 12යි. කසාද බඳිනකොට මෝදිට අවුරුදු 18යි. ගෑනු ළමයාට 17යි. කොහොම වුණත් මෝදි ගැන ලියැවුණු ජීවිත කතාවේ නම් කියවෙන්නේ මේ විවාහය සම්පූර්ණ වුණේ නැහැ කියලයි. ඒ නිසා මෝදි තමන්ගේ විවාහය ගැන අනුගමනය කළේ නිහඬ ප්‍රතිපත්තියක්. මෝදි දේශපාලනයට එක්වුණු 2002 වසරේ සිටන්ම තමන්ගේ අපේක්ෂක ප්‍රකාශනයේ සඳහන් කොට තිබුණේ අවිවාහක තැනැත්තෙක් විදිහයටයි. පවුලක් නැති නිසා තමන්ට දූෂණ වංචාවලට සම්බන්ධවන්නට අවශ්‍යතාවයක් ද නැති බවයි ඔහු ඒ කාලෙයේ නිතරම කිව්වේ. නමුත් 2014 ලෝක් සභා මැතිවරණයේදී තමයි බළලා මල්ලෙන් එළියට පැන්නේ. දැන් අපි කතා කරන්න යන්නේ එහෙම එළියට පැනපු බළලා ගැනයි. ඇත්තම කිව්වොත් බැළලි ගැනයි. 

ජසෝඩාබෙන්  පාසල් ගුරුවරියක්. මේ ඔක්තෝබර් මාසයේ විශ්‍රාම යන්නට නියමිතයි. ඇය ජීවත්වෙන්නේ මොදිගේ ගම, ඒ කියන්නේ වාද්නගර්වල ඉඳන් කිලෝමීටර් 35ක් පමණ දුරින් තියෙන බ්‍රහ්මන්වාදා කියන පුංචි ගමේ. එහි ජනගහනය 2,500ක් විතර ඇති. 


ජසෝඩාබෙන් දිහා බලන කෙනෙකුට හිතන්න බැහැ ඇය ඉන්දියාවේ අගමැති වෙන්න ඉන්න පුද්ගලයාගේ බිරිඳ කියලා. ඇයගෙන් පෙනෙන්නේ දුෂ්කර පළාතක දුක්බර ජීවිතයක් ගත කළ ගැහැනියකගේ පෙනුමක්. ඒත් දැන් ගමේ හැමෝම ඇයට කිය්නනේ ‛නරේන්ද්‍ර මෝදිගේ බිරිඳ’ කියලයි. 

ජසෝඩාබෙන්ගේ ඡායාරූප සොයාගන්න හරිම අඩුයි. එයට හේතුව ඇය ඡායාරූපවලට පෙනී සිටින්නට ඇති අකමැත්තයි. තමන්ගේ පෙනුම ඒ තරම් දැකුම්කලු නැහැ කියලයි ඇය කියන්නේ. ඒ නිසාම ඇය ඡායාරූපවලට පෙනී සිටින්න කැමති නැහැ. 

නරේන්ද මෝදි සහ ජසෝඩාබෙන් විවාහ වුණත් ඒක සම්පූර්ණ විවහයක් වුණේ නැහැ කියලා කිව්වේ ඔවුන් එක වහලක් යට ජීවත් වෙන්න උත්සාහ නොකළ නිසයි. ඔවුන් එසේ නොසිටිය තරම්. නමුත් දික්කසාද වුණේ නැහැ. විවාහයෙන් පස්සේ ජසෝඩාබෙන් ආයෙත් තාත්ත ළඟට ගියා. ඒ  වැඩිදුර ඉගෙනගෙන අධ්‍යපන වැඩකටයුතු නිමා කරන්න. ඇය 1972 දී ජ්‍යෙෂ්ඨ විභාගය සමත් වුණා. පසුව ප්‍රාථමික පාසල් ගුරුවරියක් විදියට පුහුණුව ලබාගෙන් මාස තුනක් විතර අහමදාබාද්වල වැඩ කළා. ඇය ඉන්පසුව පාසල් කිහිපයකම සේවය කළා අවසානයේ දැන් ඉන්න ප්‍රදේශයට පැමිණියා. ඇගේ හිතවතුන් පවසන්නේ මේ කාලගය ඇතුළත ඇය කිසිම දවසක තමන්ගේ සැමියා සමඟ ජීවත්වන්නට යාමට උත්සාහ නොකළ බවයි. 

නරේන්ද්‍ර මෝදි හින්දු ජාතිවාදී ආකල්පවලින් පිරුණත් ජසෝඩාබෙන් එසේ නොවන බවයි පෙනෙන්ට තිබෙන්නේ. ඇය මුළින්ම උගන්වා තිබුණෙත් මුස්ලිම් දරුවන්ට. එම දරුවන්ගේ දෙමාපියන් පවසන්නේ තම දරුවන්ගේ ජීවිත යහමගට ගන්නට ඇය බොහෝ වෙහෙස වූ බවයි. 
ඇගේ ගමේ වැඩිහිටියෙක් මෙහෙම කියනවා. 

නරේන්ද්‍ර මෝදි දැන් ජාතික නායකයෙක්. බුද්ධිමතෙක්. හොඳ පෙනුමකුත් තියෙනවා. ජසෝඩාබෙන් ඔහුට ගැළපෙන්නේ නැහැ. ඒත් ඇය ඔහුගේ බිරිඳ. ඔහු ඇයව නැවත තමා ළඟට කැන්දාගෙන ඇය සමග ජීවත් වෙන්න ඕන.” 

මහ මැතිවරණයට සමයේ ඇය නරේන්ද්‍ර මෝදිගේ ජයග්‍රහණය උදෙසා දෙවියන්ට යාච්ඥා කළ බවත් දැනගන්නට ලැබෙනවා. මාධ්‍යවේදියකු ඇය හමුවූ අවස්ථාවේ ඇය මෙසේ ප්‍රකාශකොට තිබුණා. 

මම මගේ සැමියාට විරුද්ධව කිසිම දෙයක් කියන්නේ නැහැ. ඔහු බලවතෙක්. මේ රැකියාව විතරයි මට ජීවත්වෙන්න ආදායමක් ලැබෙන එකම දෙය. අනවශ්‍ය ප්‍රකාශ කරලා අනවශ්‍ය ප්‍රශ්න ඇතිකරගන්න මට ඕන නැහැ.” 

ජසෝඩාබෙන් තම ගුරු රැකියාවෙන් ඉන්දියානු රුපියල් 10,000ක් පමණ උපයනවා. මාසෙකට රුපියල් 150ක් වැයකරමින් ඇය තනි කාමරයක් සහිත නවාතැනකයි ජීවත් වෙන්නේ. 

නරේන්ද්‍ර මෝදිගේ බිරිඳ විදියට ඇයට මෙයට වඩා සැපවත් ජීවිතයක් ගත කරන්න පුලුවන් කියලයි ගමේ අය කියන්නේ. ඒත් ඇය එවැනි ජීවිතයකට කැමැති නැති පෙනුමක් තමයි පෙනෙන්නට තියෙන්නේ. අවුරුදු 63ක් වයස වෙන ඇයට ගෙදර වැඩට උදව්වටවත් කිසිවෙක් නැහැ. හැම දෙයම කරගන්නේ තනියම. 

ඇගේ ළඟම හිතවතුන් කියන්නේ ඇය තමන්ගේ සැමියා, ඒ කිය්නනේ නරේන්ද්‍ර මෝදිගෙන් දුරකතන ඇමතුමක් ලැබෙනකල් කැමැත්තෙන් බලා ඉන්නවා කියලයි. එහෙම කතා කරලා ඔහුත් එක්ක ජීවිතේ ඉතිරි කාලය ගතකරන්න ආරාධනාකරාවි කියලයි. 

Tuesday, May 27, 2014

දුම්වැටි පරීක්ෂණ වෙනුවෙන් සතුන් බිළිවීමේ කතාව - Sacrificing Animals for Cigarette Testings

සුනඛයන්ද දුම්වැටි පරීක්ෂණ සඳහා යොදාගනු ලැබිණි. 

සත්තු කිසිදා දුම්පානය නොකරති. නමුත් මිනිස්සු දුම්පානය කරති. දුම්පානය අහිතකර දෙයක් බව දැන දැනත් ඔවුහු දුම්පානය කර එයට ඇබ්බැහි වී එයින්ම අකාලයේ මිය යති. සතුන් දුම්පානය නොකරතත් දුම්පානය කරන මිනිසුන්ට නව නිෂ්පාදන ලබාදීමේ බලාපොරොත්තුවෙන් දුම්වැටි සමාගම් සතුන්ටත් දුම්පානය කරවති. සතුන්ගේ අයිතිවාසිකම් වෙනුවෙන් සටන් කිරීම සිනහවට කාරණයක් යැයි බොහෝ දෙනෙකු සිතන නිසා මේ වෙනුවෙන් උද්ඝෝෂණය කරන්නනෝ ද අල්පය.  මේ පිළිබඳව දන්නා අය මෙන්ම නොදන්නා අය වෙනුවෙන් ද මේ තොරතුරු ඉදිරිපත් කිරීම මැනවැයි සිතෙන්නේ මේ නිසාය.

මීයන් පරීක්ෂණ නලවලට දමා පරීක්ෂණ පැවැත්වීම 

මීයන් පරීක්ෂණ නලවලට දමා පරීක්ෂණ පැවැත්වීම 

දුම්බීම සෞඛ්‍යයට අහිතකර බැව් වෛද්‍යවරුන් විසින් සොයාගෙන දශක ගණනාවකි. දුම්බීම මගින් මුඛ පිළිකා හා පෙනහළු පිළිකා පමණක් නොව ශරීරයේ සෑම ඉන්ද්‍රියයකටම පාහේ හානි සිදු වේ. කෙසේ නමුත් දුම්වැටි සමාගම් සිය නිෂ්පාදන අත්හදාබැලීම සඳහා අහිංසක සතුන් කෲර ලෙස යොදාගන්නා බව රහසක් නොවේ. එයින් සතුන් වේදනා විඳ මිය යන අතර එම පර්යේෂණවලින් දුම්වැටි පානයට ඇබ්බැහි වූ අනුවණ මිනිසුන් වෙනුවෙන් යහපතක් සිදුවන්නේ ද නැත. දුම්වැටි පානය නිසා මිනිසුන් මරණය වැළැඳගන්නා බව එම සමාගම් දන්නා මුත් ඔවුන් මෙම පර්යේෂණ මගින් බලාපොරොත්තු වන්නේ මරණය ළඟාවීම තරමක් ප්‍රමාද කොට දුම් බොන්නන් හට වැඩි වැඩියෙන් දුම්වැටි පොවා තම ලාභය වැඩිකරගැනීමය.

දුම්වැටි නිෂ්පාදනයේදී සතුන් යොදා කෙරෙන පරීක්ෂණ සඳහා එක්සත් රාජධානියේ අවසර නැතත් ඇමරිකා එක්සත් ජනපදයේ හා යුරෝපීය සංගමයේ රටවලට තහනමක් නැත. දුම්වැටි නිෂ්පාදන සතුන් යොදා කෙරෙන පරීක්ෂණවලදී ඔවුනට බලහත්කාරයෙන් දුම් ආශ්වාස කිරීමට සිදුවේ. මෙය දිනකට පැය 6 බැගින් දෛනිකව සිදුකෙරේ. නොමැරී සිටියහොත් වසර තුනක පමණ කාලයක් දක්වා මෙම දඬුවම විඳිනට සතුනට සිදුවේ.

වඳුරන් ආශ්‍රිත දුම්වැටි පරීක්ෂණ 

වඳුරන් ආශ්‍රිත දුම්වැටි පරීක්ෂණ 

සත්තු සහජයෙන් දුම් ආශ්වාස කිරීම ප්‍රතික්ෂේප කරති. නමුත් දුම්වැටි සමාගම්වල ඇති රසායානාගාරයන්හිදී පරීක්ෂණ නල තුළට දමන මීයන්ගේ නාසයට සෘජුවම, බලහත්කාරයෙන් දුම් පොම්ප කරනු ලබයි.  අතීතයේදී මෙම පරීක්ෂණ සඳහා සුනඛයන් සහ වඳුරන් ද යොදා ගැනුණි. ඔවුන්ගේ උගුරු දණ්ඩෙහි සිදුරක් තනා මුහුණට මුඛවාඩාම් දමා එම සිදුරෙන් කෙළින්ම පෙනහලුවලටම දුම් පොම්ප කරවනු ලැබිණි. සාමාන්‍ය පරීක්ෂණවලදී මීයන්ගේ සමට සෘජුවම දුම් විදිනු ලැබිණි. එයින් අපේක්ෂා කරනු ලැබුයේ දුම් මගින් චර්ම පිළිකා ඇතිවන්නේ දැයි සොයා බැලීමය.

මෙසේ කරනු ලබන පරීක්ෂණ පහත සඳහන් ස්වභාවයන්ගේ යුක්ත වේ.

1. දුම්වැටිවලට මීපැණි, සීනි, පැණි මණ්ඩි, මිදි යුෂ, දෙහිවලින් ලබාගන්නා තෙල්, චොක්ලට්, කොකෝවා සහ කෝපි සාරය එක් කරමින් ෆිලිප් මොරිස් නම් සුප්‍රකට දුම්වැටි නිෂ්පාදන සමාගම කළ පරීක්ෂණ සඳහා මීයන් දහස් ගණනක් යොදා ගැනුණි. මීයන් පරීක්ෂණ නල තුළට දමා ඉහත සඳහන් ද්‍රව්‍ය මිශ්‍ර කළ දුම් ඔවුනගේ නාස වලට සෘජුවම ඇතුළු කරනු ලැබිණි. මෙය දිනකට පැය 6 බැගින් අඛණ්ඩව දින 90 කාලයක් සිදු කෙරණි. මෙම කාලය අවසන් වන විට මීයන් මිය ගිය අතර දුම නිසා සිරුරේ ඇති වන විවිධ වෙනස් කම් සොයා බැලීම සඳහා මළ සිරුරු නැවතත් රසායනාගාරවලට යවනු ලැබිණි.

2. තිරිඟුවලින් සාදාගනු ලබන අධි සාන්ද්‍රණ ෆෘටෝස් සිරප් රසය දුම්වැටිවලට එක්කිරීමේ පරීක්ෂණ ආර්.ජේ. රෙනෝල්ඩ්ස් නම් සුප්‍රකට දුම්වැටි සමාගමේ සිදුකෙරිණි. මෙහිදී මීයන් දහසකට අධික සංඛ්‍යාවක් යොදා ගැනුණු අතර ඔවුන්ගේ සමෙහි සිගරැට් තාර තවරනු ලැබිණි. එමෙන්ම ඔවුනට බලහත්කාරයෙන් දුම් ආශ්වාස කරන්නට සළස්වනු ලැබිණි. තාර ඇඟේ තවරනු ලැබූ මීයෝ පරීක්ෂණය අතරතුර මිය ගියහ. අනෙක් මීයන්ගේ සම පැළී චර්ම පිළිකා ඇති විය. ඉතිරි මීයන් මරා විච්ඡේදන කටයුතු සඳහා රසායානාගාරවලට යවනු ලැබිණි.

3. ෆිලිප් මොරිස් සමාගම මීයන් දහසක් පමණ ඩීසල් ඇන්ජින් දහනයේදී පිටවන දුමට සහ වරක් පාවිච්චි කළ දුම්වැටිවලින් නිකුත්වන දුමට නිරාවරණය කරනු ලැබිණි. මෙය දිනකට පැය 6 බැගින් සතියක කාලයක් ක්‍රියාත්මක කෙරිණි. මෙයින් බලාපොරොත්තු වූයේ ඔවුනගේ පෙනහළුවලට දුම බලපාන්නේ කෙසේදැයි සොයා බැලීමය.

සාවුන් ද මෙම පරීක්ෂණවලින් ගැළවුණේ නැත

දුම්වැටි සමාගම්  දැවටුම් කඩදාසි, දුම්කොළ මිශ්‍රණ සහ ආරක්ෂිත යැයි කියාගනු ලබන (නමුත් කිසිදු ආරක්ෂාවක් නැති) දුම්වැටි නිෂ්පාදන සඳහා ද සතුන් යොදා පරීක්ෂණ පවත්වයි. පරීක්ෂණ සඳහා සතුන් යොදාගැනීමට එරෙහි ඇමරිකානු සංවිධානයක් වන PETA - People for the Ethical Treatment of Animals හි පර්යේෂකයන් මෑතකදී සොයාගත් සුවිශේෂී කරුණක් වූයේ දුම්කොළ භාවිතයට එරෙහිව සටන් වදින්නේ යැයි සියලු දෙනා පිළිගත් ඇමරිකානු ජාතික පිළිකා ආයතනය දුම්වැටි නිෂ්පාදන සමාගම්වලට ඔවුන්ගේ නව නිෂ්පාදන අත්හදාබැලීම සඳහා මීයන් අළෙවිකරන බවය.

ඇමරිකාවේ ඔරිගන් ප්‍රාන්තයේ ඇති ජාතික ප්‍රයිමේටා පර්යේෂණ ආයතනයේ රීසස් වර්ගයේ වැඳිරියන්ගේ ගර්භනී සමයේ අවසාන මාස හතර තුළ නිකොටින්වල බලපෑම කෙතරම්දැයි සොයා බැලීම සඳහා පරීක්ෂණ පවත්වන බවට හෙළිවී තිබේ. ගර්භනී තත්වය සම්පූර්ණ වීමට ප්‍රථම මෙම වැඳිරියන්ගේ ගර්භාෂයෙන් කළල පිටතට ගෙන ඔවුන් මරා නිකොටින්වල බලපෑම සොයා බැලීම සඳහා පර්යේෂණාගාරවලට යවනු ලබයි.

දුම්කොළවලින් සිදුකෙරෙන නිෂ්පාදන පරීක්ෂා කිරීම සඳහා සැබවින්ම සතුන් යොදාගැනීම අත්‍යවශ්‍ය නොවේ. මිනිස් සිරුර පිළිබඳ මෙතෙක් ලබාගෙන ඇති විද්‍යාත්මක දැනුම ඔස්සේ යන්ත්‍රානුසාරයෙන් මේවා පරීක්ෂා කිරීමට ඇති තරම් පහසුකම් තිබේ. නමුත් බොහෝ දුම්වැටි නිෂ්පාදන සමගම් තවමත් මෙම කෲරතර ක්‍රියාව මගින් සිය නිෂ්පාදන පරීක්ෂාකිරීම නවතා නැත.

සුනඛයන්ද දුම්වැටි පරීක්ෂණ සඳහා යොදාගනු ලැබිණි. 


දුම්වැටි නිෂ්පාදන පරීක්ෂාකිරීම සඳහා සතුන් යොදාගැනීමෙන් අහිංසක සතුන්ට සිය ජීවත්වීමේ අයිතිය අහිමිවනවා සේම එයින් මිනිසුන්ට ඇතිවන සෙතක් ද නැත. එයට හේතුව යම් යම් ස්වභාවයන්ගෙන් සතුන්ගේ ක්‍රියාකාරීත්වයන් මිනිසුන්ට සමාන අවස්ථා තිබුණ ද එය සර්ව සම්පූර්ණ නොවීමය. එනම් සතුන් මත කෙරෙන පර්යේෂණවල ප්‍රතිපල මිනිසුනට අදාළ කරගැනීම සාර්ථක ක්‍රමයක් නොවන නිසාය. කුමන ආකාරයෙන් කෙතරම් පරීක්ෂණ පැවැත්වුවද දුම්කොළ ආශ්‍රිතව කෙරෙන කිසිදු නිෂ්පාදයක් කිසිසේත්ම හිතකර නැත. කෙටියෙන් පවසන්නේ නම් දුම්බීම සිරුරට කිසිසේතම හිතකර නැත. යමෙක් දුම්බීමට ඇබ්බැහි වී ඇත්නම් ඔහු හෝ ඇය තමාට ආදරය නොකරන්නෙක් වනවා පමණක් නොව අහිංසක සතුන්ගේ ජීවත්වීමේ අයිතිය උදුරාගන්නට ද දායක වන්නෙකි. අනෙක දුම්වැටි සමාගම්වලට සිය නිෂ්පාදන ඔස්සේ මිනිසුන්ගේ ජීවිත උදුරාගන්නට අවශ්‍ය නම්, එය අනුවණ මිනිසුන්ට වටහාගන්නට නොහැකි නම් අඩුම තරමේ අහිංසක සතුන්ගේ ජීවිත හෝ එයට බිලිනොදී සිටිය යුතුය. කෙසේ මුත් වඩාත් යහපත්ම දෙය වන්නේ ඔබ ද දුම්පානයෙන් වැළකී ඔබේ හිතවතුන් ද එයින් වළක්වාලීමය. එවිට මිනිසුන්ගේ ජීවිත අකාලයේ වැනසීම වළක්වන්නට හැකියාව ලැබෙනවා පමණක් නොව අහිංසක සතුන්ගේ ජීවත්වීමේ අයිතිය සුරක්ෂිත කරන්නට දායක වූයේය යන සතුට ද ඔබට ලැබෙනු ඇත. 

Monday, May 26, 2014

ඩිමාෂාගේ ෆේස්බුක් ගිනුමේ කවි - Poems from Dimasha's FB Account


මරණය කොයි වෙලාවක කොයි විදියට අපව හොයාගෙන එනවද කියන එක් ගැන අපි දන්නේ නැහැ. මරණය කොයි මොහොතක හරි එන බව දැනගත්තත් අපට ඒ ගැනම හිත හිතා ඉන්න වෙලාවකුත් නැහැ. ඒත් සමහර වෙලාවට සමහර අයට මරණය ගැන ඉව වැටුණු අවස්ථා අපි අසා තියෙනවා. ඒ කියන්නේ ඇතැම් අය තමන්ගේ මරණයට පෙර යම් යම් සළකුණු මගින් තමා මරණය කරා ගමන් කරමින් සිටින බව අනෙක් අයට හඟවන්නට උත්සාහ කළ අවස්ථා තියෙනවා. ඒත් එහෙම කරන කෙනාවත් දන්නේ නැහැ තමන් මේ කියන්නේ තමන්ගේම මරණය ගැනයි කියලා. නමුත් ඒ තැනැත්තා මිය ගිය හැටියෙම අනෙක් අයට දැනෙනවා මෙයා තමන්ගේ මරණය ගැන යම යම් දේවල් කිව්වා නේද කියලා. මේ වගේම සිද්ධියක් අපට මේ මැයි මාසේ 24 වැනිදා අසන්න ලැබුණා.

අපට මේ සිදුවීම අසන්න ලැබුණේ ඇල්පිටියෙන්. මේ කතාවේ නායිකාව 22 හැවිරිදි තරුණියක්. ඇය නමින් ඩිමාෂා ගයනකී. සෞන්දර්ය සරසවියේ දෙවන වසරේ අධ්‍යාපනය හදාරමින් සිටියා. ඩිමිෂාගේ අම්මට බැංකුවෙන් යමක් සිදු කරගන්නට තනිව යන්න නොහැකි නිසා ඩිමාෂට ද ඒ ගමනට කතා කොට තිබුණා. ඇය නිවසට පැමිණ සිටියේ ඒ නිසයි. ඊට අමතරව ඇය තමන්ගේ අධ්‍යාපන වැඩකටයුතුවලට නිවසටම බරක් පටවන්නට අකැමැති වූ නිසා සති අන්තයේ පෞද්ගලික ටියුෂන් පංතියක ඉගැන්වීමත් සිදු කළා. ඒ වෙනුවෙන් ඇය සති අන්තවලදීද නිවසට පැමිණෙනවා.

ඩිමාෂාට පෙම්වතෙක් හිටියා. ඔහු හමුදාවේ කොමාන්ඩෝ සෙබළෙක්. ඩිමාෂා සරසවි අධ්‍යාපනයට යනවාට ඔහුගේ කැමැත්තක් තිබුණේ නැහැ. ඒ හුඟ දෙනෙක් සරසවියේදී තමන්ගේ පරණ ප්‍රේම සබඳතාවලට ආයුබෝවන් කීමේ පුරුද්දක් අනාදිමත් කාලයක ඉඳන්ම පැවතුණු බව ඔහු දැන සිටි නිසා වෙන්න පුලුවන්. තමන් ආදරය කරන ගෑනු ළමයා වෙන කෙනෙක් එක්ක යාලුවෙයි කියලා ඔහුට බයක්, සැකක් තියෙන්නට ඇති. මේ නිසාම ඔවුන් අතර යම් යම් ආරවුලුත් ඇති වුණා. මේ වගේ ඇතිවුණු මතබේදයක් ගැන කතා කරලා විසඳගන්න ඔහුව මුණගැහෙන්න කියලා දුරකතනයෙන් අමතා ඇයට පවසා තිබුණා.

අම්මගේ බැංකුවේ වැඩේ ඉවර වුණාට පස්සේ පහුවදා, ඒ කියන්නේ 24 වැනිදා උදේම සරසවියට යන්නයි ඩිමාෂා කල්පනා කළේ. ඒ යන ගමන් ඇල්පිටියෙදි තමන්ගේ පෙම්වතා හමුවෙලා ප්‍රශ්නය බේරුමක් කරගන්න ඇයට ඕන වුණා. ඇය මාපලගම සිට කොළඹ දක්වා ධාවනය වූ බස් රථයකට ගොඩ වුණා. මේ බස් රථය ඇයට නුපුරුදු එකක් නෙවෙයි. එහි රියැදුරු සහ කොන්දොස්තර ඇය හොඳින් දන්නවා. වෙනදා ඇය කෙළින්ම මේ බස් රථයේ කොළඹ ගියත් එදා ඇල්පිටියෙන් බහින්න ඇය සූදානම් වුණා. මේ ගැන බසයේ කොන්දොස්තර ඇයගෙන් විමසා සිටියා.

යාලුවෝ කට්ටියක් අද ඇල්පිටියෙන් එකතු වෙනවා. එයාලාත් එක්කම වෙන බස් එකක නැගලා කොළඹ එන්නයි බහින්නේ.

ඇය දුන්නේ එවැනි පිළිතුරක්. නමුත් ඇය ඇල්පිටියෙන් බැස්සේ තම සෙබල පෙම්වතා හමුවූ ප්‍රශ්නය බේරුමක් කරගැනීමේ අරමුණින්. ඒ වනවිට ඔහුත් ඇල්පිටියට ඇවිත් තිබුණා. ඔවුන් ප්‍රශ්නය බේරුම් කරගැනීමට ගියේ ඉදිකරමින් පවතින පාලු ගොඩනැගිල්ලකට. එතැනදි ඔහු සැක කළ දේවල් ගැන ඇයගෙන් විමසන්නට ඇති. ඇයද මේවාට පිළිත-රු දෙන්නට ඇති. ඇගේ පිළිතුරුවලින් ඔහුට සෑහීමට පත්වෙන්න බැරිවෙන්න ඇති. ඒ නිසාම ඇති වුණු කෝපය නිසා සඟවා ගෙන ආ පිහිය ඇගේ සිරුර තුළට කිහිප වතාවක් කිඳා බසින්නට ඇති.

ප්‍රේමයයි වෛරයයි අතරේ වෙනස් කෙස් ගසයි කියල කියන්නේ නිකමට නෙවෙයි. නැත්නම් තමන් ආදරය කළ කෙනාට පිහියෙන් ඇනලා මරාදමන්න තරම් තද හිතක් ඇතිවෙන්නේ කොහොමද? මොනව වුණත් අනතිමේදී තරුණියක් අකාලයේ ජීවිතයෙන් සමුගත්තා. එදාම මේ මිනමරු ආදරවන්ත සෙබළාව පොලිස් අත් අඩංගවට පත් වුණා.

මාධ්‍යවලින් මේ පුවත මිනිසුන් අතර ගිහින් වැඩිවෙලාවක් ගියේ නෑ. ඊළඟට කාගේත් අවධානය යොමු වුණේ ඇගේ ෆේස්බුක් ගිනුමටයි. ඇය එයට අවසන් වරට ඇතුළු වී තිබුණේ පසුගිය 8 වැනිදා. ඇය එහි මෙවැනි අදහස් කිහිපයක් සඳහන් කොට තිබුණා. සැබවින්ම මෙය ඇය එහි යතුරු ලියනය කොට සඳහන් කිරීමක් නොව සාමාන්‍යයෙන් ෆේස්බුක් ඔස්සේ විවිධ පුද්ගලයින් සිය මිතුරු මිතුරියන් සමඟ හුවමාරු කරගන්නා, පින්තූර ලෙස තනන ලද අදහස්. මේ අදහස්ම වෙනත් ආකාරවලින් විවිධ වෙබ් අඩවිවලත් දකින්නට තිබෙනවා. උදාහරණයක් ලෙස මෙහි අන්තිම කැමැත්තයනුවෙන් සඳහන් අදහස http://mutuwassa.blogspot.com/ යන බ්ලොග් අඩවියේ වෙනත් ආකාරයකින් දකින්නට තිබෙනවා.

මුතුවැස්සේ ‘අන්තිම කැමැත්ත‘


අන්තිම කැමැත්ත

මා මියයන දිනක එන්න - මා බලන්න ඇවිත් යන්න,
කිසි දිනයක නොහෙළු කඳුළු එක බිඳුවක් හෙළලා යන්න
දෑස තදින් පියවුනාට - දෙකොපුල්  සීතල වුණාට,
පෙර පැවතුන දේ සිහිකර - නළලේ හාදුවක් තබන්න

නෙත් දහසක්  බලා හිදියි - මගේ යහගුණ ගැනම දොඩයි
මුවගට කර කිසිත් නොකියා පස් අහුරක් දාලා යන්න
සොහොනින් නුඹ පිටවන විට මහා තනිකමක් මෙමට දැනෙයි
මිනී මලක් ළගින් තබා - ආපසු නොබලාම යන්න


මේ තියෙන්නේ ඇය එහි සඳහන් කළ තවත් අදහසක්


කවදා හරි දවසක මේ හැම දෙයම දාල යන්නම වෙනවා. ඒ ගමන කිසිවෙක් සතුටින් යන්නේ නෑ. ඒත් ඒ  ගමන දුකක් නැතුව යන්න පුළුවන් වුනොත් කොයි තරම් දෙයක්ද ? එදාට ගොඩාක් අය මතකයට එන එකක් නෑ. මතක් වෙන කීප දෙනා අතර ඔබත් ඉදියි කියලා විශ්වාසයි මට.

මීට අමතරව ආදරයක දුක්බර හැඟීම් ගැන අනෙක් අයට දැනෙන තවත් අදහස් කීපයක්ම ඇය තම ෆේස්බුක් පිටුවේ සඳහන් කොට තිබුණා.


ඇය තබා තිබුණු මේ සටහන් නොබෝ දිනකින් තමා වැළඳගන්නට එන මාරයා ගැන දැනගෙනම ලියූවක් ද කියා හිතෙන තරමට මේ සිදුවීම් දෙක අතර සමීප සම්බන්ධයක් තියෙන බව පේනවා. නමුත් මේවා ඇගේම අදහස් නොවන බව පැහැදිලියි. මෙහි මුල් අයිතිකරුවා කවුදැයි දන්නේ නැහැ. නමුත් ඇගේ හිතේ ඇති වේදනාව මේ අදහස්වලින් අනෙක් අයට දන්වන්නට පුලුවන් නිසා ඇය මේවා ප්‍රදර්ශනය කළා වන්නට පුලුවන්. ඒ නිසා ඇය තමන්ගේ මරණය ගැන අවබෝධයෙන්ම මෙය සටහන් තැබුවාද කියා අපට එක එල්ලේ පවසන්නට බැහැ. පෙම්වතුන් ප්‍රේමය නිසා සිත් රිදවාගත් විට සියල්ලටම වඩා මරණය සැප බව අනෙකාට හඟවමින් අදහස් ප්‍රකාශ කරන එක ඉස්සර ඉඳන්ම සිද්ධවෙන දෙයක්. මා මළ පසු සොහොන් කොතේ දුක්ගීයක් ලියනු මැනව කියා මහගමසේකරයන් ලිව්වේ ද විරහ වේදනාව නිසයි. එවැන්නක් ලියූ පමණින්ම යමෙක් තමාගේ මරණය ගැන ඉව වැටී මෙවැන්නක් ලියූ බව කිව නොහැකියි. කෙසේ වුවත් ඩිමාෂා මෙවැනි මරණයක් සිහිනෙකින් හෝ අපේක්ෂා නොකරන්නට ඇති. ඇයට අහස උසට බලාපොරොත්තු තිබෙන්නට ඇති. ඇයට සැබවින්ම වෙනත් පෙම්වතෙක් සරසවියේ හෝ වෙනයම් තැනක් සිටියා නම් සෙබළ පෙම්වතාට සිත් රිදවීමක් ඇතිවීම පුමයට කාරණයක් නොවෙයි. ඔහු ඇයට දුරකතනයෙන් පවා තර්ජනය කළ බව දැනගන්නට ලැබෙන්නේ මෙවැනි සිත් රිදවීම් නිසයි. නමුත් ආදරය කළ කෙනාව පිහියකින් ඇන මරාදමන්නට තරම් තරුණු සිතක් ආදරය පරයා පැමිණීමයි මේ කතාවේ ඇති ඛේදනීයම තත්වය. 


මෙයට සබැඳි ලිපි
සරසවි සිසුවිය මරාදැමූ සෙබළ පෙම්වතාගේ සම්පුර්ණ පාපොච්චාරණය මෙන්න