පුවත්පත්වලට ලිපි ලිවීම මාගේ විනෝදාංශයකි. මා ලියන ලිපි මගින් පාඨකයින් දැනුමක් ලබමින් ජීවිතයට යමක් එකතු කරගන්නේ නම් එය මාගේ සතුටකි. වේගයෙන් ඉදිරියට ඇදෙන තාක්ෂණික ලෝකයේ පුවත්පත් කියවන්නට තරම් විවේකයක් නොමැති අයවලුන් බොහෝය. තවකෙකු පුවත්පත් කියවන්නට කැමති නැත. අන්තර්ජාලයේ ද සිංහල බසින් සියලුම පුවත්පත් ඇති බැවින් තාක්ෂණයට ප්‍රිය කරන්නෝ පරිගණකයෙක් හෝ සිය ජංගම දුරකථනයෙන් ඒවා කියවති. එබැවින් මා ලියන ලිපි එවැනි පාඨක පිරිස් වෙත යොමු කරන්නට අදහස් කළ නිසා මෙවැනි බ්ලොග් අඩවියක් ගොඩනගන්නට සිතුවෙමි. මාගේ උත්සාහය කෙතරම් නම් සාර්ථකදැයි තීරණය වන්නේ ඔබගෙන් ලැබෙන ප්‍රතිචාර මතය. එබැවින් ඔබ මේ පිළිබඳ සිතන පතන දෑ මවෙත දන්වන්නට උනන්දුවන්නේ නම් එය මාගේ සතුටයි. ඔබ සැමට තෙරුවන් සරණයි!

Thursday, December 14, 2017

අභිරහස් ලෙස මිය ගිය සුප්‍රකට මිනිසුන් - Mysterious deaths of famous people

Source - https://i.ytimg.com/vi/5EjhGf-HfzE/maxresdefault.jpg

ඉපදෙන සියලු දෙනාම මිය ගියත්, මේවා අතුරින් ඇතැම් මරණ පසුපස විස්තර කළ නොහැකි අභිරහස් ස්වභාවයක් පවතින බැව් පෙනේ. එයට හේතුව ඒ මරණ සිදු වූ ආකාරය පිළිබඳ පැහැදිලි තොරතුරක් ඉදිරිපත් කිරීම දුෂ්කර බැවිනි. මෙවැනි අභිරහස් මරණවලට බොහෝ දෙනෙක් බඳුන් වෙති. ඒ අතර සිටින අප්‍රකට පුද්ගලයන්ගේ මරණ නොබෝ දිනකින් මිනිසුන්ගේ මතකයෙන් මැකී ගිය ද සුප්‍රකට පුද්ගලයන්ගේ මරණ පසුපස පවතින අභිරහස් එසේ මැකී යන්නේ නැත. යම් යම් හේතූන් නිසා ඒවා වරින් වර මේවා ඉස්මතු වේ. මේ කතා  කරන්නට සැරසන්නේ ද එසේ වරින් වර ඉස්මතු වන සුප්‍රකට අභිරහස් මරණයන් කිහිපයක් පිළිබඳවය.

බෲස් ලී

බෲස්ලී ගේ මරණය 

බෲස් ලී යනු අද දවසේ සමාජයට පිය මනින දරුවාගේ සිට මහල්ලා දක්වා වූ සියල්ලන් අසා ඇති නමකි. සටන් කලාව තුළ ඔහු තරමට ලෝකයේ කතා බහට ලක් වූ වෙනත් පුද්ගලයකු නොමැති තරම්ය. 1940 නොවැම්බර් 27 වැනිදා උපන් බෲස් ලී කුඩා කාලයේ සිටම සටන් කලාව ප්‍රගුණ කළ අයෙකි. එමෙන්ම නළුවෙකි. ග්‍රීන් හෝර්න්ට්නම් ඇමරිකානු රූපවාහිනී කතා මාලාවෙන් සහ ද චයිනීස් කනෙක්ෂන්හා ෆිස්ට් ඇන්ඩ් ෆියුරියන චිත්‍රපට ඔස්සේ ඉමහත් ජනප්‍රියත්වයට පත් විය. රංගන ශිල්පියකු සහ සටන් කරුවකු ලෙස සාර්ථකව ඉදිරි ගමනක් යමින් සිටි ඔහු 1973 ජූලි 20 වැනිදා හොංකොං හි දී හදිසියේ මරණයට පත් විය. ඔහුගේ මරණයට හේතුව ලෙස නිල වශයෙන් ඉදිරිපත් කළ කාරණය වූයේ මොළයේ ජල සාන්ද්‍රණය වැඩි වීම බව ය. එසේ ජල සාන්ද්‍රණය වැඩී වී ඇත්තේ පිට කොන්දේ අසනීප තත්වයක් නිසා ඔහු ලබා ගත් වේදනා නාශක ඖෂධ බව ද මරණ පරීක්ෂණයේ දී සඳහන් කෙරිණි. කෙසේ නමුත් ඔහු මරණයට පත් වූ ආකාරය පිළිබඳ මුල සිටම සැක සහිත විය. ඇතැමුන් පවසන ලද්දේ එම මරණය ඝාතනයක් බවය. ඇතැමුන් පැවසූයේ ඔහුට සාපයක් වැදුණු බවය. 1993 වසරේ දී බෲස්ලීගේ පුතු බ්‍රැන්ඩන් ලී රූගත කිරීමක් අතරේ දී අභිරහස් ලෙස මරණයට පත් වීමත් සමග නැවත බෲස්ලීගේ අභිරහස් මරණය ද කතාබහට ලක්වන්නට විය. බෲස්ලීගේ පුතු මරණයට පත් වූයේ රූගත කිරීමක සඳහා ගෙනැවිත් තිබූ තුවක්කුවක අහම්බෙන් ජීව උණ්ඩයක් තිබීම නිසාය. එය පසුපස ඇත්තේ ද තවමත් නොවිසඳුණු අභිරහසකි.

මැරිලින් මොන්රෝ

මැරිලින් මොන්රෝගේ මරණය 

මැරිලින් මොන්රෝගේ මරණය 

1926 ජූනි 1 උපන් නෝර්මා ජේන් මෝර්ටෙන්සන් පසුව මැරිලින් මොන්රෝ බවට පත් වූවා ය. එකල ලෝකයේ අතිශය ලිංගික ආකර්ෂණයක් පැවැති කාන්තාව ඇය වූවා ය. ඇය කිසිදා සිය පියා දැක නොතිබුණු අතර මව වූ ග්ලේඩිස් සිය ජීවිතයේ අවසාන කාලයේ මානසික රෝගියකු බවට පත් වූවාය. 1982 අගෝස්තු 5 වැනිදා ඇය ලොස් ඇන්ජලීස් හි පිහිටි සිය නිවසේ දී මරණයට පත් වූවා ය. ඇගේ යහනට පසෙකින් හිස් නිදි පෙති බෝතලයක් විය. නමුත් වැඩි දිනක් ගත වන්නට පෙර පැතිර ගිය රාවය වූයේ මෙය ඝාතනයක් බවය. නමුත් ඇගේ මරණයට හේතුව වශයෙන් නිල වශයෙන් සඳහන් කොට තිබුණේ නිදි පෙති අධික ලෙස ගැනීම ය. ඇය එවක ඇමරිකානු ජනපති වූ ජෝන් එෆ්. කෙනඩි සහ ඔහුගේ සොයුරා වූ රොබට් කෙනඩි සමග එකවර ආදර සබඳතා පැවැත් වූ බවට ද රාවයක් පැති තිබිණි. කෙසේ නමුත් මේ 2017 වසරේ කරන ලද හෙළිදරව්වකින් දැනගන්නට ලැබී ඇත්තේ මාරක එන්නතක් මගින් මැරිලින් මොන්රෝව ඝාතනය කිරීම සඳහා රොබට් කෙනඩි අණ දුන් බව ය.

ජෝන් එෆ්. කෙනඩි

කෙනඩි ඝාතනය සිදුවූ ආකාරය 

ලී හාවේ ඔස්වල්ඩ් ඝාතනය වූ අවස්ථාව 


1917 ඇමරිකා එක්සත් ජනපදයේ මැසචුසෙට්ස් ප්‍රාන්තයේ උපත ලද ජෝන් එෆ්. කෙනඩි ඇමරිකාවේ 35 වැනි ජනපතිවරයා විය. සිය පාලන තන්ත්‍රයේ දී බොහෝ අර්බුදවලට මුහුණ දුන්න ද ඔහු එරට සැලකිය යුතු තරමේ ජනප්‍රියත්වයක් ඉසිලූ ජනපතිවරයෙකු විය. 1963 නොවැම්බර් 22 වැනිදා ඔහු මෝටර් රථ පෙළපාලියක් අතරතුරේ දී වෙඩි පහරකින් ඝාතනයට ලක් විය. ඔහුගේ ඝාතකයා ලෙසට සැක කෙරුණේ ලී හාවේ ඔස්වල්ඩ් ය. පසුව ඔහු අත්අඩංගුවට ගෙන සිර භාරයට ගෙන යමින් සිටින අවස්ථාවේ දී ඩලාස් හි රාත්‍රී සමාජ ශාලා හිමිකරුවකු වූ ජැක් රූබි අතින් ඝාතනයට ලක් විය. ඒ සමගම කෙනඩිගේ මරණය පිළිබඳ සැක පහළ වන්නට විය. ඔස්වල්ඩ් ඝාතනය වීම නිසා කෙනඩි ඝාතනය පසුපස පවතින තොරතුරු දැන ගැනීමට තිබූ අවස්ථාව අහිමි විය. බොහෝ දෙනෙකු පැවසූයේ කෙනඩිගේ ඝාතනය ඔස්වල්ඩ්ගේ තනි ක්‍රියාවක් නොවන බව ය.  නමුත් නිල වශයෙන් ප්‍රකාශ කෙරුණේ එය හුදෙක්ම ඔහුගේ තනි උත්සාහයක් පමණක් බව ය.

කෙනඩි ඝාතනය

මක්සිම් ගෝර්කි

ගෝර්කි සහ ස්ටාලින් හමු වූ අවස්ථාවක් 

ලෙනින් චෙස් අදිද්දී සිටගෙන ඡායාරූපයට මුහුණ දී සිටින්නේ ගෝර්කි ය

මක්සිම් ගෝර්කි පිළිබඳ නොදන්නා අයකු නොමැති තරම් ය. 1868 මාර්තු 28 වැනිදා රුසියාවේ නිෂ්නි නොව්ගොරොද්වල උපන් ඔහු කුඩා කල සිටම ජීවත් වන්නට ඉමහත් අරගලයක් යෙදුණු පුද්ගලයකු විය. ඔහුගේ නිර්මාණවල පන්නරයට මේ අරගල බොහෝ දායකත්වයක් සැපයූ බැව් බොහෝ දෙනෙකු පවසති. මුල් කාලයේ දී බොල්ෂෙවික් විප්ලවයට පක්ෂපාතී අදහස් දැක් වූ ගෝර්කි, ලෙනින් බලයට පත් වීමත් සමග එය විවේචනය කරන්නට පටන් ගත්තේය. ඔහු 1936 ජූනි 18 වැනිදා මරණයට පත් වූ අතර බොහෝ දෙනෙකු අදටත් ඔහුගේ මරණය දෙස බලන්නේ සැක මුසු බැල්මකිනි. ලෙනින් සිදු කළ ඇතැම් ප්‍රජාතන්ත්‍ර විරෝධී ක්‍රියාවන් විවේචනය කරමින් ගෝර්කි පුවත්පත්වලට ලිපි ලීවේය. මේ පුවත්පත වසා දමන්නට සිදු වූ නිසා ගෝර්කි හඬ යටපත් විය. බොල්ෂෙවික් පාලනයට පහර දීම නිසා ඔහුට රුසියාවෙන් යාමට සිදු විය. ඔහු විදෙස් රටවලදී රුසියානු පාලන තන්ත්‍රය විවේචනය කරන නිසා සිය රටට ගෙන්වා ගැනීම වඩාත් සුදුසු යැයි කල්පනා කළ රුසියානු පාලකයෝ ඔහුගේ 60 වැනි ජන්ම දිනය සැමරීම සඳහා ඔහුව නැවත රුසියාවට කැඳවා ගන්නා ලදී. එවකට රුසියාවේ පාලකයා වූයේ ස්ටාලින් ය. ඉන්පසුව ඔහුට රටින් පිටවීම තහනම් කෙරිණි. 1936 ජූනි 18 වැනිදා සිදු වූ ඔහුගේ මරණය ස්වාභාවික එකක් බැව් රුසියානු පාලකයන් දැනුම් දුන්නත් ඔහුගේ මරණය සහමුලින්ම ස්ටාලින් විසින් සැලසුම් කරන ලද්දක් බවට කටකතා පැතිර යන්නට විය. මේ මරණයේ අභිරහස් බව නැවත පුන රූපණය කිරීමක ලෙස 2006 වසරේ දී The Murder of Maxim Gorky: A Secret Execution නමින් චිත්‍රපටයක් ද නිර්මාණය විය.



මක්සිම් ගෝර්කිගේ අවමංගල්‍යය

Friday, December 8, 2017

PhotoScan - ඡායාරූප පිටපත් කරන්නටම හදපු ඇන්ඩ්‍රොයිඩ් ඇප් එක


අද කාලේ ඡායාරූප අර ගන්නේ එක්කෝ ජංගම දුරකතනයෙන්. එහෙමත් නැත්නම් ඩිජිටල් කැමරාවෙන්. මේ නිසා හැම ඡායාරූපයක් ම තියෙන්නේ ඩිජිටල් ආකාරයටයි. නමුත් කාලෙකට පෙර ඡායාරූප ගත්තේ දළ සේයා පටල (Film Roll) දාන්න පුළුවන් කැමරාවලින්. ඒවා වර්ණ රසායනාගාරයකට ගිහින් මුද්‍රණය කළාට පසුවයි ඡායාරූපය බලන්න ලැබෙන්නේ. අද වගේ ගත්තු ගමන්, තමන් ගත්තේ මොකක්ද කියලා බලා ගන්න ලැබෙන්නේ නැහැ. මෙහෙම ගත්තු ඡායාරූප ඩිජිටල් ආකාරයෙන් ගබඩා කරලා තියා ගන්න නම් ඒවා ස්කෑන් (Scan) කරන්න වෙනවා. ඒ සඳහා ස්කැනර් යන්ත්‍රයක් අවශ්‍ය වෙනවා. කොහොම වුනත් අපට යන යන හැම තැනකම ස්කැනර් එකක් රැගෙන යන්න අමාරුයි. මේ නිසා අපේ ඥාති නිවසකට, මිතුරකුගේ නිවසකට ගිය විට අපට සම්බන්ධයක් තියෙන මෙවැනි පැරණි ඡායාරූපයක් දුටු විට කරන්නේ තමන්ගේ අතේ තියෙන ජංගම දුරකතන කැමරාවෙන් එහි ඡායාරූපයක් අර ගන්න එක. නමුත් මෙසේ ගන්නා ඡායාරූප සෑම විටම හොඳ තත්වයෙන් පවතින්නේ නැහැ. ජංගම දුරකතන කැමරාවේ තිබෙන ෆ්ලෑෂ් ආලෝකය නිසා පැරණි ඡායාරූපය දිලිසෙන්න පුළුවන්. එවිට එහි පැහැදිලි කම නැතිව යනවා. දහවල් කාලයේ නම් ෆ්ලෑෂ් ආලෝකය නොමැතිව හොඳින් ආලෝකය පතිත වන ස්ථානයකට ගිහින් ඒ ඡායාරූපය පිටපත් කර ගන්න පුළුවන්. නමුත් එහි ද බොහෝ විට අඩුපාඩු පවතිනවා. අනෙක රාත්‍රි කාලයේ නම් ෆ්ලෑෂ් ආලෝකය හැරෙන්න වෙන ආලෝක ක්‍රමයක් හොයා ගන්නත් අමාරුයි.
මෙවැනි අවස්ථාවල දී ප්‍රයෝජනයට ගැනීම සඳහා බොහෝ ඇන්ඩ්‍රොයිඩ් ඇප් බාගත කර ගන්නට තිබෙනවා. මේ ඇතැම් ඒවා යම් යම් මට්ටම්වලින් සාර්ථක වුනත් සෑම විටම සාර්ථක වන්නේ නැහැ. නමුත් ගූගල් සමාගම විසින් නිර්මාණය කරන ලද PhotoScan ඇප් එක වඩාත් ඉදිරියෙන් තිබෙන බව පැවසිය හැකියි. මෙය ඇපල් දුරකතන සඳහා ද වෙනමම සංස්කරණයක් පවතිනවා.
මේ ඇප් එකෙන් ඡායාරූපයක් ස්කෑන් කළ විට ෆ්ලෑෂ් ආලෝකය දැල්වුනත්, අවසන් ඡායාරූපයේ එය ඇතුළත් වන්නේ නැහැ. ඒ වගේම උසස් තත්වයෙන් අවසන් ප්‍රතිඵලය ලබාගන්නටත් පුළුවන්. ඔබට නිකමට මෙය අත්හදා බලන්න.






Tuesday, December 5, 2017

ශෂී කපූර්ගේ නික්ම යාම ගැන සටහනක් . . .


අග්‍රගණ්‍ය බොලිවුඩ් රංගන ශිල්පියකු වන ශෂී කපූර් මේ දෙසැම්බර් 04 වැනිදා පස්වරු 5. 20 ට වසර 79 ක ජීවන ගමනකින් පසු සිනමා රසිකයන්ට සමු දී මෙලොවින් සදහටම සමුගත්තේය. ඒ බටහිර මුම්බායි හි කෝකිලබෙන් ධිරුභායි අම්භානි රෝහලේ දී ය. ඔහු වසර කිහිපයක් මුළුල්ලේ දරුණු වකුගඩු රෝගයකින් පෙළුණු බැව් පැවසෙන අතර ඔහුගේ මරණය දැනුම් දෙමින් ඔහුගේ බෑණනුවන් වන රන්දීර් කපූර් ද ඒ බව නිවේදනය කලේ ය. ඔහු දශක ගණනාවක් පුරා බොලිවුඩ් සිනමාවේ පතාක යෝධයන් ව සිටින කපූර් පවුලේ ආරම්භ සාමාජිකයෙකි.

ප්‍රීතිවිරාජ් කපූර්

1938 මාර්තු 18 වැනිදාවක ඉන්දියාවේ කල්කටා හි දී (වර්තමාන කොල්කොටා) උපත ලද ශෂී කපූර්ගේ මුල් නම වූයේ බල්බීර් ප්‍රීතිවිරාජ් කපූර් ය. රංගන ශිල්පියකු පමණක් නොව චිත්‍රපට නිෂ්පාදකයකු ද වූ ඔහු අති විශාල හින්දි සිනමා පට ගණනාවක මෙන්ම සුප්‍රකට ඉංග්‍රීසි චිත්‍රපට කිහිපයක ද චරිත නිරූපණය කළේ ය. ඔහුගේ පියා ප්‍රීතිවිරාජ් කපූර් වූ අතර මව රම්සර්නි කපූර් වූවා ය.  පවුලේ තෙවැන්නා මෙන්ම බඩපිස්සා ද වූ ශෂී බොලිවුඩ් සිනමාවේම පතාක යෝධයන්ව සිටි රාජ් කපූර්ගේ සහ ෂම්මි කපූර්ගේ බාල සොයුරා ද වූයේය.

රාජ් කපූර්

ෂම්මි කපූර්

1958 දී ඔහු ඉංග්‍රීසි ජාතික රංගන ශිල්පිනියක වන ජෙනිෆර් කෙන්ඩාල් සමග විවාහ වූයේය. ප්‍රීතිවිරාජ් පදනම පිහිටුවන්නට මුල් වූයේ ඇය ය. ඔවුන්ට මෙම විවාහයෙන් දරුවන් තිදෙනෙකු ලැබුණි. ඒ කුනාල් සහ කරන් යන පුතුන් දෙදෙනා සහ සන්ජන් නම් දියණිය යි. ඔවුන් ද විශාල ප්‍රසිද්ධියක් නොලැබුවා වුව ද බොලිවුඩ් සිනමාවේ රංගන ශිල්පීන් ය.

ශෂී සහ ජෙනිෆර්



ශසී කපූර්, බිරිඳ සහ දරුවන්



ශෂී කපූර් මුලින්ම රංගනයෙහි යෙදුණේ සිය පියා වූ ප්‍රීතිවිරාජ්ගේ ප්‍රීතිවිරාජ් තියටර්ස්විසින් නිෂ්පාදනය කරන ලද නාට්‍යවල ළමා නළුවකු වශයෙනි. ඔහු මුලින්ම චිත්‍රපටයක චරිතයක් නිරූපණය කළේ 1940 දශකයේ ය. ඒ වන විට ප්‍රීතිවිරාජ් නමින් වෙනත් ළමා නළුවකු සිටි බැවින් ඔහු පෙනී සිටියේ ශෂීරාජ්යන නමිනි. ඔහු ළමා නළුවකු ලෙස වඩාත්ම ජනාදරයට පත් වූ චරිතවල රංගනයෙහි යෙදුණේ ආග්’ (1948)  සහ ආවාරා’ (1951) යන චිත්‍රපටවලය. එම චිත්‍රපට දෙකෙහි ඔහු පෙනී සිටියේ සිය වැඩිමහලු සොයුරා වූ රාජ් කපූර්ගේ ළමා කාලය නිරූපණය කිරීම සඳහා ය. එමෙන්ම 1950 වසරේ තිරගත වූ සංග්‍රම්චිත්‍රපටයේ ද ඔහු කැපී පෙනෙන චරිත නිරූපණයක යෙදුණේ ය. ඔහු එහි නිරූපණය කළේ එවක සුප්‍රකට නළුවකු වූ අශෝක් කුමාර්ගේ ළමා කාලයේ චරිතය යි.

ශෂී කපූර් ට සුනිල් දත්ගේ මුල්ම චිත්‍රපටය වූ පෝස්ට් බොක්ස් 999’ චිත්‍රපටයේ සහාය අධ්‍යක්ෂවරයා ලෙස වැඩකටයුතු කරන්නට ද අවස්ථාව ලැබිණි. ඔහු ප්‍රධාන චරිතය සඳහා පෙනී සිටි මුල්ම චිත්‍රපටය වූයේ 1961 වසරේ තිරගත වූ ධර්මපුත්‍රයි. එතැනින් ආරම්භ කළ සිනමා චාරිකාවේ දී ඔහු හින්දි චිත්‍රපට 116ක රංගනයෙහි යෙදුණේ ය. 60, 70 සහ 80 දශකවල දී ඔහු බොලිවුඩ් සිනමාවේ ඉමහත් ජනාදරයක් දිනාගත් නළුවකු විය. 1961 වසරේ සිට ඔහු ඉංග්‍රීසි චිත්‍රපට සඳහා ද රංගනයෙන් දායක වූයේය. ඒවා අතර ද හවුස් හෝල්ඩර්’, ‛ශේක්ෂ්පියර් වාලායන චිත්‍රපට විශේෂයෙන් සඳහන් කළ යුතු වේ. ඔහු සමග වැඩිම චිත්‍රපට ගණනාවක රංගනයෙහි යෙදුණු රංගන ශිල්පිනිය වූයේ නන්දා ය. එම චිත්‍රපට අතිශය ජනප්‍රියත්වයට ද පත් විය. ඒවා අතර මොහාබත් ඉස්කෝ කාහේතේ හේන්’, චාර් දිවාරි’, ‛මෙහෙන්දි ලගී මේරේ හාත්’, ‛ජබ් ජබ් ෆූල් ඛීලේ’, ‛නීන්ද් හමාරි ඛාවබ් තුම්හාරේවැනි තවත් බොහෝ සිනමා නිර්මාණ විය.



පසු කාලයේ ඔහු රාඛී, ෂර්මිලා ථාගෝර් සහ සීනාත් අම්මාන් යන රංගන ශිල්පිනියන් සමග ද සාර්ථක චිත්‍රපට ගණනාවකම රංගනයෙහි යෙදුණේ ය. එමෙන්ම හේමමාලිනී, ප්‍රවීන් බාබි සහ මවුෂුමි චැටර්ජි යන රංගන ශිල්පිනියන් සමග ද චිත්‍රපට ගණනාවක් සඳහාම පෙනී සිටියේය.

ඔහු ද්විත්ව රංගනයෙහි යෙදුණු චිත්‍රපට දෙකක්  විය. ඒ හසීනා මාන් ජයේගිසහ ශන්කර් දාදාවිය. ඒ චිත්‍රපට දෙකම අතිශය සාර්ථකත්වයට පත් වූ ඒවා ය. ශන්කර් දාදා හි ඔහු එක් චරිතයක් සඳහා පෙනී සිටියේ ගැහැනියක ලෙස ය.

ඔහු මර්චන්ට් අයිවරි’, ‛ද හවුස් කීපර්’, ‛ශේක්ෂ්පියර් වාලා’, ‛බොම්බේ ටෝකි’, ‛හීට් ඇන්ඩ් ඩස්ට්’  ආදී තවත් බොහෝ ඉංග්‍රීසි සිනමා නිර්මාණවල රංගනයෙහි යෙදීමෙන් ජාත්‍යන්තර වශයෙන් ද කීර්තියට පත් වූයේය. මේ බොහෝ ඉංග්‍රීසි චිත්‍රපටවල ඔහු රංගනයෙහි යෙදුණේ සිය බිරිඳ වූ ජෙනිෆර් කෙන්ඩාල් සමගිනි.




ඔහු කලෙක බොලිවුඩ් සිනමාවේ වැඩිම ගෙවීමක් ලද රංගන ශිල්පියා ද වූයේ ය.

1984 වසරේ දී සිය බිරිඳ පිළිකාවක් වැළඳී මෙලොව හැර යාමත් සමග ශෂී කෙමෙන් සිනමාවෙන් දුරස් වන්නට පටන් ගත්තේය. ශෂී සිනමාව වෙනුවෙන් කළ ඉමහත් කැපවීම නිසා ඉන්දියානු රජය 2011 දී ඔහුට පද්ම භූෂන්සම්මානය පිරිනැමුවේ ය. 2014 දී ඔහුට සිනමාවෙ වෙනුවෙන් පිරිනැමෙන දදාෂාහෙබ් ෆල්කීසම්මානය ද හිමි විය. මෙම සම්මානය ඔහුගේ පියා වූ ප්‍රීතිවිරාජ් සහ සොයුරා වූ රාජ් කපූර් ද මෙයට පෙර හිමි කරගෙන තිබිණි.



ඔහුගේ මරණය වෙනුවෙන් ඉන්දීය අගමැති නරේන්ද්‍ර මෝඩි සහ ජනපති රාම් නාත් සිය ට්විටර් පණිවිඩවල ශෝකය පළ කොට තිබිණි.

සුප්‍රකට සිනමා කරුවකු වූ මහේෂ් භාත්ගේ ට්විටර් පණිවිඩය තුළ ශෂී කපූර්ගේ වෙන්ව යාම ඉමහත් සංවේදීව සටහන් කරයි. ඒ මෙසේය.


අහස ගගුරා මුම්බායි නගරයේ එක් පෙදෙසකට වැසි ඇද හැලෙන්නට විය. මගේ හදවත කෘතඥතාවෙන් පිරී ගියේය. මහත්මයාණෙනි, ඔබට මාගේ හද පිරි කෘතගුණය පිරිනමමි. ඔබ අපගේ හදවත් ස්පර්ශ කළේය. එසේ ස්පර්ශ කළ හැක්කේ ඔබටම පමණි.” 

Monday, November 27, 2017

මනුෂි චිලර් - 2017 ලෝක රූ රැජින කිරුළ ඉන්දියාවට


2017 වසර අවසන් වී 2018 වසර එළඹෙන්නේ ඉන්දියාව ඉමහත් සතුටක ගිල්වමින් බව කීවොත් එහි වරදක් නැත. ඒ අන් කිසිවක් නිසා නොව චීනයේ සන්යා සිටි ඇරීනාහි දී 2017 නොවැම්බර් 18 වැනිදා පවත්වන්නට යෙදුණු ලෝක රූ රැජින තරගයෙන් තරගකාරියන් 118 දෙනෙකු අභිබවමින් 2017 ලෝක රූ රැජින ඉන්දියාවෙන් බිහි වීම නිසා ය. ඈ නමින් මනුෂී චිලර්ය. ඉන්දියාවෙන් ලෝක රූ රැජිනක් මෙසේ බිහිවන්නේ වසර 17 කට පසුව ය. 2017 වසර අවසන් වෙමින් තිබිය දී ඉන්දියාව ලද මේ ජයග්‍රහණය ඔවුන්ට මහමෙරක් තරම් වටින්නේ මේ නිසා ය.

මනුෂී චිලර් වෛද්‍ය ශිෂ්‍යාවකි. මෝස්තර නිරූපණ ශිල්පිනියකි. එමෙන්ම කිවිඳියකි. 1997 මැයි 14 වැනිදා උපන් ඇය මෙයට පෙර ඉන්දියාව තුළ පවත්වන ලද ෆෙමිනා රූ රැජින තරගය ද ජයග්‍රහණය කළාය. ඇගේ මේ ජයග්‍රහණය සමගින් ඉන්දියාව මෙතෙක් බිහි කළ ලෝක රූ රාජිනියන් සංඛ්‍යාව හයකි.



ඉන්දියාවෙන් මුලින්ම රූ රැජිනක් බිහි වන්නේ 1966 වසරේ ය. ඒ රීටා ෆාරියා ය. ඉන්පසු 1994 වසරේ දී අයිෂ්වර්යා රායි ලෝක රූ රැජින වූවා ය. 1997 වසරේ දී ඉන්දියාව තවත් රූ රැජිනක් ලොවට දායාද කළ අතර ඈ නමින් ඩයනා හේඩ්න් ය. යුක්තා මූකී ලෝක රූ රැජින වෙමින් 1999 වසරේ දී ඉන්දියාව තවත් වතාවක් ලෝකය අමන්දාන්දයට පත් කළාය.  ඉන් පසු ලෝක රූ රැජිනක් ඉන්දියාවෙන් බිහිවන්නේ 2000 වසරේ දී ය. ඇය ප්‍රියංකා චොප්රා ය. මනූෂි චිලර් ලෝක රූ රැජින වන්නේ ඉන් වසර 17 කට පසුව ය.

රීටා ෆාරියා

අයිශ්වර්යා

ඩයනා හේඩ්න්

යුක්තා මුඛි
ප්‍රියංකා

මනූෂි චිලර් ඉන්දියාවේ හර්යානා ප්‍රාන්තයේ ගොවි පවුලක තරුණියකි. පරම්පරාවෙන් ගොවි පවුලක වුව ද ඇගේ පියා වෘත්තියෙන් වෛද්‍යවරයෙකි. ඔහු නමින් මිත්‍ර බාසු චිලර් ය. ඔහු ආරක්ෂක පර්යේෂණ සහ සංවර්ධන සංවිධානයේ විද්‍යාඥයකු ද වන්නේ ය. මනූෂිගේ මව නීලම් චිලර් ද වෛද්‍යවරියකි. ඇය මානව චර්යා සහ අනුබද්ධ විද්‍යා ආයතනයේ මහාචාර්යවරියක සේම ස්නායු රසායන විද්‍යා අංශයේ අංශාධිපතිනිය ද වන්නී ය. මේ අනුව මනූෂිගේ පවුල එසේ මෙසේ පවුලක් නොවන බව පැහැදිලි ය.

මව සහ පියා සමග

නවදිල්ලියේ සාන්ත තෝමස් විද්‍යාලයේ අධ්‍යාපනය හැදැරූ මනූෂි සිය දෙමාපියන්ගේ අඩි පාරේ යමින් වෛද්‍ය විද්‍යාව හැදෑරීම පිණිස සෝනිපත් හි පිහිටි කාන්තාවන් සඳහා පමණක් වෙන් වූ භගත් පූල් සිං රජයේ වෛද්‍ය විද්‍යාලයට ඇතුළු වූවා ය. මනූෂි හොදින් පුහුණු වූ කුචිපුඩි නර්තන ශිල්පිනියක් ද වන්නී ය. කුචිපුඩි යනු ඉන්දියාවේ සාම්ප්‍රදායික නර්තනයන් සතෙන් එකකි. ඇය 2017 වසරේ ෆෙමිනා ඉන්දීය රූ රැජින තරගයට සහභාගී වන්නේ හර්යානා ප්‍රාන්තය නියෝජනය කරමිනි.

ලෝක රූ රැජින තරගයක අවසන් වටයේ දී ජයග්‍රහණය මග පෙන්වන්නේ තරගකාරියන්ගේ බාහිර පෙනුම පමණක්ම නොවේ. ඔවුන් ලෝකය දකින බුද්ධිමත් ආකාරය ද මෙයට බලපාන්නේය. මනුෂී ට ද එය පොදුය. ඇයට මේ ජයග්‍රහණය හිමි කර දුන්නේ ඈ මාතෘත්වය සහ කාන්තාවන් පිළිබඳ පළ කළ බුද්ධිමත් අදහස් නිසාය. මනූෂි අවසන් ජයග්‍රාහිකාවන් පස් දෙනා අතර සිටිද්දී ඇගෙන් පැනයක් අසනු ලැබිණි. ඇගෙන් අසනු ලැබූයේ ඉහලම වැටුපක් හිමි විය යුත්තේ කුමන වෘත්තියට ද යන්න ය. ඇය පිළිතුරු දෙමින් පවසා සිටියේ මාතෘත්වයට යන්න ය. එය මුදලින් මැනිය නොහැකි බවත්, එය මැනිය හැක්කේ ආදරය සහ ගෞරවය යන මිනිස් ගුණාංගයන්ගෙන් බවත් ඇය පවසා සිටියා ය. තමාගේ ජීවිතයේ ලද සියලු ජයග්‍රහණයන් පසුපස සිය මව සිටි බව ද ඇය මෙහි දී සිහිපත් කළාය. සෑම මවක්ම සිය දරුවන් වෙනුවෙන් ඉමහත් කැපවීමක් කරනා බව ද ඇය සඳහන් කළාය. ඉහළම වැටුප හිමි විය යුත්තේ මාතෘත්වයට යැයි ඇය හඩ නගා පවසා සිටියේ සවන් පිරී යන අනේක වූ ප්‍රේක්ෂක ප්‍රතිචාර රැසක් මැද්දේ ය. ඇගේ මේ ප්‍රකාශය ඇයට ලෝක රූ රැජින බවට පත්වන්නට මග එළි පෙහෙළි කළා පමණක් නොව ඇය ලෝකයේ සෑම දෙනෙකුගේම අතිශය ගෞරවයට පාත්‍ර වන්නට ද හේතුවක් විය.


මනුෂී චිලර් ලෝක රූ රැජින ලෙස කිරුළ පළඳද්දී දෙවෙනි තැනට මෙක්සිකෝවේ ඇන්ඩ්‍රියා මීසා ද තෙවැනි තැනට එංගලන්තයේ ස්ටෙෆානි හිල් ද පත් වූවා ය. මෙම තරගය සඳහා ශ්‍රී ලංකාවෙන් දුෂේනි සිල්වා ඉදිරිපත් වුව ද ඇයට අවසන් 40 දෙනා අතරට පැමිණීමට හෝ හැකියාවක් ලැබුණේ නැත.

ඉන්දියාවෙන් මෙතෙක් බිහි වූ ලෝක රූ රැජිනන්ට අමතරව විශ්ව රූ රැජිනන් ද බිහි වී තිබේ. ඒ 1994 දී සුස්මිතා සෙන් සහ 2000 දී ලාරා දත්තා වශයෙනි. මේ තරග දෙකෙහි ඇති වෙනස් කුමක් දැයි යමෙකුට සිතෙන්නට පුළුවන. ලෝක රූ රැජින තරගය 1951 දී එක්සත් රාජධානියේ එරික් මෝර්ලි විසින් ආරම්භ කරන ලද්දක් වන අතර එහි වර්තමාන හිමිකාරිත්වය දරන්නේ ඔහුගේ බිරිඳ වන ජුලියා මෝර්ලි ය. විශ්ව රූ රැජින තරගය 1952 දී ඇමරිකා එක්සත් ජනපදයේ රෙදිපිළි ව්‍යාපාරයක් වූ පැසිෆික් මිල්ස් මගින් ආරම්භ කරන ලද්දක් වන අතර එහි වර්තමාන හිමිකාරිත්වය දරන්නේ ඇමරිකානු ජනපති ඩොනල්ඩ් ට්‍රම්ප් සහ එන්.බී.සී. සමාගම වේ. මේ තරග දෙකෙන්ම ඉන්දියාවට බිහි වූ රූ රැජිනන්ගෙන් බොහෝ දෙනෙක් බොලිවුඩ් නිළියන් බවට පත් වූහ. නමුත් නිළියන් වශයෙන් අතිශය සාර්ථකත්වයට පත් වූයේ අයිශ්වර්යා සහ ප්‍රියංකා පමණි. ඩයනා හේඩ්න්, යුක්තා මූඛි, නිළියන් වන්නට උත්සාහ කළ ද ඔවුන්ගේ සිනමා නිර්මාණ සාර්ථක වූයේ නැත. විශ්ව රූ රැජිනන් බවට පත් වූ සුස්මිතා සෙන් සහ ලාරා දත්තා ද නිළියන් බවට පත් වූ මුත් එතරම් සාර්ථකත්වයක් හිමි වූයේ නැත. ඉන්දියාවේ මුල්ම ලෝක රූ රැජින වූ රීටා ෆාරියා මේ සඳහා මග විවර කර ගත්තේ මෝස්තර නිරූපණයෙනි. ඇය  සිනමාට සම්බන්ධ වූ නමුත් පසුව මේ සියල්ල අතහැර වෛද්‍යවරියක වූවා ය. ඇය දැනට අයර්ලන්තයේ ඩබ්ලින් හි වාසය කරන්නී ය.

සුස්මිතා සෙන්

ලාරා දත්තා


2017 වසරේ ලෝක රූ රැජින වූ මනුෂී චිලර් වෛද්‍ය ශිෂ්‍යාවකි. ඇයගේ දෙමාපියන් ද වෛද්‍යවරුන් ය. ඇය ඉන්දියාවේ නිසා බොලිවුඩ් සිනමාවෙන් ඇයට නිසැකවම ඇරයුම් ලැබෙනු ඇත. කෙසේ නමුත් ඇය අයිශ්වර්යා, ප්‍රියංකා ආදීන් ගේ මාවතේ යනු ඇති ද නැතහොත් රීටා ෆාරියා මෙන්ම වෛද්‍ය වෘත්තිය වෙනුවෙන් ජීවිතය කැප කරනු ඇති ද යන්න බොහෝ දෙනෙකු අසති. අනාගතය මේ සියල්ල තීරණය කරනු ඇත.