පුවත්පත්වලට ලිපි ලිවීම මාගේ විනෝදාංශයකි. මා ලියන ලිපි මගින් පාඨකයින් දැනුමක් ලබමින් ජීවිතයට යමක් එකතු කරගන්නේ නම් එය මාගේ සතුටකි. වේගයෙන් ඉදිරියට ඇදෙන තාක්ෂණික ලෝකයේ පුවත්පත් කියවන්නට තරම් විවේකයක් නොමැති අයවලුන් බොහෝය. තවකෙකු පුවත්පත් කියවන්නට කැමති නැත. අන්තර්ජාලයේ ද සිංහල බසින් සියලුම පුවත්පත් ඇති බැවින් තාක්ෂණයට ප්‍රිය කරන්නෝ පරිගණකයෙක් හෝ සිය ජංගම දුරකථනයෙන් ඒවා කියවති. එබැවින් මා ලියන ලිපි එවැනි පාඨක පිරිස් වෙත යොමු කරන්නට අදහස් කළ නිසා මෙවැනි බ්ලොග් අඩවියක් ගොඩනගන්නට සිතුවෙමි. මාගේ උත්සාහය කෙතරම් නම් සාර්ථකදැයි තීරණය වන්නේ ඔබගෙන් ලැබෙන ප්‍රතිචාර මතය. එබැවින් ඔබ මේ පිළිබඳ සිතන පතන දෑ මවෙත දන්වන්නට උනන්දුවන්නේ නම් එය මාගේ සතුටයි. ඔබ සැමට තෙරුවන් සරණයි!

Wednesday, October 26, 2016

හිලරි දිනයිද?


ඇමරිකා එක්සත් ජනපදයේ 58 වැනි ජනාධිපතිවරයා තෝරා පත්කරගැනීමේ මැතිවරණයට තව වැඩි දවසක් නැත. එය නොවැම්බර් 8 වැනිදා පැවැත්වීමට මේ වන විට සියලු වැඩකටයුතු යොදා තිබේ.  බැරක් ඔබාමාගෙන් හිස්වන ජනපති අසුන සඳහා තරග කරන්නවුන් අතරින් ඩිමොක්‍රටික් පක්ෂයෙන් ඉදිරිපත්ව සිටින හිලරි ක්ලින්ටන් සහ රිපබ්ලිකන් පක්ෂයෙන් ඉදිරිපත්ව සිටින ඩොනල්ඩ්ට් ට්‍රම්ප් ඉදිරියෙන්ම සිටිති. මේ අතරින් හිලරි ක්ලින්ටන් ඉදිරියෙන්ම සිටින්නීය. මැතිවරණ ප්‍රතිඵල පුරෝකතනය කිරීමේ සෑම සමීක්ෂණයකින්ම පාහේ පෙරමුණ ගෙන සිටින්නී ඇය ය. බොහෝ විට ඇය ඇමරිකා එක්සත් ජනපදයේ 58 වැනි ජනපති මැතිවරණයෙන් ජයග්‍රහණය කරනු ඇත. එසේ වුවහොත් ඇය එරට ප්‍රථම ජනපතිවරිය බවට පත්වනු ඇත. බෙහෝ දෙනෙකු දෑස් දල්වා බලා සිටිනුයේ එසේ වනු ඇතැයි කියාය. ඇමරිකානු වැසියන් බොහෝ දෙනෙකුගේ පැතුම බවට පත්ව ඇති හිලරි ක්ලින්ටන් ගැන මේ අවස්ථාවේදී යමක් අප කතා කළ යුතු වන්නේ ද මේ නිසාමය. 



1947 ඔක්තෝබර් 26 වැනි දින වෘශ්චික ලග්නයෙන් චිකාගෝ නුවර උපත ලැබ ඉලිනොයිස් හි පාර්ත් රිජ් උප නගරයේ හැදී වැඩුණු හිලරි ඩයන් රෝඩම් ක්ලින්ටන් අධ්‍යාපනය හදාරන ලද්දේ වෙලෙස්ලි විද්‍යාලයෙනි. ස්ක්‍රැබ්ල් (වචන සෙවීමේ ක්‍රීඩාවක්), ප්‍රහේළිකා විසඳීම සහ ගෙවතු අලංකරණය විනෝදාංශය ලෙස සිදුකරන ඇය පවසන්නේ වැඩකිරීම ද විනෝදාංශයක් බවය. එයින් ඇය අදහස් කරන්නේ ඇය සෑම වැඩක්ම ඉතා උනන්දුවෙන් කරන බවය. 

හිලරි ක්ලින්ටන් එකවර රාජ්‍ය තන්ත්‍රයට පැමිණි තැනැත්තියක නොවේ. ඇය 2009 සිට 2013 දක්ව එරට 67 වැනි රාජ්‍ය ලේකම්වරිය ලෙස ද කටයුතු කොට අත්දැකීම් ලබා ඇති කාන්තාවකි. එමෙන්ම 2001 සිට 2009 දක්වා කාලය තුළ ඇය නිව්යෝර්ක් නගරය නියෝජනය කරමින් කණිෂ්ඨ සෙනෙට්වරියක් ලෙස ද සේවය කළාය. ඇගේ සැමියා වන බිල් ක්ලින්ටන් හිටපු ඇමරිකානු ජනපතිවරයෙක් සහ ආණ්ඩුකාරවරයකු ද විය. ඇය ජනපති මැතිරණයට ඉදිරිපත්ව සිටින්නේ මෙසේ සියලු අත්දැකීම් දරාගෙනය. 



වර්ෂ 1973 දී යේල් නීති විද්‍යාලයෙන් නීතිය හදාරා උපාධියක් හිමි කරගත්තාය. කොංග්‍රස් නීති උපදේශිකාවක ලෙසින් කලක් සේවය කළ ඇය 1975 ඔක්තෝබර් 11 වැනිදා බිල් ක්ලින්ටන් හා යුගදිවියට එළැඹුණාය. බිල් ක්ලින්ටන් සමග වූ විවාහයෙන් ඇයට චෙල්සි වික්ටෝරියා ක්ලින්ටන් නමින් දියණියක් සිටියි. විවාහයෙන් පසු එම වසරේදීම ඇය අර්කැන්සාස් ජනපදයේ පදිංචියට ගියේ එම ප්‍රාන්තයේ ආණ්ඩුකාරවරයාගේ බිරිඳ වශයෙනි. එහිදී ද ද ඇය කාන්තාවන් නියෝජනය කරමින් විවිධ ආයතනවල බොහෝ තනතුරු දරන්නට සමත් වූවාය. 



ජනපති ආර්යාව ලෙස ඇය ඇමරිකා එක්සත් ජනපදය තුළ ළමා හා කාන්තා වරප්‍රසාද සහ හිමිකම් ගණනාවක් දිනාගන්නට සෑහෙන සටනක නිරත වූවාය. 1998 වසරේදී සිය සැමියා වූ බිල් ක්ලින්ටන් හා මොනිකා ලෙවින්ස්කි සිදුවීම සම්බන්ධව ඇය දක්වන ලද ප්‍රතිචාරය තුළින් ඇය එරට බහුතර වැසියන්ගේ නොමද ගෞරවය දිනාගන්නට ද සමත් වූවාය. 
2000 වසරේදී ඇය සෙනෙට් සභික සමාජිකාවක ලෙස තේරී පත්වන්නේ එවැනි තනතුරකට පත් ප්‍රථම නිව්යෝර්ක් කාන්තාව වශයෙනි. සැප්තැම්බර් 11 ලෝක වෙළෙඳ මධ්‍යස්ථානයට එල්ල වූ ත්‍රස්තවාදී ප්‍රහාරයෙන් පසු ඇෆ්ගනිස්ථානයට ප්‍රහාර එල්ල කළ යුතු යැයි ඉදිරිපත් වූ යෝජනාව සම්මත කරගන්නට ද ඇය සිය ඡන්දය පාවිච්චි කළාය. 

ජනපති ඔබාමා යටතේ රාජ්‍ය ලේකම්වරිය ලෙස කටයුතු කරන සමයේදී ද ඇය ජාත්‍යන්තර අවධානයට ලක්වන කටයුතු බොහොමයක් සිදු කළාය. මේ සියලු කාර්යයන්ගේ  අවසන් ප්‍රතිඵලය වූයේ 58 වැනි ඇමරිකා එක්සත් ජනපතිවරයා තෝරා පත්කරගැනීමේ අපේක්ෂිකාව ලෙස ඇයට ඉදිරිපත්වන්නට හැකියාව ලැබෙන මග විවර කරගැනීමය. 
කලක් සමලිංගික විවාහයන්ට එරෙහිව දැඩි ස්ථාවරයක් පිහිටා සිටි ඇය 2013 වසරේදී සිය අදහස් වෙනස් කොට එයට පක්ෂව අදහස් දක්වන්නට පටන් ගත්තාය. 

ඇමරිකා එක්සත් ජනපදයේ ලෝක වෙළෙඳ මධ්‍යස්ථානයට බෝම්බ ප්‍රහාරය එල්ලවීමෙන් පසු ලෝකයේ සියලු රටවලින් ත්‍රස්තවාදය මුළිනුපුටා දැමීමට එවකට සිටි ජනපතිවරයා ගත් තීරණය සමග හිලරි ක්ලින්ටන් ද සිටියත්, ඇය රාජ්‍ය ලේකම්වරිය ලෙස සිටි සමයේ මේ ස්ථාවරයේ යම් වෙනසක් දක්නට හැකි විය. එවකට අප රටේ පැවැති ත්‍රස්තවාදයට එරෙහි යුද්ධයේ දී ඇය එල්.ටී.ටී.ඊ. ත්‍රස්තවාදී සංවිධානය කෙරෙහි සානුකම්පිත ස්ථාවරයක සිටිනු දක්නට හැකි විය. එම සංවිධානය පරාජය වීම ඇගේ පැතුම වූයේ නැත. මේ නිසා අප රටේ ත්‍රස්තවාදයට එරෙහි යුද්ධය වළක්වාලන්නට ඇය තමාට ගත හැකි සෑම පියවරක්ම ගත්තාය. ඇය සිය සිය පෞද්ගලික ඊමේල් ලිපිනය භාවිත කරමින් ජාත්‍යන්තර මූල්‍ය අරමුදලට ඊමේල් ගණනාවක් යවමින් ඉල්ලා සිටියේ ශ්‍රී ලංකාවට එරෙහිව සම්බාධක පනවා යුද්ධය නතර කරන තැනට වැඩ කටයුතු සලසා දෙන ලෙසය. නමුත් මේ වන විට ජාත්‍යන්තර මූල්‍ය අරමුදල දරන ලද ස්ථාවරය වූයේ එල්.ටී.ටී.ඊ. ත්‍රස්ත සංවිධානය සහමුළින්ම පරාජය විය යුතුය යන්න වූ නිසා ඇමරිකානු රාජ්‍ය ලේකම්වරිය ලෙස හිලරි ක්ලින්ටන් කරන ලද බලපෑම් කෙරෙහි ජාත්‍යන්තර මූල්‍ය අරමුදලේ ඉහළ පෙලේ නායකත්වය කිසිසේත් කැමැත්තක් දැක්වූයේ නැත. හිලරි ක්ලින්ටන් එල්.ටී.ටී.ඊ. සංවිධානය පිළිබඳ තවමත් දරනුයේ එකී ස්ථාවරයමය. ඇය ඇමරිකා එක්සත්ජනපදයේ ජනපතිවරිය බවට පත්වුවහොත්, එසේ පත්වන්නේ එම ස්ථාවරය ද පෙරදැරිවය. එබැවින් ඇමරිකානු ජනපතිවරිය ලෙස ඇගෙන් ශ්‍රී ලංකාවට කුමනාකාර බලපෑම් එනු ඇතිදැයි සිතාගත නොහැකිය. 

කෙසේ වෙතත් සේ සියලු අනාවැකි තහවුරු වන දිනයට තව ඇත්තේ දින කිපයක් පමණි. මෙවර ඇමරිකානු ජනපති මැතිවරණයෙන් හිලරි ක්ලින්ටන් ජයග්‍රහණය කළහොත් ඇය දිව්රුම් දෙන අවස්ථාව වන විට ඇගේ වයස අවුරුදු 69කි. එය ඇමරිකා එක්සත් ජනපදයට සුවිශේෂී අවස්ථාවකි. වැඩිම වයස්ගත අවස්ථාවකදී දිව්රුම් දුන් ජනපතිවරුන් අතරින් ඉදිරියෙන්ම සිටින්නේ ජනපති රේගන්ය. ඔහු දිව්රුම් දුන්නේ වයස අවුරුදු 69 දීය. හිලරි ක්ලින්ටන් ජයග්‍රහණය කළහොත් ඇය එරට වැඩිම වයස්ගත අවස්ථාවකදී දිව්රුම් දුන් ජනපතිවරිය වනු ඇත. යම් හෙයකින් ඩොනල්ඩ් ට්‍රම්ප් ජයග්‍රහණය කළහොත් ඔහු එරට දිව්රුම් දෙන වයස්ගතම ජනපතිවරයා බවට පත්වනු ඇත. එයට හේතුව ඔහුට ඒ වන විට වයස අවුරුදු 70ක් වන බැවිනි. මේ සියල්ල විසඳෙන්නට ඇත්තේ දින කිහිපයක් පමණි. එතෙක් අපි බලා සිටිමු. 

Saturday, October 22, 2016

අවුරුදු 98 ස්නායු මනෝ වෛද්‍යවරිය - බ්‍රෙන්ඩා මිල්නර් - Brenda Milner, the 98 Year Old Neuropsychologist


අවුරුදු 98ක් යනු බොහෝ විට මරණාසන්න වයසකි. එසේත් නැත්නම් යන තැනකට යමක් කරගන්නා එක වඩා හොඳ යැයි සිතන්නට හොඳ වයසකි. ඇතැම් විට එවැන්නක් පවා සිතාගන්නට තරම් නිරවුල් මනසක් නොමැති වයසකි. එයට හේතුව එවැනි වයස් මට්ටමකදී බොහෝ දෙනෙකුගේ සිහිය විකල්ව යාමට වැඩි ඉඩක් ඇති බවට ඕනෑ තරම් අත්දැකීම් තිබෙන නිසාය. කෙසේ නමුත් අවුරුදු 98 දී මනෝ වෛද්‍යවරියක ලෙස සේවය කරන්නියක සිටින්නේ යැයි පැවසුවහොත් එය දවසේ විහිළුවක් බවට පත්වන්නට බොහෝ ඉඩක් තිබේ. නමුත් සැබෑව එය නොවේ. එවැන්නියක සැබැවින්ම සිටී. නමුත් අප රටේ නොවේ. කැනඩාවේය.  ඉංග්‍රීසි ජාතික කාන්තාවක ලෙස එංගලන්තයේ උපත ලැබ, වර්තමානයේ කැනේඩියානු ස්නායු මනෝ වෛද්‍යවරියක ලෙස සේවය කරන බ්‍රෙන්ඩා මිල්නර් ද එබඳු තැනැත්තියකි. දැනටමත් 98 හැවිරිදි වියෙහි පසුවන ඇය කෙතරම් සේවයේ යෙදී සිටිය ද තවමත් වෙහෙස වී ඇති බවක් නම් පෙනෙන්නේ නැත. ඇගේ ජීවිතය පිළිබඳ යමක් කෙටියෙන් කතාබහ කිරීම අපට වටින්නේ ඒ නිසාමය. 

1918 ජූලි 15 වැනිදා උපන් බ්‍රෙන්ඩා මිල්නර් ස්නායු මනෝ විද්‍යා ක්ෂේත්‍රය තුළ විවිධ පර්යේෂණ පවත්වමින් තවමත් ඉතාමත් සක්‍රිය ලෙස මෙම ක්ෂේත්‍රයට සිය දැනුම දායාද කරමින් සිටින්නියකි. ඇතැම් විට ඇය හඳුන්වනු ලබන්නේ ස්නායු මනෝ විද්‍යාවේ ආදී කර්තෘවරිය ලෙසිනි. ඇය මේ වන විට කැනඩාවේ මැක්ගිල් සරසවියේ ස්නායුවේදය සහ ස්නායු ශල්‍යකර්ම පිළිබඳ අංශයේ මාහාචාර්යවරියක ලෙස සහ මොන්ට්‍රියල් ස්නායුවේදී ආයතනයේ මහාචාර්යවරියක ලෙස වැඩකටයුතු කරයි. මේ වන විට ගෞරව උපාධි 20 කට අධික සංඛ්‍යාවකට හිමිකම් කියන ඇය, විවිධ පර්යේෂණව නිරතවෙමින් සිය ක්ෂේත්‍රය වෙනුවෙන් අතිමහත් සේවයක් සළසයි. ඇය වර්තමානයේ පර්යේෂණ පවත්වන්නේ මොලයේ වම් සහ දකුණු අර්ධගෝල අතර සිදුවන අන්‍යෝන්‍ය ක්‍රියාකාරීත්වය පිළිබඳවය. ස්නායු මනෝ විද්‍යා ක්ෂේත්‍රය වර්තමානයේ පවතින තත්වය දක්වා සංවර්ධනය කිරීමට ඇය ලබා දී ඇති දායකත්වය ඉමහත්ය. මේ නිසාම ඇයට ස්නායුවේදය සම්බන්ධ ‛කැව්ලි’ තිළිණය පවා හිමිව තිබේ. 

ඇය එංගලන්තයේ මැන්චෙස්ටර් හි උපත ලබන්නේ බ්‍රෙන්ඩා ලැන්ග්ෆෝර්ඩ් ලෙසින් වුව ද මිල්නර් ලෙස වාසගම වෙනස් වන්නේ විවාහයෙන් පසුවය. ඇගේ දෙමාපියන් සංගීත ක්ෂේත්‍රයට සම්බන්ධව වැඩකටයුතු කරන්නන් වුව ද ඇයට ඒ පිළිබඳ උනන්දුවක් තිබුනේ නැත. සය මස් හැවිරිදි වියේදී ඇය සහ මව ඉන්ෆ්ලුවෙන්සා වසංගතයට ගොදුරු වූ අතර එම සමයේ එයට ගොදුරු වූ පුද්ගලයන් මිලියන 20 - 40 අතර සංඛ්‍යාවක් මිය ගිය බව වාර්තා වේ. එය පළමු ලෝක යුද්ධයෙන් මිය සංඛ්‍යාවට ද වඩා අධිකය. කෙසේ නමුත් වාසනාවකට ඇයත් මවත් මේ වසංගතයේ ගොදුරු වූයේ නැත. 

ඇයට අවුරුදු 8 දක්වා ඇගේ පියා විසින් ගණිතය උගන්වන ලද අතර පසුව ඇය විතින්ටන් බාලිකා පාසලට ඇතුළත් කෙරිණි. ඉන් පසුව ගණිතය අංශයෙන් තවදුරටත් ඉගෙනගැනීම සඳහා ඇය කේම්බ්‍රිජ්හි නිව්න්හැම් පාසලට ඇතුළත් කෙරිණි. කෙසේ නමුත් තමා ගණිතය ක්ෂේත්‍රයට දක්ෂ නොවන බව තේරුම් ගත් නිසාම ඇය කළේ මනෝ විද්‍යාව තෝරාගැනීමය. මෙහි ප්‍රතිඵලය වූයේ 1939 වසරේදී ඇය පර්යේෂණාත්මක මනෝවිද්‍යාව යන ක්ෂේත්‍රයෙන් උපාධියක් හිමිකරගැනීමය. 

ඇයට සිය සැමියා වූ පීටර් මිල්නර් හමුවන්නේ 1941 වසරේදීය. ඔහු විදුලි ඉංජිනේරුවෙක් බැවින් යුද කටයුතු සඳහා සහය වන්නට ඔහුට සිදු විය. 1944  දී ඔවුන් විවාහ වූ අතර පරමාණුක බල ශක්තිය පිළිබඳ අධ්‍යයනයක් සඳහා දායක වන්නට පීටර් හට ආරාධනයක් ලැබුණු බැවින් ඔවුහු එංගලන්තය අතහැර කැනඩාව කරා පිටත්ව ගියහ. 

බ්‍රෙන්ඩා මිල්නර් සිය ක්ෂේත්‍රයේ අතිමහත් ජනාදරයට පත්වන්නට එක් සුවිශේෂී සිදුවීමක් ඉවහල් විය. ‛එච්.එම්’ යන නමින් පමණක් දැන සිටි එක්තරා පුද්ගලයෙක් 1955 වසරේදී සිය මොලයේ කොටසක් ඉවත්කිරීමේ ශල්‍යකර්මයකට සූදානම්වෙමින් සිටියේය. මෙම ශල්‍යකර්මයේ ප්‍රතිඵලය වූයේ ඔහුගේ කෙටිකාලීන මතකය අහිමි වීමය. පෙර සිදුවූ කිසිවක් ඔහුට මතකයට නගා ගත නොහැකි විය. ඔහුගේ මෙම තත්වය අවබෝධ කොටගත් ඇය සිදු කළේ මේ පිළිබඳ පර්යේෂණයක් ආරම්භකිරීමය. ඇයගේ මෙම පර්යේෂණය තුළින් ඔහුගේ කෙටිකාලීන මතකය නැව වර්ධනය කරවන්නට හැකියාව ලැබිණි. මෙම සිදුවීමත් සමඟ ඇය සිය ක්ෂේත්‍රය තුළ ලෝක ප්‍රකට කාන්තාවක බවට පත් වූවාය. 

98 හැවිරිදි වියෙහි පසුවන ඇයගේ මතකය අංශු මාත්‍රයකින් හෝ හෝ අඩු වුණු බවක් පෙනෙන්නට නැත. ඇය සිය කුඩා සමයේ සිදු වූ සියලු සිදුවීම තවමත් කිසිදු අඩුවක් නොමැතිව මෙනෙහි කරන්නට සමත්ය. වයස 98ක්ව සිටියදී පවා ඇගේ බලාපොරොත්තුව මිනිස් වර්ගයා වෙනුවෙන් කුමක් හෝ සුවිශේෂී කාර්යභාරයක් කිරීමය. කරයි.  තමා වයස්ගත බැව් හැඟෙන්නට පටන් ගත් දින සිටම වැඩපළ කිරීමට නොහැකි යැයි සිතන බොහෝ කාන්තාවන්ට පමණක් නොව පිරිමින්ට ද ඇය ආදර්ශයක්ම වන්නීය. 



Saturday, October 15, 2016

පරාක්‍රමබාහු ද පුලස්ති ඍෂිවරයාද? - King Parakramabahu or Pulasthi the Prophet?


පොළොන්නරුවේ චාරිකාවක ගිය අවස්ථාවක පරාක්‍රමබාහු රජුගේ යැයි සැළකෙන ප්‍රතිමාව නරඹන්නට ගියා. මේ වීඩියෝවේ දැක්වෙන්නේ ඒ අවස්ථාවේදී එතැන සිටි නිලධාරී මහතකු මේ ප්‍රතිමාව පිළිබඳ පැවසූ විස්තරයක්. ඒ විස්තරය වඩාත් ප්‍රයෝජනවත් වන ආකාරයට අවශ්‍ය තැන්වලට ගැළපෙන ඡායාරූප දමා තිබෙනවා. අත්හදාබැලීමක් ලෙස මෙය ත්‍රිමානව නැරඹිය හැකි ආකාරයටයි සකස්කොට තිබෙන්නේ. පහත ආකාරයේ ත්‍රමාන කන්නාඩියක් පළඳා මෙය නැරඹීමෙන් මාගේ උත්සාහය කෙතරම් සාර්ථක ද කියා ඔබට නිගමනය කළ හැකියි.







ඔහු පවසන විස්තරයට අනුවත්, ඉතිහාස හා පුරා විද්‍යා සාධක අනුවත් මේ ප්‍රතිමාව ගැන නිශ්චිත අදහසක් නැහැ. ඇතැමෙක් මෙ පුලස්ති ඍෂිවරයාගේ යැයි විශ්වාස කරන අතර තවත් පිරිසක් මෙය පරාක්‍රමබාහු රජුගේ යැයි විශ්වාස කරනවා. මා පුරාවිද්‍යාව හෝ ඉතිහාසය පිළිබඳ විශේෂඥයකු නොවන නිසා ඒ ක්ෂේත්‍රයන් ඔස්සේ මේ ගැන කිසිවක් කියන්න බැහැ. නමුත්  වෙනත් අදහසක් පළකරන්න හැකියාවක් තියෙනවා.


එක් අවස්ථාවක පඬුවස්නුවර නටබුන් නැරඹීමේ අවස්ථාවක් ලැබුණා. පඬුවස්නුවර කියන්නේ පඬුවස්දෙව් රජ කළ රාජධානිය නොවන බව කවුරුත් දන්නා දෙයක්. ඉතිහාසගත තොරතුරුවට අනුව මෙයට මේ නම වැටී ඇත්තේ මේ ප්‍රදේශයේ පැවති පඬා වැව නිසා බවයි පැවසෙන්නේ. දැන් ඇත්තේ එහි නටබුන් පමණයි. ඒ වගේම මෙම ප්‍රදේශය ප්‍රධාන රාජධානියක් නොව උප රාජධානියක් ලෙස පැවති බවත්, එහි පාලකයාව සිට ඇත්තේ එවකට ඈපා කෙනෙක් හෙවත් යුව රජකු වූ, පසුව පොලොන්නරුව රාජධානිය කරගන්නා පරාක්‍රමබාහු කුමාරයා බවත් ඉතිහාස පුවත් හමුවෙනවා.  




පඩුවස්නුවර පවතින කෞතුකාගාරයේ පරාක්‍රමබාහු කුමාරයාගේ යැයි සැලකෙන කුඩා ප්‍රතිමාවක් දක්නට ලැබෙනවා. මේ ප්‍රතිමාවේ පෙනුමත් පොලොන්නරුවේ පවතින ප්‍රතිමාවේ පෙනුමත් බොහෝ සමාන බැව් මේ ඡායාරූපය බැලීමෙන් ඔබට ද පැහැදිලි වෙනවා ඇති. මේ නිසා පොලොන්නරුවේ පවතින්නේ පරාක්‍රමබාහු රජුගේ ප්‍රතිමාවම බව බොහෝ දෙනෙක් දක්වන අදහසට මෙය අනුබලයක් වන බවයි මගේ අදහස. 

Thursday, October 13, 2016

මනමාලකම ඉහවහා යාමෙන් ඉල්ලං කාපු පිරිමි

මැද ඉන්නේ ඩොනල්ඩ් ට්‍රම්ප්

ඇමරිකා එක්සත් ජනපදයේ ජනපති තරගයට සටන් වැදී සිටිනවුන් අතරින් පෙරමුණේ වැජඹෙන අපේක්ෂකයෙක් ලෙස ඩොනල්ඩ් ට්‍රම්ප් සඳහන් කළ හැකිය. ඉස්ලාමීය අන්තවාදයට එරෙහිව ප්‍රබලව අදහස් දැක්වීම නිසා ඔහුට එරට බහුතරයකගේ කැමැත්ත පළවෙමින් තිබිණි. නමුත් හදිසියේ ඔහුගේ වාසනාව කණපිට පෙරළෙමින් පවතීදෝ වැනි සැකයක් ජාත්‍යන්තර මාධ්‍ය ඔස්සේ දැනගන්නට ලැබෙමින් පවතී. ඒ ගැහැනුන් සම්බන්ධව ඔහුට ඇති ඉතිහාසය කිසිසේතම යහපත් නොවන බව කෙමෙන් ආරංචි වීම නිසාය. 

ඩොනල්ඩ් ට්‍රම්ප් පිළිබඳ දැනගන්නට ලැබෙන තොරතුරුවලට අනුව ඔහු දැඩි කාන්තාලෝලියෙකි (කාන්තාලෝලීන් ගැන කියවන්න). විවිධාකාරයෙන් කාන්තාවන් සමඟ ඔහු පෙනී සිට ඇති ඡායාරූප බොහෝ පවතී. කාන්තාවන් පිළිබඳ ඔහු පළ කොට ඇති අදහස් අතුරින් සියල්ලම පාහේ ලිංගිකත්වය හා සම්බන්ධ ඒවාය. එක් අවසථාවකදී ඔහු ප්‍රකාශ කොට තිබුණේ ගැහැනුන් යනු වින්දනය සඳහා සිටින පිරිසක් පමණක් බවය. ගැහැනුන් යනු ලිංගික කටයුතු සඳහා යොදාගන්නා භාණ්ඩ වර්ගයක් මිස මනුෂ්‍ය වර්ගයට අයත් කිසිවකුත් නොවන බව තමාට හැඟෙන්නේ යැයි ඔහු තවත් අවස්ථාවක ප්‍රකාශ කොට තිබිණි. ඔහුගේ මෙවැනි අදහස් පිළිබඳ දැනගන්නට ලැබුණු මුල් අවධියේ බොහෝ දෙනෙක් සිතුවේ මේවා හුදු විනෝදාශ්වාදය සඳහා පමණක් ඉදිරිපත් කරන ඒවා පමණක් ලෙස වුව ද ඒවා එසේ නොවන බැව් මේ වන විට හොඳින්ම පැහැදිලි වී තිබේ. ඔහු සිට ජීවිතය පුරාම සිදු කොට ඇත්තේ විවිධාකාරයෙන් කාන්තාවන්ට අතවරකිරීම, හිංසාකිරීම ආදිය බව පැවසේ. මේ හිංසනයන්ට සහ අතවරයන්ට අමතරව ඔහු ගැහැනුන්ව නිර්දය ලෙස අපහාසයට ද ලක්කොට තිබේ. මෙම මැතිවරණ කටයුතු අතරවාරයේ ඔහු එක් අවස්ථාවක එරට ප්‍රහසන රංගන ශිල්පිනියක වන රෝස් ඕ‛ඩොනල්ඩ්ව හඳුන්වා ඇත්තේ “පිළිකුල් සහගත කැත ඊරියක්’ ලෙසිනි. රූපරාජිනි තරග පැවැත්වෙන අවස්ථාවන් සඳහා ඔහුට ඇරයුම් ලැබුණු අවස්ථාවලදී එම තරගකාරියන් ඇදුම් මාරු කරන කාමරවලට ඇතුළුවීමේ පුරුද්දක් ඔහු තුළ පැවති බව ද දැනගන්නට ලැබී තිබේ. මේ ආකාරයට ඔහු පිළිබඳ දිනෙන් දින දැනගන්නට ලැබෙන ආරංචි එතරම් සුබදායක නැත. ඔහුට එරට කාන්තාවන් සිය ඡන්දයෙන් කුමනාකාරයෙන් සළකනු ඇත්ද යන්න පිළිබඳ සහතිකයක් දැනටම පළවී ඇති බැව් බොහෝ මාධ්‍ය පවසයි. 


ගැහැනු සම්බන්ධ මෙවැනි ගැටලු නිසා ඩොනල්ඩ් ට්‍රම්ප්ට ඇතැම් විට සිට ජනපති සිහිනය සැබෑ කරගන්නට අවස්ථාව නොලැබෙන්නට ද පුළුවන. මේ පිළිබඳ තවමත් නිවැරදි තක්සේරුවක් ලබාදීමට නොහැකි වුව ද එවැන්නක් සිදුවන්නට ඉඩක් නැතැයි කිව නොහැකිය. කෙසේ වෙතත් ගැහැනුන් සම්බන්ධ කටයුතු නිසා සිය ජීවිතය, නම ‛කැත’ කරගත් පිරිමින් ලෙස දැනගන්නට ලැබෙන්නේ ඩොනල්ඩ් ට්‍රම්ප් පමණක්ම නොවේ. ලෝක ඉතිහාසයේ එවැනි පිරිමි බොහෝ දෙනෙක් සිටිති. කාන්තාලෝලීන් පිළිබඳ සඳහන්කළ පමණින් බොහෝ දෙනෙකුට ඇතැම් විට ‛රස්පුටින්’(රස්පුටින් ගැන කියවන්න) යන නාමය මතක් විය හැකිය. නමුත් මෙවැනි සිදුවීම් පිළිබඳ නිදසුන් සෙවීම  සඳහා අපට රස්පුටින්ගේ යුගය තරම් බොහෝ ඈත අතීතයකට ගමන් කරන්නට සිදුවන්නේ නැත. 

බිල් සහ මොනිකා

මෙවර ඇමරිකානු ජනපති තරගයට ඉදිරිපත්ව සිටිව හිලරි ක්ලින්ටන්ගේ සැමියා වන බිල් ක්ලින්ටන්ගෙන්ම අපට මේ පිළිබඳ කතාව ආරම්භ කළ හැකිය. එවකට 49 හැවිරිදි වූ ඔහු සිය ජනපතිධූරයේ සිටි සමයේ ධවල මන්දිරයේ සිටි 22 හැවිරිදි සේවිකාවක වූ මොනිකා ලෙවින්ස්කි සමඟ පැවත්වූ ලිංගික සම්බන්ධතා නිසා ඔහු කෙරෙහි තිබුණු ජනප්‍රසාදය ශීඝ්‍රයෙන් පහළ ගියේය. ඔහු අමරිකාවේ ජනපතිවරයා ලෙසට පත්ව එරට වැසියන් අතර ඉමහත් ජනාදරයක් දිනාගන්නට සමත්ව සිටි නායකයෙක් විය. නමුත් මොනිකා නිසා අපවාදයට පත් ඔහු අදටත් අවලංගු කාසියක් බවට පත්ව සිටී. 

ටයිගර් වුඩ්ස්

ටයිටර් වුඩ්ස් යනු ඇමරිකානු ජාතික, ලෝක ප්‍රකට ගොල්ෆ් ක්‍රිඩකයෙකි. මාධ්‍ය මගින් ඔහු ක්‍රීඩකයකු ලෙස කීර්ති නාමයක් දිනාගෙන සිටිය ද හිටිහැටියේ ඔහුගේ පෞද්ලලික ජීවිතය පිළිබඳ ආරංචි ලැබීම නිසා ඔහුගේ කීර්තිනාමය කෙටි කලකින්ම විනාශ වී ගියේය. ක්‍රීඩා ඉතිහාසයේ දරුණුතම ලිංගික අපවාදයට ලක්ව සිටින්නේ ඔහු යැයි පැවසේ. ඔහුට එල්ල වී තිබුණු ප්‍රබලතම චෝදනාව වූයේ ගැහැනුන් රවටමින් සිය ලිංගික අවශ්‍යතාවයන් ඉටුකරගත් පුද්ගලයෙක් ලෙසිනි. ඔහු විසින් රවටා ඇති ගැහැනුන් ගණන 1 -2 ක් හෝ 10 - 15 ක් නොවේ. ගැහැනුන් 120 දෙනෙකු පමණ ඔහුගේ රැවටීමට ලක්ව ඇති බැව් පැවසේ. 

මයිකල් වික්

මයිකල් වික් යනු 1980 ගණන් වල සිටි ලෝක ප්‍රකට පාපන්දු ක්‍රීඩකයෙකි. පාපන්දු ක්‍රීඩව තුළින් ලෝකය පුරා ඉමහත් කීර්තියක රන්දාගෙන සිටිය ද ඔහු සොන්යා එලියට් නමැති සෞඛ්‍ය සේවිකාවක් සමඟ අනියම් සබඳතාවයක් පැවැත්වූ බවට ඇය විසින් ලෝකය හමුවේ නිරාවරණය කිරීමත් සමඟ ඔහුගේ බිඳවැටීම ආරම්භ විය. ඇය චෝදනා කොට සිටියේ එපමණක් නොවේ. ඔහු සමඟ පැවැත්වූ අනාරක්ෂිත ලිංගික සබඳතාවයේ ප්‍රතිඵලයක් පෙස තමාට ‛හර්පීස්’ නම් ලිංගිකව සම්ප්‍රේෂණය වන රෝගය ද වැළඳුණු බවය. 

චාර්ල්ස් සහ කැමිලා

බ්‍රිතාන්‍ය මහ රැජිනගෙන් පසුව ඔටුන්නට හිමිකම් පැවසූ චාර්ල්ස් කුමරුට එය අහිමිවන්නට හේතුව ද ඩයනා කුමරිය සමඟ ඔහු විවාහ වී සිටියදීම කැමිලා පාකර් සමඟ පවත්වන ලද අනියම් සබඳතාවය බව ලොවම දන්නා කරුණකි. මේ සිදුවීම නිසා එකල ජාත්‍යන්තර මාධ්‍ය හමුවේ චාර්ල්ස් කුමරු ඉමහත් අපවාදයන්ට ලක්විය. ඩයනා කුමරියගේ මරණයෙන් පසු ඔහු සිය අනියම් පෙම්වතිය වූ කැමිලා පාකර් හා විවාහ වුව ද ඔහුට කිසිදා කිරුළ නම් හිමි නොවනු ඇති බව සඳහන් කළ හැකිය.

ආර්නෝල්ඩ්

ආර්නෝල්ඩ් ස්වාසනගර් යනු සුප්‍රකට හොලිවුඩ් නළුවකු සේම ඇමරිකානු දේශපාලඥයෙකි. බොහෝ නළුවන්ට නොමැති දෙයක් ඔහුට හිමිව තිබිණි. ඒ සාර්ථක විවාහ ජීවිතයකි. ඔහු සිය බිරිඳ මාරියා ෂ්‍රීවර් සහ දරුවන් සමඟ වසර 25ක ප්‍රිතිමත් විවාහ ජීවිතයක් ගත කළේය. නමුත් රිදී තිරයේදී ලෝකය විවිධ දරුණු උපද්‍රවවලින් ගළවාගන්නට සමත් වූ ඔහුට සිය පවුල් ජීවිතය ගළවාගන්නට හැකියාවක් තිබුණේ නැත. ඒ සිය නිවසේ සේවිකාව සමඟ කාලයක් තිස්සේ ඔහු පවත්වාගෙන ආ අනියම් සබඳතාවය සිය බිරිඳට හසුවීමෙන් පසු එය මුළු ලෝකයේම පැතිර ගිය බැවිනි. එතැනින්ම ඔහුගේ ජීවිතයේ කඩා වැටෙන්නට පටන් ගත්තේය. 

මේ ලැයිස්තුව මෙසේ අවසන් කළ නොහැක. කෙසේ නමුත් ලෝක ඉතිහාසය පවසන්නේ ලිංගික අපවාදයන්ට ලක්වූ කිසිදු පුද්ගලයකුට තවදුරටත් සිය කීර්තිය එකසේ රඳාගන්නට හැකියාවක් නොමැති වූ බවය. මේ ධර්මතාවය ඩොනල්ඩ් ට්‍රම්ප්ට ද එකසේ සාධාරණ ද නැත්ද යන්න නොබෝ දිනකින් දැකබලා ගත හැකිවනු ඇත. 

Saturday, October 1, 2016

ශීතකරණ දෝෂයක් පහසුවෙන් නිවැරදි කර ගනිමු


ඔබේ නිවසේ තියෙන ශීතරකණවල බොහෝ විට ඇතිවන දෝෂයක් තමයි උඩින් තියෙන ෆ්‍රීසර් කොටසේ සිසිල තිබුණත් පහළ තියෙන කොටස සිසිල් නොවී තිබීම. පහළ කොටස් ඇති ආහාර ද්‍රව්‍ය නරක්වී දුගඳ හමන්නට පටන් ගන්න විට තමයි බොහෝ  දෙනෙක් දැන ගන්නේ ශීතකරණයේ යම්කිසි දෝෂයක් තිබෙන බව. එවිට අනිවාර්යයෙන්ම ශීතකරණ අලුත්වැඩියා කරන ශිල්පියෙකුට කතා කරනවා. නමුත් ඔබට කිසිදු ශීතකරණ ගැන කිසිදු දැනුමක් නොමැති වුවත් මේ දෝෂය නිරාකරණය කරගන්න පුළුවන්. මේ දෝෂය ඇති කරන්නට හේතුවන උපකරණයේ පින්තූරයක් තමයි මේ උඩින්ම තියෙන්නේ.


මේ පින්තූරයේ තියෙන්නේ මොකක්ද? සමහර අය දන්නවා වෙන්න පුළුවන්. ඒ වගේම නොදන්න අයත් ඉන්නවා. මේක තමයි ඩිෆ්‍රොස්ට් ටයිමර් (Defrost Timer) එක කියන්නේ. මේක සම්බන්ධ මොනවටද? මේක සම්බන්ධ ඔබ අප කාගෙත් නිවෙස්වල තියෙන ශීතකරණයට. මේ ගැන කතා කරන එකේ වැදගත්කම මොකක්ද කියලා හිතෙන්න පුළුවන්. අපි ඒ ගැන කතා කරමු.



මුල් කාලේ ආපු ශීතකරණවල තිබුණු ලොකුම ගැටලුව තමයි අයිස් බැඳෙන එක. මේ ගැන හිතලා බලපු ශීතකරණ නිෂ්පාදකයෝ මෙයට විසඳුමක් විදිහට අයිස් නොබැඳෙන ශීතකරණ නිෂ්පාදනය කළා. ඇත්තටම ගත්තොත් මොන ශීතකරණයෙත් අයිස් බැඳෙනවා. නමුත් මොවුන් සොයා ගත්ත තාක්ෂණය තමයි මේ විදිහට බැඳෙන අයිස් දිය කරලා හරින එක. ඒ සඳහා ඔවුන් ශීතකරණයට හීටරයක්, එහෙමත් නැත්නම් ශීතකරණයේ අයිස් දියකරන්න තාපජනක උපකරණයක් සවි කළා. පැය 6 - 7 කට වරක් මේ හීටරය ක්‍රියාත්මක කරලා ශීතකරණයේ බැඳුණු අයිස් දියකර හරින්න ඕන. පැය 6 -7 කට වරක් හීටරය ක්‍රියාත්මක කරවන එක තමයි ඔබ දකින මේ ඩිෆ්‍රොස්ට් ටයිමර් එකෙන් කරන්නේ. ඔබ ‘ටකස්‘ වැනි හඬක් ශීතකරණයෙන් ඇසෙනවා සමහර විට මතක ඇති. ඒ තමයි ඩිෆ්‍රොස්ට් ටයිමර් එක ක්‍රියාත්මක වන හඬ.


ශීතකරණය සිසිල ඇති කරන කොටස තියෙන්නේ එහි උඩ තියෙන ෆ්‍රීසර් කොටසේ. එහි ඇතිවන සිසිල පංකාවක් ඔස්සේ පහල කොටසට යැවීම සිදු කරනවා. බොහෝ විට කාලයක් යද්දි ඩිෆ්‍රොස්ට් ටයිමර් එකේ දෝෂ මතුවෙනවා. එවිට එය පැය 6-7කට වරක් ක්‍රියාත්මක වීම ඇනහිටිනවා. ඔබට ඇසෙන ‘ටකස්‘ කියන හඬ ඇසෙන්නේ නැත්නම්, එයින් අදහස් වන්නේ ඩිෆ්‍රොස්ට් ටයිමර් එකේ දෝෂයක් ඇති බවයි. එය ක්‍රියාකරන්නේ නැත්නම් ශීතකරණයේ බැඳෙන අයිස් දියවන්නේ නැහැ. එවිට ඉහළ ෆ්‍රීසර් කොටසේ ඇතිවන සිසිල පහළට ගමන් කරන කොටසේ ද අයිස් බැඳී ඇති නිසා පහළ කොටස සිසිල් වන්නේ නැහැ. ඇතැම් අවස්ථාවල මෙම පංකාව ක්‍රියාත්මක නොවන නිසාත් පහළට සිසිල ගමන් කරන්නේ නැති වෙන්න පුළුවන්. පැය 6-7කට වරක් ඩිෆ්‍රොස්ට් ටයිමර් එකේ හඬ පුරුදු පරිදි ඇසෙනවා නම් බොහෝ විට පහළ කොටස සිසිල් නොවන්නේ පංකාවේ දෝෂයක් නිසා විය හැකියි. 




ඩිෆ්‍රොස්ට් ටයිමර් එකේ දෝෂයක් නම් ශීතකරණ අලුත්වැඩියා කරන්නන් බොහෝ විට කරන්නේ මෙම ඩිෆ්‍රොස්ට් ටයිමර් එක ගළවා එය පිරිසිදු කොට ඇතැම් විට පොල් තෙල් වැනි යමක් දමා නැවත සවිකිරීමයි. නමුත් මෙය සාර්ථක පිළියමක් නොවන බව බොහෝ විට පෙනෙන්නට තිබෙන්නේ වැඩි දිනක් යන්නට පෙර ඩිෆ්‍රොස්ට් ටයිමර් එක නැවත දෝෂ පෙන්වන්නට පටන් ගන්නා නිසයි. අනෙක ශීතකරණ අලුත්වැඩියා කරන්නන් මේ පරණ ඩිෆ්‍රොස්ට් ටයිමර් එක පිරිසුදු කොට සවි කරන්නට රුපියල් 1000ක් හෝ ඊට මදක් වැඩි මුදලක් අයකරනවා. 


කෙසේ නමුත් ඩිෆ්‍රොස්ට් ටයිමර් එකක් අලුතින් මිලදී ගෙන සවි කරන්නට ඔබට වැයවන්නේ රු. 750 - 800 ක් වැනි මුදලක් පමණයි. කොළඹ කොම්පඤ්ඤ වීදියේ නවලෝක රෝහල අවට ශීතකරණ අමතර කොටස් අළෙවි කරන වෙළෙඳසැල්වල මේ ඩිෆ්‍රොස්ට් ටයිමර් මිලදී ගන්නට තිබෙනවා. ඔබට තියෙන්නේ ශීතකරණය විදුලියෙන් විසන්ධි කොට මෙය ගළවා ගෙන ගොස් රැගෙන ගොස් ඔබගේ ඩිෆ්‍රොස්ට් ටයිමර් එකේ මාදිලියේ එකක් රැගෙන විත් සවිකර ගැනීම පමණයි.
LG වර්ගයේ ශීතකරණවල බොහෝ විට ඩිෆ්‍රොස්ට් ටයිමර් එක සවිකොට ඇත්තේ මෙතැනයි.  ඇතැම් ශීතකරණවල මෙය වෙනත් ස්ථානවල ද සවිකොට තිබෙනවා.




ඩිෆ්‍රොස්ට් ටයිමර් එක තිබෙන්නේ එක තිබෙන්නේ ශීතකරණයේ පිටුපස පහළට වන්නටයි. එහි කුඩා ගෑස් ටැංකියක් වැන්නක් තිබෙනවා. එය කොම්ප්‍රෙෂර් එක නමින් හඳුන්වනවා. එයට කිට්ටුවෙන් මෙම ඩිෆ්‍රොස්ට් ටයිමර් එක තිබෙනවා ඔබට සොයා ගන්නට පුළුවන්. එහි ඇති ඇණ ගළවා එයට සවිකොට ඇති වයර්වලින් පහසුවෙන් මෙය ගළවා වෙන්කොට ගන්නට පුළුවන්. 


සාමාන්‍යයෙන් ශීතකරණ අලුත්වැඩියා කරන්නන් පරණ ඩිෆ්‍රොස්ට් ටයිමර් එකම සවි කරන නිසාත්, එය අනිවාර්යයෙන්ම නැවත දෝෂ මතු කරන නිසා ඔවුන්ට කිහිප වතාවක් පැමිණ මෙය අලුත්වැඩියා කරමින් රුපියල් 2000 - 3000 ඔබගෙන් අය කරගන්නට පුළුවන්. ඔවුන් අලුත් ඩිෆ්‍රොස්ට් ටයිමර් එකක් සවිකරන්නේ බැරිම තැනකදී පමණයි. එවැනි තත්වයන්ට පත්ව පාඩු විඳගත් පුද්ගලයන් බොහෝ විට හමු වී ඇති නිසා මෙය මේ ආකාරයන් ලියා ඔබ දැනුවත්කරන්නට සිතුවා.


ඔබට ඩිෆ්‍රොස්ට් ටයිමර් ගැන හෝ ශීතකරණ ගැන හෝ කිසිදු දැනුමක් නැතත් මෙය පහසුවෙන්ම ගළවා සවිකරගන්නට පුළුවන්.