පුවත්පත්වලට ලිපි ලිවීම මාගේ විනෝදාංශයකි. මා ලියන ලිපි මගින් පාඨකයින් දැනුමක් ලබමින් ජීවිතයට යමක් එකතු කරගන්නේ නම් එය මාගේ සතුටකි. වේගයෙන් ඉදිරියට ඇදෙන තාක්ෂණික ලෝකයේ පුවත්පත් කියවන්නට තරම් විවේකයක් නොමැති අයවලුන් බොහෝය. තවකෙකු පුවත්පත් කියවන්නට කැමති නැත. අන්තර්ජාලයේ ද සිංහල බසින් සියලුම පුවත්පත් ඇති බැවින් තාක්ෂණයට ප්‍රිය කරන්නෝ පරිගණකයෙක් හෝ සිය ජංගම දුරකථනයෙන් ඒවා කියවති. එබැවින් මා ලියන ලිපි එවැනි පාඨක පිරිස් වෙත යොමු කරන්නට අදහස් කළ නිසා මෙවැනි බ්ලොග් අඩවියක් ගොඩනගන්නට සිතුවෙමි. මාගේ උත්සාහය කෙතරම් නම් සාර්ථකදැයි තීරණය වන්නේ ඔබගෙන් ලැබෙන ප්‍රතිචාර මතය. එබැවින් ඔබ මේ පිළිබඳ සිතන පතන දෑ මවෙත දන්වන්නට උනන්දුවන්නේ නම් එය මාගේ සතුටයි. ඔබ සැමට තෙරුවන් සරණයි!

Monday, April 25, 2016

පිරමිඩ ජාවාරම්වලට හසුවන්න එපා!



අප කාර්යාලයේ සේවය කරන හිතවතකු දිනක් වඩාත් ඉක්මණින් ධනය උපයාගත හැකි ක්‍රමයකට තමන් සම්බන්ධ වී සිටින බවත්, එය නියමාකාර ලෙස කරගතහොත් වෙනත් රැකියාවක් කිරීමේ අවශ්‍යතාවක් නැතැයි ද කියමින් කතාවකට මුල පිරුවේය. 

“මේකෙන් සල්ලි ලැබෙන විදිහ ගැන ඔයාට හිතාගන්නත් බැහැ. අපි එන්න කලින් ආපු හුඟ දෙනෙක් දැන් හොඳටම දියුණු වෙලා. එක් කෙනෙක් කාර් එකකුත් ගත්තා. අපිත් දැන් මේ ටික ටික නැගිටගෙනයි එන්නේ.” 

ඔහු එසේ ද පැවසූයේය. මෙයට යම් ගාස්තුවක් ගෙවා සාමාජිකයෙක් වශයෙන් බැඳිය යුතු බවත් ඒ සඳහා ඉරිදා දිනයක  සවස 2.00ට ගම්පහ නගරයේ එක්තරා ගොඩනැගිල්ලක් අසලට පැමිණෙන ලෙසත් ඔහු පැවසූයේය. 

මේ මා පෞද්ගලිකව මුහුණ දුන් අත්දැකීමකි. සැබැවින්ම මේ වේගයෙන් මුදල් ඉපැයීමක් ලෙස ඔහු විස්තර කරන ලද්දේ ‛පිරමිඩ’ ගනුදෙනුවක් මිස අන් කිසිවක් නොවේ. මෙය සැබැවින්ම හොර ජාවාරමක් වන අතර මෙවැනි කිසිදු වංචනික ක්‍රියාවකට හසුනොවන්න යැයි ශ්‍රී ලංකා මහ බැංකුව පුවත්පත්වල දැන්වීම් පවා පළකොට ඇති මුත් වර්තමානයේ මෙම ව්‍යාපාරය විවිධ මුහුණුවර ඔස්සේ නැවත ක්‍රිියාත්මක වෙමින් පවතී. යම් යම් අය 

“මේකත් අර පිරමිඩ බිස්නස් එකක්ද?” 

කියා කවුරුන් හෝ ඇසූ විට, 

“පිස්සුද මේක එහෙම එකක් නොවයි. එහෙම නම් මම මේකට කාහොමටවත් සම්බන්ධ වෙන්නේ නෑ. අනෙක මේකට මහ බැංකුවේ අනුමැතියත් තියෙනවා” 

යැයි මෙයට බැඳී සිටින්නන් නව සාමාජිකයන් බඳවා ගැනීමේදී පවසයි.  

කෙසේ මුත් අප අතර සිටින්නන් සැළකිය යුතු පිරිසක් දැනුවත්ව හෝ නොදැනුවත්ම මෙයට සම්බධ වී සිටිති. 

පිරමිඩ ක්‍රමය යනු කුමක්ද? 

ඔබ පිරමිඩයක් පින්තූර ඕනෑ තරම් දැක තිබෙනවාට සැකයක් නැත. පිරමිඩයක් සාමාන්‍යයෙන් ඉහළ සිට පහළට කෙමෙන් විශාල වෙයි. පිරමිඩ ගනුදෙනුවල ද ඇත්තේ එවැනි ස්වභාවයකි.  අප රටේ පමණක් නොව ලෝකයේ බොහෝ රටවල සිදුකොරන මෙම පිරමිඩ ක්‍රමයේ ව්‍යාපාරවලට හසුවන්නෝ නම් කොතෙකුත් සිටිති. 

වර්තමානයේ පිරමිඩ ක්‍රමය ක්‍රියාත්මක වන්නේ කෙසේද? 

කලකට පෙර විවිධ ක්‍රම ඔස්සේ මෙය ක්‍රියාත්මක වූ අතර වර්තමානයේ ක්‍රියාත්මක වන්නේ එකවර සොයාගත නොහැකි ආකාරයටය. මෙය හඳුන්වා දෙන ආයතනය මෙහි මුල් ගනුදෙනුකරුවාට හෝ කරුවන්ට යම්කිසි භාණ්ඩයක් අළෙවි කරයි. ඔවුන් මේ ආකාරයට ගනුදෙනුකරුවන්ට අළෙවිකරනුයේ බොහෝ ප්‍රයෝජනවත් යැයි පැවසෙන භාණ්ඩයකි. කෙසේ නමුත් මේ පිළිබඳව සොයා බැලීමේදී පෙනී යන්නේ එය සාමාන්‍ය වෙළෙඳ පළෙන් ඉතා අඩු මිලට ගත හැකි චීනයේ නිෂ්පාදිත භාණ්ඩයක් බවය. කෙසේ මුත් මෙම ව්‍යාපාරයට බැඳී මුදල් ඉපැයීමේ අවශ්‍යතාවය වෙනුවෙන් ඔවුහු මෙම භාණ්ඩය මිලදී ගනිති. මෙවැනි සංවිධානයකට සාමාජිකයන් බඳවාගැනීම සඳහා මුදල් ද අයකරන බැවින් ඔවුන්ට වැඩි මිලක් දී අඩු වටිනාකමක් ඇති භාණ්ඩයක් මිලට ගන්නට සිදුවේ. ඉන්පසු ඔහු විසින් මෙම ආයතනය වෙත තවත් අලුත් සාමාජිකයන් දෙදෙනෙකු බඳවා ගැනීම සඳහා කටයුතු කළ යුතු අතර ඉන්පසු එම මිලටම ඔවුන් දෙනොට ද එම භාණ්ඩය විකිණිය යුතු වේ. මෙසේ විකුණද්දී ඔවුන්ට යම් කිසි ප්‍රතිශතයකින් වට්ටමක් ද හිමි වේ. මේ ආකාරයට පිරමිඩයේ පහළට කෙමෙන් ගමන් කරද්දී වැඩි වැඩියෙන් නව සාමාජිකයන් බදවා ගැනීම සිදු කළ යුතුය. මෙහිදී එක් ස්ථරයක සිටිය යුතු සාමාජිකයන් ගණන කොතෙක්දැයි ගණන් බලන අතර එක් ස්ථරයකින් ඊළඟ ස්ථරයට යද්දී යම්කිසි ලකුණු ප්‍රමාණයක් ද හිමි වේ. ලකුණු සමග මුදල් ද හිමි වේ. තමන් හඳුන්වා දුන් සාමාජිකයන් මෙසේ පහලට ගමන් කරන විට ද මේ ආකාරයට ලකුණු සහ මුදල් හිමි වේ. යම් සාමාජිකයෙක් සියලු උත්සාහ දරා තවත් පහළට ගමන් කළහොත්, ඒ වන විට ආයතන ඔහු නිසා බොහෝ ගනූදෙනුකරුවන් පිරිසක් මේ සඳහා බඳවාගෙන ඇති බැවින් ඔහුට වඩාත් වටිනාකමක් ඇති භාණ්ඩයක් තිළිණ කරයි. මේ පිළිබඳව මා සමග කතා කළ හිතවතා පැවසූයේ ඔවුනව මෙම ආයතනය වෙත හඳුන්වා දුන් පුද්ගලයාට මෑතකදී මෝටර් රථයක් ද හිමි වූ බවය. මෙවැනි දේ දකිත්ම බොාේ දෙනෙක් මෙයට නව සාමාජිකයන් බඳවාගැනීමට හැකි සියලු උත්සාහයන් යොදා වැඩ කටයුතු කරති. නමුත් ගැටලුව වන්නේ මුළින්ම මෙයට බැඳෙන සාමාජිකයන් හට මෙම පිරමිඩයේ පහල ස්ථර කරා පහසුවෙන් ඇදී ගිය හැකි මුත් පසුව බැඳෙන සාමාජිකයන්ට ඒ සඳහා ඇති අවස්ථාව වඩාත් අවම වීමය. 



බොහෝ විට මෙම පිරමිඩ ක්‍රමය සිදුවන්නේ දෙකේ ගුණාකාරවලටය. මෙයට සම්බන්ධ වන සෑම පුද්ගලයකුම නව සාමාජිකයන් දෙදෙනෙකු මේ සඳහා බඳවා ගත යුතු වේ. එවිට 2, 4, 8, 16, 32 ආදී වශයෙන් දෙකේ ගුණාකාරවලින් වැඩිවෙයි. මෙම සඳහන් රූපසටහන දෙස බැලීමෙන් මෙය වඩාත් පහසුවෙන් අවබෝධ කරගත හැකිය. මෙම පිරමීඩයේ ස්තර ඉහළ සිට පහලට රේඛාවලින් වෙන් කොට තිබේ. මෙහි වම් පැත්තේ දිස්වන්නේ එක් එක් ස්තරයට පැමිණෙද්දී එකතු වී සිටිය යුතු සාමාජිකයන් සංඛ්‍යාවය. එක් එක් ස්ථරයේ සිටිය යුතු සාමාජික සංඛ්‍යාව මැද ඇති ඉළක්කම්වලින් දැක්වෙන අතර දකුණු පැත්තේ ඉළක්කම්වලින් දැක්වෙන්නේ ස්තර සංඛ්‍යාවය. මෙය දෙකේ ගුණාකාරවලින් වැඩි වෙමින් පහළට ගමන් කරන බව ඔබට පෙනෙනවා ඇත. මෙහි පහලට ගමන් කරද්දී සාමාජිකයන් බඳවා ගැනීම කෙතරම් දුෂ්කර ද යන්න ඔබට පෙනෙනවා ඇත. 25 වැනි ස්තරය බලන්න. ඒ වන විට එකතු වී සිටිය යුතු සාමාජික සංඛ්‍යාව තුන්කෝටියකටත් වඩා වැඩිය. නමුත් අප රටේ ජනගහනය දෙකෝටි විසි දහසකට ආසන්න සංඛ්‍යාවක් පමණි. 

මුල් ස්තරවලදී කෙසේ හෝ සාමාජිකයන් බඳවා ගත්ත ද පහළට යත්ම එය ඉතා දුෂ්කර වේ. මේ අනුව මුල් අවස්ථාවේදී මෙයට එක් වන සාමාජිකයන් හට යම් යම් මට්ටම්වලින් ප්‍රතිලාභ ලබාගන්නට හැකියාව ලැබුණත් පසුව එක්වන සාමාජිකයන්ට එය එක්කෝ ඉතා දුෂ්කර වේ. එක්කෝ ලැබෙන්නේම නැත. මෙම ව්‍යාපාරයට අප රටේ සියලුම ජනතාව එක් වූවා කියා මඳකට සිතුව ද පහළට යත්ම මෙයට සිටිය යුතු සාමාජික සංඛ්‍යාව ජනගහනය ද ඉක්මවන නිසා අලුතින් එකතු කරගැනීමට කිසිවකු ඉතිරි වන්නේ නැත. එවිට ඔවුනට සිදුවන්නේ පාඩුව විඳ දරාගන්නටය. අනෙක මෙයට සාමාජිකයන් බඳවාගැනීම සඳහා අධික කාලයවක් ද මිඩංගු කරන්නට සිදු වේ. ඒ සඳහා වියදම් දරන්නට ද සිදු වේ. මෙවැනි ව්‍යාපාර සඳහා සිය දේපළ පවා උගස් කොට මුදල් ආයෝජනය කළ ඇතැමුන්ට අවසානයේ බඳවා ගැනීමට සාමාජිකයන් නොසිටි නිසා සිදුවූයේ පාඩුව විඳ දරාගත නොහැකිව සිය දිවි නසාගන්නටය. එවැනි අවස්ථාවන් ද පසුගිය කාලයේ වාර්තා විය. 

ප්‍රායෝගික ලෙස සළකා  බැලුවහොත් මෙවැනි ව්‍යාපාරයක් සඳහා එකතුවන්නට සියලු දෙනාම කැමති වන්නේ නැත. මේ පිරමීඩ ක්‍රමය වංචාවක් බැව් අවබෝධ කරගෙන සිටින කිසිවෙකු මෙයට සම්බන්ධ වන්නේ නැත. අප රටේ ජනගහනයෙන් බාල වයස්කරුවන් හේ වයෝවෘද්ධ ජනතාවද මෙයට එකතු වන්නේ නැත. යම් වෘත්තීය මට්ටමවල සිටින කිසිවකු ද එකතුවන්නට කැමැත්තක් දක්වන්නේ නැත. මේ නිසා මෙවැනි ව්‍යාපාර සඳහා එක්කරගත හැකි පිරිස වර්තමානය වන විට සිටින්නේ සාපේක්ෂව සුළු ප්‍රතිශතයකි. එසේ හෙයින් වර්තමානයේ මෙම ව්‍යාපාරයකින් ප්‍රතිලාභ ලැබිය හැක්කේ මුල් ස්තර කිහිපයේ පසුවන්නන් කිහිප දෙනෙකුට පමණි. සෙසු සියලු දෙනාට සිදුවන්නේ පාඩුව විඳදරාගැනීමටය. 

මේ නිසා සියලු දෙනා සිදුකළ යුත්තේ මෙවැනි ව්‍යාපාරවලට සම්බන්ධ වී ඇති පුද්ගලයන් පැමිණ ඔබ ඉදිරියේ මවන සුරංගනා ලෝකය පිළිබඳව බුද්ධිමත්ව බලා මෙම වංචාවන්ට හසු නොවී ජීවත්වීමය. 

ජංගම දුරකතනයක් තෝරාගන්නේ කෙසේද? - How Select a Mobile Phone?


හොඳ ජංගම දුරකතනයක් තෝරාගන්නේ කොහොමද කියන එක කාගෙන් හරි ඇහුවොත් අපට නොයෙක් විදියේ උපදෙස් ලැබෙනවා. සමහර විට ඒ කියන කරුණු ඒ ඒ පුද්ගලයාට පෞද්ගලිකව ගැළපෙන්න පුළුවන්. දුරකතන සාප්පුවකට ගිහින් බැලුවොත්, ඒවායෙන් මොන වර්ගයේ එකක් තෝරා ගන්නද කියලා, එතැන වැඩ කරන අය දෙන උපදෙස් තමයි අපට අහන්න වෙන්නේ. ඔවුන් කුමක් හෝ දෙයක් විකුණාගන්න උත්සාහ කරනවා මිසක් සමහර විට අපට ඕන කරන විදිහේ ජගංම දුරකතනයක් හොයා දෙන්නේ නැහැ. මෙන්න මේ නිසා අපි කල්පනා කළා ජංගම දුරකතනයක් මිලදී ගන්නවා නම් ඔබට හරියටම ගැළපෙන එකක් තෝරාගන්නේ කොහොමද කියන දෙය සම්බන්ධ පොදු උපදෙස් ටිකක් දෙන්න.

දැරිය හැකි මිල

සාමාන්‍යයෙන් ජංගම දුරකතනයක් ගැන හිතුවොත් වැඩි දෙනෙක් බලාපොරොත්තු වෙන්නේ අඩු මිලට හොඳ කැමරාවක්, වේගයක්, මතකයක් හෙවත් රැම් එකක් සහ ගබඩාකිරීමේ ධාරිතාවයක් (Storage Capacity), වැඩි බැටරි කාලයක්, සැළකිය යුතු තරමේ ඩිස්ප්ලේ එකක් වැනි අංග තියෙන එකක් තමයි. ගැටලුව තියෙන්නේ මේ හැම දෙයකින්ම හොඳම දේ තෝරාගන්න කොට වැඩි මිලක් ගෙවන්න සිදුවෙන එක තමයි. කොහොම වුණත් ඔබට දැරිය හැකි මිලට අනුව ඉහත සඳහන් කළ අත්‍යවශ්‍ය කරුණු වැඩි ප්‍රමාණයක් ඇති දුරකතනයක් කරා යන එක තමයි හොඳම දේ. අනෙක දැරිය හැකි මිලක් ගැන කතා කරද්දී හොඳ වෙළෙඳ නාමයක් තෝරාගැනීමත් වැදගත්.

ඔබට මොනවද ඕන?
අද කාලේ තියෙන ස්මාර්ට් වර්ගයේ ජංගම දුරකතන ගැන කතා කළොත් ඒවායේ නැති දෙයක් නැති තරම්. නමුත් හැමෝටම මේ හැම දෙයක්ම අවශ්‍ය වෙන්නේ නැහැ. ජංගම දුරකතනයෙන් නිතර අන්තර්ජාලයේ  සැරිසරන, චිත්‍රපටි නරඹන අය ටිකක් ලොකු ඩිස්ප්ලේ එකක් හොයනවා. නමුත් ඔබට එවැනි අවශ්‍යතාවයක් නැත්නම්, ඒ කරුණ ඔබේ අවශ්‍යතා ලැයිස්තුවෙන් ඉවත් කරන්න පුළුවන්. ඔබ එය හරහා වැඩිපුර අන්තර්ජාලයේ සරන්නේ නැත්නම් 4G අතහැර 3G කියන පහසුකම පමණක් තියෙන එකක් තෝරා ගන්න පුළුවන්. කොහොම නමුත් ඉදිරියේදී එන සෑම දුරකතනයකම 4G පහසුකම තියෙන්නත් පුළුවන්. ජංගම දුරකතනයේ චිත්‍රපට, ගීත වැනි දේ ගබඩා කොට තබාගන්නේ නැත්නම් වැඩි මතක ධාරිතාව කියන කරුණ ඉවත් කරගන්නත් පුළුවන්. එවිට ඔබට අඩු මිලට වඩාත් හොඳ වර්ගයේ දුරකතනයක් මිලට ගන්න පුළුවන් වෙයි.

පෙනුම

ඇතැම් අය ජංගම දුරකතනයේ පෙනුම, හැඩය ආදිය ගැනත් සැලකිලිමත් වෙනවා. ඇතැම් ඒවායේ කොන් රවුම් වෙලා තියෙනවා. ඇතැම් ඒවායේ කොන් හතරැස්. කොන් රවුම් ඒවාට ඇතැම් අය කැමති නැහැ. ඇතැම් අය විශාල ජංගම දුරකතනවලට කැමතියි. ඇතැම් අය කැමති නැහැ. ඇතැම් ප්‍රකට ජංගම දුරකතන වර්ග, උදාහරණයක් විදිහට ගත්තොත් ඇපල්විශාලත්වය අනුව සළකා බැලුවොත්, එක්තරා සීමාවකින් එහාට ඒවායේ විශාලත්වය වැඩි කරන්නේ නැහැ. ඇතැම් ඒවාට එසේ සීමාවක් නැහැ. සැම්සුන්ග් කියන්නේ ඒ වගේ වර්ගයක්.  මේ අනුව ඔබ කැමති පෙනුම අනුව ජංගම දුරකතන වර්ගයක් තෝරා ගත යුතු වෙනවා.

ඔබේ වෘත්තිය

වෘත්තිය අනුවත් ඇතැම් විට ජංගම දුරකතනයේ වර්ගය වෙනස් විය හැකියි. ඇතැමුන්ට කොයි තරම් මිලක් මේ වෙනුවෙන් වෙන් කරන්නට පුළුවන්කම තිබුණත් ඔවුන්ගේ වෘත්තිය මේ සඳහා හරස් වෙනවා. ඇතැම් විට ඔබ යන්ත්‍ර සූත්‍ර සමග වැඩ කටයුතු කරන කාර්මිකයෙන් වෙන්න පුළුවන්. මා දන්නා හිතවතකු පැවසූයේ ඔහු නිතර යන්ත්‍ර සූත්‍ර සමඟ වැඩකටයඅතු කරන නිසා ටච් වර්ගයේ දුරකතනයක් භාවිත කරන්නට නොහැකි බවයි. හේතුව ඔහුගේ අතේ නිතරම තෙල්, මජං ආදිය තැවරෙන්නට ඇති ඉඩකඩ නිසයා. ඒ හැරුණු විට ඔහුගේ ආදායම් තත්වය සළකා බැලුවහොත් ඔහුට සෑහෙන මුදලක් වැය කොට ස්මාර්ට් වර්ගයේ දුරකතනයක් මිලදී ගන්නට හැකියාවක් නැත්තේ නැහැ. ඇතැමුන්ගේ රැකියාවේ හැටියට ඔවුන්ට විශාල වර්ගයේ දුරකතන භාවිත කරන්නට හැකියාවක් නැහැ. මෙසේ වෘත්තිය හරස් නොවන අය පවා ඇතැම් විට ඇමතුම් ගැනීම, පණිවිඩ යැවීම වැනි අවශ්‍යතා සපුරාගන්නට කුඩා වර්ගයේ දුරකතනයක් ද, අන්ත්ර්ජාලය, චිත්‍රපටි ආදිය නරඹන්නට ස්මාර්ට් වර්ගයේ දුරකතනයක් භාවිත කරනු දැකිය හැකියි.

තිරයේ ප්‍රමාණය


මෙය අපි ඉහත අවස්ථා කිහිපයකදීත් යම් යම් තරමින් කතා කළා. සාමාන්‍යයෙන් විශාල, මධ්‍යම හා කුඩා යනුවෙන් තිර වර්ග 3 කට බෙදන්න පුළුවන්. අඟල් 5.5 හෝ එයට වඩා වැඩි කියන්නේ විශාල තිරයක් කියන එකයි. අඟල් 5 - 5.4 කියන්නේ මධ්‍යම ප්‍රමාණය. අඟල් 4 - 4.9 කියන්නේ කුඩා ප්‍රමාණය. මෙය තීරණය වෙන්නේ ද ඔබේ අවශ්‍යතාවයේ හැටියටයි. ඔබ නිතර ක්ෂේත්‍රයේ සිටින කෙනෙක් නම් ඇතැම් විට විශාල තිරයක් සහිත  දුරකතනයක් සාක්කුවේ දමාගෙන යන්නට අපහසු වෙන්න පුළුවන්. එවිට ඒ අවශ්‍යතාවයේ හැටියට එකක් තෝරාගන්නට වෙනවා.

සකසනය හෙවත් ප්‍රොසෙසරය

සෑම ජංගම දුරකතනයක සකසනයක් (Processor/CPU) තිබුණත් වැඩි දෙනෙක් ඒ ගැන සැළකිල්ලක් දක්වන්නේ නැහැ. මෙය වේගවත් නම් දුරකතනය ද වේගවත්. එහි වේගය මනින්නේ ගිගා හර්ට්ස් (Giga Hertz -GHz) වලින්. ඔබේ ජංගම දුරකනයේ වේගය ගැන ඔබට අදහසක් නැත්නම් http://www.gsmarena.com නම් සුප්‍රකට වෙබ් අඩවියෙන් ඒ බව දැනගන්නට පුළුවන්. එහි ඇතැම් විට සඳන්ව ඇත්තේ Processor නමින් නොව CPU නමින් විය හැකියි.

කැමරාව


හොඳ කැමරාවක් සහිත ජංගම දුරකතනයක් හිමි කරගන්නට හැමෝම සිහින මවනවා. අද කාලේ සෙල්ෆි රැල්ලක් පවතින නිසා මේ අවශ්‍යතාවය වැඩියි. මේ නිසා දුරකතනයේ පසුපස මෙන්ම ඉදිරිපස කැමරාව ගැනත් සැළකිල්ලක් දක්වන්නට වෙනවා. සාමාන්‍යයෙන් කැමරාවක ගුණත්වය බොහෝ දෙනෙක් මනින්නේ මෙගා පික්සල්වලින්. නමුත් එහි ඒ තරම් නිවැරදිතාවයක් නැහැ. මෙගා පික්සල් 20 සහිත ජංගම දුරකතන කැමරාවකට වඩා හොඳ ඡායාරූප මෙගා පික්සල් 13 වැනි ඒවායෙන් ගත් අවස්ථා ඕනෑ තරම්. ඔබට අවශ්‍ය ගුණත්වයෙන් ඉහළ කැමරා දුරකතනයක් නම් කැමරාවේ සංවේදකය සහ කාචය ගැනත් හොයන්න ඕන. මේවා බාල නම් මෙගා පික්සල් සංඛ්‍යාව වැඩි වූවා කියා හොඳ කැමරාවක් වන්නේ නැහැ.

බැටරිය


මේක තමයි බොහෝ දෙනෙකුට තියෙන ලොකුම ගැටලුව. බොහෝ ස්මාර්ට් වර්ගයේ ජංගම දුරකතනවල බැටරි කාලය අඩු බවට හැමෝම මැසිවිලි නගනවා. මේවායෙන් කළ හැකි වැඩ බොහෝ නිසා මේ සියල්ල කරගන්නට යාමේදී බැටරි ඉක්මණින් බැස යාම සාමාන්‍ය දෙයක්. නමුත් විවිධ දුරකතනවල බැටරි ධාරිතාවය වෙනස්. සෑම බැටරියකම මිලි ඇම්පියර් (mAh) අගයක් සඳහන් කොට තිබෙනවා. එයින් කියැවෙන්නේ එහි ගබඩා කොට ඇති ධාරාවේ ප්‍රමාණයයි. මෙය වැඩිවන තරමට බැටරිය පැවතීමේ කාලය ද වැඩි වෙනවා. සාමාන්‍යයෙන් මිලි ඇම්පියර් 1700 සිට 4000 පමණ දක්වා බැටරි ඇති ජංගම දුරකතන පවතිනවා. ඔබේ අවශ්‍යතාවය අනුව  මෙය ගැන ද සොයා බැලිය හැකියි.

තිරය නිමවා ඇති ද්‍රව්‍යය


සාමාන්‍යයෙන් හොඳ නමක් සහිත ජංගම දුරකතනවල තිර නිමවා ඇත්තේ LED වලින්. ඇතැම් ඒවා LCDවලින්. LCDවලට වඩා LEDවල බැටරි කාලය වැඩියි. විශේෂයෙන් ඇතැම් ජංගම දුරකතනවල AMOLED යනුවෙන් සඳහන් වෙනවා. (gsmarena වෙබ් අඩවියෙන් ඔබේ දුරකතකයේ තිරය නිපදවා ඇති ද්‍රව්‍යය සොයා ගන්නට පුළුවන්). මේ ඇමෝ එල්ඊඩී තිර වල බැටරි බැස යාම ඉතාමත් අඩුයි. එයට හේතුව සහ එහි ක්‍රියාකාරීත්වය දීර්ඝව විස්තර කළ යුතු නිසා පසු  අවස්ථාවක ඒ ගැන කතා කරමු.




මෙහෙයුම් පද්ධතිය




සාමාන්‍යයෙන් ස්මාර්ට් ජංගම දුරකතන සඳහා ප්‍රධාන මෙහෙයුම් පද්ධති 3ක් තිබෙනවා. ඒ ඇන්ඩ්‍රොයිඩ්, ඇපල් සහ වින්ඩෝස් නමින්. මේ අතරින් වැඩි වශයෙන් ජනප්‍රිය වී ඇත්තේ අන්ඩ්‍රොයිඩ්. ඇන්ඩ්‍රොයිඩ් සඳහා නිපදවී ඇති යෙදුම් සංඛ්‍යාව ද අති විශාලයි. අනෙක් මෙහෙයුම් පද්ධති දෙකේ ඇන්ඩ්‍රොයිඩ්වලට සාපේක්ෂව එතරම් යෙදුම් සංඛ්‍යාවක් නැහැ. මේ පද්ධති තුනම සිංහල භාෂාවට හොඳින් සහය දක්වනවා. ඇන්ඩ්‍රොයිඩ් සඳහා බොහෝ සිංහල යෙදුම් නිර්මාණය වී ඇති බව ද සඳහන් කළ යුතුයි. මිත්‍රශීලිත්වය අතින් ඇන්ඩ්‍රොයිඩ් ඉදිරියෙන් සිටින බව බොහෝ දෙනෙකුගේ පිළිගැනීමයි. නමුත් මෙය ද එකිනෙකාට සාපේක්ෂ දෙයක්. ඕනෑම පද්ධතියක් සමග ටික කාලයක් වැඩ කටයුතු කරද්දී එය අදාළ තැනැත්තාට මිත්‍රශීලී වෙනවා. ඇපල් පද්ධතිය සහිත දුරකතන මිලෙන් තරමක් ඉහළයි.

භාවිත කරන්නන්ගේ අදහස්
විශේෂයෙන් gsmarena වෙබ් අඩවියේ යටතේ ඔබ විස්තර සෙවූ දුරකතනය භාවිත කළ අයගේ අදහස් (user opinions and reviews) දැකගන්නට පුළුවන්. ජංගම දුරකතනයක් මිලට ගන්නට පෙර මේවා කියවා බැලූ විට එහි ඇති ගුණාංග, අඩුපාඩු ආදිය ගැන වැටහීමක් ලබාගන්න පුළුවන්.


මේ කරුණු ගැන සැළකිලිමත්වීමෙන් සහ වැඩි විස්තර සොයා බැලීමෙන් ඔබට ඔබේ අවශ්‍යතාවයට අනුව හොඳ ජංගම දුරකතනයක් තෝරාගන්නට පුළුවන් වේවි.

Sunday, April 24, 2016

අලුත් ලෝකයට අලුත් ගැජට් 13 කොටස - New Gadgets for New World Part 13

අලුත් ලෝකයට අලුත් උෂ්ණත්ව පාලකයක්








අපේ රටේ පැහැදිලි ඍතු භේදයක් නැති වුණත් අවුරුද්ද පුරා කාලෙන් කාලෙට උෂ්ණත්වය අඩු වැඩි වෙනවා. අවුරුද්දේ අග සහ මුල උදේ කාලයට ටිකක් සීතල වැඩියි. විශේෂයෙන් නුවරඑළිය වැනි පළාත්වල වැඩි වශයෙන් සීත දේශගුණ තත්වයක් පවතින නිසා ඔවුන් නිවාස ඇතුළත් උෂණත්වය පාලනය කරන්නට විවිධ උපකරණ භාවිත කරනවා. එවැනි අවශ්‍යතාවයන් සපුරාලමින් මේ ස්මාර්ට්යුගයට ගැළපෙන සේ නිර්මාණය කළ උෂ්ණත්ව පාලකයක් තමයි වීන්’ (Ween) කියන්නේ. සාමාන්‍ය උෂණත්ව පාලකයක්  එය සකස් කරන ලද උෂ්ණත්ව මට්ටම නැවත කවුරුන් හෝ සකස් කරන තුරු වෙනස් වන්නේ නැහැ. නමුත් මෙහි ඇති සංවේදකවලින් නිවසේ පුද්ගලයන් සිටිනවා ද නැද්ද යන්න එයටම තීරණය කරන්න පුළුවන්. අනෙක නිවැසියන් පිටත සිටින කාලය සහ නිවසේ සිටින කාලය කිහිප දිනක් යන විට මෙයට ඉගෙන ගැනීමේහැකියාවක් ද තිබෙනවා. ඒ නිසා නිවාසියන්ට තම නිවසේ උෂණත්ව මට්ටම ගැන සැළකිල්ලක් නොදක්වා තම වැඩකටයුතු කරගෙන යන්නට පුළුවන්. ඒ සියල්ල පාලනය කරන්නට වීන්ට පුළුවන්. නිවසේ කිසිවකු නැත්නම් උෂ්ණත්වය පහළ දමන්නට හෝ එය නිවා දමන්නට මෙයට හැකි නිසා එහි ප්‍රතිඵලයක් ලෙස විදුලි බිල ද අවම කරගත හැකියි. වයි ෆයි ඔස්සේ ඔබගේ ස්මාර්ට් දුරකතනය හා සම්බන්ධ වන්නට ද මෙයට හැකියාව තිබෙනවා. මෙහි මිල දැනට ඇමරිකානු ඩොලර් 378ක් (රුපියල් 53,700ක් පමණ) වෙනවා.



වැඩ ගොඩක් කරන්නට පුළුවන් ලයිට් එකක් 






ටොෂීබා සමාගමේ එල්ඊඩී තාක්ෂණය ලබා ගනිමින් සෝනි සමාගම මගින් මේ නවතම ආලෝක පද්ධතිය හඳුනවා තිබෙනවා. මෙය ඇත්තටම ලයිට් එකක් විතරක්ම කිව්වොත් වැරදියි. මෙයින් ඔබේ වැඩ කටයුතු බොහොමයක් කරදෙනවා. මෙයට වයි ෆයි පහසුකමත් ඔබගේ ස්මාර්ට් දුරකතනය සමඟ සම්බන්ධ වන්නට හැකි නිසා එහි සැකිසීම් සියල්ල දුරකතනයෙන්ම කළ හැකියි. මෙම ආලෝක පද්ධතිය එලාර්ම් එකක්, ඉන්ටර්කොම් පද්ධතියක් (ගොඩනැගිල්ලක් තුළ සන්නිවේදන කටයුතු කරගන්නා පද්ධතිය), උෂණත්ව සහ තෙතමන සංවේදක, අධෝරක්ත කිරණ පාලකයක්, මතක චිපයක් තැන්පත් කළ හැකි ස්ථානයක්, ස්පීකරයක්, මයික් එකක් සහ තවත් කුඩා උපකරණ කිහිපයකින් සමන්විතයි. ලයිට් එකකට මේවා මොකටද කියා ඕනෑම කෙනෙකුට සිතෙන්නට පුළුවන්. සෝනි සමාගම මේ උපකරණයේ ක්‍රියාකාරීත්වය ගැන තවමත් වැඩි යමක් සඳහන් කර නැති නිසා මේ උපකරණ සියල්ලෙන්ම කරගත හැක්කේ කුමක් ද කියා තවමත් අවබෝධයක් ලබාගන්නට හැකියාවක් නැහැ. නමුත්, නිවසේ ඒ අවස්ථාවේ පවතින උෂණත්වයට සරිලන පරිදි ස්වයංක්‍රීයව ආලෝකයේ ස්වභාවය වෙනස් කරන්නට මෙයට හැකියි. ඔබ යම් කිසි කාමරයකට ඇතුළු වන විටම එහි ආලෝකය ඒ අවස්ථාවට අනුකුළ වන පරිදි දල්වා ලන්නට මෙයට හැකියාව තිබෙනවා. රූපවාහිනී නරඹන කුටියට ඔබ යන විට රූපවාහිනිය ක්‍රියාත්මක කර ඔබ එම අවස්ථාවේ නරඹන ප්‍රියතම වැඩසටහන ඔබ වෙනුවෙන් තෝරා දෙන්නටත් මෙයට පුළුවන්. මිල තවමත් ප්‍රකාශයට පත් කොට නැහැ.



අලුත් විදිහේ ප්ලග් එකක්







නිවසක ප්ලග් පොයින්ට් ප්‍රමාණය ටික දවසක් යන කොට මදියි කියා හිතෙන අවස්ථා තිබෙනවා. ඒ කියන්නේ විවිධ විදුලි උපකරණ නිවසට ගෙනෙන විට ඒවාට විදුලි සපයන්නට නිවසේ තියෙන ප්ලග් පොයින්ට් ප්‍රමාණය මදි වෙන්න පුළුවන්. මේ වගේ වෙලාවට බොහෝ දෙනෙක් කරන්නේ කොහෙන් හරි මල්ටි ප්ලග් එකක්හෝ එක්ටෙන්ෂන් කෝඩ් එකක්ගෙනැවිත් මෙයට විසඳුමක් සොයා ගන්න එක. නමුත් නිෂ්පාදන ගුණත්වය ඉතාමත් පහළ මට්ටමක පවතින නිසා මේවායේ අඛණ්ඩ ක්‍රියාකාරීවය සහ කල්පැවැත්ම ගැන අපට සහතික වන්නට හැකියාවක් නැහැ. අනෙක විදුලිය වැඩි වශයෙන් ගළාගෙන යද්දී මේවා උණුවී විනාශකාරී සිදුවීම් සිදුවන අවස්ථා ද තිබෙනවා. ඉතා විශ්වාසයෙන් යුක්තව එක්වර විදුලි උපකරණ කිහිපයක් සඳහා විදුලි බලය ලබාදෙන්නට theOUTlet නමින් නව ප්ලග් එකක් දැන් වෙළෙඳ පළට පැමිණ තිබෙනවා. ඔබ කළ යුත්තේ ඔබගේ නිවසේ දැනට ඇති ප්ලග් එක ගළවා දමා එතැනට මෙය සවි කරගැනීම පමණයි. තිබෙන ප්ලග් එකට සවිකිරීමක් නොව අලුතින්ම සවිකිරීම නිසා පරිපථ ෂෝට්වීමකට ලක්වන්නට ද මෙහිදී ඉඩක් නැහැ.  අනෙක මෙහි දැනට අප භාවිත කරන සියලු විදුලි සහ ඉලෙක්ට්‍රොනික උපාංගවලට ගැළපෙන පරිදි කෙවෙනි සාදා තිබෙනවා. මෙහි මිල දැනට ඇමරිකානු ඩොලර් 25ක් (රුපියල් 3,550ක් පමණ) වෙනවා.


ද්විත්ව ක්‍රියාකිරී බිම පිරිසිදුකරනයක්






නමින් HIZERO වන මෙය ලෝකයේ මුල්ම ද්විත්ව ක්‍රියාකාරී බිම පිරිසිදු කරනය වශයෙනුයි හඳුන්වා දෙන්නේ. මෙය එකවර වැකුම් කිරීම සහ මොප් කිරීම සිදු කරනවා. යම් තැනක කිළිටි වී ඇත්නම්, දියර හැලී ඇත්නම්, දුහුවිලි ඇත්නම් මෙයට ඒවා ගැටලුවක් නෙවෙයි. මෙහි විශේෂයෙන් නිපදවා ඇති දුහුවිලි පිසදමනයට දුහුවිලි අංශු මාත්‍රයක් හෝ මඟ හැරෙන්නේ නැහැ. එමෙන්ම දුහුවිලි පිසදමන කොටසේ යම් විදිහකින් ජලය තැවරුනහොත් ඒ සැනින් එය උරාගෙන එතැන වියලී තත්වයෙන් තබාගන්නට මෙම උපරණය වගබලා ගන්නවා. අනෙක මෙහි පැය 4 - 6 කාලයක් දක්වා පවතින නැවත ආරෝපණය කළ හැකි බැටරියක් පවතින නිසා විදුලිය ලබාගැනීම ගැන සිතන්නට අවශ්‍ය වෙන්නේ ද නැහැ. තවත් එකක් කියන්න ඕන. ඔබ මේ උපකරණයෙන් නිවස පිරිසිදු කරන විට ඔබේ සිරුරෙන් දහනය වන කැලරි ප්‍රමාණයත් මෙම උපකරණයේ තත්වයත් ඔබේ සමාර්ට් දුරකතනය ඔස්සේ බලාගන්නට ද පුළුවන්.  මිල දැනට ඇමරිකානු ඩොලර් 299ක් (රුපියල් 42,500ක් පමණ) වෙනවා. 





උෂ්ණත්වය පෙන්වන ෂවර් එක



අද කාලේ බොහො දෙනෙක් නිවෙස්වල උණුජල පහසුකම ලබාගන්නට උත්සාහ කරනවා. විදුලි බලය වගේම හිරු එළියේ බලයෙනුත් මේ පහසුකම ලබාගන්නට පුළුවන් නිසා මෙය ඉස්සරට වඩා ජනප්‍රියයි. මෙය සඳහන් කළේ අපි කියන්න යන ගැජට් එක උණුජලයට සම්බන්ධ නිසයි. ඔබ ස්නානයට යන මොහොතේ ටැංකියේ ඇති ජලයේ උෂ්ණත්වය ගැන ඔබට වැටහීමක් ලබාගන්නට බැහැ. ඔබ වෙනම උෂ්ණත්ව මානයක් සවි කළොත් ඒ හැකියාව ලබාගන්නට පුළුවන්. නමුත් හැම විටම එසේ කරන්නට හැකියාවක් නැහැ. මේ නිසා ජල කරාමය විවෘත කර ජලය පරෙස්සමින් ස්පර්ශ කර උෂ්ණත්ව මට්ටම ගැන වැටහීමක් ගන්නට සිදු වෙනවා. මේ ගැටලුවට විසඳුමක් ලෙස Delta Temp2O Digital Temperature Display Shower Head නමින් ෂවර් එකක් හඳුන්වා දී තිබෙනවා. මෙහි ඇති උෂ්ණත්වමානයෙන් මේ හරහා ගමන් කරන ජලයේ උෂ්ණත්වය මැන මෙහි ඇති දර්ශක තිරය ඔස්සේ පෙන්වනවා. අංකවලින් උෂ්ණත්වය පෙන්වනවා සේම උෂ්ණත්වයේ ප්‍රමාණයේ හැටියට එය වර්ණයෙන් පෙන්වන්නටත් මෙයට පුළුවන්. අංශක 80 වඩා අඩු නම් නිල් පැහැයෙන් ද, අංශක 80 - 110 අතර නම් මැජෙන්ටා ද, 110 වැඩි නම් රතු ද වශයෙන් එය පෙන්වා සිටිනවා. ඒ වගේම ෂවර් එකෙන් ජලය හැලෙන විවිධ ක්‍රම 6 කට මෙය සකසන්නට ද පුළුවන්. මෙහි මිල දැනට ඇමරිකානු ඩොලර් 60ක් (රුපියල් 8,500ක් පමණ) වෙනවා. 


Thursday, April 21, 2016

ජංගම දුරකතනවලටත් හෙන වදිනවාද?


“මේ අකුණු ගහන වෙලාවේ කෝල් අරන් අපිවත් මරවන්නද හදන්නේ?” 

අකුණු පුපුරන අවස්ථාවක ඔබ ජංගම දුරකතනයෙන් ඇමතුමක් ගතහොත් සියලු දෙනාම පාහේ පවසන්නේ මෙවැනි කතාවකි. මේ නිසාම අප බොහෝ දෙනෙකු පුරුදුව ඇත්තේ එවැනි අවස්ථාවකදී ජංගම දුරකතනය භාවිත නොකර සිටින්නට පමණක් නොව එය ක්‍රියා විරහිත කොට ද තබාගන්නටය. සැබවින්ම ජංගම දුරකතනයක් භාවිත කරන්නකු අකුණු පුපුරන අවස්ථාවකදී අනතුරකට ලක්වීමේ ඉඩක් තිබේද? මෙය බොහෝ දෙනෙකුට ඇති ගැටලුවකි.  අප්‍රේ්ල්, එසේත් නැත්නම් බක් මාසයේ අධික ලෙස අකුණු පිපිරීම ද සිදුවන බැවින් මේ පිළිබඳ පැහැදිලි අවබෝධයකින් සිටීම අප සියලු දෙනටම ඉතා වැදගත්ය.


අප මුළින්ම ‛අකුණක්’ යනු කුමක්දැයි සරල ලෙස පැහැදිලි කරගනිමු. අහසේ ඇතිවන වළාකුළු, විශේෂයෙන් කැටි වැසි වළාකුළු විද්‍යුත් ආරෝපණයෙන් යුක්තය. ඔබ සාමාන්‍යයෙන් දකින බැටරි කැබැල්ලක මෙන් මෙම වළාකුළුවල ඉහළ කොටස ධන (+) ආරෝපණයෙන් (ඉලෙක්ට්‍රෝන) ද, පහළ කොටස ඍණ (-) ආරෝපණයෙන් (ප්‍රෝටා්න) ද යුක්තය. මෙසේ ආරෝපණය වූ වළාකුළක් පාවී යද්දී මෙවැනි තවත් වළාකුළකට උඩින් හෝ යටින්  ගමන් කළ හොත් මෙම වලාකුළු දෙකෙහි ධන සහ ඍණ අරෝපණ අතර ආකර්ෂණයක් ඇති වෙයි. මේවායේ අධික විදුලියක් ගබඩා වී ඇති බැවින් මේ ආකර්ෂණය සිදුවන්නේ මහ හඬකින් පුපුරා ගිනි විසිකරමිනි. අපට අකුණු පුපුරන අවස්ථාවක මහා හඬක් ඇසෙන්නේ සහ අධික ආලෝකයක් පෙනෙන්නේ මේ නිසාය. ඇතැම් අවස්ථාවලදී වළාකුල තුළම පවතින ධන හා ඍණ ආරෝපණ එකිනෙක ආකර්ෂණය වී අකුණු ඇතිවන අවස්ථාවන්ද තිබේ. ආකර්ෂණය වන්නට වළාකුලක් නොමැති අවස්ථාවක බොහෝ විට සිදුවනුයේ සිය පහළ කොටසේ ඇති ඍණ ආරෝපණය පොලොවේ ආසන්නතම ස්ථානයක ඇති ධන ආරෝපණයක් සමඟ ආකර්ෂණය වීමය. මෙහිදී පොලොවේ  යම් භූමියක ඒ අවස්ථාව්දී පවතින උසම ස්ථානයක් කරා අකුණ ඇදී යයි. උස් ගසක් තිබුණහොත් අකුණ එයට ඇදී යයි. ගස අසළ ලෝහ කුළුණක් තිබුණහොත් අකුණ ඇදෙන්නේ එයටය. එයට හේතුව ගසකට වඩා ලෝහ කොටස් ධන ආරෝපණයෙන් යුක්ත වීම නිසාය. අකුණු පුපුරන අවස්ථාවක පිට්ටනියක් වැනි තැනිතලා බිමක යම් කිසිවකු සිටගෙන සිටියහොත් එම අවස්ථාවේදී පොලොවේ ඇති උසම ස්ථානය එම පුද්ගලයාගේ හිස නිසා එතැනට අකුණ ඇදී එයි. 



 

අකුණු පුපුරන අවස්ථාවකදී යම් පුද්ගලයකු ඇමතුමක් ගනිමින් එළිමහනේ සිටියහොත් ඔහු අකුණු අනතුරකට ලක්වීමේ වැඩි ඉඩක් පවතී. එයට හේතුව ඇතැම් විට එම අවස්ථාවේදී පොලොවේ පවතින උසම ස්ථානය ද ඔහුගේ හිස  වීමට ඇති ඉඩකඩය. අනෙක ජංගම දුරකතනයේ ලෝහ කොටස් ඇති නිසා ඒවාට අකුණු ආකර්ෂණය වීමේ වැඩි ඉඩකඩක් පැවතීමය. කලකට පෙර එක් ප්‍රවෘත්තියකින් අසන්නට ලැබුණේ අකුණු පුපුරන අවස්ථාවකදී වැව් බැම්ම මතින් ඇමතුමක් ගනිමින් ගමන් කළ පුද්ගලයකු අකුණක් වැදී මරුමුවට පත් වූ බවය. මේ පුවතත් සමඟ බොහෝ දෙනෙක් අකුණු ගසන අවස්ථාකදී ජංගම දුරකතන භාවිතය අතහැර දැමූ බව පෙනෙන්නට තිබිණි.  මේ පිළිබඳ විදුලි සංදේශ නියාමන කොමිෂන් සභාව, කාලගුණ විද්‍යා දෙපාර්තමේන්තුව ආදී රජයේ ආයතන ජනතාව දැනුවත් කරමින් පැවසූයේ ජංගම දුරකතන සොයා අකුණු ඇදී එන බවට පවතින විශ්වාසය මිත්‍යාවක් බවය. නිවසක් තුළ සිට යමකු ජංගම දුරකතන ඇමතුමක් ගන්නේ නම් එවැනි අවස්ථාවක එයට අකුණක් ඇදී ඒමේ හැකියාව මේසය මත ඇති හැන්දකට අකුණක් ඇදී ඒමේ හැකියාවට හැම අතින්ම සමානය. 

ජංගම දුරකතන ක්‍රියාත්මක වන්නේ ක්ෂුද්‍ර තරංග ඔස්සේය. ක්ෂුද්‍ර තරංගවලට අකුණු ඇදී එන බවට භෞතික විද්‍යාත්මකම කිසිදු සාධකයක් නැත. හේතුව මේවායේ ධන හෝ ඍණ ආරෝපණ කිසිවක් නොමැති බැවිනි. නමුත් යම් පුද්ගලයකු නිවසේ ආවරණයක් නොමැතිව දොරකඩ සිට ඇමතුමක් ගතහොත් ඔහු කරා අකුණක් ඇදී එන්නේ ජංගම දුරකතනය නිසාම නොව ඔහු එළිමහනේ අකුණට ඇදී ඒමට පහසු ස්ථානයක සිටින බැවිනි. මිදුලේ සිටිය හොත් අකුණක් ඇදී එන්නේ අදාළ පුද්ගලයා එතැන උසම ස්ථානයක් නිර්මාණය කරන නිසාය. 

රෙදි වැලක් සඳහා කම්බියක් යොදා ඇති නිවසක, එම රෙදි වැළ නිවස තුළ යමකට ගැට ගසා ඇතැයි මඳකට සිතන්න. එවැනි අවස්ථාවකදී එය පිටත සමඟ සම්බන්ධ වී ඇති නිසා එයට අකුණක් ඇදී ඒමේ හැකියාවක් තිබේ. මෙය නිවස තුළ රෙදි වැල ගැට ගසා ඇති ස්ථානය අසළ සිට අකුණු පුපුරන අවස්ථාවෙකදී යමකු ජංගම දුරකතනයෙන් ඇමතුමක් ලබානිමින් සිටියදී අකුණු අනතුරකට ලක් වුවහොත් ඒ ජංගම දුරකතකව නිසා නොව රෙදි වැල දිගේ අකුණක් ඇදී ඒමට ඇති හැකියාව අධික නිසාය. 

මේ කරුණු නිසා විදුලිය සහ සන්නිවේදන කටයුතු පිළිබඳ විශේෂඥයන් පවසන්නේ නිවසක්, ගොඩනැගිල්ලක්, වාහනයක් වැනි ආවරණයක් සහිත ස්ථානයක ඇතුළත සිට ජංගම දුරකතනය භාවිත කරන්නේ නම් කිසිදු අකුණු අනතුරක් සිදුවන්නේ නැති බවය. අකුණු පුපරන අවස්ථාවකදී ඇමතුමක් ගත හැකි ආරක්ෂිතම ක්‍රමය වන්නේ ජංගම දුරකතනය ඔස්සේ සිදු එය කිරීමය. නමුත් එළිමහනට යාමෙන් වැළකී සිටිය යුතුය. යම් පුද්ගලයකු අකුණු පුපුරන අවස්ථවකවදී ගසක් යට සිටිමින් ඇමතුමක් ගනිමින් සිටියදී අකුණු අනතුරකට ලක්වූයේ නම් ඒ ජංගම දුරකතනය නිසා නොව ගස්වලට ඇදී එන අකුණු නිසාය. එය භූගත වන්නට ගස ඔස්සේ පොලොවට ඇදී ඒමේදී යම් පුද්ගලයකු ගස යට සියහොත් එම පුද්ගලයා ද අකුණ නිසා අනතුරකට ලක් වෙයි. 

කෙසේ වුවත් අකුණු පුපුරන අවසථාවකදී ස්ථාවර දුරකතන ඔස්සේ යමෙකු ඇමතුමක් ලබාගන්නේ නම්, එය අකුණු අනතුරකට පත්වීමට ඇති ඉඩකඩ වැඩිය. එයට හේතුව එය කෙළින්ම නිවසින් බාහිර ස්ථානයකට රැහැනක් ඔස්සේ සම්බන්ධ වන බැවිනි. 

මේ නිසා අකුණු පුපුරන අවස්ථාවකදී හොඳින් ආවරණය වූ ස්ථානයක සිට ජංගම දුරකතනය ඔස්සේ ඇමතුමක් ලබාගත හොත් කිසිදු අකුණක් ඇදී එන්නේ නැත. අකුණු පුපුරන අවස්ථවක නිවසේ සියලු විද්‍යුත් උපකරණ විදුලියෙන් විසන්ධි කොට තැබීම, රූපවාහිනිය විදුලියෙන් පමණක් නොව ඇන්ටෙනාවෙන් ද විසන්ධි කොට තැබීම නිවස තුළට අකුණක් ඇදී එන්නට ඇති අවස්ථා හැකිතාක් අවම කරගත හැකි ආරක්ෂිත පියවරයන්ය. එවිට අකුණු පිපිරුව ද නිවස තුළ සිට කිසිදු බියක් සැකක් නොමැතිව ජංගම දුරකතනය ඔස්සේ ඇමතුම් ලබාගත හැකිය. 

අවසාන වශයෙන් යළිත් විශ්වාසයෙන් යුතුව කිව හැක්කේ අකුණු පුපුරද්දී නිවසක් තුළ සිට ජංගම දුරකතනයෙන් ඇමතුම් ගැනීම කිසිදු ආකාරයකින් අනතුරුදායක දෙයක් නොවන බවය. කරුණු මෙසේ වුවත් ඔබ තුළ තවමත් මේ පිළිබඳ විශ්වාසයක් නොමැති නම්, වඩාත් සුදුසු දෙය වන්නේ අකුණු පුපුරන අවස්ථාවලද ජංගම දුරකතනය භාවිතයෙන් වැළකී සිටීමය.


 

Friday, April 8, 2016

සැමන්, සාඩින්, ටින් මාළු


මේ උත්සව සමය නිසා වසරේ අනෙක් දිනයන්ට වඩා කෑම බීම පරිභෝජනය වැඩි වන බව අමුතුවෙන් පැවසිය යුත්තක් නොවේ. සාමාන්‍යයෙන් වෙනත් දිනකට වඩා වැඩි කෑම  බීම වර්ග වැඩි ප්‍රමාණයන්ගෙන් නිවසේ රැස්කොට තබා ගැනීම මේ දිනවල බහලුව සිදුවන්නකි. ඉක්මණින් නරක් නොවන කෑම බීම මේ අතින් ප්‍රමුඛය. ඉක්මණින් නරක් නොවන ආහාර වර්ග අතුරින් ඉදිරියෙන්ම පසුවන්නේ ටින් කළ මාළුය. සාමාන්‍යයෙන් අප සැමන්යනුවෙන් හඳුන්වන්නේ මේවාය. සැමන් හොදි, සම්බෝල ආදිය ඉතා මෙයින් පිළියෙල කරගන්නා කෑම වර්ග අතරින් ඉතා ජනප්‍රියය. ඊට අමතරව උත්සව සමයේදී කට්ලට් ආදිය සාදාගැනීම සඳහා  ගෘහනියන් වැඩි දෙනෙක් යොදාගන්නේ ද ටින් කළ මාළුය.

ටින් කළ මාළු වශයෙන් සාමාන්‍යයෙන් හඳුන්වන්නේ රත්කිරීමේ ක්‍රියාවලියකින් අනතුරුව වායුරෝධක හෙවත් වාතය පිට නොවන ආකාරයෙන් ටින්වල දමා මුද්‍රා තබන ලද ආහාරයකි. මේ ක්‍රමය අනුගමනය කිරීමෙන්  වසර පහක පමණ කාලයක් දක්වා මාළු කල් තබා ගත හැකි වේ. මාළු යනු අඩු ආම්ලිකතාවයකින් යුක්ත සත්ව විශේෂයක් වන බැවින් ක්ෂුද්‍රජීවීන් ඇතිවීම ඉතා ශීඝ්‍රයෙන් සිදුවේ. මාළු වඩාත් ඉක්මණින් නරක් වන්නේ මේ නිසාය. මේ නිසා අඩු ආම්ලික තාවයකින් යුක්ත ආහාර ( පීඑච් අගය 4.6 ට වඩා වැඩි) පාරිභෝගකයන්ගේ ආරක්ෂාව සඳහා සෙන්ටිග්‍රේඩ් අංශක 116 - 130 දක්වා රත්කොට බීජානුහරණකිරීම අත්‍යවශ්‍ය වේ. මාළුවල ඇති ගුණය හා රසය යම් තාක් ප්‍රමාණයකින් අඩුවුව ද ඒවා නරක් නොවී සැළකිය යුතු කාලයක් තබාගැනීමට හැකි නිසා ටින් කළ මාළු අදටත් ආහාර සංරක්ෂණය කිරීමේ ජනප්‍රියතම ක්‍රමයක් ලෙස ක්‍රියාත්මක වෙයි.

මාළු ටින්කොට කල් තබාගැනීමේ ක්‍රමයේ ආරම්භය ප්‍රංශ අධිරාජයකු වූ නැපෝලයන්ගේ  සමය දක්වා අතීතයකට විහිදෙයි. නැපෝලියන්ගේ යුද්ධය ආරම්භ කිරීමෙන් පසු ප්‍රංශ රජය ෆ්‍රූන්ක් 12,000 ප්‍රදානය කරමින් නිවේදනය කොට සිටියේ ආහාර වැඩි ප්‍රමාණයක් වැඩි කාලයක් සංරක්ෂණය කොට තබා ගැනීමේ ක්‍රමයක් සොයා ගන්නා අයෙකුට මෙම මුදල තිළිණයක් ලෙස ලබා දෙන බවයි. එයට හේතුව වූයේ විශාල හමුදාවක් සඳහා ගුණයෙන් අඩු නොවූ ආහාර අධික ප්‍රමාණයක් රැස්කොට, කල් තබාගත යුතු වූ බැවිනි. මෙම අභියෝගය භාරගත්තේ ප්‍රංශ ජාතිකයෙකු වූ නිකොලා ඇපේ’ (Nicolas Appert) ය. ඔහු 1795 වසරේදී මෙම මාළු ටින් කිරීමෙන් කල් තබාගැනීමේ ක්‍රමය පිළිබඳ පර්යේෂණ ආරම්භ කළ අතර 1810 දී එය සාර්ථකව ක්‍රියාත්මකකොට අදාළ ත්‍යාගය ද දිනා ගත්තේය. ඔහු සොයා ගත් ක්‍රමයට අනුව ආහාර අසුරන ලද්දේ වීදුරු බඳුන්වලය.  නමුත් වීදුරු බඳුන් ප්‍රවාහනයේදී ගැටලු මතු වු බැවින් බ්‍රිතාන්‍ය ජාතික නව නිපැයුම්කරුවකු වූ පීටර් ඩුරාන්ඩ්ටින්වල මාළු ඇසිරීමේ ක්‍රමය ලෝකයට හඳුන්වා දුන්නේය. අද දක්වා ක්‍රියාත්මක වන්නේ ඔහු විසින් මෙසේ හඳුන්වා දුන් ක්‍රමයයි.

මුල් සමයේ ටින්වල අසුරන්නට යොදා ගත් මත්ස්‍ය වර්ගය වූයේ සැමන්’ (salmon ) ය. සැමන් යනු මිරිදිය මත්ස්‍ය විශේෂයකි. සැමන් මත්ස්‍යයින් යොදා මාළු ටින් කිරීමේ කර්මාන්තයක් උතුරු ඇමරිකාවේ ආරම්භ කෙරුණු අතර එය හඳුන්වන ලද්දේ ද සැමන් කැනරි’ (salmon cannery) යනුවෙනි. 

සැමන් මත්ස්‍යයා 

ඔවුන් මෙය මහා පරිමාණයෙන් සිදුකරගෙන ගිය අතර දහනව වැනි සියවස තුළ ලෝකයේ බොහෝ රටවල ඔවුන්ගේ කර්මාන්ත ශාලා බිහිකොට සැමන් මත්ස්‍යයන් ඇල්ලීම වඩාත් පුළුල් කරන ලදී. මෙහි ප්‍රතිඵලයක් ලෙස ලෝකයේ බොහෝ රටවලට ටින් කරන ලද මාළු පැතිර ගිය අතර මේවා වඩාත් ප්‍රචලිත වූයේ ටින් කළ මාළු නමින් නොව සැමන්නමිනි. අප රටේ ද අදටත් සැමන්යනු ටින් කළ මාළු හඳුන්වන වඩාත් ප්‍රචලිත නමක් බවට පත්ව ඇත්තේ මේ නිසාය.

සාඩින් හෙවත් පිල්චාර්ඩ් 

ටින් කළ මාළු හඳුන්වන්නා වූ තවත් නමක් වන්නේ සාඩින්ය. සාඩින්නමින් හඳුන්වනු ලබන්නේ ද මත්ස්‍ය වර්ගයකි. සැබවින්ම එක් මත්ස්‍ය වර්ගයක් නොව තෙල් සහිත සියලු කුඩා මත්සය්‍යන් හැඳින්වීම සඳහා පොදුවේ භාවිත කරන නම වන්නේ සාඩින්ය’. මොවුන්ට මෙම නම පටබැඳෙන්නට හේතුව වශයෙන් සැළකෙන්නේ ටින් කොට මත්ස්‍යයන් කල් තබාගැනීමේ කර්මාන්තය ආරම්භ කළ මුල් සමයේ මෙම මත්ස්‍යයන් බහුල වශයෙන් දක්නට ලැබුණු මධ්‍යධරණී දූපතක් වූ සාඩිනියාවආශ්‍රිත මුහුදේ නිසාය. මෙම දුපතේ නම මෙම වර්යේ සියලු මත්සය්‍යන්ට පටබැඳුණූ අතර ඔවුන් යොදා නිපදවන ලද ටින් කළ මාළු ද සාඩින්නමින් ප්‍රකට විය. වර්තමානයේ  ටින් කළ මාළු නිපදවීමට යොදා ගන්නා වඩාත් ප්‍රචලිත මත්ස්‍ය වර්ගයක් වන පිල්චාර්ඩ්අයත් වන්නේ මෙම සාඩින්නමැති පොදු මත්ස්‍ය වර්ගයටය.

ටූනා මත්ස්‍යයා 

ටින් කළ මාළු නිපදවීම සඳහා යොදාගන්නා තවත් මත්ස්‍ය වර්ගයක් වන්නේ ටූනාය. ටූනා යොදා ටින් කළ මාළු නිපදවීම 1903 වර්ෂයේදී ආර්ම්භ කෙරුණු අතර ලොව පුරා බොහෝ දෙනෙක් සැන්ඩිච්, සලාද සහ කැසරොල් ආදී කෑම වර්ග සෑදීමේදී යොදා ගන්නේ ටූනා මත්ස්‍යයන් සහිත ටින්කළ මාළුය.

ජැක් මැකරල්


ජැක් මැකරල් යනු මෙසේ ටින් කළ මාළු නිපදවීමට යොදා ගන්නා තවත් ජනප්‍රිය මත්ස්‍ය වර්ගයක් වේ.

බොහෝ ටින් කළ මාළු නිෂ්පාදකයන් තමන් මේ සඳහා යොදා ගත්තේ කුමන මත්ස්‍ය වර්ගය ද යන්න ටින් එකෙහි ඇසුරුමෙහි සඳහන් කර තිබේ. ඔබ මෙයට පෙර මේ පිළිබඳව අසා නොතිබුණේ නම් මින් පසු ටින් කළ මාළු මිලදී ගැනීමේදී මේ පිළිබඳව මඳක් සොයා බලන්න.

මෙතෙක් කළ ටින් කළ මාළු කර්මාන්තය පිළිබඳ විස්තර නොදැන ඒවා ආහාරයට ගත් ඔබට දැන් ඒ පිළිබඳ දැනුමකින් යුක්තව ආාහාරයට ගැනීමට හැකිය.