පුවත්පත්වලට ලිපි ලිවීම මාගේ විනෝදාංශයකි. මා ලියන ලිපි මගින් පාඨකයින් දැනුමක් ලබමින් ජීවිතයට යමක් එකතු කරගන්නේ නම් එය මාගේ සතුටකි. වේගයෙන් ඉදිරියට ඇදෙන තාක්ෂණික ලෝකයේ පුවත්පත් කියවන්නට තරම් විවේකයක් නොමැති අයවලුන් බොහෝය. තවකෙකු පුවත්පත් කියවන්නට කැමති නැත. අන්තර්ජාලයේ ද සිංහල බසින් සියලුම පුවත්පත් ඇති බැවින් තාක්ෂණයට ප්‍රිය කරන්නෝ පරිගණකයෙක් හෝ සිය ජංගම දුරකථනයෙන් ඒවා කියවති. එබැවින් මා ලියන ලිපි එවැනි පාඨක පිරිස් වෙත යොමු කරන්නට අදහස් කළ නිසා මෙවැනි බ්ලොග් අඩවියක් ගොඩනගන්නට සිතුවෙමි. මාගේ උත්සාහය කෙතරම් නම් සාර්ථකදැයි තීරණය වන්නේ ඔබගෙන් ලැබෙන ප්‍රතිචාර මතය. එබැවින් ඔබ මේ පිළිබඳ සිතන පතන දෑ මවෙත දන්වන්නට උනන්දුවන්නේ නම් එය මාගේ සතුටයි. ඔබ සැමට තෙරුවන් සරණයි!

Monday, April 23, 2018

මේවා මේ තරම් වටින්නේ ඇයි? - Most Expensive Items from around the World

ලෝකයේ වටිනා දේවල් බොහොමයක් තිබෙනවා. ඒවා නොයෙක් ආකාරයෙන් පෙළ ගස්වන්න පුළුවන්. අනෙක එක් වටිනා දෙයක් තවත් එකකට දෙවෙනි වන්නේත් නැහැ. කෙසේ නමුත් මේ වසරේ අප්‍රේල් මාසය වන විට ලෝකයෙන් හමු වූ වටිනාම භාණ්ඩ කිහිපයක් ගැන විස්තරයක් අන්තර්ජාලය පීරමින් සිටිද්දී හමුවුණා. ඒ ගැන ටිකක් කතා කරන්නයි මේ සූදානම් වෙන්නේ.


වටිනාම ජංගම දුරකතනය 





ලෝකයේ වටිනාම ජංගම දුරකතනය අහවල් එකය කියා එකවර කියන්න අපහසුයි. මේ ගැන විස්තර සොයා අන්තර්ජාලය පුරා යන විට එකිනෙකට වෙනස් බොහෝ තොරතුරු සොයා ගන්නට පුළුවන්. කෙසේ නමුත් මේ කියන්න යන ජංගම දුරකතනයට තියෙන්නෙත් පුදුම වටිනාකමක්. මුදලින් ගත්තොත් ඇමරිකානු ඩොලර් මිලියන 2.97ක් (රුපියල් මිලියන 461ක් පමණ) වටින මෙය අයිෆෝන් ත්‍රීජීඑස් සුප්‍රීම්කියන වර්ගයට අයත් එකක්. වටිනාකමක් නොපෙනෙන දෙයකට ඉතා ඉහළ මිලක් නියම කරන විට බොහෝ දෙනෙක්, “ඇයි මේක රත්තරන්වලින්ද හදලා තියෙන්නේ?” දැයි අසනවා. ඇත්තටම මේ ජංගම දුරකතනය මේ තරමටම වටින්නටත් ඒ වගේම කාරණා ටිකක් හේතු වී තිබෙනවා. මෙහි කැරට් 97.5 ක දියමන්ති ඔබ්බවා තිබෙනවා. ඒ වගේම මේ දුරකතනයේ වටේ දාරය තනා ඇත්තේ ප්ලැටිනම්වලින්. මෙහි ඇති ඇපල් ලාංඡනය නිමවා ඇත්තේ කැරට් 18 රෝස රත්තරන්වලින් සහ දියමන්ති 53 කින්. මෙහි ප්‍රධාන බොත්තම, ඒ කියන්නේ තේරෙන විදියට කීවොත් නැවිගේෂන්බොත්තම තනිකරම කැරට් 7.1 ක දියමන්තියකින් තනා තිබෙනවා. නැවිගේෂන්බොත්තම  සවිකොට ඇති පාදම් කොටස තනා ඇත්තේ කැරට් 18 රෝස රත්තරන්වලින්. මේ සියල්ල හැරුණු විට දුරකතනය ක්‍රියාකාරීත්වය අතින් ද ඉතා ඉහළ තැනක තිබෙනවා. ඉතින් ඒක අඩුම ගානේ මේ ගාණටවත් ගන්න තියෙන එක ලොකු දෙයක් කියලා හිතෙන්නේ නැද්ද




වටිනාම ඡායාරූපය

 



මෑත කාලයේ අළෙවි වුණු ලෝකයේ වටිනාම ඡායාරූපය කියා හඳුනාගෙන තිබෙන්නේ රෙයින් II’  (Rhein II) කියන ඡායාරූපයයි. මෙය ඇමරිකානු ඩොලර් මිලියන 4.3කට (රුපියල් මිලියන 668ක් පමණ) අළෙවි වී තිබෙනවා. 1999 වසරේ දී ජර්මානු ඡායාරූප ශිල්පියකු වූ ඇන්ඩ්‍රියාස් ගර්ස්කි විසින් සිය කැමරාවට හසුකර ගන්නා ලද්දක් වන මෙයින් මිනිසා පරිසරය සමග ඇති කරගෙන සිටින අදෘශ්‍යමාන බැඳීම හොඳින් පෙන්නුම් කරන බව විචාරකයන් පවසනවා. මෙය ඡායාරූපයෙන් දැක්වෙන්නේ ජර්මනියේ රෙයින් නදියේ පහළ කොටසකට අයිති ප්‍රදේශයක්. එහි ඇත්තේ කොල පැහැ කෙත්වතු මැදින් රෙයින් නදිය ගළාගෙන යන අන්දම පමණයි. කෙසේ නමුත් මේ ඡායාරූපයට හසු වූ මිනිසුන් සහ ඈතින් පෙනෙන ගොඩනැගිලි ඡායාරූප ශිල්පියා විසින් පරිගණකය මගින් ඉවත් කොට ඇති බව පැවසෙනවා. ඒ සංස්කරණය තුළින් මැවුණු සරල අපූර්වත්වය, මෙය මේ තරම් වටිනාකමක් ලබා දී ඇති බවයි වාර්තා වෙන්නේ. 




ග්‍රාෆ් රෝස දියමන්තිය

 



මෙය ලෝකයේ අතිශය ප්‍රසිද්ධියට පත් දියමන්තියක්. දියමන්ති අතරින් රෝස දියමන්ති කියන්නේ ඉතා දුර්ලභ පාෂාණයක්. කැරට් 24.78ක් වන මෙය ඇමරිකානු සුප්‍රකට ආභරණ එකතු කරන්නකු වූ හැරී වින්ස්ටන් සතුව තිබී 2010 නොවැම්බර් 16 වැනිදා ස්විට්සර්ලන්තයේ ජීනීවා හි වෙන්දේසිකදී අළෙවි කෙරුණා. ඒ ඇමරිකානු ඩොලර් මිලියන 46 (රු. මිලියන 7,150 ක් පමණ) කටයි. 





කාඩ් සෙල්ලම් කරන්නන්ගේ සිත්තම

 



සිතුවම්වලටත් ලෝකයේ ධනවතුන් අතර තිබෙන්නේ පුදුමාකර ඉල්ලුමක්. මේ නිසා ඇතැම් සිතුවම් නොසිතූ තරම් ඉහළ මිල ගණන්වලට අළෙවි වෙනවා. ද කාර්ඩ් ප්ලේයර්ස්’ (The Card Players) කියන සිත්තමත් එහෙම එකක්. මෙය ප්‍රංශ පශ්චාත් උපස්ථිතිවාදී සිත්තරකු වූ පෝල් සෙසාන් විසින් 1890 දශකයේ දී නිම කරන ලද්දක් වශයෙන් සැලකෙනවා. මෙය 2011 වසරේ දී ඇමරිකානු ඩොලර් මිලියන 300 කට (රුපියල් බිලියන 46කට පමණ) අළෙවි වුණා. මෙහි නව හිමිකරුවා වන්නේ කටාරයේ රජ පවුලයි. 




හිස්ට්රි සුප්‍රීම් නෞකාව

 



හිස්ට්රි සුප්‍රීම් (History Supreme)  කියන්නේ සාමාන්‍ය විනෝද කටයුතු සඳහා පමණක් යොදා ගන්නා කුඩා වර්ගයේ නෞකාවක්. නමුත් මේ නෞකාව ප්‍රමාණයට සාපේක්ෂව මිලෙන් ඉතා අධිකයි. එයට හේතුව තමයි මෙය රත්රන් සහ ප්ලැටිනම්වලින් තනා තිබීම. ඒ වගේම මෙම නෞකාවේ තට්ටුව ඩයිනොසෝරයන්ගේ ඇටකටුවලින් සාදන ලද ද්‍රව්‍යයකින් නිමවා තිබෙන බවත් පැවසෙනවා. නිර්නාමික මැලේසියානු ව්‍යාපාරිකයකුගේ ඇණවුමකට අනුව කැනේඩියානු නළුවකු වන ස්ටුවර්ට් හග්ස් වෙනුවෙන් මෙය නිපදවා ඇති මෙය සම්පූර්ණ කිරීම සඳහා වසර 3ක් ගතවූ බවයි පැවසෙන්නේ. 2018 වර්ෂය වන විට මෙහි වටිනාකම ඇමරිකානු ඩොලර් මිලියන 4.5ක් (රුපියල් මිලියන 700ක් පමණ) වන බව ගණන් බලා තිබෙනවා. 





පළිඟු පියානෝව

 



සාමාන්‍යයෙන් සංගීත භාණ්ඩ අතර පියානෝවට හිමි වන්නේ විශේෂ තැනක්. උසස් සංගීත සංධ්වනියක දී පියානෝව දායකත්වය නැතිවම බැරිවා සේම එය සංගීත භාණ්ඩ අතර ඉතා ඉහළ වටිනාකමකට ද හිමිකම් කියනවා. එහෙම තත්වයක් යටතේ පියානෝවක් පළිඟුවලින් තැනුවොත් වටිනාකම තවත් ඉහළ යනවා. පළිඟු පාෂාණයෙන් සාදන ලද  මේ කියන්න සූදානම් වන පියානෝව බීජිං ඔලිම්පික් උළෙලේ දී වාදනය කෙරුණා. එය පසුව ඇමරිකානු ඩොලර් මිලියන 3.2කට (රුපියල් මිලියන 497ක් පමණ) වෙන්දේසියක දී අළෙවි කෙරුණා.



රන් ආලේපිත බුගට්ටි වේරොන්

 



බුගට්ටි වේරොන් (Bugatti Veyron)  කියන්නේ ජර්මනියේ ෆොක්ස්වැගන් සමූහ සමාගම විසින් නිර්මාණය කොට ප්‍රංශයේ බුගට්ටි සමාගම විසින් නිෂ්පාදනය කරන ලද මධ්‍යම ඇංජිමක් සහිත ක්‍රීඩා කටයුතු සඳහා යොදා ගන්නා මෝටර් රථ වර්ගයක්. ප්‍රංශ මෝටර් රථ ධාවන ශූරයකු වූ පියරේ වේරොන් සිහි වනු පිණිස මෙම මෝටර් රථයට බුගට්ටි වේරොන්කියන නම තබා තිබෙනවා. මේ කියන්න යන්නේ මේ වර්ගයේ මෝටර් රථයක් ගැන වුනත් මෙහි විශේෂත්වයක් තියෙනවා. ඒ කියන්නේ මෙයට රත්රන් ආලේප කොට තිබෙනවා. සවුදි අරාබියේ කෝටිපතියකු වෙනුවෙන් නිෂ්පාදනය කරන ලද මෙම මෝටර් රථය වටිනාකමින් ඇමරිකානු ඩොලර් මිලියන 10ක් (රුපියල් මිලියන 15541ක් පමණ) වෙනවා. 




කාලා දෙව්දුවගේ ශීර්ෂ සිත්තම

 



සිංහලෙන් කාලා දෙව්දුවගේ ශීර්ෂ සිත්තමකියා කීවත් මෙහි නියම නම වන්නේ Head of a Muse  යන්නයි. ඉතාලියානු සිත්තරකු වූ රෆායෙල් විසින් අඳින ලද මෙය වෙන්දේසියක දී ඇමරිකානු ඩොලර් මිලියන 16 කට (රුපියල් මිලියන 2,487 ක් පමණ) අළෙවි වුණා. මෙම සිත්තම සියවස් ගණනාවක් තිස්සේ විවිධ කලා විචාරකයන්ගේ සහ ඉතිහාසඥයන්ගේ නොමද ගෞරවය පාත්‍ර වූවක් ලෙස සැලකෙනවා. 






චොපාර්ඩ් අත් ඔරලෝසුව 




චොපාර්ඩ් කියන්නේ ස්විට්සර්ලන්තයේ ඇති ආභරණ සහ සුඛෝපභෝගී අත් ඔරලෝසු නිෂ්පාදනය කරන සමාගමක්. වර්ෂ 1860 දී ආරම්භ කරන ලද මෙය මුල් කාලයේ ප්‍රසිද්ධියට පත් වී තිබුණේ කාන්තා සහ සාක්කු ඔරලෝසු නිෂ්පාදනය කරන සමාගමක් ලෙසයි. මෙම අත් ඔරලෝසු සාමාන්‍යයෙන් මිල අධිකයි. ඒ අතරේ ඔවුන් අතිශය මිල අධික එක් ඔරලෝසුවක් ද නිර්මාණය කළා. මෙහි දියමන්ති 874ක් අඩංගුයි කීවොත් සමහර විට ඔබට පුදුම සිතෙන්නට පුළුවන්. මෙය ඇමරිකානු ඩොලර් මිලියන 25 කට (රුපියල් මිලියන 3,886ක් පමණ) අළෙවි වුණා.


නම්බර් 5, 1948 




මේ කියන්න යන්නේ තවත් සිත්තමක් ගැනයි. එහි නම තමයි Number 5, 1948  කියන්නේ. පසුගිය සියවසේ මුල් භාගයේ උපන් ඇමරිකානු ජාතික සිත්තරකු වූ ජැක්සන් පොලොක් විසින් අඳින ලද මෙය අයත් වන්නේ ව්‍යුක්ත ප්‍රකාශනවාදී  (abstract) කියන සිත්තම් ශෛලියටයි. ෆයිබර් ලෑල්ලක තෙල් සායම්වලින් අඳින ලද මෙය 2016 වසරේ දී ඇමරිකානු ඩොලර් මිලියන 140 (රුපියල් බිලියන 22ක් පමණ) කට අළෙවි වුණා. 


Thursday, April 12, 2018

අරුම පුදුම මඟුල් සිරිත් - Weird Wedding Traditions from around the World

මේක මඟුල් සක්වළක් කියලා කවුදෝ කියලා තියෙනවා. ඒ නිසා අතේ හොඳින් සල්ලි නැතත් සෑහෙන ගාණක් වියහියදම් කරලා, ෆොටෝ සූට් තොගයක් කරලා විශාලෙට මඟුලක් ගන්න කවුරුවත් දෙපාරක් හිතන්නේ නෑ.  මොනව වුනත් මඟුලක් ගන්න කොට සිරිත් විරිත් සම්ප්‍රදායන් නම් පුළුවන් තරම් කරන්න කවුරුත් උත්සාහ ගන්නවා. අපේ රටේ නම් නැකතට වැඩ කරන එක තමයි කවුරුත් කරන්න උත්සාහ කරන වැඩේ. අපේ රටේ සිංහල ජනතාව බොහෝ දෙනෙක් ආගම කුමක් වුනත්, විවාහ උත්සවයක් වෙනුවෙන් නැකත් ගැන විශ්වාසයක් තබනවා. මේක අපේ සම්ප්‍රදාය වගේම සංස්කෘතිය. කොහොම වුනත් ඒ සම්ප්‍රදාය ඇතැම් විට වෙනත් රටක කෙනෙකුට අමුතු දෙයක් වගේ පෙනෙන්න පුළුවන්. මේ නිසා වෙනත් රටවල තියෙන විවාහ සම්ප්‍රදායයන් අපට අමුතු ආකාරයෙන් පෙනෙනවා. විස්තර කියවගෙන යද්දි ඒවා අමුතුම දේවල් තමයි. මේ මඟුල් නැකත් කාලේ ඒ වාගේ විස්තර ටිකක් ගැන දැන ගන්න එකත් ටිකක මතක හිටින දෙයක් වේවි.

මනාලිය කළු කරන ස්කොට් වැසියෝ



අපේ රටේ නම් විවාහ උත්සවයක් තියන්න මාස කීපයකට පෙර සිටම මනාලිය වෙන්න ඉන්න තරුණිය උත්සාහ කරන්නේ කොහොම හරි වැඩිපර සුදට ඉන්න. මේ සඳහා රූපලාවණ්‍ය ශිල්පීන්ගේ පිහිට පතනවා. විවාහ මංගල්‍යය තියෙන දවස පුරාම මේ විදියට සුදට, ලස්සනට ඉන්න එක තමයි ඔවුන්ගේ බලාපොරොත්තුව. නමුත් ස්කොට්ලන්තයේ මේ සෙල්ලම හරියන්නේ නැහැ. ඒ රටේ මනාල යුවලගේ යහළු මිත්‍රාදීන් තමන්ගේ ආදරය පෙන්වන හොඳම ක්‍රමය තමයි හොයා ගන්න පුළුවන් හැම කුණු කන්දල්ම දාලා මනාලියව කළු පාට කරන එක. ඔවුන් මේ සඳහා මුදවපු කිරි, මැරුණු මාළුවෝ, නරක් වුණු කෑම, තාර, සෝස්, මඩ, පිටි වගේ දේවල් භාජනයක දාලා මිශ්‍ර කරනවා. ඔවුන් ඒ මිශ්‍රණය මනාලියගේ ඔළුවේ ඉඳන් හලනවා. ඉන් පස්සේ මනාලියව ටික වෙලාවක් ගහක බැඳලා තියලා මත්පැන් පානය කරන්න එක්කගෙන යනවා. ස්කොට් වැසියන් විශ්වාස කරන්නේ මනාලියකට මේ සියලු වද හිංසා ඉවසාගෙන ඉන්න පුළුවන් නම්, ඇයට විවාහය ඇතුළුව මුළු ජීවිතයේ එන ඕනෑම ගැටලුවකට පහසුවෙන් මුහුණ දෙන්න මෙයින් ශක්තියත්, ධෛර්යයත් ලැබෙන බවයි.




කලින්ම ලෑස්ති වෙලා අඬන චීන්නු



කසාදයක් බැඳගෙන තමන්ගේ සැමියාත් එක්ක තමන්ටම වෙන් වුණු ලෝකයක ජීවත් වෙන්න  යන්න තමයි හැම තරුණියක්ම වාගේ නිසි වයසට ආවාට පස්සේ සිහින මවන්නේ. ඒත් කසාදෙ දවසට මේ හැම දේම වෙනස් වෙනවා. එදාට අම්මාව, තාත්තාව, සමහර විට බල්ලාව පවා දාලා යන්න බෑ කිය කියා අඬා වැලපෙනවා. කොයි රටෙත් එහෙමයි. හැබැයි චීනේ ටුජියා කියන ජනතාව මේක තව ටිකක් ජයට කරනවා. ඔවුන් විවාහ මංගල්‍යයකට ලෑස්ති වෙද්දි දාලා යන්න බෑකියල අඬන ව්‍යාපාරයට වෙනම ලෑස්ති වෙනවා. ඒ මනාලියක් අඬන්නේ විවාහ දවසේ විතරක් නෙවෙයි. කසාදෙට මාසයක් තියා දවසට පැය ගානේ අඬන්න පටන් ගන්නවා. මුල් දවස් දහයෙන් පස්සේ මනාලියගේ ඇඬිල්ලට අම්මාත් එකතු වෙනවා. දවස් විස්සකට පස්සේ ආච්චි අම්මාත් එකතු වෙනවා. මාසය අන්තිම වෙද්දි මුළු පවුලේම කට්ටියම එකතු වෙලා එකම ඇඬිල්ලයි. එක එක ගැහැනු එක එක හඬවලින් අඬන එක ඇහෙන කොට එයින් විවාහයේ සතුට ප්‍රකාශ වන බවයි මේ ජනතාව විශ්වාස කරන්නේ. ඕන නම් අපේ කාට හරි වුනත් මේක අත්හදා බලන්නත් පුළුවන්.




ගසක් සැමියා කර ගැනීම



සාමාන්‍යයෙන් ඕනෑම රටක තරුණියක් තමන්ගේ සැමියා බවට පත් කරගන්නේ පිරිමියෙක්වයි. නමුත් ඉඳ හිට මේක වෙනස් වෙන අවස්ථා තියෙනවා. අපල දුරුවෙන්නට කියා තරුණියකට බල්ලකුව විවාහ කර දුන් කතාවක් ටික කාලෙකට කලින් ඉන්දියාවෙන් ආරංචි වුණා. මේ වගේ අමුතු දේවල් සිද්ධ වෙන ඉන්දියාවේ පිරිමියෙක් වෙනුවට ගසක් සමග විවාහ වෙන තරුණියන් ද ඉන්නවා. මේක කරන්නෙත් අපලයක් නිසාම තමයි. ඉන්දියාවේ ඇතැම් ප්‍රදේශවල බුද සහ කුජ හත්වැන්නේ නම් ඔවුන්ගේ එම තත්වය ජ්‍යෝතිෂයට අනුව ඔවුන් හඳුන්වන්නේ මංග්ලික්ස්නමින්. ඒ කියන්නේ එවැනි තරුණියන් හඳුන්වන්නේ සාපයක් වැදුණු අය හැටියටයි. ඔවුන් විවාහ වන පිරිමියා අනිවාර්යයෙන්ම අකල් මරණයකට මුහුණ පාන බව ඔවුන් විශ්වාස කරනවා. (මේ වගේ සාපයක් නිසා ඉන්දියාවේ සුප්‍රකට නිළියක වන අයිශ්වර්යා රායිවත් මුලින්ම ගහකට බන්දලා දුන්නු බවට කතාවක් අන්තර්ජාලයේ පැතිරිලා යනවා.) මේ නිසා සාපය දූරීභූත කරන්නට නම් මෙවැනි තරුණියකට මුලින්ම ගසක් හා විවහ වෙන්න සිද්ධ වෙනවා. ඉන් පස්සේ ගහ කපා දානවා. ඔන්න සාපය දූරීභූත වෙනවා. අනේ අසරණ ගස්!






මනාලයාගේ යටි පතුල තලන කොරියානුවෝ



කොරියාවේ සේවයට ගිහින් කොරියානු තරුණියක්ව කැන්දන් එන්න හිතාගෙන ඉන්න තරුණයන් ඉන්නවා නම් මේක ටිකක් හොඳින් කියව ගන්න එක ඇඟට හොඳයි. කොරියානු තරුණයෙක් විවාහ වුණු දවසේ පළමු මංගල රාත්‍රිය ගත කරන්නට පෙර ඔහුගේ යහළු හිත මිත්‍රාදීන් එකතු වෙලා මැරුණු මාළුවකුගෙන් හරි ටිකක් මහත කෝටුවකින් හරි මනාලයාගේ පතුල්වලට රිදෙන්නම ගහනවා. මේක වේදනාකාරී දෙයක් වුනත් බොහෝ දෙනෙක් එය සලකන්නේ විනෝදයක් ලෙසයි. මේක කළාම පළමු මංගල රාත්‍රියේදී මනාලයාගේ බලාපොරොත්තු කඩවෙන්නේ නැහැ කියා ඔවුන් විශ්වාස කරනවා.




දෑවැද්ද නැත්නම් බොරු මනාලියක් දෙන රුසියාව



දෑවැද්ද ගැන වද වෙන්නේ ලංකාව, ඉන්දියාව වගේ දකුණු ආසියානු රටවල් කියලා හිතුවාට රුසියාවෙත් මේ පුරුද්ද තියෙනවා. හැබැයි ඒක ටිකක් අමුතුයි. කසාදෙට කලින් මනාලයාගේ පාර්ශ්වයෙන් මනාලියගේ පාර්ශ්වය බැහැ දකින්න යනවා. දෑවැද්ද සම්පූර්ණයෙන්ම දුන්නාට පස්සේ විතරයි මනාලිය වෙන්න ඉන්න තරුණියට මනාලයාව බලන්න අවස්ථාවක් ලබා දෙන්නේ. කොහොම වුනත් දෑවැද්ද ගැන මනාලයාගේ පාර්ශ්වයෙන් සතුටක් නැත්නම්, ඒ කියන්නේ දෑවැද්ද අඩු නම්, තරුණියගේ නිවසේදීම තරුණයාට  වෙනත් මනාලියක් තිළිණ කරනවා. ඇත්තටම මේ මනාලිය විදියට එන්නේ තරුණියක් නෙවෙයි. මනාලියක් විදියට විකාර ඇඳුමකින් සැරසුණු තරුණයෙක්ම තමයි මේ විදියට එන්නේ. ඉන් පස්සේ දෑවැද්දේ අඩුපාඩු සම්පූර්ණ කරන තුරු මනාලිය වෙන්න ඉන්න තරුණියගේ නිවසට වෙලා කට්ටිය මේ ජවුසම නටනවා. දෑවැද්ද සම්පූර්ණ කළාට පසුව තරුණියට තරුණයා අසලට යන්න අවසර ලැබෙනවා. දෑවැද්ද ගැන තෘප්තිමත් වුණා ද නැත් ද කියා පරීක්ෂා කරන්නටයි මේ සම්ප්‍රදාය ඇති වී තිබෙන්නේ.

වලං, පිඟන්, දීසි බිඳින ජර්මානුවෝ



ජර්මනියේ තියෙන්නෙත් පුදුමාකාර සිරිත්. ජර්මනියේ කසාදේ දවසට මනාල යුවලට තෑගි විදියට ලැබෙන මැටිවලින් තැනූ හැලි, වලං, පිඟන්, දීසි ආදියට දෙයියන්ගේම පිහිටයි. මනාල යුවල මේ සියල්ල කුඩු කුඩු වෙන්න පොළොවේ ගසා බිඳින එක ජර්මනියේ බොහෝ පළාත්වල සම්ප්‍රදායක්. ඔවුන් විශ්වාස කරන්නේ මේ කැඩෙන බිඳෙන හඬ නිසා නරක ආත්ම පැත්ත පලාතේවත් නොඉඳ ඈතට පළා යන බවයි. ඔවුන්ගේ ජීවිතවලට එන බාධක දුක් කම්කටොළුවලින් ගැලවෙන්නටත් මෙය ක්‍රමයක් බව ඔවුන් විශ්වාස කරනවා. ජර්මන් හිතවතෙක් කසාද බඳිනවා නම් වීදුරු, පිඟන් කට්ටල අරන් යන්න නම් එපා! අපරාදේනේ!





මනාලියට කෙළ කසන කෙන්යානුවෝ




සාමාන්‍යයෙන් අපේ රටේ කෙල ගහන්නේ අවනම්බුවක් වුණාමයි. ඒත් කෙන්යාවේ මසායි ගෝත්‍රයේ කෙළ ගසන්නෙ මනාල යුවලට  ආශීර්වාද කරන්නටයි. විවාහයෙන් පස්සේ මනාල යුවල නික්ම යන්නට පෙර මනාලියගේ පියා විසින් මනාලියගේ ඔළුවටත් පියයුරුවලටත් කෙළ ගසනවා. ඉන් පස්සේ මනාල යුවල නිකමටවත් පසුපස හැරී නොබලා ගමෙන් පිටවී යා යුතුයි. යම් විදියකින් පිටුපස හැරී බැලුවොත් ඔවුන් දෙදෙනා ගල් බවට පත් වේ යැයි විශ්වාසයක් ඔවුන් අතර පවතිනවා.