ඉලෙක්ට්‍රික් දුම් කබලක් සාදා ගනිමු - Electric Incense Burner DIY

දුම් කබලක් කියන්නේ මොකක්ද කියලා කවුරුත් දන්නවා. ගෙවල් දොරවල් සුවඳවත් වෙන්න විවිධ සුවඳ වර්ග පුළුස්සන්න යොදා ගන්නා තැටිය තමයි මේක. මේකේ දුම් අල්ලන වැඩේ ටිකක් කරදරයි. ඒ මට පෞද්ගලිකව හිතෙන විදිය. ඒ කියන්නේ පොල් කටු කඩලා, ඒවා තැටියට දාලා, භූමිතෙල් වත්කරලා පොල් කටු ගිනි අඟුරු සාදා ගන්න ඕන. ඉන් පස්සේ අර සුවඳ කුඩු මේ ගිනි අඟුරු උඩට දාන්න ඕන. එතකොට තමයි ඒවා පිච්චිලා සුවඳ හමන්න පටන් ගන්නේ. මේක ටිකක් කම්මැළි වැඩක් නිසා ඉලෙක්ට්‍රික් දුම් කබලක් මිලට ගන්න හිතුවා. ඒක ටිකක් ගණන් වැඩියි. 

මිලදී ගැනීමට ඇති ඉලෙක්ට්‍රික් දුම් කබල්

පස්සේ මම හිතුවා එකක් හදලා බලන්න. අන්තර්ජාලයේ මේ ගැන විස්තර හොයලා බැලුවා. ඒවායේ විවිධ උපදෙස් දීලා තිබුණා. ඒ උපදෙස් අතරේ මම හොයා ගත්ත හොඳම දේ තමයි හොට් ප්ලේට් එකක ගිනියම් වෙන දඟරයක් වැනි දෙයක් මතට මේ සුවඳ කුඩු දාලා පුච්චන එක. ඒත් හොට් ප්ලේට් එකකට යන විදුලිය අධිකයි. බැටරි කරන්ට් එකක්, එහෙමත් නැත්නම් සුළු විදුලි බලයකින් මේ වැඩේ කර ගන්න පුළුවන් නම් වැඩේ ලාබයි. මෙහෙම ඉන්න කොට තමයි මට නයික්‍රොම් කියන ලෝහය ගැන අහන්න ලැබුණේ. මේකටම නික්‍රොම් කියලත් කියනවා. මේ ලෝහයෙන් කුඩා දඟරයක්, නැත්නම් සූත්‍රිකාවක් සාදා ගත්තොත් ඒක සුළු විදුලි ධාරාවකින් ගිනියම් කරන්න පුළුවන් බව අන්තර්ජාලයේ කිහිප තැනක තිබුණා. ඉතින් මම මේ ලෝහය වෙළෙඳසැල් කීපයක බැලුවත් හොය ගන්න බැරි වුණා. අන්තිමට ඊබේ එකෙන් ඩොලර් ශත 97 කට එයින් මීටර් කිහිපයක් ගෙන්නා ගත්තා.

එයින් මම පොඩි ආදර්ශ දඟරයක් සාදා බැලුවා. වැඩේ සාර්ථකයි. මම මේ දාලා තියෙන්නේ ඒ ආදර්ශය ගැන විස්තරයක්. මේ විදියට තවත් වැඩිදියුණු කරලා, පෙනුම අලංකාර කරලා ඕන කෙනෙකුට ඉලෙක්ට්‍රික් දුම් කබලක් සාදා ගන්න පුළුවන්.

සුවඳ දුම් දැවීම සඳහා තැටිය විදියට ගත්තේ මුට්ටියකින් කපා ගත් කොටසක්. මේ සඳහා ලෝහ තැටියක් භාවිත කරන්නට නොහැක්කේ මෙය විදුලිය සපයන නිසා පරිපථය ලුහුවත් වන නිසයි. මේ මැටි තැටියේ සිදුරු දෙකක් විද ඇණ මුරිච්චි යොදා නික්‍රොම් දඟරය සවි කර ගත යුතු වෙනවා. අධික ලෙස රත්වන නිසා ඊයම්වලින් පෑස්සිය නොහැකියි. නයික්‍රොම් දඟරයේ දිග සහ ලබා දෙන වෝල්ටීයතාව අනුව කොයි තරම් උෂ්ණත්වයක් ලබා ගත හැකිද කියා සොයා බැලිය හැකි ක්‍රමයක් තිබෙනවා. එවැනි වෙබ් අඩවියකට මෙතැන ක්ලික් කිරීමෙන් පිවිසෙන්නට පුළුවන්.

මා මෙයට බලය ලබාදීම සඳහා භාවිත කළේ පැරණි යූපීඑස් ට්‍රාන්ස්ෆෝමරයක්. එයින් වෝල්ට් 12 කට වඩා බලයක් ලබා ගන්න පුළුවන්. 

මෙවැනි දුම් කබලක එක් අවාසියක් තිබෙනවා. එය තමයි අපට මෙය රැගෙන යා හැක්කේ වයරයේ දිග ඇති සීමාවට පමණක් වීම. මේ සඳහා විසඳුමක් විදියට අපට බැටරි බලය යොදා ගන්න පුළුවන්. මේ සඳහා හොඳම බැටරි වර්ගය තමයි 18650. මේ එක් බැටරියකින් වෝල්ට් 3.6ක් ලබා ගන්න පුළුවන්. ධාරාව නම් වෙනස් විය හැකියි. මේ බැටරි  4 ක් ශ්‍රේණිගත ආකාරයට සම්බන්ධ කරගැනීමෙන් අවම වශයෙන් වෝල්ට් 14.4 ක් ලබා ගත හැකියි. මේවා අලුතින්ම මිලට ගන්නවා නම් ටිකක් වියදම් වැඩියි. නමුත් පිටකොටුවේ පළමුවැනි හරස් වීදියේ පරණ ලැප්ටොප් බැටරි විකුණන්නට දමා තිබෙන තැනකින් රුපියල් 500 කට වැනි මුදලකට මෙවැනි බැටරි 6ක් පමණ මිලට ගන්න පුළුවන්. මේ බොහෝ ඒවා හොඳ තත්වයෙන් තිබෙන බැටරි. කාලයක් පාවිච්චි කරන්න පුළුවන්. මේවා දුම් කබලේ පීවීසී රාමුව වටේට පහසුවෙන් සවි කරගත හැකියි. යූපීඑස් ට්‍රාන්ස්ෆෝමරයකින් මෙය ආරෝපණය කරගත හැකි පරිපථයක් සාදා ගන්න පුළුවන්. 

මේ සියල්ල සාදා අවසන් වූ පසු දඟරය වැසෙන සේ සුවඳ දුම් කුඩු දමා විදුලියට හෝ බැටරියට සම්බන්ධ කළ යුතුයි. එවිට දඟරය ගිනියම් වී සුවඳ දුම් කුඩු ගිනි ගන්නවා. එවිට සුවඳ පැතිරෙන්න පටන්න ගන්නවා. පොල්කටු කඩලා ගිනි තියලා දුම් පත්තු කරනවාට වඩා මේ වැඩේ පහසුයි. 

පාර්ලිමේන්තු වලි හෙවත් පාර්ලිමන්ට් ජෝක්ස් - Fights in Parliaments from Around the World

පාර්ලිමේන්තුවේ වලි දාගන්නේ මේ උතුම් වූ සිරි ලංකාවේ විතරක්ද? නැත මිත්‍රවරුණි. ගෞරවනීය පුරවැසියනි, ලෝකයේ දියුණු යැයි කියා ගන්නා හැම රටකම වාගේ පාර්ලිමේන්තුවේ වලි දාගෙන තිබේ. මේවා ශාස්ත්‍රීය ලෙස හඳුන්වන් ලබන්නේ ව්‍යවස්ථාදායක ප්‍රචණ්ඩත්වය හෙවත් Legislative violence කියාය. විකිපීඩියා එකේ මේවා ගැන කියා තිබෙන දේවල් මෙතැනින් ගිහින් බලාගන්නට පුළුවන්ය.  කොහොමත් වලි දා ගැනීම හොඳ නැත. පාර්ලිමේන්තුවේ වලි නම් කොහොමත්ම හොඳ නැත. අප හොඳ නැත කීවාට මේ මඩුවට රිංගන සියල්ලෝ බලු රැලක් සේ වලි දාගන්නෝය. වලි දාගන්නා එකේ සීමාවක් ද නැතිය. එහෙව් එකේ අපි ඒවා ටිකක් බැලුවා කියා ඇස් ගෙවෙන්නේ නැත. ප්‍රජාතන්තුවාදය, ජනතා පරමාධිපත්‍යය වැනි බර වචනවලින් කියවෙන දේවල්වල ද ගෙවෙන්න දෙයක්  ඉතිරි වී නැත. ඒ නිසා අපි පාර්ලිමේන්තු වලි හෙවත් පාර්ලිමන්ට් ජෝක්ස් ටිකක් ඔන්න ඔහේ බලමු.

මේ අපේ ලංකාවේ කට්ටිය

ලොව වටා පාර්ලිමේන්තු වලි

යුක්රේනය

හොංකොං

සෝමාලියාව

බොලීවියාව

තුර්කිය

දකුණු කොරියාව

තායිපේ

ජපානය

ගුගල් සේවකයන්ගේ උද්ඝෝෂණය සහ තවත් ගූගල් කතා - Google Protest and other Stories

ගූගල් සමාගම සඳහන් කරන ආකාරයට එයට ලොව පුරා පූර්ණ කාලීන සේවකයන් සහ කොන්ත්‍රාත්තු පදනම යටතේ බඳවා ගත් සේවකයන් 94,372 ක් ක් ඉන්නවා. මේ සංඛ්‍යාව අතුරින් විසි දහසකට අධික සංඛ්‍යාවක්, එනම් මුළු සමාගමෙන් සියයට 20 කට අධික පිරිසක් මේ නොවැම්බර් 1 වැනිදා උද්ඝෝෂණයක නිරත වුණා. ඒ එහි සේවය කළ ජ්‍යෙෂ්ඨ නිලධාරියකු වූ ඇන්ඩි රූබින් ට එරෙහිව නිව්යෝර්ක් ටයිම්ස් පුවත්පත මගින් පළ කොට තිබූ ආන්දෝලනාත්මක ලිපියක් නිසයි. ඇන්ඩි රූබින් කියන්නේ එසේ මෙසේ පුද්ගලයකු නොව ඇන්ඩ්‍රොයිඩ් මෙහෙයුම් පද්ධතියේ නිර්මාතෘවරයායි. ඇන්ඩ්‍රොයිඩ් මෙහෙයුම් පද්ධතිය යනු කුමක්දැයි නොදන්නා කිසිවකු නොමැති වුවත්, නොදන්නා කෙනෙක් අහම්බෙන් හෝ සිටිනවා නම් ඔහුගේ හෝ ඇයගේ දැන ගැනීම පිණිස සඳහන් කරන්නේ ඇන්ඩ්‍රොයිඩ් යනු ඔබත් මමත් භාවිත කරන ස්මාර්ට් ජංගම දුරකතන බොහොමයක (ඇපල් හැරුණු විට) ක්‍රියාත්මක වන මෙහෙයුම් පද්ධතිය කියායි. එතරම් එසේ මෙසේ නොවන කෙනා දැන් ගූගල් සමාගමේ නැතත්, ඔහු ඉන්නා කාලයේ එක්තරා කාන්තාවක් සමග පැවැත්වූ වැරදි ලිංගික ඇසුරක් අතට අසුවීමක් ගැනයි මේ ලිපිය පළකොට තිබුණේ. මේ වරද ගූගල් සමාගමට අසු වූ නිසා ඔහුගේ පස්සට පයින් ගසා එළවනවා වෙනුවට ඔහුට ඇමරිකානු ඩොලර් මිලියන 90 ක් ලබා දී ඔහුව ඇගයීමකට ද ලක්කොට තවත් පහසුකම් ද ලබා දී ඔහු විශ්‍රාම ගන්වනු ලැබුවා. මේ සියල්ල නිව්යෝර්ක් ටයිම්ස් පුවත්පතෙන් දැනගත් පසු ගූගල් සේවකයන්ට යකා නැග්ගේ මේ නිසා ගූගල් සමාගමට මහත් අපහාසයක් සිදුවූ නිසයි.  ලෝකයට ආදර්ශයක් විය යුතු සමාගමක් පිළිබඳ මෙවැනි පුවත් පළවීම තමන්ට දරාගන්නට නොහැකි බවයි සේවකයන් පවසන්නේ. ඒ නිසා මෙසේ උද්ඝෝෂණය කළ බව දැනගන්නට ලැබෙනවා.

ඇන්ඩි රූබින්

කොහොම වුනත් මේ හදන්නේ මේ උද්ඝෝෂණය ගැනවත් ලිංගික අපයෝජනය ගැනවත් කතා කරන්න නෙවෙයි. තමන්ගේ සමාගමට අපහාසයක් වීම නිසා මේතරම් සේවකයන් පිරිසක් පාරට බහින්න තරම් ඔවුන්ට වටින ගූගල් සමාගම ගැන විස්තර ටිකක් කතා කරන්නයි.

වැරදීමකින් නම වැටුණු ගූගල්

ඇමරිකා එක්සත් ජනපදයේ කැලිෆෝර්නියා ප්‍රාන්තයේ මවුන්ට් වීව් හි පිහිටා ඇති ගූගල් සමාගමේ ප්‍රධාන කාර්යාලය පිහිටුවනු ලැබුවේ 1998 වර්ෂයේ දියි. ඒ ලැරී පේජ් සහ සර්ජි බ්‍රින් විසින්. ලෝකයේ පවතින ජනප්‍රියතම අන්තර්ජාල සෙවුම් යන්ත්‍රය කියන්නේ ගූගල්. මෙයට පෙරත් පසුවත් බොහෝ සෙවුම් යන්ත්‍ර බිහිවුවත්, ඒවාට ගූගල් තරම් කාර්යක්ෂම වෙන්නට නොහැකි වෙලා තියෙනවා.

ගූගල් සමාගමට මුලින්ම ලබා දෙන්නට යෝජනා වී තිබුණු නම වුණේ ‛බැක්රබ්’.  නමුත් පසුව ‛ගූගල්’ නමින් වෙනස් කරනු ලැබුවා. එය සිදුවුණේ වැරදීමකින්. ඔවුන්ට අවශ්‍ය වූයේ යම් සෙවුමක් කළ විට ඒ සඳහා කෝටි ගණන් ප්‍රතිඵල ලැබෙන බව පෙන්වන නමක් යොදන්නටයි. ඔවුන් මේ සඳහා තෝරා ගත්තේ ‛ගූගොල්’ (googol) යන්නයි. ගූගොල් යනු එකයි බිංදු සියයක සංඛ්‍යාවයි. නමුත් ඔවුන් අකුරු වරදවා ලියා තිබූ නිසා වෙබ් අඩවියේ පළවූයේ Google යන්නයි. වැරැද්ද නිවැරදි කරන්නට නොගිය ඔවුන් ඒ නම එසේම තියෙන්නට හැරියා. මෙය කෙතරම් ජනප්‍රිය වචනයක් වූවා ද කීවොත් යමක් සොයනවා යන අර්ථය ඇතිව ‛ගූගල් කරන්න’ යන්න භාවිතයට පැමිණියා. අවසානයේ මෙය අලුත් ඉංග්‍රීසි වචනයක් ලෙස 2006 වසරේ දී ඔක්ස්ෆර්ඩ් ඉංග්‍රීසි ශබ්දකෝෂයට ද එකතු කෙරුණා.

ගූගල් සෙවුම් යන්ත්‍රය බිහිවන්නට පෙර ලෝකයේ තිබූ හොඳම සෙවුම් යන්ත්‍රය වූයේ ‛යාහූ’. කෙසේ නමුත් ගූගල් සමාගම ආරම්භ වූ පසු ‛යාහූ’ සමාගමට යන එන මං නැති වුණා. කෙසේ නමුත් ‛යාහූ’ සමාගම මුල් සමයේ සිටියේ පුදුම ආඩම්බරයකින්. ගූගල් සමාගම ආරම්භ වූ කාලයේ යම් යම් ගැටලු නිසා එය විකුණා දමන්නට තීරණය කෙරුණා. ඔවුන් එය විකුණා දමන්නට තීරණය කරන ලද්දේ ඇමරිකානු ඩොලර් බිලයන 3 කට යාහූ සමාගමටයි. නමුත් ආඩම්බර යාහූ සමාගම එය ප්‍රතික්ෂේප කළා. නමුත් අද එහි වටිනාකම ඇමරිකානු ඩොලර් බිලයන 400 කටත් අධිකයි. මේ ගැන ලෝභ සිතුණු යාහූ සමාගම එය මිලදී ගන්නට කැමැත්ත පළ කළත් අළුතින්ම ආඩම්බර වී ඇති ගූගල් සමාගම එය පයිසෙකටවත් ගණන් නොගෙන ප්‍රතික්ෂේප කළා.

අහසේ ගෑවෙන වැටුප්

ගූගල් කියන්නේ ලෝකයේ අතිශය ජනප්‍රිය මෙන්ම දැවැන්ත සමාගමක් නිසා මෙහි සේවකයන්ගේ වැටුප් ද ඒ තරමටම ආකර්ෂණීයයි. අහසේ ගෑවෙන තරම් ඉහළයි. දැනගන්නට ලැබෙන පරිදි වසරකට ගූගල් සමාගම එක සේවකයකුට ගෙවනු ලබන වැටුපේ සාමාන්‍යය ඇමරිකානු ඩොලර් 96,000 ක් හෙවත් රුපියල් එක්කෝටි හැටපන් ලක්ෂයක් පමණ වෙනවා. ප්‍රසාද දීමනාවල සාමාන්‍යය ඇමරිකානු ඩොලර් 25,000 ක් හෙවත් රුපියල් හතලිස් තුන් ලක්ෂයක් පමණ වෙනවා. මෙය තවත් විස්තර කළොත් ජ්‍යෙෂ්ඨ මෘදුකාංග වර්ධක නිලධාරියකු සඳහා වාර්ෂික වැටුප ඇමරිකානු ඩොලර් 149,000 ක් හෙවත් රුපියල් දෙකෝටි පනස් හය ලක්ෂයක් පමණ වෙනවා. ප්‍රධාන ස්ථිර සේවකයන්ගෙන් අඩුම වාර්ෂික වැටුපක් ගෙවන්නේ තොරතුරු තාක්ෂණ විශ්ලේෂකයන්ටයි. එය ඇමරිකානු ඩොලර් 65,000ක් හෙවත් එක්කෝටි එකලොස් ලක්ෂයක් පමණ වෙනවා.

මරණින් මතු සැපවත් ජීවිතයක්

ගූගල් සමාගමේ සේවයට යාමෙන් තමාගේ මරණයෙන් පසු තමාට නැතත් තමාගේ බිරිඳට හෝ සැමියාට හෝ සැපවත් ජීවිතයක් ලැබෙන බව ඒකාන්තයි. මිය ගිය සේවකයාගේ වැටුපෙන් හරි අඩක් බිරිඳට හෝ සැමියාට වසර 10 ක් යන තුරු හිමි වෙනවා. මීට අමතරව සැමියා හෝ බිරිඳ වෙනුවෙන් තවත් බොහෝ සුබසාධන කටයුතු ගූගල් සමාගම විසින් හඳුන්වා දී තිබෙනවා.

ආඩම්බර සේවකයෝ

ගූගල් සමාගමේ රස්සාවට යන්න තියෙනවා නම් ඉතින් ඒ ගැන කවර කතා ද කියලා බොහෝ දෙනෙක් කියනවා. මෙහෙම කියන්නේ ගූගල් සේවකයන් ගෙවන නිදහස් ජීවිතය ගැන අන්තර්ජාලයේ බොහෝ තැන්වල සඳහන් වෙලා තියෙන තොරතුරු නිසයි. මේ ගැන හොයා බැලුවාම මේ වගේ විස්තර ටිකක් කෙටියෙන් සඳහන් කරන්නට පුළුවන්. ගූගල් සමාගම ගැන කියවෙන ලොකුම ප්‍රවෘත්තිය තමයි එහි සේවකයන්ට ඕනෑම වෙලාවක ඕනෑම කෑමක් නොමිලේ භුක්ති විඳින්ට පුළුවන්ය කියන එක. ඔවුන්ට කෑම ගන්න තියෙන ක්‍රම අනන්තයි අප්‍රමාණයි කියා කියන්න පුළුවන්. ලොකු වැටුපක් ගෙවන අතරේ කෑම බීම නොමිලේ දෙනවා කියන එක ලේසි පාසු වැඩක් නෙවෙයි. වැඩ කරමින් ඉන්න අතරේ ඉවුම් පිහුම් පංතිවලට සහභාගී වෙන්නටත් මෙහි සේවකයන්ට අවස්ථාව තිබෙනවා. ඒ වගේම කාර්යාලය තුළම ඇති ව්‍යායාම ශාලා, සම්බාහන මධ්‍යස්ථාන, කම්මැලි වෙලාවට කරන්න තියෙන විනෝදාත්මක වැඩ, අමතර අධ්‍යාපන කටයුතු සඳහා ගෙවීම් වැනි අතෝරක් නැති පහසුකම් එක්ක හොඳ වැටුපකුත් ලැබෙද්දි ගූගල් සේවකයන් ආඩම්බර නොවී වෙන මක් කරන්නද?

ඇස් කඩාගෙන යන කාර්යාල

ගූගල් සමාගම ගැන තවත් ප්‍රසිද්ධ කතාවක් වන්නේ අමුතු විලාසිතා, හැඩතලවලට සැලසුම් කොට කාර්යාල ගැනයි. මේවා දකින විට ඇත්තටම මෙහෙම ඒවාත් තියෙනවාද කියා සිතුනත් කියන්න තියෙන්නේ මෙහෙම ඒවා තියෙන බවයි. මේ කාර්යාල සාම්ප්‍රදායික ඒවාට වඩා හාත්පසින්ම වෙනස්. සේවකයන්ට තමන්ගේ වැඩකටයුතු නිදහසේ කරගෙන යන්නට, මානසික නිරවුල් බවක් ඇති කරගන්නට හැකි ආකාරයට සකස් කොට තිබෙනවා. ලොව පුරා ඇති විවිධ ගූගල් කාර්යාල විවිධ හැඩතලවලින් සකස් කොට තිබෙනවා. ඇතැම් ඒවා සකස් කොට ඇත්තේ හාත්පස ගහ කොල ඇති ආකාරයටයි. ඇතැම් ඒවාට කුඩා උද්‍යාන පවා ඇතුළත් කොට තිබෙනවා. එල්ලී පැද්දෙන ආසන, යහන් ආදී විවිධ දේවල් මේ කාර්යාල තුළ දකින්නට පුළුවන්. අනෙක ලොව පුරා ඇති සියලුම කාර්යාල ස්ථාන ගත කොට ඇත්තේ ඉතා මනස්කාන්ත දර්ශනයක් නෙතට දිස්වන ආකාරයටයි.

සොබා දහමට ආදරය කිරීම

ගූගල් සමාගම සොබා දහම රැක ගන්නට දක්වන්නේ විශාල දායකත්වයක්. ලෝකයට විෂ වායු මුදා හැරීම, ශබ්දය ආදී දේවල්වලින් සිදුවන හානි වලකාගන්නට ඔවුන් ගත හැකි සෑම උත්සාහයක්ම ගන්නවා. මේ අතුරින් විශේෂයෙන් සඳහන් කළ හැකි කාරණයක් වන්නේ ඔවුන්ගේ කැලිෆෝර්නියා කාර්යාලයේ තණකොල කැපීමයි. ඔවුන් මේ සඳහා යන්ත්‍ර යොදා ගන්නේ නැහැ. ඒ වෙනුවට ඔවුන් සෑම අවස්ථාවකදීම එළුවන් භාවිත කරනවා.

ගූගල් ගුවන් යානා

ගූගල් සමාගමේ නිර්මාතෘවරුන් වන ලැරී සහ සර්ජි ලෝකයේ සිටින ධනවතුන් අතර තෙවැනි සහ සිව්වැනි ස්ථානවල පසු වෙනවා. ඔවුන්ගේ වත්කම් 2018 වසරේ දී ඇමරිකානු ඩොලර් බිලියන 47 කටත් අධිකයි. සාමාන්‍යයෙන් ප්‍රබල සමාගම්වල හිමිකරුවන් අධික වටිනාකම්වලන් යුක්ත වාහන මිලට ගන්නා අතර ගූගල් හිමිකරුවන් වාහනවලට අමතරව පෞද්ගලික ගුවන් යානා ද මිලට ගෙන තිබෙනවා. මේ පෞද්ගලික ගුවන් යානා නවත්වන්නට යොදා ගන්නේ නාසා ආයතනයට අයත් ගුවන් තොටුපලේ බව සඳහන් වෙනවා. මේවා ගොඩබෑම සඳහා සකස් කොට ඇති ධාවන පථවලට වෙනත් යානා ගොඩ බෑම සඳහා අවසර ලබා දෙන්නේ නැහැ.

දෘඩ තැටි කිහිපයකින් ඇරඹුණු ගමන

අද කාලේ අලුතින්ම මිලට ගන්නා පරිගණකයක දෘඩ තැටිය අවම වශයෙන් ගිගා බයිට් 500ක් වත් වෙනවා. ඇතැම් ඒවා ටෙරා බයිට් 1 ක් පමණ වෙනවා. ඊට වඩා ධාරිතාව තියෙන ඒවා ද තිබෙනවා. නමුත් 1998 වසරේ දී ගූගල් සමාගම ආරම්භ කරද්දී දත්ත ගබඩා කිරීම සඳහා යොදා ගෙන ඇත්තේ ගිගා බයිට් 4 දෘඩ තැටි 10ක් බව දැනගන්නට ලැබෙනවා. නමුත් අද ඔවුන්ගේ දත්ත ගබඩා ධාරිතාව ගිගා බයිට් මිලියන 100කට අධිකයි. මුල්  සමයේ යම් සෙවුමක් කළ විට තත්පරයක් තුළ සකසා ප්‍රතිඵල ලෙස ලබා දිය හැකිව තිබුණේ පිටු 35 - 50 ක සංඛ්‍යාවක් පමණයි. නමුත් වර්තමානයේ දී තත්පරයක දී සැකසිය හැකි පිටු සංඛ්‍යාව මිලියන ගණනකටත් අධිකයි. 

ලොව වටා හොල්මන් - Haunted Places from around the World

මේ ලෝකයේ ඇත්තටම පවතිනවාද නැත්ද කියලා වාද කරන දේවල් අතර හොල්මන්වලට ලැබෙන්නේ මුල් තැනක්. ඇතැමුන් මේවා විශ්වාස කරනවා. ඇතැමුන් විශ්වාස කරන්නේ නැහැ. කොහොම වුනත් බහුතරයක් දෙනා මේ ගැන අත්දැකීමක් ලබා ගන්න සෑහෙන උනන්දුවක් තියෙනවා. හොල්මන් නවකතා, චිත්‍රපට ආදිය බිහි වෙන්නේ මේ නිසයි. මේ ඇරුනාම හොල්මන්වලින් පිරිලා ඉතිරිලා ගිය තැන් ගැනත් දැනගන්නට ලැබෙනවා. අපේ රටෙත් මේ වගේ තැන් තියෙනවා. සොහොන් පිට්ටනි මේ අතර ප්‍රධානයි.  ඊට අමතරව ඇතැම් නිවාස, නගර, කැලෑ සහ ගොඩනැගිලි ද හොල්මන්වලට ප්‍රසිද්ධ වෙලා තියෙනවා. ලෝකයේ අතිශයින් ප්‍රසිද්ධියට පත් එවැනි ස්ථානත් බොහොමයක් තියෙන අතර මේවා සංචාරක ආකර්ෂණයක් ඇති ස්ථාන වශයෙන් ද ජනප්‍රියත්වයක් උසුලනවා. කොහොම වුනත් මේවා නරඹන්නට යන්නේ නම් හොල්මන්වලට බයක් නැති ඇය විතරයි කියලත් පැවසෙනවා. ඇත්තටම අපට යන්න අවස්ථාවක නැතත් මේ විදියට විස්තරයක් හරි කියවාගන්න ලැබෙන එක ලොකු දෙයක් නිසා මේ සති අන්තයේ මේ විදියට හොල්මන් ගැන කියවමු.

ඇමරිකාවේ මයර්ටල් වතුයායේ මන්දිරය 

රතු ඉන්දියානුවන්ට අයත්ව තිබුණු සොහොන් බිමක් මත ගොඩනැගුවේ යැයි කටකතා පැතිර පවතින ඇමරිකාවේ මයර්ටල් වතුයාය කියන්නේ හොල්මන්වලට බොහොම ප්‍රසිද්ධ තැනක්. මයර්ටල් වතුයායට අයත් මේ පින්තූරයෙන් දැක්වෙන මන්දිරයේ මේ වන විට මිනීමැරුම් 10ක් සිදු වී තිබෙනවා. මේ මන්දිරයේ කලකට පෙර සේවය කළ වහලකු මෙහි හොල්මන් කරන බවට ප්‍රබල විශ්වාසයක් පවතිනවා. කොල පැහැ තලප්පාවක් බැඳ ගත් මේ හොල්මන කීප දෙනෙක්ම දැක තිබෙනවා. මේ මන්දිරයේ මෙයට පෙර ජීවත් වුණු සාරා වුඩ්රෆ් සහ ඇගේ දරුවන්ගේ අවතාර මෙහි ඇති මුහුණ බලන කන්නාඩියක හිරවෙලා තියෙන බවත් දැනගන්නට ලැබෙනවා. මේ මන්දිරයේ ඉදිරිපස වාහන නැවතුම් ස්ථානයේ දී වෙඩි තබා මරා දැමුණු විලියම් පීටර් නමැත්තාගේ අවතාරය ද මේ මන්දිරයේ නිතරම සැරිසරනවා. පීටර්ගේ අවතාරය දුවගෙන ගොස් මේ මන්දිරයේ ඇති 17 වැනි සියවසට අයත් පඩි පෙළක් ළගදී එක්වර අතුරුදහන් වෙන බවත් දැනගන්නට ලැබෙනවා.

එක්සත් රාජධානියේ ටොල්බූත් 

එක්සත් රාජධානියේ ඇති ටොල්බූත් කියන්නේ අඳුරු අතීතයකට හිමිකම් කිවූ තැනක් නොවුනත් එහි වර්තමානය තත්වය ඊට හාත්පසින්ම වෙනස්. වර්ෂ 1700 ගණන්වල ස්කොට් ජාතිකයන් බ්‍රිතාන්‍ය කිරුළ පැහැර ගැනීම සඳහා ‛ජැකොබයිට්’ නමින් කැරැල්ලක් දියත් කළා. කෙසේ නමුත් එය සාර්ථක වූයේ නැහැ. එයට සහභාගී වූ කැරලිකරුවන්ට සිරගත කිරීම සඳහායි මේ ස්ථානය මුලින්ම යොදා ගෙන තිබුණේ. ඉන් පසුව ඇමරිකානු යටත් විජිතවල ජීවත්ව වූ දරුවන් පැහැර ගෙන විත් වහලුන් ලෙස විකිණීම සඳහා මේ ස්ථානයේ රඳවා තබා තිබෙනවා. වර්තමානයේ මේ ස්ථානයෙන් අද්භූත සිදුවීම වාර්තා වෙනවා. මෙතැන නරඹන්නට පැමිණි බොහෝ දෙනෙකුට දම්වැල් සෙලවෙන හඬ ඇසී තිබෙනවා. ඒ වගේම බොහෝ අවස්ථාවල දී මීදුමින් මෙතැන වැසී යන අවස්ථා තිබෙනවා. එපමණක් නොවෙයි මෙතැනට පැමිණෙන බොහෝ දෙනෙකු පවසන්නේ මෙහි ගත කරන කාලය අතරතුර තමන්ගේ ගෙල කවුරුන් විසින් හෝ මිරිකා ගෙන සිටිනවා සේ දැනුණු බවයි.

එක්සත් රාජධානියේ ප්ලක්ලි ගම්මානය 

එක්සත් රාජධානියේ කෙන්ට් ප්‍රාන්තයේ පිහිටා ඇති මේ ප්ලක්ලි ගම්මානය ලෝකයේ වැඩියෙන්ම හොල්මන් ගැවසෙන ප්‍රදේශය ලෙස එක වතාවක ගිනස් වාර්තා පොතට ද ඇතුළු වී තිබුණා. ගිනස් වාර්තා පොතේ සඳහන් වන්නේ මෙහි හොල්මන් 12 - 16 අතර සංඛ්‍යාවක් දක්නට ලැබුණු බවයි. මං පහරන සොරෙකු මේ ස්ථානයේ දී කඩුවකින් කොටා මරා දමා ඇති අතර ඔහු නිතරම මෙතැන හොල්මන් කරන බව දැනගන්නට ලැබී තිබෙනවා. ඒ වගේම දේවස්ථානය ඇති භූමියේ රතු ඇඳ ගත් කාන්තාවක් ද හොල්මන් කරනා ආකාරය බොහෝ දෙනෙක් දැක තිබෙනවා.

ඇමරිකා එක්සත් ජනපදයේ ඇල්කැට්රාස් 

මේ කියන ස්ථානයේ ඇමරිකාවේ ඉතා ප්‍රකට  අපරාධකාරයෙකු වූ අල් කොපේනෝ ඇතුළු බොහෝ සිරකරුවන් පිරිසක් රඳවා තිබූ ස්ථානය බැව් පැවසෙනවා. ඔහු සමග සිරගෙදර සෑහෙන කාලයක් ගත කළ පුද්ගලයකු වූ ලියොන් විටී නමැත්තා 1980 ගණන්වල දී පිරිසක් ද සමග මෙතැන නරඹන්නට පැමිණ තිබෙනවා. එම පිරිසත් සමග මෙතැන සිටින අතරේ එක්වරම මිහිදුමක් ආකාරයෙන් මිනිස් රුවක් මතු වී ගමන් කළ බවත්, වඩාත් හොඳින් බලද්දී ඒ රුව අන් කිසිවකුගේ නොව සිය සිරකාර මිතුරා වූ අල් කොපේනෝගේ බව ඔහු පවසනවා. මෙතැන පැමිණි තවත් නරඹන්නන් බොහෝ දෙනෙකුට විලාප තැබීම් සහ හැඬුම් ශබ්ද ද ඇසී තිබෙනවා. ඉතාමත් මෑතකදී මෙය නැරඹීමට ගිය එක් පුද්ගලයකු පවසා ඇත්තේ මෙහි ජනෙල් කවුළුවකින් කාන්තාවක් පැන එක්වර අතුරුදහන් වූ බව තමා දුටු බවයි.

ඕස්ට්‍රේලියාවේ ආර්ඩේල් උන්මත්තකාගාරය 

ඕස්ට්‍රේලියාවේ වික්ටෝරියා ප්‍රාන්තයේ පිහිටා ඇත් මේ උන්මත්තකාගාරය විශාල ගමක් තුළ පිහිටුවා ඇති තවත් කුඩා ගමක් ලෙස සඳහන් කළ හැකියි. මෙය පිහිටුවා ඇත්තේ 1867 වර්ෂයේ දී පමණ බව පැවසෙනවා. මෙහි රඳවා තිබූ උන්මත්තක පුද්ගලයන් 13,000 කට වඩා මිය ගොස් ඇති බවත් ඒ බොහොමයක් මරණවලට හේතුව ස්වාභාවික කාරණා නොවන බවත් වාර්තා වී තිබෙනවා. වර්තමානයේ මෙය නරඹන්නට පැමිණෙන බොහෝ දෙනෙකු හොල්මන් දැක තිබෙනවා. මෙහි කාන්තාවන් රඳවා තිබූ කොටස තුළ මෙහි අතීතයේ සිට මිය ගිය නර්ස් කෙරී නමැත්තියගේ අවතාරය නිතර දකින්නට ලැබෙන බව වාර්තා වෙනවා. ඒ වගේම තමාව කවුරුන් විසින් හෝ ස්පර්ශ කළ බවත්, හිට හැටියේ අධික සීතලක් දැනුණු බවත් තවත් පිරිසක් පවසනවා.

ඕස්ට්‍රේලියාවේ ඩෙවිල්ස් පොකුණ 

 

අනතුරු ඇඟවීමේ පුවරුව

ඕස්ට්‍රේලියාවේ ක්වීන්ස්ලන්ත ප්‍රාන්තයේ පිහිටි මෙය නමින්ම කියවෙන පරිදි යකාගේ පොකුණක්. ගල් පරවලින් වටවුණු මේ පොකුණේ බොහෝ කාලයකට පෙර ඕස්ට්‍රේලියානු ආදී වාසි ඇබොරිජිනල් කාන්තාවක් මේ පොකුණට පැන සිය දිවි නසාගෙන තිබෙනවා. ඒ  ඇගේ පෙම්වතා ඇගෙන් වෙන් කළ ශෝකයටයි. මෙය සිදූ වී ඇත්තේ 1950 ගණන්වලයි. 1959 න් පසුව මෙය අසලට පැමිණි පුද්ගලයන් 17 දෙනෙකු කුමක් හෝ හේතුවක් නිසා මෙම පොකුණට වැටී මරණයට පත්ව තිබෙනවා. මේ නිසා බොහෝ දෙනා පවසන්නේ ආදී වාසී කාන්තාවගේ සාපයක් මේ පොකුණට වැදී ඇති බවයි. මේ තරම් මරණ සිදුවන නිසා බලධාරීන් මෙහි අනතුරු ඇඟවීමේ දැන්වීම් පුවරුවක් ද සවි කොට තිබෙනවා.

ඉන්දියාවේ භන්ගාර් බළකොටුව 

ඉන්දියාවේ රාජස්ථාන් හි පිහිටා ඇති මෙය ‛භූත් බන්ගලා’ නමින් ද ප්‍රකටයි. අද නටබුන්ව පැවතියත් මෙය කුඩා කෝවිල් දෙකක් ද සහිතව ඉදිකරන ලද කුඩා නගරයක් ලෙස පැවැතී තිබෙනවා. ඒ වගේම මාලිගාවල නටබුන් ද මෙහි දකින්නට පුළුවන්. 1783 වර්ෂයේ දී මේ බළකොටුව අතහැර දමා තිබෙනවා. මෙහි ඉරණම පිළිබඳ කතා දෙකක් මේ අවට ප්‍රදේශයේ ප්‍රචලිතව පවතිනවා. මෙහි වාසය කළ එක් පූජකයකු සතුව තිබූ ගොඩනැගිල්ලට වඩා උසින් වැඩි වෙනත් ගොඩනැගිල්ලක් ඔහුගේ අකැමැත්ත මධ්‍යයේ ඉදිකොට ඇති අතර උසින් වැඩි ගොඩනැගිල්ලේ සෙවණැල්ල තම ගොඩනැගිල්ල මතට වැටෙනු දුටු ඔහු මුළු නගරයටම සාප කළ බවයි පැවසෙන්නේ. එක්තරා මායාකරුවෙක් මායා බලයකින් මේ බළකොටුවේ තිබූ මාලිගාවේ සිටි කුමරියක් සිය ආදර වසඟයට ගත් බවත්, එහි බලය බිඳී ගිය විට ඔහු මුළු නගරයටම සාපයක් කළ බවත් තවත් කතාවකින් පැවසෙනවා.

මැලේසියාවේ පෙනෑන්ග් යුද කෞතුකාගාරය 

ලෝක ප්‍රකට නැෂනල් ජෝග්‍රැෆික් සඟරාව සඳහන් කරන අන්දමට ආසියාවේ වැඩිපුරම හොල්මන් අවතාරවලට ප්‍රසිද්ධියක් උසුලන්නේ ‛හොල්මන් කන්ඳ නමින් ප්‍රකට මෙම යුද කෞතුකාගාරයයි. 1930 ගණන්වල දී ආරක්ෂක බළකොටුවක් ලෙස මෙය ගොඩනංවා ඇති අතර 1941 වර්ෂයේ දී ජපනුන් විසින් මැලේසියාව ආක්‍රමණය කරන තුරු මෙහි සිට ඇත්තේ බ්‍රිතාන්‍ය ජාතිකයන්. එතැන් පටන් මෙය ජපනුන්ගේ සතුරන් සිර කොට වද හිංසා කොට මරා දමන ස්ථානයක් ලෙස යොදා ගැනුණා. මේ බොහෝ සිරකරුවන් මරා දමා තිබුණේ ගෙළ සිඳලීමෙන්. මේ ජපනුන් අතර සිටි කෲර නිලධාරියකුගේ අවතාරය නිතර මෙහි සැරිසරන බව මේ අවට වෙසෙන්නන් පවසනවා.