ලූවර් කෞතුකාගාරයේ නිර්භීත මංකොල්ලයක් ප්‍රංශය තිගැස්සවයි: යුරෝ මිලියන 88ක වටිනා ආභරණ සොරා ගනී

ගැලරී ඩ’ඇපලෝන්' (Galerie d’Apollon)

ප්‍රංශයේ අභිමානය වන, ලෝකයේ වැඩිම පිරිසක් නැරඹීමට යන ලූවර් කෞතුකාගාරය (Louvre), පසුගිය ඔක්තෝබර් 19 වැනි ඉරිදා දහවල් සිදුවූ අතිශයින් නිර්භීත මංකොල්ලයක දර්ශන තලයක් බවට පත්විය. වෙස්මුහුණු පැළඳි සොරුන් සිව් දෙනෙකු යුරෝ මිලියන 88කට ආසන්න වටිනාකමකින් යුත් රාජකීය ආභරණ තොගයක් රැගෙන පලා ගොස් තිබේ. කෞතුකාගාරයේ සුප්‍රසිද්ධ 'ගැලරී ඩ’ඇපලෝන්' (Galerie d’Apollon) ශාලාව තුළ සිදුවුණු මෙම මංකොල්ලය, මහජනතාව මෙන්ම සංස්කෘතික බලධාරීන් ද කම්පනයට පත් කර ඇති අතර, ලෝකයේ ඉතා විශේෂිත කෞතුකාගාරයක ආරක්ෂාවේ තිබූ බරපතල දුර්වලතා මේ සිදුවීමත් සමග කරළියට පැමිණ තිබේ.

කෞතුකාගාරයට ඇතුළුවීම සඳහා භාවිත කොට ඇත්තේ මේ හා සමාන එසැවුම් යන්ත්‍රයකි

ඔක්තෝබර් 19 වැනිදා උදෑසන 9:30ට පමණ, සොරුන් හතර දෙනා හයිඩ්‍රොලික් සෝපානයක් සවිකළ ට්‍රක් රථයකින් පැමිණ ඇති අතර, නඩත්තු සේවකයින් ලෙස පෙනී සිටීම සඳහා අධි-දෘශ්‍ය කබා (high-visibility vests) පැළඳ සිටියහ. මෙම සෝපානය භාවිතා කරමින් ඔවුහු සේන් (Seine) ගඟ දෙසට විවෘත වූ බැල්කනියේ කවුළුවක් වෙතට ළඟා වූහ. පසුව හෙළිදරව් වූයේ මෙම ප්‍රදේශය අවම නිරීක්ෂණ කැමරා ආවරණයක් සහිත කලාපයක් බවයි. විනාඩි කිහිපයක් ඇතුළත, ඔවුන් කාර්මික මෙවලම් භාවිතයෙන් වීදුරුව කපා, ශාලාවට ඇතුළු වී, ප්‍රදර්ශන කුටි දෙකක් බිඳ දමා, ඓතිහාසික ආභරණ එකතුවක් අත්පත් කරගෙන, පැරිස් වීදි ඔස්සේ යතුරුපැදිවලින් පලා ගොස් ඇත.

මාරියා අමලියා රැජිනගේ සහ හෝර්ටෙන්ස් රැජිනගේනීල මාණික්‍ය පලඳනා කට්ටලයේ කරාබු

සාක්ෂිකරුවන් සහ ආරක්ෂක කැමරා දර්ශනවලට අනුව, සමස්ත මෙහෙයුම සඳහා ගතව ඇත්තේ මිනිත්තු හතකට වඩා අඩු කාලයකි. කෞතුකාගාර ආරක්ෂකයින් එම ස්ථානයට ළඟා වන විටත් මංකොල්ලකරුවන් අතුරුදහන්ව ගොස් තිබූ අතර ඉතිරි ව තිබී ඇත්තේ කැඩුණු වීදුරු කැබලි සහ දැඩි කම්පනයක් පමණි "එය ඉතාමත් නිරවද්‍ය මෙහෙයුමක්. කොතැනට යා යුතුද සහ කුමක් ගත යුතුද කියා ඔවුන් හරියටම දැන සිටියා," යැයි ලූවර් ආරක්ෂක නිලධාරියෙක් ප්‍රංශ මාධ්‍ය වෙත ප්‍රකාශ කළේය.

නිල් මැණික් ඔටුන්න

සොරකම් කරන ලද භාණ්ඩ අතර මිල කළ නොහැකි රාජකීය හා අධිරාජ්‍ය ආභරණ විය; ඒ අතර, මාරි-ඇමලී බිසව (Queen Marie-Amélie) විසින් පැළඳ සිටි නිල් මැණික් ඔටුන්නක් (sapphire tiara), තෙවන නැපෝලියන්ගේ (Napoleon III) බිරිඳ වූ ඉයුජීනි අධිරාජිනියට (Empress Eugénie) අයත් අලංකාර ආභරණ සහ මාරි-ලුවී අධිරාජිනියගේ (Empress Marie-Louise) මරකත ආභරණ ද විය. එම එකතුවේම ඔටුන්නක් පසුව හානියට පත්ව, පලායාමේදී අතහැර දමා තිබියදී එම ප්‍රදේශයෙන් සොයා ගන්නා ලදී.

මාලයක්

ආභරණවල ඇස්තමේන්තුගත වටිනාකම අතිමහත් වුවද, විශේෂඥයන් පවසන්නේ සැබෑ පාඩුව ඇත්තේ ඒවායේ සංස්කෘතික හා ඓතිහාසික වැදගත්කම තුළ බවයි. "මේවා ප්‍රංශයේ රාජකීය අතීතයේ සංකේතයි – අපගේ ජාතික කතාවේ කොටස්," යැයි නීතිවේදියකු වන ලෝර් බෙක්යෝ (Laure Beccuau) අදහස් දැක්වීය. "ඒවා අතුරුදහන් වීම මූල්‍ය අපරාධයක් පමණක් නොව, අපගේ උරුමයට සිදුවූ කැළලක්."

මාරී ලුවී බිසවගේ මරකත (පලඳනා) කට්ටලයේ මාලය

ලූවර් අධ්‍යක්ෂ ලෝරන්ස් ඩෙස් කාර්ස් (Laurence des Cars) මෙම සිදුවීම "දරුණු අසාර්ථකත්වයක්" ලෙස හැඳින්වූ අතර, කෞතුකාගාරයේ ආරක්ෂක පද්ධති යල් පැන ගිය සහ ප්‍රමාණවත් නොවූ බව පිළිගත්තේය. සොරුන් භාවිත කළ බිත්තියට මුහුණලා තිබූ කැමරාවක් ඇතුල් වීමේ ස්ථානයෙන් ඈත් කර තිබූ බව වාර්තා වූ අතර, එය ව්‍යසනකාරී "අන්ධ" ස්ථානයක් නිර්මාණය කර ඇත. අනතුරු ඇඟවීමේ සීනු නාද වුවද, කාර්ය මණ්ඩලයට සොරුන් අල්ලා ගැනීමට තරම් වේගයෙන් ප්‍රතිචාර දැක්වීමට නොහැකි විය.

බිසෝවරු පළඳින ඔටුන්නක්

මෙම හෙළිදරව්ව ප්‍රංශ සංස්කෘතික බලධාරීන් අතර පුළුල් විවේචනයක් සහ ලැජ්ජාවක් ඇති කර තිබේ. මොනාලිසා සිතුවම සහ දස දහස් ගණනක් වටිනා වස්තු තැන්පත් කර ඇති, කලාකෘති බලකොටුවක් ලෙස සැලකෙන ලූවර් කෞතුකාගාරය ජාතික අභිමානයේ සංකේතයකි. මෙවැනි මංකොල්ලයක් දහවල් කාලයේ සිදුවිය හැකි බව බොහෝ දෙනාට සිතාගත නොහැකි විය. ප්‍රංශ සෙනෙට් සභිකයින් වසර ගණනාවක අඩු ආයෝජන සහ කාර්ය මණ්ඩල හිඟය උපුටා දක්වමින්, රට පුරා කෞතුකාගාර ආරක්ෂාව පිළිබඳ පුළුල් සමාලෝචනයක් සඳහා ඉල්ලා තිබේ.

ඉයුජිනී අධිරාජිනියගේ විශාල දියමන්ති (සළුවේ) බඳ පලඳනාව

විශ්ලේෂකයින් මෙම මංකොල්ලය විස්තර කරන්නේ වේගය, වෙස්වළාගැනීම සහ අධි-තාක්ෂණික මෙවලම් සම්මිශ්‍රණය කරන නව ආකාරයේ සංස්කෘතික අපරාධයක ලක්ෂණයක් ලෙසය. කාර්මික කැපුම් යන්ත්‍ර සහ ට්‍රක් රථයක සවිකරන ලද සෝපානයක් භාවිතය මඟින් සැලසුම් සහගත සූදානමක් සහ කෞතුකාගාරයේ දෛනික කටයුතු පිළිබඳ අභ්‍යන්තර දැනුමක් තිබූ බව සිතා ගත හැකිය. විමර්ශකයෝ පසුගිය දශක දෙක තුළ යුරෝපය පුරා ආභරණ සොරකම් මාලාවකට වගකිව යුතු "පින්ක් පැන්තර්" ජාලය වැනි සංවිධානාත්මක කණ්ඩායම් සමඟ ඇති විය හැකි සම්බන්ධතා ගවේෂණය කරමින් සිටිති.

ඉයුජිනී අධිරාජිනියගේ ඔටුන්නක්

කෙසේ වෙතත්, මෙහෙයුමේ පැහැදිලි නිරවද්‍යතාවය නොතකා, සොරුන්ට ඔවුන්ගේ සොරකම් කළ භාණ්ඩවලින් ලාභ ලැබීමට ඇත්තේ දුෂ්කර තත්ත්වයකි. ආභරණ අද්විතීය වන අතර පහසුවෙන් හඳුනාගත හැකිය, එමඟින් ඒවා කුඩා කොටස්වලට කඩා දැමීම හෝ උණු කිරීමකින් තොරව නැවත විකිණීම කිසිසේතම කළ නොහැක්කකි . එවැන්නක් සිදුවුවහොත්  ඒවායේ ඓතිහාසික වටිනාකම විනාශ වී යනු ඇත. "ඔවුන් සොරකම් කළේ ඉතිහාසයයි," ප්‍රංශ කලා ඉතිහාසඥ සෙසිල් ෆොන්ටේන් (Cécile Fontaine) පවසයි. "මේවා විනාශ කර දැමුවහොත්, එය ප්‍රංශයේ සංස්කෘතික මතකයේ කොටසක් මකා දැමීම හා සමාන වනු ඇත."

මාරී ලුවී බිසවගේ කරාබු කුට්ටමක්

ලූවර් කෞතුකාගාරය ඔක්තෝබර් 22 වන දින නැවතත් අමුත්තන් සඳහා විවෘත කරන ලද නමුත්, විමර්ශකයින් තම කටයුතු කරගෙන යන බැවින් ගැලරී ඩ’ඇපලෝන් ශාලාව තවමත් වසා දමා තිබේ. ප්‍රංශ රජය විසින් දැනටමත් නව කැමරා සවි කිරීම, සේන් ගඟ දිගේ වාහන ගමනාගමනය සීමා කිරීම සහ ජාතික පොලිසිය හා සංස්කෘතික ආරක්ෂණ ඒකක සමඟ සම්බන්ධීකරණය වැඩි දියුණු කිරීම ඇතුළු කෞතුකාගාර ආරක්ෂක පද්ධති ප්‍රතිසංස්කරණය කිරීමේ සැලසුම් නිවේදනය කර ඇත.

ප්‍රංශය සම්බන්ධයෙන් ගත් කල, මෙම සිදුවීම අපරාධ පරීක්ෂණයකට වඩා වැඩි යමක් බවට පත්ව තිබේ එය ජාතික ආත්ම-විමර්ශනයක මොහොතකි. වසරකට මිලියන නවයකට ආසන්න පිරිසක් පැමිණෙන එහි සංස්කෘතික අනන්‍යතාවයේ හදවත, මෙවැනි නිර්භීත අපරාධයකට ගොදුරු විය හැක්කේ කෙසේද? මංකොල්ලය මහජන ප්‍රවේශය සහ මිල කළ නොහැකි උරුමයන් ආරක්ෂා කිරීම අතර සමබරතාවය පිළිබඳ සංවාද නැවත කරළියට පැමිණ තිබේ.

අපරාධකරුවන් සොයා ගැනීම සඳහා වන සෙවීම් දිගටම සිදුවන අතර, එක් සත්‍යයක් පැහැදිලිය: ලූවර් මංකොල්ලය එහි සිනමාත්මක නිර්භීතකම නිසා පමණක් නොව, එය ඉතිහාසයේ භාරකාරත්වය පිළිබඳව නඟන අපහසු ප්‍රශ්න නිසාද මතකයේ රැඳෙනු ඇත. දිදුලන ආභරණ අටක් සොරකම් කිරීමෙන්, සොරුන් වඩා විශාල අවදානමක් හෙළිදරව් කර තිබේ. එනම් සංස්කෘතික නිධන් සැබවින්ම සුරක්ෂිත ය යන මුළාවයි.