පුවත්පත්වලට ලිපි ලිවීම මාගේ විනෝදාංශයකි. මා ලියන ලිපි මගින් පාඨකයින් දැනුමක් ලබමින් ජීවිතයට යමක් එකතු කරගන්නේ නම් එය මාගේ සතුටකි. වේගයෙන් ඉදිරියට ඇදෙන තාක්ෂණික ලෝකයේ පුවත්පත් කියවන්නට තරම් විවේකයක් නොමැති අයවලුන් බොහෝය. තවකෙකු පුවත්පත් කියවන්නට කැමති නැත. අන්තර්ජාලයේ ද සිංහල බසින් සියලුම පුවත්පත් ඇති බැවින් තාක්ෂණයට ප්‍රිය කරන්නෝ පරිගණකයෙක් හෝ සිය ජංගම දුරකථනයෙන් ඒවා කියවති. එබැවින් මා ලියන ලිපි එවැනි පාඨක පිරිස් වෙත යොමු කරන්නට අදහස් කළ නිසා මෙවැනි බ්ලොග් අඩවියක් ගොඩනගන්නට සිතුවෙමි. මාගේ උත්සාහය කෙතරම් නම් සාර්ථකදැයි තීරණය වන්නේ ඔබගෙන් ලැබෙන ප්‍රතිචාර මතය. එබැවින් ඔබ මේ පිළිබඳ සිතන පතන දෑ මවෙත දන්වන්නට උනන්දුවන්නේ නම් එය මාගේ සතුටයි. ඔබ සැමට තෙරුවන් සරණයි!

Sunday, December 4, 2016

කොළඹ කොටුවේ පැරණි ස්මාරකයක් - Old Monument of Colombo Fort



කොළඹ කොටුවේ තරුණ ක්‍රිස්තියානි සංගමයේ (YMCA) ගොඩනැගිල්ල ඔබ බොහෝ දෙනෙක් දන්නා ස්ථානයක් විය යුතුය. . එහි ආපනශාලාවත් තැපැල් කාර්යාලයත් අතර පැසේජයේ පසෙකට වන්නට කුඩා එළිමහන් කොටසක් තිබේ.  මේ එළිමහන් කොටසට මුහුණ දී ඇති බිත්තියක සවිකොට තිබෙන මෙම පුවරුව කිහිප වතාවක්ම මා දැක තිබුණත් ආසන්නයට ගොස් පරීක්ෂා කරන්නට සිතුනේ නැත. කෙසේ නමුත් දැනට වසරකට මදක් වැඩි කාලයකින් එපිට දිනක එයට ගිය අතරතුරේ මෙයට කිට්ටු වී මෙහි ඡායාරූපයක් ගතිමි. නමුත් එය කුමක්දැයි සොයා බැලුවේ නැත. පසුගිය දිනක වෙනත් ඡායාරූපයක් සොයා පරිගණකය පීරමින් සිටියදී අහම්බෙන් මෙන් මෙය නැවත දුටුමි. එහි විස්තරය මා කියවා බැලුවේ එදාය. මේ ස්මාරකය ඓතිහාසික වශයෙන් අපට වැදගත් දෙයක් යැයි දැනගත්තේ එදාය. එම විස්තරයට අනුව මෙය සවිකොට තිබී ඇත්තේ කොළඹ පැරණි කොටුවේ ප්‍රධාන දොරටුවට ඉහළිනි. එය 1717 සවිකොට ඇති බව ද කියැවෙයි. කොළඹ තරුණ ක්‍රිස්තියානි සංගමයේ ගොඩනැගිල්ල සඳහා අත්තවාරම් කපද්දී 1921 වසරේදී මෙය හමුවී ඇත.



මෙහි වෙනත් පැරණි ඡායාරූපයක් අන්තර්ජාලයේ ඇති දැයි සොයාගන්නට මා උත්සාහ කළ ද එය සාර්ථක වූයේ නැත. අප රටේ පැරණි දෑ ගැන උනන්දුවන, මෙතෙක් මෙය දැක නැති සියලු දෙනාගේ දැනගැනීම පිණිස මෙය මෙසේ පළ කළෙමි. 

Saturday, November 26, 2016

මංගල ප්‍රේමදාස නම් අසහාය හඩ අනුකරණ ශිල්පියා - Mangala Premadasa, the incomparable sound imitating Man



මංගල ප්‍රේමදාස පිළිබඳ අප දැන සිටියේ ඉතා කුඩා සමයේ සිට වුවද අන්තර්ජාලයේ ඔහු පිළිබඳ සොයා බලද්දී සොයාගත හැක්කේ එකම එක විස්තරයක් පමණි. ඒ ඇම්.ඩී. ගුණසේන සමාගම විසින් ප්‍රකාශයට පත් කරන ලද, ඔහු විසින් රචිත ‘අකුරුවලින් සත්තු අඳිමු‘ නම් ළමා කෘතිය පිළිබඳව පමණි. 



නමුත් ඔහු සැබවින්ම දක්ෂතාවය පෙන්වා ඇත්තේ ලේඛකයෙකු ලෙස නොව හඬ අනුකරණ ශිල්පියකු වශයෙනි. අපි කුඩා කාලයේ සිටම ඔහුගේ හඬ අනුකරණය කිරීම් දක්ෂතාවයන් දැක ඇත්තෙමු. දැනට වසර 40ක පමණ කාලයක් තිස්සේ හඬ අනුකරණයෙහි නියැළෙන ඔහුට විවිධ හඬ 600 කට අධික ප්‍රමාණයක් අනුකරණය කිරීමෙහි හැකියාව ඇති බව පැවසේ. ශ්‍රී ලංකා ගුවන් විදුලි සංස්ථාවේ ‘හඳ මාමා‘ ළමා වැඩසටහනෙහි පෙත්තප්පුගේ හඬ ඉදිරිපත් කරන්නේ ඔහු බව බොහෝ දෙනෙක් නොදන්නවා විය හැකිය.

හඬ අනුකරණය පිළිබඳව අන්තර්ජාලය පිරික්සා බැලීමේදී බොහෝ ශිල්පීන් හමුවේ. ඔවුන් සහ මංගල ප්‍රේමදාස නම් ශිල්පියා අතර පැහැදිලි වෙනසක් දැකිය හැකිය. ලෝකයේ මෙබඳු බොහෝ ශිල්පීන් දක්ෂතාව පෙන්වන්නේ එකම වර්ගයේ හඬ, එනම් සතුන්, කාර්, බස්, නැව් වැනි එක් වර්ගයකට අයත් හඬ අනුකරණය කිරීම සඳහා පමණි.  නමුත් මංගල ප්‍රේමදාස අප අවට ඇසෙන ඕනෑම හඩක් අනුකරණය කොට පෙන්වීමෙහි අති දක්ෂයෙකි. කෙසේ වුවත් ඔහු පිළිබඳ එතරම් කතා කොට නොමැති බව පෙනෙන්නේ අනුන්ගේ ගීත ගයා එක රැයින් ජනප්‍රිය වන පුද්ගලයන් පිළිබඳ වෙබ් පිටු බොහෝ ගණනක් තිබුණ ද, ඔහු පිළිබඳ ලියැවුණු එකදු වෙබ් පිටුවක් හෝ නොමැති බැවිනි.


ඔහුගේ හඩ අනුකරණ දක්ෂතාවයෙන් බිඳක් දැකගත හැකි මේ කෙටි වීඩියෝව ඔහුට උපහාරයක් වනු ඇතැයි සිතමි.

Sunday, November 13, 2016

ස්ලෝ මෝෂන් වීඩියෝ එකක් හැදුවා මමත්


නිකං ආසාවට වගේ මොබයිල් ෆෝන් එකෙන් මමත් ස්ලෝ මෝෂන් වීඩියෝ එකක් හැදුවා. බලන්න කොහොමද කියලා.

Saturday, November 12, 2016

ජේසුස් වහන්සේගේ චරිතය නිරූපණය කරන නළුවන් අකල් මරණවලට පත්වනවාද? Does Portraying Jesus Foretell DEATH?


ජේසුස් වහන්සේගේ චරිතය සිනමා නිර්මාණ සඳහා ඉදිරිපත් කළ ලෝක ප්‍රකට නළුවෝ බොහෝ වෙති. අප රටේ ද නිෂ්පාදනය කළ ‛ක්‍රිස්තු චරිතය’ සිනමා නිර්මාණය සඳහා සුප්‍රකට නළු විජය කුමාරතුංගයන් රංගනයෙන් දායක වූවේය. කෙසේ නමුත් ඔහුට අත්වූවේ අකල් මරණයකි. ජේසුස් වහන්සේගේ චරිතය සඳහා රංගනයෙන් දායක වන ශිල්පීන් අකල් මරණයකට පත්වන අප රටේ ද කසුකුසුවක් ඇති වූ අතර ලෝකයේ බොාේ දෙනෙකු අතර ද එම මතය පවතින බැව් පෙනෙන්නට තිබේ. මෙයට හේතුව වශයෙන් බොහෝ දෙනෙක් පවසන්නේ බහුතර ලෝක වාසීන්ගේ ආගමික නායකයකු වන ජේසුස් වහන්සේගේ චරිතය ඉදිරිපත් කිරීම  ‛වස් වදින්නට’ හේතුවක් වන බවය. මෙය සැබවින්ම සිදුවන්නක්දැයි සොයා බැලීම වටින්නේය. මේ සඳහා ජේසුස් වහන්සේගේ චරිතය ඉදිරිපත් කළ සුප්‍රකට රංගන ශිල්පීන්ගේ ලැයිස්තුවක් ගෙන ඔවුන්ගේ ජීවිත පිළිබඳ සොයා බැලීමෙන් මෙය අවබෝධ කොට ගත හැකිය. 

ඔහු ජේසුස් වහන්සේ චරිතය ඉදිරිපත් කළේ මෙල් ගිබ්සන්ගේ ‛පැෂන් ඔෆ් ද ක්‍රියිස්ට්’ නම් සිනමා නිර්මාණය සඳහා 2004 වසරේදීය. ඔහු තවමත් ජීවතුන් අතර සිටින මුත් එක් අවස්ථාවක පවසා සිටියේ මෙම චරිතය ඉදිරිපත් කිරීමෙන් පසු සිට රංගන ජීවිතය සහමුළින්ම පරිහානියට පත් වූ බවය. 

‛ගොස්පල් ඔෆ් ජෝන්’ සිනමා නිර්මාණය සඳහා 2003 වසරේදී ජේසුස් වහන්සේගේ චරිතය ඉදිරිපත් කළ ඔහු තවමත් ජීවත් වන්නේය. 

1999 වසරේදී ‛මේරි, මදර් ඔෆ් ජීසස්’ සඳහා ජේසුස් වහන්සේගේ චරිතය ඉදිරිපත් කළ මොහු තවමත් ජීවත් වන්නේය. 

‛ද ඩේ ඔෆ් ක්‍රියිස්ට් ඩයිඩ්’ සඳහා 1980 දී රංගනයෙන් දායක වුණු  ඔහු තවමත් ජීවත් වන්නේය. 

2000 වසරේදී ‛ද මිරකල් මේකර්’ සිනමා පටයට ජේසුස් වහන්සේ චරිතය ඉදිරිපත් කළ මොහු තවමත් ජීවත් වෙයි. 

1973 වසරේදී ‛ගෝඩ්ස්පෙල්’ චිත්‍රපටය සඳහා රංගනයෙන් දායක වුණු මොහු අකල් මරණයකට පත් වූයේ නැත. 

‛ජීසස්’ නම් සංගීතමය චිත්‍රපටය සඳහා 2005 දී රංගනයෙන් දායක වුණු මොහු අකල් මරණයකට පත් වූයේ නැත. 

1973 වසරේදී ‛ජීසස් ක්‍රියිස්ට් සුපර්ස්ටාර්’ සඳහා රංගනයෙන් දායක වුව ද මොහු තවමත් හොඳින් ජීවත් වෙයි. 

1927 වසරේදී ‛කිංග්ස් ඔෆ් ද කිංග්ස්’ චිත්‍රපටය සඳහා රංගනයෙන් දායක වුණු මොහු 1958 වසරේදී මිය යන විට 83 වැනි වියෙහි පසුවූයේය. එබැවින් එය අකල් මරණයක් ලෙස දැක්විය නොහැක. 

1977 වසරේ නිෂ්පාදනය කළ ‛ජීසස් ඔෆ් නාසරෙත්’ සඳහා ජේසුස් වහන්සේගේ චරිතය නිරූපණය කළ මොහු අකල් මරණයකට පත් වූයේ නැත. 

1965 වසරේදී ‛ද ග්‍රේටස්ට් ස්ටෝරි එවර් ටෝල්ඩ්’ සඳහා රංගනයෙන් දායක වුණු මොහු දැනට 87 වැනි වියෙහි පසු වෙයි. 

1961 වසරේදී නිෂ්පාදනය කෙරුණු ‛කිංග්ස් ඔෆ් ද කිංග්ස්’ සිනමා නිර්මාණය සඳහා ජේසුස් වහන්සේ චරිතය ඉදිරිපත් කළ මොහු 1969 වසරේදී මිය යන විට 42 වැනි වියෙහි පසුවූවේය. ඒ ඔහු ජේසුස් වහන්සේගේ චරිතය නිරූපණය කිරීමෙන් වසර 8 කට පසුය. ඔහු සැබවින්ම අකල් මරණයකට ලක් වූවෙක් යැයි සැළකිය හැකිය. 

2013 වසරේ රූපවාහිනි කතා මාළාවක් වූ ‛ද බයිබල්’ සඳහා ද, 2014 දී ‛සන් ඔෆ් ගෝඩ්’ සිනමා නිර්මාණය සඳහා ද ජේසුස් වහන්සේගේ චරිතය නිරූපණය කළ මොහු දැනට 36 වැනි වියෙහි පසුවෙයි. 





Wednesday, October 26, 2016

හිලරි දිනයිද?


ඇමරිකා එක්සත් ජනපදයේ 58 වැනි ජනාධිපතිවරයා තෝරා පත්කරගැනීමේ මැතිවරණයට තව වැඩි දවසක් නැත. එය නොවැම්බර් 8 වැනිදා පැවැත්වීමට මේ වන විට සියලු වැඩකටයුතු යොදා තිබේ.  බැරක් ඔබාමාගෙන් හිස්වන ජනපති අසුන සඳහා තරග කරන්නවුන් අතරින් ඩිමොක්‍රටික් පක්ෂයෙන් ඉදිරිපත්ව සිටින හිලරි ක්ලින්ටන් සහ රිපබ්ලිකන් පක්ෂයෙන් ඉදිරිපත්ව සිටින ඩොනල්ඩ්ට් ට්‍රම්ප් ඉදිරියෙන්ම සිටිති. මේ අතරින් හිලරි ක්ලින්ටන් ඉදිරියෙන්ම සිටින්නීය. මැතිවරණ ප්‍රතිඵල පුරෝකතනය කිරීමේ සෑම සමීක්ෂණයකින්ම පාහේ පෙරමුණ ගෙන සිටින්නී ඇය ය. බොහෝ විට ඇය ඇමරිකා එක්සත් ජනපදයේ 58 වැනි ජනපති මැතිවරණයෙන් ජයග්‍රහණය කරනු ඇත. එසේ වුවහොත් ඇය එරට ප්‍රථම ජනපතිවරිය බවට පත්වනු ඇත. බෙහෝ දෙනෙකු දෑස් දල්වා බලා සිටිනුයේ එසේ වනු ඇතැයි කියාය. ඇමරිකානු වැසියන් බොහෝ දෙනෙකුගේ පැතුම බවට පත්ව ඇති හිලරි ක්ලින්ටන් ගැන මේ අවස්ථාවේදී යමක් අප කතා කළ යුතු වන්නේ ද මේ නිසාමය. 



1947 ඔක්තෝබර් 26 වැනි දින වෘශ්චික ලග්නයෙන් චිකාගෝ නුවර උපත ලැබ ඉලිනොයිස් හි පාර්ත් රිජ් උප නගරයේ හැදී වැඩුණු හිලරි ඩයන් රෝඩම් ක්ලින්ටන් අධ්‍යාපනය හදාරන ලද්දේ වෙලෙස්ලි විද්‍යාලයෙනි. ස්ක්‍රැබ්ල් (වචන සෙවීමේ ක්‍රීඩාවක්), ප්‍රහේළිකා විසඳීම සහ ගෙවතු අලංකරණය විනෝදාංශය ලෙස සිදුකරන ඇය පවසන්නේ වැඩකිරීම ද විනෝදාංශයක් බවය. එයින් ඇය අදහස් කරන්නේ ඇය සෑම වැඩක්ම ඉතා උනන්දුවෙන් කරන බවය. 

හිලරි ක්ලින්ටන් එකවර රාජ්‍ය තන්ත්‍රයට පැමිණි තැනැත්තියක නොවේ. ඇය 2009 සිට 2013 දක්ව එරට 67 වැනි රාජ්‍ය ලේකම්වරිය ලෙස ද කටයුතු කොට අත්දැකීම් ලබා ඇති කාන්තාවකි. එමෙන්ම 2001 සිට 2009 දක්වා කාලය තුළ ඇය නිව්යෝර්ක් නගරය නියෝජනය කරමින් කණිෂ්ඨ සෙනෙට්වරියක් ලෙස ද සේවය කළාය. ඇගේ සැමියා වන බිල් ක්ලින්ටන් හිටපු ඇමරිකානු ජනපතිවරයෙක් සහ ආණ්ඩුකාරවරයකු ද විය. ඇය ජනපති මැතිරණයට ඉදිරිපත්ව සිටින්නේ මෙසේ සියලු අත්දැකීම් දරාගෙනය. 



වර්ෂ 1973 දී යේල් නීති විද්‍යාලයෙන් නීතිය හදාරා උපාධියක් හිමි කරගත්තාය. කොංග්‍රස් නීති උපදේශිකාවක ලෙසින් කලක් සේවය කළ ඇය 1975 ඔක්තෝබර් 11 වැනිදා බිල් ක්ලින්ටන් හා යුගදිවියට එළැඹුණාය. බිල් ක්ලින්ටන් සමග වූ විවාහයෙන් ඇයට චෙල්සි වික්ටෝරියා ක්ලින්ටන් නමින් දියණියක් සිටියි. විවාහයෙන් පසු එම වසරේදීම ඇය අර්කැන්සාස් ජනපදයේ පදිංචියට ගියේ එම ප්‍රාන්තයේ ආණ්ඩුකාරවරයාගේ බිරිඳ වශයෙනි. එහිදී ද ද ඇය කාන්තාවන් නියෝජනය කරමින් විවිධ ආයතනවල බොහෝ තනතුරු දරන්නට සමත් වූවාය. 



ජනපති ආර්යාව ලෙස ඇය ඇමරිකා එක්සත් ජනපදය තුළ ළමා හා කාන්තා වරප්‍රසාද සහ හිමිකම් ගණනාවක් දිනාගන්නට සෑහෙන සටනක නිරත වූවාය. 1998 වසරේදී සිය සැමියා වූ බිල් ක්ලින්ටන් හා මොනිකා ලෙවින්ස්කි සිදුවීම සම්බන්ධව ඇය දක්වන ලද ප්‍රතිචාරය තුළින් ඇය එරට බහුතර වැසියන්ගේ නොමද ගෞරවය දිනාගන්නට ද සමත් වූවාය. 
2000 වසරේදී ඇය සෙනෙට් සභික සමාජිකාවක ලෙස තේරී පත්වන්නේ එවැනි තනතුරකට පත් ප්‍රථම නිව්යෝර්ක් කාන්තාව වශයෙනි. සැප්තැම්බර් 11 ලෝක වෙළෙඳ මධ්‍යස්ථානයට එල්ල වූ ත්‍රස්තවාදී ප්‍රහාරයෙන් පසු ඇෆ්ගනිස්ථානයට ප්‍රහාර එල්ල කළ යුතු යැයි ඉදිරිපත් වූ යෝජනාව සම්මත කරගන්නට ද ඇය සිය ඡන්දය පාවිච්චි කළාය. 

ජනපති ඔබාමා යටතේ රාජ්‍ය ලේකම්වරිය ලෙස කටයුතු කරන සමයේදී ද ඇය ජාත්‍යන්තර අවධානයට ලක්වන කටයුතු බොහොමයක් සිදු කළාය. මේ සියලු කාර්යයන්ගේ  අවසන් ප්‍රතිඵලය වූයේ 58 වැනි ඇමරිකා එක්සත් ජනපතිවරයා තෝරා පත්කරගැනීමේ අපේක්ෂිකාව ලෙස ඇයට ඉදිරිපත්වන්නට හැකියාව ලැබෙන මග විවර කරගැනීමය. 
කලක් සමලිංගික විවාහයන්ට එරෙහිව දැඩි ස්ථාවරයක් පිහිටා සිටි ඇය 2013 වසරේදී සිය අදහස් වෙනස් කොට එයට පක්ෂව අදහස් දක්වන්නට පටන් ගත්තාය. 

ඇමරිකා එක්සත් ජනපදයේ ලෝක වෙළෙඳ මධ්‍යස්ථානයට බෝම්බ ප්‍රහාරය එල්ලවීමෙන් පසු ලෝකයේ සියලු රටවලින් ත්‍රස්තවාදය මුළිනුපුටා දැමීමට එවකට සිටි ජනපතිවරයා ගත් තීරණය සමග හිලරි ක්ලින්ටන් ද සිටියත්, ඇය රාජ්‍ය ලේකම්වරිය ලෙස සිටි සමයේ මේ ස්ථාවරයේ යම් වෙනසක් දක්නට හැකි විය. එවකට අප රටේ පැවැති ත්‍රස්තවාදයට එරෙහි යුද්ධයේ දී ඇය එල්.ටී.ටී.ඊ. ත්‍රස්තවාදී සංවිධානය කෙරෙහි සානුකම්පිත ස්ථාවරයක සිටිනු දක්නට හැකි විය. එම සංවිධානය පරාජය වීම ඇගේ පැතුම වූයේ නැත. මේ නිසා අප රටේ ත්‍රස්තවාදයට එරෙහි යුද්ධය වළක්වාලන්නට ඇය තමාට ගත හැකි සෑම පියවරක්ම ගත්තාය. ඇය සිය සිය පෞද්ගලික ඊමේල් ලිපිනය භාවිත කරමින් ජාත්‍යන්තර මූල්‍ය අරමුදලට ඊමේල් ගණනාවක් යවමින් ඉල්ලා සිටියේ ශ්‍රී ලංකාවට එරෙහිව සම්බාධක පනවා යුද්ධය නතර කරන තැනට වැඩ කටයුතු සලසා දෙන ලෙසය. නමුත් මේ වන විට ජාත්‍යන්තර මූල්‍ය අරමුදල දරන ලද ස්ථාවරය වූයේ එල්.ටී.ටී.ඊ. ත්‍රස්ත සංවිධානය සහමුළින්ම පරාජය විය යුතුය යන්න වූ නිසා ඇමරිකානු රාජ්‍ය ලේකම්වරිය ලෙස හිලරි ක්ලින්ටන් කරන ලද බලපෑම් කෙරෙහි ජාත්‍යන්තර මූල්‍ය අරමුදලේ ඉහළ පෙලේ නායකත්වය කිසිසේත් කැමැත්තක් දැක්වූයේ නැත. හිලරි ක්ලින්ටන් එල්.ටී.ටී.ඊ. සංවිධානය පිළිබඳ තවමත් දරනුයේ එකී ස්ථාවරයමය. ඇය ඇමරිකා එක්සත්ජනපදයේ ජනපතිවරිය බවට පත්වුවහොත්, එසේ පත්වන්නේ එම ස්ථාවරය ද පෙරදැරිවය. එබැවින් ඇමරිකානු ජනපතිවරිය ලෙස ඇගෙන් ශ්‍රී ලංකාවට කුමනාකාර බලපෑම් එනු ඇතිදැයි සිතාගත නොහැකිය. 

කෙසේ වෙතත් සේ සියලු අනාවැකි තහවුරු වන දිනයට තව ඇත්තේ දින කිපයක් පමණි. මෙවර ඇමරිකානු ජනපති මැතිවරණයෙන් හිලරි ක්ලින්ටන් ජයග්‍රහණය කළහොත් ඇය දිව්රුම් දෙන අවස්ථාව වන විට ඇගේ වයස අවුරුදු 69කි. එය ඇමරිකා එක්සත් ජනපදයට සුවිශේෂී අවස්ථාවකි. වැඩිම වයස්ගත අවස්ථාවකදී දිව්රුම් දුන් ජනපතිවරුන් අතරින් ඉදිරියෙන්ම සිටින්නේ ජනපති රේගන්ය. ඔහු දිව්රුම් දුන්නේ වයස අවුරුදු 69 දීය. හිලරි ක්ලින්ටන් ජයග්‍රහණය කළහොත් ඇය එරට වැඩිම වයස්ගත අවස්ථාවකදී දිව්රුම් දුන් ජනපතිවරිය වනු ඇත. යම් හෙයකින් ඩොනල්ඩ් ට්‍රම්ප් ජයග්‍රහණය කළහොත් ඔහු එරට දිව්රුම් දෙන වයස්ගතම ජනපතිවරයා බවට පත්වනු ඇත. එයට හේතුව ඔහුට ඒ වන විට වයස අවුරුදු 70ක් වන බැවිනි. මේ සියල්ල විසඳෙන්නට ඇත්තේ දින කිහිපයක් පමණි. එතෙක් අපි බලා සිටිමු. 

Saturday, October 22, 2016

අවුරුදු 98 ස්නායු මනෝ වෛද්‍යවරිය - බ්‍රෙන්ඩා මිල්නර් - Brenda Milner, the 98 Year Old Neuropsychologist


අවුරුදු 98ක් යනු බොහෝ විට මරණාසන්න වයසකි. එසේත් නැත්නම් යන තැනකට යමක් කරගන්නා එක වඩා හොඳ යැයි සිතන්නට හොඳ වයසකි. ඇතැම් විට එවැන්නක් පවා සිතාගන්නට තරම් නිරවුල් මනසක් නොමැති වයසකි. එයට හේතුව එවැනි වයස් මට්ටමකදී බොහෝ දෙනෙකුගේ සිහිය විකල්ව යාමට වැඩි ඉඩක් ඇති බවට ඕනෑ තරම් අත්දැකීම් තිබෙන නිසාය. කෙසේ නමුත් අවුරුදු 98 දී මනෝ වෛද්‍යවරියක ලෙස සේවය කරන්නියක සිටින්නේ යැයි පැවසුවහොත් එය දවසේ විහිළුවක් බවට පත්වන්නට බොහෝ ඉඩක් තිබේ. නමුත් සැබෑව එය නොවේ. එවැන්නියක සැබැවින්ම සිටී. නමුත් අප රටේ නොවේ. කැනඩාවේය.  ඉංග්‍රීසි ජාතික කාන්තාවක ලෙස එංගලන්තයේ උපත ලැබ, වර්තමානයේ කැනේඩියානු ස්නායු මනෝ වෛද්‍යවරියක ලෙස සේවය කරන බ්‍රෙන්ඩා මිල්නර් ද එබඳු තැනැත්තියකි. දැනටමත් 98 හැවිරිදි වියෙහි පසුවන ඇය කෙතරම් සේවයේ යෙදී සිටිය ද තවමත් වෙහෙස වී ඇති බවක් නම් පෙනෙන්නේ නැත. ඇගේ ජීවිතය පිළිබඳ යමක් කෙටියෙන් කතාබහ කිරීම අපට වටින්නේ ඒ නිසාමය. 

1918 ජූලි 15 වැනිදා උපන් බ්‍රෙන්ඩා මිල්නර් ස්නායු මනෝ විද්‍යා ක්ෂේත්‍රය තුළ විවිධ පර්යේෂණ පවත්වමින් තවමත් ඉතාමත් සක්‍රිය ලෙස මෙම ක්ෂේත්‍රයට සිය දැනුම දායාද කරමින් සිටින්නියකි. ඇතැම් විට ඇය හඳුන්වනු ලබන්නේ ස්නායු මනෝ විද්‍යාවේ ආදී කර්තෘවරිය ලෙසිනි. ඇය මේ වන විට කැනඩාවේ මැක්ගිල් සරසවියේ ස්නායුවේදය සහ ස්නායු ශල්‍යකර්ම පිළිබඳ අංශයේ මාහාචාර්යවරියක ලෙස සහ මොන්ට්‍රියල් ස්නායුවේදී ආයතනයේ මහාචාර්යවරියක ලෙස වැඩකටයුතු කරයි. මේ වන විට ගෞරව උපාධි 20 කට අධික සංඛ්‍යාවකට හිමිකම් කියන ඇය, විවිධ පර්යේෂණව නිරතවෙමින් සිය ක්ෂේත්‍රය වෙනුවෙන් අතිමහත් සේවයක් සළසයි. ඇය වර්තමානයේ පර්යේෂණ පවත්වන්නේ මොලයේ වම් සහ දකුණු අර්ධගෝල අතර සිදුවන අන්‍යෝන්‍ය ක්‍රියාකාරීත්වය පිළිබඳවය. ස්නායු මනෝ විද්‍යා ක්ෂේත්‍රය වර්තමානයේ පවතින තත්වය දක්වා සංවර්ධනය කිරීමට ඇය ලබා දී ඇති දායකත්වය ඉමහත්ය. මේ නිසාම ඇයට ස්නායුවේදය සම්බන්ධ ‛කැව්ලි’ තිළිණය පවා හිමිව තිබේ. 

ඇය එංගලන්තයේ මැන්චෙස්ටර් හි උපත ලබන්නේ බ්‍රෙන්ඩා ලැන්ග්ෆෝර්ඩ් ලෙසින් වුව ද මිල්නර් ලෙස වාසගම වෙනස් වන්නේ විවාහයෙන් පසුවය. ඇගේ දෙමාපියන් සංගීත ක්ෂේත්‍රයට සම්බන්ධව වැඩකටයුතු කරන්නන් වුව ද ඇයට ඒ පිළිබඳ උනන්දුවක් තිබුනේ නැත. සය මස් හැවිරිදි වියේදී ඇය සහ මව ඉන්ෆ්ලුවෙන්සා වසංගතයට ගොදුරු වූ අතර එම සමයේ එයට ගොදුරු වූ පුද්ගලයන් මිලියන 20 - 40 අතර සංඛ්‍යාවක් මිය ගිය බව වාර්තා වේ. එය පළමු ලෝක යුද්ධයෙන් මිය සංඛ්‍යාවට ද වඩා අධිකය. කෙසේ නමුත් වාසනාවකට ඇයත් මවත් මේ වසංගතයේ ගොදුරු වූයේ නැත. 

ඇයට අවුරුදු 8 දක්වා ඇගේ පියා විසින් ගණිතය උගන්වන ලද අතර පසුව ඇය විතින්ටන් බාලිකා පාසලට ඇතුළත් කෙරිණි. ඉන් පසුව ගණිතය අංශයෙන් තවදුරටත් ඉගෙනගැනීම සඳහා ඇය කේම්බ්‍රිජ්හි නිව්න්හැම් පාසලට ඇතුළත් කෙරිණි. කෙසේ නමුත් තමා ගණිතය ක්ෂේත්‍රයට දක්ෂ නොවන බව තේරුම් ගත් නිසාම ඇය කළේ මනෝ විද්‍යාව තෝරාගැනීමය. මෙහි ප්‍රතිඵලය වූයේ 1939 වසරේදී ඇය පර්යේෂණාත්මක මනෝවිද්‍යාව යන ක්ෂේත්‍රයෙන් උපාධියක් හිමිකරගැනීමය. 

ඇයට සිය සැමියා වූ පීටර් මිල්නර් හමුවන්නේ 1941 වසරේදීය. ඔහු විදුලි ඉංජිනේරුවෙක් බැවින් යුද කටයුතු සඳහා සහය වන්නට ඔහුට සිදු විය. 1944  දී ඔවුන් විවාහ වූ අතර පරමාණුක බල ශක්තිය පිළිබඳ අධ්‍යයනයක් සඳහා දායක වන්නට පීටර් හට ආරාධනයක් ලැබුණු බැවින් ඔවුහු එංගලන්තය අතහැර කැනඩාව කරා පිටත්ව ගියහ. 

බ්‍රෙන්ඩා මිල්නර් සිය ක්ෂේත්‍රයේ අතිමහත් ජනාදරයට පත්වන්නට එක් සුවිශේෂී සිදුවීමක් ඉවහල් විය. ‛එච්.එම්’ යන නමින් පමණක් දැන සිටි එක්තරා පුද්ගලයෙක් 1955 වසරේදී සිය මොලයේ කොටසක් ඉවත්කිරීමේ ශල්‍යකර්මයකට සූදානම්වෙමින් සිටියේය. මෙම ශල්‍යකර්මයේ ප්‍රතිඵලය වූයේ ඔහුගේ කෙටිකාලීන මතකය අහිමි වීමය. පෙර සිදුවූ කිසිවක් ඔහුට මතකයට නගා ගත නොහැකි විය. ඔහුගේ මෙම තත්වය අවබෝධ කොටගත් ඇය සිදු කළේ මේ පිළිබඳ පර්යේෂණයක් ආරම්භකිරීමය. ඇයගේ මෙම පර්යේෂණය තුළින් ඔහුගේ කෙටිකාලීන මතකය නැව වර්ධනය කරවන්නට හැකියාව ලැබිණි. මෙම සිදුවීමත් සමඟ ඇය සිය ක්ෂේත්‍රය තුළ ලෝක ප්‍රකට කාන්තාවක බවට පත් වූවාය. 

98 හැවිරිදි වියෙහි පසුවන ඇයගේ මතකය අංශු මාත්‍රයකින් හෝ හෝ අඩු වුණු බවක් පෙනෙන්නට නැත. ඇය සිය කුඩා සමයේ සිදු වූ සියලු සිදුවීම තවමත් කිසිදු අඩුවක් නොමැතිව මෙනෙහි කරන්නට සමත්ය. වයස 98ක්ව සිටියදී පවා ඇගේ බලාපොරොත්තුව මිනිස් වර්ගයා වෙනුවෙන් කුමක් හෝ සුවිශේෂී කාර්යභාරයක් කිරීමය. කරයි.  තමා වයස්ගත බැව් හැඟෙන්නට පටන් ගත් දින සිටම වැඩපළ කිරීමට නොහැකි යැයි සිතන බොහෝ කාන්තාවන්ට පමණක් නොව පිරිමින්ට ද ඇය ආදර්ශයක්ම වන්නීය. 



Saturday, October 15, 2016

පරාක්‍රමබාහු ද පුලස්ති ඍෂිවරයාද? - King Parakramabahu or Pulasthi the Prophet?


පොළොන්නරුවේ චාරිකාවක ගිය අවස්ථාවක පරාක්‍රමබාහු රජුගේ යැයි සැළකෙන ප්‍රතිමාව නරඹන්නට ගියා. මේ වීඩියෝවේ දැක්වෙන්නේ ඒ අවස්ථාවේදී එතැන සිටි නිලධාරී මහතකු මේ ප්‍රතිමාව පිළිබඳ පැවසූ විස්තරයක්. ඒ විස්තරය වඩාත් ප්‍රයෝජනවත් වන ආකාරයට අවශ්‍ය තැන්වලට ගැළපෙන ඡායාරූප දමා තිබෙනවා. අත්හදාබැලීමක් ලෙස මෙය ත්‍රිමානව නැරඹිය හැකි ආකාරයටයි සකස්කොට තිබෙන්නේ. පහත ආකාරයේ ත්‍රමාන කන්නාඩියක් පළඳා මෙය නැරඹීමෙන් මාගේ උත්සාහය කෙතරම් සාර්ථක ද කියා ඔබට නිගමනය කළ හැකියි.







ඔහු පවසන විස්තරයට අනුවත්, ඉතිහාස හා පුරා විද්‍යා සාධක අනුවත් මේ ප්‍රතිමාව ගැන නිශ්චිත අදහසක් නැහැ. ඇතැමෙක් මෙ පුලස්ති ඍෂිවරයාගේ යැයි විශ්වාස කරන අතර තවත් පිරිසක් මෙය පරාක්‍රමබාහු රජුගේ යැයි විශ්වාස කරනවා. මා පුරාවිද්‍යාව හෝ ඉතිහාසය පිළිබඳ විශේෂඥයකු නොවන නිසා ඒ ක්ෂේත්‍රයන් ඔස්සේ මේ ගැන කිසිවක් කියන්න බැහැ. නමුත්  වෙනත් අදහසක් පළකරන්න හැකියාවක් තියෙනවා.


එක් අවස්ථාවක පඬුවස්නුවර නටබුන් නැරඹීමේ අවස්ථාවක් ලැබුණා. පඬුවස්නුවර කියන්නේ පඬුවස්දෙව් රජ කළ රාජධානිය නොවන බව කවුරුත් දන්නා දෙයක්. ඉතිහාසගත තොරතුරුවට අනුව මෙයට මේ නම වැටී ඇත්තේ මේ ප්‍රදේශයේ පැවති පඬා වැව නිසා බවයි පැවසෙන්නේ. දැන් ඇත්තේ එහි නටබුන් පමණයි. ඒ වගේම මෙම ප්‍රදේශය ප්‍රධාන රාජධානියක් නොව උප රාජධානියක් ලෙස පැවති බවත්, එහි පාලකයාව සිට ඇත්තේ එවකට ඈපා කෙනෙක් හෙවත් යුව රජකු වූ, පසුව පොලොන්නරුව රාජධානිය කරගන්නා පරාක්‍රමබාහු කුමාරයා බවත් ඉතිහාස පුවත් හමුවෙනවා.  




පඩුවස්නුවර පවතින කෞතුකාගාරයේ පරාක්‍රමබාහු කුමාරයාගේ යැයි සැලකෙන කුඩා ප්‍රතිමාවක් දක්නට ලැබෙනවා. මේ ප්‍රතිමාවේ පෙනුමත් පොලොන්නරුවේ පවතින ප්‍රතිමාවේ පෙනුමත් බොහෝ සමාන බැව් මේ ඡායාරූපය බැලීමෙන් ඔබට ද පැහැදිලි වෙනවා ඇති. මේ නිසා පොලොන්නරුවේ පවතින්නේ පරාක්‍රමබාහු රජුගේ ප්‍රතිමාවම බව බොහෝ දෙනෙක් දක්වන අදහසට මෙය අනුබලයක් වන බවයි මගේ අදහස.