පුවත්පත්වලට ලිපි ලිවීම මාගේ විනෝදාංශයකි. මා ලියන ලිපි මගින් පාඨකයින් දැනුමක් ලබමින් ජීවිතයට යමක් එකතු කරගන්නේ නම් එය මාගේ සතුටකි. වේගයෙන් ඉදිරියට ඇදෙන තාක්ෂණික ලෝකයේ පුවත්පත් කියවන්නට තරම් විවේකයක් නොමැති අයවලුන් බොහෝය. තවකෙකු පුවත්පත් කියවන්නට කැමති නැත. අන්තර්ජාලයේ ද සිංහල බසින් සියලුම පුවත්පත් ඇති බැවින් තාක්ෂණයට ප්‍රිය කරන්නෝ පරිගණකයෙක් හෝ සිය ජංගම දුරකථනයෙන් ඒවා කියවති. එබැවින් මා ලියන ලිපි එවැනි පාඨක පිරිස් වෙත යොමු කරන්නට අදහස් කළ නිසා මෙවැනි බ්ලොග් අඩවියක් ගොඩනගන්නට සිතුවෙමි. මාගේ උත්සාහය කෙතරම් නම් සාර්ථකදැයි තීරණය වන්නේ ඔබගෙන් ලැබෙන ප්‍රතිචාර මතය. එබැවින් ඔබ මේ පිළිබඳ සිතන පතන දෑ මවෙත දන්වන්නට උනන්දුවන්නේ නම් එය මාගේ සතුටයි. ඔබ සැමට තෙරුවන් සරණයි!

Monday, October 23, 2017

ඇස්වලට නිවැරදිව බෙහෙත් දමන්නේ කොහොමද? - How to put eyedrops correctly?



අද වෙනකල් ඇස්වලට නිවැරදිව බෙහෙත් දමන්නේ කොහොමද කියලා හරියටම නොදැන හිටියේ මම විතරක් නෙවෙයි කියලා දැනගත්තේ ඒ ගැක කිහිප දෙනෙකුගෙන් ඇහුවට පසුවයි. ඇහේ කොනට බෙහෙත් වත්කරලා සෑහෙන වෙලාවක් උඩ බලාගෙන ඉන්න ඕන‍ කියලත්, ඊට පස්සේ උගුරට තිත්ත රසක් දැනුණා නම් ඔන්න නියම විදියට බෙහෙත ඇහැට වැටිලා කියලත් තමයි  තරම් කාලයක් මම හිතාගෙන හටියේ  මම මේ ගැන අහපු හැමෝම කිව්වෙත් ඒ විදයට. ඒත් අද ඇස්වලට බෙහෙත් කරන රෝහලක දි මම මේ තරම් හිතාගෙන හිටි විදිය වැරදියි කියලා දැනගත්තා. මම වගේම වැරදියට හිතාගෙන ඉන්න තවත් අය ඉන්නවා නම් ඒ හැමෝටම මේක ප්‍රයෝජනවත් වෙයි කියලා හිතලයි මම මේක ලියන්න හිතුවේ. 

නිවැරදිව ඇස්වලට බෙහෙත් වැටුණා නම් ඒ බෙහෙත් කොහොමටවත් උගුරට බහින්න විදියක් නෑ. ඒ කියන්නේ උගුරට බෙහෙත් රසක් දැනෙන්න විදියක් නෑ. නිවැරදිව බෙහෙත් වැටුණේ නැත්නම් ඒ බෙහෙත් ටික කෙලින්ම උගුරට බහිනවා. 

නිවැරදිව බෙහෙත් දමන්නේ මෙහෙමයි. මේක අදාළ වෙන්නේ දියර බෙහෙත් බිංදු වත් කරද්දී බවත් මතක තියාගන්න ඕන.





බොහෝ විට තමන්ටම තමන්ගේම ඇස්වලට ‍බෙහෙත් දමාගන්න අපි පුරුදු වෙලා ඉන්නවා. නමුත් ඒක සාර්ථක නැහැ. ඒත් හරියටද දාගන්න පුළුවන් නම් ගැටළුවකුත් නැහැ. වෙන කෙනෙක් තමයි බෙහෙත් දමන්න ඕන. ඔළුව උඩට උස්සලා ඇස්වලින් සාමාන්‍ය මට්ටමකින් උඩ බලන්න ඕන. දැන් බෙහෙත් දමන කෙනා ඇස් අමාරුව තියෙන කෙනාගේ ඇහැට යටින් තරමක් තදින් තෙරපන්න ඕන. මේ පින්තූරවල ඒ විදිය තියෙනවා. එසේ තෙරපන විට ඇසට වැටෙන දියරය උගුරට බහින මාර්ගය අවහිර වෙනවා. දැන් හරියටම ඇසේ යටට මැදට වන්නට බෙ‍හෙත දමන්න ඕන. මේ විදයට බෙහෙත් වැටිලා ගොඩක් වෙලා උඩ බලාගෙන ඉන්න ඕන නෑ. ඕනම නම් විනාඩියක් ඉන්න. ඒත් ඒ වෛද්‍යවරයා කීව විදියට නම් තත්පර කිහිපයක් හිටියත් ඇති. මෙහෙම ඉන්න අතරේ ඇස හොඳින් වටේට කරකවලා අර බෙහෙත් ඇසේ තවර ගන්න ඕන. 

ඔන්න ඔය විදියට තමයි නිවැරදිව ඇසට බෙහෙත් දමන්නේ.

Friday, October 13, 2017

ප්ලේබෝයි සඟරාවෙන් ශෘංගාරය ලොවට බෙදූ හග් හෙෆ්නර් - Death of Hugh Hefner


ශෘංගාර රසය පසුපස හඹා යන ලොව පුරා වෙසෙන පිරිමින් සඳහා පමණක් වෙන් වූ ප්ලේබෝයිසඟරාවේ ආරම්භක හග් හෙෆ්නර් පසුගිය සැප්තැම්බර් 27 වැනිදා ලොවට සමුදුන්නේ ය. ඒ වන විටත් ඔහු 91 වැනි වියෙහි පසුවූයේ ය. 1953 වසරේ ආරම්භ කළ මෙම සඟරාවේ ප්‍රධාන කතුවරයා වූයේ ද ඔහු ය. පාසල් අධ්‍යාපනයෙන් පසුව හමුදා වාර්තාකරුවකු ලෙස සේවයට බැඳුණු ඔහු ඉලිනොයිස් සරසවියෙන් මනෝ විද්‍යාව පිළිබඳ උපාධියක් ද හිමි කරගත් තැනැත්තෙකි.

හෙෆ්නර් සහ ම්ල්ඩ්‍රෙඩ්

1949 දී ඔහු නෝර්ත්වෙස්ටර්න් සරසවියේ සිසුවියක වූ මිල්ඩ්‍රෙඩ් හා විවාහ වූයේය. ඒ විවාහයෙන් ඔවුන්ට ක්‍රිස්ටි නමින් දියණියක් ද, ඩේවිඩ් නමින් පුතකු ද උපන්නේය. ඔවුන්ගේ විවාහය පසුපස ඇත්තේ අපූරු කතාවකි. ඔවුන්ගේ විවාහයට පෙර හෙෆ්නර් ඉදිරියේ පාපෝච්චාරණයක් කරමින් මිල්ඩ්‍රෙඩ් පවසා සිටියේ හෙෆ්නර් හමුදාවේ සේවය කළ අතරවාරයේ ඇය වෙනත් තරුණයකු සමග සම්බන්ධයක් පැවැත් වූ බවය. ඒ බව දැන ගැනීම සිය ජීවිතයේ වඩාත්ම වේදනාත්මක අවස්ථාවක් වූ බව ඔහු පසු කලෙක පවසා තිබිණි. 2006 වසරේ දී මේ පිළිබඳ සඳහන් කරමින් හෙෆ්න්ර් පවසා සිටියේ ඇය කළ වරදට හිලව් වශයෙන් ඔහුට ඕනෑම ගැහැනියක හා ලිංගිකව එක් වන්නට ඇය ඉඩ හළ බවය. ඇය එයින් බලාපොරොත්තු වූයේ ඔවුන්ගේ විවාහය රැක ගැනීම වුවත් ඔවුහු 1959 දී දික්කසාද වූහ.

1952 දී එස්ක්වයර්නම් සඟරාවේ පිටපත් ලියන්නකු ලෙස සේවයට කළ ඔහු සිය වැටුප ඩොලර් 5කින් වැඩි කරන ලෙස ඉල්ලා සිටිය ද එසේ නොකළ හෙයින් රැකියාවෙන් ඉවත් වීමට තීරණය කළේය. ඉන්පසුව බැංකුවකින් ඩොලර් 6000ක ණයක් ද සිය මව ඇතුළු තවත් කිහිප දෙනෙකුගෙන් ඩොලර් 2000ක් ඉල්ලාගෙන සඟරාවක් ආරම්භ කරන්නට තීරණය කළේය. මේ ආකාරයට ඔහු ප්ලේබෝයිසඟරාව ආරම්භ කළේය. කාන්තා නිරුවත් ඡායාරූප, ශෘංගාරාත්මක කතා, සංවාද, සාකච්ඡා ආදී බොහෝ විශේෂාංගවලින් සපිරි මෙය හැට සහ හැත්තෑව දශකවල ඇමරිකාවේ අතිශය ජනප්‍රිය සඟරාවක් ව පැවැතුණි. 1953 දෙසැම්බර් මාසයේ දී ප්‍රකාශනය ආරම්භ කළ එහි මුල්ම කවරය සරසන ලද්දේ මැරිලින් මොන්රෝ ය. ඩොල්ර් ශත 50ක් වූ එම සඟරාවෙන් පිටපත් 54,000ක් අළෙවි විය.



හෙෆ්නර් සිය සඟරාව සඳහා මුළින්ම තබන්නට බලාපොරොත්තුවෙන් සිට නම වූයේ ස්ටැග් පාර්ටියන්නය. නමුත් ඒ වන විටත් ස්ටැග්නමින් සඟරාවක් පැවැති අතර යම් හෙයකින් එම නම අලුත් සඟරාවට යෙදුවහොත් එයට එරෙහිව නීතිමය පියවර ගන්නා බව හෙෆ්නර් හට දැනුම් දෙනු ලැබිණි. මේ නිසා ඔහුට වෙනත් නමක් අවශ්‍ය විය. ප්ලේබෝයියන්න ඔහුට මතක් වූයේ එවිටය. සැබැවින්ම එය ඔහු විසින් නිර්මාණය කරනා ලද්දක් නොවේ. එය කෙටි කාලයක් පමණක් පැවැති ඇමරිකානු මෝටර් රථ කර්මාන්ත ශාලාවක වෙලෙඳ නාමය විය. එය වසා දමනු ලැබ තිබු නිසා ඔහු සිය සඟරාව සඳහා ප්ලේබෝයියන්න යොදා ගන්නට තීරණය කළේය. සැබැවින්ම එම නාමය මෝටර් රථයකට නොව සැබැවින්ම ගැළපෙන්නේ ශංගාරාත්මක සඟරාවකට බව ඔහු කදිමට තහවුරු කොට පෙන්වූයේය.

ප්ලේබෝයි මෝටර් රථ කර්මාන්ත ශාලාව 


ප්ලේබෝයි නාමයත් සමග එකට බැඳුණු තවත් සුවිශේෂී දෙයක් වන්නේ මෙය වෙළෙඳ සලකුණ ය. ඒ බෝ එකක් පැළැඳ සිටින හාවකුගේ පැත්තකින් පෙනෙන රූපයකි. ශෘංගාරය, ලිංගිකත්වය ආදිය නිරූපණය වන සෑම තැනකම මෙය දක්නට හැකි විය. කෙසේ නමුත් කිසිදු ප්ලේබෝයි සඟරාවක මෙම ජේත්තුකාර හාවාගේ සම්පූර්ණ රූපය නොමැති බැව් පැවසේ.



ලිංගිකත්වය, ශෘංගාරය ආදියට මුල් තැන් දුන් සඟරාවක් වුව ද මෙහි සාකච්ඡා සඳහා ලෝකයේ ප්‍රබල පුද්ගලයන් බොහොමයකගේ දායකත්වය ලැබී තිබේ. ෆිදෙල් කැස්ත්‍රෝ, ජිමී කාටර්, ෆ්‍රෑන්ක් සිනාත්‍රා, මාලන් බ්‍රැන්ඩෝ ආදීන් ඒ අතර විය.


හෙෆ්නර් ප්ලේබෝයි මන්දිරය අසල

හෙෆ්නර් මෙම සඟරාව පවත්වාගෙන පැමිණි. ප්ලේබෝයි මන්දිරයද ලෝකයේ අතිශය ජනප්‍රිය ස්ථානයකි. මෙය 1921 දී ආතර් ආර්. කෙලී විසින් සැලසුම් කරන ලද්දකි. හෙෆ්නර් 1971 දී මෙය ඇමරිකානු ඩොලර් මිලියන 1.1කට මිලට ගත්තේය. එතැන් පටන් ප්ලේබෝයි සඟරාව කරගෙන ආ මෙතැන සේවකයන් 70කට අධික සංඛ්‍යාවක් සේවය කළේ ය. හෙෆ්න්ර් 2016 වසරේ දී මෙය විකුණා දමන්නට තීරණය කළ අතර ඒ වන විට එහි අගය ඇමරිකානු ඩොලර් මිලියන 200ක් දක්වා ඉහළ ගොස් තිබිණි. කෙසේ නමුත් හෙෆ්නර් මෙය අලෙවි කළේ එක් කොන්දේසියක මත ය. ඒ තමාගේ මරණය දක්වාම යම්කිසි කුලියක් ගෙවමින් මෙතැන සිය සඟරාව කරගෙන යන්නට ඉඩ සලසන පෙරොන්දුව පිටය.

කාන්තා නිරුවත, ලිංගිකත්වය හා ශෘංගාරය කැටිකරගත් පෙන්ත්හවුස්නම් තවත් සඟරාවක් ඇමරිකාවට පැමිණිය ද ප්ලේබෝයි සඟරාවට එයින් එතරම් බලපෑමක් වූ බවක් පෙනෙන්නට තිබුණේ නැත.

හෙෆ්නර් පෞද්ගලිකවම ලා බාල තරුණියන්ගේ ඇසුරට කැමැත්තක් දැක්වූ පුද්ගලයකු විය. ශෘංගාරයට, ලිංගිකත්වය ඔහු තුළ තිබූ නිසඟ කැමැත්තක් ඇතැම් විට මෙවැනි සඟරාවක් ආරම්භ කරන්නට මුල් වන්නට ඇත. ඔහු සිය ජීවිත කාලය තුළ තරුණියන් බොහෝ දෙනෙක්ම ප්ලේබෝයි මන්දිරයට ගෙන්වාගෙනම ඇසුරු කළේය. ඔවුන් අතර ඇමරිකානු නිළියන් වන බ්‍රුන්ඩේ රොඩ්‍රික්, ඉසබෙලා සේන්ට් ජේම්ස්, ටීනා මේරි ආදී බොහෝ දෙනෙක් විය.

ද ගාර්ඩියන්පුවත්පතේ ලේඛිකාවක වන සුසාන් මූවර් සිය ලිපියකින් හෙෆ්නර් පිම්පියා’ (ගණිකාවන් සපයන්නා) ලෙසින් හඳුන්වා දීම නිසා ඔහු ඇයට එරෙහිව නඩුමගට ද බැස්සේ ය. ඇය සිය ස්ථාවරය බිඳ නො ගනිමින් පවසා සිටියේ හෙෆ්නර් පිරිමින්ට කාන්තාවන් විකුණා දමන නිසා එසේ හැඳින්වීමෙහි වරදක් නැති බව ය. ද ඉන්ඩිපෙන්ඩන්ට්පුවත්පතේ ලේඛිකාවක වන ජූලි බෙන්ඩල් සිය ලිපියකින්  පවසා සිටියේ කාන්තා සිරුර අළෙවි කිරීමෙන් ඔහු මහත් වරදක් සිදුකොට ඇති බය ය. මීට අමතරව තවත් බොහෝ දෙනෙක් හෙෆ්නර් සහ ඔහුගේ ප්ලේබෝයි සඟරාව විවේචනය කොට තිබේ.


කෙසේ නමුත් දැන් හෙෆ්නර් මිය ගොසිනි. ඔහුගේ ශෘංගාරාත්මක අධිරාජ්‍යය දැන් හිමිව ඇත්තේ ඔහුගේ පුතු වන ඩේවිඩ් හටය. ඔහු මෙය තවත් ඉදිරියට පත්වාගෙන යනු ඇත. හෙෆ්න්ර් මිය යන්නට පෙර පවසා තිබුණේ තමා මිය ගිය දිනක සිය මළ සිරුර දවා එහි අළු ලොස් ඇන්ජලිසි හි වෙස්ට්වුඩ් අනුස්මරණ උද්‍යානයේ මැරිලින් මොන්රෝගේ ස්මාරකයට පසෙකින් තැන්පත් කරන ලෙසය. එය එලෙසම ඉටු වනු ඇත. මැරිලින් මොන්රෝ සමග සදාකාලික ජීවිත ගෙවා දැමීම බොහෝ මිහිරියාවක් වනු ඇතැයි ඔහු වරෙක පවසා තිබිණි. 

Wednesday, October 11, 2017

ක්‍රිකට් ගැන අරුම කතා ටිකක් - Fantastics Facts about Cricket

මේ දවස්වල බොහෝ දෙනෙකුගේ කතාබහට ලක්වෙන මාතෘකාවක් වෙලා තියෙන්නේ ක්‍රිකට්. බස් එකේ, දුම්රියේ කොහේදි වුනත් කීප දෙනෙක් එකතු වුණු වෙලාවට ක්‍රිකට් කතා නිතර ඇහෙනවා.  මේ හැම කතාවක්ම වගේ ක්‍රිකට් ගැන එදිනෙදා ප්‍රවෘත්තිවලින් ඇසෙන දකින දේවල්. කොහොම වුනත් අපට වැඩිය අසන්නට නොලැබෙන අමුතු අමුතු කතා ක්‍රිකට් ක්‍රීඩාව තුළින් ඇසෙනවා. බොහෝ දෙනෙක් මේවා දැනගන්නට කැමැත්තෙන් හිටියත් මේවා වැඩිය දැනගන්නට ලැබෙන්නේ නැහැ. ඒ නිසා අද ඒ වගේ කතා ටිකක් ගැන කතාකරන එක වඩා හොඳයි කියලා හිතුවා. 


1. ස්ථාන 10ටම වැටුණු ක්‍රීඩකයෝ 


ක්‍රිකට් ක්‍රීඩාවේ දි පන්දුවට පහර දෙන්න ක්‍රීඩකයන් පෙළගස්වන අනුපිළිවෙළක් තියෙනවා. හොඳින්, වේගයෙන් ලකුණු රැස් කළ හැකි අය පිතිකරු ලැයිස්තුවේ මුළින්මත්, පන්දු යැවීමට පමණක් දක්ෂයන් පිතිකරු ලැයිස්තුවේ අවසාන භාගයටත් දමනවා. සාමාන්‍යයෙන් පිති හරඹයට දක්ෂ ක්‍රීඩකයන් බොහෝ විට පිතිකරු ලැයිස්තුවේ පසුපසට යන්නේ නැහැ. නමුත් ආරම්භක පිතිකරුවාගේ සිට අවසන් පිතිකරුවා කියන ස්ථාන සියල්ලේම ක්‍රීඩා කළ ක්‍රීඩකයන් ද සිටිනවා. දැනට එසේ සිටියා යැයි පැවසෙන ක්‍රිඩකයන් 4 දෙනෙක් හඳුනාගෙන තිබෙනවා. ඔවුන් වන්නේ දකුණු අප්‍රිකාවේ ලාන්ස් ක්ලූස්නර්, පාකිස්ථානයේ අබ්දුර් රසාක් සහ ෂොයිබ් මලික්, ශ්‍රී ලංකාවේ හෂාන් තිලකරත්නයි. 


2. එකම දිනයේ ඉනිම් හතරක් 




ටෙස්ට් තරගයක් කියන්නේ වේගයෙන් ලකුණු රැස් කරනවාට වඩා තරමක් ඉවසිල්ලෙන් ලකුණු රැස්කරන අවස්ථාවක්. සියලුම ක්‍රීඩකයන් ඉතා ඉවසීමෙන් ක්‍රීඩා කරන ආකාරය තමයි මේ වගේ තරගයකින් වඩාත්ම දිස්වන්නේ. අනෙක එක් දිනයකින් ටෙස්ට් තරගයක් අවසන් වන්නේ ද නැහැ. නමුත් එසේ එක් දිනයකින් ඉනිම් හතරම අවසන් වුණු තරග ද ක්‍රිකට් ඉතිහාසයෙන් හමු වෙනවා. ඇත්තටම එවැනි අවස්ථා දෙකක් හමු වෙනවා. ඉන් පළමු වැන්න පැවැත්වුණේ 2000 වසරේ දී ලෝඩ්ස් ක්‍රීඩාංගනයේ දී. එංගලන්තය සහ බටහිර ඉන්දීය කොදෙව් පිල අතර පැවැති ටෙස්ට් තරගයේ දී ඉනිම් හතරම එකම දිනයේ දීම අවසන් වුණා. ඉන් පසු 2011 දී ද මෙවැන්නක්ම සිද්ධ වුණා. ඒ කේප් ටවුන් හි දි පැවැත්වුණු දකුණු අප්‍රිකාව සහ ඕස්ට්‍රේලියාව අතර පැවැත්වුණු ටෙස්ට් තරගයේ දී. 


3. උපන් දිනයත් ලකුණුත් එක සමාන වීම 




ලෝකයේ අහඹු අරුම පුදුම සිදුවීම් ගැන ඕනෑ තරම් අසන්නට දකින්නට පුළුවන්. නමුත් මේවා සිදුවන්නේ කොහොමද කියන එක ගැන තවමත් නිවැරදි විග්‍රහයක් නැහැ. මේ කියන්න යන්නෙත් එහෙම කතාවක්. ඇලෙක් ස්ටුවර්ට් කියන්නේ එංගලන්ත ක්‍රිකට් කණ්ඩායමේ ක්‍රීඩා කළ විකට් රකින්නෙක් සහ පිතිකරුවෙක්. ඔහු උපන්නේ 1963 අප්‍රේල් 8 වැනිදා. සිංහලෙන් දින ලියන කොට අපි ඒ විදියට ලිව්වත් ඉංග්‍රීසියෙන් දින ලියන්නේ 8 අප්‍රේල් (8 අප්‍රේල් 63), 1963 කියලා. ඒ විදියට ලියන දිනය සාමාන්‍ය සංඛ්‍යාවක් විදියට ලිව්වොත් අපට ලැබෙන්නේ 8463. ඇලෙක් ස්ටුවර්ට් තමන්ගේ ක්‍රිකට් ක්‍රීඩා තරග සියල්ලේ දී ම තරග 133 කට සහභාගී වෙමින්, 39.54 ක සාමාන්‍යයක් රඳවා ගනිමින්, ශතක 15ක් සහ අර්ධ ශතක 45ක් ලබාගනිමින් රැස් කරගන්නා ද මුළු ලකුණු ප්‍රමාණය වන්නේ ද 8,463 යි. පුදුමයි ද නැද්ද


4. මිනීමැරුමක් වෙනුවෙන් එල්ලා මරණ ලද ක්‍රිකට් ක්‍රීඩකයා 




අපරාධ, වංචා දූෂණවලට ලක්වුණු ක්‍රිකට් ක්‍රීඩකයන් ගැන ලොව පුරාම අසන්නට ලැබෙනවා. නමුත් මිනීමරුමක් නිසා මරණ දඬුවමකට ලක්වුණූ ක්‍රිකට් ක්‍රීඩකයෙක් ගැන අසන්නට ලැබෙන්නේ ක්‍රිකට් ඉතිහාසයේ එකම එක අවස්ථාවකදී පමණයි. ඒ බටහිර ඉන්දියානු ක්‍රිකට් කණ්ඩායමේ  හිටි ලෙස්ලි හිල්ටන්. ඔහු ටෙස්ට් තරග 6 කදී විකට් 16කට හිමි කම් කියා තිබෙනවා. නමුත් සිය බිරිඳ මරා දැමීමේ චෝදනාවට ලක් වුණු නිසා ඔහු 1955 මැයි 17 වැනිදා ජැමෙයිකාවේ දී එල්ලා මරා දමනු ලැබුවා. 


5. උපන් දිනයේ දී ත්‍රිත්ව විකට් 




ත්‍රිත්ව විකට් කියලා කිව්වට වඩාත්ම වටින්නේ එක පිට එක විකට් තුනක් දවා ගන්නා හැට් - ට්‍රික්අවස්ථාවයි. හැට්-ට්‍රික් ලබාගත් ක්‍රිකට් ක්‍රීඩකයන්ගේ නම් ලැයිස්තුවක් තිබුණත් තමන්ගේ උපන් දිනයේ දී එවැනි හපන්කමක් කළ අය ගැන ලැයිස්තු ලියන්න බැහැ. හේතුව ක්‍රිකට් ඉතිහාසයෙන්ම එවැනි අය හමුවෙන්නේ එකම එක අවස්ථාවකදී පමණක් වීමයි. ඔහු තමයි ඕස්ට්‍රේලියානු ක්‍රිකට් කණ්ඩායමේ පීටර් සිඩ්ල්. ඔහුගේ උපන් දිනය වැටී තිබෙන්නේ නොවැම්බර් 25 වැනිදාවකයි. 2010 නොවැම්බර් 25 වැනිදා එංගලන්තයට එරෙහිව බ්‍රිස්බේන් හි පැවැත් වූ ටෙස්ට් තරගයේ දී ඔහු හැට්-ට්‍රික්එකක් ලබා ගත්තා.


6. පළමු පන්දුවෙන්ම හයේ පහරක් 




පළමු පන්දුවෙන්ම හයේ පහරක් ගහන්න ලැබෙනවා කියන්නේ හොඳ ආරම්භයක්. නමුත් ටෙස්ට් තරගයකදී පළමු පන්දුවෙන්ම එවැනි හපන්කමක් කරන්න ලැබෙනවා කියන්නේ හිතන තරම් පහසු දෙයක් නෙවෙයි. නමුත් ක්‍රිකට් ඉතිහාසයේ එවැනි එක් අවස්ථාවක් හමුවෙනවා. මේ හපන්කම කළේ බටහිර ඉන්දීය ක්‍රිකට් කණ්ඩායමේ ක්‍රිස් ගේල්. ඔහු 2012 වසරේ බංග්ලාදේශයේ මනිපූර් හි බංග්ලාදේශයට එරෙහිව පවත්වන ලද ටෙස්ට් තරගයේ දී මේ හපන්කම කළා. ඔහුට පන්දුව එවනු ලැබුවේ එවකට නවක බංග්ලාදේශ ක්‍රීඩක සොහාග් ගාසි විසින්. 


7. මහේලගෙන් පමණයි 



ලෝක කුසලාන අර්ධ අවසාන සහ අවසාන තරගයක දී ශතකයක් රැස්කරගන්නට හැකියාව ලැබුණු එකම ක්‍රිකට් ක්‍රීඩකයා වන්නේ ශ්‍රී ලංකා ක්‍රිකට් කණ්ඩායමේ ක්‍රීඩා කළ මහේල ජයවර්ධන පමණයි. ඔහු 2007 ලෝක කුසලාන තරගයේ දී නවසීලන්තයට එරෙහිව පන්දු 109 කදී ලකුණු 115ක් රැස් කළා. ඉන් පසු 2011 වසරේ ලෝක කුසලාන තරගයේ දී ඉන්දියාවට එරෙහිව පන්දු 88 ක දී ලකුණු 103ක් රැස් කළා. ආඩම්බර ද නැද්ද


8. දිනය, වෙලාව සහ ලකුණු එකම ඉලක්කමක් වීම 




මේකත් ක්‍රිකට් ක්‍රීඩා ඉතිහාසයෙන් හමුවන අරුම පුදුම සිදුවීමක්. සිද්ධිය වුණේ 2011 නොවැම්බර් 11 වැනිදා දකුණු අප්‍රිකාවේ කේප් ටවුන් හි පැවැත් වූ දකුණු අප්‍රිකාව සහ ඕස්ට්‍රේලියාව අතර පැවැති පළමු ටෙස්ට් තරගයේ දියි. එදින  පෙරවරු 11.11 වෙද්දී දකුණු අප්‍රිකානු පිලට තරගය ජයග්‍රහණය කිරීම සඳහා ලකුණු 111ක් අවශ්‍යව තිබුණා. එදා දිනයත් සමග මේ සියල්ල එකට ලිව්වොත් මෙහෙමයි. (20)11 - 11- 11, පෙරවරු 11.11, අවශ්‍ය ලකුණු 111. පුදුමයි නේද


9. ෂේන් වෝන්ට වඩා විකට් දවා ගත් ජයසූරිය 



ශ්‍රී ලංකා ක්‍රිකට් කණ්ඩායම වෙනුවෙන් ක්‍රීඩා කළ තුන් ඉරියව්වෙන්ම කැපී පෙනෙන ක්‍රීඩක සනත් ජයසූරිය ඔස්ට්‍රේලියානු ක්‍රිකට් කණ්ඩායමේ ෂේන් වෝන්ට වඩා එක් දින තරග විකට් ලබාගෙන තිබෙනවා කියා කීවොත් බොහෝ දෙනෙක් එකවර පිළිගන්නට මැලි වෙනවා. නමුත් ඒක තමයි ඇත්ත. සනත් එක් දින තරග 445 ක දී විකට් 323ක් ලබා ගෙන ඇති අතර ෂේන් වෝන් ලබා ගෙන ඇත්තේ එක්දින තරග 194 ක දී විකට් 293ක් පමණයි.



10. නොදැවී සිටීමේ වාසනාව 



ක්‍රිකට් තරගයක් අවසන් වෙද්දි දැවී නොගිය පිතිකරුවෙක් ලෙස ලකුණු පුවරුවේ නම සඳහන් වීම එක්තරා ආකාරයක ගෞරවයක් විදියට හඳුන්වන්නට පුළුවන්. මෙය ගෞරවයක් නම්, ඒ ගෞරවය වැඩිම වාර ගණනක් ලබන්නට වාසනාව හිමි වෙලා තියෙන්නේ බටහිර ඉන්දීය ක්‍රිකට් කණ්ඩායම වෙනුවෙන් ක්‍රීඩා කළ වේග පන්දු යවන්නකු වූ කර්ට්නි වොල්ෂ්. ඔහු ටෙස්ට් තරග 132ක් සඳහා ක්‍රීඩා කොට තිබෙනවා. ඉනිම 185 කදී ඔහු රැස් කොට ඇති ලකුණු ප්‍රමාණය 936ක් වුනත්, 61ක් වතාවක් දැවී නොගිය පිතිකරුවෙක් ලෙස ලකුණු පුවරුවේ නම සඳහන් වුණා. ඔහු නොදැවී ලබාගත් වැඩිම ලකුණු සංඛ්‍යාව වන්නේ 1988 දෙසැම්බර් 24 වැනිදා ඕස්ට්‍රේලියාවේ මෙල්බෝන් ක්‍රීඩාංගනයේ ඕස්ට්‍රේලියාවට එරෙහිව පැවැත් වූ ක්‍රිකට් තරගයේ දී ලබා ගත් ලකුණු 30 යි.