පුවත්පත්වලට ලිපි ලිවීම මාගේ විනෝදාංශයකි. මා ලියන ලිපි මගින් පාඨකයින් දැනුමක් ලබමින් ජීවිතයට යමක් එකතු කරගන්නේ නම් එය මාගේ සතුටකි. වේගයෙන් ඉදිරියට ඇදෙන තාක්ෂණික ලෝකයේ පුවත්පත් කියවන්නට තරම් විවේකයක් නොමැති අයවලුන් බොහෝය. තවකෙකු පුවත්පත් කියවන්නට කැමති නැත. අන්තර්ජාලයේ ද සිංහල බසින් සියලුම පුවත්පත් ඇති බැවින් තාක්ෂණයට ප්‍රිය කරන්නෝ පරිගණකයෙක් හෝ සිය ජංගම දුරකථනයෙන් ඒවා කියවති. එබැවින් මා ලියන ලිපි එවැනි පාඨක පිරිස් වෙත යොමු කරන්නට අදහස් කළ නිසා මෙවැනි බ්ලොග් අඩවියක් ගොඩනගන්නට සිතුවෙමි. මාගේ උත්සාහය කෙතරම් නම් සාර්ථකදැයි තීරණය වන්නේ ඔබගෙන් ලැබෙන ප්‍රතිචාර මතය. එබැවින් ඔබ මේ පිළිබඳ සිතන පතන දෑ මවෙත දන්වන්නට උනන්දුවන්නේ නම් එය මාගේ සතුටයි. ඔබ සැමට තෙරුවන් සරණයි!

Saturday, August 19, 2017

'පඩයක්' තරම්වත් ගණන් නොගන්නා පඩ ගෙඩි සහ පඩ වැල් (දැල් බටු)- Pada gedi alias Passiflora foetida

පඩ ගෙඩි


ප්‍රසිද්ධියේ කියන්න ටිකක් මොකක්ද වගේ වුනත් පඩ ගෙඩි සහ පඩ වැල් කියන්නේ කැලෑ බදට වෙන්න වැවෙන වැල් වර්ගයක්. කොහොම වුනත් මේ පින්තූර ටික නම් මම ගත්තේ අපේ ගෙවල් ළඟ වත්තක වැවුණු පඩ වැලකින්. මෙහි උද්භිද විද්‍යාත්මක නම Passiflora foetida. ඉංග්‍රීසි බසින් හඳුන්වන්නේ Wild water melon නමින්. කැලෑවල්වලදී පිපාසය නිවන පලතුරක් බව ඒ නමින්ම හඳුනා ගන්නට පුළුවන්. මේ ප්‍රසිද්ධ නමට අමතරව wild maracuja, bush passion fruit, marya-marya,  stinking passionflower, love-in-a-mist සහ running pop කියන නම්වලිනුත් මෙය හඳුන්වන බව සඳහන් කළේ නැත්නම් ඒක අඩුවක්. මේවාට 'දැල් බටු' කියා කියන බවත් මේ බ්ලොග් එකට කොමෙන්ටුවක් දාපු jay-c z කියලා තිබුණා. හොයලා බැලුවාම ඒක ඇත්ත. ඒ නිසා මම ඒ නමත් මෙතනට එකතු කරලා පෝස්ටුව යාවත්කාලීන කළා.


පඩ වැල්

මෙය අප කවුරුත් දන්න හඳුනන පැෂන් පවුලට අයිති වැල් වර්ගයක්. ඒක පැහැදිලි වෙන්නේ පඩ ගෙඩි සහ පැෂන් ෆෘට්වල කුලය නිසයි. මේ දෙකේම කුලය වෙන්නේ Passifloraceae. එවැනි විද්‍යාත්මක පැහැදිලි කිරීමක් නොකළත් මේ පඩ ගෙඩියක් කපා බැලූ විට පැෂන් ෆෘට් සහ පඩ ගෙඩි එකම කුලයේ බව හොඳින් පැහැදිලි වෙනවා. නමුත් ප්‍රමාණයෙන් නම් අසමානයි. පඩ ගෙඩියක් සාමාන්‍යයෙන් පිංපොං බෝලයක ප්‍රමාණයකින් යුක්තයි. නමුත් පැෂන් එයට වඩා  විශාලයි. ඒ වගේම පඩ මල් සහ පැෂන් ෆෘට් මල් පෙනුමින් එක සමානයි. 




පඩ ගෙඩි වැලේ පවතින්නේ දැලක් වැනි අපූරු ස්වාභාවික වියමනකට මැදි වෙලා. කොහොම වුනත් වැඩි දෙනෙක් නොදන්නා නිසාත් පඩ ගෙඩි ගැන වැඩි විස්තරයක් වැඩි දෙනෙක් කතා කරලා තියෙනවා දැකලා නැති නිසාත් මේ ගැන ටිකක කතා කරන එක හොඳයි කියලා හිතුවා.



කැලෑ බදට වෙන්න වැවෙන නිසාත්, අද කාලේ කෑමට අප විසින්ම නියම කර ගත් වෙනත් පලතුරු වර්ග බොහෝ තිබෙන නිසාත් ඉදුණු පඩ ගෙඩි කියන්නේ රසවත් වගේම ගුණවත් පලතුරක් කියන එක බොහෝ දෙනෙක් අමතක කරලා. ඉදිරි පරම්පරාවන්ට මේ වැලක් තබා නමක් හෝ අමතක වී යන්න තියෙන ඉඩකඩ බොහෝ වැඩියි. නිවාස ගොඩනැගීම සඳහා ගෙවතු සකස් කිරීමේ දී මෙවැනි 'වල් පැලෑටි' කපා දමා විනාශ කරන්නේ මෙහි ඇති ගුණාත්මක බව පිළිබඳ කිසිදු වැටහීමක් නැති නිසයි.

Ayurvedic Medicinal Plants of Sri Lanka  කියන ආයතනයේ වෙබ් අඩවියට අනුව මෙය අප රටට ආවේණික ශාකයක් වුනත් විකිපිඩීයාවේ කියන්නේ ඊට වඩා හාත්පසින්ම වෙනත් දෙයක්. එහි සඳහන් වන අන්දමට මෙය නිරිත දිග ඇමරිකාව (දකුණු ටෙක්සාස් සහ ඇරිසෝනා), මෙක්සිකෝව, කැරිබියන් දූපත්, මධ්‍යම ඇමරිකාව, සහ දකුණු ඇමරිකාව කියන ප්‍රදේශවලට ආවේණික ශාකයක්. පසුකාලීනව මෙය දකුණු ආසියාවට සහ හවායි වැනි ප්‍රදේශ ඇතුළුව ලොව පුරා බොහෝ රටවලට ව්‍යාප්ත කොට තිබෙනවා.


මෙහි ගෙඩි මෙන්ම ලපටි කොලත් ආහාරයට ගනු ලබනවා. කෙසේ නමුත් ඊසාන දිග බ්‍රසීලයේ ගොවීන් කළ පර්යේෂණයකින් පසුව නිවේදනය කළේ මෙහි පත්‍ර විෂ සහිත බවයි. විශේෂයෙන් වියලි කාලවලදී මෙහි පත්‍ර ආහාරයට ගැනීමෙන් ශරීරයට අධික ලෙස සයිනයිඩ් එකතුවන බව ඔවුන් සඳහන් කොට තිබෙනවා. කෙසේ නමුත් ගෙඩි පලතුරක් ලෙස ආහාරයට ගැනීමේ කිසිදු අහිතකර තත්වයක් නැහැ. නින්ද නොයාමේ රෝගයට පිළියමක් ලෙස වියට්නාමයේ මෙහි කොල වියලා ඖෂධයක් ලෙස භාවිත කරනවා.

ආයුර්වේද වෛද්‍ය ක්‍රමයට අනුව මෙහි පත්‍ර සහ මුල් ඖෂධීය වටිනාකමකින් යුක්තයි. පෙණහැල්ලේ රෝගාබාධ, ලිංගිකව සම්ප්‍රේෂණය වන රෝග, උදර රෝග, ඉදිමුම්, රක්තවාතය, ඔසප්වීමේ අක්‍රමවත්භාවයන්, අපස්මාරය, වලිප්පුව, පක්ෂාඝාතය යන රෝග සඳහා ප්‍රතිකාර කිරීමට ඖෂධයක් ලෙස මෙය භාවිත කෙරෙනවා. එමෙන්ම ස්වාභාවික ගබ්සාවන්ට මුහුණ දෙන කාන්තාවන්ගේ එම තත්වය සමනය කිරීම, වේදනාව සමනය තිරීම, උණ ස්වභාවය පහත දැමීම ආදිය සඳහා ප්‍රත්‍යක්ෂ ඖෂධයක් ලෙසත් මෙය ප්‍රකටයි.


නම දුටු පමණින් පඩයක් තරම්වත් ගණන් නොගත්තත්, අප බොහෝ දෙනෙකුගේ අවධානයට ලක් නොවී පවතින මේ පලතුර මෙන්ම ඖෂධය ඉදිරියේ දී අපගෙන් තව තවත් ඈත්ව යනවා නිසැකයි. ඔබ දැනුවත් නම් අප අවට ඇති, අප විසින් 'පඩයක්' තරමින් වත් ගණන් නොගන්නා තවත් ඖෂධීය පැළෑටි බොහෝ සොයා ගන්නට පුළුවන්. අනාගත ලෝකයට නිරෝගී මිනිසකු ලෙස පිවිසෙන්නට නම් සොබා දහම හඳුනා ගෙන එය ආරක්ෂා කරමින් එහි ජීව ගුණය අප තුළ තැන්පත් කර ගත යුතුයි. නමුත් සිදු වන්නේ එයමද?  

මේ ලිපියත් කියවන්න

වනේ වන පල වැල ගැන දන්නවාද?

Monday, July 24, 2017

අඩු වයසේ නායකයෝ - World's Youngest Leaders

නායකයෙක් වන්නට නම් බොහෝ ජීවිත අත්දැකීම් තිබිය යුතුය. රටක නායකයෙක් පිළිබඳ සැලකීමේ දී මෙය අනිවාර්යය. ජනාධිපතිවරයෙක්, අගමැතිවරයෙක් පත්වීමේ දී වයස සලකා බැලෙන්නේ මේ නිසාය. අප රටේ වුව ජනපති ධුරය සඳහා තරුණ වියෙහි පුද්ගලයකු ඉදිරිපත් වන්නේ කලාතුරකින් වන අතර යම් හෙයකින් ඉදිරිපත් වුව ද ඔහු වෙනුවෙන් ඡන්දය දෙන්නට බොහෝ දෙනෙකු තුළ එතරම් කැමැත්තක් නැත. නමුත් සෑම විටම එසේ වන්නේ ද නැත. තරුණයෝ ද ලෝකයේ රාජ්‍ය නායකයන් බවට පත් වෙති. 


වර්තමානයේ ද එවැන්නෝ සිටිති. වර්තමාන ප්‍රංශ ජනපතිවරයා වන එම්මානුවෙන් මැක්‍රෝන් එවැන්නෙකි. ඔහු තිස් නව වැනි වියේදී ජනපති පදවියට පත් විය. ඔහුගේ සම්ප්‍රාප්තියෙන් පසු තරුණ රාජ්‍ය නායකයන් පිළිබඳ ලෝකයේ කතා බහට ලක්වන්නට පටන් ගත් බවක් පෙනුණි. තරුණ රාජ්‍ය නායකයන් සිටින්නේ ඔහු පමණක්ම දැයි ඇතැමෙක් අසන්නට වූහ. මේ එයට පිළිතුරක් වන්නට පුළුවන.


ජිග්මේ ඛේසාර් නාම්ග්යෙල් වන්ග්චුක්


1980 පෙබරවාරි 21 උපන් දැනට 37 වැනි වියෙහි පසුවන ජිග්මේ, භූතානයේ රජු ය. වජ්‍රයාන බෞද්ධයකු වූ ඔහු එහි රාජ්‍යත්වය පත් වන්නේ සිය පිය රජු වූ ජිග්මේ සිංග්යේ වන්ග්චුක් ගේ ඇවෑමෙන් පසුවය. සිය ද්විතීයික අධ්‍යාපනය භූතානයේ දී හැදෑරීමෙන් පසු  ඇමරිකා එක්සත් ජනපදයේ දී සහ එක්සත් රාජධානියේ දී උසස් අධ්‍යාපනය හැදෑරුවේය. ඔහු එහිදී විදේශ සේවය ජාත්‍යන්තර සබඳතා පිළිබඳ සිය දැනුම දියුණු කරගත්තේය. එමෙන්ම ඉන්දියාවේ ලාල් බහදුර් ශාස්ත්‍රී ජාතික පරිපාලන ඇකඩිමියේ දී පරිපාලනය පිළිබඳ පාඨමාලාවක් ද සම්පූර්ණ කොට තිබේ.

තමිම් බින් හමාඩ් අල් ථානි


ඔහු කටාර් හි එමීර් වරයා වේ. එමීර් යනු කටාරයේ රාජ්‍ය නායකයා ය. 1980 ජූනි 5 වැනිදා උපන් ඔහු දැනට 36 වැනි වියෙහි පසු වෙයි. ඔහු මෙයට පෙර සිටි එමීර්වරයා වූ හමාඩ් බින් ඛලීෆා අල් ථානි ගේ සිව්වැනි දරුවාය. සිය පියාගේ ඇවෑමන් අනතුරුව ඔහු මෙම තනතුරට සුදුසුකම් ලද්දේය.

කිම් ජොන් උන්


කිම් ජොන් උන් යනු උතුරු කොරියාවේ උත්තරීතර නායකයා වේ. විකිපීඩියාව ඔහුගේ උපන් දින දෙකක් ගැන සඳහන් කරයි. ඉන් එකක් 1984 ජනවාරි 8 වැනිදා වන අතර අනෙක 1984 ජූලි 5 වැනිදාය. කෙසේ වුවත් ඔහු දැනට 33 වැනි වියෙහි පසු වෙයි. උතුරු කොරියාව යනු ලෝකයේ වැසුණු රටක් බැවින් ඔහු පිළිබඳ දැනගන්නට ලැබෙන තොරතුරු ස්වල්ප වන අතර ඒවා ද කෙතරම් දුරකට නිවැරදි දැයි කිව නොහැකිය. සිය පියා වූ කිම් ජොන්ග් ඉල් ගේ අවමංගල්‍යය දා ඔහු උතුරු කොරියාවේ රාජ්‍ය නායකත්වය පත් විය.

වැනෙස්සා ඩිඇම්බ්‍රාසියෝ


වැනෙස්සා යනු ඉතාලි අර්ධද්වීපයේ පිහිටි ස්වාධීන රාජ්‍යයක් වූ සැන් මැරීනෝ ජනරජයේ රාජ්‍ය නායිකාව වේ. එහි රාජ්‍ය නායිකාව හඳුන්වනු ලබන්නේ කැප්ටන් රීජන්ට්යන නමිනි. 1988 අප්‍රේල් 26 වැනිදා උපන් ඇය දැනට 26 වැනි වියෙහි පසුවන්නීය. ජනතා ඡන්දයෙන් තේරී පත් වුණු ඇය සැන් මැරීනෝ වේ මෙතෙක් පත් වූ ලාබාලතම රාජ්‍ය නායිකාව වේ. 

Wednesday, July 19, 2017

ච්ත්‍රපටි හදන්න ගිහින් වරද්ද ගත්තු තැන් - Famous Movie Mistakes

සිනමා නිර්මාණයක් කිරීම ජංගම දුරකතනයකින් වීඩියෝ පටිගත කිරීමකට කිසිසේත් සමාන වන්නේ නැත. අප සිනමා ශාලාවක හෝ නිවසේ හෝ සිට ඉතා සුවපහසුවෙන් නැරඹුව ද මෙය පසුපස අතිශය දැවැන්ත සංකීර්ණ ක්‍රියාදාමයක් තිබේ. මේ නිසා ඇතැම් විට විවිධ අත් වැරදීම් සිදුවන්නට ඉඩ තිබේ. ඇතැම් අත්වැරැදි අපට එක්වර පෙනෙන අතර ඇතැම් ඒවා කිසිදාක අපට හසුවන්නේ නැත. නමුත් විවිධ සිනමා නිර්මාණවල පවතින එසේ අත් වැරදුණු ස්ථාන යමෙකු විසින් පෙන්වා දුන් විට ඒවා මහත් හාස්‍ය රසයකින් යුක්තව නැවත නැරඹිය හැකි ය. මේ පවසන්නට සැරසෙන්නේ ද එවැනි සිනමා අත් වැරදීම් කිහිපයක් පිළිබඳව තොරතුරු ය. මේ සිනමා නිර්මාණ ඇතැම් වට ඔබ නැරඹූ ඒවා වන්නට පුළුවන්. එසේ නොවන ඒවා තිබෙන්නට ද පුළුවන. නරඹා තිබුණ ද නැති ද මේ වැරදි දැනගත් පසු එය රස විඳින්නට නම් එය බාධාවක් නොවන බව විශ්වාසය.




වෙඩි තියන්න කලින් කන් වසා ගැනීම




සිංහල අවුරුද්දට රතිඤ්ඤා පත්තු කරන්නට පෙරම කන් වසා ගැනීම කුඩා දරුවන්ගේ සිරිතය. ඇතැම් විට වැඩිහිටියෝ ද එසේ කන් වසා ගනිති. ඒ තව මොහොතකින් පිපිරීමක් සිදුවන බව දන්නා නිසාය. North by Northwest  නම්  චිත්‍රපටයේ ද එවැනි දෙයක් සිදු විය.  මවුන්ට් රෂ්මෝර් අවන්හල තුළ වෙඩි තබන දර්ශනයක් රූප ගත කරමින් පැවතිණි. මොහොතකින් වෙඩි හඬක් ඇසෙන බව දන්නා නිසා මේ දර්ශන තලයේ සිටි එක් පුද්ගලයකු සිය කන්වල ඇඟිල්ල ගසා ගත්තේය. මෙය ඒ මොහොතේදී කිසිවකු නොදැක්කත් තිරගත වෙද්දී බොහෝ දෙනෙකුට පෙනුණි.

අත් දෙක මාරු වීම


මෙය Reservoir Dogs  චිත්‍රපටයේ සිදු වූ අත්වැරැද්දකි. මෙහි මාර්වින් නැෂ් නම් පුද්ගලයා හට වද දීම සඳහා රැගෙන එයි. ඔහුගේ දෑත් පිටුපසට කොට මාංචු දමා තිබේ. ඔහුව රැගෙන ආ දෙදෙනා ඔහුට පහර දෙන විට ඔහුගේ දෑත් ඉදිරිපසින් තිබෙනු පෙනෙයි. තව මොහොතකට පසු එම දර්ශනයේම නැවතත් පෙනෙන්නේ ඔහුගේ දෑත් පිටුපසින් තිබෙන බවය.

ගෑස් ලාම්පුව විදුලියෙන් දැල්වීම




ගෑස් ලාම්පු දැල්වෙන්නේ ගෑස්වලිනි. නමුත් සුප්‍රකට සිනමා නිර්මාණයක් Gone With The Wind  හි මෙය වෙනස් බව පෙනේ. මෙහි වෙඩි තැබීමේ අවස්ථාවකින් පසු ඈෂ්ලි නම් තැනැත්තා හට ප්‍රතිකාර කිරීම සඳහා කාමරයකට රැගෙන එයි. එහිදී මෙලනි නම් තැනැත්තිය ගෑස් ලාම්පුවක් ගෙන පසුපසින් පැමිණේ. නමුත් ගෑස් ලාම්පුව සැබවින්ම දැල්වෙන්නේ විදුලියෙන් බව පෙනෙන්නේ පහළින් වයරයක් පවතින නිසාය.

ඇංජින් අතුරුදහන් වීම




මෙසේ ඇංජින් අතුරුදහන් වන්නේ The Usual Suspects චිත්‍රපටයේය. මෙහි බෝයිං 747 ගුවන් යානයක් ගොඩ බසින අවස්ථාවක්  පෙන්වයි. එහිදී එහි ඇංජින් හතරක් පෙනෙන්නට තිබේ. පසුව මෙම දර්ශනයම පසුපස කෝණයකින් පෙන්වයි. නමුත් එවිට පෙනෙන්නේ ඇංජින් දෙකක් පමණි. ඉදිරියේ සිට පසුපසට මාරු වෙද්දී ඇංජින් දෙකක් අතුරුදහන් වී තිබේ.

අතීත රෝම හමුදාවට ගෑස් ටැංකි


Gladiator නම් සුප්‍රකට චිත්‍රපටය ඔබ ද බොහෝ විට නරඹා තිබෙනවාට සැක නැත. මෙයට පදනම් වන්නේ ක්‍රි.ව. 180 සමයේ රෝමයයි. මෙහි කොලොසියම් හි සිදුවන කාර්තේජ් සංග්‍රාමයඉතා සුප්‍රකට දර්ශනයකි. මෙහි එක් අශ්ව රථයක් පෙරලී යයි. මේවා පෙරළවීම සඳහා භාවිත කොට තිබූ තාක්ෂණය සඳහා අධික පීඩනය යටතේ පිරවූ ගෑස් සිලින්ඩර් යොදා ගැනුණි. මේවා සඟවා තැබුව ද එක් අශ්ව රථයක් පෙරලී යන විට දුහුවිල්ල තුළින් එහි ඇති ගෑස් සිලින්ඩරය හොඳින් දර්ශනය වේ.

අතීතයට ගිය ටී ෂර්ට්




වර්තමානයේ දක්නට ලැබෙන ටී ෂර්ට් එකක් අතීතයට ගිය කතාවක් දකින්නට ලැබෙන්නේ Raiders of the Lost Ark චිත්‍රපටයේය. මෙම චිත්‍රපටයට පාදක වන්නේ 1936 වර්ෂයයි. මෙය පුරාවස්තු සොයා යන ඉන්ඩියානා ජෝන්ස් චිත්‍රපටයකි. ඔබ ද මෙය නරඹා ඇතිවාට සැකයක් නැත. මෙහි ඉන්ඩියානා ජෝන්ස් තැබෑරුමක පිටත වී මත්පැන් පානය කරමින් සිටිය දී ඔහුට පසුපසින් වම් පසින් හදිසියේ මතුවන්නේ වර්තමානයේ අප දකින ටී ෂර්ට් එකක් ඇඳ ගත් පුද්ගලයෙකි.

නැවත ඉපදෙන වීදුරු




ආර්නෝල්ඩ් ස්වාසෙනගර් රංගනයෙන් දායක වුණු ටර්මිනේටර්චිත්‍රපට මාළාව නරඹා නැති සිනමා ලෝලියෙක් සිටින්නට නොහැකිය. එහි එක් චිත්‍රපටයක් වන Terminator 2: Judgment Day   හි ටී - 1000 නම් රොබෝව ට්‍රක් රථයක් පදවාගෙන විත් පාලමකින් පහළ පවතින මාර්ගයක් මතයට කඩා වදී. එහිදී එහි ඉදිරිපස වීදුරු සියල්ල සුනුවිසුණු වී යයි. නමුත් දර්ශනය ඉදිරියට දිව යද්දී පෙනෙන්නේ ට්‍රක් රථයේ සුනුවිසුණු වී ගිය වීදුරු සියල්ල  නැවත තිබෙන ආකාරයයි.

මුහුදු මංකොල්ලයට වර්තමානයෙන් ගිය මිනිසා




Pirates of the Caribbean: The Curse of the Black Pearl චිත්‍රපටය ද බොහෝ දෙනෙක් නරඹා තිබෙන්නකි. එයට පාදක වන්නේ 18 වැනි සියවසයි. මෙම මුහුදු මංකොල්ලකරුවන් නැවක සිටින දර්ශනයකි. සියලු දෙනා 18 වැනි සියවසට අදාළ ඇඳුම් පැළඳුම්වලින් සැරසී සිටිද්දී එක් පුද්ගලයකු පමණක් ටී ෂර්ට් එකකින් සැරසී, කව්බෝයි තොප්පියක් සහ අව් කන්නාඩියක් පැළැඳ සිටී.

මේ සඳහන් කරන ලද්දේ ලෝක සිනමාවේ නිර්මාණ කිහිපයක පමණක් සිදුවූ අපූරු අත්වැරදීම්ය. මෙයට අමතරව තව බොහෝ තිබේ. මෙතෙක් හඳුනාගත නොහැකි වූ අත්වැරදීම් ද තිබන්නට පුළුවන. ඔබ සිනමා රසිකයෙක් නම් අදින් පසුව චිත්‍රපටයක් රසවිඳීමේ දී මෙවැනි අත්වැරදීම් ඔබටත් හසු විය හැකිය.






Saturday, June 17, 2017

සමාජ වෛරය නිසා බිහි වන විකෘති ජීවීන්


අපි සියලු දෙනා එකම ආකාරයකින් මේ ලොවට බිහි වුව ද සමාජයත් සමග ගැටෙද්දී විවිධාකාර පුද්ගල චරිත බවට පත් වන්නෙමු. දෙමාපියන්ගෙන් අපට ලැබෙන ආදර්ශයන්ට වඩා බොහෝ දේවල් අප ලබාගන්නේ සමාජයෙනි. මෙසේ සමාජානුගත වන ජීවියා ඇතැම් අවස්ථාවල දී කුමක් හෝ හේතුවක් නිසා සමාජය සමග යම්කිසි නොමනාපයක් ඇති කර ගනියි. මෙය සුළු සිද්ධියක් හෝ විශාල සිද්ධියක් විය හැකිය. කෙසේ නමුත් මෙයට මුහුණ දෙන ආකාරය ඒ ඒ  පුද්ගලයාගේ පෞරුෂය අනුව වෙනස් වේ.

ශක්තිමත් පෞරුෂයකින් යුක්ත පුද්ගලයා ඒ දෙස උපේක්ෂාවෙන් බලා සිය සමාජ සාරධර්ම රැක ගනිමින් සාමාන්‍ය පුද්ගලයකු ලෙස සමාජයේ ජීවත් වෙයි. නමුත් පෞරුෂයේ යම්කිසි අසාමාන්‍යතාවක් ඇත්නම්, ඔහු තමා මුහුණ දුන් සිදුවීම පිළිබඳ සලකා බලන්නේ සාමාන්‍ය පුද්ගලයකු ලෙස නොවේ. ඔහු එය වෙනත් ඇසකින් දකින්නට උත්සාහ කරයි. මේ පුද්ගලයා සිය අදහස් සමාජය වෙතට යොමු කිරීමේ දක්ෂයකු නම් එවිට තත්වය බරපතළ වේ. තත්වය බරපතළ වනවා යන්නේ අදහස් කරන්නේ තමාට සමාජයෙන් සිදු වූ වරද, අසාධාරණය නිසා ඔහු සිය අදහස් සමාජ සාරධර්ම, සිරිත් විරිත් ආදිය බිඳ දැමෙන සේ කටයුතු කිරීමය. එවැනි පුද්ගලයන් සතුටු වන්නේ ඒ ආකාරයෙනි. සමාජය රැඳී පවතින කුමන හෝ සාරධර්මයකට පහර වදිනු බලා මොවුහු බොහෝ සතුටක් ලබති. එයින් නො නැවතෙන ඔවුහු මෙවැනි අදහස් ඇති පිරිස් එක් කර ගනිමින් යම්කිසි කණ්ඩායමක් ගොඩ නගා ගනිති. මෙවැන්නන් හැඳින්වීමට ඉංග්‍රීසි භාෂාවේ අපූරු වචනයක් ද පවතී. ඒ misanthrope යන්නය. එහි අදහස ‘විශ්වද්වේෂියා’ යන්නය.


දැන් ඔවුන් ශක්තිමත්ය. ඔවුන් අතර ලේඛකයන්, මාධ්‍යවේදීන්, සිනමාකරුවන්, කවි ගී ලියන්නන් බොහෝ සිටිය හැක. ඔවුන් සිය නිර්මාණ ඔස්සේ සමාජයට මුදා හරින්නේ සිය සිත්හි කැකෑරෙමින් පවතින සමාජ වෛරයයි. නමුත් එය බොහෝ විට පැමිණෙන්නේ වෛරී සහගත ස්වභාවයකින් නොවන්නට පුළුවන. අද මෙවැන්නෝ සමාජය පුරා බොහෝ විසිරී සිටිති. වුන්ගේ ඒකායන අරමුණ සමාජ සාරධර්මවලට සියුම් ලෙස පහර දීමය.

මොවුන් ඇතැම් අවස්ථාවාදී දේශපාලන පක්ෂවලට කඩේ යාමක් ද සිදු කරනු දක්නට ලැබේ. ඔවුන් එයින් සමාජයට දීමට අදහස් කරන පණිවිඩය නම් සිය අදහස් ඔස්සේ සමාජය යහමගට ගැනීමට උත්සාහ ගැනීම බවය. වමුත් සැබවින්ම ඔවුන්ගේ සැබෑ අරමුණ වන්නේ සිය විකෘති අදහස් සමාජගත කිරීම සඳහා දේශපාලන බලය ගොඩනගා ගැනීමය. මේ ඔස්සේ ඔවුන්ට රාජ්‍ය මාධ්‍ය නාලිකා ඔස්සේම සිය විකෘති අදහස් සමාජයට මුදාහැරීමට අවස්ථාව ලැබේ.

සමාජයේ බහුතරයක ගේ ගෞරවයට පාත්‍රවන යම් යම් දෑ. යම් යම් පුද්ගලයන් මොවුන්ගේ ඉලක්කයන් වේ. බහුතර සමාජයට පූජනීය වන පුද්ගලයන් මොවුනට පෙනෙන්නේ නිස්සාර පුද්ගලයන් ලෙසය. පූජනීය වන ස්ථාන මොවුනට පෙනෙන්නේ පව් හෝ කුණු කඳු ලෙසය. එවැනි අදහස් සිත්හි දරා සිටීමෙන් නොනැවෙතෙන ඔවුහු ඒවා සමාජයට මුදු හැරීම ද සිදු කරති. එවිට විභාගය සමත් වන්නට පමණක් අකුරු උගත්, සමාජ ජාල හෝ මුදලින් එපිට සමාජ වගකීමක් නැතැයි සිතන බහුතරය මෙවැනි ඇදහස් රස මසවුළු සේ භුක්ති විඳිති. ‘යකෝ මූ නියම කතාවක් නේ කියවලා තියෙන්නේ. ඇත්ත නේන්නම්’ යැයි පවසති.  එසෙත් නැත්නම් ‘ඒ කතාවෙත් ඇත්තක් තියෙනවා නේන්නනම්’ කියා පවසති. අද සමාජය පුරා මෙවැනි විකෘති ජීවීන් විසිරී සිටිති. ඔවුන් පවසන්නේ තමන් ‘අවුට් ඔෆ් බොක්ස්’ සිතන බවය. එයට හේතුව එවුන් ඒ වන විටත් සිය ‘බොක්ස්’ එක කඩා ගෙන ඇති බැවිනි. ඔවුන්ට අවශ්‍ය අන් අයගේ ‘බොක්ස්’ එක ද කඩා දැමීමටය. මෙය පැරණි කතාවකට ආදේශ කරන්නේ නම් උගුලකට හසුව වලිගය කඩා ගත් නරියාගේ කතාව සඳහන් කළ හැකිය.


මේ කුලකයෙන් බිහි වන සිනමා ‘නිර්මාණකරුවන්’ ද බොහෝ ය. වෙනත් රටක් සිනමා නිර්මාණ සලකා බැලුවහොත් සැබවින්ම වුන් ‘අවුට් ඔෆ් බොක්ස්’ සිතන බව පෙනේ. නමුත් ඉහත කී සමාජ විරෝධී කුලකයෙන් බිහිවන සිනමා නිර්මාණකරුවන් යැයි කියා ගන්නා පුද්ගලයන්ගේ ‘අවුට් ඔෆ් බොක්ස්’ සෙසු රටවල් සිනමා නිර්මාණකරුවන්ගේ චින්තනයට වඩා වෙනස්ය. මොවුන් ‘අවුට් ඔෆ් බොක්ස්’ යැයි සිතන්නේ සිය සමාජයේ කුණු විකුණාගෙන කෑමය. විකිණිය හැකි කුණු ගොඩක් ඇත්නම් ඔවුහු ය අවුස්සා විකුණති. නමුත් කුණු ගොඩ විකුණන්නේ ‘නිර්මාණය’ නම් දවටනය එතීමෙනි. ඔවුන්ගේ ‘තියරිය’ වන්නේ සේදූ යට ඇඳුම් පිළිකන්නේ තබා අව්වේ වේලා ගැනීම නොව ගේ දොරකඩ වැලක් ගැට ගසා වේලා ගැනීමය.

අද සමාජ ජාල මෙවැනි පුද්ගලයන්ගේ අදහස්වලින් පිරී ඇත. ෆේස්බුක්වලින් එපිට ජීවිතයක් හෝ ජීවිත වගකීමක් නැතියි සිතමින් උදේ හවා එහිම ජීවත් වන්නන්ට මොවුන් සුපිරි වීරයන්ය. පාලකයන්ට ද මෙවැන්නන් සිටීම වාසිදායකය. විට ජනතාව ගොනාට ඇන්දවීම සඳහා මොවුන්ගේ සහාය ද වක්‍රව හිමිකරගත හැකිය.


කෙසේ වුවත් සමාජගත මිනිසා විචාරාත්මක වන තාක් මෙවැනි විකෘති ජීවීන්ගේ සමාජය මුදවා ගත නොහැකි වන බව නම් පැවසිය යුතුය. වර්තමාන අධ්‍යාපනය ඔස්සේ කිසිදාක විවාර බුද්ධියකින් යුතු පුද්ගලයන් බිහි නොවන සක්සුදක් සේ පැහැදිලිය. එවිට බිහිවන අවිචාරවත් සමාජ මෙවැනි විකෘති ජීවින්ගේ පිරී අනාගතයේ දී විකෘති සමාජයක් බිහිවන බව නම් ඉඳුරාම පැහැදිලිය.

Wednesday, June 7, 2017

ත්‍රස්තයන්ට කිරි පෙවීම නිසා මිතුරන් අහිමි කර ගත් කටාරය - Qatar who lost friends for terrorists

Source - https://en.wikipedia.org/wiki/Qatar#/media/File:Emblem_of_Qatar.svg

මේ දිනවල ලෝකයේ වැඩි වශයෙන්ම කතාබහට ලක් වන පවතී නම් ඒ අන් කිසිවක් නොව මැද පෙරදිග කලාපයේ පිහිටි ඉස්ලාම් රටක් වන කටාර්රාජ්‍යයයි. ඔවුන් ලෝකයේ ඇති විවිධ ත්‍රස්තවාදී කණ්ඩායම්වලට විවිධාකාරයෙන් උදව් උපකාර කරමින් මැදපෙරදිග කලාපයේත්, ලෝකයේ සෙසු රටවලත් ත්‍රස්තවාදය ව්‍යාප්ත කිරීම සඳහා උදව් උපකාර කරන්නේ ය යන චෝදනාව පිට පසුගිය දා එහි තදාසන්න රටවල් වන සවුදි අරාබිය, බහරේන්, එක්සත් අරාබි එමීර් රාජ්‍යය, ඊජිප්තුව කටාර් රාජ්‍යය සමග පවතින සියලු රාජ්‍ය තාන්ත්‍රික සම්බන්ධතා අතහැර දැමුවේය. මෙයින් පසු කටාර් යනු කුමනාකාර රාජ්‍යයක්ද, එය පිහිටා ඇත්තේ කොහිද වැනි කරුණු පිළිබඳ බොහෝ දෙනෙකු කතා කරන්නට විය. එබැවින් කටාර් රාජ්‍යය පිළිබඳ යමක් සැකෙවින් කතා බහ කිරීමට මේ හොඳම කාලය යැයි සිතේ.

දෝහා නුවර
Source - https://en.wikipedia.org/wiki/File:Doha_City,_UNCTAD_XIII_(7115124733).jpg

කටාර් රාජ්‍යය යනු බටහිර ආසියාවේ, අරාබි අර්ධද්වීපයේ ඊසාන දිගට වන්නට කුඩා උප අර්ධද්වීපයක් ලෙස පිහිටා ඇති වර්ග කිලෝමීටර 11,586ක භූමි ප්‍රදේශයක් පුරා පැතිර ගිය ස්වාධීන රාජ්‍යයකි. කටාර් අර්ධද්වීපය ගල්ෆ් මුහුද දෙස කිලෝමීටර 160 ක් විහිදී තිබේ. වැඩි භූමි ප්‍රදේශයක පවතින්නේ නිසරු සහ වැලි සහිත භූමියකි. එහි දකුණ දිග සීමාව සවුදි අරාබියෙන් මායිම් වන අතර භූමියේ අන් සියලු කොටස් පර්සියානු මුහුදු බොක්කෙන් වට වී තිබේ. මෙහි අගනගරය දෝහා වේ. මුදල් ඒකකය වන්නේ කටාර් රියාල් ය. දෙසැම්බර් 18 එහි ජාතික දිනය වේ. 

19 වැනි සියවසේ මුල් භාගයේ සිටම කටාරය පාලනය කරන ලද්දේ තානිරාජ වංශයයි. කටාර් රාජ්‍යය බිහි කිරීමේ ගෞරවය හිමි වනුයේ ෂීක් ජසිම් බින් මොහොමඩ් අල් තානි හට ය. මෙහි පාලන බලය පරම්පරාවෙන් හිමි වන්නක් වන අතර එහි පාලකයා වන්නේ ෂීක් තමිම් බින් අල් තානි නම් එමීර් වරයා ය. කටාරය තුළ පැවතිය යුත්තේ රාජ්‍ය පාලනයක් ද, එසේත් නැත්නම් ව්‍යාවස්ථානුකූල පාලනයක් ද යන මතය පැන නැගුනෙන් 2003 වසරේ දී ජනමත විචාරණයක් පවත්වන ලද අතර එහිදී 98%ක් ම ව්‍යවස්ථාවක් සඳහා සිය කැමැත්ත පළකොට තිබිණි.

ෂීක් තමිම් බින් අල් තානි
Source - https://insidesyriamcen.files.wordpress.com/2017/05/tamim.png?w=287&h=374

2017 වසරේ මුල් සමය වන විට කටාරයේ මුළු ජනගහනය මිලියන 2.6ක් විය. මෙයින් 313,000 ක් කටාර් පුරවැසියන් වන අතර සෙසු මිලියන 2.3 සමන්විත වන්නේ විදෙස් සංක්‍රමණිකයන්ගෙනි. සමස්ත ජනගහනයෙන් ඉන්දියානුවන් 25% ක් ද, කටාර් වැසියන් 12.1% ක් ද, බංග්ලාදේශ වැසියන් 10.7% ක් ද, ශ්‍රී ලාංකිකයන් 5.6%  ක් ද, පාකිස්ථානුවන් 4.8% ක් ද ආදී වශයෙන් සමන්විත වේ.

කටාරයේ පවතින තෙල් නිධි නිසා එය ලෝකයේ පවතින ඉහළ ආදායමක් ඇති රාජ්‍යයක් බවට පත් ව තිබේ. ලෝකයේ පවතින ඉහළතම ඒක ශීර්ෂ ආදායමක් ඇති රටවල් අතරින් එකක් වන්නේ ද කටාරයයි. එක්සත් ජාතීන්ගේ සංවිධානය පවසන අන්දමට ලෝකයේ වැඩිම දියුණුවක් ඇති මානව සම්පත ඇත්තේ කටාරයේ ය. සැලකිය යුතු බලයක් ද හිමි රාජ්‍යයක් වන කටාරය පසුගිය සමයේ පැවති අරාබි වසන්තයනම් කැරලිකාර සමයේ දී, ලෝකයේ කැරලිකාර සංවිධාන ගණනාවකට ධනයෙන් හා බලයේ උදව් උපකාර කළේය. එමෙන්ම අල් ජසීරා මාධ්‍ය ජාලය ලෝකය පුරා බලවත්ව ව්‍යාප්ත කරන්නට මූල්‍ය ශක්තිය ලබා දුන්නේ ද කටාර් රාජ්‍යයමය. කෙසේ නමුත් ඔවුන් සහය ලබා පෝෂණය කළ කැරලිකාර කණ්ඩායම්වල ක්‍රියාකාරීත්වයම අද ඔවුන්ට රාජ්‍ය තාන්ත්‍රික සබඳතා අහිමි කරවන තත්වයකට වැඩි දියුණු වී තිබෙන බැව් පෙනේ. ඔවුන් පවසන්නේ තමා කිසිදු ත්‍රස්තවාදී කණ්ඩායමකට සහය පළ නොකරන බවය. කෙසේ නමුත් ත්‍රස්තවාදයේ මුහුණුවර වසා ගනිමින් ලෝකය පුරා ව්‍යාප්තවාදයක් පවත්වාගෙන යාමට කටාරය මූල්‍ය ශක්තිය සපයන බව නම් පසුගිය කාලය පුරාම ලෝකයේ මාධ්‍යවල නිතර කතා බහට ලත් විය. අප රටේ ද බොහෝ ව්‍යාප්තවාදයන් සඳහා ඔවුන්ගේ මූල්‍ය ශක්තිය ලැබෙන බැව් අසන්නට ලැබිණි.

ජාතික ධජය
Source - https://en.wikipedia.org/wiki/File:Flag_of_Qatar.svg

ක්‍රි.ව. 23 වසරේ ඉපිද ක්‍රි.ව. 79 දී මිය ගිය  රෝම ලේඛකයකු සහ ස්වභාවික විද්‍යාඥයකු වූ වූ ප්ලිනි  කටාර් දේශය සහ එහි වැසියන් පිළිබඳ සිය ඉතිහාස තොරතුරුවල සඳහන් කොට තිබේ. ඔහු ඔවුන්ව හඳුන්වා දී ඇත්තේ කත්තාරෙයිනමිනි. ටොලමි සිය සිතියම්වල මෙම දේශය කටාරාවශයෙන් සඳහන් කොට තිබේ. එම සිතියමට අනුව මෙම අර්ධද්වීපයේ නැගෙනහිරට වන්නට කඩාරානමින් පැවති නගරයක් ද ඔහු සිය සිතියමේ සටහන් කොට තිබේ. කටාර්යන්න බිඳීවිත් ඇත්තේ මේ ආකාරයෙන් බැව් පෙනේ.

කටාරයේ මිනිස් වාසභූමි අදින් වසර පනස් දහසක් පමණ අතීතයකට දිවෙන අතර ගල් යුගයට අයත් ජනාවාස කොටස් සහ විවිධ මෙවලම් මෙම අර්ධද්වීපයෙන් හමු වී තිබේ.

ක්‍රි.ව. 224 දී මෙම ප්‍රදේශය සසානියන් අධිරාජ්‍යයට නතු වූ අතර එම සමයේ දී කටාරය වාණිජ මධ්‍යස්ථානයක් ලෙස ඔවුහු භාවිත කළහ. මෙම සමයේ කිතුනු ආගම මෙම ප්‍රදේශයේ ව්‍යාප්තව තිබූ බැව් පෙනෙන්ට තිබේ. කෙසේ වෙතත් ක්‍රි.ව. 628 දී මුන්සිර් ඉබ්න් සාවා අල් තමීමි මෙම ප්‍රදේශය අත්පත් කර ගත් අතර එහි යටත් වැසියන්ට ඉස්ලාම් ආගම ඇදහිය යුතු යැයි ඔහු පැවසූවේය. මේ අනුව මෙම ප්‍රදේශයේ බොහෝ දෙනෙක් ඉස්ලාම් ආගම වැළඳ ගත්හ. ක්‍රි.ව. 661 - 1783 ත් අතර සමයේ මේ ආකාරයට මූලික ඉස්ලාම් පාලන තන්ත්‍රයක් පැවති අතර පසුව ක්‍රි.ව. 1783 - 1868 ත් අතර බහරේන් සහ සවුදි පාලනයක් පැවැතිණි. ක්‍රි.ව. 1871 - 1915 අතර සමයේ ඔටෝමාන් පාලනයක් පැවැති අතර ක්‍රි.ව. 1916 දී මෙය බ්‍රිතාන්‍යයේ යටත් ප්‍රදේශයක් බවට පත් විය. කටාරය බ්‍රිතාන්‍යයෙන් නිදහස් වූයේ 1971 වසරේ දී ය.

කටාරයේ ඉස්ලාම් භක්තිකයන් 67.7% ක් සිටින අතර ඉස්ලාමය එහි නිල ආගම වේ. එයට අමතරව 13.8% ක් කිතුනුවන් ද, 13.8% ක් හින්දු භක්තිකයන් ද, 3.1% ක් බෞද්ධයන් ද ජීවත් වෙති.

කටාරය යනු ව්‍යවස්ථාවක් සහිත රජ පරම්පරාවක පාලනයක් පවතින රාජ්‍යයක් ලෙස හැඳින්වීම වඩාත් නිවැරදි ය. දැනට පාලනය පවතින අල් තානි රාජ වංශය මෙහි ස්ථාපිත වූයේ වර්ෂ 1825 දී ය. දැනට සිටින තමීම් බින් හමාඩ් අල් තානි යනු එරට සිටින අල් තානි රාජ වංශයේ අට වැනි එමීර්වරයා වේ.

මෙහි නීති පද්ධතිය මුළුමනින් පදනම් වී ඇත්තේ ෂාරියා නීතිය මතය. නමුත් ප්‍රයෝගිකව මෙහි සිවිල් සහ ෂාරියා යන නීති මිශ්‍රණයක් දක්නට ලැබේ. ආගම අතහැර දැමීම සහ සමලිංගිකත්වය මරණය දඬුවම ලැබිය හැකි වරදක් වේ. සෙසු ඉස්ලාම් රටවල මෙන්ම මෙහි ද ඉස්ලාම් ජාතිකයන්ට මත්පැන් පානය තහනම් ය. ඉස්ලාම් නොවන පුද්ගලයන් වෙනුවෙන් තරු පහේ හෝටල සහ වෙනත් අවසර ලත් ස්ථානවලදී මත්පැන් මිලට ගත හැකි ය. ඉස්ලාම් නොවන්නන් සඳහා පමණක් ඌරු මස් ආනයනට ද අවසර ලබා දී තිබේ.


කටාරයේ යුද, ගුවන් සහ නාවික වශයෙන් 11,000 කින් සමන්විත හමුදාවක් පවත්වාගෙන යනු ලබයි. ඔවුහු සිය දළ ජාතික නිෂ්පාදිතයෙන් 4.2% ක් ආරක්ෂාව වෙනුවෙන් වැය කරති.