පුවත්පත්වලට ලිපි ලිවීම මාගේ විනෝදාංශයකි. මා ලියන ලිපි මගින් පාඨකයින් දැනුමක් ලබමින් ජීවිතයට යමක් එකතු කරගන්නේ නම් එය මාගේ සතුටකි. වේගයෙන් ඉදිරියට ඇදෙන තාක්ෂණික ලෝකයේ පුවත්පත් කියවන්නට තරම් විවේකයක් නොමැති අයවලුන් බොහෝය. තවකෙකු පුවත්පත් කියවන්නට කැමති නැත. අන්තර්ජාලයේ ද සිංහල බසින් සියලුම පුවත්පත් ඇති බැවින් තාක්ෂණයට ප්‍රිය කරන්නෝ පරිගණකයෙක් හෝ සිය ජංගම දුරකථනයෙන් ඒවා කියවති. එබැවින් මා ලියන ලිපි එවැනි පාඨක පිරිස් වෙත යොමු කරන්නට අදහස් කළ නිසා මෙවැනි බ්ලොග් අඩවියක් ගොඩනගන්නට සිතුවෙමි. මාගේ උත්සාහය කෙතරම් නම් සාර්ථකදැයි තීරණය වන්නේ ඔබගෙන් ලැබෙන ප්‍රතිචාර මතය. එබැවින් ඔබ මේ පිළිබඳ සිතන පතන දෑ මවෙත දන්වන්නට උනන්දුවන්නේ නම් එය මාගේ සතුටයි. ඔබ සැමට තෙරුවන් සරණයි!

Monday, December 24, 2018

ශීතකරණ දෝෂයක් පහසුවෙන් නිවැරදි කර ගනිමු - 2 - Refrigerator Compressor Relay Problem Solving


ශීතකරණ දෝෂයක් පහසුවෙන් නිවැරදි කර ගනිමු - 2 කියා මෙය හඳුන්වා දී තිබෙන්නේ ශීතකරණයක් මුහුණ දෙන එක දෝෂයක් ගැන කලකට පෙර මා බ්ලොග් සටහන් ලියූ නිසයි. එය මෙතැන ක්ලික් කිරීමෙන් කියවන්නට පුළුවන්.

මා ශීතකරණ අලුත්වැඩියා කරන්නෙකු නොවුනත්, අපේ නිවසේ ඇති ශීතකරණයේ දෝෂයක් ඇති වූ විට කාර්මිකයකු කැඳවන්නට ඉක්මන් නොවී එය මටම විසඳාගන්නට හැකිදැයි සොයා බැලීමට මා පුරුදුව සිටින නිසා මා සොයා ගත් ක්‍රම මෙසේ ලියා තබන්නට සිතුවා.

පසුගිය දවසක අපේ නිවසේ ශීතකරණය හදිසියේ අක්‍රියාකාරී වුණා. එය තුල ඇති විදුලි බුබුල දැල්වුනත් එය ක්‍රියා කරන හඬක් ඇසුණේ නැහැ. සිසිල්වන බවක් පෙනුනේ ද නැහැ.  අන්තර්ජාලය පීරා මේ ගැන සොයා බැලූ විට මෙවැනි තත්වයක් ඇති වන්නට හේතුවන කාරණා දෙකක් ගැන දැනගන්නට ලැබුණා.

1. කොම්ප්‍රෙෂරය අබලන් වීම
2. කොම්ප්‍රෙෂරයට සවි කොට ඇති රිලේ සහ ඕවර්ලෝඩ් කොටස අබලන් වීම

මේ නිසා මා කළේ ශීතකරණයේ විදුලිය විසන්ධි කොට පරීක්ෂා කරන්නට පටන් ගැනීමයි. මේ සඳහා මල්ටි මීටරයක් තිබෙනවා නම් එය ඉතා ප්‍රයෝජනවත්.



කොම්ප්‍රෙෂරය හොඳදැයි බැලීම සඳහා මුලින්ම එයට බලය සැපයෙන රිලේ සහ ඕවර් ලෝඩ් කොටස ගැලවිය යුතුයි. පහළ පින්තූරයේ තියෙන්නේ කොම්ප්‍රෙෂරයට රිලේ සහ ඕවර්ලෝඩ් කොටස සවි වී ඇති ආකාරයයි. එය බොහෝ විට තියෙන්නේ කුඩා පෙට්ටියක් වැනි දෙයකින් ආවරණය වෙලා. මෙය සෙමින් ගැලවීමෙන් පසු කොම්ප්‍රෙෂරය හොඳින් තිබේදැයි පරීක්ෂා කරන්නට පුළුවන්.




කොම්ප්‍රෙෂරයේ කූරු 3 ක් තිබෙනවා. ඒවා Run, Common සහ Start යන නම්වවලින් හඳුන්වනවා. ඇතැම් කොම්ප්‍රෙෂර්වල Common කූර තිබෙන්නේ උඩින්. මේ කූරු දෙක බැගින් මල්ටිමීටරයේ  ඕම්ස් පරිමාණයෙන් පරීක්ෂාවක් කළ යුතු වෙනවා. 





මෙහි Common සහ Run අතර පරීක්ෂා කිරීමේ දී ඕම්ස් 5 - 6 අතර ආසන්න අගයක් පෙන්විය යුතුයි. Run සහ Start අතර පරීක්ෂාවේදී ඕම්ස් අගය 11 - 12 අතර ආසන්න අගයක් පෙන්විය යුතුයි. Common සහ Start පරීක්ෂාවේදී ඕම්ස්  5 - 6 අතර ආසන්න අගයක් පෙන්විය යුතුයි. Common/Run සහ Common/Start වලදී ලැබුණු අගයයන්වල එකතුව Run/Start පරීක්ෂාවේදී ලද අගයට ආසන්න වශයෙන් සමාන විය යුතුයි.

මෙවැනි පරීක්ෂාවක් කරන ආකාරය පහත වීඩියෝවෙන් දැක්වෙනවා.




ඒ වගේම මෙම කූරු එකින් එක් කොම්ප්‍රෙෂරයේ බඳ කොටස සමග ද පරීක්ෂා කළ යුතු වෙනවා. එසේ කරන්නේ පරිපථ ලඝුවීමක් (Short Circuit) වී තිබේද කියා බැලීමටයි. මේ සඳහා මල්ටිමීටරයේ Continuity පරීක්ෂාවක් කළ යුතුයි. එහි  Continuity තෝරාගන්න. කොම්ප්‍රෙෂරයේ බඳෙහි තීන්ත ඉවත්වන සේ සූරා කූරු එකින් එක බඳ සමග පිරික්සන්න. යම් අවස්ථාවක දී මල්ටිමීටරයේ බසරය නාද වූයේ නම් ගැටලුවක් පවතින බව සඳහන් කළ යුතුයි. එය සාමාන්‍ය දැනුමකින් විසඳිය හැකි ගැටලුවක් නොවේ. කොම්ප්‍රෙෂරයේ දෝෂයක් නම් එය අපට තනිව නිවසේදී අලුත්වැඩියා කරගන්නට නොහැකි අන්දමේ  බරපතල ගැටලුවක් නිසා ශීතකරණ කාර්මිකයකු කැඳවීම වඩාත් සුදුසුයි.

කොම්ප්‍රෙෂරයේ ගැටලුවක් නැත්නම් ඊළඟට ගැටලුව ඇත්තේ රිලේ සහ ඕවර්ලෝඩ් කොටසේ විය යුතුයි. මේ කොටස අතින් අල්ලා සෙලවූ විට සෙලවෙන හඩක් ඇසේ නම් එයින් කියවෙන්නේ එහි දෝෂයක් ඇති බවයි. මෙය මල්ටි මීටරයෙන් ද පරීක්ෂා කළ හැකියි. එවැනි පරීක්ෂාවක් කරන ආකාරය පහත වීඩියෝවෙන් දැක්වෙනවා.





මේ කොටසේ දෝෂයක් ඇත්නම් එය ගලවා ගෙන ගොස් එම වර්යේම එකක් සවි කිරීමෙන් මේ දෝෂය නිවාරණය කර ගත හැකියි. එම කොටස් ශීතකරණ අමතර කොටස් විකිණීමට ඇති වෙළෙඳ සල්වලින් මිලට ගන්නට පුලුවන්. කොළඹ නම් මේවා නවලෝක රෝහල අවට බොහෝ වෙළෙඳ සල්වලින් මිලට ගන්නට පුළුවන්.

මෙවැනි දෝෂ කාර්මිකයකුගේ සහායක් නැතිව ඔබටම නිවාරණය කර ගත හැකියි. කාර්මිකයකුගේ සහාය ලබාගන්නේ නම් ඔබට ඒ සඳහා සෑහෙන මුදලක් ගෙවන්නට වෙනවාට සැකයක් නැහැ.




Thursday, December 20, 2018

බුදුන් වහන්සේගෙන් ලද කාන්තා අයිතිය සුරකින්නට කැපවුණු ශාක්‍යධිතා සංවිධානය - Sakyaditha International



බුදු දහම යනු සියලු ආගම් අතුරින් සැබෑ නිදහසකින් යුක්තව පිළිපැදිය හැකි ආගමකි. විශේෂයෙන් කාන්තා විමුක්තිය පිළිබඳ කතා කිරීමේදී මෙය හොඳින් පෙනෙන්නට තිබේ. එය බුදු දහමේ ආරම්භයේ සිට අද දක්වාම නොනැසී පවතින්නාවූ සුවිශේෂී ලක්ෂණයකි. මේ නිසාම බුදු දහම සිය ජීවන දර්ශනය ලෙස තබාගනිමින් විවිධ සංවිධාන ලෝකයේ විවිධ ස්ථානවල බෞද්ධ කාන්තා සංවිධාන බිහිවී තිබේ. අප දැන කතා කරන්නට සැරසෙන්නේ මේවා අතුරින් වඩාත් සුවිශේෂී බෞද්ධ කාන්තා සංවිධානයක් පිළිබඳවය.  ‛ශාක්‍යධිතා’ (Sakyadhita) යනුවෙන් හඳුන්වනු ලබන එය ජාත්‍යන්තර වශයෙන් ඉතා ශක්තිමත් සංවිධානයක් ලෙස බෞද්ධ ලෝකය තුළ ඉදිරියට එමින් පවතී. ‛ශාක්‍යධිතා’ යන්නෙහි අරුත ද ඉතාමත් සුවිශේෂීය. ‛බුදුන් වහන්සේගේ දියණියෝ’ යන්න එහි අරුතයි. කෙසේ නමුත් බුදුමග ගමන් කරනා මේ දියණියන් පිළිබඳ දන්නා පිරිස අල්ප බැව් හොඳින්ම පෙනෙන්නට තිබේ. 

ශාක්‍යධිතා යනු ලෝකයේ ජාත්‍යන්තර පිළිගැනීමක් සහිත ප්‍රමුඛ පෙළේ බෞද්ධ සංවිධානයකි. 1987 වසරේදී බුද්ධගයාවේ පැවැති මුල්ම ජාත්‍යන්තර බෞද්ධ කාන්තා සංවිධානයේ ඒකමතික තීරණයක් ලෙස මෙම සංවිධානය ලොවට බිහි විය. ලෝකයේ විවිධ රටවල වෙසෙන බෞද්ධ කාන්තාවන්ගේ ජීවිත වඩා යහපත් කිරීම මෙම සංවිධානයේ අරමුණය. 

පිරිමින් හා සමානවම කාන්තාවට ද මේ ලෝකය වෙනුවෙන් සමාන සේවයක් සැළසිය හැකි බැව් ලොවට පෙන්වා දුන් මුල්වැන්නා වූයේ අප බුදුන් වහන්සේය. කාන්තා විමුක්තිය පිළිබඳ අද කතා බහ කරනා සියලු සංවිධාන අමතක කරදමා ඇත්තේද මෙයයි. බුදුන් වහන්සේ පෙන්වා දුන්නේ පිරිමියාගේ හා කාන්තාවගේ ජීව විද්‍යාත්මක වෙනස්කම් පැවතිය ද එය ලෝකයට සමාන සේවයක් සැළසීමට බාධාවක් වන්නේ නැති බවයි. පිරිමියාගේ හා කාන්තාවගේ මෙම එක හා සමාන හැකියාව පිළිගත් එකම දර්ශනය වන්නේ ද බෞද්ධ දර්ශනය පමණි. නමුත් අවාසනාව වන්නේ මෙම දර්ශනය තුළම උපන් බොහෝ බෞද්ධ කාන්තාවන් සිය ශක්තිය යොදා ලෝකයට සේවයක් කිරීමට පසුගාමී වීමය. 

ලෝකයේ රටවල් ගණනාවක ව්‍යාප්තව ඇති මෙම සංවිධානය ශ්‍රී ලංකාවට පැමිණෙන්නේ 1993 දීය. ඒ එම වසරේ අප රටේ පවත්වන ලද ජාත්‍යන්තර බෞද්ධ කාන්තා සම්මේලනය පවත්වන ලද ඓතිහාසික අවස්ථාවෙන් අනතුරුවය. අප රටේ ක්‍රියාත්මක වන ශාක්‍යධිතා සංවිධානයේ මූලික අරමුණ වන්නේ බෞද්ධ භික්ෂූණීන් හා මෙහෙණින් වහන්සේ අතර උසස් අධ්‍යාපන තත්වයක් ඇති කිරීමය. අතීතයේ අප රටේ බෞද්ධ භික්ෂුණින් හා මෙහෙණින් වහන්සේ බොහෝ විට සිදු කළේ ආගමික වතාවත් සිදුකිරීම පමණි. නමුත් ශාක්‍ය ධිතා සංවිධානය පවසන්නේ උන් වහන්සේලාගෙන් සමාජයට වඩාත් යහපත් සේවයක් ලබාගත හැකි බවය. විවිධ සමාජ හා ආර්ථික ගැටළුවලින් පෙළෙන බෞද්ධ කාන්තාවන්ට පිහිට වන්නට භික්ෂූණීන් වහන්සේලාට වඩාත් වැඩි මෙහෙයක් කළහැකි බැව් මෙම සංවිධානය පෙන්වා දෙයි. ඒ අතරතුර බෞද්ධ කාන්තාවන් තුළින් ගිළිහී යන බෞද්ධ සම්ප්‍රදායයන් යළි ඇති කිරීමට ද මේ තුළින් හැකි වෙතැයි ඔවුහු බලාපොරොත්තු වෙති. 

අප රටේ භික්ෂූණී ශාසනය නිවැරදි ලෙස පිහිටුවන ලද්දේ දැනට වසර 10 කට පමණ පෙරය. ඒ වනතුරු අප රටේහි සිටියේ දසසිල් මාතාවන් පමණි. මේවන විට භික්ෂූණී ශාසනය කෙමෙන් කෙමෙන් ව්‍යාප්ත වන්නට පටන්ගෙන තිබේ.  ශාක්‍ය ඩීටා සංවිධානය මේ පිළිබඳ දක්වන්නේ යහපත් ආකල්පයකි. අප රටෙහි බෞද්ධ කාන්තාවන්ගේ ජීවන තත්වය නගා සිටුවීමට මෙය මහත් රුකුළක්වනු ඇතැයි මෙම සංවිධානය බලාපොරොත්තු වෙයි. 

දැනට ගණනය කොට ඇති පරිදි ලෝකයේ බෞද්ධ කාන්තාවෝ මිලියන 300ක් පමණ සිටිති. මෙයට භික්ෂුණීන් හා මෙහෙණින් වහන්සේලා 130,000 ක් ඇතුළත්ය. බොහෝ කාන්තාවෝ බෞද්ධ වතාවත් අනුගමනය කරමින් බෞද්ධ දර්ශනයට අනුව ජීවිතය හැඩගස්වා ගන්නට හැකියාවක් නැති කරමටම දුප්පත්කමින් පිරුණු ජීවිත ගත කරති. බුදුන් වහන්සේ පිරිමි හා කාන්තාවන් අතර සමතැන් ඇති කළ ද අද බුද්ධ ශාසනය තුළම ඒ තත්වය තුරන්ව යමින් පවතින බැව් පෙනේ. භික්ෂූන් වහන්සේ හා සමාන උපසම්පදාවකට අද හිමිකම් කිව හැක්කේ චීන, කොරියානු හා වියට්නාම් බෞද්ධ සම්ප්‍රදායයන් තුළ පමණක් බැව් පෙනේ. ශාක්‍යධිතා සංවිධානයේ අරමුණ වන්නේ මෙසේ අහිමිවී ගිය කාන්තා හැකියාව යළි ඇතිකර ගැනීමය. ඔවුහු මේ අරමුණ වෙනුවෙන් ලොව වටා වූ බෞද්ධ කාන්තාවන්ට අධ්‍යාපනය හා පුහුණුව ලබාදෙමින් සිටිති. 

ඔවුහු සිය අරමුණු මෙසේ දක්වති. 

1. බෞද්ධ කාන්තාවන්ගේ ජාත්‍යන්තර එකමුතුවක් ඇතිකිරීම 
2. බෞද්ධ කාන්තාවන් තුළ අධ්‍යාත්මික ගුණ වගාවන් දියුණු කිරීම 
3. බෞද්ධ භික්ෂුණීන් වහන්සේලාට ද භික්ෂූණ් වහන්සේලා හා සමානවම උපසම්පදාව ලබාගැනීමට ක්‍රියාකිරීම 
4. බෞද්ධ සම්ප්‍රදායයන් හා අනෙකුත් ආගම් අතර සංහිඳියාවක් ඇතිකිරීම 
5. බෞද්ධ කාන්තාවන්ට වැදගත්වන ආකාරයේ පර්යේෂණ හා ප්‍රකාශන ඇතිකිරීම 
6. බුද්ධ දේශනාව ඔස්සේ ලෝක සාමය ඇතිකිරීම සඳහා දායකත්වය සැළසීම 

බෞද්ධ සම්ප්‍රදායයන් බහුලව පැතිර පවතින ආසියානු රටවල පමණක් නොව ඇමරිකා එක්සත් ජනපදය, යුරෝපියානු රටවල්, ඕස්ට්‍රේලියාව ආදී බෞද්ධ සම්ප්‍රදාය ක්‍රියාත්මක නොවන තවත් බොහෝ රටවල් ප්‍රබල සංවිධානයක් ලෙස ඉස්මතුවෙමින් වෙමින් පවතී. එය ලෝකවාසී බෞද්ධ කාන්තාවන්ට පමණක් නොව සමස්ථ බෞද්ධ ජනතාවටම සතුටට කරුණකි. ලොව පුරා බුදු වදන පතුරුවන්නට මෙය ඉමහත් පිටිවහලක් වනු ඇත.

වැඩිදුර කියවීම්

Wednesday, December 19, 2018

රවි ෂංකර්ගේ සුරූපී දියණිය අනුෂ්කා - Anoushka Shankar, the Daughter of Ravi Shankar


ලොව ප්‍රකට චරිත බවට පත්වන්නට විවිධ ක්‍රම තිබේ. කලාකරුවකු වීම මෙවැනි එක් ක්‍රමයකි. කලාකරුවකුගේ දරුවකු වීම තවත් ක්‍රමයකි.


අනුෂ්කා ෂංකර් (Anoushka Shankar) මේ හේතු දෙක නිසාම අද වන විට ලෝක ප්‍රකට චරිතයක් බවට පත්ව තිබේ. ඇය ලෝක සංගීත ක්ෂේත්‍රයේ ප්‍රධාන පෙළේ කලාකාරියකි. ඒ ඇය අතිදක්ෂ සිතාර් වාදන ශිල්පිනියක් වීම නිසාය. මේ ජනප්‍රියතාවය තවත් වැඩිවන්නේ ඇය ලොව ශ්‍රේෂ්ඨතම මෙන්ම අතිදක්ෂ සිතාර් වාදන ශිල්පියකු වූ පණ්ඩිත් රවි ෂංකර්ගේ දියණියක වීම ද නිසා ය. 1981 ජුනි 9 වැනිදා අනුෂ්කා මෙලොව එළිය දකිද්දී ඇගේ පියා වන 1920 අප්‍රේල් 7 වැනිදා උපන් රවි ෂංකර් 60 වැනි වියෙහි විය. ඇයගේ මව වූ සුකන්‍යා රාජන් රවි ෂංකර්ගේ දෙවැනි බිරිඳ ය. උපතේ සිටම සිතාර් නදට හුරුව සිටි ඇයගේ ජීවිතයේ සදාකාලික සහකරුවා වූයේ ද සිතාරයමය. ඒ සිතාර් වාදනයෙහි කෙළපැමිණියකු වීමෙන් හා සංගීත සංයෝජනයෙන් ඇය අද වන විට මහත් ධනස්කන්ධයක් උපයන බැවිනි.

අනුෂ්කා සිතාරයට අත‍පොත තැබුවේ කුඩා දැරියකට සිටින සමයේදීම ය. මුල් සමයේ සිතාර් වාදනය පුහුණුවීමේ කාලය කෙටි වුවත් වයස දහතුන වන විට එය දිනකට පැය දෙක දක්වා වැඩිවිය. සති අන්තවල දී එය පැය හතරක් විය. තවත් කාලයක් ගතවද්දී එය පැයකට දින 8ක් බවට පත්විය. ඇය මුලින්ම සිය පියා සමග මහජනයා ඉදිරියේ පෙනී සිටින විට වයස අවුරුදු 14ක් විය.


1988 දී ඇය සිය මුල්ම ඇල්බමය නිකුත් කළ අතර එය ‘අනුෂ්කා’ විය. 2000දී ඇය ‘අනුරාග්’ නමින් තවත් ඇල්බමයක් නිකුත් කළාය.
ඇමෙරිකා එක්සත් ජනපදයේත්, එක්සත් රාජධානියේත්, ඉන්දියාවේත් වරින් වර පදිංචිව සිටින අනුෂ්කා සෑම සංගීත ෙශෙලියක් කෙරෙහිම දක්ෂතාවයක් උසුලන්නීය. සංගීතය සඳහා ලොව පිරිනැමෙන ඉහළම ග්‍රැමි සම්මානයට ඇය දෙවරක්ම යෝජනා වූ අතර ග්‍රැමි සම්මාන උළෙලකදී සංගීතමය ඉදිරිපත් කිරීමක් සඳහා භාග්‍යය හිමිකරගත් ප්‍රථම ඉන්දීය ජාතිකයා ද ඇය විය. වර්ෂ 2004 දී ටයිම් සඟරාව මගින් තෝරන ලද ආසියානු වීරයන් 20 දෙනා අතර ඇය ද වූවාය.


2002 දී ඈ Bapi:The Love of My Life නමින් ‍පොතක් එළිදැක්වූවාය. එහි ඇත්තේ ඇගේ පියාණන් වන රවි සංකර්ගේ ජීවිත කතාවයි. සිය ස්ථිර වාසස්ථානය ලෙස ඇය තෝරාගෙන ඇත්තේ එක්සත් රාජධානියයි. සිය සැමියා වන බ්‍රිතාන්‍ය සංගීත අධ්‍යක්ෂවරයකු වන ජෝ රයිට් හා එකම පුතු Anoushka-Shankar4වන සුබින් සංකර් රයිට් සමග ඈ එක්සත් රාජධානියේ දිවි ගෙවයි.

සියල්ල එසේවුවත් ඇගෙන් නිරතුරු දිස්වන්නේ හුදෙකලා ගැහැනියකගේ පැතිකඩකි. බොහෝ සිතාරයකින් නැගෙන සංගීත මාධූර්යයක් තරම් සුන්දර අනුෂ්කා බොහෝ මාධ්‍යයන් දකින්නේ සුන්දර භාරත දේශයට පිවිසෙන්නට බටහිර කලාකරුවන්ට දොර හැර දෙන අපූරු සංකේතයක් ලෙසය. බටහිර ලෝකය තුළ ඇගෙන් සංකේතවත් වන්නේ ඇගේ පියා ඇතුළු සියලු කලාකරුවන් නිර්මාණය කළ සුන්දර ඉන්දියාවමය.


මිනිස් ආධ්‍යාත්මයට ඉන්දීය සුවඳ කැටිකොට බටහිර ජාතීන්ට ඉදිරිපත් කරන්නට ඇය තරම් සමත් වූ වෙනත් අයකු නැති තරම් බැව් බොහෝ දෙනෙකුගේ පිළිගැනීමය. ඒ අන්කිසිවක් නිසා නොව සිය පියාගෙන් ඇය ලද උරුමයයි.




Wednesday, December 12, 2018

මගේ සූර්ය විදුලිබල පද්ධතිය - My Solar Power Electricity System



මේ දවස්වල සූර්ය බල ශක්තිය ගැන කවුරුත් කතා කරන නිසා යම් ප්‍රමාණයකින් විදුලි බිල අඩු කර ගැනීමටත්, හදිසි විදුලි බල ඇණහිටීමකදී අඳුරේ සිටීමෙන් වැලකී සිටින්නටත් හිතලා මමත් කුඩා පරිමාණයෙන් සූර්ය විදුලි බල පද්ධතියක් හදාගන්න කල්පනා කළේ සෑහෙන කාලෙකට කලින්. කොහොම හරි සුළුවෙන් වුනත් මේ වැඩේට යම්කිසි මුදලක් වැය වෙන නිසා වැඩේ පස්සට දම දමා හිටියා. කොහොම හරි දැනට අවුරුද්දකට විතර කලින් මම මෙහෙම එකක් නිවසේ ස්ථාපිත කළා. අන්තර්ජාලයට පින් සිද්ධ වෙන්න තමයි මේ සම්බන්ධව දැනුම ලබා ගත්තේ. ඉතිං මේ වැඩේ යම් සාර්ථකත්වයක් පෙන්නුම් කරන නිසා මමත් හිතුවා සද්ද නැතිව ඉන්නවාට වඩා මගේ කතාවත් බ්ලොග් එකට දාන්න.

මම මේ සඳහා වෝල්ට් 12 - වොට් 100 සූර්ය පැනලයක්, ඇම්පියර් 30 සූර්ය ආරෝපණ පාලකයක් (solar charge controller) මිලට ගත්තා.







ඇම්පියර් 30 ක එකක් ගත්තේ ඉදිරියේ මේ පද්ධතිය වැඩිදියුණු කරන බලාපොරොත්තුව තියෙන නිසා. ඒ වගේම පාවිච්චි කළ කාර් බැටරියකුත් ගත්තා. ඉන්වර්ටර් මිලදී ගැනීමෙදි තමයි ගැටලුවක් ආවේ. මොකද අඩු මුදලට තියෙන්නේ Modified Sine wave ඉන්වර්ටර්. නමුත් ඒවා ඇතැම් විදුලි උපකරණවලට අහිතකරයි. ඒත් Pure Sine wave ඒවා ගණන් වැඩියි. මිලට ගන්න අමාරුයි. කොහොම වුනත් එකවර වැඩි වියදමක් දරන්න බැරි නිසා ඉවත දමා තිබුණු UPS එකක් යාළුවෙකුගෙන් ඉල්ලා ගත්තා. මේකත් Modified Sine wave තමයි. මෙය ඉවත් දමා තිබුණේ බැටරි ආරෝපණ වන කොටස වැඩ නොකළ නිසා. (මෙහි ආරෝපණය නොවීමේ ගැටලුව මම පසුව විසඳාගත්තා. දැන් මෙයින් ඇම්පියර් 15 ක විතර බැටරියක් ආරෝපණය කරගන්න පුළුවන්. නමුත් මම සූර්ය කෝෂයෙන් තමයි මගේ බැටරිය ආරෝපණය කරන්නේ). මම බැටරිය ආරෝපණය කරන්නේ සූර්ය පැනලයෙන් නිසා මට ඒක ගැටලුවක් වුණේ නැහැ. මට මුලින්ම අවශ්‍ය වුණේ නිවසේ විදුලිය දැල්වීම පමණයි. ඒ වැඩේට මේක ඇති. මේක Prolink 1200S කියන එක. මෙයින් වොට් 800 – 900 ක විතර බලයක් ලබාගන්න පුළුවන්. මම මේක ටිකක් වෙනස් කළා. ඒ කියන්නේ බැටරි සම්බන්ධතා සඳහා ගේජ් 6 විතර අලුත් වයර් දාලා කූලින් ෆෑන් එකකුත් සවි කළා.




කාර් බැටරිය ඇම්පියර් 65 එකක්. සූර්ය පැනලයෙන් ඇම්පියර් 8 ක් විතර එනවා. අපතේ යාම අයින් කළොත් ඇම්පියර් 6ක් විතර ගන්න පුළුවන්. හොඳින් හිරු එලිය තිබුණොත් බැටරිය හොඳ මට්ටමකට ආරෝපණය කරගන්න පුළුවන්. (පස්සේ මට තව ඇම්පියර් 45 ක හොඳ තත්වයේ බැටරියකුත් ලැබුණා. හැබැයි ඒක ආරෝපණය කරන්න මේ සෝලා පැනල් එක විතරක් මදි. තව එකක් දාන්න වෙනවා.)

මේ යූපීඑස් එකෙන් දවසකට පැය 3 ක් විතර ගෙදර විදුලිය දල්වා තියන්න පුළුවන්. සාමාන්‍යයෙන් මගේ නිවසේ රාත්‍රියට විදුලි බල්බ 8 -9 ක් විතර නිතරම දැල්වෙනවා. වරින් වර තව 3 -4 ක දැල්වෙනවා. මේ ප්‍රමාණය පැය 3ක් පමණ දල්වා තියන්න මෙයින් නිපදවෙන විදුලියට පුළුවන්. මෙය එක දිගට මේ ආකාරයෙන් වැඩ කරනවා නම් විදුලි බිලෙන් යම්කිසි ප්‍රමාණයක් අඩු වෙන බව පැහැදිලිව ම පෙනෙනවා.


මේ තියෙන්නේ පාලක පුවරුව. 


මෙය මැනුවල් මෙන්ම ස්වයංක්‍රීය කියන ක්‍රම දෙකින්ම ක්‍රියා කරන ආකාරයට සකස්කොට තිබෙනවා. ඒ කියන්නේ හදිසි විදුලි ඇණ හිටීමකදී ස්වයංක්‍රීයව නිවසේ විදුලි බල්බ දැල්වෙන ආකාරයට. මේ සඳහා මම DPDT Relay Switch එකක් සවි කළා. එයින් පුළුවන් මේ ස්වයංක්‍රීය ක්‍රියාව පහසුවෙන් ඇති කරගන්න.


මෙතනට තමයි DPDT Relay Switch එක සවි කළේ.




DPDT Relay Switch






Monday, November 19, 2018

ඉලෙක්ට්‍රික් දුම් කබලක් සාදා ගනිමු - Electric Incense Burner DIY



දුම් කබලක් කියන්නේ මොකක්ද කියලා කවුරුත් දන්නවා. ගෙවල් දොරවල් සුවඳවත් වෙන්න විවිධ සුවඳ වර්ග පුළුස්සන්න යොදා ගන්නා තැටිය තමයි මේක. මේකේ දුම් අල්ලන වැඩේ ටිකක් කරදරයි. ඒ මට පෞද්ගලිකව හිතෙන විදිය. ඒ කියන්නේ පොල් කටු කඩලා, ඒවා තැටියට දාලා, භූමිතෙල් වත්කරලා පොල් කටු ගිනි අඟුරු සාදා ගන්න ඕන. ඉන් පස්සේ අර සුවඳ කුඩු මේ ගිනි අඟුරු උඩට දාන්න ඕන. එතකොට තමයි ඒවා පිච්චිලා සුවඳ හමන්න පටන් ගන්නේ. මේක ටිකක් කම්මැළි වැඩක් නිසා ඉලෙක්ට්‍රික් දුම් කබලක් මිලට ගන්න හිතුවා. ඒක ටිකක් ගණන් වැඩියි. 


මිලදී ගැනීමට ඇති ඉලෙක්ට්‍රික් දුම් කබල්


පස්සේ මම හිතුවා එකක් හදලා බලන්න. අන්තර්ජාලයේ මේ ගැන විස්තර හොයලා බැලුවා. ඒවායේ විවිධ උපදෙස් දීලා තිබුණා. ඒ උපදෙස් අතරේ මම හොයා ගත්ත හොඳම දේ තමයි හොට් ප්ලේට් එකක ගිනියම් වෙන දඟරයක් වැනි දෙයක් මතට මේ සුවඳ කුඩු දාලා පුච්චන එක. ඒත් හොට් ප්ලේට් එකකට යන විදුලිය අධිකයි. බැටරි කරන්ට් එකක්, එහෙමත් නැත්නම් සුළු විදුලි බලයකින් මේ වැඩේ කර ගන්න පුළුවන් නම් වැඩේ ලාබයි. මෙහෙම ඉන්න කොට තමයි මට නයික්‍රොම් කියන ලෝහය ගැන අහන්න ලැබුණේ. මේකටම නික්‍රොම් කියලත් කියනවා. මේ ලෝහයෙන් කුඩා දඟරයක්, නැත්නම් සූත්‍රිකාවක් සාදා ගත්තොත් ඒක සුළු විදුලි ධාරාවකින් ගිනියම් කරන්න පුළුවන් බව අන්තර්ජාලයේ කිහිප තැනක තිබුණා. ඉතින් මම මේ ලෝහය වෙළෙඳසැල් කීපයක බැලුවත් හොය ගන්න බැරි වුණා. අන්තිමට ඊබේ එකෙන් ඩොලර් ශත 97 කට එයින් මීටර් කිහිපයක් ගෙන්නා ගත්තා.




එයින් මම පොඩි ආදර්ශ දඟරයක් සාදා බැලුවා. වැඩේ සාර්ථකයි. මම මේ දාලා තියෙන්නේ ඒ ආදර්ශය ගැන විස්තරයක්. මේ විදියට තවත් වැඩිදියුණු කරලා, පෙනුම අලංකාර කරලා ඕන කෙනෙකුට ඉලෙක්ට්‍රික් දුම් කබලක් සාදා ගන්න පුළුවන්.








සුවඳ දුම් දැවීම සඳහා තැටිය විදියට ගත්තේ මුට්ටියකින් කපා ගත් කොටසක්. මේ සඳහා ලෝහ තැටියක් භාවිත කරන්නට නොහැක්කේ මෙය විදුලිය සපයන නිසා පරිපථය ලුහුවත් වන නිසයි. මේ මැටි තැටියේ සිදුරු දෙකක් විද ඇණ මුරිච්චි යොදා නික්‍රොම් දඟරය සවි කර ගත යුතු වෙනවා. අධික ලෙස රත්වන නිසා ඊයම්වලින් පෑස්සිය නොහැකියි. නයික්‍රොම් දඟරයේ දිග සහ ලබා දෙන වෝල්ටීයතාව අනුව කොයි තරම් උෂ්ණත්වයක් ලබා ගත හැකිද කියා සොයා බැලිය හැකි ක්‍රමයක් තිබෙනවා. එවැනි වෙබ් අඩවියකට මෙතැන ක්ලික් කිරීමෙන් පිවිසෙන්නට පුළුවන්.

මා මෙයට බලය ලබාදීම සඳහා භාවිත කළේ පැරණි යූපීඑස් ට්‍රාන්ස්ෆෝමරයක්. එයින් වෝල්ට් 12 කට වඩා බලයක් ලබා ගන්න පුළුවන්. 

මෙවැනි දුම් කබලක එක් අවාසියක් තිබෙනවා. එය තමයි අපට මෙය රැගෙන යා හැක්කේ වයරයේ දිග ඇති සීමාවට පමණක් වීම. මේ සඳහා විසඳුමක් විදියට අපට බැටරි බලය යොදා ගන්න පුළුවන්. මේ සඳහා හොඳම බැටරි වර්ගය තමයි 18650. මේ එක් බැටරියකින් වෝල්ට් 3.6ක් ලබා ගන්න පුළුවන්. ධාරාව නම් වෙනස් විය හැකියි. මේ බැටරි  4 ක් ශ්‍රේණිගත ආකාරයට සම්බන්ධ කරගැනීමෙන් අවම වශයෙන් වෝල්ට් 14.4 ක් ලබා ගත හැකියි. මේවා අලුතින්ම මිලට ගන්නවා නම් ටිකක් වියදම් වැඩියි. නමුත් පිටකොටුවේ පළමුවැනි හරස් වීදියේ පරණ ලැප්ටොප් බැටරි විකුණන්නට දමා තිබෙන තැනකින් රුපියල් 500 කට වැනි මුදලකට මෙවැනි බැටරි 6ක් පමණ මිලට ගන්න පුළුවන්. මේ බොහෝ ඒවා හොඳ තත්වයෙන් තිබෙන බැටරි. කාලයක් පාවිච්චි කරන්න පුළුවන්. මේවා දුම් කබලේ පීවීසී රාමුව වටේට පහසුවෙන් සවි කරගත හැකියි. යූපීඑස් ට්‍රාන්ස්ෆෝමරයකින් මෙය ආරෝපණය කරගත හැකි පරිපථයක් සාදා ගන්න පුළුවන්. 


මේ සියල්ල සාදා අවසන් වූ පසු දඟරය වැසෙන සේ සුවඳ දුම් කුඩු දමා විදුලියට හෝ බැටරියට සම්බන්ධ කළ යුතුයි. එවිට දඟරය ගිනියම් වී සුවඳ දුම් කුඩු ගිනි ගන්නවා. එවිට සුවඳ පැතිරෙන්න පටන්න ගන්නවා. පොල්කටු කඩලා ගිනි තියලා දුම් පත්තු කරනවාට වඩා මේ වැඩේ පහසුයි. 


Saturday, November 17, 2018

පාර්ලිමේන්තු වලි හෙවත් පාර්ලිමන්ට් ජෝක්ස් - Fights in Parliaments from Around the World

පාර්ලිමේන්තුවේ වලි දාගන්නේ මේ උතුම් වූ සිරි ලංකාවේ විතරක්ද? නැත මිත්‍රවරුණි. ගෞරවනීය පුරවැසියනි, ලෝකයේ දියුණු යැයි කියා ගන්නා හැම රටකම වාගේ පාර්ලිමේන්තුවේ වලි දාගෙන තිබේ. මේවා ශාස්ත්‍රීය ලෙස හඳුන්වන් ලබන්නේ ව්‍යවස්ථාදායක ප්‍රචණ්ඩත්වය හෙවත් Legislative violence කියාය. විකිපීඩියා එකේ මේවා ගැන කියා තිබෙන දේවල් මෙතැනින් ගිහින් බලාගන්නට පුළුවන්ය.  කොහොමත් වලි දා ගැනීම හොඳ නැත. පාර්ලිමේන්තුවේ වලි නම් කොහොමත්ම හොඳ නැත. අප හොඳ නැත කීවාට මේ මඩුවට රිංගන සියල්ලෝ බලු රැලක් සේ වලි දාගන්නෝය. වලි දාගන්නා එකේ සීමාවක් ද නැතිය. එහෙව් එකේ අපි ඒවා ටිකක් බැලුවා කියා ඇස් ගෙවෙන්නේ නැත. ප්‍රජාතන්තුවාදය, ජනතා පරමාධිපත්‍යය වැනි බර වචනවලින් කියවෙන දේවල්වල ද ගෙවෙන්න දෙයක්  ඉතිරි වී නැත. ඒ නිසා අපි පාර්ලිමේන්තු වලි හෙවත් පාර්ලිමන්ට් ජෝක්ස් ටිකක් ඔන්න ඔහේ බලමු.



මේ අපේ ලංකාවේ කට්ටිය




ලොව වටා පාර්ලිමේන්තු වලි




යුක්රේනය



හොංකොං


සෝමාලියාව


බොලීවියාව


තුර්කිය


දකුණු කොරියාව


තායිපේ


ජපානය

Sunday, November 11, 2018

ගුගල් සේවකයන්ගේ උද්ඝෝෂණය සහ තවත් ගූගල් කතා - Google Protest and other Stories

ගූගල් සමාගම සඳහන් කරන ආකාරයට එයට ලොව පුරා පූර්ණ කාලීන සේවකයන් සහ කොන්ත්‍රාත්තු පදනම යටතේ බඳවා ගත් සේවකයන් 94,372 ක් ක් ඉන්නවා. මේ සංඛ්‍යාව අතුරින් විසි දහසකට අධික සංඛ්‍යාවක්, එනම් මුළු සමාගමෙන් සියයට 20 කට අධික පිරිසක් මේ නොවැම්බර් 1 වැනිදා උද්ඝෝෂණයක නිරත වුණා. ඒ එහි සේවය කළ ජ්‍යෙෂ්ඨ නිලධාරියකු වූ ඇන්ඩි රූබින් ට එරෙහිව නිව්යෝර්ක් ටයිම්ස් පුවත්පත මගින් පළ කොට තිබූ ආන්දෝලනාත්මක ලිපියක් නිසයි. ඇන්ඩි රූබින් කියන්නේ එසේ මෙසේ පුද්ගලයකු නොව ඇන්ඩ්‍රොයිඩ් මෙහෙයුම් පද්ධතියේ නිර්මාතෘවරයායි. ඇන්ඩ්‍රොයිඩ් මෙහෙයුම් පද්ධතිය යනු කුමක්දැයි නොදන්නා කිසිවකු නොමැති වුවත්, නොදන්නා කෙනෙක් අහම්බෙන් හෝ සිටිනවා නම් ඔහුගේ හෝ ඇයගේ දැන ගැනීම පිණිස සඳහන් කරන්නේ ඇන්ඩ්‍රොයිඩ් යනු ඔබත් මමත් භාවිත කරන ස්මාර්ට් ජංගම දුරකතන බොහොමයක (ඇපල් හැරුණු විට) ක්‍රියාත්මක වන මෙහෙයුම් පද්ධතිය කියායි. එතරම් එසේ මෙසේ නොවන කෙනා දැන් ගූගල් සමාගමේ නැතත්, ඔහු ඉන්නා කාලයේ එක්තරා කාන්තාවක් සමග පැවැත්වූ වැරදි ලිංගික ඇසුරක් අතට අසුවීමක් ගැනයි මේ ලිපිය පළකොට තිබුණේ. මේ වරද ගූගල් සමාගමට අසු වූ නිසා ඔහුගේ පස්සට පයින් ගසා එළවනවා වෙනුවට ඔහුට ඇමරිකානු ඩොලර් මිලියන 90 ක් ලබා දී ඔහුව ඇගයීමකට ද ලක්කොට තවත් පහසුකම් ද ලබා දී ඔහු විශ්‍රාම ගන්වනු ලැබුවා. මේ සියල්ල නිව්යෝර්ක් ටයිම්ස් පුවත්පතෙන් දැනගත් පසු ගූගල් සේවකයන්ට යකා නැග්ගේ මේ නිසා ගූගල් සමාගමට මහත් අපහාසයක් සිදුවූ නිසයි.  ලෝකයට ආදර්ශයක් විය යුතු සමාගමක් පිළිබඳ මෙවැනි පුවත් පළවීම තමන්ට දරාගන්නට නොහැකි බවයි සේවකයන් පවසන්නේ. ඒ නිසා මෙසේ උද්ඝෝෂණය කළ බව දැනගන්නට ලැබෙනවා.

ඇන්ඩි රූබින්

කොහොම වුනත් මේ හදන්නේ මේ උද්ඝෝෂණය ගැනවත් ලිංගික අපයෝජනය ගැනවත් කතා කරන්න නෙවෙයි. තමන්ගේ සමාගමට අපහාසයක් වීම නිසා මේතරම් සේවකයන් පිරිසක් පාරට බහින්න තරම් ඔවුන්ට වටින ගූගල් සමාගම ගැන විස්තර ටිකක් කතා කරන්නයි.

වැරදීමකින් නම වැටුණු ගූගල්


ඇමරිකා එක්සත් ජනපදයේ කැලිෆෝර්නියා ප්‍රාන්තයේ මවුන්ට් වීව් හි පිහිටා ඇති ගූගල් සමාගමේ ප්‍රධාන කාර්යාලය පිහිටුවනු ලැබුවේ 1998 වර්ෂයේ දියි. ඒ ලැරී පේජ් සහ සර්ජි බ්‍රින් විසින්. ලෝකයේ පවතින ජනප්‍රියතම අන්තර්ජාල සෙවුම් යන්ත්‍රය කියන්නේ ගූගල්. මෙයට පෙරත් පසුවත් බොහෝ සෙවුම් යන්ත්‍ර බිහිවුවත්, ඒවාට ගූගල් තරම් කාර්යක්ෂම වෙන්නට නොහැකි වෙලා තියෙනවා.

ගූගල් සමාගමට මුලින්ම ලබා දෙන්නට යෝජනා වී තිබුණු නම වුණේ බැක්රබ්’.  නමුත් පසුව ගූගල්නමින් වෙනස් කරනු ලැබුවා. එය සිදුවුණේ වැරදීමකින්. ඔවුන්ට අවශ්‍ය වූයේ යම් සෙවුමක් කළ විට ඒ සඳහා කෝටි ගණන් ප්‍රතිඵල ලැබෙන බව පෙන්වන නමක් යොදන්නටයි. ඔවුන් මේ සඳහා තෝරා ගත්තේ ගූගොල්’ (googol) යන්නයි. ගූගොල් යනු එකයි බිංදු සියයක සංඛ්‍යාවයි. නමුත් ඔවුන් අකුරු වරදවා ලියා තිබූ නිසා වෙබ් අඩවියේ පළවූයේ Google යන්නයි. වැරැද්ද නිවැරදි කරන්නට නොගිය ඔවුන් ඒ නම එසේම තියෙන්නට හැරියා. මෙය කෙතරම් ජනප්‍රිය වචනයක් වූවා ද කීවොත් යමක් සොයනවා යන අර්ථය ඇතිව ගූගල් කරන්නයන්න භාවිතයට පැමිණියා. අවසානයේ මෙය අලුත් ඉංග්‍රීසි වචනයක් ලෙස 2006 වසරේ දී ඔක්ස්ෆර්ඩ් ඉංග්‍රීසි ශබ්දකෝෂයට ද එකතු කෙරුණා.



ගූගල් සෙවුම් යන්ත්‍රය බිහිවන්නට පෙර ලෝකයේ තිබූ හොඳම සෙවුම් යන්ත්‍රය වූයේ යාහූ’. කෙසේ නමුත් ගූගල් සමාගම ආරම්භ වූ පසු යාහූසමාගමට යන එන මං නැති වුණා. කෙසේ නමුත් යාහූසමාගම මුල් සමයේ සිටියේ පුදුම ආඩම්බරයකින්. ගූගල් සමාගම ආරම්භ වූ කාලයේ යම් යම් ගැටලු නිසා එය විකුණා දමන්නට තීරණය කෙරුණා. ඔවුන් එය විකුණා දමන්නට තීරණය කරන ලද්දේ ඇමරිකානු ඩොලර් බිලයන 3 කට යාහූ සමාගමටයි. නමුත් ආඩම්බර යාහූ සමාගම එය ප්‍රතික්ෂේප කළා. නමුත් අද එහි වටිනාකම ඇමරිකානු ඩොලර් බිලයන 400 කටත් අධිකයි. මේ ගැන ලෝභ සිතුණු යාහූ සමාගම එය මිලදී ගන්නට කැමැත්ත පළ කළත් අළුතින්ම ආඩම්බර වී ඇති ගූගල් සමාගම එය පයිසෙකටවත් ගණන් නොගෙන ප්‍රතික්ෂේප කළා.

අහසේ ගෑවෙන වැටුප්


ගූගල් කියන්නේ ලෝකයේ අතිශය ජනප්‍රිය මෙන්ම දැවැන්ත සමාගමක් නිසා මෙහි සේවකයන්ගේ වැටුප් ද ඒ තරමටම ආකර්ෂණීයයි. අහසේ ගෑවෙන තරම් ඉහළයි. දැනගන්නට ලැබෙන පරිදි වසරකට ගූගල් සමාගම එක සේවකයකුට ගෙවනු ලබන වැටුපේ සාමාන්‍යය ඇමරිකානු ඩොලර් 96,000 ක් හෙවත් රුපියල් එක්කෝටි හැටපන් ලක්ෂයක් පමණ වෙනවා. ප්‍රසාද දීමනාවල සාමාන්‍යය ඇමරිකානු ඩොලර් 25,000 ක් හෙවත් රුපියල් හතලිස් තුන් ලක්ෂයක් පමණ වෙනවා. මෙය තවත් විස්තර කළොත් ජ්‍යෙෂ්ඨ මෘදුකාංග වර්ධක නිලධාරියකු සඳහා වාර්ෂික වැටුප ඇමරිකානු ඩොලර් 149,000 ක් හෙවත් රුපියල් දෙකෝටි පනස් හය ලක්ෂයක් පමණ වෙනවා. ප්‍රධාන ස්ථිර සේවකයන්ගෙන් අඩුම වාර්ෂික වැටුපක් ගෙවන්නේ තොරතුරු තාක්ෂණ විශ්ලේෂකයන්ටයි. එය ඇමරිකානු ඩොලර් 65,000ක් හෙවත් එක්කෝටි එකලොස් ලක්ෂයක් පමණ වෙනවා.

මරණින් මතු සැපවත් ජීවිතයක්
ගූගල් සමාගමේ සේවයට යාමෙන් තමාගේ මරණයෙන් පසු තමාට නැතත් තමාගේ බිරිඳට හෝ සැමියාට හෝ සැපවත් ජීවිතයක් ලැබෙන බව ඒකාන්තයි. මිය ගිය සේවකයාගේ වැටුපෙන් හරි අඩක් බිරිඳට හෝ සැමියාට වසර 10 ක් යන තුරු හිමි වෙනවා. මීට අමතරව සැමියා හෝ බිරිඳ වෙනුවෙන් තවත් බොහෝ සුබසාධන කටයුතු ගූගල් සමාගම විසින් හඳුන්වා දී තිබෙනවා.

ආඩම්බර සේවකයෝ

ගූගල් සමාගමේ රස්සාවට යන්න තියෙනවා නම් ඉතින් ඒ ගැන කවර කතා ද කියලා බොහෝ දෙනෙක් කියනවා. මෙහෙම කියන්නේ ගූගල් සේවකයන් ගෙවන නිදහස් ජීවිතය ගැන අන්තර්ජාලයේ බොහෝ තැන්වල සඳහන් වෙලා තියෙන තොරතුරු නිසයි. මේ ගැන හොයා බැලුවාම මේ වගේ විස්තර ටිකක් කෙටියෙන් සඳහන් කරන්නට පුළුවන්. ගූගල් සමාගම ගැන කියවෙන ලොකුම ප්‍රවෘත්තිය තමයි එහි සේවකයන්ට ඕනෑම වෙලාවක ඕනෑම කෑමක් නොමිලේ භුක්ති විඳින්ට පුළුවන්ය කියන එක. ඔවුන්ට කෑම ගන්න තියෙන ක්‍රම අනන්තයි අප්‍රමාණයි කියා කියන්න පුළුවන්. ලොකු වැටුපක් ගෙවන අතරේ කෑම බීම නොමිලේ දෙනවා කියන එක ලේසි පාසු වැඩක් නෙවෙයි. වැඩ කරමින් ඉන්න අතරේ ඉවුම් පිහුම් පංතිවලට සහභාගී වෙන්නටත් මෙහි සේවකයන්ට අවස්ථාව තිබෙනවා. ඒ වගේම කාර්යාලය තුළම ඇති ව්‍යායාම ශාලා, සම්බාහන මධ්‍යස්ථාන, කම්මැලි වෙලාවට කරන්න තියෙන විනෝදාත්මක වැඩ, අමතර අධ්‍යාපන කටයුතු සඳහා ගෙවීම් වැනි අතෝරක් නැති පහසුකම් එක්ක හොඳ වැටුපකුත් ලැබෙද්දි ගූගල් සේවකයන් ආඩම්බර නොවී වෙන මක් කරන්නද?

ඇස් කඩාගෙන යන කාර්යාල






ගූගල් සමාගම ගැන තවත් ප්‍රසිද්ධ කතාවක් වන්නේ අමුතු විලාසිතා, හැඩතලවලට සැලසුම් කොට කාර්යාල ගැනයි. මේවා දකින විට ඇත්තටම මෙහෙම ඒවාත් තියෙනවාද කියා සිතුනත් කියන්න තියෙන්නේ මෙහෙම ඒවා තියෙන බවයි. මේ කාර්යාල සාම්ප්‍රදායික ඒවාට වඩා හාත්පසින්ම වෙනස්. සේවකයන්ට තමන්ගේ වැඩකටයුතු නිදහසේ කරගෙන යන්නට, මානසික නිරවුල් බවක් ඇති කරගන්නට හැකි ආකාරයට සකස් කොට තිබෙනවා. ලොව පුරා ඇති විවිධ ගූගල් කාර්යාල විවිධ හැඩතලවලින් සකස් කොට තිබෙනවා. ඇතැම් ඒවා සකස් කොට ඇත්තේ හාත්පස ගහ කොල ඇති ආකාරයටයි. ඇතැම් ඒවාට කුඩා උද්‍යාන පවා ඇතුළත් කොට තිබෙනවා. එල්ලී පැද්දෙන ආසන, යහන් ආදී විවිධ දේවල් මේ කාර්යාල තුළ දකින්නට පුළුවන්. අනෙක ලොව පුරා ඇති සියලුම කාර්යාල ස්ථාන ගත කොට ඇත්තේ ඉතා මනස්කාන්ත දර්ශනයක් නෙතට දිස්වන ආකාරයටයි.

සොබා දහමට ආදරය කිරීම


ගූගල් සමාගම සොබා දහම රැක ගන්නට දක්වන්නේ විශාල දායකත්වයක්. ලෝකයට විෂ වායු මුදා හැරීම, ශබ්දය ආදී දේවල්වලින් සිදුවන හානි වලකාගන්නට ඔවුන් ගත හැකි සෑම උත්සාහයක්ම ගන්නවා. මේ අතුරින් විශේෂයෙන් සඳහන් කළ හැකි කාරණයක් වන්නේ ඔවුන්ගේ කැලිෆෝර්නියා කාර්යාලයේ තණකොල කැපීමයි. ඔවුන් මේ සඳහා යන්ත්‍ර යොදා ගන්නේ නැහැ. ඒ වෙනුවට ඔවුන් සෑම අවස්ථාවකදීම එළුවන් භාවිත කරනවා.

ගූගල් ගුවන් යානා


ගූගල් සමාගමේ නිර්මාතෘවරුන් වන ලැරී සහ සර්ජි ලෝකයේ සිටින ධනවතුන් අතර තෙවැනි සහ සිව්වැනි ස්ථානවල පසු වෙනවා. ඔවුන්ගේ වත්කම් 2018 වසරේ දී ඇමරිකානු ඩොලර් බිලියන 47 කටත් අධිකයි. සාමාන්‍යයෙන් ප්‍රබල සමාගම්වල හිමිකරුවන් අධික වටිනාකම්වලන් යුක්ත වාහන මිලට ගන්නා අතර ගූගල් හිමිකරුවන් වාහනවලට අමතරව පෞද්ගලික ගුවන් යානා ද මිලට ගෙන තිබෙනවා. මේ පෞද්ගලික ගුවන් යානා නවත්වන්නට යොදා ගන්නේ නාසා ආයතනයට අයත් ගුවන් තොටුපලේ බව සඳහන් වෙනවා. මේවා ගොඩබෑම සඳහා සකස් කොට ඇති ධාවන පථවලට වෙනත් යානා ගොඩ බෑම සඳහා අවසර ලබා දෙන්නේ නැහැ.

දෘඩ තැටි කිහිපයකින් ඇරඹුණු ගමන

අද කාලේ අලුතින්ම මිලට ගන්නා පරිගණකයක දෘඩ තැටිය අවම වශයෙන් ගිගා බයිට් 500ක් වත් වෙනවා. ඇතැම් ඒවා ටෙරා බයිට් 1 ක් පමණ වෙනවා. ඊට වඩා ධාරිතාව තියෙන ඒවා ද තිබෙනවා. නමුත් 1998 වසරේ දී ගූගල් සමාගම ආරම්භ කරද්දී දත්ත ගබඩා කිරීම සඳහා යොදා ගෙන ඇත්තේ ගිගා බයිට් 4 දෘඩ තැටි 10ක් බව දැනගන්නට ලැබෙනවා. නමුත් අද ඔවුන්ගේ දත්ත ගබඩා ධාරිතාව ගිගා බයිට් මිලියන 100කට අධිකයි. මුල්  සමයේ යම් සෙවුමක් කළ විට තත්පරයක් තුළ සකසා ප්‍රතිඵල ලෙස ලබා දිය හැකිව තිබුණේ පිටු 35 - 50 ක සංඛ්‍යාවක් පමණයි. නමුත් වර්තමානයේ දී තත්පරයක දී සැකසිය හැකි පිටු සංඛ්‍යාව මිලියන ගණනකටත් අධිකයි.