මිනිසකු මරා දැමීමේ වරදට එල්ලුම් ගස් ගිය මේරිගේ අනුවේදනීය කතාව - The tragic story of Mary who was hanged for killing a man

අපරාධයක් වෙනුවෙන් ලබා දෙන දඬුවමක් විදියට මිනිසෙක්ව එල්ලා මරන සිදුවීම් ඔබ ඕනෑ තරම් අසා ඇති. නමුත් අපරාධයක් වෙනුවෙන් අලියෙක්ව  එල්ලා මරන සිදුවීමක් ගැන අසා නැති වෙන්නත් පුළුවන්. මේ කියන්න යන්නේ එහෙම කතාවක්.

මේ කතා නායිකාව ආසියානු ගැහැනු අලියෙක්. ඒ කියන්නේ කෙනරක්. නමින් මේරි. කොහොම වුනත් ඉතිහාසයේ ඇගේ නම ලියවී තිබෙන්නේ ‘මිනීමරු මේරි’ විදියටයි. 1894 දී උපන්, ටොන් 5ක පමණ බරින් යුක්ත ඇය උසින් අඩි 11 අඟල් නවයක් වුණා. ඇමරිකාවේ චාලි ස්පාර්ක් කියන සර්කස් කණ්ඩායමේ හිටිය ඉතා හීලෑ සතෙක්. ඇය කළේ මිනිසුන් සතුටු කරන්න සර්කස් පෙන්වපු එක. 

මේ විදියට අහිංසක විදියට හිටිය මේරිගේ ඉරණම් දවස උදා වුණේ කිසිවෙක් නොසිතපු විදියට. ඒ 1916 අවුරුද්දේ සැප්තැම්බර් 11 වෙනිදා. ඇමරිකාවේ ටෙනිසි ප්‍රාන්තයේ කිංග්ස්පෝර්ට් කියන කුඩා නගරයට මේ සර්කස් කණ්ඩායම පැමිණෙමින් සිටියා. මේ සර්කස් කණ්ඩායමේ ප්‍රසිද්ධම චරිතය තමයි මේරි. 

රෙඞ් එල්ඩ්‍රිජ්

එදා මේරිගේ ඇත්ගොව්වා විදියට වැඩකටයුතු කළේ රෙඞ් එල්ඩ්‍රිජ්. ඔහු මේ කණ්ඩායමට එකතු වී තිබුණේ එදාට කලින් දවසෙ. අලින්ව බලාකියා ගැනීම ඔහුට කිසිම පළපුරුද්දක් තිබුණේ නැහැ. නමුත් ඔහු නිතර පුරසාරම් දෙඩමින් කිව්වේ “හෙණ්ඩුව අතේ තියෙන කල් ඕනම අලියෙක් මට ඔට්ටුයි” කියන එක. කොහොම වුනත් මේ කියන දවසේ මේරිගේ දතක වේදනාවක් තිබුණා. පාරේ වැටිලා තිබුණු කොමඩු ගෙඩියක් අරන් හපමින් යන්න මේරි කැමැත්තක් ඇති වුණා. ඇය එය හොඬයෙන් ගන්න නතර වුණා. ඒ වෙලාවේ නතර වෙන වළක්වන්න එල්ඩ්‍රිජ් මේරිට හෙණ්ඩුවෙන් ඇන්නා. ඒ ඇන්නෙත් හක්කේ දතේ අමාරුව තිබුණු තැනටයි. 

සාමාන්‍යයෙන් කතාවක් තියෙනවා අලින්ට ඇත්තුන්ට හරි ඉක්මනින් කේන්ති එනවා කියලා. එදා මේරිටත් ඒකම සිද්ධ වුණා. මේරි සැනෙකින් එල්ඩ්‍රිජ් හොඬයෙන් ඇදලා අරන් පොලොවේ ගසා මරා දැම්මා. 

එල්ඩ්‍රිජ්ගේ මරණ සහතිකය. අලියෙක් විසින් මරා දැමූ බව එහි සඳහන් වෙනවා.

‘මිනීමරු මේරිව මරා දමන්නැයි රැස්ව සිටි පිරිස ගෑගැසුවා. එතැන හිටි කම්මල්කාරයෙක් මේරිට වෙඩි පහක් තැබුවා. නමුත් ඒවාට ඇගේ ඝනකම් හම පසා කරගෙන යන්න පුළුවන් වුණේ නැහැ. 

සර්කස් කණ්ඩාමේ අයිතිකාරයා, චාලි ස්පාර්ක්

සර්කස් කණ්ඩාමේ අයිතිකාරයා, චාලි ස්පාර්ක්ට  පවා ඕනෑ වුණේ මේරිව මරා දමා සර්කස් එක ඉදිරියට පවත්වාගෙන යෑම පමණයි. ඔහු ඇයව එල්ලා මරා දමන්න තීරණය කළා. ඒක එකපාරටම විකාර අදහසක් වගේ පෙනුනත් අවසාන තීරණය වුනෙත් ඒකම තමයි. 

ඔවුන්ගේ ඊළඟ සර්කස් සංදර්ශනය පැවැත්වෙන අර්වින් නගරයේ දී මෙය සිදු කරන්නට ඔවුන් තීරණය කළා. එයට හේතුව වුණේ එහි දුම්රිය මැදිරි එසවිය හැකි ටොන් 100 දොඹකරයක් තිබුණු නිසයි. 

ඒ 1916 සැප්තැම්බර් 13 වෙනිදා. මේ මරාදැමීම නරඹන්න ඔහු මුළු නගර වැසියන්ටම ආරාධනා කළා. ඇගේ කකුල් සියල්ලත්, මුළු සිරුර වටේටත් දම්වැල් යොදා බැඳ තිබුණා. බෙල්ලටත් දම්වැලක් යොදා දොඹකරයෙන් ඇයව ඉහළට ඉස්සුවා. දම්වැල් නිසා ඇති වුණු වේදනාවෙන් ඇය කෑ ගැසුවා. 

කොහොම වුනත් අඩි 5ක් ඉහළට ඔසනවාවත් සමග දම්වැල් ලිහිල් වී ඇය බිම ඇද වැටුණා. ඇගේ උකුල් ප්‍රදේශය එයින් දැඩිව බිඳී ගියා. ඇය වේදනාවෙන් කෑගැසුවත් ඒ හඬ අසන්නට කිසිවෙක් හිටියේ නැහැ. තවත් ශක්තිමත් දම්වැල් ගෙනැත් ඇයව ගැට ගසා නැවතත් ඉස්සුවා. බෙල්ලට දමා තිබුණු දම්වැල් හිර වී ඇය මිය යන තුරුම මෙසේ එල්ලාගෙන සිටියා. 

මිනිසුන් සතුටින් කෑගැසුවා. පැය භාගයකට පමණ පසු ඇය බිමට පහත් කළා. පශු වෛද්‍යවරයකු විසින් පරීක්ෂා කළාට පසුව මේරි මිය ගොස් ඇති බව නිල වශයෙන් නිවේදනය කළා. 

මිනිසකු මරා දැමූ වරදට මේරි එල්ලා මැරූ පුවත එකල පුවත්පත්වල පළ වුණා. මේරි මරා දැමුවේ එක් පුද්ගලයකු පමණක් වුවත් ඇතැම් පුවත්වල තිබුණේ ඇය මිනිසුන් අට දෙනෙකු මරා දැමූ බවයි. 

ඇගේ සිරුර වළලා දමන්නට දැවැන්ත වලක් සෑරු බවට වාර්තා වුනත් එය තිබුණු තැනක් දැන් කිසිවෙක් දන්නේ නැහැ. 

 

සිරිලකට සම්බා බත හඳුන්වා දුන් බව කියන අප්‍රකට මිනිසාගේ කතාව

 

අනාදිමත් කාලයක සිට ශ්‍රී ලාංකේය ජන සමාජයේ ප්‍රධාන ආහාරය බත් ය.අතීතයේ සිට විවිධ සහල් වර්ග වලින් බත් පිසිනු ලැබුවද ඒ සියළු බත් වර්ග අතුරින් පෙරටු වන බතක් තිබේ.එනම් සම්බා බතය.ශ්‍රී ලංකේය බෞද්ධ සමාජයේ ආධ්‍යාත්මික පක්ෂය නියෝජනය කරන අග්‍ර භෝජනය වන බුද්ධ පූජාවේ සිට ලෞකික පක්ෂය නියෝජනය කරන අග්‍ර භෝජනය වන මංගල භෝජනය තෙක් වන සියළු සම්භාවනීය අවස්ථාවන් සඳහා යොදා ගැනෙන සම්බා ඉන්දියානු සම්භවයකින් යුතු වී වර්ගයකි.ඉන්දියාවේ දී මෙම වී වර්ගය සඳහා කෙතරම් සම්භාව්‍ය තත්වයක් ආරෝපණය වී තිබේ ද යන්න බටහිර බෙංගාලයේ දී එය ගෝභින්දෝ භෝග්[විෂ්ණු දෙවියන්ගේ බෝගය] නමින් හැඳින්වීමෙන් පැහැදිලි වෙයි.එමෙන්ම මෙම උතුම් බත අප රටට හඳුන්වා දුන් අතීත වීර පුරුෂයකු පිළිබඳ මානව විද්‍යාත්මක සාක්ෂි රැසක් සහිත අප්‍රකට පුරාවෘත්තයක් ගොනු කර ගැනීමට අපට හැකි විය.

ගම්පහ දිස්ත්‍රික්කයට, ගම්පහ ප්‍රාදේශීය ලේකම් කොට්ඨාශයට අයත් ගණේමුල්ලේ පිහිටි හොරගොල්ල ගම්මානයේ කොටසක් අතීතයේ භැඳින්වෙන ලද්දේ “මහ ගම” යනුවෙනි. ඒ පැරණි ග්‍රාම නාමය මතකයෙන් කිව හැකි ගැමියෝ තවමත් එම ප්‍රදේශයේ සිටිති. මෙම හොරගොල්ල ග්‍රාමයේ උතුර  ග්‍රාම නිලධාරී කොට්ඨාශයට අයත් නිවාස එකසිය පනහක් පමණ අයත් වන කොටසක් අදටත් ගෘහ මූලික ලැයිස්තු වල “හම්බාගම” යනුවෙන් සඳහන් ය. ඒ එහි මුල් නම වන සම්බාගම යන්නෙන් බිඳී ඒමේ ප්‍රතිඵලයක් ලෙසිනි. සිරිලකට සම්බා බත හඳුන්වාදුන් බව පැවසෙන "මහගම මුත්තා": පුරාවෘත්තය මතු වනුයේ ඒ ගම් පියස ඇසුරිනි. මෙම හොරගොල්ල ගම්වරයේ වෙසෙන ජනතාව සමඟ පාරම්පරික ඥාති සම්බන්ධයක් සහිත ජනතාවකගෙන් යුතු තවත් ගම්වරයක් ඊට යාබදව පිහිටා තිබේ. එය හැඳින්වෙනුයේ තිබ්බටුගොඩ ලෙසිනි. එහෙත්, ඉහත සඳහන් හොරගොල්ල සහ තිබ්බටුගොඩ යන ගම්මාන වල සෑම පාරම්පරික වැසියකුගේම පෙළපත් නාමය ආඬිගේ හෝ සේනාසිගේ යනුවෙන් දැක්වෙයි. සන්‍යාසි යන්නෙන් බිඳීගත් මෙම සේනාසිගේ නාමය පසුව සේනාසිංහගේ හෝ සේනාසිංහ යනුවෙන් වෙනස් වී ඇති බව ද පෙනෙයි. අතීතයේ විසූ මෙම මහගම මුත්තා පිළිබඳව විමසීමට පෙර ඔහු නියෝජනය කළ එම ජන වර්ගය පිළිබඳව ද විමසා බැලිය යුතු ය. මුඛ පරම්පරාගත කතා වලට අනුව අතීතයේ වනයෙන් වැසී තිබූ මෙම ප්‍රදේශය ජනාවාස වීම ඇරඹී ඇත්තේ ඉන්දියාවෙන් පැමිණි ආඬි සහ සන්‍යාසි මිනිස් කණ්ඩායම් දෙකකිනි. මොවුන් අතර කාන්තාවන් සිටියේ ද නැතහොත් ඔවුන් මෙරට කාන්තාවන් විවාහ කරගත්තේ ද යන්න අවිනිශ්චිතය.

මෙම ආඬි මිනිස්සු තෙළිඟු බස කතා කරන දකුණු ඉන්දියාවේ නැගෙනහිර කොටසට වන්නට පිහිටි ආන්ද්‍රා දේශයෙන් පැමිණි අතර ඔවුන් කතා කළ තෙලිඟු බස තේරුම් ගත නොහැකි අප රටේ ගැමියෝ ඊට ආන්ද්‍රා දෙමළ යන අරුත ගෙනෙන අණ්ඩර දෙමළ යැයි කීහ. දහ අට වන සියවසේ ලියැවුණු රාජාවලියෙහි දැක්වෙන අන්දමට ද ආඬි යනු වත්මන් ආන්ද්‍රා දේශයෙන් හෙවත් තෙළිඟු රටින් පැමිණි ජන වර්ගයට කියන නමකි. එම සියවසටම අයත් උපාසක ජනාලංකාරය, සුළු පූජාවලිය වැනි කෘතීන් මඟින් අබෞද්ධ පූජක කොට්ඨාශයක් සේ නම් කොට ඇති ආඬි ජනයා පිළිබඳව මදුරාසි සරසවියේ දෙමළ ශබ්ද කෝෂයෙහි [Tamil Lexicon] අර්ථ දක්වා ඇත්තේ ද පූජක විශේෂයක් ලෙසිනි. ඔවුන් සමඟ මෙහි පැමිණි සන්‍යාසී මිනිසුන් දකුණු ඉන්දියාවේ බටහිරට වන්නට පිහිටි කේරලයෙන් පැමිණි අතර ඔවුන්ගේ මව් බස මලයාලම් විය. සන්‍යාසීන් යනුවෙන් හින්දු සංස්කෘතික ධාරාවේ  ගිහි පූජක පිරිස් හැඳින්වුණු අතර හිස මුදුනට වන්නට බැඳගත් ජටාව හෝ ඒ අයුරින් සකසා ගත් කෙස් කළඹ, මුහුණ පුරා වැඩුණු රැවුල, උඩු කය වසා ගත් සාළුව ගෙලෙහි වූ නව ගුණ වැල සේම උරෙහි එල්ලා ගත් ලෝගුව සන්‍යාසියකු ගේ විශේෂ ලක්ෂණ විය. එවක ගමින් ගමට යමින් වැසියන් ගේ රෝග පීඩා, අපල, යක්ෂ බලපෑම් ආදිය තමන් සතු මලයාලී මන්ත්‍ර ශාස්ත්‍ර බලයෙන් දුරු කළ හැකි බව පැවසූ මොවුන් කෙරෙහි මෙරට සාමාන්‍ය වැසියන් තුළ බිය හා සබැඳි ගෞරවයක් තිබූ බව පෙනෙයි. ඒ අතරේ ඔවුන් තමන්ගේ උරෙහි එල්ලෙන ලෝගුවේ බහා කුඩා දරුවන් පැහැර ගෙන යන බවට පැවැති වැරදි සමාජ විශ්වාසය මත ගම්මු මොව්හු සන්නාසි බිල්ලන් ලෙස ද හැඳින්වූහ. ජලය හා සබැඳි පූජා චාරිත්‍ර සම්ප්‍රදායක් පවත්වාගෙන ගිය මෙම සන්‍යාසීන් ඒ සඳහා හොරගොල්ල, තිබ්බටුගොඩ යන ගම්මාන මැදින් ගලා යන ඌරුවල් ඔය යොදා ගත් බව පෙනෙයි. ඒ අනුව මෙම තිබ්බටුගොඩ ග්‍රාම නාමය පූජකයන් හෙවත් තීර්ථකයන් ගොඩ බසින ලද ගොඩැල්ල හෙවත් තිත්+බට+ගොඩ යන්නෙන් බිඳී ආ එකක් බව පෙනෙයි. මෙය වඩාත් තහවුරු වනුයේ තිබ්බටුගොඩ ගමේ කෙලවර ඌරුවල් ඔය ආසන්නයේ පුරාණ පත්තිනි දේවාලයක් කේන්ද්‍ර කර ගත් පත්තිනිපිටිය නම් ප්‍රදේශයක් අදත් දක්නට ලැබීමෙනි.

අද අපගේ මාතෘකාවට බඳුන් වන මහගම මුත්තා එම ඉන්දීය සංක්‍රමණික ජනතාවගේ නායකයා වූ බව පැහැදිලි ය. එහෙත්, ඔහු ආඬි මිනිසෙකු ද නැතහොත් සන්‍යාසියෙකු ද යන්න තහවුරු කර ගැනීමට අවශ්‍ය සාක්ෂි නොමැත. නමුදු ඔහුජීවත් වූ ගම්වරය “මහ ගම” නමින් හැඳින්වීමට ඔහු ගේ එම පෞරුෂය, ප්‍රතාපය හේතු වන්නට ඇත. අදටත් ඒ අවට හොරගොල්ල සහ තිබ්බටුගොඩ වැසියෝ මෙම ප්‍රදේශය හැඳින්වීම පිණිස “ගම දිහා” යන්න යොදති.  මහගම මුත්තා පිළිබඳව කෙරෙන ඓතිහාසික විමසුම්වල දී ඔහු පහලොස් වන සියවසත් දහසය වන සියවසත් අතර කෝට්ටේ යුගයේ ජීවත් වූවකු බව පෙනී යයි. එමෙන්ම මහගම මුත්තා ඒ සමයේ උඩුගම්පල රජ කළ සකල කලා වල්ලභ රජුගේ සමීපතමයකු වූ බවට ද තොරතුරු තිබේ. සිංහල රජවරුන්ගේ නාමාවලිය අතුරින් තරමක් වෙනස් ස්වරූපයක් ගන්නා සකල කලා වල්ලභ නාමය ද ද්‍රවිඩ ඌරුවකින් යුතු වූවකි. එහි එන වල්ලභ යන වදන අධිපති යන්න හැඟවෙන වල්ලවන් යන ද්‍රවිඩ වදනට අනුරූප ආර්ය සම්භවයේ වදනකි. මෙම කලා යන්නෙන් සියලු ශාස්ත්‍ර සේම ආත්මාරක්ෂක සටන් කලා (Martial Arts)  ද හැඟවෙයි. කෘෂිකර්මාන්තයේ, වාරි කර්මාන්තයේ, සේම සටන් කලාවන් හි ද විශාරදයකු වූ රජතුමා ඒ සියලු ශාස්ත්‍ර දකුණු  ඉන්දීය ආභාෂයකින් ප්‍රගුණ කළ බව ද සාධාරණ ලෙස අනුමාන කළ හැක.

සකල කලා වල්ලභ රජු ගේ කෘෂිකාර්මික විප්ලවයේ අග්‍ර ඵලය වත්මන් ගම්පහ දිසාවේ බටහිරට වන්නට පිහිටි සුවිසල් තෙත් බිමක් විධිමත් වාරි තාක්ෂණිකක්‍රම යොදා ගනිමින් අස්වද්දන ලද මුතුරාජවෙල ය. මුතුවන් සහල් ලැබෙන රාජකීය වෙල්යාය යන අරුතින් ඊට "මුතුරාජවෙල" යන නම ලැබී තිබේ.හොරගොල්ල,තිබ්බටුගොඩ ප්‍රදේශයේ මුඛ පරම්පරාගත කතාවලට අනුව මෙම සම්බා වී මුලින්ම වගා කොට ඇත්තේ මෙම මහගම මුත්තා විසින් දැනට හොරගොල්ල, ශ්‍රී ලංකා විද්‍යාලයට පහලින් ඇති වෙල් යායේ ය. පසුව එතෙක් කිසිවකු දැක නොතිබූ මුතු වැනි වූ මෙම අපූරු සහල් වර්ගය දුටු සකල කලා වල්ලභ රජතුමා වහාම මහ ගම මුත්තා රජ වාසලට කැඳවා ඒ වී වර්ගය ගැන විමසා දැන එම වී වගාව ව්‍යාප්ත කරන ලෙස දන්වා ඇත. පසුව ඊට දියවර සපයා ගැනීම පිණිස එම කුඹුරු යාය ඉහත්තේ වැවක් ද තනා දුන් බව පැරණි මුඛ පරම්පරාගත කතාවල සඳහන් ය. අද වන විට එම වැව මුළුමනින්ම ගොඩ වී ඇතත් ශ්‍රී ලංකා විද්‍යාලයට පහලින් වැටී ඇති මාර්ගය අද ද හඳුන්වනුයේ ‘වැව් වේල්ල’ යනුවෙනි. පසුව සකල කලා වල්ලභ රජ තුමා විසින් රාජකීය කුඹුරු යායක් බවට පත් කරන ලද මෙය සම්බා කෙත යනුවෙන් හැඳින්වුණු බව කියනු ලැබේ. ශ්‍රී ලංකාවේ මුල්ම පුරාවිද්‍යා කොමසාරිස් පදවිය හෙබ වූ එච්. සී. පී. බෙල් සූරීන්ගේ කෑගලු වාර්තාව මඟින් ද කෙත යනු රාජකීය කුඹුර බව තහවුරු වෙයි. එමෙන්ම එකල මෙම සම්බා කෙතින් ලබා ගන්නා වී අස්වැන්න සකල කලා වල්ලභයන්ගේ සේම අටවන වීර පරාක්‍රමබාහු නමවන ධර්ම පරාක්‍රමබාහු ආදී සමකාලීන කෝට්ටේ රාජධානියේ රජවරුන් ප්‍රමුඛ ප්‍රභූන්ගේ ආහාරය සඳහා යොදා ගැනුණු රජ බොජුනක් වූ බව පෙනෙයි. නමුදු මහගම මුත්තා විසින් හඳුන්වා දුන් මෙම මුතුවන් සහල සහිත වී වර්ගය  සකල කලා වල්ලභයන් විසින් පසුව මුතුරාජවෙල පුරා ව්‍යාප්ත කිරීමත් සමඟ එය සාමාන්‍ය ජනතාවගේ ආහාරයක් බවට පත්ව තිබේ. මෙලෙස හොරගොල්ල සහ තිබ්බටුගොඩ යන ගම්මාන වල ජනතාවගේ නොමඳ ආදර ගෞරවයට පත් වෙමින්, සම්බා වී වගාවේ පුරෝගාමීත්වය දරමින් සහ තමන් දන්නා ගුප්ත ශාස්ත්‍ර මුල් කොට ඔවුනට සෙත සලසමින් දිගු කලක් වැජඹුණු ගමේ මුත්තා මරණයෙන් පසුව මහගම ඉහත්තාවේ ඇති නාගොඩ අල්ලිය නම් නාගස් ගොඩැල්ල වාස භවනය කරගත් ගම්බාර දෙවියකු වශයෙන් දේවත්වයට පත් ව තිබේ. එහෙත්, ඉන් පසුව ඛේදනීය අකල් මරණයකට පත් සකල කලා වල්ලභයන් ද අස්වානේ දෙවියන් නමින් දේවත්වයට පත් වන ලදුව මේ දේවත්වයන් දෙකම එකම දේවත්වයක් සේ සැලකෙන ලදී. ඊටත් පසු කලෙක දිවයිනේ ප්‍රදේශ බොහොමයක අදහනු ලබන සූනියම් ගම්බාර දේවත්වය තුළට මේ දේවත්වයන් දෙකම අවශෝෂණය වීම තුළ මහගම මුත්තාගේ දිව්‍යමය අනන්‍යතාව මුළුමනින් ගිලිහී තිබේ.

සම්පත් දායකත්වය - ප්‍රවීණ මාධ්‍යවේදී තිලක් සේනාසිංහ මහතා

පරණ පවර් සප්ලයි එකකින් වැඩක් ගනිමු - Computer Power Supply Hack

ඔබ ළඟ සමහර විට ඩෙස්ක්ටොප් වර්ගයේ පරිගණකවලට බලය ලබා දෙන, මේ වන විට ප්‍රයෝජනයක් නොගන්නා පවර් සප්ලයි එකක් තියෙන්න පුළුවන්. මේවා පරිගණකයකට බලය ලබා දෙන්න යොදා ගත්තත්, අපට එයින් වෙනත් ප්‍රයෝජන ගන්නත් ඕනෑ තරම් ක්‍රම තියෙනවා. උදාහරණයක් විදියට ඔබට නිවැරදි ආකාරයට වෝලට් 12 සරල ධාරාවක් යම් කිසි දෙයකට යොදා ගන්න අවශ්‍ය වුනොත්, වෙළෙඳ පළෙන් වොල්ට් 12 පවර් සප්ලයි එකක් මිලදී ගන්නේ නැතිව, පරිගණකයක ඇති පවර් සප්ලයි එකකින් මේ අවශ්‍යතාව සපුරා ගන්නට පුළුවන්. අනෙක පරිගණක පවර් සප්ලයි එකකින් වෝල්ට් 12 සරල ධාරවක් හැරුණු එයට වඩා අඩු වෝල්ටීයතාවන් ද ලබා ගැනීමේ හැකියාව තිබෙනවා. බොහෝ අය මේ ගැන දන්නවා  වුනත් නොදන්නා කෙනෙක් හිටියොත්, එහෙම අයට ප්‍රයෝජනයක් වෙයි කියලා හිතලා මම මේ සටහන ලියන්න හිතුවා.

මේ ඉහළ පින්තූරයෙන් පෙනෙන්නේ මා ළඟ තිබුණු පවර් සප්ලයි එක. මෙයින් ප්‍රයෝජනයක් ගන්නේ නැති නිසාත්, මට වෝල්ට් 12 සරල ධාරාවක් ලබා ගැනීමේ අවශ්‍යතාවක් ඇති වූ නිසාත්, මම කල්පනා කළා මෙයින් ඒ අවශ්‍යතාව ඉටු කරගන්න. මේ කියන්න යන කතාව ඔබටත් ප්‍රයෝජනයක් වෙයි කියලා මා හිතනවා.

පවර් සප්ලයි එකක් පරිගණක පද්ධතියෙන් ගලවා ඉවත් කර ගත් විට මෙන්න මේ ආකාරයකට දකින්න පුළුවන්. එහි විවිධ වර්ණවලින් නොසෑහෙන්න වයර් තියෙන බව ඔබ දන්නවා. මේ වයර්වලින් එකිනෙකට වෙනස් වෝල්ටීයතාවන් ලබා ගන්න පුළුවන්. ඒ ගැන විස්තරයක් පවර් සප්ලයි එකේ පැත්තක සඳහන් වෙනවා. පහත තියෙන්නේ එහෙම විස්තරයක්

 මේ පින්තූරයට අනුව අපට විවිධ වර්ණවල වයර්වලින් ලැබෙන වෝලටීයතාව දැනගන්නට පුළුවන්. 

දම් - වෝල්ට් +3.3/ ඇම්පියර් 7

කහ - වෝල්ට් +12/ඇම්පියර් 12

නිල් - වෝල්ට් -12/ඇම්පියර් 0.5

රතු - වෝල්ට් +5/ඇම්පියර් 12

සුදු - වෝල්ට් -5/ඇම්පියර් 0.5

දම් - වෝල්ට් +5/ඇම්පියර් 2 (SB - ස්ටෑන්ඞ් බයි - පවර් සප්ලයි එකේ අනෙක් සියල්ල අක්‍රියාකාරී තත්වයෙන් පැවතුනත් මේ වයර් එකෙන් සැපයෙන බලය සූදානම් තත්වයෙන් පවතිනවා. මෙයට ඒ නමින් පවසන්නේ ඒ නිසයි)

කලු - පොදු 

කොළ - පණ ගැන්වීම

අලු - PG (PG කියන්නේ පවර් ගුඞ් කියන අදහස. පවර් සප්ලයි එකෙන් සැපයෙන් සියලු වෝල්ටීයතාවන් හොඳ තත්වයෙන් පවතින බව පරිගණකයේ මදර් බෝඞ් එකට දැනුම් දෙන්න යොදා ගන්නේ මේ වයර් එකෙන් ලැබෙන විදුලියෙනුයි. 

මේ විස්තරය කියවා ගත්තාට පසු අර පවර් සප්ලයි එකේ නොසෑහෙන්න තියෙන වයර් ටික මෙන්න මේ විදියට පහසුවෙන් වෙන් කරගන්න පුළුවන්. 

මේ වයර් අතරින් කොළ පාට වයර් එක විශේෂයි. ඒ වයර් එක තමයි පවර් සප්ලයි එක පණ ගන්වන්න යොදා ගන්නේ. කලු එක වයර් එකක් සහ මේ කොළ වයර් එක මේ පහත සඳහන් ආකාරයට එකිනෙක සම්බන්ධ කිරීමෙන් පවර් සප්ලයි එක පණ ගන්වන්න පුළුවන්. 

ඊට පස්සේ අපට පුළුවන් මල්ටි මීටරයක් භාවිතයෙන් මෙයින් සැපයෙන වොල්ටීයතාවන් මැන බලන්න. 

මෙය අපට පිළිවෙලකට සකස් කර ගැනීමෙන් පසුව අපට අවශ්‍ය පරිදි වෝල්ටීයතා කීපයකින්ම බලය ලබා ගැනීමේ හැකියාවක් තිබෙනවා

අපේ ගමේ මෑතකදී සිදුවූ මරණ විශ්ලේෂණය

අපේ ගමේ මෑතක දී සිදු වූ මරණ පිළිබඳ විශ්ලේෂණයක් පහතින් ඉදිරිපත් කෙරේ. එහි ඇත්තේ මරණයට හේතුව යැයි අප සිතන දේ සහ ඒ පිළිබඳ වෛද්‍ය වාර්තාව පවසන කාරණාව බව කරුණාවෙන් සැලකිය යුතු ය.

1. සිමියොන් මාමාගේ මරණය

සිමියොන් මාමාගේ වයස අවුරුදු 78 කි. වකුගඩු අමාරුවකින් කාලයක සිට පෙලුනේ ය.

මරණයට හේතුව

ගමේ අය හිතන හැටි

නාන කාමරයේ ඇද වැටී හිස බිම වැදීම නිසා

වෛද්‍ය වාර්තාව

නාන කාමරයේ ඇද වැටී හිස බිම වැදීමෙන් ඇති වූ වකුගඩු සංකූලතාව නිසා මරණයට පත් වී තිබේ.

2. ගර්ටි නෝනාගේ මරණය

ගර්ටි නෝනාගේ වයස අවුරුදු 80 කි. දියවැඩියාවෙන් කාලයක සිට පෙලුණාය.

මරණයට හේතුව

ගමේ අය හිතන හැටි

පාර අයිනේ සිටිය දී වාහනයක හැපීම නිසා

වෛද්‍ය වාර්තාව

පාර අයිනේ සිටිය දී වාහනයක හැපීම නිසා ඇති වූ දියවැඩියා සංකූලතාවයෙන් මරණයට පත් වී තිබේ.

3. ලකී අයියාගේ මරණය

ලකී අයියාගේ වයස අවුරුදු 60කි. අධික ලෙස මත්පැන් පානය කළ නිසා සිරෝසිස් රෝගයෙන් පෙලුනේය.

මරණයට හේතුව

ගමේ අය හිතන හැටි

මත්පැන් බී ඇති වූ බහින්බස්වීමක දී සිදු වූ පිහි ඇනුමක් නිසා

වෛද්‍ය වාර්තාව

මත්පැන් බී ඇති වූ බහින්බස්වීමක දී සිදු වූ පිහි ඇනුමක් නිසා සිරෝසිස් රෝගය උත්සන්න වීමෙන් මරණයට පත් ව තිබේ.

4. මිසිලින් නැන්දාගේ මරණය

මිසිලින් නැන්දාගේ වයස අවුරුදු 78 කි. ඇය බොහෝ කාලයක සිට අධික රුධිර පීඩනයෙන් පෙලුණාය.

මරණයට හේතුව

ගමේ අය හිතන හැටි

වත්ත පහළ පාලු ළිඳට ඇද වැටීම නිසා

වෛද්‍ය වාර්තාව

වත්ත පහළ පාලු ළිඳට ඇද වැටීම නිසා අධික රුධිර පීඩනය සංකූලතාවයෙන් මරණයට පත් ව තිබේ.

5. ගුණපාලගේ මරණය

ගුණපාලට වයස අවුරුදු 60 කි. අධික අලස පුද්ගලෙයකි. දන්නා තරමින් විශේෂ රෝගයක් නොමැත.

මරණයට හේතුව

ගමේ අය හිතන හැටි

කොවිඞ් 19 වැලඳීම නිසා

වෛද්‍ය වාර්තාව

කොවිඞ් 19 වැලඳීම හේතුවෙන් ඇති වූ අලස සංකුලතාව උත්සන්න වීමෙන් මරණයට පත් ව තිබේ. 

බල සැපයුම් ස්ථායිකාරක උපාංගයක් - DC-DC Automatic Voltage Stabilizer 5-32V to 12V 3A 36W Power Converter Regulator

මේ උපාංගය ගැන විස්තර මම හොයා ගත්තේ Ebay එකෙන්. විස්තර හොයාගෙන ගෙන්න ගත්තා මේ කොවිඞ් වසංගතය එන්න ටික කාලෙකට කලින්. මේ උපාංගය ගැන කියන්න හිතුවේ වෝල්ට් 12 ස්ථායි බල සැපයුමක් හදාගන්න ඉන්න කෙනෙකුට ප්‍රයෝජනයක් වේවි කියලා හිතලයි.

මේ වගේ උපාංගයක් මට ඕන කළේ නිවසේ ඇති CCTV කැමරා පද්ධතිය විදුලි බලය ඇණ හිටි අවස්ථාවක දී අඛණ්ඩව ක්‍රියාත්මක කරවන්න ඕනෑ වුණු නිසයි. සාමාන්‍යයෙන් හැම තැනකම මේ කාරණය සඳහා යොදා ගන්නේ UPS එකක්. නමුත් එයින් දීර්ඝ වේලාවක් බලය ලබා ගන්න බැහැ. මම CCTV කැමරා පද්ධතියට මධ්‍යම බල සැපයුම් ඒකකයක් (Centralized Power Supply) සවි කළේ මෙවැනි දෙයක් ඉදිරියේ දී සාදාගන්නවාය කියන අරමුණ ඇතිවයි. 

මේ උපාංගයේ තියෙන විශේෂත්වය තමයි මෙයට වෝල්ට් 6 - 32 දක්වා සරල ධාරා සැපයුමක් ලබා දීමේ දී වෝල්ට් 12  ඇම්පියර් 3 ක බල සැපයුමක් ලබා ගත හැකි වීම. අපේ රටේ මුදලින් රුපියල් 1800ක් විතර වැය කරලා ඊබේ එකෙන් මේක ලබා ගන්න පුළුවන්. මේ දවස්වල නම් චිනයේ සිට භාණ්ඩ ගෙන්වා ගැනීම ගැටලුවක්.

අපේ නිවසේ සූර්ය පැනලවලින් බැටරි ආරෝපණ පද්ධතියක් කලින් සිට සවි කොට තිබුණු නිසා මේ උපාංගයට වෝල්ට් 12 බලසැපයුමක් ලබා දෙන්න අමතරව කළ යුතු දෙයක් තිබුණේ නැහැ.

පහළින් තියෙන්නේ මා සාදා ගත් බල සැපයුම. මෙහි රිලේ තුනක් තිබෙනවා. විදුලි බලය ඇණ හිටි අවස්ථාවක දී මේ රිලේ ක්‍රියාත්මක වී  බැටරියෙන් ලබා දෙන බලයෙන් DVR එක සහ කැමරා පද්ධතිය අඛණ්ඩව ක්‍රියාත්මක වෙනවා. මේ සඳහා ස්ථායි බලසැපයුමක් ලබා ගැනීම තමයි මේ ගෙන්වා ගත් උපාංගයෙන් සිදු කරන්නේ.

බැටරියෙන් එන බලය කෙලින්ම මේ පද්ධතියට ලබාදෙන එක අවදානම්. එයට හේතුව බැටරියේ ඇම්පියර් ප්‍රමාණය වැඩි නිසා සුළු ගැටලුවක දී වුවත් DVR එක සහ කැමරා විනාශ වී යා හැකි නිසයි. මේ උපාංගයෙන් නිතරම වෝල්ට් 12 ක් සහ ඇම්පියර් 3 ක් පමණක් ලබා දෙන නිසා ඒ අවදානම පැන නගින්නේ නැහැ. රවුටරයට බලය ලබා ගන්නත් මේ හරහාම පුළුවන්. එවිට විදුලි බලය ඇණ හිටියත් නිවසේ අන්තර්ජාල  සම්බන්ධය බිඳී යන්නේ නැහැ.

මීට අමතරව ඔබ කැමති වෙනත් ඕනෑම ආකාරයේ බල සැපයුමකටත් මෙය භාවිත කළ හැකියි. 

කොවිඞ් - 19 ජලයෙන් සම්ප්‍රේෂණය විය හැකිද? - Covid-19 Can it be transmitted by water?

කොවිඩි 19 ආසාදනය වීමෙන් මිය යන පුද්ගලයන්ගේ සිරුරු භූමදානය කිරීම ගැන මේ දිනවල දැඩි කතා බහකට ලක් වෙනවා. විශාල භූමි ප්‍රමාණයක් හිමි ඒ නිසාම ජන ඝනත්වය අඩු රටවල මෙවැනි සිරුරු භූමදානය කළත්, එවැනි තත්වයක් නොමැති අප රටේ එසේ කිරීම සෞඛ්‍ය ගැටලු ඇති කරන්නට හේතු වන විශේෂඥයන් පවසනවා. නමුත් මෙවැනි අවදානමක් පිළිගන්නවාට වඩා සිය ආගමික වතාවත් ගැන සැලකිල්ලක් දක්වන අන්තගාමී කොටස්වල බලපෑම හමුවේ රජය ද දැන් ‘නැවෙන’ තකවයකට පත් ව ඇති බව පෙනෙනවා. මේ සම්බන්ධව අප රටේ විශේෂඥයන් දක්වන අදහසකට වඩා වෙනත් රටක විශේෂඥයන් දක්වන අදහසක් ඉදිරිපත්කිරීම වඩා සුදුසු යැයි සිතුණේ ඒ නිසයි. මේ විස්තරය මා උපුටා ගත්තේ https://www.news-medical.net වෙඞ් අඩවියේ පළ වී තිබුණු Dire warning on contamination of water and COVID-19 spread  නම් ලිපියෙන්. ලිපිය ලියා තිබුණේ ලිජි තෝමස් වෛද්‍යවරියක විසින්. එහි සඳහන් තොරතුරු සැකෙවින් මෙසේ ඉදිරිපත් කළ හැකියි. මෙය පළ වී තිබුණේ පසුගිය ජූනි මාසයේ. 

“මුළු ලොව පුරා කොවිඞ් 19 ව්‍යාප්ත වීමත් සමග, එය සම්ප්‍රේෂණය වීමේ ක්‍රම පිළිබඳ විද්‍යාඥයන් සොයා බලමින් සිටිනවා. එක්සත් රාජධානියේ සහ පෝලන්තයේ විද්‍යාඥයන් මෑතක දී නිකුත් කළ වාර්තාවකින් පෙන්නුම් කළේ එය ජලයේ දින 25 ක පමණ කාලයක් පැවතිය හැකි බවයි. මේ නිසා එක් එක් රටවල පවතින පාරිසරික තත්වයට අනුව කොවිඞ් 19 වෛරසය ජලය ඔස්සේ සම්ප්‍රේෂණය වීමේ යම් අවදානමක් තිබෙනවා. 

මෙය මිරිදියේ වැඩි වශයෙන් දක්නට ලැබෙනව බවයි පැවසෙන්නේ. එය වෛරසය නැවත හිස ඔසවන්නට හේතුවක්. 

මෙවැනි වාර්තාවක් ඉක්වfදා්රයෙන් ද ලැබෙනවා. එහි විද්‍යාඥයන් වාර්තා කරන්නේ එරට අගනුවර හරහා ගමන් ගන්නා ගංගාවන්ගේ ජලයෙන් කොවිඞ් 19 වෛරසය සොයා ගන්නට හැකි වූ බවයි. මේ නිසා සංවර්ධනය වෙමින් පවතින රටවල මේ වෛසරය ව්‍යාප්ත වීමේ වැඩි අවදානමක් පවතිනවා.”

මේ ඒ ලිපියෙන් උපුටා ගත් සංක්ෂිප්තයක් පමණයි. මෙවැනි වාර්තා අන්තර්ජාලයේ වෛද්‍ය සහ විද්‍යාත්මක කරුණු අඩංගු වෙබ් අඩවිවලින් ඕනෑ තරම් සොයා ගන්නට පුළුවන්.

ලෝක සෞඛ්‍ය සංවිධානය නිර්දේශ කරන්නේ කොවිඞ් - 19 මළ සිරුර භූමදානය කරන්නේ නම් ඒවා දැඩිව මුද්‍රා තබා පොලිතින්වල අසුරා භූමදානය කළ යුතු බවයි. කෙසේ නමුත් එවැනි ක්‍රමවේද සෑම විටම අනුගමනය කිරිමක් සිදුවේ ද යන්න පිළිබඳ සහතිකයක් දෙන්නට කිසිවෙකුටත් හැකියාවක් නැහැ. ඒ නිසා භූමදානය කරන මළ සිරුරවලින් මේ වෛරසය භූගත ජලයට එක් නොවේ යැයි සහතිකයක් දෙන්නට හැකියාවක් නැහැ.  ශ්‍රී ජයවර්ධනපුර විශ්වවිද්‍යාලයේ මහාචාර්යවරියක වන මෙත්තිකා විතාන මහත්මිය සඳහන් කරන්නේ 1918 වසරේ ලොව පුරා ව්‍යාප්ත වූ ‘ස්පාඤ්ඤ උණ’ රෝගයෙන් මියගියවුන්ගේ සිරුරු මිහිදන් කළ ස්ථානවලින් ලබා ගත් ඩීඑන්ඒ නියැඳිවල එම වෛරසය තිබී මෑතකදී සොයා ගත් බවයි.

විශේෂඥයන්ගේ හා ලොව පුරා ලැබෙන වාර්තාවලින් පැවසිය හැක්කේ කොවිඩි 19 මළ සිරුරු භූමදානය තීරණය කරන්නේ නම්, එය කිසිසේත්ම නුවණක්කාර දෙයක් නම් නොවන බවයි.

ආණ්ඩුව බස්නාහිර පළාත වැසීමේ කුණුහරුපය

ආණ්ඩුව බස්නාහිර පළාත වැසීමට ගත් තීරණය කුණුහරුපයක් කියා මට සිතෙන්නේ ය. ඒ ගැන විස්තර කරනවා නම් මේ ආකාරය ය.

ආණ්ඩුව බස්නාහිර පළාතෙන් පිටවීම තහනම් කියා ප්‍රවෘත්තිවලින් කිව්වේ ය. එසේ කියන්නට  ඇත්තේ බස්නාහිර පළාතේ කොවිඞ් ඉහළ යාම නිසා, එහි සිටින කොවිඞ් ආසාදනය වූ අය වෙන පළාත්වලට ඇතුළු වී මහා අලකලංචියක් වේ යැයි ආණ්ඩුව සිතන නිසා යැයි මම සිතුවෙමි ය. කෙසේ නමුත් බස්නාහිරට ඇතුළුවන්නට පුළුවන් ද බැරි ද කියා පැහැදිලිව කිව්වේ නැති ය. ස්ටේෂන් එකෙන් ඇසූ විට ස්ටේෂන් මාස්ටර් මහතා පැවසුවේ “කෝච්චි යනවා ය. හවසට ආපහු එයිද කියා දන්නේ නැති ය” කියා ය. මේ නිසා වැඩට ගියොත් කොළඹටම වී සිටින්නට සිදු වේ යැයි බයක් දැනුණු නිසා වැඩට ගියේ නැත්තෙමි ය. 

මා සිටින වෙන්නප්පුව පළාතේ සිට කොච්චිකඬේ පාළම පැන්න සැනින් පිවිසෙන්නේ බස්නාහිර පළාතට ය. ඊයේ උදේ කෝච්චි යනවා දැයි ඇහුම්කම් දීගෙන සිටියෙමි ය. උදේ කෝච්චි සියල්ලම කොළඹ බලා යනවා ඇසුණි ය. “එහෙනම් යන එවුන් පලයව්. තොපි කොළඹට වී ඉඳපියව්” කියා සිතින් සිතමින් වියරු ජොලියකින් පසුවුවෙමි ය. ජොලිය තිබුණේ හවස් වන තුරු විතර ය. කොළඹ ගිය කෝච්චි සියල්ල ආපහු ආවේ ය. 

දැන ගන්නට ලැබුණු විස්තරය වූයේ  කොළඹ සිට සෑම දෙනෙක්ම කිසි කරදරයක් නැතිවම පුත්තලම දක්වාම ගමන් කළ බව ය. මේ අතරේ බස්නාහිර සිටි කොව්ඩි අය ද ආවා ද නැද්ද තියා සොයන්නට කිසිවෙක් සිටියේ නැති බව ද දැනගන්නට ලැබුණේ ය.

අද උදේ ද ඊයේ වාගේම කෝච්චි ගියේ ය. අද හවස ද මේ විදියටම ගිය කෝච්චි කිසිදු කරදරයක් නොමැතිවම ආපසු එනවා නිසැක ය.

එසේ හෙයින් ආණ්ඩුව බස්නාහිර පළාතට ඇතුළුවීම කෙසේ වෙතත් පිටවීම තහනම් කළ කුණුහරුපය තවමත් තේරුම් ගැනීමට බැරි වී අඤ්ඤකොරොස් තත්වයකින් පසුවෙමි ය.

මාස්ක්වාදය Vs. මාක්ස්වාදය - Maskism Vs. Marxism

මාක්ස්වාදය සොයා ගත්තේ කාල් මාක්ස් ය. නමුත් මාස්ක්වාදය සොයා ගත්තේ චීන වෛද්‍යවරයකු වූ ‘වූ ලියන්ඩේ’ ය. මාක්ස්වාදයටත් වඩා මාස්ක්වාදය දැන් ලෝකයේ පැතිරිලා ය. ඒ නිසා මාස්ක්වාදයේ අනුගාමිකයෙකු වීමෙන් ජීවිත දානය ද හිමි වන්නේ ය.

2020 වසර එළැඹෙද් දී මාක්ස්ටත් වඩා මාස්ක් ලෝකයේ ජනප්‍රිය වේ යැයි මාක්ස්වාදීන් ද සිතන්නට  නැති ය. 2020 වසරේ ලෝකයේ වැඩියෙන්ම මාකට් වී ඇත්තේ මාස්ක් ය.  මාක්ස්වාදීන්ට පවා මාස්ක්වාදයෙන් ගැළවිල්ලක් නැති ය. 

සමහර කඩවල බෝඞ් ලෑලිවල ලියා තිබෙන්නේ ‘මාක්ස් විකිණීමට ඇත’ කියා ය. ‘මාක්ස් විකුණන්න දෙයක් නෑ මුදලාලි. සමාජවාදී කට්ටිය මාක්ස් වික්කේ සෑහෙන කාලෙකට ඉස්සරය’ කියා මුහුණු පොතේ කවුරු හරි නොසන්ඩාලයෙක් දමා තිබුණා ද මතක ය. මාක්ස් විකිණී අහවර නිසා මාස්ක් මේ තරම් මාකට් විම ගැන පුදුමයක් ද නැති ය.

පැරණි රෝමයේ මේ වගේ මාස්ක් ද තිබුණේ ය. ඒත් ඒවා පාවිච්චි කළේ වෛරසයෙන් බේරීමට නොවේ ය. හතුරන්ගෙන් මුහුණ බේරා ගන්නට ය.

මාස්ක් එකක් ගැන ලෝකයෙන් මුලින් ම දැනගන්නට ලැබෙන්නේ ක්‍රි.පූ. 6 වැනි සියවසෙන් බව අන්තර්ජාලයේ තිබුණේ ය. මේ කාලයට අයිති පර්සියානු සොහොන් ගෙවල්වල චිත්‍ර ඇඳ තිබෙන අතර මුහුණට උඩින් රෙද්දක් දමාගත් චිත්‍ර ද ඒ අතර තිබෙනවා ය. 

කොහොම වුනත් අද තියෙන මාස්ක් එකට ටිකක් සමාන මාස්ක් එකක් හමුවන්නේ චීනයෙන් ය. ඒ ක්‍රි.ව. 1279 - 1368 ත් අතර සමයේ පැවැති යුවාන් රාජ වංශය කාලයේ ය. සේද රෙද්දකින් මසා රත්තරන් නූලකින් හැඩ කළ මාස්ක් එකක් ගැන මේ කාලයෙන් අසන්නට ලැබෙනවා ය. 

ඉතාලි ජාතික මාර්කෝ පෝලෝ ද මේ කතාවම කියනවා ය. මාර්කෝ පෝලෝ චීනයට ගොස් තිබුණේ මේ රාජ වංශය තිබුණු කාලයේම ය. චීන අධිරාජයාට ආහාර පිළිගන්වන සේවක සේවිකාවන් අනිවාර්යයෙන්ම මාස්ක් එකක් පැළැඳ සිටිය යුතුය කියා ඔහු ලියා තිබෙනවා ය. (කොරෝනාව චීනයෙන් ඉතාලියට කෙලින්ම ගියේ මේ සම්බන්ධය නිසා කියා ද කියන්නට බැරි ය.)

14 වැනි සියවසේ දී ‘කලු මරණ වසංගතය’ යුරෝපය පුරා පැතිරුණු බව අපි දන්නවා ය. මේ කාලයේ ද මාස්ක්වල ඕනෑ කම ඇති වුණේ ය. 16 වැනි සියවසේ සිටි ප්‍රංශ දොස්තර මහතෙකු වූ චාල්ස් ඩි ලෝර්ම් ඒ කාලයේ ‘බීට් මාස්ක්’ කියා එකක් හැදුවේ ය. 

1827 දී සිටි ස්කොට් විද්‍යාඥයකු වූ රොබට් බ්‍රවුන් ද මාස්ක් එකක් නිර්මාණය කරමින් පැවසුවේ මෙය දූවිල්ල ට හොඳ බව ය. 1848 දී ඇමරිකානුවකු වූ ලුවිස් හැස්ලි මාස්ක්වලට මුල්ම පේටන්ට් බලපත්‍රය ලබා ගත් බව අසන්නට ලැබෙනවා ය. 

ලෝකයේ කවුරුත් දන්නා විද්‍යාඥයකු වූ ලුවී පාස්චර් 1861 දී කීවේ බැක්ටීරියා කියා දෙයක් තියෙනවා ය, එයින් ගැළවෙන්නට මාස්ක් දමන්නට ඕනෑ බව ය. 

1899 සිටි ප්‍රංශ විද්‍යාඥයකු තට්ටු 6 ක් ඇති මාස්ක් එකක් සෑදුවේ ය. තට්ටු කියන්නේ ලේයර් හෙවත් ස්තර ය. 

කොහොම වුනත් අද කාලයේ අප දකින විදියේ මාස්ක් එකක් මුලින්ම සාදා මාස්ක්වාදය ලෝකයට හඳුන්වා දුන්නේ මෙහි මුලින්ම සඳහන් කළ චීන වෛද්‍යවරයා වූ වූ ලියන්ඩේ ය. ඒ 1644 - 1911 දක්වා ම චිනයේ පැවති කිං රාජ වංශය කාලයේ ය. 

දැන් පෙනෙන්නට තියෙන හැටියට චීනා මාස්ක් ගැන ප්ලෑන් ගසා ඇත්තේ සෑහෙන කලක සිට ය. මේ විදියට ඇති වූ මාස්ක්වාදය ගැන දැන් මාක්ස්වාදයටත් වඩා කතා කරනවා ය. එක් එක් විදියේ මාස්ක් ද දකින්නට තිබෙනවා ය. ඒ විතරක් ද, මාක්ස්වාදයේ පියාගේ රූපය ද දැන් මාස්ක්වල තිබෙනවා ය. ඒ කියන්නේ මාස්ක් උඩ මාක්ස් ඉන්නවා කියන එක ය. මාක්ස් දකින්නටත් මාස්ක් ගන්න ඕනෑ කියා ද ඕනෑ නම් කියන්නට පුළුවන් ය. මාක්ස්, එංගල්ස් සහ ලෙනින්  ඉන්නා මාස්ක් ද තිබෙනවා ය. 

මේවා අස්සේ මාස්ක් මෝස්තර ද එනවා ය. ඒවා ගැන පොඩි විස්තරයක් මෙතනින් කියවන්නට පුළුවන් ය.

මාස්ක්වාදය ගැන මට ලියන්න සිතුණේ මෙහෙම දෙයක් නිසා මම එසේ ලිව්වෙමි ය. මාස්ක්වාදය සමග මාක්ස්වාදය ද ලියූ නිසා මාක්ස්වාදීන් සහ සමාජවාදීන් උරණ නොවේ යැයි සිතෙන්නෙමි ය.

උස් අඩි පාවහන් නිතර පැළඳීම අහිතකරද? - Is it bad to wear high heels ?

  ගැහැනිය යනු සහජයෙන්ම විලාසිතාවන්ට ප්‍රිය කරන්නා වූ සත්වයෙකි. මෙය ලොකු කුඩා බාල මහළු යන කොයි කවුරුත් අතර අඩුවැඩි වශයෙන් පවතින බැව් පෙනේ. තම රුව කැපී පෙනීම සඳහා පවතින සෑම විලාසිතාවක් අනුගමනය කරන්නට ඔවුන් අකැමතිවන්නේ නැත. නමුත් මේ පවතින ඇතැම් විලාසිතාවන් එහි බාහිරින් දකින සුන්දරත්වය පසුපස අවදානම් සහිත අවස්ථා ද පවතින බැව් ඇතැමුන් දන්නේ නැත. එසේ නොදැන සිටීම සෞඛ්‍යය අතින් ගත් කල අහිතකර තත්වයකි. අප මේ කතා කරන්නට යන්නේ ද ඇතැම් අය දැන දැනත් අනුගමනය කරනා, ඇතැම් අය නොදැන අනුගමනය කරනා අවදානම් සහිත විලාසිතාවක් පිළිබඳව ය. එය අන් කිසිවක් නොව උස් අඩි පාවහන් හෙවත් ‛හයි හීල්ස්’ (High Heels ) පැළැඳීමයි.

 

උස් අඩි පාවහන් පැළැඳීම කාන්තාවන් අතර ජනප්‍රිය වන්නට පටන් ගැනුෙණ් අද ඊයේක නොවේ. ක්‍රි.පූ. 200 දී පවා ‛කොතෝර්නි’ නම් වූ උස් අඩි පාවහන් වර්ගයක් රෝමයේ ප්‍රචලිතව පැවති බැව් ඉතිහාසයේ සඳහන් වේ. එතරම් කාලයක් තිස්සේ මෙය ජනප්‍රියව පවතින්නට ඇත්තේ උස් අඩි පාවහන් පැළැඳීම නිසා කාන්තාවන්ගේ රුවෙහි කැපී පෙනෙන වෙනසක් දක්නට හැකි වූ නිසා වන්නට ඇත. ඔවුනගේ පවතින ප්‍රමාණයට වඩා වැඩි උසක් දක්නට හැකිවීම බොහෝ දෙනෙකුගේ ආකර්ෂණයට හේතුවක් විය. නමුත් මෙතරම් කාලයක් තිස්සේ ජනප්‍රියව පැවති උස් අඩි පැවහන් පැළැඳීමෙහි අහිතකර තත්වය පිළිබඳ දැනගන්නට ලැබුණේ සාපේක්ෂ වශයෙන් මෑතකාලයේදී ය. උස් අඩි පාවහන් නිසා පාදවල පමණක් නොව පිටකොන්දේ ද සුව නොවන තරමේ ආබාධ ඇතිවන්නට හේතුවන බැව් දැන් සොයාගෙන තිබේ. ඇතැම්විට ඔබ මේ පිළිබඳව දැනටමත් දන්නවා වන්නට ද පුළුවන.

 

අපගේ පාදය ප්‍රධාන අස්ථි 26 කින් ද, සන්ධි 33 කින් ද, අස්ථි බන්ධන 107 කින් ද, මාංශ පේශී හා බලනහර 19 කින් ද සමන්විත වේ. මිනිසාගේ පාදය විස්මිත නිර්මාණයක් බැව් ලියනාඩෝ ඩාවින්සි වරෙක පවසා තිබිණි.

 

විවිධ භූමි ස්වභාවයන් මත ඔබ පියමැන යද්දී හෝ දිව යද්දී හෝ සිරුර සමබරව පවත්වාගෙන යන්නට මහඟු හැකියාවක් ලැබෙන අයුරින් පාද නිර්මාණය වී තිබේ.  ඔබ සැතපුමක් පයින් ඇවිද ගියේ නම් ඔබගේ පාද 1,800 වාරයක් පොලොෙව් ගැටෙන බැව් ඔබ නොදැන ඉන්නට ඇත. යම්කිසි පුද්ගලයෙක් දිනකට සැතපුම් 5ක් ඇවිද්දේ නම් ඒ තැනැත්තා තබා ඇති පියවර ගණන ආසන්න වශයෙන් 8,000 - 10,000 අතර වේ. එමෙන්ම ඔබ පයින් ඇවිද යද්දී එක් පාදයකට ඔබගේ සිරුරේ බරමෙන් එකහමාරක ගුණයක් දැනේ. ඔබ දිව යද්දී මෙය සිව්ගුණයකින් වැඩි වේ. ඔබගේ පාදවලට කෙතරම් බරක් දරාගන්නට සිදුව ඇතිදැයි දැන් ඔබට වැටහෙනවා ඇත. එබැවින් ඔබගේ ශරීර සෞඛ්‍යය යහමින් පවත්වාගෙන යාම සඳහා සුවපහසු පාවහන් පැළැඳීම කළයුතු දෙයකි. ඔබ හැකිතාක් සුවපහසු පාවහන් පැළඳුව ද පාදවලට යම් ප්‍රමාණයක ආතතියක් ලැබීම වළක්වාලිය හැකි දෙයක් නොවේ. තත්වය මෙසේ නම්  අස්ථි 26කින් සමන්විත සම්පූර්ණම පාදය මත ඔබගේ සිරුරේ බර රඳාපවතිනවාට වඩා උස් අඩි පාවහන් පළඳා ඇඟිලි මතට පමණක් බර පැටවීම මඟින් පාදවලට කෙතරම් වෙහෙසක් දැනෙන්නේ දැයි ඔබට දැන් අවබෝධවන්නට ඇත.

 

උස් අඩි පාවහන් පැළැඳීම මගින් වැරදි ජෛව යාන්ත්‍රණයක් සිදුවනවා පමණක් නොව ඔබගේ වළලුකර, උකුළු ප්‍රදේශය සහ සමස්ත කොඳු නාරටියම ඉමහත් වෙහෙසකට පත් වේ. මෙම වෙහෙස කාලයක් තිස්සේ පැවතීම මඟින් සදාකාලිකව පවතින ආබාධ තත්වයන් ඇති වේ. ඔබගේ පාදවල සිට හිස දක්වා ම පවතින්නේ එකිනෙකට සම්බන්ධ වූ ක්‍රියාවලියකි. මේ සියල්ල සිදුවිය යුතු ආකාරයෙන් සිදුවන විට එය සිරුරට පහසුවකි. නමුත් උස් අඩි පාවහන් පැළඳි විට මෙම ක්‍රියාවලිය නියමාකාරයෙන් සිදුවන්නේ නැත. පාද මත සිරුරේ බර සුවපහසු ලෙසින් බෙදීයාමේ ක්‍රියාවලිය එතැන දී ඇණහිටී. එතැන් පටන් සියලු ක්‍රියාවලීන් සිදුවිය යුතු අන්දමින් සිදුවන්නේ නැත. මේ නිසා සිරුර අමතර වෙහෙසකට පත්වනවා පමණක් නොව අනවශ්‍ය ක්ෂයවීමකට ද ලක්වේ. එමෙන්ම ඇතැම් කාන්තාවන්ගේ ගෙල පිටුපස මාංශ පේශීන් තද බවකට පත්වනු ද දැකිය හැකි දෙයකි. මෙය නිධන්ගත හිසරදයකට හේතු වේ.

මීට අමතරව උස් අඩි පාවහන් පැළැඳීම නිසා ඔබේ සිරුරේ සමබරතාවය පවත්වාගෙන යාම සඳහා සිරුරට අමතර වෙහෙසක් දැරීමට සිදු වේ. මෙය උකුළට මෙන්ම දණහිස්වලටද වෙහෙසකි. ඇතැම්විට ඔබ නොදන්නේ වුව ද උස් අඩි පාවහන් පැළදීමේ දී දණහිස මඳක් නැවී පවතී. ඔබගේ කොඳු නාරටිය සාමාන්‍ය තත්වයේදී ක්‍රියාත්මක වන්නේ සිරුරේ කම්පන උරාගන්නා අවයවයක් වශයෙනි. කොඳුනාරටියේ සාමාන්‍ය වක්‍රතාවය පවත්වා ගැනීම තුළින් එය මෙම ක්‍රියාවලිය සිදුකරයි. නමුත් උස් අඩි පාවහන් පැළැඳීමේ දී මෙම පැවතිය යුතු වක්‍රතාවය රැඳෙන්නේ නැත. එවිට කොඳු නාරටියට අමතර බරක් මෙන්ම වෙහෙසක් දරන්නට ද සිදුවේ. එය රෝග රැසකටම හේතුවකි.

 

උස් අඩි පාවහන් පැළැඳීමේදී ඔබගේ සිරුරේ බර දරාගන්නේ පාදයේ ඇඟිලිවලින් පමණක් වීම නිසා එයට දැනෙන්නාවූ වෙහෙස අධික ය. පාදවල ඇඟිළි ඉමහත් වෙහෙසකට පත්වීම හැරුණු විට ඒවා විකෘති තත්වයට පත්වන්නට ද පුළුවන.

 

මේ නිසා කාන්තාවන්ට පාදවල ආබාධ වැළඳීමේ අවදානම පිරිමින්ට මෙන් සිව්ගුණයක් පමණ වේ. උස් අඩි පාවහන් පැළඳීමේ ප්‍රතිවිපාක පිළිබඳ දැනගන්නට මේ කරුණු ප්‍රමාණවත් යැයි සිතමු. එසේ නම් පාදවල සෞඛ්‍යය වෙනුවෙන් පහත පියවර අනුගමනය කිරීම සුදුසු වේ.

 

1. හැකි සෑම අවස්ථාවකම උස් අඩි පාවහන් පැළඳීමෙන් වැළකෙන්න

 

2. ඔබ පාවහන් මිලට ගන්නට අදහස් කළේ නම් ඒ සඳහා දිවාකාලයෙන් පසුව යාම සුදුසුය. එයට හේතුව දවස ගෙවී යද්දී පාදවල ප්‍රමාණය මඳක් විශාල වී පැවතීම නිසාය. එසේ සිදුවන්නේ පාද ක්‍රියාකාරීවීම හේතුවෙනි. එවිට ඔබට පාදවලට වඩාත් සුවපහසු පාවහන් තෝරා ගැනීමට හැකිවනු ඇත. ඔබ පාවහන් මිලදී ගැනීමට ගියේ උදය වරුවේ නම්, එවිට ඔබ මිලට ගන්නේ තරමක් කුඩා ඒවා වන්නට පුළුවන. ඒවා දවස ගෙවී යද්දී පාදවලට වෙහෙසක් ඇතිකරනු ඇත.

 

2. පාවහන් මිලදී ගන්නා විට යුගලම පළඳින්නට අමතක නොකරන්න. මන්ද ඇතැම් විට එක් පාවහනයක් අනෙක්ට වඩා මඳක් විශාල විය හැකි බැවිනි.

 

3. සකසන ලද ආහාරවලට වඩා ශාක කොටස් සහිත ආහාර පරිභෝජනයට වැඩි වශයෙන් හුරුවන්න. එවිට සිරුර පුරා ප්‍රශස්ථ මට්ටමින් රුධිර සංසරණය සිදුවන ඇත. එය පාදවල පටක පෝෂණයට ඉමහත් පිටිවහලක් වන්නේය.

 

අවසාන වශයෙන් පැවසිය යුත්තේ මෙපමණකි. ඔබ උස් අඩි පාවහන් පැළඳීමේදී ඔබගේ සිරුර හා පාද අමතර ගෙවී යාමකට ලක්වේ. ඔබ වයසට පත්වද්දී වඩාත් සෞඛ්‍ය සම්පන්නව සිටින්නටත් සුපුරුදු පරිදි ඇවිදයන්නට කැමත්තේ නම් පාදවලට වඩාත් සුවපහසු පාවහන් පැළැඳීම ඔබගේ වගකීම වන්නේය.  

 

සියල්ල ඇත්තේ ඔබ අතය.