මංගල ප්‍රේමදාස නම් අසහාය හඩ අනුකරණ ශිල්පියා - Mangala Premadasa, the incomparable sound imitating Man

මංගල ප්‍රේමදාස පිළිබඳ අප දැන සිටියේ ඉතා කුඩා සමයේ සිට වුවද අන්තර්ජාලයේ ඔහු පිළිබඳ සොයා බලද්දී සොයාගත හැක්කේ එකම එක විස්තරයක් පමණි. ඒ ඇම්.ඩී. ගුණසේන සමාගම විසින් ප්‍රකාශයට පත් කරන ලද, ඔහු විසින් රචිත අකුරුවලින් සත්තු අඳිමු නම් ළමා කෘතිය පිළිබඳව පමණි. 

නමුත් ඔහු සැබවින්ම දක්ෂතාවය පෙන්වා ඇත්තේ ලේඛකයෙකු ලෙස නොව හඬ අනුකරණ ශිල්පියකු වශයෙනි. අපි කුඩා කාලයේ සිටම ඔහුගේ හඬ අනුකරණය කිරීම් දක්ෂතාවයන් දැක ඇත්තෙමු. දැනට වසර 40ක පමණ කාලයක් තිස්සේ හඬ අනුකරණයෙහි නියැළෙන ඔහුට විවිධ හඬ 600 කට අධික ප්‍රමාණයක් අනුකරණය කිරීමෙහි හැකියාව ඇති බව පැවසේ. ශ්‍රී ලංකා ගුවන් විදුලි සංස්ථාවේ ‘හඳ මාමා‘ ළමා වැඩසටහනෙහි පෙත්තප්පුගේ හඬ ඉදිරිපත් කළේ ඔහු බව බොහෝ දෙනෙක් නොදන්නවා විය හැකිය.

හඬ අනුකරණය පිළිබඳව අන්තර්ජාලය පිරික්සා බැලීමේදී බොහෝ ශිල්පීන් හමුවේ. ඔවුන් සහ මංගල ප්‍රේමදාස නම් ශිල්පියා අතර පැහැදිලි වෙනසක් දැකිය හැකිය. ලෝකයේ මෙබඳු බොහෝ ශිල්පීන් දක්ෂතාව පෙන්වන්නේ එකම කාණ්ඩයකට අයත් හඩ අනුකරණය කරන්නට පමණි. එනම්, එක්කෝ ඔවුන් අනුකරණය කරන්නේ වාහනවල හඬ පමණි. එක්කෝ යතුරු පැදි වර්ගවල හඬ පමණි. එක්කෝ පක්ෂීන්ගේ හඩ පමණි. නමුත් මංගල ප්‍රේමදාස නම් අපූරු ශිල්පියා අප අවට ඇසෙන ඕනෑම හඩක් අනුකරණය කොට පෙන්වීමෙහි අති දක්ෂයෙකි. කෙසේ වුවත් ඔහු පිළිබඳ එතරම් කතා කොට ඇති බවක් පෙනෙන්නේ නැත. අනුන්ගේ ගීත ගයා එක රැයින් ජනප්‍රිය වන පුද්ගලයන් පිළිබඳ වෙබ් පිටු බොහෝ ගණනක් තිබුණ ද, ඔහු පිළිබඳ ලියැවුණු එකදු වෙබ් පිටුවක් හෝ අන්තර්ජාලයේ දකින්නට ලැබෙන්නේ නැත. ඔහු සිය දක්ෂතා පෙන්වන යූටියුබ් වීඩියෝ කිහිපයක් නම් දැක ගත හැකිය.

මා මේ සටහන මුලින්ම ලිව්වේ 2016 වසරේ දීය. නැවත මා මෙය කියවන්නේ 2024 වසරේ ඔහු මිය ගිය බව දැනගත් මොහොතේය. 1952 දී උපත ලද ඔහු 2024 ජූලි 28 වැනිදා මෙලොවට සමු දුන්නේ ඔහුගේ හඬ පමණක් නොව ඔහු විසින් අනුකරණට කළ සියලු හඬ, නිහඬ කරමිනි. 

මංගල ප්‍රේමදාස කලා ශිල්පියා සිය දක්ෂතා ඉදිරිපත් කළ අවස්ථාවක්

ස්ලෝ මෝෂන් වීඩියෝ එකක් හැදුවා මමත්

නිකං ආසාවට වගේ මොබයිල් ෆෝන් එකෙන් මමත් ස්ලෝ මෝෂන් වීඩියෝ එකක් හැදුවා. බලන්න කොහොමද කියලා.

ජේසුස් වහන්සේගේ චරිතය නිරූපණය කරන නළුවන් අකල් මරණවලට පත්වනවාද? Does Portraying Jesus Foretell DEATH?

ජේසුස් වහන්සේගේ චරිතය සිනමා නිර්මාණ සඳහා ඉදිරිපත් කළ ලෝක ප්‍රකට නළුවෝ බොහෝ වෙති. අප රටේ ද නිෂ්පාදනය කළ ‛ක්‍රිස්තු චරිතය’ සිනමා නිර්මාණය සඳහා සුප්‍රකට නළු විජය කුමාරතුංගයන් රංගනයෙන් දායක වූවේය. කෙසේ නමුත් ඔහුට අත්වූවේ අකල් මරණයකි. ජේසුස් වහන්සේගේ චරිතය සඳහා රංගනයෙන් දායක වන ශිල්පීන් අකල් මරණයකට පත්වන අප රටේ ද කසුකුසුවක් ඇති වූ අතර ලෝකයේ බොාේ දෙනෙකු අතර ද එම මතය පවතින බැව් පෙනෙන්නට තිබේ. මෙයට හේතුව වශයෙන් බොහෝ දෙනෙක් පවසන්නේ බහුතර ලෝක වාසීන්ගේ ආගමික නායකයකු වන ජේසුස් වහන්සේගේ චරිතය ඉදිරිපත් කිරීම  ‛වස් වදින්නට’ හේතුවක් වන බවය. මෙය සැබවින්ම සිදුවන්නක්දැයි සොයා බැලීම වටින්නේය. මේ සඳහා ජේසුස් වහන්සේගේ චරිතය ඉදිරිපත් කළ සුප්‍රකට රංගන ශිල්පීන්ගේ ලැයිස්තුවක් ගෙන ඔවුන්ගේ ජීවිත පිළිබඳ සොයා බැලීමෙන් මෙය අවබෝධ කොට ගත හැකිය. 

ජේම්ස් කැවියසෙල් (උපත 1968) 

ඔහු ජේසුස් වහන්සේ චරිතය ඉදිරිපත් කළේ මෙල් ගිබ්සන්ගේ ‛පැෂන් ඔෆ් ද ක්‍රියිස්ට්’ නම් සිනමා නිර්මාණය සඳහා 2004 වසරේදීය. ඔහු තවමත් ජීවතුන් අතර සිටින මුත් එක් අවස්ථාවක පවසා සිටියේ මෙම චරිතය ඉදිරිපත් කිරීමෙන් පසු සිට රංගන ජීවිතය සහමුළින්ම පරිහානියට පත් වූ බවය. 

හෙන්රි ඉයන් කුසික් (උපත 1993) 

‛ගොස්පල් ඔෆ් ජෝන්’ සිනමා නිර්මාණය සඳහා 2003 වසරේදී ජේසුස් වහන්සේගේ චරිතය ඉදිරිපත් කළ ඔහු තවමත් ජීවත් වන්නේය. 

ක්‍රිස්ටියන් බේල් (උපත 1974) 

1999 වසරේදී ‛මේරි, මදර් ඔෆ් ජීසස්’ සඳහා ජේසුස් වහන්සේගේ චරිතය ඉදිරිපත් කළ මොහු තවමත් ජීවත් වන්නේය. 

ක්‍රිස් සැරන්ඩන් (උපත 1942) 

‛ද ඩේ ඔෆ් ක්‍රියිස්ට් ඩයිඩ්’ සඳහා 1980 දී රංගනයෙන් දායක වුණු  ඔහු තවමත් ජීවත් වන්නේය. 

රැල්ෆ් ෆියනස් (උපත 1962) 

2000 වසරේදී ‛ද මිරකල් මේකර්’ සිනමා පටයට ජේසුස් වහන්සේ චරිතය ඉදිරිපත් කළ මොහු තවමත් ජීවත් වෙයි. 

වික්ටර් ගාර්බර් (උපත 1949) 

1973 වසරේදී ‛ගෝඩ්ස්පෙල්’ චිත්‍රපටය සඳහා රංගනයෙන් දායක වුණු මොහු අකල් මරණයකට පත් වූයේ නැත. 

රොබර්ට් ටෝර්ටි (උපත 1961) 

‛ජීසස්’ නම් සංගීතමය චිත්‍රපටය සඳහා 2005 දී රංගනයෙන් දායක වුණු මොහු අකල් මරණයකට පත් වූයේ නැත. 

ටෙඩ් නීලි (උපත 1943) 

1973 වසරේදී ‛ජීසස් ක්‍රියිස්ට් සුපර්ස්ටාර්’ සඳහා රංගනයෙන් දායක වුව ද මොහු තවමත් හොඳින් ජීවත් වෙයි. 

හෙන්රි බයිරන් වෝනර් (උපත 1875 - විපත 1958) 

1927 වසරේදී ‛කිංග්ස් ඔෆ් ද කිංග්ස්’ චිත්‍රපටය සඳහා රංගනයෙන් දායක වුණු මොහු 1958 වසරේදී මිය යන විට 83 වැනි වියෙහි පසුවූයේය. එබැවින් එය අකල් මරණයක් ලෙස දැක්විය නොහැක. 

රොබට් පවල් (උපත 1944) 

1977 වසරේ නිෂ්පාදනය කළ ‛ජීසස් ඔෆ් නාසරෙත්’ සඳහා ජේසුස් වහන්සේගේ චරිතය නිරූපණය කළ මොහු අකල් මරණයකට පත් වූයේ නැත. 

මැක්ස් වොන් සිඩොව් (උපත 1929) 

1965 වසරේදී ‛ද ග්‍රේටස්ට් ස්ටෝරි එවර් ටෝල්ඩ්’ සඳහා රංගනයෙන් දායක වුණු මොහු දැනට 87 වැනි වියෙහි පසු වෙයි. 

ජෙෆ්රි හන්ටර් (උපත 1926 - විපත 1969) 

1961 වසරේදී නිෂ්පාදනය කෙරුණු ‛කිංග්ස් ඔෆ් ද කිංග්ස්’ සිනමා නිර්මාණය සඳහා ජේසුස් වහන්සේ චරිතය ඉදිරිපත් කළ මොහු 1969 වසරේදී මිය යන විට 42 වැනි වියෙහි පසුවූවේය. ඒ ඔහු ජේසුස් වහන්සේගේ චරිතය නිරූපණය කිරීමෙන් වසර 8 කට පසුය. ඔහු සැබවින්ම අකල් මරණයකට ලක් වූවෙක් යැයි සැළකිය හැකිය. 

දියෝගේ මොර්ගාඩෝ (උපත 1981) 

2013 වසරේ රූපවාහිනි කතා මාළාවක් වූ ‛ද බයිබල්’ සඳහා ද, 2014 දී ‛සන් ඔෆ් ගෝඩ්’ සිනමා නිර්මාණය සඳහා ද ජේසුස් වහන්සේගේ චරිතය නිරූපණය කළ මොහු දැනට 36 වැනි වියෙහි පසුවෙයි.