කෙටල පටානෝ නිතරම උඩ යට යානෝ

කැලණි ගඟානෝ නිතරම වතුර ගලානෝ
කෙටල පටානෝ නිතරම උඩ යට යානෝ 

මේක ජන කවියක්. මේ ගැන කියන්න හොඳම කාලය තමයි මේ. 

රජයක් අවසන් වෙලා අලුත් රජයක් පත්වෙලා තව වැඩි දවසක් නැහැ. රජයක් වෙනස් වෙනවා කියන්නේ බලයේ වෙනස්වීමක් ද සිදුවෙනවා කියන එකයි. පසුගිය රජය කාලේ හිටපු ජනපතිවරයාගේ සිට ඇමතිලා සහ මන්ත්‍රීවරයා දක්වා සියලු දෙනාගේම බලය පහළ ගිහින් තියෙනවා. ජනපතිවරයාගේ බලය පහළ යනකොට ඔහු වටා සිටි ඇමතිවරුන්ගේ බලය පහළ යනවා. ඒ ඇමති වටේ ඉන්න මන්ත්‍රීවරුන්ගේ බලය පහළ යනවා. ඒ මන්ත්‍රීවරුන්ගේ හෙංචයියලාගේ බලයත් පහළ යනවා. 

ඒ වගේම අලුත් ජනපතිවරයා සහ අගමැතිවරයාගේ බලය ඉහළ ගිහින් තියෙනවා. ඒ නිසා අලුත් ඇමතිවරු පත්වෙලා ඉන්නවා. ඔවුන්ගේ බලය දැන් වැඩියි. දැනට මාසෙකට විතර කලින් ඔවුන්ට ලොකු බලයක් තිබුණේ නැහැ. දැන් ඔවුන් වටා ඉන්න අයගේ බලය ද ඉහළ ගිහින් තියෙනවා. 

මේක තමයි ලෝකයේ හැමදාම, හැමතැනම සිද්ද වුණේ. ඉදිරියේදී සිද්ද වෙන්නෙත් ඒකම තමයි. 

මේ ජනකවිය අපට මතක් කර දෙන්නෙත් ඒ ධර්මතාවයම තමයි. අපි බලමු දැන් ඒ කවියෙන් කියැවෙන්නේ මොකකද් කියලා. 

කැලණි ගඟානෝ නිතරම වතුර ගලානෝ 

ඒ කියන්නේ කැලණි ගඟ ගංවතුර වැනි තත්වයන් නිසා නිතරම වතුර පිටාර මට්ටමේ තියෙන්නේ. ඇතැම් වෙලාවට පිටාර යනවා. 

කෙටල පටානෝ නිතර උඩයට යානෝ 

ගංගාවල කෙටල ගස් තියෙනවා. කැලණි ගඟෙත් තියෙනවා. ‛කෙටල පටානෝ’ කියන්නේ කෙටල කොලවලට. කැලණි ගඟේ වතුර මට්ටම ඉහළ යනකොට කෙටල කොල ඉහළ යනවා. වතුර පහළ යන කාලෙට කෙටල කොල පහළ යනවා. 

ප්‍රබලයා (කැලණි ගඟ) ඉහළ යනකොට ඒ අවට සිටින දුබලයාගේ (කෙටල) බලය ද ඉහළ යනවා. 

ප්‍රබලයාගේ බලය පහළ යනකොට දුබලයාගේ බලයත් පහළ යනවා.
අපි හැමදාම දකින්නේ මේ ධර්මතාවය තමයි. 

මේ ගැන තවත් අදහසක්

"කැලණිගඟානෝ" කවියෙන් කියැවෙන්නේ ලිංගික සූරාකෑමක් ගැනද?