නළු සත්තු - Animal Actors

“ලෝකය රඟහලක් නම් අපි හි නළුවෝ වෙමු” කියා ශේක්ෂ්පියර් කියා තිබෙනවා. ඒ විදියට බැලුවොත් මේ ලෝකේ ඉන්න හැමෝම කුමක් හෝ චරිතයක් කරනවා. මිනිස්සු විතරක් නෙවෙයි සතුන් පවා නළුවෝ වෙනවා. කොහොම වුනත් සාමාන්‍ය කතාබහේදි අපි නළුවෙක් හෝ නිළියක් කියා කියන්නේ සිනමා පටයක, ටෙලි නාට්‍යයක හෝ වේදිකා නාට්‍යයක යම් චරිතයක් ඉදිරිපත් කරන පුද්ගලයෙකුට. ඒ අර්ථයෙන් ගත්තොත් නම් නළුවා කියන්නේ විශේෂ පුද්ගලයෙක්. ඒ අතරිනුත් යම් සතෙක් නළුවෙක් වෙනවා නම් ඒක තවත් විශේෂයි. එහෙම විශේෂ නළු සතුන් අපි ඕනෑ තරම් දැක තිබෙනවා. ඒත් ඒ තරම් විස්තරයක් දන්නේ නෑ. අදින් පස්සේ නම් දන්නේ නෑ කියන්න බෑ මොකද අද අපි එයාලා ගැනයි කතා කරන්න යන්නේ.

රින් ටින් ටින් (RIN TIN TIN)

රින් ටින් ටින් කියන්නේ ජර්මන් ෂෙපර්ඩ් වර්ගයට අයත් සුනඛයෙක්. මෙයාව පුරුදු පුහුණු කරලා තියෙන්නේ ලොස් ඇන්ජලිස්වලින් ආපු පළමු ලෝක යුද්ධයට සහභාගී වූ යුද විශේෂඥයෙකු වූ ලී ඩන්කන්. මුලින්ම ප්‍රංශයේ හිටපු රින් ටින් ටින්ව ඇමරිකාවට ගෙනාපු ඔහු, මෙයාට විවිධ උපක්‍රම පුරුදු පුහුණු කළා. ඔහුට අවශ්‍ය කළේ රින් ටින් ටින්  ඒ වන විට හොලිවුඩ්වල හිටපු තවත් සුනඛ නළුවකු වූ ජීන්ගේ අඩි පාරේ යනවා දකින්නටයි. අවසානයේ ඔහු සිතූ දෙයම වුණා. 1920 සහ 1930 කියන දශකවල රින් ටින් ටින් අතිශය ජනප්‍රියත්වයට පත් වුණා. රින් ටින් ටින් පෙනී සිටියේ වෝනර් බ්‍රදර්ස් සමාගමේ චිත්‍රපටවලට පමණක් වූ අතර ඒවායේ ආදායම් ඉපැයීම අදහා ගත නොහැකි තරම් ඉහළ ගියා. රින් ටින් ටින් විවිධ නම්වලින්, චිත්‍රපට ගණනාවකම පෙනී සිටියා. රින් ටින් ටින් වෙනුවෙන් වෙන් වූ ගුවන් විදුලි වැඩසටහනක් ද තිබුණා. කොහොම වුනත් ගුවන් විදුලි වැඩසටහනේ දී රින් ටින් ටින්ට කරන්න තිබුණේ බුරන එක සහ ගොරවන එක පමණයි. 1932 දී රින් ටින් ටින් මිය ගියා. රින් ටින් ටින්ගෙන් පස්සේ තවත් රින් ටින් ටින්ලා බොහොමයක් සිනමාවට එකතු වුණා. ඒ හැමෝම මුල් රින් ටින් ටින්ගේ දරු මුණුබුරෝ. රින් ටින් ටින් චිත්‍රපටවල පෙනී සිටි හොඳම කාලයේ සතියකට ඇමරිකානු ඩොලර් 6,000 ක ආදායමක් ලබා ගත් බව පැවසෙනවා. එය වර්තමානයට ගැළපුවොත් ඇමරිකානු ඩොලර් 78,000 කට වඩා වැඩි බවයි පැවසෙන්නේ.

කෙයිකෝ (KEIKO )

කෙයිකෝ කියන්නේ යෝධ ඩොල්ෆින් විශේෂයකට අයත් සතෙක්. 1993 තිරගත වූ ‛ෆ්‍රී විලී’ කියන චිත්‍රපටයෙන් ලෝක ප්‍රසිද්ධියට පත් වුණා. මේ චිත්‍රපටය නිසා කෙයිකෝ ඇමරිකානු ඩොලර් මිලියන 36ක් උපයා ගත් බව පැවසෙනවා. අයිස්ලන්තය ආශ්‍රිත මුහුදකින් කුඩා කාලයේ අල්ලා ගත් මේ ඩොල්ෆින් සත්වයාට මුලින්ම තබා තිබුණේ වෙනත් නම් වුවත් පසුව ‛වාසනාවන්තයා’, ‛ආශීර්වාද ලත් තැනැත්තා’ යන අරුතැති මෙම ජපන් නම යොදනු ලැබුවා. චිත්‍රපටයේ රඟපෑමෙන් පසු කෙයිකෝ මාළු අල්ලන්නට පුහුණු කරනු ලැබුවා. එසේ කළේ කෙයිකෝ ලවා ආදායමක් ලබා ගන්නට නොව ඌව නැවත මුහුදු ජීවිතයට පුරුදු කිරීමේ අරමුණින්. මුහුදු ජීවිතයට යළි පුරුදු කිරීම සඳහා අධික මුදලක් වැය කරන්නට සිදු වූ අතර 2003 වසරේ ඌ උපන් මුහුදු ප්‍රදේශයටම යලි නිදහස් කළත් වසරක් ගත වන්නටත් පෙර මිය ගියා.

බාර්ට් (BART )

බාර්ට් කියන්නේ කොඩියැක් කියන වර්ගයට අයත් යෝධ ඇලස්කානු දුඹුරු වලසෙක්. ‛ද බෙයර්’ කියන චිත්‍රපටය ඇතුළු තවත් හොලිවුඩ් චිත්‍රපට ගණනාවකම පෙනී සිටි නිසා ඌ ඉතා ප්‍රසිද්ධ හොලිවුඩ් වලස් නළුවෙක් බවට පත් වුණා. මේ චිත්‍රපටය ඇකඩමි සම්මානය සඳහා ද නිර්දේශ වුණා. එයට අමතරව බාර්ට් රංගනයෙන් දායක වූ අනෙකුත් චිත්‍රපට අතර ‛වයිට් ෆෑන්ග්’, ‛ලෙජන්ඩ් ඔෆ් ද ෆෝල්’ සහ ‛ද එජ්’ යන ඒවා බොහෝ දෙනෙකුගේ මතකයේ රැඳී තිබෙනවා. බාර්ට් ගේ චිත්‍රපට අතිශය ජනප්‍රියව තිබූ සමයේ උපයා ගත් ආදායම පමණක් ඇමරිකානු ඩොලර් මිලියන 6ක් පමණ වන බවයි පැවසෙන්නේ. 1977 දී උපන් බාර්ට් 2000 වසරේ දී පිළිකා රෝගයක් නිසා මිය ගියා. මිය යන කාලයේ බාර්ට්, ‛ග්‍රෝවින් අප් ග්‍රිස්ලි’ කියන වාර්තා චිත්‍රපටයේ වැඩ කටයුතු කරමින් සිටියා. මේ මරණයෙන් පසු චිත්‍රපටයේ ඉතිරි කොටස් සම්පූර්ණ කර ගැනීම සඳහා පෙනී සිටියේ බාර්ට් සමග ‛ලෙජන්ඩ්ස් ඔෆ් ද ෆෝල්ස්’ චිත්‍රපටයේ රඟ පෑ ‛ලිට්ල් බාර්ට්’ කියන වලසායි.

පැල් (PAL )

ඔබ ‛ලැසී’ කියන කියන සුනඛ චරිතය තියෙන රූපවාහිනී නාට්‍යවල හෝ චිත්‍රපටවලින් දැක ඇත්නම් මේ සුනඛයාව මතක ඇති. බැල්ලක් වූ පැල් උපන්නේ 1940 වසරේදියි. හොලිවුඩ්වල සතුන් පුහුණු කරන්නකු වූ රුඩ් වෙදර්වැක්ස්, පැල්ගේ දක්ෂතා හඳුනාගෙන ඌව පුහුණු කරන්නට පටන් ගත්තා. 1943 දී පැල්ට ‛ලැසී කම් හෝම්’ චිත්‍රපටයේ පෙනී සිටින්නට අවස්ථාව ලැබුණා. 1940 සහ 1950 දශකවල ඌ තවත් චිත්‍රපට ගණනාවකම රංගනයෙන් පෙනී සිටියා. ‛ලැසී’ කියන මාලා චිත්‍රපටයේ රඟපාන්නට ලැබුණේ 1954 වර්ෂයේ දියි. 1958 ජුනි මාසයේ දී පැල් මිය ගියා. පැල්ගේ හොඳම කාලයේ දී සතියකට ඇමරිකානු ඩොලර් 51,000 ක පමණ ආදායමක් ලැබූ බව පැවසෙනවා.

මූස් (MOOSE )

මූස් කියන්නේ තවත් සුනඛ නළුවෙක්. පාර්සන් රසල් ටෙරියර් කියන වර්ගයට අයත් මූස් උපන්නේ 1990 වසරේ දියි. මූස් ජනප්‍රියත්වයට පත් වූයේ ‛එඩී’ කියන අපූරු හැකියාවන්ගෙන් යුත් සුනඛයාගේ චරිතය ඇසුරින් නිර්මාණය කරන ලද රූපවාහිනී වැඩසටහන්වල ‛එඩී’ ලෙසින් පෙනී සිටීම නිසයි. 2006 දී සිදු වූ මූස්ගේ මරණයෙන් පසුව මූස්ගේ පුත්‍ර සුනඛයා වූ ‛එන්සෝ’ මේ වැඩසටහන සඳහා පෙනී සිටියා. මූස් රූපවාහිනි වැඩසටහන්වල පෙනී සිටි කාලයේ එක් වැඩසටහනක් වෙනුවෙන්  ලැබූ ආදායම ඇමරිකානු ඩොලර් 10,000 ක පමණ වූ බව පැවසෙනවා.

ටෙරී (TERRY )

ටෙරී කියන්නේ 1933 දී උපන් සුනඛ නළුවෙක්. බැල්ලක් වන ඌ ටෙරියර් කියන වර්ගයට අයත් වෙනවා. ඌ අතිශය ජනප්‍රියත්වයට පත් වුණේ ‛ද විසර්ඩ් ඔෆ් ඔස්’ චිත්‍රපටයේ ‛ටොටෝ’ ලෙස පෙනී සිටීමෙන් පසුවයි. විශ්ව සාහිත්‍ය කෘතියක් වන ‛ද විසර්ඩ් ඔෆ් ඔස්’ කියවා ඇත්නම් මේ චරිතය කුමක්දැයි ඔබට මතක් වන්නට ඇති. ‛ද විසර්ඩ් ඔෆ් ඔස්’ චිත්‍රපටයේ රඟපාද්දි සිදු වූ අනතුරකින් ටෙරීගේ කකුලක් කැඩුණා. එයින් සුව වීමෙන් පසු ටෙරී ට තවත් බොහෝ චිත්‍රපට ලැබෙන්නට පටන් ගත් අතර ‛බ්‍රයිට් අයිස්’, ‛ටෝර්ටිලා ෆ්ලැට්ස්’ ද ඇතුළුව තවත් ලෝක ප්‍රකට චිත්‍රපට 12 කට පමණ රංගනයෙන් දායකවී තිබෙනවා. ටෙරීගේ ජීවිත කතාව ඇතුළත් කෘතියක් ‛ඇන් ඔටෝබයොග්‍රුෆි ඔෆ් ටෙරී’ නමින් පළවී තිබෙන අතර එය ඇමසන් වෙබ් අඩවියේ වරින් වර අළෙවියට දමා තිබෙනු දකින්නට පුළුවන්.

හයිලන්ඩ් ඩේල් (Highland Dale)

1943 වසරේ උපන් හයිලන්ඩ් ඩේල් කියන්නේ ස්ටැලියන් වර්ගයට අයත් කලු අශ්වයෙක්. කලු අශ්වයෙක් වූ නිසාම ඌට ලෝක ප්‍රකට ‛බ්ලැක් බියුටි’ කියන වීර අශ්ව චරිතය ඇතුළත් චිත්‍රපටයට රංගනයෙන් දායක වන්නට අවස්ථාව හිමි වුණා. හයිලන්ඩ් ඩේල් පෙනී සිටි ‛ෆියුරි’ රූපවාහිනී කතා මාලාව ද අතිශය ජනප්‍රියත්වයට පත් වූවක් ලෙස සැලකෙනවා. ‛බ්ලැක් බියුටි’ චිත්‍රපටයේ රඟපෑමෙන් අතිශය ජනප්‍රියත්වයට පත් වූ නිසා පසු කාලයේ බොහෝ දෙනෙක් හයිලන්ඩ් ඩේල්ව ව හඳුන්වනු ලැබුවේ ‛බියුටි’ නමින්. 1972 වසරේ මිය යන විට ඌ චිත්‍රපට 8 ක පමණ රඟපා තිබුණු අතර සම්මාන තුනක් ද හිමි කරගැනීම විශේෂයෙන් සඳහන් කළ යුතුයි.

ගෝල්ඩන් ක්ලවුඩ් (Golden Cloud)

1934 උපන් ‛ගෝල්ඩන් ක්ලවුඩ්’ කියන්නේ අශ්ව නළුවෙක්. මුල් නම මෙය වුනත් සිනමා ලෝකයේ ප්‍රසිද්ධියට පත් වුණේ ‛ට්‍රිගර්’ නමින්. ගොපලු චිත්‍රපට සඳහා පෙනී සිටි, වේගයෙන් දිවිය හැකි, උඩින් පැනිය හැකි බොහෝ අශ්වයන් සිටියත් ට්‍රිගර්ගේ විශේෂත්වය වූයේ වාචික උපදෙස් පිළිපැදීමේ මනා හැකියාවත් තිබුණු නිසයි. සාමාන්‍යයෙන් අශ්වයන්ට වචනයෙන් ලබා දෙන උපදෙස් පිළිපදින්නට ඇති හැකියාව අඩුයි. එවැනි හැකියාවන් ඇති අශ්වයන් අප දකින්නේ චිත්‍රපටයක දර්ශනවල පමණයි. ඒ වගේම අනෙක් බොහෝ අශ්වයන්ට තිබුණාට වඩා අති විශේෂ හැකියාවන් රැසක් ට්‍රිගර්ට හිමිව තිබුණා. තම ස්වාමියාගේ දෑත් බැඳ ඇති අවස්ථාවක ඒවා ගලවා දමන්නට, පිටුපස කකුල්වලින් සිට ගන්නට, නටන්නට, මළාක් මෙන් සිටින්නට ආදී බොහෝ හැකියාවන් ට්‍රිගර්ට තිබුණා. චිත්‍රපට 13කට පමණ රංගනයෙන් දායක වූ ට්‍රිගර් 1965 දී මිය ගියා.