පුවත්පත්වලට ලිපි ලිවීම මාගේ විනෝදාංශයකි. මා ලියන ලිපි මගින් පාඨකයින් දැනුමක් ලබමින් ජීවිතයට යමක් එකතු කරගන්නේ නම් එය මාගේ සතුටකි. වේගයෙන් ඉදිරියට ඇදෙන තාක්ෂණික ලෝකයේ පුවත්පත් කියවන්නට තරම් විවේකයක් නොමැති අයවලුන් බොහෝය. තවකෙකු පුවත්පත් කියවන්නට කැමති නැත. අන්තර්ජාලයේ ද සිංහල බසින් සියලුම පුවත්පත් ඇති බැවින් තාක්ෂණයට ප්‍රිය කරන්නෝ පරිගණකයෙක් හෝ සිය ජංගම දුරකථනයෙන් ඒවා කියවති. එබැවින් මා ලියන ලිපි එවැනි පාඨක පිරිස් වෙත යොමු කරන්නට අදහස් කළ නිසා මෙවැනි බ්ලොග් අඩවියක් ගොඩනගන්නට සිතුවෙමි. මාගේ උත්සාහය කෙතරම් නම් සාර්ථකදැයි තීරණය වන්නේ ඔබගෙන් ලැබෙන ප්‍රතිචාර මතය. එබැවින් ඔබ මේ පිළිබඳ සිතන පතන දෑ මවෙත දන්වන්නට උනන්දුවන්නේ නම් එය මාගේ සතුටයි. ඔබ සැමට තෙරුවන් සරණයි!

Monday, November 19, 2018

ඉලෙක්ට්‍රික් දුම් කබලක් සාදා ගනිමු - Electric Incense Burner DIY



දුම් කබලක් කියන්නේ මොකක්ද කියලා කවුරුත් දන්නවා. ගෙවල් දොරවල් සුවඳවත් වෙන්න විවිධ සුවඳ වර්ග පුළුස්සන්න යොදා ගන්නා තැටිය තමයි මේක. මේකේ දුම් අල්ලන වැඩේ ටිකක් කරදරයි. ඒ මට පෞද්ගලිකව හිතෙන විදිය. ඒ කියන්නේ පොල් කටු කඩලා, ඒවා තැටියට දාලා, භූමිතෙල් වත්කරලා පොල් කටු ගිනි අඟුරු සාදා ගන්න ඕන. ඉන් පස්සේ අර සුවඳ කුඩු මේ ගිනි අඟුරු උඩට දාන්න ඕන. එතකොට තමයි ඒවා පිච්චිලා සුවඳ හමන්න පටන් ගන්නේ. මේක ටිකක් කම්මැළි වැඩක් නිසා ඉලෙක්ට්‍රික් දුම් කබලක් මිලට ගන්න හිතුවා. ඒක ටිකක් ගණන් වැඩියි. 


මිලදී ගැනීමට ඇති ඉලෙක්ට්‍රික් දුම් කබල්


පස්සේ මම හිතුවා එකක් හදලා බලන්න. අන්තර්ජාලයේ මේ ගැන විස්තර හොයලා බැලුවා. ඒවායේ විවිධ උපදෙස් දීලා තිබුණා. ඒ උපදෙස් අතරේ මම හොයා ගත්ත හොඳම දේ තමයි හොට් ප්ලේට් එකක ගිනියම් වෙන දඟරයක් වැනි දෙයක් මතට මේ සුවඳ කුඩු දාලා පුච්චන එක. ඒත් හොට් ප්ලේට් එකකට යන විදුලිය අධිකයි. බැටරි කරන්ට් එකක්, එහෙමත් නැත්නම් සරල ධාරාවකින් ඇතිවෙන විදුලියෙන් මේ වැඩේ කර ගන්න පුළුවන් නම් වැඩේ ලාබයි. මෙහෙම ඉන්න කොට තමයි මට නයික්‍රොම් කියන ලෝහය ගැන අහන්න ලැබුණේ. නයික්‍රොම්වලින් දඟරයක් සාදා ගත්තොත් ඒක සරල ධාරාවකින් ගිනියම් කරන්න පුළුවන් බව අන්තර්ජාලයේ කිහිප තැනක තිබුණා. ඉතින් මම මේ ලෝහය වෙළෙඳසැල් කීපයක බැලුවත් හොය ගන්න බැරි වුණා. අන්තිමට ඊබේ එකෙන් ඩොලර් ශත 96 කට එයින් මීටර් කිහිපයක් ගෙන්නා ගත්තා.




එයින් මම පොඩි ආදර්ශ දඟරයක් සාදා බැලුවා. වැඩේ සාර්ථකයි. මම මේ දාලා තියෙන්නේ ඒ ආදර්ශය ගැන විස්තරයක්. මේ විදියට තවත් වැඩිදියුණු කරලා, පෙනුම අලංකාර කරලා ඕන කෙනෙකුට ඉලෙක්ට්‍රික් දුම් කබලක් සාදා ගන්න පුළුවන්.




රත් වෙන දඟරය සාදා ගත යුත්තේ අඟල් 6ක් පමණ දිග නයික්‍රොම් කම්බියකින්. එයට වඩා දිග වුණොත් වෝල්ට් 12 කින් එය ගිනියම් කරන්න අපහසුයි. මේ සඳහා අවශ්‍ය කරන වෝල්ට් 12කට ආසන්න විදුලිය මම ලබාගත්තේ 18650 වර්ගයේ බැටරි තුනක් ශ්‍රේණිගත විදියට සවි කරලා. මේ එක බැටරියක වෝල්ටීයතාව 3.7ක් පමණ වෙනවා. මේවා ආරෝපණය කළ විට වෝල්ට් 4කට තරමක් වැඩියි. එවිට බැටරි 3 කින් වෝල්ට් 12 ක් ලබා ගන්න පුළුවන්. මේ බැටරියක් අලුතින් ගන්නවා නම් රුපියල් 400ක් විතර වෙනවා. ඊබේ එකේ නම් ඊට වඩා අඩු ඒවා තියෙනවා. හැබැයි මම ගත්තේ පාවිච්චි කරපුවා. කොළඹ පිටකොටුවේ 1 වෙනි හරස් වීදියේ පරණ ලැප්ටොප් බැටරි විකුණන්න තියෙනවා. ඒවාට භාවිත කරලා තියෙන්නේ 18650 වර්ගයේ බැටරි. මේ පාවිච්චි කළ බැටරි 4ක් රුපියල් 300 කට විතර ගන්න පුළුවන්. මේ වැඩේට ඒ බැටරි ගැළපෙනවා. මේවා පාවිච්චි කළ ඒවා වුණාට හොදට ආරෝපණය අල්ලා ගන්න පුළුවන්. ඒ කියන්නේ මේ වැඩේට ඕන තරමට ඇති.




මුලින්ම නයික්‍රොම් කම්බියක් කපා ගෙන පෑනක් වගේ දෙයක ඔතලා දඟරය හදා ගන්න ඕන. මම මේ සඳහා ගත්තේ ඇන්ටෙනාවලට දාන බට කෑල්ලක්.  විදුලිය ලබා දෙන වයර් කෙළින්ම මේ දඟරයට සවි නොකළ යුතුයි. මොකද දඟරය ගිනියම් වූ විට වයර් ද උණු වී යන නිසා. දඟරය වෙනම ඇණයකට මුරිච්චිවලින් සම්බන්ධ කොට කොට වයරය ඒ ලෝහ කැබැල්ලට සවි කළ විට වයර් එක් උණු වෙන එක වළක්වා ගන්නට පුළුවන්.



මේ සියල්ල සාදා අවසන් වූ පසු දඟරය වැසෙන සේ සුවඳ දුම් කුඩු දමා බැටරි සම්බන්ධ කළ යුතුයි. එවිට දඟරය ගිනියම් වී සුවඳ දුම් කුඩු ගිනි ගන්නවා. එවිට සුවඳ පැතිරෙන්න පටන්න ගන්නවා. පොල්කටු කඩලා ගිනි තියලා දුම් පත්තු කරනවාට වඩා මේ වැඩේ පහසුයි. 



8 comments:

මේ ලිපිය හොඳද? ප්‍රයෝජනවත්ද? වැඩක් නැත්ද? විකාරයක් වගේ පේනවද?
ඔබට ඒ ගැන සිතෙන ඕනම අදහසක් මෙහි සටහන් කරන්න.
ඒ ගැන දෙවරක් නොසිතන්න