කුරුමිණි මළකුණු සමග තේ බොන පුටින්

ලෝකයේ හොඳම තේ අපේය. අපේ රටේ ප්‍රධාන අපනයන භෝගවලින් එකක් වන්නේ තේ ය. මේ අපි පොඩි කාලේ උගත් දේවල් ය. නමුත් ටික ටික අපනයන භෝගවල තැන නැති වුණේය. ඒ තැනට ගාර්මන්ට්වල හදන ඇඳුම් ආවේ ය. තැන නැති වුනත් අපනයන භෝග නැති වුණේ නැති ය. අඩුම ගානේ හොඳම අපනයන භෝග පිටරට යවා අපට රොඩ්ඩ හෝ තියා ගත්තේ ය. මේ නිසා අපනයන භෝගවලින් එකක් වන තේවල රොඩ්ඩ අපි පානය කළ අතර හොඳම තේ පානය කළේය පිටරටවුන්ය. ඒත් කමත් නැත, අපේ රටට ආදායමක්වත් එනවා යැයි කියා අපි හිත හදාගෙන රොඩුම බීවෙමුය. රටේ නැති නම් කියමින්, දිලිසෙන පැකට්වල අසුරමින්, කෝටි ගණන් වියදම් කරමින් ඇඩ් දමා අපට මහා කොම්පැනි පොවන්නේ රොඩු බව දැන දැනම සද්ද නැතිව රොඩුම බීවෙමුය. 

මෙසේ සිටින අතරේ හිටි ගමන් රුසියාව අපේ රටෙන් එන තේ බොන්නට බෑ කීවේය. බෑ ම කීවේ ය. යකෝ හොඳම තේ දීලත් මුන්ට මදි වෙලානේ යැයි කියා සිතමින් නිවුස් බැලුවිට තරු විසි වුණේය. ව්ලැදිමීර් පුටින්ගේ තේ කෝප්පයෙන් Khapra beetle කියා කුරුමිණියෙක් මතුවෙලා යැයි නිව්ස්වල තිබුණේය. 

අනේ අනිච්චං කියා කියැවෙන්නේ දැන් ය. යකෝ පිටරට එවුන්ට හොඳම තේ කියා කුරුමිණි මළකුණු සමග තේ දෙනවා නම් අපි බොන රොඩ්ඩේ මොන මළ ජරාවක් ඇතිද කියා සිතමින් තවත් තේ උගුරක් බොන්නට හිත හදා ගත්තේමි ය.