පුවත්පත්වලට ලිපි ලිවීම මාගේ විනෝදාංශයකි. මා ලියන ලිපි මගින් පාඨකයින් දැනුමක් ලබමින් ජීවිතයට යමක් එකතු කරගන්නේ නම් එය මාගේ සතුටකි. වේගයෙන් ඉදිරියට ඇදෙන තාක්ෂණික ලෝකයේ පුවත්පත් කියවන්නට තරම් විවේකයක් නොමැති අයවලුන් බොහෝය. තවකෙකු පුවත්පත් කියවන්නට කැමති නැත. අන්තර්ජාලයේ ද සිංහල බසින් සියලුම පුවත්පත් ඇති බැවින් තාක්ෂණයට ප්‍රිය කරන්නෝ පරිගණකයෙක් හෝ සිය ජංගම දුරකථනයෙන් ඒවා කියවති. එබැවින් මා ලියන ලිපි එවැනි පාඨක පිරිස් වෙත යොමු කරන්නට අදහස් කළ නිසා මෙවැනි බ්ලොග් අඩවියක් ගොඩනගන්නට සිතුවෙමි. මාගේ උත්සාහය කෙතරම් නම් සාර්ථකදැයි තීරණය වන්නේ ඔබගෙන් ලැබෙන ප්‍රතිචාර මතය. එබැවින් ඔබ මේ පිළිබඳ සිතන පතන දෑ මවෙත දන්වන්නට උනන්දුවන්නේ නම් එය මාගේ සතුටයි. ඔබ සැමට තෙරුවන් සරණයි!

Tuesday, January 30, 2018

පද්මාවතියට එරෙහිව රාජ්පුත් - Padmavati Vs. Rajput


මේ දිනවල බොලිවුඩ් සිනමාවේ සේම ලෝක සිනමාවේ ද වඩාත් ආන්දෝලනාත්මක තත්වයකට පත්ව ඇත්තේ  පද්මාවත්චිත්‍රපටයයි. මේ කියවන ඔබ ඇතැම් විට දැනටමත් මේ කරුණ ගැන දන්නවා විය හැකියි. නමුත් නොදන්නා අය ද බොහෝ සිටින බවට සැකයක් නැහැ. කලින් පද්මාවතිලෙස නම් කොට තිබුණත් පසුව පද්මාවත්බවට පත් වූ මේ චිත්‍රපටය සුප්‍රකට ඉන්දියානු සිනමා අධ්‍යක්ෂවරයකු වන සංජේ ලීලා බන්සාලිගේ අධ්‍යක්ෂණයක්. නිෂ්පාදන වියදම පමණක් ඉන්දියානු රුපියල් කෝටි 90 ක් වන මෙය දැනට ඉන්දියාවේ නිෂ්පාදනය කොට ඇති වියදම් අධිකතම සිනමා නිර්මාණවලින් එකක් බවට ද පත්ව තිබෙනවා. දීපිකා පදුකොන්, සහිඩ් කපූර්, රන්වීර් සිං ආදී සුප්‍රකට බොලිවුඩ් සිනමා ශිල්පීන් රැසක් රංගනයෙන් දායක වී තිබෙන මෙය මුලින්ම 2017 දෙසැම්බර් 1 වැනිදා තිරගත කරන්නට නියමිතව පැවතියත්, මෙයට එරෙහිව නැගුණු දැවැන්ත උද්ඝෝෂණ නිසා 2018 ජනවාරි 25 වැනිදා දක්වා තිරගත කිරීම් කල් දැමීමට සිදු වුණා. අවසානයේ ඉන්දීය මධ්‍යම සිනමා මණ්ඩලය මෙය තිරගත කිරීම සඳහා අවසර ලබාදුන්නේ වෙනස්කම් පහක් ද සහිතවයි. එම වෙනස්කම්වලට මෙහි නම වෙනස් කිරීම සහ වගකීමෙන් බැහැරවීමේ ප්‍රකාශ රැසක් ද අන්තර්ගත වුණා.

චිත්‍රපටයේ කතාව මේ ආකාරයෙන් කෙටියෙන් සඳහන් කළ හැකියි.

13 වැනි සියවසේ ඇෆ්ගනිස්ථානයේ ඛිල්ජි රජ පරපුරට අයත් ජලාල්උද්දින් ඛිල්ජි, දිල්ලියේ බලය අල්ලා ගැනීම සඳහා සැලසුම් කරනවා. මේ සඳහා කරන උදව්වක් ලෙස ජලාල්උද්දින්ගේ බෑණා වන අලාඋද්දින් ඛිල්ජි, ජලාල්උද්දින්ගේ දියණිය වූ මෙහ්රුනිෂා විවාහ කොට දෙන මෙන් ඉල්ලා සිටිනවා. එහි ප්‍රතිඵලයක් ලෙස අලාඋද්දින්ගේ විවාහය සූදානම් කරනවා. මේ මංගල රාත්‍රිය දිනයේ දීම අලාඋද්දින් වෙනත් ගැහැනියක් සමග කාම සේවනයේ යෙදී සිටිනු ජලාල්උද්දින්ගේ සේවකයකුගේ අතටම අසු වෙනවා. මෙහිදී අලාඋද්දින් ඔහුව එතැනම මරා දමනවා. මෙයින් අලාඋද්දින්ගේ අලුත් බිරිද ඉමහත් බියකට පත් වෙනවා. 

මේ අතරේ දිල්ලියේ පාලනය ගෙන යන රාජ්පුත් වංශයට අයත් මහරාවල් රතන්සිං සිය ප්‍රථම බිරිඳ වූ නග්මති වෙනුවෙන් දුර්ලභ ගනයේ මුතු ඇට යුවලක්  සොයා සිංහල දීපය හෙවත් වර්තමාන ශ්‍රී ලංකාවට පැමිණෙනවා.  ඔහු සිංහල දීපයේ සැරිසරද්දී සිංහල කුමරියක වූ පද්මාවතී, මුවකු දඩයම් කරන්නට ගොස් ඉලක්කය වැරදීමෙන් ඇදී යන ඊතලය වැදී රතන්සිංට තුවාල සිදු වෙනවා. මෙහිදී ඔවුන් එකිනෙක හමුව කතාබහ කිරීමෙන් පසුව ආදරයක් හට ගන්නවා. එය කෙළවර වන්නේ විවාහයකින්.

මේ අතරේ ජලාල්උද්දින් දිල්ලිය අල්ලා ගන්නවා. කෙසේ නමුත් බලයට තණ්හාවෙන් සිටින අලාඋද්දින් අවසානයේ ජලාල්උද්දින් ඝාතනය කොට සුල්තාන්වරයෙකු බවට පත් වෙනවා.

පද්මාවතී සහ රතන් සිං රාජස්ථානයට පැමිණෙනවා. ඔවුන් ආදරයෙන් වෙලී සිටිනු දකින රතන් සිංගේ පූජකයාට රතන් සිං ගැන ඊර්ෂ්‍යාවක් ඇතිවෙනවා. ඔහුගෙන් පලිගන්නට සිතන පූජකයා පද්මාවතී කුමරිය ගැන අලාඋද්දින්ට පවසනවා. ඔහු පද්මාවතීව ලබාගන්නට සැලසුම් කරනවා.

මෙන්න මේ ආකාරයටයි කතාව ගලාගෙන යන්නේ. සත්‍ය කතාවේ හැටියට අලාඋද්දින්ගේ පිරිස සහ රාජ්පුත්වරුන් අතර ඇති වන අවසන් සටනෙන් රාජ්පුත්වරුන් පරාජයට පත් වෙනවා. මේ අවස්ථාවේ දී අලාඋද්දින් ඇතුළු පිරිසගේ අඹුවන් බවට පත්වීමෙන් වැළකෙන්නට පද්මාවතී තවත් රාජස්ථාන් කාන්තාවන් රැසක් සමග ජවුහාර්නමින් හඳුන්වන සියදිවි නසා ගැනීම සිදුකරනවා. මේ නිසා අලාඋද්දින්ට පද්මාවතීව අයිති කර ගැනීමට ලැබෙන්නේ නැහැ. මෙයින් පසුව රාජ්පුත් වැසියන් අතර පද්මාවතී දේවත්වයට පත් වෙනවා. අදටත් ඔවුන් පද්මාවතී දෙවඟනට වැඳුම් පිදුම් කරනවා. පද්මාවත්චිත්‍රපටය සඳහා රාජ්පුත් වැසියන් මෙතරම් විරුද්ධත්වයක් දක්වන්නේ මේ නිසයි.

පද්මාවත් කාව්‍යය 

සංජේ ලීලා බන්සාලි මේ සිනමා නිර්මාණය සඳහා පාදක කොට ගෙන ඇත්තේ සුෆි කිවියකු වූ මලික් මුහම්මද් ජයාසි විසින් 1540 දී රචිත පද්මාවත්නම් වීර කාව්‍යයි. මේ කාව්‍යයේ කියැවෙන්නේ සිංහල රාධානියක ඉපිද, සටන් ශිල්පය මැනවින් හැදැරූ දුටුවන් වශීකරවන රූ සපුවකින් යුක්ත කුමරියක පිළිබඳවයි. පද්මාවතී නම් වන ඇය පද්මිනීසහ රාණි පද්මිනීලෙසත් ප්‍රකටයි. නමුත් මේ පිළිබඳ පැහැදිලි ඓතිහාසික තහවුරු කිරීමක් සොයාගන්නට නැහැ. මේ වීර කාව්‍යයත්, ඒ හා වර්ධනය වුණු හින්දු ජනප්‍රවාදත් ආදිය තුළින් රාජ්පුත් වැසියන් අතර පද්මාවතිය පිළිබඳ ඇති ගෞරවනීය බව මේ චිත්‍රපටය නිසා කෙලෙසෙනු ඇතැයි හින්දුන් අතර සැකයක් පහළ වී තිබෙනවා. මෙයට එරෙහිව උද්ඝෝෂණ මතුව ඇත්තේ විශේෂයෙන් මේ නිසයි. චිත්‍රගාරවලට පැන පහරදීම්, රූ ගත කරන ස්ථානවලට පහරදීම් ආදිය පමණක් නොව එක් අවස්ථාවක දී අධ්‍යක්ෂ සංජේ ලීලා බන්සාලිගේ කම්මුලකට ද එක් උද්ඝෝෂණකරුවකු පහරදීමක් සිදු වුණා. එමෙන්ම දේවත්වයෙහි ලා සැලකෙන පද්මාවතීගේ චරිතය දීපිකා පදුකොන් විසින් නිරූපණය කිරීම නිසා පද්මාවතියට අගෞරවයක් සිදුවන බව ද මෙයට විරුද්ධවන්නන් පවසනවා. පද්මාවතියගේ ගෞරවනීය කතාව දීපිකා විසින් සැබෑ ලෙස නිරූපණය කොට නොමැති බවයි ඔවුන්ගේ අදහස. ඇය සිදුකොට ඇති මේ අගෞරවය නිසා ඇයගේ හිස ගසා දැමිය යුතු බවට පිරිසක් පවසනවා. එසේත් නොමැති නම් අඩුම තරමේ ඇයගේ නාසය හෝ කපා දැමිය යුතු බව ඔවුන් පවසනවා. මෙවැනි දඬුවමක් පංචතන්ත්‍රයේ ද සඳහන් වනවා. එහි මේ දඬුවම ලබා දෙන්නේ පරපුරුෂයක් ඇසුරු කළ කාන්තාවන්ට බව සඳහන්.



මෙයට විරුද්ධව හඬ නගන එක් රාජ්පුත් වැසියකු වන මහේන්ද්‍ර සිං පවසන්නේ මෙම චිත්‍රපටය තුළින් ඉතිහාස කතාව ද විකෘති කොට ඇති බවයි. ඔහු පවසන පරිදි මෙහි එක් තැනක අලාඋද්දින් ඛිල්ජි සහ පද්මාවතී ආලයෙන් වෙලී සිටින දර්ශනයක් ඇතුළත්ව ඇති බවයි. ඉතිහාස කතාවේ එවැන්නක් ඇත්තේ නැහැ.  නමුත් අධ්‍යක්ෂ සහ මෙහි නිෂ්පාදකයන් මේ අදහස සහමුලින්ම ප්‍රතික්ෂේප කරනවා. මෙහි අධ්‍යක්ෂ  සංජේ ලීලා බන්සාලි පවසන්නේ මෙයට එරෙහි වන්නන් කිසිවකු තවමත් මේ චිත්‍රපටය නරඹා නොමැති බවයි. මෙය නැරඹූ පසු සියලු දෙනා මේ අදහස් වෙනස් කරගනු ඇති බවයි ඔහු පවසන්නේ.


මේ කතා වෘතාන්තයට අනුව පද්මාවතිය ඉන්දියාවට යන්නේ සිංහල දීපය හෙවත් ශ්‍රී ලංකාවෙන්. නමුත් අප රටේ ඉතිහාසයේ එවැන්නියක ගැන පැහැදිලි සඳහනක් සොයා ගන්නට ලැබෙන්නේ නැහැ. එවැන්නියක ගැන අපට ඇසෙන්නේ චාල්ස් ඩයස් සූරින්ගේ පද්මාවතීනූර්තියෙන්. එහි ඇති දැක්කොත් පද්මාවතීගීතය අද ද ජනප්‍රිය තැනක පවතිනවා. ඉන්දියාවේ පද්මාවත්චිත්‍රපටය නිසා අපේ රටේ මේ ගීතය සොයා අසන්නට සිතන පිරිස ද ඉදිරියේ දී වර්ධනය වන්නට ද පුළුවන්. කෙසේ නමුත් මේ පද්මාවතියත්, චිත්‍රපටයේ එන පද්මාවතියත් අතර සම්බන්ධතාවක් නැති බව සඳහන් කළ යුතුයි. කෙසේ නමුත් පද්මාවත්චිත්‍රපටයේ  අධ්‍යක්ෂවරයා පද්මාවතියගේ ඇඳුම් නිර්මාණය කොට ඇත්තේ මෙම ඉතිහාස කතාවට අදාළ කාල වකවානුවේ අප රටේ පැවැති කාන්තා ඇඳුම් ආභාෂයට ගනිමින් බව ද දැනගන්නට ලැබෙනවා.







පද්මාවත්චිත්‍රපටයට එරෙහිව මෙසේ උද්ඝෝෂණ ඇතිවීම එක් අතකින් මෙහි නිෂ්පාදකයන්ට වාසි සහගත තත්වයක් උදා කරනවා. එයට හේතුව මේ චිත්‍රපටය නරඹන්නට අපේක්ෂා කරන ප්‍රේක්ෂකයන්ගේ සංඛ්‍යාව මේ නිසා වර්ධනය වන බව පෙනී යාමයි. බොහෝ දෙනෙකු පවසන්නේ මෙය අධික වියදමක් දරා නිපදවා ඇති චිත්‍රපට අතරින් එකක් බවට පත්වනවා පමණක් නොව මේ වසරේ ඉහළතම ආදායම් වාර්තාවක් තබන චිත්‍රපටය බවට ද පත්වන්නට බොහෝ ඉඩක් පවතින බවයි. 


Thursday, January 18, 2018

සල්ලිකාරයන්ගේ පිස්සු වියදම් - Crazy Purchases of Celebrities

ඇතැම් භාණ්ඩ මිලදී ගෙන වැඩි දවසක් ගත වන්නට පෙර, “අයියෝ අපරාදෙනේ මේකට මේ තරම් ගාණක් වියදම් කළේයැයි අපට සිතුණු වාර අනන්තය. මෙය බොහෝ දෙනෙක් අත් දැක ඇති දෙයක් බව අමුතුවෙන් සඳහන් කළ යුත්තක් නොවේ. එවැන්නක් බොහෝ විට අපට සිතෙන්නේ අපට යහමින් මුදල් නැති කම නිසා විය යුතුය. මුල මුදල් යහමින් අතේ ගැවසෙන අයට එවැන්නක් සිතෙන්නට ඉඩක් නැත. මේ නිසාම මුදලින් පොහොසත් ඇත්තෝ නොවටිනා, ප්‍රයෝජනයක් නොමැති දේවලට අධික ලෙස මුදල් වැය කරනු අප දැක තිබේ. මෙය බොහෝ දෙනෙකුට පොදුය. ලෝකයේ කීර්තිමත්, ප්‍රසිද්ධ පුද්ගලයෝ ද එසේමය. නමුත් ඔවුන් අධික මුදල් ගෙවා මිලදී ගෙන ඇත්තේ මොනවාදැයි අප දන්නේ නැත. මේ ලිපිය අවසන් වන තුරු කියවූ විට ඔබට තවදුරටත් එවැනි දේවල් ගැන දන්නේ නැතැයි කියන්නට හැකියාවක් නැත.

මයික් ටයිසන්ගේ බෙංගාලි කොටි




මයික් ටයිසන් යනු කවුරුන්දැයි කවුරුත් දනිති. දක්ෂ බොක්සිං ක්‍රීඩකයකු වන ඔහු වඩාත් ප්‍රසිද්ධියට පත් වූයේ බොක්සිං තරගයක් අතරතුර දී එවැන්ඩර් හෝලිෆීල්ඩ්ගේ කනෙන් කොටසක් කටින් කඩා ගත් නිසාය. මයික්වලින් නිතර කතා කරන්නට කැමති පුද්ගලයන්ට ද ගමේ ගොඩේ මයික් ටයිසන් යැයි කියනු ඇසේ. කෙසේ වෙතත් බොක්සිං ගසන මයික් ටයිසන් බෙංගාලි කොටි දෙදෙනෙකුව මිලට ගත්තේය. ඒ සඳහා ඔහුට ඇමරිකානු ඩොලර් 150,000 (රු. දෙකෝටි තිස් ලක්ෂයකට මඳක් වැඩිය) වැය විය. ඔවුන්ව නඩත්තු කිරීම සඳහා මසකට ඔහුට ඇමරිකානු ඩොලර් 4,000 (රු.ලක්ෂ හයකට ආසන්නය) මුදලක් වියදම් විය.



කොටි වෙනුවෙන් පමණක් නොව ඔහු සිය සනීපාරක්ෂාව වෙනුවෙන් ද ලෝබ නැතිව වියදම් කරන්නෙකි. එබැවින් හොඳින් නා ගැනීම සඳහා ඔහු බාත් ටබ්එකක් හෙවත් නාන බේසමක්මමිලට ගත්තේ ය. ඒ සඳහා ඔහු තෝරා ගත්තේ තනි රත්රන්වලින් නිමවන ලද නාන බේසමකි. ඔහු ඒ වෙනුවෙන් ඇමරිකානු ඩොලර් මිලියන 2.3 (රු. මිලියන 354)කට වඩා වියදම් කළේ නැත.

නිකොලස් කේජ්ගේ අමුතු විනෝදාංශ



නිකොලස් කේජ් යනු හොලිවුඩයේ සුප්‍රකට ක්‍රියාදාම නළුවෙකි. ඔහු කිසි තේරුමක් නැති ආකාරයට සුරතල් සතුන් වෙනුවෙන් මුදල් වියදම් කරන්නෙකු යැයි බොහෝ දෙනෙකු පවසති. ඔහු ගැන විස්තර සොයා බැලීමේ දී ඒ බව ඇත්තක් යැයි පැහැදිලි වේ. අනෙක ඔහු සුරතල් සතුන් යැයි සිතන්නේ අප කවුරුත් දන්නා සුරතලුන් නම් නොවේ. ඔහු වරෙක කිං කෝබ්‍රානමින් හඳුන්වන නාගයන් දෙදෙනකු සුරතලුන් ලෙස හදා වඩා ගැනීම සඳහා ඇමරිකානු ඩොලර් 275,000 (රුපියල් හාරකෝටි 23 ලක්ෂයකට ආසන්න) මුදලක් වැය කළේය. මොවුන් ලෝකයේ සිටින විෂ අධිකතම සතුන් ලෙස සලකනු ලැබේ. ඔහු ඔවුන් දෙදෙනාට මෝබිසහ ෂීබායන සුරතල් නම් දෙක ද තබා තිබේ. මොවුන් සුරතලුන් වුවත් කුමන් මොහොතක හෝ දෂ්ට කළහොත් යන සැකය නිසා ප්‍රතිවිෂ බෝතලයක් ද නිතරම ළඟ තබා ගෙන සිටියේය. කෙසේ නමුත් ඔහුගේ ආර්ථිකයේ යම් බිඳ වැටීමක් සිදු වූ බැවින් ඔහු මෙම සතුන් දෙදෙනා සත්වෝද්‍යානයකට පරිත්‍යාග කළේය.



නිකොලස් කේජ් තවත් අවස්ථාවක දී ඇමරිකානු ඩොලර් 276,000 (රුපියල් හාරකෝටි 25 ලක්ෂයකට ආසන්න) මුදලක් වැය කරමින් ඩයිනෝසරයකුගේ හිස් කබලක් මිලට ගත්තේ ය. ඔහු මෙය වෙන්දේසියක දී මිලට ගත් අතර ඒ සඳහා ඔහුට සිය මිතුරු නළුවකු වූ ලියොනඩෝ ඩි කැප්‍රියෝ සමග තරග කරන්නට ද සිදු විය. මෙය වසර මිලියන 67 ක් පැරණි හිස්කබලක් විය.


නිකොලස් කේජ් චිත්‍ර කතා කියවන්නට ද රුසියෙකි. ලෝකයේ ප්‍රකට චිත්‍ර කතා එකතුවක් ඔහු සතුව තිබේ. ඔහුගේ ආර්ථික බිඳ වැටෙන්නට පෙර ඔහු සතුව තිබූ මුළු චිත්‍ර කතා පොත්වල එකතුව  පමණක් ඇමරිකානු ඩොලර් මිලියන 1.6ක් (රුපියල් මිලියන 246ක් පමණ) විය. එහි වටිනාකම ලොවට අනාවරණය වූයේ  ඔහු සිය ආර්ථික දුෂ්කරතාවලින් අස්වැසිල්ලක් ලබන්නට ඒ චිත්‍ර කතා පොත් වෙන්දේසි කළ අවස්ථාවේදීය.

පැරිස් හිලටන් ගේ බලු කූඩුව




පැරිස් හිල්ටන් යනු ඇමරිකානු ව්‍යාපාරික කාන්තාවකි. ලොව වටා වූ හිල්ටන් හෝටල් සමූහය ආරම්භ කළ කොනාර්ඩ් හිල්ටන්ගේ දියණියත් ඇයමය. ඇය බල්ලන්ට බොහෝ ඇලුම් කරන්නියකි. කුඩා බලු අනුරූ සිය පසුමිබියේ ද දමාගෙන යනු නිතර දැකිය හැකිය. ඒ සියල්ලම පසෙකින් තැබුවහොත් ඇය සිය මිල අධික සුඛෝපභෝගී මන්දිරයේම කුඩා අනුරුවක් සිය සුරතල් බල්ලන් වෙනුවෙන් පිළියෙල කොට දුන්නාය. එය කුඩා අනුරුවක් පමණක් නොව එහි කුඩා ලී බඩු, වායු සමීකරණ, තාපය ඇති කරන උපකරණ, පොකුරු පහනක් ආදී බොහෝ දේවල් අඩංගු ය. බොහෝ මිනිසුන්ට වඩා අධික සැප සම්පත් සහිතව බල්ලන්ට ජීවත් විය හැකි වන සේ තැනූ මේ කුඩා අනුරුව සඳහා ඇයට ඇමරිකානු ඩොලර් 325,000 (රු. කෝටි පහක් පමණ) වැය විය.

සෙලීන් ඩියොන් හා කටහඬ



සෙලීන් ඩියොන් ගැන අප රටේ බොහෝ දෙනෙකු දැනගත්තේ ටයිටැනික් චිත්‍රපටය නිර්මාණය වීමෙන් පසුවය. ඒ එම චිත්‍රපටය වෙනුවෙන් නිර්මාණය කරල ලද මයි හාර්ට් විල් ගෝ ඔන්ගීතයත් සමගිනි. මෙම චිත්‍රපටයෙන් පසුව ඇගේ හඬ ලෝකයේ මිල අධිකතම හඬක් බවට ද පත් විය. ඇය ඒය ආරක්ෂා කරගැනීම වෙනුවෙන් බොහෝ වියදම් ද කළා ය. අවට වාතයේ තෙතමනය යම් මට්ටමක් රඳවා ගැනීම කටහඬ සුරක්ෂිත කර ගැනීමට ඉවහල් වනු ඇතැයි පැවසේ. ඇය ද එම උපදෙස් අනුගමනය කරමින් තෙතමනය පවත්වා ගැනීම සඳහා හියුමිඩිෆයර්උපකරණයක් මිලට ගත්තාය. සාමාන්‍යයෙන් එවැන්නක වටිනාකම ඩොලර් 20කට (රු. 3,000ක් පමණ) වඩා වැඩි වන්නේ නැත. නමුත් ඇය මිල අඩු ඒවා ගන්නේ නැති නිසා ඒ වෙනුවෙන් ඇමරිකානු ඩොලර් මිලියන 2ක් (රු. මිලයන 307 ක් පමණ) වැය කළාය. මෙය සාදා ඇත්තේ දියමන්තිවලින් දැයි එයින් පසුව බොහෝ දෙනෙකු ප්‍රශ්න කරන්නට වූහ.

Tuesday, January 16, 2018

ජෙෆ් බෙසොස් හෙවත් ලෝකයේ ලොකුම සල්ලිකාරයා - jeff bezos , the World's Richest Man


ජෙෆ් බෙසොස්කියන්නේ කවුදැයි ඔබෙන් ඇසුවොත් එයට පිළිතුරක් දෙන්නට නොහැකි වන්නට පුළුවන්. නමුත් මේ විස්තරය කියවුවාට පසු බොහෝ දෙනෙක් මේ නම මතක තබා ගන්නා බව නො අනුමානයි. ඒ අන් කිසිවක් නිසා නොව අලුත්ම ආර්ථික සහ මූල්‍ය වාර්තාවලට අනුව ලොව ධනවත්ම පුද්ගලයා වන්නේ ජෙෆ් බෙසොස් වීම නිසයි. ලෝක ප්‍රකට, විශාලතම අන්තර්ජාල වෙළෙඳ සමාගම වන ඇමසන්හි සභාපති සහ ප්‍රධාන විධායක නිලධරයා වන්නේ  ඔහුයි. ඔහුගේ මුළු වත්කම් ප්‍රමාණය ඇමරිකානු ඩොලර් බිලියන 105ක් පමණ වනවා. මේ ප්‍රමාණය 153 න් වැඩි කිරීමෙන් මේ වත්කම අප රටේ මුදලින් කීයක් වනවා දැයි සොයා ගන්නට ඔබට අවශ්‍ය නම් හැකියාව තිබෙනවා. ඒ වගේම 2016 වසරේ අප රටේ දළ දේශීය නිෂ්පාදනය ඇමරිකානු ඩොලර් බිලියන 81.32ක් යැයි කීමෙන් ඔහුගේ වත්කම්වල ප්‍රමාණය කෙතරම් දැයි යම් අවබෝධයක් ඔබට ලැබිය හැකියි. 


මෙතෙක් වසර ගණනාවක් තිස්සේම ලෝකයේ ධනවත්ම පුද්ගලයා ලෙස කිරුළු පළඳා සිටියේ මයික්‍රොසොෆ්ට් සමාගමේ බිල් ගේට්ස්. නමුත් පසුගිය දිනෙක ඇමසන් සමාගම කොටස් වෙළෙඳ පළේ වේගයෙන් ඉදිරියට පැමිණීම නිසා බිල් ගේට්ස්ව පරදා ජෙෆ් බෙසොස් ට ඉදිරියට එන්නට හැකියාව ලැබුණා. 



1964 ජනවාරි 12 වැනිදා ඇමරිකා එක්සත් ජනපදයේ නිව් මෙක්සිකෝ ප්‍රාන්තයේ දී ජෙෆ් බෙසොස් උපත ලබන විට ඔහුගේ මව වූ ජැක්ලින් ජෝර්ගෙන්සන් ට වසර විස්සක්වත් සම්පූර්ණ වී තිබුණේ නැහැ. ඔහුගේ පියා වූයේ ටෙඩ් ජෝර්ගෙන්සන්. කෙසේ නමුත්  ජෙෆ් බෙසොස් ට අවුරුදු හතරක්වත් සම්පූර්ණ වන්නට පෙර ඔහුගේ මව වෙනත් විවාහයක් කර ගත්තා. ඔහුගේ නව පියා වූයේ මෙක්සිකානු ජාතිකයකු වූ මයික් බෙසොස්. කුඩා කාලයේ සිටම අලුත් දේවල් ගැන සිහින මැවූ ජෙෆ් බෙසොස් ඇමසන් නම් වූ ලෝකයේ අති විශාල අන්තර්ජාල වෙළෙඳ සල දක්වා දිගු ගමනක් ගියේ මේ සිහිනය නිසාම බව බොහෝ ව්‍යාපාරික සඟරා පවසනවා. 


ඔහු පරිගණක විද්‍යාව සහ විදුලි කාර්මික ශිල්පය කෙරෙහි දැඩි උනන්දුවක් දැක්වූවා. මේ නිසාම මේ ක්ෂේත්‍ර දෙකින් ඔහුට උපාධි ගැනීමටත් හැකියාව ලැබුණා. කුඩා කාලයේ දී ඔහු බොහෝ දේවල් නිර්මාණය කළේ සිය නිවසේ අවශ්‍යතාවයන් වෙනුවෙන්. තමන් සමග කාමරයේ එකට හැදුණු වැඩුණු සහෝදරයන් කාමරයෙන් පිටතට යනවා දැයි බලා ගන්නට ඔහු අපූරු අනතුරු හැඟවීමේ උපකරණයක් ද නිපදවූවේ කුඩා කාලයේදීමයි. 



ජෙෆ් බෙසොස් ලෝකයේ ලොකුම ධනවතා වුවත් යහපත් විවාහ ජීවිතයක් ගත කරන බව තමයි ව්‍යාපාරික වෙබ් අඩවි පවා සඳහන් කරන්නේ. එයට හේතුව ලෝකයේ බොහෝ ධනවතුන්ගේ විවාහ ජීවිතවල යම් යම් අසාර්ථකතාවන් තිබෙන නිසයි. ඔහු විවාහ වී සිටින්නේ මැකන්සි ටට්ල් සමගයි. ඔහුට ඇයව හමු වී ඇත්තේ ඔහු උපාධිය සඳහා ඉගෙනීම ලැබූ කාලයේ දී. 1993 වසරේ දී විවාහ වූ ඔවුන් ඇමසන් සමාගම ආරම්භ කිරීම සඳහා සියැටල් ප්‍රාන්තය කරා සංක්‍රමණය වුණා. මේ විවාහයෙන් ඔවුන්ට දරුවන් තිදෙනෙකු ලැබුණා. එයට අමතරව ඔවුන් චීන ජාතික දැරියකව සිය දරුකමකට ද හදා වඩා ගත්තා. 




ජෙෆ්,  ඇමසන් සමාගමේ මුල්ම කාර්යාලය බවට පත් කර ගත්තේ සිය නිවසේ ගරාජයයි. ඔහු තම සමාගමට ගැළපෙන විවිධ නම් ගැන සිතුවත් අවසානයේ දකුණු ඇමරිකානු ගංගාවක් වූ ඇමසන්යන්න ඒ සඳහා යොදාගැනීමට තීරණය කළා. මේ නමින් නිර්මාණය කළ ඇමසන් වෙළෙඳ ලාංඡනයේ  ඉංග්‍රීසි අකුරත් ඉසඩ්අකුරත් යාකරමින් ඊතලයක් ඇඳ තිබෙනවා. එයින් ඔහු අදහස් කළේ ඇමසන් වෙබ් අඩවියෙන් ඕනෑම දෙයක් (ඒ සිට ඉසඩ් දක්වා - A to Z) මිලට ගත හැකි බවයි. 



ඔහු ගරාජ කාර්යාලයේ සිටියදී මේසයක් ලෙස භාවිත කළේ ලීවලින් සෑදූ දොරක්. ඔහු මේ බව කිසි දිනක අමතක කළේ නෑ. තමා දවසින් දවස දියුණුව කරා පා තැබුවත් මේ මේසය ඔහු සමග ඉදිරියට ගමන් කළා. අද ද ඇමසන් කාර්යාලයේ ඇති සියලු මේස සකසා ඇත්තේ ලීවලින් තැනූ දොරක ආකෘතියක් සිහිවන ආකාරයෙනුයි. 


2003 වසරේ දී ඔහු ගමන් කළ හෙලිකොප්ටරය අනතුරකට ලක් වුණා. එයින්ඔහුට සිදු වූයේ සුළු තුවාලයක් පමණක් වුවත් ඔහු එයින් පසුව හෙලිකොප්ටර්වලින් ගමන් බිමන් යාම සහමුලින්ම නතර කළා. 


ඔබ බොහෝ දෙනෙක් ලෝක ප්‍රසිද්ධ වොෂිංටන් පෝස්ට්පුවත් පත පිළිබඳ දන්නවා විය හැකියි. 2013 වසරේ දී ජෙෆ් මෙය ඇමරිකානු ඩොලර් මිලියන 250 කට මිලට ගත්තා. 



ජෙෆ් කුඩා කාලයේ පටන්ම අභ්‍යවකාශ චාරිකා ගැන සිහින මැවූ පුද්ගලයෙක්. මේ සිහිනය ඉටු කරගන්නට ඔහු ඇමසන් ප්‍රයිම් එයාර්නමින් සමාගමක් ආරම්භ කළා. ඔහු එයින් බලාපොරොත්තු වන්නේ අභ්‍යවකාශ චාරිකා සඳහා වැයවූ මුදල් බොහෝ අඩු කොට වැඩි දෙනෙකුට එම අත්දැකීම ලබා දීමටයි. කෙසේ නමුත් ඇමරිකාවේ ෆෙඩරල් ගගන පරිපාලනය තවමත් මෙයට අනුමැතිය ලබා දී නැහැ. 


ජෙෆ් ලෝකයේ ලොකුම සල්ලිකාරයා වුනත් ඇතැම් මූල්‍ය ආයතන එය එකවර පිළිගන්නට කැමැත්තක් නැති බව පෙනෙනවා. ඇතමෙක් පවසන්නේ අද පවතින උද්ධමන අනුපාතය ආදිය පිළිබඳ සලකා බැලීමේ දී මේ තරම් වත්කමක් මෙයට වසර කිහිපයකට පෙර මයික්‍රොසොෆ්ට් සමාගමේ බිල් ගේට්ස් ට ද තිබුණු බවයි. කෙසේ නමුත් අනෙක් අය පවසන්නේ සිය ව්‍යාපාර තුළින් ඉදිරියට පැමිණ ලෝකයේ ධනවතා බවට පත්ව සිටින ජෙෆ් බෙසොස් හට එම ගෞරවය ලබා දෙන්නට කිසිවකු මැලි නොවිය යුතු බවයි.

(මේ ලිපිය ලියන කාලයේ ලෝකයේ ලොකුම සල්ලිකාරයා ජෙෆ් බෙසොස් වුවත් 2021 ආරම්භයේ දී මේ තත්වය වෙනස් වුණා. 2021 වෙද්දී ලෝකයේ ලොකුම සල්ලිකාරයා වුනේ ටෙස්ලා ආදී සමාගම් ගණනාවකට නායකත්වය දුන් එලන් මස්ක්. ඔහු ගැන ලිපියක් පහත ලින්ක් එකෙන් කියවන්න පුළුවන්.)